2. Ɛbɛ wɛɛ nɛ pɩlakɩ ɛjaɖɛ yɔɔ kpaɣnɩ pɩnaɣ 1914?

Yesu tɔmkpɛlɩkɩyaa pɔzɩ-ɩ se: «Heyi-ɖʋ nɛ ɖɩnɩɩ, ɛzɩmtaa pɩkaɣ labʋ mbʋ, nɛ ɛbɛ kaɣ kɛʋ ñɛ-wɛʋ alɩwaatʋ nɛ ɛjaɖɛ tɛm alɩwaatʋ yʋsaɣ?» (Maatiyee 24:3) Yesu cosaɣ-wɛ lɛ, ɛyɔɔdɩ wɛtʋ ndɩ ndɩ ndʋ tɩkaɣ wɛʋ ɛjaɖɛ yɔɔ alɩwaatʋ ndʋ ɛpaɣzɩɣ kewiyitu tɔɔʋ ɛsɔdaa yɔ tɩ-tɔm. Wɛtʋ ndʋ tɩ-taa natʋyʋ lɛ, yoŋ, ñɔɔsɩ nɛ tɛtʋ ñamsʋʋ. (Kalɩ Maatiyee 24:7.) Bibl kaayɔɔdaa ɖɔɖɔ se ɛyaa kaɣ yebu nɛ «kɛdɛzaɣ kɩyakɩŋ» kɛ alɩwaatʋ ndʋ «tɩ-lʋbɩnʋʋ [wɛɣ] kaɖɛ» yɔ. (2 Timootee 3:1-5) Wɛtʋ ndʋ tɩpaɣzɩ tɔyʋʋ kpaɣnɩ pɩnaɣ 1914.

3. Ɛbɛ yɔɔ ɛjaɖɛ wɛɛkɩ kpem kpaɣnɩ alɩwaatʋ ndʋ Ɛsɔ Kewiyaɣ paɣzɩ ka-tʋmɩyɛ yɔ?

Yesu paɣzɩ kewiyitu tɔɔʋ nɛ pɩla pazɩ lɛ, eyooni Sataŋ nɛ aleewaa ɛsɔdaa; nɛ pawa Sataŋ you ŋgʋ kɩ-taa. Bibl yɔɔdʋʋ se «pɔlɔ-ɩ tɛtʋ yɔɔ, nɛ pɛkpɛndɩ ɛ nɛ e-tiyiyaa nɛ pɔlɔ.» (Natʋ 12:9, 10, 12) Sataŋ kɔ pana siŋŋ mbʋ pʋyɔɔ yɔ ɛnawa se pakaɣ-ɩ ɖɩzʋʋ. Pʋyɔɔ ɛkɔŋnɩ wɩzasɩ nɛ kʋñɔmɩŋ ɛjaɖɛ kpeekpe yɔɔ. Ye mbʋ ɖɩnɩɣ mbʋ pʋyɔɔ ɛjaɖɛ yɔɔ wɛtʋ wɛɛkɩ siŋŋ yɔ pɩ-taa. Ɛsɔ Kewiyaɣ kaɣ ñɔɔzʋʋ mbʋ payɩ pɩwɛɛkaa yɔ.