MWBR19 08 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
5-11 AOÛT
ÑƖM MBƲ PƖWƐ ƐSƆTƆM TAA YƆ | 2 TIMOOTEE 1-4
“Pɩtɩkɛ sɔɔndʋ fezuu Ɛsɔ ha-ɖʋ”
(2 Timootee 1:7) Mbʋ pʋyɔɔ yɔ pɩtɩkɛ sɔɔndʋ fezuu Ɛsɔ ha-ɖʋ, ɛlɛ ɛha-ɖʋ ɖoŋ nɛ sɔɔlɩm nɛ maɣzɩm mbʋ pɩmʋnaa yɔ pi-fezuu na.
w09 15/5 15 § 9
Evebiya nɛ pɛlaa—Iyele nɛ pɩna kaɣlaa se ɩwɛɛ nɛ ɩɖɛɣnɩ ɛsɩndaa fezuu taa
9 Pɩsa nɛ Pɔɔlɩ sɩnɩ Timootee lɛ, ɛtɔzɩ-ɩ se: “Pɩtɩkɛ sɔɔndʋ fezuu Ɛsɔ ha-ɖʋ, ɛlɛ ɛha-ɖʋ ɖoŋ nɛ sɔɔlɩm nɛ maɣzɩm mbʋ pɩmʋnaa yɔ pi-fezuu na.” (2 Timootee 1:7) Ye pɔtɔma se ɛyʋ ɛwɛɛnɩ “maɣzɩm mbʋ pɩmʋnaa yɔ”, pɩwɩlɩɣ se ɛyʋ ɛnʋ ɛmaɣzɩ ɛ-ñʋʋ taa nɛ ɛcɔnɩ tɔm natʋyʋ ɖeɖe nɛ lɛɣtʋ. Pɩwɩlɩɣ ɖɔɖɔ se ɛyʋ ɛnʋ etisi wɛtʋ natʋyʋ yɔɔ paa tɩɩlakɩ nɔɔ kʋɖʋmaɣ nɛ ɛ-sɔɔlɩm yɔ. Pɛlaa nɛ evebiya mba patɩpɩɩ fezuu taa yɔ, pa-taa nabɛyɛ wɛnɩ sɔɔndʋ fezuu nɛ alɩwaatʋ ndʋ pakatɩɣ wɛtʋ kaɖɛ ñɩndʋ ndʋ tɩhaɣ-wɛ nɩɣzɛ yɔ, patɩŋɩɣnɩ ɖom yaa teelee cɔnʋʋ kadadayaɣ, tabakʋʋyaɣ yaa sʋlʋm ñɔtʋ kadadayaɣ, kazandʋ ndʋ tɩ-taa pɛɖɛlɛsɩɣ niye yɔ, yaa kʋzʋʋ kɩdɛkɛdʋʋ wezuu caɣʋ yɔɔ se palʋbɩnɩ-tʋ. Papaɣ Krɩstʋ mba se ‘pekizi kaañamtʋ wɛnʋʋ Ɛsɔ yɔɔ nɛ ɛjaɖɛ kɔɖɛyɩ, nɛ pacaɣ wezuu nɛ maɣzɩm mbʋ pɩmʋnaa yɔ nɛ siɣsiɣ wɛtʋ nɛ Ɛsɔ ñɔnʋʋ ɛjaɖɛ yɔɔ ɖʋtʋ tʋnɛ tɩ-taa.’—Tiiti 2:12.
(2 Timootee 1:8) Pʋyɔɔ lɛ, fɛyɛ ɛtaakpa-ŋ nɛ aseɣɖe lɩzʋʋ ɖa-Kɩbaɣlʋ yɔɔ yaa ma weyi mɛnkɛ salaka tʋ ɛ-yɔɔ yɔ mɔ-yɔɔ, ɛlɛ tisi nɛ ŋtɔɔ kʋñɔŋ kaɖɛ taa tɔm kɩbandʋ yɔɔ pɩtɩŋnɩ Ɛsɔ ɖoŋ yɔɔ.
w03 1/3 9 § 7
Wɛɛ abalɩtʋ nɛ ŋkpa ɖoŋ!
7 Pɔɔlɩ ma Timootee takayaɣ nɛ eheyi-i se “pɩtɩkɛ sɔɔndʋ fezuu Ɛsɔ ha-ɖʋ, ɛlɛ ɛha-ɖʋ ɖoŋ . . . fezuu na. Pʋyɔɔ lɛ, fɛyɛ ɛtaakpa-ŋ nɛ aseɣɖe lɩzʋʋ ɖa-Kɩbaɣlʋ yɔɔ.” (2 Timootee 1:7, 8; Maarkɩ 8:38) Ye ɖɩkalɩ tɔm tʋnɛ yɔ, pɩmʋnaa se ɖɩpɔzɩ ɖa-tɩ se fɛyɛ kpaɣ-m nɛ men-tisuu na? Yaa mɛwɛ abalɩtʋ? Mba pɔcɔ-m nɛ pata man-tʋmɩyɛ taa yaa mon-sukuli taa yɔ, pasɩmɩ-m se mɛnkɛ Yehowa Aseɣɖe Tʋ na yaa mɛmɛsɩɣ man-tɩ? Fɛyɛ kpaɣ-m mbʋ pʋyɔɔ yɔ mɛwɛ ndɩ nɛ lalaa na? Yaa man-taa lakɩ leleŋ nɛ taabalɩyɛ nɖɩ ɖɩwɛ ma nɛ Yehowa ɖɛ-hɛkʋ taa yɔ, nɛ malɩzɩɣ man-tɩ nɛ mawɩlɩɣ se mɛnkɛ Aseɣɖe Tʋ na? Ye nɔɔyʋ ɛwɛnɩ lɩmaɣza kɩdɛkɛda tɔm kɩbandʋ susuu yɔɔ yaa ɛmaɣzɩɣ se tɔm susuu yɔɔ lɛ, ɛyaa pɩzɩɣ nɛ pɛwɛɛnɩ lɩmaɣza wɛna atɩmʋna yɔ ɛ-yɔɔ yɔ, pɩwɛɣ ɖeu se ɛtɔzɩ lɔŋ weyi Yehowa tasɩ Yozuwee yɔ, ɩ-yɔɔ: “Kpa ɖoŋ nɛ ŋɖɔkɩ kpam.” Taasɔɔ kaaʋ se lɩmaɣza wena Yehowa nɛ Yesu Krɩstʋ pɛwɛnɩ ñɔ-yɔɔ yɔ a-tɔm cɛyɩna nɛ pɩkɩlɩ wena ña-tʋmɩyɛ taa taabalaa yaa ño-sukuli taa taabalaa wɛnɩ ñɔ-yɔɔ yɔ.—Galaatii mba 1:10.
Ðɩñɩnɩ fezuu taa ñɩm
(2 Timootee 2:3, 4) Ɛzɩ Krɩstʋ Yesu sɔɔja kɩbanʋ yɔ, tisi nɛ ŋtɔɔ kʋñɔŋ kaɖɛ taa. 4 Ɛyʋ weyi ɛkɛ sɔɔja yɔ, ɛɛɖʋʋ ɛ-nɔɔ wezuu caɣʋ taa tadɩyɛ labʋ taa, se pɩsa nɛ ɛ-tɔm kɛdɩnɩ weyi ɛmʋ-ɩ sɔɔjatʋ yɔ.
Ñɩnɩ ñɩm mbʋ pɩkɛ ñɩm siŋŋ yɔ
13 Timootee kaawɛnɩ ɖɔɖɔ tisuu siŋŋ. Pɔɔlɩ ya Timootee se “Yesu Krɩstʋ sɔɔja” nɛ pɩtɛ lɛ, eheyi-i se: “La tʋmɩyɛ ɛzɩ Yesu Krɩstʋ sɔɔja yɔ. Sɔɔjatʋ tʋmɩyɛ taa lɛ, nɔɔyʋ ɛɛsʋzʋʋ ɛ-tɩ ɛjaɖɛ yɔɔ tɔm taa, ye e-liu ɛsɔɔlaa se eɖeni weyi ɛmʋ-ɩ tʋmɩyɛ taa yɔ yɔ.” (2 Tim. 2:3, 4) Sɔnɔ, alɩwaatʋ tɩŋa Ɛsɔ sɛtʋ tʋmlaɖaa mba pɛcɛzɩ miiliyɔɔ kʋɖʋmʋʋ yɔ nɛ Yesu wayɩ tɩŋɩyaa lalaa pɛwɛɛ nɛ pɔɖɔŋ Pɔɔlɩ lɔŋ tasʋʋ pʋnɛ pɩ-yɔɔ. Pañakɩ pana se ɛjaɖɛ ɖɩnɛ ɖɩtaawɛɛnɩ ɖoŋ pɔ-yɔɔ nɛ pɔtɔzʋʋ Bibl paɣtʋ kiɖe ɖɩnɛ ɖɩ-yɔɔ paa ɛzɩmtaa: “Weyi pakɩndɩɣ-ɩ yɔ, ɛpɩsɩ weyi ɛkɩndɩ-ɩ yɔ e-yom.” (Adu. 22:7) Nabʋyʋ ɛɛhaɣ Sataŋ taa leleŋ nɛ pɩkɩlɩ se ɖɩkpaɣ ɖa-alɩwaatʋ nɛ ɖo-ɖoŋ kpeekpe nɛ ɖɩlabɩnɩ tadɩyɛ. Ɛlɛ ye ɖɩtɩtɩlɩ lɩmaɣza naayɛ kpaɣʋ yɔ, ɖɩpɩsɩɣ kɩmtɔɔyaa pɩnzɩ sakɩyɛ. Ye ɖɩtɔɔ kɩma sɔsɔna nɛ ɖɩla haya ɖamɩŋ sɔsɔŋ, yaa ɖɩhɛyɩ sukuli yɔɔ, yaa ɖɩya lɔɔɖa wena awɛ liidiye pɩdɩɩfɛyɩ yɔ, yaa ɖɩla nesi ɖɔkʋʋ mbʋ pɩmʋʋ liidiye kadadayaɣ yɔ, pɩpɩzɩɣ nɛ pɩkɔnɩ-ɖʋ kaɖɛ. Ye ɖɩcakɩ wezuu kɛlɛʋ, ɖɩñakɩ pana se ɖɩtaatɔkɩ kɩma sɔsɔna nɛ ɖɩɩwɛɛkɩɣ ɖe-liidiye yɔ, pɩsɩɣnɩ-ɖʋ nɛ ɖɩha ɖa-tɩ faaa nɛ ɖɩpɩsɩ Ɛsɔ yomaa. Pʋbʋ lɛ ɖɩwɩlɩɣ ɖɔɖɔ se ɖɩwɛnɩ lɔŋsɩnɖɛ.—1 Tim. 6:10.
(2 Timootee 2:23) Pɩtasɩ lɛ, kizi kɩmɛlɛndʋ nɛ kɩɩsɩŋɩyɩtʋ tɔm hɔm, ŋsɩm mbʋ se pɩkɔŋnɩ yoŋ.
w14 15/7 14 § 10
Yehowa samaɣ ‘seɣ kɩdɛkɛdɩm’
10 Sɔnɔ tisuu yebiyaa tɩtɔyɩ Yehowa samaɣ taa. Ɛlɛ ye pɩlaba se ɖɩkatɩ wɩlɩtʋ ndʋ tɩfɛyɩ Bibl taa yɔ, paa pɩtɩɩkɛ le tɩlɩnaa yɔ, pɩwɛɛ se ɖikizi-tʋ kpaagbaa. Pɩɩkɛɣnɩ lɔŋsɩnɖɛ se ɖa nɛ tisuu yebiyaa ɖɩcaɣ nɛ ɖɩhɔŋ tɔm, se ɖicosi tɔm ndʋ pamaɣ intɛrnɛɛtɩ yɔɔ yɔ tɩ-yɔɔ, yaa se ɖɩtɩŋnɩ nʋmɔŋ lɛɛŋ yɔɔ nɛ ɖɩyɔɔdɩnɩ-wɛ. Paa ɖa-lɩmaɣzɩyɛ ɛkɛnaa se ɖɩsɩnɩ-wɛ yɔ, pɩwɛɛ se ɖɩnɩɩ pɩ-taa se faawɩyɛ ŋgʋ kɩ-labʋ kaɖɩɣnɩ Bibl wɩlɩtʋ ndʋ tɩ-taa ɖɩtɛm tazʋʋ nɛ pɩɖɛɛ yɔ. Ða Yehowa samaɣ lɛ, ɖɩtɩkatɩ tisuu yebiyaa paa ññɩɩ, nɛ ɖiseɣ-wɛ kiseu.
Bibl kalʋʋ
(2 Timootee 1:1-18) Ma Pɔɔlɩ, Krɩstʋ Yesu tɛ apostoloo pɩtɩŋnɩ Ɛsɔ sɔɔlɩm yɔɔ, ɛzɩ wezuu lidaʋ ŋgʋ pɩtɩŋnɩ Krɩstʋ Yesu yɔɔ nɛ kɩwɛɛ yɔ kɩpɔzʋʋ yɔ, 2 mamaɣnɩ takayaɣ kanɛ Timootee, man-pɩɣa kʋsɔɔlaɣ: Tɛtɛ nɛ ŋhiɣ lootiye, pʋtɔdɩyɛ naʋ, nɛ laŋhɛzɩyɛ nɖɩ ɖɩlɩnɩ Caa Ɛsɔ nɛ ɖa-Kɩbaɣlʋ Krɩstʋ Yesu pɔ-cɔlɔ yɔ. 3 Mɛwɛnɩ ɛsɩmɩyɛ Ɛsɔ yɔɔ, ɛnʋ weyi malakɩ-ɩ tʋmɩyɛ kiɖeɖee nɛ ɛhʋyɛ kele kele ñɩnɖɛ ɛzɩ mɔn-cɔzɔnaa kaalabʋ yɔ, nɛ maayeki ñɔ-yɔɔ tɔzʋʋ kpa alɩwaatʋ ndʋ mentendiɣ Ɛsɔ ɖoo nɛ wɩsɩ yɔ. 4 Alɩwaatʋ ndʋ mɔntɔzʋʋ ñɛ-ɛsɩtɛɣlɩm yɔɔ yɔ, me-liu wɛɛ pɩŋŋ se mana-ŋ, nɛ taa leleŋ pɩzɩ nɛ isu man-taa. 5 Mbʋ pʋyɔɔ yɔ, mɔntɔzʋʋ ñe-tisuu mbʋ pɩ-taa fɛyɩ pɩ-tɛɛ nɛ pɩ-yɔɔ lakasɩ yɔ pɩ-yɔɔ, mbʋ pɩcalɩ wɛʋ ñe-neze Loyiisi nɛ ño-ɖoo Eniisi pa-taa yɔ, nɛ maapɩtɩɣ se pɩwɛ ña-taa ɖɔɖɔ. 6 Pʋyɔɔ lɛ, mantɩnɩ me-nesi ñɔ-yɔɔ nɛ Ɛsɔ kʋjɔʋ ŋgʋ kɩwɛɛ ña-taa yɔ, mɔntɔzʋʋ-ŋ se ŋkpazɩ-kʋ ɖoŋ ɛzɩ petikuu miŋ yɔ. 7 Mbʋ pʋyɔɔ yɔ pɩtɩkɛ sɔɔndʋ fezuu Ɛsɔ ha-ɖʋ, ɛlɛ ɛha-ɖʋ ɖoŋ nɛ sɔɔlɩm nɛ maɣzɩm mbʋ pɩmʋnaa yɔ pi-fezuu na. 8 Pʋyɔɔ lɛ, fɛyɛ ɛtaakpa-ŋ nɛ aseɣɖe lɩzʋʋ ɖa-Kɩbaɣlʋ yɔɔ yaa ma weyi mɛnkɛ salaka tʋ ɛ-yɔɔ yɔ mɔ-yɔɔ, ɛlɛ tisi nɛ ŋtɔɔ kʋñɔŋ kaɖɛ taa tɔm kɩbandʋ yɔɔ pɩtɩŋnɩ Ɛsɔ ɖoŋ yɔɔ. 9 Ɛyabɩ ɖa-ñʋʋ nɛ ɛyaa-ɖʋ nɛ yatʋ kiɖeɖetu, pɩtɩkɛ ɖa-tʋma yɔɔ ɛlabɩ mbʋ, ɛlɛ ɛlabɩ mbʋ ɛ-maɣmaɣ ɛ-kaɖʋwa nɛ e-lootiye pɔ-yɔɔ. Ɛlabɩ-ɖʋ lootiye nɖɩ Krɩstʋ Yesu taa ɖooo lɔŋ, 10 ɛlɛ lɛɛlɛɛyɔ lɛ, palɩzɩ-ɖɩ nɛ pawɩlɩ kpayɩ kpayɩ pɩtɩŋnɩ ɖa-Ñʋʋ Yaɖʋ Krɩstʋ Yesu yɔɔ kuluu yɔɔ, ɛnʋ weyi ɛɖɩzɩ sɩm nɛ eyele nɛ ñalɩmɩyɛ ñandɩ wezuu nɛ mbʋ pɩɩɖazɩɣ yɔ pɩ-yɔɔ pɩtɩŋnɩ tɔm kɩbandʋ yɔɔ, 11 ndʋ tɩ-yɔɔ palɩzɩ-m se mɛnkɛ tɔm susuyu nɛ apostoloo nɛ wɩlɩyʋ yɔ. 12 Pʋyɔɔ ɖɔɖɔ mɔntɔkɩ kʋñɔmɩŋ ɛnɩ, ɛlɛ fɛyɛ ɛɛkpaɣ-m. Mbʋ pʋyɔɔ yɔ mansɩm Weyi ɛ-yɔɔ mentisaa yɔ, nɛ mantaɣ liu se ɛpɩzɩɣ nɛ ɛkandɩyɩ mbʋ manɖʋzɩ e-nesi tɛɛ yɔ pɩ-yɔɔ, pɩkɔɔ pɩtalɩ kɩyakʋ ŋgʋ ki-wiye. 13 Wolo pɩ-yɔɔ nɛ ŋɖɔkɩ tɔm kɩbandʋ kɩɖaʋ, ndʋ ŋnɩ mɔn-cɔlɔ yɔ, nɛ tisuu nɛ sɔɔlɩm mbʋ pɩlɩnɩ nɔɔ kʋɖʋmaɣ labʋ nɛ Krɩstʋ Yesu taa yɔ. 14 Pʋyʋ kɩbanʋ weyi paɖʋzɩ ñe-nesi tɛɛ pɩtɩŋnɩ fezuu kiɖeɖeu, ŋgʋ kɩwɛ ɖa-taa yɔ kɩ-yɔɔ yɔ, ɖɔkɩ-ɩ kpam. 15 Ŋsɩm mbʋ se mba payɩ pɛwɛ Aazii egeetiye taa yɔ, paha-m siɣye, pa-taa kɛlɛ Fiijɛɛlɩ nɛ Ɛrmoojɛɛnɩ. 16 Tɛtɛ nɛ Kɩbaɣlʋ na Onezifɔɔrɩ ɖɩɣa taa mba pʋtɔdɩyɛ, mbʋ pʋyɔɔ yɔ ɛhɛzaɣ ma-laŋɩyɛ ɖoŋ ɖoŋ, nɛ fɛyɛ tɩkpa-ɩ nɛ man-salaka kpasɩ. 17 Ɛlɛ alɩwaatʋ ndʋ ɛkɔm Room yɔ, ɛñɩnɩ-m siŋŋ nɛ ɛna-m. 18 Tɛtɛ nɛ Kɩbaɣlʋ yele nɛ ehiɣ pʋtɔdɩyɛ naʋ Yehowa cɔlɔ kɩyakʋ ŋgʋ ki-wiye. Nɛ ŋsɩm tʋma wena payɩ ɛlabɩ Efɛɛzɩ taa yɔ camɩyɛ.
12-18 AOÛT
ÑƖM MBƲ PƖWƐ ƐSƆTƆM TAA YƆ | TIITI 1– FILEEMƆƆ
‘Sɩɩ ɛzʋtʋyaa’
(Tiiti 1:5-9) Meyebi-ŋ Krɛɛtɩ se ŋñɔɔzɩ mbʋ pɩtɩtʋʋzɩ yɔ nɛ ŋsɩɩ ɛzʋtʋyaa tɛtʋ sɔsɔtʋ ndɩ ndɩ taa, ɛzɩ maaɖʋʋ-ŋ paɣtʋ yɔ: 6 pɩwɛɛ se ɛzʋtʋyʋ ɛkɛ weyi ɛfɛyɩnɩ kɩwɛɛkɩtʋ natʋyʋ yɔ, ɛkɛ halʋ kʋɖʋm walʋ, ɛwɛɛnɩ piya nzɩ sɩwɛnɩ tisuu nɛ paayɔɔdʋʋ sɩ-tɔm se sɩcakɩ wezuu kɩdɛkɛdʋʋ yaa sɩlakɩ ñʋʋ taa ɖoŋ yɔ. 7 Mbʋ pʋyɔɔ yɔ ɛzɩ Ɛsɔ tɛ wondu yɔɔ cɔnɩyʋ yɔ, pɩwɛɛ se ɛgbɛyɛ yɔɔ cɔnɩyʋ ɛtaawɛɛnɩ kɩwɛɛkɩtʋ natʋyʋ, ɛtaakɛ ñʋʋ taa ɖoŋ tʋ, ɛtaamʋʋ pana lɛɛ lɛɛ, ɛtaakɛ sʋlʋm kpaŋɩyʋ, ɛtaawɛɛ puuyaɣ, ɛtaasɔɔlɩ mulum kɛzɛɣa, 8 ɛlɛ ɛsɔɔlɩ ɛyaa mʋʋ, ɛkɛ kɩbandʋ sɔɔlɩyʋ, ɛwɛɛnɩ maɣzɩm mbʋ pɩmʋnaa yɔ, ɛwɛɛ siɣsiɣ, ɛwɛɛ toovenim, ɛtɩlɩ ɛ-tɩ ɖɔkʋʋ, 9 ɛñɔɔnɩ siɣsiɣ tɔm kpam ɛ-tɔm wɩlʋʋ lɛɣtʋ taa, se pɩsa nɛ ɛtɩŋnɩ wɩlɩtʋ kɩbandʋ yɔɔ nɛ ɛpɩzɩ ɛkpazɩ lalaa ɖoŋ nɛ ekizini tɔm mba pakaɖɩɣnɩ wɩlɩtʋ kɩbandʋ ndʋ yɔ.
w14 15/11 28-29
Tɔm ndʋ ɖa-takayɩsɩ kalɩyaa pɔzʋʋ yɔ
Paa Masɩ ɩtɩlɩzɩ pɩ-taa kpayɩ kpayɩ ɛzɩma pasɩɣaɣ ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa kajalaɣ pɩnzɩ mɩnʋʋ taa yɔ, ɖɩyʋsɩ nʋmɔŋ nɩɩyɩ weyi ɩ-yɔɔ patɩŋaɣnaa nɛ palakɩ mbʋ yɔ. Bibl heyiɣ-ɖʋ se alɩwaatʋ ndʋ Pɔɔlɩ nɛ Barnaabaasɩ palɩnɩ pa-kajalaɣ Ɛsɔtɔm tiyiyaa tʋmɩyɛ taa nɛ pekpeŋ lɛ, ‘pasɩ ɛzʋtʋyaa paa ɛgbɛyɛ nɖɩ lɛ ɖɩ-taa, patɩmaa nɛ pɔhɔkɩ nɔɔ, nɛ paɖʋzɩ-wɛ Yehowa nesi tɛɛ, ɛnʋ weyi petisi ɛ-yɔɔ yɔ.’ (Tʋma 14:23) Pɩnzɩ sakɩyɛ wayɩ, Pɔɔlɩ ma takayaɣ Tiiti weyi ɛ nɛ ɩ patɩɩɖɔŋ nʋmɔʋ yɔ nɛ eheyi-i se: “Meyebi-ŋ Krɛɛtɩ se ŋñɔɔzɩ mbʋ pɩtɩtʋʋzɩ yɔ nɛ ŋsɩɩ ɛzʋtʋyaa tɛtʋ sɔsɔtʋ ndɩ ndɩ taa, ɛzɩ maaɖʋʋ-ŋ paɣtʋ yɔ.” (Tiiti 1:5) Paha waɖɛ kʋɖʋmɖɩyɛ nɖɩ ɖɔɖɔ Timootee weyi ɛ nɛ apostoloo Pɔɔlɩ pɔɖɔm nʋmɔŋ sakɩyɛ yɔ. (1 Tim. 5:22) Pɩnaɣ kpayɩ kpayɩ se ɛgbɛyɛ yɔɔ cɔnɩyaa nʋmɔɖɔnaa kaawɛnɩnɩ waɖɛ se pasɩɩ ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa, pɩtɩkɛ apostoloowaa nɛ ɛzʋtʋyaa mba paawɛ Yeruzalɛm yɔ mba lakaɣnɩ tʋmɩyɛ nɖɩ.
Bibl taa lɩmaɣza ana, a-yɔɔ Yehowa Aseɣɖe Tɩnaa tɛ Nɔɔɖɛyaa ɛgbɛyɛ labɩ lɛɣzɩtʋ ɛzɩma pɩwɛɛ se pasɩɩ ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa yɔ. Kpaɣnɩ 1er septembre 2014 lɛ, nʋmɔʋ kʋnɛ kɩ-yɔɔ patɩŋɩɣna nɛ pasɩɣ ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa agbaa taa: Paa egeetiye yɔɔ cɔnɩyʋ weyi lɛ, ɛtazɩɣ mba pɔ-tɔm peheyi-i e-egeetiye taa se papɩzɩɣ nɛ pɛkɛ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa yɔ pɛ-wɛtʋ taa camɩyɛ. Alɩwaatʋ ndʋ ekilimiɣ agbaa ana a-yɔɔ yɔ, ɛñakɩ pana nɛ ɛtɩlɩ mba pɔ-tɔm peheyi-i yɔ, nɛ ye pɩsaŋ yɔ, ɛ nɛ wɛ pala tʋmɩyɛ tɔm susuu taa. Ɛ nɛ ɛgbɛyɛ nɖɩ ɖɩ-yɔɔ ekilimiɣ yɔ ɖɩ-taa ɛzʋtʋyaa patazɩɣ mba pacaɣ sɩʋ yɔ pɛ-wɛtʋ taa nɛ pɩtɛ lɛ, ɛwɛnɩ waɖɛ se ɛsɩɩ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa e-egeetiye taa. Pɩtɩŋnɩ nʋmɔʋ kʋnɛ kɩ-yɔɔ lɛ, ɛzɩma pasɩɣ ɛyaa agbaa taa yɔ pɩnɩɣzɩnɩ ɛzɩma palakaɣ kajalaɣ pɩnzɩ mɩnʋʋ taa yɔ.
Mba cɔŋnɩ tʋma ana a-yɔɔ? “Yom siɣsiɣ tʋ nɛ lɔŋsɩnɖʋ” kajalaɣ tʋmɩyɛ lɛ se ɛcalɩ ɖɩɣa taa mba. (Mat. 24:45-47) Ye mbʋ, pɩpɔzʋʋ se “yom siɣsiɣ tʋ nɛ lɔŋsɩnɖʋ” ɛtazɩ Masɩ taa tete, nɛ pɩtɩŋnɩ fezuu kiɖeɖeu sɩnʋʋ yɔɔ lɛ, ɛpɩzɩ nɛ ɛwɩlɩ ɛzɩma palabɩnɩ Bibl paɣtʋ kila tʋmɩyɛ yɔ nɛ ɛtɩŋnɩ Bibl paɣtʋ kila ana a-yɔɔ nɛ ɛwɩlɩ ɖɔɖɔ ɖʋtʋ ndʋ tɩ-yɔɔ pɩwɛɛ se ɛjaɖɛ kpeekpe yɔɔ agbaa ɩɖɔ yɔ. Yom siɣsiɣ tʋ ɖɔɖɔ lɩzɩɣnɩ ageeta yɔɔ cɔnɩyaa nɛ Ɛgbɛyɛ piliŋa taa kɔɔmiite taa mba. Nɛ ɛgbɛyɛ pilinzi ñaɖʋʋ nesi nʋmɔʋ ŋgʋ yom siɣsiɣ tʋ nɛ lɔŋsɩnɖʋ wɩlɩɣ yɔ. Nɛ paa ɛgbɛyɛ taa ɛzʋtʋyaa ŋgbɛyɛ nɖɩ lɛ, pɩkɛnɩ-ɖɩ sʋʋtʋ se ɖɩtɩŋnɩ Masɩ yɔɔ nɛ ɖɩtazɩ koobiya mba pamʋnaa se paha-wɛ wala agbaa taa yɔ pɛ-wɛtʋ taa. Pɩpɔzʋʋ se paa egeetiye yɔɔ cɔnɩyʋ weyi lɛ, ɛtɩmɩ nɛ ɛtazɩ camɩyɛ abalaa mba ɛzʋtʋyaa lɩzaa se paha-wɛ wala yɔ pɛ-wɛtʋ taa nɛ pʋwayɩ lɛ, ɛlɩzɩ mba pamʋnaa yɔ.
Ðɩñɩnɩ fezuu taa ñɩm
(Tiiti 1:12) Pa-taa nɔɔyʋ, weyi ɛkɛ pa-maɣmaɣ pa-nayʋ yɔ, ɛyɔɔdaa se: “Krɛɛtɩ mba kɛ cɛtɩyaa paa ɛzɩmtaa, pɛkɛ tɛtɛgbɩna kɩdɛkɛda, hiluu tɩnaa mba paalakɩ naɖɩyɛ yɔ.”
w89 15/5 31 § 5
Tɔm ndʋ ɖa-takayɩsɩ kalɩyaa pɔzʋʋ yɔ
Pɩtʋʋ fɛyɩ se Pɔɔlɩ taawɛɛ nɛ ɛtɩnɩɣ lɩmaɣza kɩdɛkɛda wena ɛyaa kaawɛnɩ Krɛɛtɩ mba yɔɔ yɔ a-yɔɔ. Ðɩpɩzɩɣ ɖitisi tɔm ndʋ tɩ-yɔɔ mbʋ pʋyɔɔ yɔ, Pɔɔlɩ nawa se Krɩstʋ ñɩma kɩbama kaawɛ Krɛɛtɩ peeɖe nɛ pɔ-tɔm kɛdɩnɩ Ɛsɔ nɛ ɛtaa-wɛ num nɛ e-fezuu kiɖeɖeu. (Tʋma Labʋ 2:5, 11, 33) Krɩstʋ ñɩma kɩbama kaaɖɔwa, piyeba nɛ papɩzɩ pasɩɩ agbaa “tɛtʋ sɔsɔtʋ ndɩ ndɩ taa.” Pɩkɛ toovenim se Krɛɛtɩ Krɩstʋ ñɩma kɛ ɛyaa mba patɩtalɩ pilim yɔ, paa mbʋ yɔ, ɖa-taa pɩzɩɣ nɛ pɩtɛ se patɩkɛ cɛtɩyaa nɛ hiluu tɩnaa mba paalakɩ naɖɩyɛ yɔ; ye pɩɩkɛ mbʋ yɔ, pataawolo pɩ-yɔɔ nɛ pɛwɛɛnɩ Yehowa lootiye. (Filiipi mba 3:18, 19; Natʋ 21:8) Ɛzɩ pɩwɛʋ ajɛɛ sakɩyɛ taa sɔnɔ yɔ, laŋa kɩbana tɩnaa kaawɛ Krɛɛtɩ nɛ wezuu kɩdɛkɛdʋʋ caɣʋ ŋgʋ kɩɩwɛ peeɖe yɔ, kɩcɛyaɣ-wɛ nɛ piyeba nɛ kewiyaɣ tɔm kɩbandʋ kɛdɩnɩ-wɛ nɛ pamʋ-tʋ.—Ezekɩyɛɛlɩ 9:4; kpaɣ-tʋ nɛ ŋmaɣzɩnɩ Tʋma Labʋ 13:48.
(Fileemɔɔ 15, 16) Pʋtɔma yɔ, pʋyɔɔ ɖeyi ɖeyi ese alɩwaatʋ pazɩ, se pɩsa nɛ ɛpɩsɩ nɛ ɛwɛɛ ñɔ-cɔlɔ tam, 16 nɛ ɛtaatasɩ wɛʋ ɛzɩ yom yɔ, ɛlɛ ɛkɛ weyi ɛkɩlɩ yom yɔ. Ɛpɩsɩ koobu kʋsɔɔlʋ, kɔzɩ kɔzɩ mɛ-ɛsɩndaa; ɛlɛ ñɛ-ɛsɩndaa lɛ, ɛpɩsɩ koobu kʋsɔɔlʋ tomnaɣ taa nɛ Kɩbaɣlʋ taa nɛ pɩkɩlɩ.
w08 15/10 31 § 4
Tiiti, Fileemɔɔ nɛ Ebree mba takayɩsɩ taa lɩmaɣza sɔsɔna
15, 16—Ɛbɛ yɔɔ Pɔɔlɩ tɩpɔzɩ Fileemɔɔ se eyele Onezim nɛ ɛwɛɛ ɛ-tɩ yɔɔ? Pɔɔlɩ kaasɔɔlɩ kpem se ɛñɔɔnɩ tʋmɩyɛ nɖɩ ɛwɛna se esusi ‘Ɛsɔ Kewiyaɣ tɔm nɛ ɛwɩlɩ ɛyaa Kɩbaɣlʋ Yesu Krɩstʋ yɔɔ tɔm’ yɔ. Pʋyɔɔ ɛlɩzaa se ɛɛɖʋʋ ɛ-nɔɔ ɛyaa lalaa tɔm taa ɛzɩ tɔm ndʋ titukuuni yomiye tɔm mbʋ yɔ yɔ.—Tʋma Labʋ 28:31.
Bibl kalʋʋ
(Tiiti 3:1-15) Wɛɛ nɛ ŋtɔzʋʋ-wɛ se poluzi pa-tɩ kominawaa nɛ ñʋndɩnaa tɛɛ nɛ pañam-wɛ, se pɔñɔɔzɩ pa-tɩ nɛ pala paa tʋmɩyɛ kɩbanɖɛ nɖɩ lɛ, 2 se pataayɔɔdɩ tɔm kɩdɛkɛdɩtʋ nɔɔyʋ yɔɔ, pataakɛ tɔm cayaa, ɛlɛ pɛkɛ mba panɩɣ tɔm taa yɔ, nɛ paa ɛzɩmtaa lɛ, pɛwɛɛnɩ hɛɛɛ wɛtʋ ɛyaa tɩŋa yɔɔ. 3 Mbʋ pʋyɔɔ yɔ ɖooo lɛ, ɖa ɖɔɖɔ ɖɩɩkɛ kɩmɛlɛmɩŋ, kaañamtʋ tɩnaa, ɛyaa mba peleba yɔ, ɖɩɩkɛ kɔɖɛyɩ ndɩ ndɩ nɛ leleŋ nɩʋ ndɩ ndɩ yomaa, ɖɩlakaɣ lakasɩ kɩdɛkɛdɩsɩ nɛ ɛsɩsɛmɩyɛ, ɖɩɩkɛ kʋzɔɔtʋ tɩnaa, nɛ ɖɩpaɖɩɣ ɖama. 4 Ɛlɛ, alɩwaatʋ ndʋ ɖa-Ñʋʋ Yaɖʋ Ɛsɔ lɩzɩ ɛ-camɩyɛ lakasɩ nɛ sɔɔlɩm mbʋ ɛwɛnɩ ɛyaa yɔɔ yɔ nɛ ɛwɩlɩ yɔ 5 (pɩtɩkɛ tʋma siɣsiɣ ñɩna wena ɖɩlaba yɔ a-yɔɔ, ɛlɛ ɛ-maɣmaɣ ɛ-pʋtɔdɩyɛ naʋ yɔɔ), ɛyabɩ ɖa-ñʋʋ pɩtɩŋnɩ lɩm sɔʋ mbʋ pɩha-ɖʋ wezuu yɔ pɩ-yɔɔ nɛ ɛzɩma ɛtɩŋnɩ fezuu kiɖeɖeu yɔɔ nɛ ɛla nɛ ɖɩpɩsɩ ɛyaa kɩfama yɔ. 6 Ɛtɩŋnɩ ɖa-Ñʋʋ Yaɖʋ Yesu Krɩstʋ yɔɔ nɛ ɛpɩyɩ fezuu ŋgʋ ɖɔ-yɔɔ sakɩyɛ, 7 se pɩsa nɛ pɛtɛŋ-ɖʋ yaʋ se siɣsiɣ tɩnaa pɩtɩŋnɩ ɛlɛ lootiye yɔɔ lɛ, ɖɩpɩsɩ mba pamʋʋ ñɩm nɛ pɩla nɔɔ kʋɖʋmaɣ nɛ wezuu maatɛŋ lidaʋ nakʋyʋ yɔ. 8 Tɔm tʋnɛ, tɩmʋnaa se pataa-tʋ liu, nɛ mɔnsɔɔlaa se ŋwɛɛ nɛ ŋñɩkɩɣ tɔm ndʋ tɩ-yɔɔ niye, se pɩsa nɛ mba petisi Ɛsɔ yɔɔ yɔ, paka pa-lɩmaɣza tʋma kɩbana labʋ yɔɔ. Pɩkɛ mbʋ pɩwɛ ɖeu nɛ pɩwazɩɣ ɛyaa yɔ. 9 Ɛlɛ taaɖʋ ñɔ-nɔɔ kɩmɛlɛndʋ tɔm hɔm nɛ cɔzɔnaa liɖe tɔm nɛ ɖama kɩɩnɩnʋʋ nɛ Paɣtʋ yɔɔ yoŋ taa, mbʋ pʋyɔɔ yɔ pɩfɛyɩnɩ wazaɣ nakɛyɛ nɛ pɩkɛ falaa pʋyʋ. 10 Piyele nɛ ɛyʋ weyi ɛɖʋʋ kɩjaʋ yɔɔ ɛgbɛyɛ naɖɩyɛ yɔ, kizi-i, ŋtɛŋɩ-ɩ paɣʋ kajalaɣ ɖeɖe nɛ nabʋlɛ ɖeɖe lɛ; 11 mbʋ pʋyɔɔ yɔ ŋsɩm mbʋ se ɛyʋ ɛnʋ elebi nʋmɔʋ nɛ ɛwɛɛ ɛlakɩ kɩwɛɛkɩm nɛ ɛkʋ ɛ-maɣmaɣ ɛ-tɔm. 12 Alɩwaatʋ ndʋ mentiyiɣ Artemaasɩ yaa Tisiiki ñɔ-cɔlɔ yɔ, la mbʋ payɩ ŋpɩzɩɣ yɔ nɛ ŋkɔɔ mɔn-cɔlɔ Nikopoliisi, mbʋ pʋyɔɔ yɔ mankpaɣ lɩmaɣzɩyɛ se peeɖe mancakɩ niŋkaɣ alɩwaatʋ taa. 13 Ha Zenaasɩ, weyi ɛkɛ Paɣtʋ sɩnɖʋ sɔsɔ yɔ, nɛ Apoloosi mbʋ pɩpɔzʋʋ yɔ camɩyɛ, nɛ pataatɛɖɩ nabʋyʋ pa-nʋmɔʋ ɖɔm taa. 14 Ɛlɛ yele nɛ ɖɛ-ɛyaa ɖɔɖɔ kpɛlɩkɩ ɛzɩma paka ñʋʋ nɛ tʋma kɩbana labʋ yɔ nɛ papɩzɩ pasɩna alɩwaatʋ ndʋ kɩcɛyɩm nabʋyʋ kɔŋ kpɛdɛyɛ yɔ, se pɩsa nɛ pataakɛ mba paalʋlʋʋ pee yɔ. 15 Mba payɩ pɛwɛ mɔn-cɔlɔ yɔ, petiyiɣni-ŋ pɛ-sɛtʋ. Cɛlɩ mɛn-sɛtʋ mba pɔsɔɔlɩ-ɖʋ tisuu taa yɔ. Tɛtɛ nɛ Ɛsɔ lootiye wɛɛ mɩ-tɩŋa mɩ-cɔlɔ.
19-25 AOÛT
ÑƖM MBƲ PƖWƐ ƐSƆTƆM TAA YƆ | EBREE MBA 1-3
‘Sɔɔlɩ siɣsiɣ wɛtʋ nɛ ŋpaɖɩ paɣtʋ yɔɔ maʋ’
(Ebree mba 1:8) Ɛlɛ ɛyɔɔdʋʋ Pɩyalʋ yɔɔ se: “Ɛsɔ kɛnɩ ñe-kewiyaɣ kpelaɣ tamtam, nɛ ñe-Kewiyaɣ ɖaʋ kɛ siɣsiɣ wɛtʋ kewiyitu ɖaʋ.
w14 1/2 10 § 8
Ɩɖɛyɩ Krɩstʋ, Wiyaʋ weyi ɛmʋnɩ samtʋ yɔ!
8 Yehowa kpa ɛ-Pɩyalʋ Wiyaʋ ɛsɔdaa pɩnaɣ 1914 taa. ‘E-kewiyaɣ ɖaʋ kɛ tʋtʋyɛ’ ɖaʋ, ye mbʋ ɖɩɩpɩtɩɣ se siɣsiɣ wɛtʋ kaɣ wɛʋ e-kewiyitu tɔɔʋ alɩwaatʋ taa nɛ ɛɛkaɣ ɖʋʋ tʋkaɣ ɛyaa hɛkʋ taa. Ɛnʋ pɩmʋnaa se ɛtɔɔ kewiyitu, mbʋ pʋyɔɔ yɔ ‘Ɛsɔ caɣzɩnɩ-ɩ Kewiyaɣ kpelaɣ yɔɔ.’ Pʋ-tɔbʋʋ lɛ se Yehowa cɔlɔ e-kewiyaɣ lɩnaa. Pɩtasɩ lɛ, Yesu Kewiyaɣ kaɣ wɛʋ pɩnzɩ nɛ pɩnzɩ. Ña-taa ɛɛlakɩ leleŋ se ŋwɛ Wiyaʋ ɖoŋ tʋ Mesiya kewiyaɣ ŋga kɛ-tɛɛ, nɛ ŋsɛɣ Yehowa na?
(Ebree mba 1:9) Ŋsɔɔlɩ siɣsiɣ wɛtʋ nɛ ŋpaɖɩ paɣtʋ yɔɔ maʋ. Pʋyɔɔ Ɛsɔ, ñɛ-Ɛsɔ ta-ŋ amɛya num nɛ pɩkɩlɩ ña-taabalaa.”
w14 1/2 9 § 7
Ɩɖɛyɩ Krɩstʋ, Wiyaʋ weyi ɛmʋnɩ samtʋ yɔ!
7 Kalɩ Keɣa 44:7, 8. Yesu kaasɔɔlɩ siɣsiɣ wɛtʋ kpem nɛ ɛpaɖɩɣ mbʋ pɩpɩzaɣ se pipisi ɛ-Caa hɩɖɛ yɔ, nɛ pʋyɔɔ lɛ Yehowa taa-ɩ num nɛ ɛpɩsɩ-ɩ Mesiya Kewiyaɣ Wiyaʋ. Ɛta Yesu “sɔzɩŋ num, ahɛɛnɛɛ num cɔɔɔ; ɛtaataa mbʋ nɔɔyʋ.” Tɔm ndʋ, tɩwɩlɩɣ se ɛzɩma paata Yesu num yɔ, pɩkɩlɩ ɛzɩma pataɣaɣ num Yuuda awiya mba palɩnɩ Daviid liɖe taa yɔ. Ɛzɩma tɩyɛ? Kajalaɣ lɛ, Yehowa maɣmaɣ tanɩ Yesu num. Nabʋlɛ lɛ, Yehowa ta-ɩ num se ɛpɩsɩ Wiyaʋ nɛ ɛtɛ ɛkɛ Cɔjɔ Sɔsɔ. (Keɣa 2:2; Ebr. 5:5, 6) Nabudozo lɛ, pɩtɩkɛ num maɣmaɣ paata Yesu, ɛlɛ fezuu kiɖeɖeu; nɛ ɛsɔdaa ɛkaɣ e-kewiyitu tɔɔʋ, pɩtɩkɛ tataa.
Ðɩñɩnɩ fezuu taa ñɩm
(Ebree mba 1:3) Ɛkɛ Ɛsɔ samtʋ kɩlɛmʋʋ nɛ mbʋ Ɛsɔ kɛnaa ɖeyi ɖeyi yɔ pɩ-lɛzʋʋ, nɛ ɛɖɔkʋʋ pɩtɩŋa payɩ pɩtɩŋnɩ e-ɖoŋ tɔm yɔɔ. Nɛ ɛñalɩ ɖa-kɩwɛɛkɩm nɛ pɩtɛ lɛ, ɛcaɣ Kɩlɩm nesi kɩbanzɩ yɔɔ ɖooo hayo.
it-1 1170 § 4
Lɛzʋʋ
Ɛzɩma tɩyɛ Yesu kɛnɩ ɛ-Caa lɛzʋʋ ɖeyi ɖeyi paa ɛzɩmtaa?
Ɛsɔ Pɩyalʋ kajalaɣ ñɩnʋ weyi ɛpɩsɩ ɛyʋ pʋwayɩ nɛ payaɣ-ɩ se Yesu yɔ, ɛkɛ ɛ-Caa lɛzʋʋ. (2Kɔ 4:4) Toovenim lɛ, Pɩyalʋ ɛnʋ Ɛsɔ yɔɔdaɣna alɩwaatʋ ndʋ ɛtɔm se: “Ðɩlɩzɩ ɛyʋ ɖɛ-lɛzʋʋ” yɔ, pɩwɩlɩɣ se kpaɣnɩ ɖooo alɩwaatʋ ndʋ palɩzɩ Yesu yɔ ɛkɛ ɛ-Caa, Lɩzɩyʋ lɛzʋʋ. (Kiɖe 1:26; Yoh 1:1-3; Kol 1:15, 16) Alɩwaatʋ ndʋ Yesu kaawɛ tɛtʋ yɔɔ ɛzɩ ɛyʋ weyi ɛtalɩ pilim yɔ, ɛlɩzɩ ɛ-Caa wɛtʋ kɩbandʋ nɛ ɛyʋtʋ nɛ ɛwɩlɩ ɖeyi ɖeyi ɛzɩ pɩpɔzʋʋ yɔ ɛyaa mantɩtalɩ pilimwaa hɛkʋ taa. Pʋyɔɔ ɛpɩzaa nɛ ɛyɔɔdɩ se, “Weyi ɛna-m yɔ, ɛna ɖɔɖɔ Caa.” (Yoh 14:9; 5:17, 19, 30, 36; 8:28, 38, 42) Nɛ Yesu tasɩ kɛʋ ɛ-Caa Ɛsɔ Yehowa lɛzʋʋ nɛ pɩkɩlɩ alɩwaatʋ ndʋ ɛlɛ fezi-i nɛ ɛpɩsɩ fezuu nɛ ɛkpa ɛsɔdaa nɛ ɛha-ɩ “ɖoŋ tɩŋa ɛsɔdaa nɛ tataa” yɔ. (1Pɩ 3:18; Mt 28:18) Ɛzɩma Ɛsɔ kpazɩ Yesu “lone sɔsɔyɛ” taa yɔ, lɛɛlɛɛyɔ, Pɩyalʋ ɛnʋ ɛwɛɛ nɛ ɛwɩlɩɣ ɛ-Caa samtʋ nɛ pɩkɩlɩɣ ɛzɩma ɛwɩlaɣ-tʋ pʋcɔ nɛ ɛkɔŋ tataa yɔ. (Fil 2:9; Ebr 2:9) Lɛɛlɛɛyɔ ɛkɛ “mbʋ Ɛsɔ kɛnaa ɖeyi ɖeyi yɔ pɩ-lɛzʋʋ.”—Ebr 1:2-4.
(Ebree mba 1:10-12) Nɛ: “Kiɖe tɛɛ lɛ, hayɩ Kɩbaɣlʋ, ŋsɩ tɛtʋ tigila, nɛ ɛsɔdaa kɛ ñe-nesi tɛɛ tʋmɩyɛ. 11 Pakaɣ ɖem, ɛlɛ ña lɛ ŋkaɣ wɛʋ; nɛ ɛzɩ toko yɔ, pa-tɩŋa pakaɣ cadʋʋ, 12 nɛ ŋkaɣ-wɛ kpiyuu ɛzɩ toko sɔsɔʋ yɔ, ɛzɩ toko yɔ, nɛ pakaɣ-wɛ lɛɣzʋʋ. Ɛlɛ ña lɛ ŋwɛɣ ɛzɩ ŋwɛʋ yɔ, nɛ ña-pɩnzɩ ɩɩkaɣ sɩʋ tɩnaɣ wiɖiyi.”
it-1 478 § 1
Ɛsɔdaa
Ɛsɔ Yehowa tɔm pɔyɔɔdʋʋ Keɣa 101: 26, 27, ɛlɛ apostoloo Pɔɔlɩ yɔɔdaɣ-tʋ lɛ, ɛkpaɣ-tʋ ɛzɩ Yesu Krɩstʋ titukuuna yɔ. Ɛbɛ yɔɔ? Mbʋ pʋyɔɔ yɔ, Ɛsɔ Pɩyalʋ ɛgbamɩyɛ ɖʋ nesi nɛ palɩzɩ Kedeŋa ŋga panaɣnɩ ɛsa yɔ. Pɔɔlɩ wɛɛ nɛ ɛɖʋʋ tʋkaɣ Yesu weyi ɛwɛ tam yɔ nɛ kedeŋa pɛ-hɛkʋ taa, mbʋ pʋyɔɔ yɔ, kedeŋa ŋga Ɛsɔ lɩzaa nɛ panaɣ-kɛ nɛ ɛsa yɔ, ye Ɛsɔ ɛsɔɔlaa yɔ, ɛpɩzɩɣ nɛ ‘ekpiyi-kɛ ɛzɩ toko sɔsɔʋ yɔ.’—Ebr 1:1, 2, 8, 10-12; kpaɣ-tʋ nɛ ŋmaɣzɩnɩ 1Pɩ 2:3.
Bibl kalʋʋ
(Ebree mba 1:1-14) Ðooo lɔndaa lɛ, Ɛsɔ kaatɩŋnɩ nayaa yɔɔ nɛ ɛyɔɔdɩnɩ ɖɔ-cɔzɔnaa tam sakɩyɛ nɛ pɩtɩŋnɩ nʋmɔŋ sakɩyɛ yɔɔ. 2 Lɛɛlɛɛyɔ, kɩyakɩŋ ɛnɩ ɩ-ɖɩdɛnɖɛ lɛ, ɛtɩŋnɩ Pɩyalʋ nɔɔyʋ yɔɔ nɛ ɛyɔɔdɩnɩ-ɖʋ, weyi ɛlɩzɩ-ɩ se pɩtɩŋa payɩ pɩkɛ ɛ-pʋyʋ yɔ, nɛ weyi ɛ-yɔɔ ɛtɩŋnaa nɛ ɛlɩzɩ ɛjaɖɛ yɔɔ ɖʋtʋ yɔ. 3 Ɛkɛ Ɛsɔ samtʋ kɩlɛmʋʋ nɛ mbʋ Ɛsɔ kɛnaa ɖeyi ɖeyi yɔ pɩ-lɛzʋʋ, nɛ ɛɖɔkʋʋ pɩtɩŋa payɩ pɩtɩŋnɩ e-ɖoŋ tɔm yɔɔ. Nɛ ɛñalɩ ɖa-kɩwɛɛkɩm nɛ pɩtɛ lɛ, ɛcaɣ Kɩlɩm nesi kɩbanzɩ yɔɔ ɖooo hayo. 4 Pʋyɔɔ ɛkɔm nɛ ɛkɩlɩ Ɛsɔ tiyiyaa, mbʋ pʋyɔɔ yɔ paha-ɩ hɩɖɛ nɖɩ ɖɩkɩlɩ pa-ñɩna yɔ. 5 Mbʋ pʋyɔɔ yɔ, Ɛsɔ tiyiyaa taa anɩ Ɛsɔ heyi wiɖiyi se: “Ŋkɛ man-pɩyalʋ; sɔnɔ manpɩsɩ ña-caa”? Nɛ ɖɔɖɔ se: “Mankaɣ pɩsʋʋ ɛ-caa, nɛ ɛkaɣ pɩsʋʋ man-pɩyalʋ”? 6 Ɛlɛ alɩwaatʋ ndʋ ɛɖaɣnɩɣ tiyuu ɛ-Kajalaɣ Pɩɣa tɛtʋ yɔɔ yɔ, ɛyɔɔdʋʋ se: “Nɛ Ɛsɔ tiyiyaa tɩŋa ɩha-ɩ ñamtʋ.” 7 Pɩtasɩ lɛ, ɛyɔɔdʋʋ Ɛsɔ tiyiyaa yɔɔ se: “Ɛlakɩ nɛ e-tiyiyaa pɩsɩɣ feziŋ, nɛ ɛ-lɩmɖʋyaa pɩsɩɣ miŋ nzʋlʋmɩyɛ.” 8 Ɛlɛ ɛyɔɔdʋʋ Pɩyalʋ yɔɔ se: “Ɛsɔ kɛnɩ ñe-kewiyaɣ kpelaɣ tamtam, nɛ ñe-Kewiyaɣ ɖaʋ kɛ siɣsiɣ wɛtʋ kewiyitu ɖaʋ. 9 Ŋsɔɔlɩ siɣsiɣ wɛtʋ nɛ ŋpaɖɩ paɣtʋ yɔɔ maʋ. Pʋyɔɔ Ɛsɔ, ñɛ-Ɛsɔ ta-ŋ amɛya num nɛ pɩkɩlɩ ña-taabalaa.” 10 Nɛ: “Kiɖe tɛɛ lɛ, hayɩ Kɩbaɣlʋ, ŋsɩ tɛtʋ tigila, nɛ ɛsɔdaa kɛ ñe-nesi tɛɛ tʋmɩyɛ. 11 Pakaɣ ɖem, ɛlɛ ña lɛ ŋkaɣ wɛʋ; nɛ ɛzɩ toko yɔ, pa-tɩŋa pakaɣ cadʋʋ, 12 nɛ ŋkaɣ-wɛ kpiyuu ɛzɩ toko sɔsɔʋ yɔ, ɛzɩ toko yɔ, nɛ pakaɣ-wɛ lɛɣzʋʋ. Ɛlɛ ña lɛ ŋwɛɣ ɛzɩ ŋwɛʋ yɔ, nɛ ña-pɩnzɩ ɩɩkaɣ sɩʋ tɩnaɣ wiɖiyi.” 13 Ɛlɛ Ɛsɔ tiyiyaa taa weyi yɔɔ ɛyɔɔdɩ wiɖiyi se: “Caɣ me-nesi kɩbanzɩ yɔɔ nɛ pɩkɔɔ pɩtalɩ alɩwaatʋ ndʋ manpɩsɩɣ ño-koyindinaa ña-nɩŋgbanzɩ ɖɩzɩyɛ yɔ”? 14 Ɛzɩ pa-tɩŋa patɩkɛ feziŋ weyi ɩlakɩ tʋmɩyɛ kiɖeɖee, weyi petiyi-i se ɩɖʋ lɩm mba pakaɣ hiɣu ñʋʋ yabɩtʋ yɔ?
26 AOÛT–1ER SEPTEMBRE
ÑƖM MBƲ PƖWƐ ƐSƆTƆM TAA YƆ | EBREE MBA 4-6
‘La mbʋ payɩ ŋpɩzɩɣ yɔ nɛ ŋsʋʋ Ɛsɔ hɛzɩyɛ taa’
(Ebree mba 4:1) Ye mbʋ, ɛzɩma lidaʋ tɔm ɖaɣnɩ wɛʋ se ɖɩpɩzɩɣ nɛ ɖɩsʋʋ ɛ-hɛzɩyɛ taa yɔ pʋyɔɔ lɛ, ɖɩkpa ɖa-tɩ nɛ pɩtaala se nɔɔyʋ wɛ mɩ-taa nɛ ɛtɩmʋnɩ lidaʋ tɔm ndʋ.
(Ebree mba 4:4) Mbʋ pʋyɔɔ yɔ, ɛyɔɔdɩ ɖoli kɩyakʋ lʋbɛ ñɩŋgʋ yɔɔ tɔm tʋnɛ: “Nɛ Ɛsɔ hɛzɩnɩ ɛ-tʋma tɩŋa kɩyakʋ lʋbɛ ñɩŋgʋ wiye,”
w11 15/7 24-25 § 3-5
Ɛbɛ kɛnɩ Ɛsɔ hɛzɩyɛ?
3 Lɩmaɣza naalɛ naayɛ sɩnɩ-ɖʋ nɛ ɖɩkɔ tɔm ñʋʋ se kajalaɣ pɩnzɩ mɩnʋʋ taa lɛ, kɩyakʋ lʋbɛ ñɩŋgʋ taatɩɩtɛmta. Kajalaɣ lɛ, yʋsɩ tɔm ndʋ Yesu heyi e-koyindinaa mba pɔhɔŋaɣnɩ-ɩ tɔm se pɩtɩmʋna se ɛwaa kʋdɔmɩŋ Sabaatɩ wiye yɔ. E-koyindinaa mba pakpakaɣ kʋdɔmɩŋ waʋ Sabaatɩ wiye ɛzɩ tʋmɩyɛ labʋ yɔ. Kɩbaɣlʋ cosi-wɛ se: “Man-Caa wɛɛ nɛ ɛlakɩ tʋmɩyɛ halɩ nɛ sɔnɔ, nɛ ma ɖɔɖɔ mɛwɛɛ nɛ malakɩ tʋmɩyɛ.” (Yohanɛɛsɩ 5:16, 17) Ɛbɛ tɔm Yesu caɣaɣ yɔɔdʋʋ? Pɔhɔŋaɣnɩ-ɩ tɔm se ɛlakɩ tʋmɩyɛ Sabaatɩ wiye. Yesu wɩlaa se pɛfɛyɩnɩ toovenim nɛ ecosi-wɛ se: “Man-Caa wɛɛ nɛ ɛlakɩ tʋmɩyɛ.” Toovenim taa lɛ, pɩɩwɛ ɛzɩ Yesu wɛɛ nɛ eheyiɣ e-koyindinaa mba se: ‘Ma nɛ man-Caa tʋmɩyɛ kʋɖʋmɖɩyɛ ɖɩwɛɛ nɛ ɖɩlakɩ yɔ. Nɛ ɛzɩma man-Caa wɛʋ nɛ ɛlakɩ tʋmɩyɛ kpaɣnɩ ɖooo Sabaatɩ kɩyakʋ wiye pɩlakɩ pɩnzɩ kudokiŋ sakɩyɛ yɔ, pɩha ma ɖɔɖɔ waɖɛ se mowolo tʋmɩyɛ yɔɔ halɩ pɩkpɛndɩnɩ Sabaatɩ maɣmaɣ wiye.’ Ye mbʋ Yesu wɩlaa se tɛtʋ yɔɔ lɛ, kɩyakʋ lʋbɛ ñɩŋgʋ, ŋgʋ kɩkɛ Ɛsɔ Sabaatɩ sɔsɔʋ hɛzɩyɛ yɔ, kɩtaatɩɩtɛmta ɛ-alɩwaatʋ taa.
4 Apostoloo Pɔɔlɩ wɩlɩ lɩmaɣzɩyɛ naalɛ ñɩnɖɛ. Fezuu kiɖeɖeu sɩnɩ Pɔɔlɩ nɛ ɛyaa tɔm ndʋ tɩwɛ Kiɖe Tɛɛ Tɔm 2:2 taa nɛ titukuuni Ɛsɔ hɛzɩyɛ yɔ nɛ ɛtɔ se: “Ða mba ɖɩwɛnɩ tisuu yɔ, ɖɩsʋʋ hɛzɩyɛ taa.” (Ebree mba 4:3, 4, 6, 9) Ye mbʋ kɩyakʋ lʋbɛ ñɩŋgʋ taatɩɩtɛmtɩ Pɔɔlɩ alɩwaatʋ taa. Alɩwaatʋ ɛzɩma hɛzɩyɛ kɩyakʋ kaɣ kpaɣʋ?
5 Pɩsa nɛ ɖicosi tɔm ndʋ tɩ-yɔɔ lɛ, pɩwɛɛ se ɖɩtɔzɩ kɩyakʋ lʋbɛ ñɩŋgʋ kaɖʋwa yɔɔ. Kiɖe Tɛɛ Tɔm 2:3 lɩzɩ pɩ-taa se “Ɛsɔ wazɩ kɩyakʋ lʋbɛ ŋgʋ yɔɔ nɛ ɛpɩsɩ-kʋ kiɖeɖeu.” Yehowa ‘pɩsɩ kɩyakʋ ŋgʋ kiɖeɖeu,’ pʋ-tɔbʋʋ se ɛpɩsɩ-kʋ kele kele, yaa ɛlɩzɩ-kʋ nɛ kɩjaʋ se ɛ-kaɖʋwa ɛla. Kaɖʋwa ŋga ɛwɛnɩ tɛtʋ yɔɔ lɛ se ɛyaa mba pañaŋɩ-ɩ yɔ pacaɣ tɩ-yɔɔ nɛ pɔñɔɔzɩ-tʋ nɛ pɔcɔnɩ tɩ-yɔɔ wondu tɩŋa yɔɔ camɩyɛ. (Kiɖe 1:28) Kaɖʋwa ŋga, kɔ-yɔɔ Yehowa Ɛsɔ nɛ “Sabaatɩ Kɩbaɣlʋ” Yesu Krɩstʋ ‘pɛwɛɛ nɛ palakɩ tʋmɩyɛ halɩ nɛ sɔnɔ.’ (Mat. 12:8) Ɛsɔ hɛzɩyɛ kɩyakʋ kaɣ wobu pɩ-yɔɔ pɩkɔɔ pɩsɩɩnɩ alɩwaatʋ ndʋ ɛ-kaɖʋwa ŋga kotukuni kɩyakʋ ŋgʋ yɔ, kalakɩ Krɩstʋ Pɩnzɩ Kudoku Kewiyitu Tɔɔʋ ɖɩdɛnɖɛ yɔ.
(Ebree mba 4:6) Pʋyɔɔ lɛ, ɛzɩma pɩkazɩ nabɛyɛ se pasʋʋ ɖɩ-taa, nɛ ɛzɩma mba pacalɩ-wɛ tɔm kɩbandʋ susuu yɔ pa-kaañamtʋ yɔɔ lɛ, patɩsʋʋ ɖɩ-taa yɔ pʋyɔɔ lɛ,
w11 15/7 25 § 6
Ɛbɛ kɛnɩ Ɛsɔ hɛzɩyɛ?
6 Ɛsɔ lɩzɩ ɛ-kaɖʋwa nɛ ɛwɩlɩ Aɖam nɛ Ɛva kpayɩ kpayɩ, ɛlɛ patɩpɩzɩ nɛ paɖʋ nesi se kala. Toovenim taa lɛ, Aɖam nɛ Ɛva kɛnɩ ɛyaa kajalaɣ ñɩma mba patɩña Ɛsɔ yɔ. Nɛ pʋwayɩ lɛ, ɛyaa miiliyɔɔwaa sakɩyɛ ɖɔɖɔ tɩña Ɛsɔ. Halɩ Ɛsɔ samaɣ mamaɣ, Izrayɛɛlɩ ɛjaɖɛ, tɔlɩ kaañamtʋ wɛtʋ kʋɖʋmtʋ ndʋ tɩ-taa. Pʋyɔɔ Pɔɔlɩ paɣ kajalaɣ pɩnzɩ mɩnʋʋ taa Krɩstʋ mba se pakpa pa-tɩ nɛ pataatɔlɩ kaañamtʋ kpaca kʋɖʋmʋʋ ŋgʋ kɩ-taa caanaʋ taa Izrayɛɛlɩ piyaa kaatɔlaa yɔ. Ɛmawa se: “Pʋyɔɔ lɛ, ɖɩla mbʋ payɩ ɖɩpɩzɩɣ yɔ nɛ ɖɩsʋʋ hɛzɩyɛ nɖɩ ɖɩ-taa, se pɩsa nɛ nɔɔyʋ ɛtaatɔlɩ kaañamtʋ kʋɖʋmtʋ ndʋ tɩ-taa.” (Ebree mba 4:11) Yʋsɩ se Pɔɔlɩ Yɔɔdaa se kaañamtʋ yebina nɛ Izrayɛɛlɩ piyaa tɩpɩzɩ nɛ sɩsʋʋ Ɛsɔ hɛzɩyɛ taa. Lɔŋ weyi pɩkpɛlɩkɩɣ-ɖʋ? Ye pɩlaba se ɖa-lakasɩ kaɖɩɣnɩ Ɛsɔ kaɖʋwa hɔɔlʋʋ nakʋyʋ taa yɔ, ɖɩpɩzɩɣ nɛ ɖɩsʋʋ Ɛsɔ hɛzɩyɛ taa? Pɩcɛyaa siŋŋ se ɖicosi tɔm ndʋ tɩ-yɔɔ, nɛ ɖɩkaɣ tɩ-taa tazʋʋ nɛ ɛsɩndaa nɛ pɩkpaɖɩ. Lɛɛlɛɛyɔ lɛ, iyele nɛ ɖɩna tɔm lɛɛtʋ ndʋ Izrayɛɛlɩ piyaa kɩɖaʋ kɩdɛkɛdʋʋ kpɛlɩkɩɣ-ɖʋ Ɛsɔ hɛzɩyɛ taa sʋʋ yɔɔ yɔ.
(Ebree mba 4:9-11) Ye mbʋ, pɩkazɩ Ɛsɔ samaɣ sabaatɩ hɛzɩyɛ naɖɩyɛ. 10 Mbʋ pʋyɔɔ yɔ ɛyʋ weyi ɛsʋ Ɛsɔ hɛzɩyɛ taa yɔ, ɛhɛzɩnɩ ɖɔɖɔ ɛ-maɣmaɣ ɛ-tʋma, ɛzɩ Ɛsɔ hɛzɩnʋʋ ɛ-maɣmaɣ ɛ-ñɩna yɔ. 11 Pʋyɔɔ lɛ, ɖɩla mbʋ payɩ ɖɩpɩzɩɣ yɔ nɛ ɖɩsʋʋ hɛzɩyɛ nɖɩ ɖɩ-taa, se pɩsa nɛ nɔɔyʋ ɛtaatɔlɩ kaañamtʋ kʋɖʋmtʋ ndʋ tɩ-taa.
w11 15/7 28 § 16-17
Ɛbɛ kɛnɩ Ɛsɔ hɛzɩyɛ?
16 Sɔnɔ lɛ, Krɩstʋ tʋ nɔɔyʋ ɛɛpɩzɩɣ nɛ ɛtɔ se pɩcɛyaa se paña Moyizi Paɣtʋ hɔɔlɩŋ nɩɩyɩ pʋcɔ nɛ ɛyʋ hiɣ ñʋʋ yabɩtʋ. Tɔm ndʋ Pɔɔlɩ ma Efɛɛzɩ mba yɔ tɩ-taa tʋ kpayɩ kpayɩ, ɛyɔɔdaa se: “Pɩtɩŋnɩ lootiye nɖɩ ɖɩ-yɔɔ lɛ, payabɩ mɩ-ñʋʋ tisuu yɔɔ, nɛ pɩtɩkɛ mɩ-maɣmaɣ mɩ-lakasɩ yɔɔ; ɛlɛ pɩkɛ Ɛsɔ kʋjɔʋ. Aayɩ, pɩtɩlɩɩnɩ tʋma cɔlɔ, se pɩsa nɛ nɔɔyʋ ɛtaawɛɛnɩ mbʋ pɩ-yɔɔ ɛkʋndɩ yɔ.” (Efɛz. 2:8, 9) Ɛbɛ Ɛsɔ hɛzɩyɛ taa sʋʋ wɩlɩɣ Krɩstʋ ñɩma? Yehowa lɩzɩ kɩyakʋ lʋbɛ ñɩŋgʋ nɛ ŋgee se kɩkɛnɩ ɛ-hɛzʋʋ kɩyakʋ se pɩsa nɛ ɛ-kaɖʋwa ŋga ɛwɛnɩ tɛtʋ yɔɔ yɔ kala. Ðɩpɩzɩɣ nɛ ɖɩsʋʋ Yehowa hɛzɩyɛ taa yaa ɖa nɛ ɩ ɖɩhɛzɩ ye ɖɩlakɩ mbʋ pɩlabɩ nɔɔ kʋɖʋmaɣ nɛ ɛ-kaɖʋwa ɛzɩ ɛ-ɛgbɛyɛ wɩlʋʋ-ɖʋ yɔ.
17 Pɩtasɩ lɛ, ye ɖɩɩkpakɩɣ Bibl taa lɔŋ weyi Yom siɣsiɣ tʋ nɛ lɔŋsɩnɖʋ tasɩɣ-ɖʋ yɔ nɛ ɖɩlakɩnɩ tʋmɩyɛ, ɛlɛ ɖɩlakɩ mbʋ ɖa-maɣmaɣ ɖɩsɔɔlaa yɔ, ɖɩnɛ lɛ ɖɩwɛɛ nɛ ɖɩkaɖɩɣnɩ Ɛsɔ kaɖʋwa. Wɛtʋ ndʋ tɩpɩzɩɣ nɛ tɩkɔnɩ kaɖɛ ɖa nɛ Yehowa ɖa-taabalɩyɛ yɔɔ. Ñʋʋ ŋgʋ kɩkɔŋ yɔ, kɩ-taa ɖɩkaɣ tazʋʋ wɛtʋ ndɩ ndɩ ndʋ tɩ-taa ɖa mba ɖɩkɛ Ɛsɔ sɛyaa yɔ ɖɩpɩzɩɣ nɛ ɖɩwɩlɩ se ɖɩñaŋ Ɛsɔ yɔ tɩ-taa. Ðɩkaɣ naʋ ɖɔɖɔ ɛzɩma lɩmaɣza wena ɖɩkpakɩɣ Ɛsɔ ñamtʋ nʋmɔʋ taa yaa ɖa-maɣmaɣ ɖɔ-sɔɔlɩm labʋ nʋmɔʋ taa yɔ, apɩzɩɣ nɛ awɩlɩ se toovenim lɛ, ɖɩsʋ Ɛsɔ hɛzɩyɛ taa yaa ɖɩtɩsʋʋ.
Ðɩñɩnɩ fezuu taa ñɩm
(Ebree mba 4:12) Mbʋ pʋyɔɔ yɔ, Ɛsɔ tɔm wɛ wezuu nɛ tɩwɛɛ ɖoŋ pɩŋŋ, nɛ tɩwɛ lɔŋ nɛ pɩkɩlɩ paa laɣɖɛ nɖɩ ɖɩwɛ lɔŋ ceemenje yɔ, nɛ tɩsʋʋ nɛ halɩ tɩtayɩɣ kalɩzaɣ nɛ fezuu pa-taa, nɛ ɖɩdanɖɛ nɛ mɔɔ taa num pa-taa, nɛ tɩpɩzɩɣ tɩtɩlɩ lɩmaɣza nɛ ɖʋtʋ ndʋ tɩwɛ laŋɩyɛ taa yɔ.
Tɔm ndʋ ɖa-takayɩsɩ kalɩyaa pɔzʋʋ yɔ
“Ɛsɔtɔm” ndʋ pɔyɔɔdɩ tɩ-tɔm Ebree 4:12 taa se tɩwɛ wezuu nɛ tɩwɛɛ ɖoŋ yɔ, ɛbɛ tɩkɛnaa?
▪ Tɔm ndʋ apostoloo Pɔɔlɩ yɔɔdaa pʋcɔ nɛ ɛyɔɔdʋʋ mayaɣ ŋga kɔ-tɔm yɔ, tɩwɩlɩɣ se tamaɣ ŋga Ɛsɔ laba nɛ kɛwɛɛ Bibl taa yɔ, kɔ-tɔm ɛyɔɔdaɣ.
Ðoŋ ɖoŋ lɛ, alɩwaatʋ ndʋ ɛgbɛyɛ takayɩsɩ yɔɔdʋʋ Ebree 4:12 tɔm yɔ, sɩwɩlɩɣ ɖoŋ weyi Bibl wɛna se kɩlɛɣzɩ ɛyaa weziŋ yɔ, nɛ pɩmʋnɩ mbʋ. Ɛlɛ pɩcɛyaa se ɖɩmaɣzɩ tɔm ndʋ tɩcɔ Ebree 4:12 nɛ tɩta yɔ tɩ-yɔɔ. Pɔɔlɩ seɣtaɣ Ebree Krɩstʋ ñɩma se paɖʋ nesi Ɛsɔ tamaɣ. Tamaɣ ŋga, pama kɔ-yɔɔ tɔm sakɩyɛ Masɩ kele kele taa. Pɔɔlɩ kpaɣ Izrayɛɛlɩ piya nzɩ poholi-sɩ Ejipiti mba nesi tɛɛ yɔ sɩ-kɩɖaʋ. Sɩɩwɛnɩ lidaʋ se sɩkaɣ sʋʋ tɛtʋ ndʋ “tɩ-taa naalɩm nɛ tɩŋ num pekpeŋ yem yɔ,” nɛ sihiɣ ɖɩhɛzɩyɛ siŋŋ.—Ejl. 3:8; Wp. 12:9, 10.
Tamaɣ ŋga Yehowa kaalabɩ Izrayɛɛlɩ piya. Ɛlɛ pʋwayɩ lɛ, sɩla laŋɩyɛ kpɩzɩŋ nɛ silesi tisuu. Piyeba nɛ sɩ-taa sakɩyɛ tɩpɩzɩ nɛ sɩsʋʋ Ɛsɔ ɖɩhɛzɩyɛ taa. (Kɩg. 14:30; Yoz. 14:6-10) Paa mbʋ yɔ, Pɔɔlɩ sɔzaa se lidaʋ wɛɛ se ɛyaa kaɣ ‘sʋʋ Ɛsɔ ɖɩhɛzɩyɛ taa.’ (Ebr. 3:16-19; 4:1) Lidaʋ tɔm ndʋ, tɩkɛ Ɛsɔ tamaɣ hɔɔlʋʋ nakʋyʋ. Ɛzɩ Ebree Krɩstʋ ñɩma yɔ, ɖa ɖɔɖɔ ɖɩpɩzɩɣ ɖɩkpɛlɩkɩ nɛ ɖɩtɩlɩ Ɛsɔ tamaɣ nɛ ɖɩɖʋ-kɛ nesi. Pɔɔlɩ ñɩnaɣ se ɛwɩlɩ se lidaʋ tɔm ndʋ, tɩlɩnɩ Masɩ taa na, pʋyɔɔ ɛkpaɣ tɔm ndʋ tɩwɛ Kiɖe Tɛɛ Tɔm 2:2 nɛ Keɣa 94:11 taa yɔ nɛ ɛlabɩnɩ tʋmɩyɛ.
Pɩtʋʋ fɛyɩ se ɖa-taa wɛ leleŋ se ɖɩtɩlɩ se lidaʋ tɔm ndʋ pɔyɔɔdaa se ɛyaa kaɣ ‘sʋʋ Ɛsɔ ɖɩhɛzɩyɛ taa yɔ, tɩkpɛndɩ tɩwɛ ɖoŋ mbʋ.’ Ðitisaa se ɖɩpɩzɩɣ nɛ ɖɩsʋʋ Ɛsɔ ɖɩhɛzɩyɛ taa, pʋyɔɔ ɖɩwɛɛ nɛ ɖɩñakɩ pana se ɖɩsʋʋ ɖɩhɛzɩyɛ nɖɩ ɖɩ-taa. Pɩtɩkɛ Moyizi Paɣtʋ yɔɔ ɖɔm yaa tʋma kɩbana lɛɛna labʋ yebina se ɖɔ-tɔm ɛkɛdɩnɩ Yehowa. Ɛlɛ tisuu mbʋ ɖɩwɛna yɔ, piseɣti-ɖʋ nɛ ɖɩɖʋ tamaɣ ŋga nesi, nɛ piseɣtiɣ-ɖʋ se ɖiwolo pɩ-yɔɔ nɛ ɖɩɖʋʋ-kɛ nesi mbʋ. Pɩtasɩ lɛ, ɛzɩ ɖɩyɔɔdʋʋ nɛ pɩɖɛɛ yɔ, ɛjaɖɛ kpeekpe yɔɔ ɛyaa kudokiŋ sakɩyɛ paɣzɩ Bibl kpɛlɩkʋʋ se pɩsa nɛ patɩlɩ Ɛsɔ tamaɣ. Piseɣti pa-taa sakɩyɛ nɛ pɛlɛɣzɩ pe-wezuu caɣʋ, pɛwɛɛnɩ tisuu, nɛ paha pa-tɩ nɛ pamɩyɩsɩ-wɛ lɩm. Ɛzɩma Bibl wɛɛ nɛ kɩlɛɣzɩɣ pe-wezuu caɣʋ yɔ, pɩwɩlɩɣ kpayɩ kpayɩ se “Ɛsɔtɔm” wɛ wezuu nɛ tɩwɛɛ ɖoŋ. Ɛsɔ tamaɣ ŋga pɔyɔɔdɩ kɔ-tɔm Bibl taa yɔ, kɛtɛm lɛɣzʋʋ ɖe-wezuu caɣʋ, nɛ kakaɣ wobu pɩ-yɔɔ nɛ kɛwɛɛnɩ ɖoŋ ɖe-wezuu caɣʋ yɔɔ tam.
(Ebree mba 6:17, 18) Mbʋ ɖɔɖɔ, alɩwaatʋ ndʋ Ɛsɔ kpaɣ lɩmaɣzɩyɛ se mba pehikiɣ lidaʋ ŋgʋ kɩ-tɔm ɛɛyɔɔdaa yɔ ɛwɩlɩɣ-wɛ kpayɩ kpayɩ nɛ pɩkɩlɩ se ɛ-tamaɣ ɛɛlɛɣzɩɣ lɛ, ɛtɩŋnɩ ɖuutu natʋyʋ yɔɔ nɛ ɛwɩlɩ se tɔm ndʋ tɩkɛ toovenim, 18 se pɩsa nɛ pɩtɩŋnɩ wondu naalɛ ndʋ tɩɩlɛɣzɩɣ, ndʋ tɩ-taa Ɛsɔ ɛɛpɩzɩɣ nɛ ɛcɛtɩ yɔ, tɩ-yɔɔ lɛ, ɖa mba ɖisewa nɛ ɖihiɣ ɖɩjɔzɩyɛ yɔ, ɖɩpɩzɩ nɛ ɖihiɣ ɖoŋ kpazʋʋ siŋŋ nɛ ɖɩɖɔkɩ lidaʋ ŋgʋ pasɩ ɖɛ-ɛsɩndaa yɔ kpam.
it-1 799 § 7
Lidaʋ
Wezuu maatɛŋ nɛ maaɖazɩɣ maaɖazɩɣ wɛtʋ lidaʋ ŋgʋ ‘mba paya-wɛ se pakpa ɛsɔdaa yɔ’ (Ebree mba 3:1) pɛwɛna yɔ, kɩkɛnɩ tɔm ndʋ papɩzɩɣ nɛ pataa liu yɔ. Lɩmaɣza naalɛ yɔɔ ɖa-taa pɩzɩɣ nɛ pɩtɛmnɩ lidaʋ ŋgʋ. Kajalaɣ lɛ, Ɛsɔ ɛɛcɛtɩɣ nɛ pʋyɔɔ lɛ, ɖɩpɩzɩɣ nɛ ɖɩtaa tɔm ndʋ liu; ɛlabɩ tamaɣ nɛ eɖuu ɛ-tɔm yɔɔ, pɩtasɩ lɛ, ɖɩwɛnɩ lidaʋ Krɩstʋ weyi ɛwɛnɩ maasɩkɩ maasɩkɩ wɛtʋ nɛ ɛwɛɛ ɛsɔdaa lɛɛlɛɛyɔ yɔ, ɛ-yɔɔ. Pʋyɔɔ pɔyɔɔdɩ lidaʋ ŋgʋ kɩ-tɔm se “kɩwɛ ɛzɩ mɛlɛ kolaɣ ŋga kɔɖɔkʋʋ kalɩzaɣ yɔ, pɩtʋʋ fɛyɩ lidaʋ ŋgʋ kɩ-yɔɔ nɛ kɩkam camɩyɛ, nɛ kiwoki pɩsaʋ wayɩ, ɖenɖe ɖɔ-yɔɔ lɛ nɔɔɖɛyʋ nɔɔyʋ sʋwa yɔ, Yesu, weyi ɛpɩsɩ cɔjɔ sɔsɔ tamtam ɛzɩ Mɛlɩkisedɛɛkɩ yɔ.”—Heb 6:17-20.
Bibl kalʋʋ
(Ebree mba 5:1-14) Mbʋ pʋyɔɔ yɔ, cɔjɔ sɔsɔ weyi palɩzɩɣ-ɩ nɛ ɛyaa hɛkʋ taa yɔ, ɛyaa mba pɔ-yɔɔ palɩzɩɣ-ɩ se ɛcɔnɩ wondu ndʋ tɩlakɩ nɔɔ kʋɖʋmaɣ nɛ Ɛsɔ yɔ tɩ-yɔɔ, se pɩsa nɛ ɛha kʋjɔŋ nɛ ɛlaa kɩlaŋ kɩwɛɛkɩm yɔɔ. 2 Ɛpɩzɩɣ nɛ ɛnɩɩ kɩɩsɩŋɩyɩŋ nɛ mba picoɖuu-wɛ yɔ pɔ-tɔm taa nɛ sɔɔlɩm, mbʋ pʋyɔɔ yɔ ɛnʋ ɖɔɖɔ ɛlʋkɩnɩ ɛ-maɣmaɣ ɛ-ɛjandʋ, 3 nɛ pʋyɔɔ lɛ, pɩwɛɛ se ɛlaa kɩlaŋ ɛ-maɣmaɣ ɛ-kɩwɛɛkɩm yɔɔ ɛzɩ ɛlaɣʋ samaɣ ñɩmbʋ yɔɔ yɔ. 4 Ɛyʋ ɛɛɖʋʋ ɛ-tɩ hɩɖɛ nɖɩ ɛ-maɣmaɣ ɛ-sɔɔlɩm taa, ɛlɛ Ɛsɔ ɖʋʋnɩ-ɩ hɩɖɛ nɖɩ alɩwaatʋ ndʋ ɛyaɣ-ɩ yɔ, ɛzɩ ɛɛyaʋ Aarɔɔnɩ yɔ. 5 Mbʋ ɖɔɖɔ, Krɩstʋ tɩsa ɛ-tɩ nɛ ɛpɩsɩ cɔjɔ sɔsɔ, ɛlɛ weyi eheyi-i se: “Ŋkɛ man-pɩyalʋ; sɔnɔ manpɩsɩ ña-caa” yɔ, ɛnʋ samnɩ-ɩ. 6 Ɛzɩ ɛyɔɔdʋʋ ɖɔɖɔ ɖoŋlɛɛɖɛ yɔ: “Ŋkɛ cɔjɔ tamtam ɛzɩ Mɛlɩkisedɛɛkɩ yɔ.” 7 Alɩwaatʋ ndʋ tɩ-taa Krɩstʋ kaacaɣ wezuu tɛtʋ yɔɔ yɔ, ɛtɩŋnɩ kubusi sɔsɔsɩ nɛ ɛsɩtɛɣlɩm yɔɔ nɛ etendi nɛ ɛpɔzɩ mbʋ ɛñɩnɩɣ yɔ Weyi ɛɛwɛnɩ ɖoŋ se ɛya ɛ-ñʋʋ sɩm nesi tɛɛ yɔ, nɛ ɛlɛ nɩɩnɩ-ɩ camɩyɛ Ɛsɔ sɔɔndʋ seu mbʋ ɛɛwɛna yɔ pɩ-yɔɔ. 8 Paa ɛɛkɛ pɩyalʋ yɔ, ɛkpɛlɩkɩ ñamtʋ kʋñɔmɩŋ weyi ɛtɔwaa yɔ ɩ-taa. 9 Nɛ pɛtɛmɩ-ɩ labʋ nɛ ɛtalɩ pilim lɛ, ɛpɩsɩ weyi ɛ-yɔɔ pɩtɩŋɩɣna se mba payɩ pañaŋɩ-ɩ yɔ, pehiɣ tamtam ñʋʋ yabɩtʋ yɔ, 10 mbʋ pʋyɔɔ yɔ Ɛsɔ lɩzɩnɩ-ɩ se ɛkɛ cɔjɔ sɔsɔ ɛzɩ Mɛlɩkisedɛɛkɩ yɔ. 11 Ðɩwɛnɩ tɔm sakɩyɛ se ɖɩyɔɔdʋʋ ɛ-yɔɔ, nɛ pɩwɛ kaɖɛ se ɖɩlɩzɩ tɩ-tɔbʋʋ, mbʋ pʋyɔɔ yɔ ɩpɩsɩ mba paanɩɣ tɔm taa lɔŋ yɔ. 12 Mbʋ pʋyɔɔ yɔ, pɩtalʋʋnɩ sɔnɔ yɔ, pɩɩwɛɛ se ɩkɛ wɩlɩyaa, ɛlɛ ɩtasɩ wɛʋ kɛdɛɖaɣ taa se nɔɔyʋ ɛwɩlɩ-mɩ Ɛsɔ tɔm kiɖeɖetu tɛ kajalaɣ wondu kpaɣnɩ kiɖe tɛɛ, nɛ mbʋ ɛzɩ ɩɩtɔɔ tɔɔnaɣ yuŋ ñɩŋga lɛ, ɩɖaɣnɩ pɩsʋʋ naalɩm wayɩ. 13 Mbʋ pʋyɔɔ yɔ weyi ewoki pɩ-yɔɔ nɛ ɛcalɩɣ ɛ-tɩ nɛ naalɩm yɔ, ɛɛsɩŋ siɣsiɣ wɛtʋ tɔm, mbʋ pʋyɔɔ yɔ ɛkɛ pɩɣa ɛjam. 14 Ɛlɛ ɛyaa mba papɩwa yɔ, mba tɩnɩ tɔɔnaɣ yuŋ ñɩŋga, mba pafalɩsɩ ɖoŋ weyi pɛwɛna se panɩɩ tɔm taa, pɩtɩŋnɩ ɛzɩma palakɩnɩ-ɩ tʋmɩyɛ se paɖʋ tʋkaɣ kɩbam nɛ kɩdɛkɛdɩm pɛ-hɛkʋ taa yɔ pɩ-yɔɔ.