MWBR19 09 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
2-8 SEPTEMBRE
ÑƖM MBƲ PƖWƐ ƐSƆTƆM TAA YƆ | EBREE MBA 7-8
“Cɔjɔ tamtam ɛzɩ Mɛlɩkisedɛɛkɩ yɔ”
(Ebree mba 7:1, 2) Mbʋ pʋyɔɔ yɔ, Mɛlɩkisedɛɛkɩ ɛnʋ, weyi ɛɛkɛ Salɛm wiyaʋ nɛ Ɛsɔ Kɩlɩm tɛ cɔjɔ yɔ, ɛkatɩ Abraham alɩwaatʋ ndʋ ɛlɛ lɩnɩ awiya ɖɩkʋyɛ nɛ ɛpɩsɩɣ yɔ, nɛ ɛwazɩ-ɩ, 2 nɛ Abraham ha-ɩ pɩtɩŋa pɩ-hɔɔlʋʋ hiu ñɩŋgʋ. Kajalaɣ lɛ, pɛɖɛzɩ ɛ-hɩɖɛ se “Siɣsiɣ Wɛtʋ Wiyaʋ,” nɛ ɛkɛ ɖɔɖɔ Salɛm wiyaʋ, pʋ-tɔbʋʋ se, “Laŋhɛzɩyɛ Wiyaʋ.”
it-2 249
Mɛlɩkisedɛɛkɩ
Ɛɛkɛ caanaʋ taa Salɛm wiyaʋ nɛ ɛɛkɛ ɖɔɖɔ Yehowa “Ɛsɔ kɩlɩm cɔjɔ.” (Kiɖe 14:18, 22) Mɛlɩkisedɛɛkɩ kɛnɩ cɔjɔ kajalaɣ ñɩnʋ weyi pɔyɔɔdɩ ɛ-tɔm Masɩ taa yɔ, nɛ ɛɛlabɩ cɔjɔtʋ tʋmɩyɛ nɖɩ alɩwaatʋ natʋyʋ pʋcɔ nɛ pɩtalɩɣ pɩnaɣ 1933 P.P.Y. Mɛlɩkisedɛɛkɩ ɛɛkɛ Salɛm wiyaʋ nɛ Salɛm tɔbʋʋ lɛ se “Laŋhɛzɩyɛ.” Pʋyɔɔ apostoloo Pɔɔlɩ ya-ɩ se “Laŋhɛzɩyɛ Wiyaʋ” nɛ ɛ-hɩɖɛ yɔɔ lɛ, ɛya-ɩ se “Siɣsiɣ Wɛtʋ Wiyaʋ” (Ebr 7:1, 2) Ɛyaa maɣzɩɣ se Caanaʋ taa Salɛm yɔɔ Yeruzalɛm tɛtʋ ñɔwa, nɛ tɛtʋ ndʋ tɩ-hɩɖɛ wɛ Yeruzalɛm taa. Nɛ nabʋyʋ taa payaɣ Yeruzalɛm se Salɛm.—Keɣa 75:3.
Abram (Abraham) wabɩ Kedɔrɩlawomɛɛrɩ nɛ awiya wena atɩnaɣ ɛ-yɔɔ nɛ pɩtɛ lɛ, ɛkɔɔ Savee fɛɛʋ taa yaa “Wiyaʋ Fɛɛʋ” taa. Peeɖe Mɛlɩkisedɛɛkɩ kɔnɩ kpɔnʋ nɛ sʋlʋm nɛ ɛwazɩ Abraham yɔɔ nɛ ɛtɔ se: “Ɛsɔ Kɩlɩm weyi ɛlɩzɩ ɛsɔdaa nɛ tɛtʋ yɔ, Ɛwazɩ Abram; Nɛ pasa ɖɔɖɔ Ɛsɔ Kɩlɩm Weyi ɛɖʋzɩ ño-koyindinaa ñe-nesi tɛɛ yɔ!” Pɩlabɩ mbʋ lɛ, Abraham ha wiyaʋ weyi ɛkɛ cɔjɔ ɖɔɖɔ yɔ “mbʋ ehiɣ you taa” yɔ “pɩtɩŋa pɩ-hɔɔlʋʋ hiu ñɩŋgʋ.”—Kiɖe 14:17-20; Ebr 7:4.
(Ebree mba 7:3) Ɛzɩma ɛtaawɛɛnɩ caa, nɛ ɖoo, nɛ liɖe, nɛ ɛzɩma patɩyɔɔdɩ ɖɔɖɔ ɛ-lʋlʋʋ nɛ ɛ-sɩm pɔ-tɔm, ɛlɛ palabɩ-ɩ ɛzɩ Ɛsɔ Pɩyalʋ yɔ pʋyɔɔ lɛ, ɛkɛɣnɩ cɔjɔ tam.
it-2 250 § 3
Mɛlɩkisedɛɛkɩ
Ɛbɛ yɔɔ pɔtɔŋ se patɩyɔɔdɩ Mɛlɩkisedɛɛkɩ ‘lʋlʋʋ nɛ ɛ-sɩm pɔ-tɔm’?
Pɔɔlɩ lɩzɩ Mɛlɩkisedɛɛkɩ yɔɔ tɔm kɩcɛyɩtʋ natʋyʋ taa nɛ ɛtɔ se “Ɛzɩma ɛtaawɛɛnɩ caa, nɛ ɖoo, nɛ liɖe, nɛ ɛzɩma patɩyɔɔdɩ ɖɔɖɔ ɛ-lʋlʋʋ nɛ ɛ-sɩm pɔ-tɔm, ɛlɛ palabɩ-ɩ ɛzɩ Ɛsɔ Pɩyalʋ yɔ pʋyɔɔ lɛ, ɛkɛɣnɩ cɔjɔ tam.” (Ebr 7:3) Ɛzɩ ɛyaa lalaa yɔ, palʋlɩ Mɛlɩkisedɛɛkɩ kɩlʋlʋʋ nɛ ɛsɩba ɖɔɖɔ. Ɛlɛ patɩyaa ɛ-caa nɛ e-ɖoo pa-hɩla, nɛ patɩyɔɔdɩ e-liɖe yɔɔ tɔm, patɩyɔɔdɩ ɖɔɖɔ alɩwaatʋ ndʋ palʋlɩ-ɩ yɔ nɛ alɩwaatʋ ndʋ ɛsɩba yɔ tɩ-tɔm. Mɛlɩkisedɛɛkɩ sɩŋnɩ Yesu Krɩstʋ weyi ɛkɛɣ cɔjɔ tam yɔ. Patɩyɔɔdɩ Masɩ taa se nɔɔyʋ kaakɛ cɔjɔ pʋcɔ nɛ Mɛlɩkisedɛɛkɩ lɛɣzɩ e-lone taa, nɛ patɩyɔɔdɩ ɖɔɖɔ se nɔɔyʋ kɔm nɛ ɛlɛɣzɩ e-lone taa pʋwayɩ. Mbʋ ɖɔɖɔ nɔɔyʋ taakɛ cɔjɔ ɛzɩ Yesu yɔ pʋcɔ nɛ Yesu mʋʋ e-lone taa, nɛ nɔɔyʋ ɖɔɖɔ ɛɛkaɣ mʋʋ e-lone taa. Pɩtasɩ lɛ, paa Yesu ɛlɩnɩ Yuuda cejewiye taa nɛ ɛ-cɔzɔ kɛnɩ Daviid yɔ, ɛ-cɔzɔ nɔɔyʋ tɩlɩɩnɩ cɔjɔtʋ cejewiye taa nɛ nɔɔyʋ taakɛ wiyaʋ nɛ ɛtɛ ɛkɛ ɖɔɖɔ cɔjɔ. Yehowa labɩnɩ-ɩ tamaɣ se ɛhaɣ-ɩ wala ana.
(Ebree mba 7:17) Mbʋ pʋyɔɔ yɔ, palɩzɩ ɛ-yɔɔ aseɣɖe ɖɩnɛ: “Ŋkɛ cɔjɔ tamtam ɛzɩ Mɛlɩkisedɛɛkɩ yɔ.”
it-2 249
Mɛlɩkisedɛɛkɩ
Cɔjɔtʋ ndʋ tɩnɩɣzɩnɩ Krɩstʋ ñɩndʋ yɔ. Natʋ tɔm natʋyʋ, ndʋ titukuuni Mesiya yɔ tɩ-taa, Yehowa yɔɔdaɣnɩ Daviid “Kɩbaɣlʋ” lɛ, ɛlabɩ-ɩ tamaɣ se: “Ŋkɛ [cɔjɔ] tam ɛzɩ Mɛlɩkisedɛɛkɩ yɔ.” (Keɣa 109:1, 4) Natʋ tɔm ndʋ tɩwɩlɩ Ebree mba kpayɩ kpayɩ se Mesiya weyi ɛkaɣ kɔm yɔ, ɛkaɣ kɛʋ wiyaʋ nɛ cɔjɔ. Apostoloo Pɔɔlɩ yɔɔdɩ weyi ɛkɛ Mesiya ɛnʋ yɔ ɛ-tɔm takayaɣ ŋga ɛma Ebree mba yɔ ka-taa alɩwaatʋ ndʋ ɛmawa se “Yesu, weyi ɛpɩsɩ cɔjɔ sɔsɔ tamtam ɛzɩ Mɛlɩkisedɛɛkɩ yɔ.”—Ebr 6:20; 5:10; kalɩ ALLIANCE.
Ðɩñɩnɩ fezuu taa ñɩm
(Ebree mba 8:3) Mbʋ pʋyɔɔ yɔ paa cɔjɔ sɔsɔ weyi lɛ, palɩzɩɣ-ɩ se ɛha kʋjɔŋ nɛ ɛlaa kɩlaŋ; pʋyɔɔ pɩɩcɛyaa se ɛnɛ ɖɔɖɔ lɛ, ɛwɛɛnɩ nabʋyʋ se ɛha.
w00 15/8 14 § 11
Kɩlaŋ weyi ɩkɛdɩɣnɩ Ɛsɔ yɔ
Apostoloo Pɔɔlɩ mawa se: “Paa cɔjɔ sɔsɔ weyi lɛ, palɩzɩɣ-ɩ se ɛha kʋjɔŋ nɛ ɛlaa kɩlaŋ.” (Ebree mba 8:3) Yʋsɩ se apostoloo Pɔɔlɩ yɔɔdɩ “kʋjɔŋ” nɛ “kɩlaŋ” yaa “kɩlaŋ kɩwɛɛkɩm yɔɔ” pɔ-tɔm. (Ebree mba 5:1) Ðoŋ ɖoŋ lɛ, ɛyaa lakɩ kʋjɔŋ se pawɩlɩ pɔ-sɔɔlɩm nɛ pɛ-ɛsɩmɩyɛ yaa se paɖʋ taabalɩyɛ, pehiɣ lootiye nɛ pɔ-tɔm kɛdɩnɩ lalaa. (Kiɖe Tɛɛ Tɔm 32:20; Aduwa 18:16) Mbʋ ɖɔɖɔ Moyizi Paɣtʋ tɛɛ, alɩwaatʋ ndʋ samaɣ lakɩ haɖɛ naɖɩyɛ Ɛsɔ yɔ, pɩwɛ ɛzɩ kalabɩ-ɩ “kʋjɔŋ” se pɩsa nɛ kɔ-tɔm kɛdɩnɩ-ɩ nɛ ɛlabɩ-kɛ lootiye yɔ. Ye nɔɔyʋ ɛmanɩ paɣtʋ yɔɔ yɔ, pɩwɛɛ se ɛlaa kɩlaŋ weyi payaɣ se “kɩlaŋ kɩwɛɛkɩm yɔɔ” yɔ. Bibl taa kajalaɣ takayɩsɩ kagbanzɩ, kɔzɩ kɔzɩ Ejipiti Lɩʋ, Levitiki nɛ Kɩgalʋʋ wɩlɩɣ tomnaɣ yɔɔ wondu ndɩ ndɩ ndʋ pɩpɔzʋʋ se pakpaɣ nɛ pahanɩ kʋjɔŋ yaa palaanɩ kɩlaŋ yɔ. Paa pɩpɩzɩɣ pɩwɛɛ-ɖʋ kaɖɛ se ɖɩtɔzɩ wondu ndɩ ndɩ ndʋ tɩ-yɔɔ yɔ, pɩwɛɛ se ɖɩtɩlɩ tɔm kɩcɛyɩtʋ natʋyʋ pɩlɩɩnɩ kɩlaŋ ndɩ ndɩ weyi palaɣaɣ yɔ ɩ-yɔɔ.
(Ebree mba 8:13) Ɛyɔɔdʋʋ se “ɛgbɛyɛ kɩfaɖɛ” yɔ, pɩwɩlɩɣ se ɛlaba nɛ kajalaɣ ñɩnɖɛ pɩsɩ mbʋ pɩpɩnaa yɔ. Ŋgʋ, mbʋ pɩpɩnaa nɛ pɩkpadɩyɩɣ yɔ, pɩwɩzɩ mʋʋʋ.
it-1 79 § 7
Ɛgbɛyɛ
Ɛzɩma tɩyɛ Paɣtʋ ɛgbɛyɛ “pɩsɩ mbʋ pɩpɩnaa yɔ”?
Ɛlɛ Paɣtʋ ɛgbɛyɛ pɩsɩ mbʋ pɩpɩnaa yɔ, alɩwaatʋ ndʋ Yehowa tɩŋnɩ nayʋ Yereemii yɔɔ nɛ ɛyɔɔdɩ ɛgbɛyɛ kɩfaɖɛ tɔm yɔ. (Yer 31:31-34; Ebr 8:13) Pɩnaɣ 33 taa Paɣtʋ ɛgbɛyɛ sɩ tɩnaɣ alɩwaatʋ ndʋ Yesu sɩbɩ nazɩm sizika yɔɔ yɔ (Kol 2:14), nɛ pɛlɛɣzɩ-ɖɩ nɛ ɛgbɛyɛ kɩfaɖɛ.—Ebr 7:12; 9:15; Tʋm 2:1-4.
9-15 SEPTEMBRE
ÑƖM MBƲ PƖWƐ ƐSƆTƆM TAA YƆ | EBREE MBA 9-10
“Wondu kɩbandʋ ndʋ tɩkaɣ kɔm yɔ tɩ-kɩlɛmʋʋ”
(Ebree mba 9:12-14) Ɛsʋ lone kiɖeɖee taa, pɩtɩkɛ pʋŋ nɛ newee abalɩñɩna calɩm ɛkpɛndɩnaa nɛ ɛsʋʋ, ɛlɛ ɛ-maɣmaɣ ɛ-calɩm tam kʋɖʋm nɛ pɩkpaɣ pɩɖɛɛ, nɛ ehiɣ-ɖʋ tamtam ñʋʋ yabɩtʋ. 13 Mbʋ pʋyɔɔ yɔ ye pʋŋ nɛ naŋ abalɩñɩŋ calɩm nɛ neɣye halɩñɩnɖɛ tɔlɩma wena pamɩzɩɣ ɛyaa mba pɛwɛnɩ azuluma yɔ pɔ-yɔɔ yɔ, piyeki se tomnaɣ ɛwɛɛ kele kele yɔ, 14 Krɩstʋ weyi pɩtɩŋnɩ tamtam fezuu nakʋyʋ yɔɔ nɛ ɛha ɛ-maɣmaɣ ɛ-tɩ Ɛsɔ nɛ ɛfɛyɩnɩ azuluma yɔ, ɛ-calɩm ɛɛkaɣ labʋ mbʋ nɛ pɩkɩlɩ yaa we? Ɛ-calɩm ñalɩɣ ɖɛ-ɛhʋyɛ yɔɔ tʋma kɩsɩba, se pɩsa nɛ ɖɩpɩzɩ ɖɩla tʋmɩyɛ kiɖeɖee Ɛsɔ ɛsadʋ.
it-2 490 § 6
Kpaɣʋ nɛ kpeɣu
Paɣtʋ ndʋ Ɛsɔ kaaha Izrayɛɛlɩ piya yɔ tɩ-taa, ye nɔɔyʋ ɛlabɩ kɩwɛɛkɩm Ɛsɔ yaa e-koobu nɔɔyʋ yɔɔ yɔ, pʋcɔ nɛ pakpaɣ nɛ pekpeɣ-i lɛ, pɩpɔzʋʋ se ɛñɔɔzɩ mbʋ ɛwɛɛkaa yɔ ɛzɩ Paɣtʋ pɔzʋʋ yɔ, nɛ ɖoŋ ɖoŋ lɛ, pɩpɔzʋʋ se ɛlaa kɩlaŋ weyi ɩ-taa peliziɣ calɩm yɔ. (Lev 5:5–6:7) Pʋyɔɔ Pɔɔlɩ yɔɔdɩ tɔm tʋnɛ: “Ɛɛɛ, ɛzɩ pɩwɛʋ Paɣtʋ taa yɔ, mbʋ pɩkazaa se calɩm ɛɛñalɩɣ-pʋ nɛ pɩwɛɛ kele kele yɔ pɩtɩɖɔɔ, nɛ ye patɩpɩyɩ calɩm yɔ kɩwɛɛkɩm kpeɣu fɛyɩ.” (Ebr 9:22) Ɛlɛ toovenim taa lɛ, kpɩna calɩm ɛɛpɩzɩɣ nɛ pɩhɩzɩ kɩwɛɛkɩm nɛ pɩha ɛyʋ ɛhʋyɛ nɖɩ ɖɩwɛ kele kele nɛ ɖɩtalɩ pilim yɔ. (Ebr 10:1-4; 9:9, 13, 14) Ɛlɛ pɩtɩŋnɩ Yesu Krɩstʋ kɩlaʋ sɩm yɔɔ lɛ, ɛgbɛyɛ kɩfaɖɛ yeki se ɛyaa ihiɣ pa-kɩwɛɛkɩm kpaɣʋ nɛ kpeɣu. (Yer 31:33, 34; Mt 26:28; 1Kɔ 11:25; Efɛ 1:7) Alɩwaatʋ ndʋ Yesu kaawɛ tɛtʋ yɔɔ yɔ, ɛwaɣaɣ kaakalaɣ nakɛyɛ lɛ, ɛwɩlaa se ɛwɛnɩ ɖoŋ se ekpeɣ kɩwɛɛkɩm.—Mt 9:2-7.
(Ebree mba 9:24-26) Mbʋ pʋyɔɔ yɔ Krɩstʋ tɩsʋʋ lone kiɖeɖee nɖɩ palabɩnɩ nesi yɔ ɖɩ-taa, nɖɩ ɖɩkɛ pʋyʋ keem lɛzʋʋ yɔ, ɛlɛ ɛsʋ ɛsɔdaa maɣmaɣ, se pɩsa nɛ lɛɛlɛɛyɔ lɛ, ɛlɩɩ Ɛsɔ ɛsɩndaa ɖɔ-yɔɔ. 25 Ɛtɩla mbʋ se ɛhaɣ ɛ-tɩ ɖoŋ ɖoŋ, ɛzɩ alɩwaatʋ ndʋ cɔjɔ sɔsɔ kpɛndaɣnɩ calɩm mbʋ pɩtɩkɛ ɛ-ñɩmbʋ yɔ nɛ ɛsʋʋ lone kiɖeɖee taa paa pɩnaɣ ŋga yɔ. 26 Ye pɩɩkɛ mbʋ yɔ, pɩɩpɔzaa se ɛwɛɛ nɛ ɛtɔkɩ kʋñɔŋ ɖoŋ ɖoŋ kpaɣnɩ alɩwaatʋ ndʋ pasɩ ɛjaɖɛ tigiɖe yɔ. Ɛlɛ lɛɛlɛɛyɔ lɛ, ɛlɩzɩ ɛ-tɩ nɛ ɛwɩlɩ tam kʋɖʋm nɛ pɩkpaɣ pɩɖɛɛ, ɛjaɖɛ yɔɔ ɖʋtʋ tɛmtʋ alɩwaatʋ taa, se ɛɖɩzɩ kɩwɛɛkɩm pɩtɩŋnɩ ɛzɩma ɛla ɛ-maɣmaɣ ɛ-tɩ yɔ pɩ-yɔɔ.
cf 183 § 4
“Wɛɛ nɛ ŋtɩŋɩɣ ma-wayɩ”
Yesu pɩsɩ ɛsɔdaa lɛ, Masɩ tiheyi-ɖʋ ɛzɩma pamʋ-ɩ yɔ nɛ ɛzɩma pɩlabɩ-ɩ leleŋ se ɛpɩsɩ ɛ-Caa cɔlɔ yɔ pɩ-tɔm. Ɛlɛ, Bibl heyi-ɖʋ mbʋ pɩkaɣ labʋ alɩwaatʋ ndʋ Yesu pɩsɩɣ ɛsɔdaa nɛ pɩtɛ lɛ. Pɩnzɩ nzɩ sɩcɛzɩ 1500 yɔ sɩ-taa Yuuda ñɩma lakaɣ kele kele sɔnzɩ nasɩyɩ paa pɩnaɣ ŋga. Paa pɩnaɣ ŋga lɛ, cɔjɔ sɔsɔ sʋwaɣ Lone Kiɖeɖee Sɔsɔyɛ taa tam kʋɖʋmam Kɩwɛɛkɩm Hɩzʋʋ Kɩyakʋ wiye, nɛ ɛmɩzɩɣ calɩm ɛgbɛyɛ aɖakaɣ yɔɔ. Kɩyakʋ ŋgʋ ki-wiye lɛ, cɔjɔ sɔsɔ lakaɣ tʋmɩyɛ nɖɩ Mesiya kɔŋaɣ labʋ yɔ. Yesu pɩsɩ ɛsɔdaa lɛ, ɛlabɩ sɔnzɩ nzɩ tam kʋɖʋmam nɛ pɩkpaɣ nɛ pɩɖɛɛ. Eewobi Yehowa maɣmaɣ ɛsɩndaa, pɩ-tɔbʋʋ se lone kiɖeɖee sɔsɔyɛ nɖɩ ɖɩwɛ ɛsɔdaa yɔ ɖɩ-taa, nɛ ɛwɩlɩ ɛ-Caa ɛ-kɩlaʋ wazasɩ. (Ebree mba 9:11, 12, 24) Yehowa tisaa nɛ ɛmʋ mbʋ Yesu woni ɛ-ɛsɩndaa yɔ?
(Ebree mba 10:1-4) Mbʋ pʋyɔɔ yɔ ɛzɩma Paɣtʋ wɛnɩ wondu kɩbandʋ ndʋ tɩkaɣ kɔm yɔ tɩ-kɩlɛmʋʋ, ɛlɛ pɩtɩkɛ wondu ndʋ tɩ-maɣmaɣ yɔ pʋyɔɔ lɛ, tɩɩpɩzɩɣ kpa nɛ tɩtɩŋnɩ kɩlaŋ kʋɖʋmɩŋ ɛnɩ, weyi palaɣ tam paa pɩnaɣ ŋga yɔ ɩ-yɔɔ nɛ tiyele nɛ mba pɔñɔtʋʋnɩ Ɛsɔ yɔ patalɩ pilim. 2 Ye pɩɩkɛ mbʋ yɔ, pataayele kɩlaŋ laʋ yaa we? Mbʋ pʋyɔɔ yɔ, pɩɩwɩlaa se mba palakɩ tʋmɩyɛ kiɖeɖee yɔ pɛtɛŋ-wɛ ñalʋʋ nɛ papɩsɩ kele kele lɛ, pɩɩtasɩɣ-wɛ cɛyʋʋ se palakɩ kɩwɛɛkɩm. 3 Ɛlɛ kɩlaŋ ɛnɩ, ɩtɔzʋʋ ɛyaa pa-kɩwɛɛkɩm yɔɔ paa pɩnaɣ ŋga, 4 mbʋ pʋyɔɔ yɔ naŋ abalɩñɩŋ nɛ pʋŋ calɩm ɛɛpɩzɩɣ nɛ pɩlɩzɩ kɩwɛɛkɩm.
it-2 547-549
Pilim wɛtʋ
Moyizi Paɣtʋ pilim wɛtʋ. Paɣtʋ ndʋ Ɛsɔ tɩŋnɩ Moyizi yɔɔ nɛ ɛha Izrayɛɛlɩ mba yɔ, tɩyɔɔdɩ cɔjɔtʋ nɛ kpɩna kɩlaŋ ndɩ ndɩ tɔm. Ɛlɛ paa Paɣtʋ ndʋ tɩwɛ pilim mbʋ pʋyɔɔ tɩlɩnɩ Ɛsɔ cɔlɔ yɔ, ɛzɩ apostoloo Pɔɔlɩ yɔɔdʋʋ yɔ, Paɣtʋ maɣmaɣ, cɔjɔtʋ nɛ kɩlaŋ ndɩ ndɩ taayeki se mba pɛwɛ Paɣtʋ ndʋ tɩ-tɛɛ yɔ patalɩ pilim. (Ebr 7:11, 19; 10:1) Paɣtʋ ndʋ, tɩtaalɩzɩ ɛyaa kɩwɛɛkɩm nɛ sɩm yomiye taa, ɛlɛ tiyeba se patɩlɩ kɩwɛɛkɩm camɩyɛ. (Rom 3:20; 7:7-13) Mbʋ mbʋ payɩ pɩ-tɔm Paɣtʋ yɔɔdʋʋ yɔ, pɩlabɩ nɔɔ kʋɖʋmaɣ nɛ Ɛsɔ tamaɣ; Paɣtʋ kaakɛnɩ ‘yɔɔ kandɩyʋ’ weyi ewokini Krɩstʋ cɔlɔ yɔ, “wondu kɩbandʋ ndʋ tɩkaɣ kɔm yɔ tɩ-kɩlɛmʋʋ.” (Gal 3:19-25; Ebr 10:1) Ye mbʋ alɩwaatʋ ndʋ apostoloo Pɔɔlɩ yɔɔdɩ “mbʋ Paɣtʋ taapɩzɩɣ labʋ mbʋ pʋyɔɔ yɔ tɩɩwɛnɩ ɛjandʋ pɩtɩŋnɩ tomnaɣ yɔɔ yɔ” pɩ-tɔm yɔ (Rom 8:3), pɩtʋʋ fɛyɩ se ɛzɩ Ebree mba 7:11, 18-28 lɩzʋʋ pɩ-taa yɔ, ɛzɩma Yuuda ñɩma tɛ cɔjɔ sɔsɔ (weyi patɩŋnɩ Paɣtʋ yɔɔ nɛ palɩzɩ nɛ ɛwɛɛnɩ waɖɛ se ɛlaa kɩlaŋ ndɩ ndɩ nɛ ɛsʋʋ ɖɔɖɔ Lone Kiɖeɖee Sɔsɔyɛ taa Kɩwɛɛkɩm Hɩzʋʋ Kɩyakʋ wiye nɛ ɛmɩzɩ kpɩna calɩm yɔ) taapɩzɩɣ se ɛya mba patɩŋɩɣnɩ ɛ-yɔɔ nɛ pɔñɔtʋʋnɩ Ɛsɔ yɔ “pa-ñʋʋ pilim” yɔ pɩ-tɔm ɛyɔɔdaɣ. Aarɔɔnɩ liɖe taa cɔjɔnaa laɣaɣ kɩlaŋ weyi yɔ, ɛsɩɣaɣnɩ samaɣ se kehiɣ Ɛsɔ lootiye, ɛlɛ ɩtaahɩzɩɣ ka-kɩwɛɛkɩm cɩɖɩ cɩɖɩ. Pɩ-tɔm apostoloo Pɔɔlɩ yɔɔdaɣ alɩwaatʋ ndʋ ɛtɔm se kɩwɛɛkɩm hɩzʋʋ kɩlaŋ iiyeki se “mba pɔñɔtʋʋnɩ Ɛsɔ yɔ patalɩ pilim” yɔ. (Ebr 10:1-4; kpaɣ-tʋ nɛ ŋmaɣzɩnɩ Ebr 9:9.) Cɔjɔ sɔsɔ taapɩzɩɣ se ɛlaa kɩlaʋ ŋgʋ kiyeki se pahɩzɩ kɩwɛɛkɩm cɩɖɩ cɩɖɩ yɔ. Krɩstʋ kɩlaʋ nɛ ɛ-cɔjɔtʋ tʋmɩyɛ ɖeke pɩzɩɣna nɛ pɩla tʋmɩyɛ nɖɩ.—Ebr 9:14; 10:12-22.
Ðɩñɩnɩ fezuu taa ñɩm
(Ebree mba 9:16, 17) Mbʋ pʋyɔɔ yɔ ɖenɖe ɛgbɛyɛ ɖʋʋ wɛɛ yɔ, pɩpɔzʋʋ se ɛyʋ weyi ɛɖʋ ɛgbɛyɛ yɔ, pana ɛ-sɩm, 17 mbʋ pʋyɔɔ yɔ sɩm yekina nɛ ɛgbɛyɛ wɛɛ wazaɣ, mbʋ pʋyɔɔ yɔ ɖɩfɛyɩnɩ ɖoŋ alɩwaatʋ ndʋ weyi ɛɖʋ-ɖɩ yɔ ɛkpɛndɩ ɛwɛ wezuu yɔ.
w92 1/3 31 § 4-6
Tɔm ndʋ ɖa-takayɩsɩ kalɩyaa pɔzʋʋ yɔ
Pɔɔlɩ yɔɔdaa se pɩpɔzʋʋ sɩm pʋcɔ nɛ ɛgbɛyɛ wɛɛ Ɛsɔ nɛ ɛyaa pɛ-hɛkʋ taa. Kɩɖaʋ nakʋyʋ lɛ Paɣtʋ ɛgbɛyɛ. Moyizi kaakɛnɩ loliyu Ɛsɔ nɛ tomnaɣ yɔɔ Izrayɛɛlɩ pɛ-hɛkʋ taa. Moyizi kaalabɩ tʋmɩyɛ sɔsɔɖɛ siŋŋ nɛ ɛnʋ kaayɔɔdɩnɩnɩ Izrayɛɛlɩ piya alɩwaatʋ ndʋ paɖʋwaɣ ɛgbɛyɛ nɖɩ yɔ. Paa mbʋ yɔ, pɩtɩkɛ Moyizi cɔlɔ ɛgbɛyɛ nɖɩ ɖɩlɩnaa, Yehowa maɣmaɣ cɔlɔ Paɣtʋ ɛgbɛyɛ lɩnaa. Ɛlɛ ɛzɩ Moyizi kaakpɛdɩ ɛ-calɩm se pɩsa nɛ paɖʋ ɛgbɛyɛ nɖɩ? Aayɩ. Kpɩna calɩm paalizi Moyizi calɩm lone taa.—Ebree mba 9:18-22.
Nɛ ɛgbɛyɛ kɩfaɖɛ nɖɩ ɖɩwɛ Yehowa nɛ fezuu taa Izrayɛɛlɩ pɛ-hɛkʋ taa yɔ? Yesu wɛnɩnɩ waɖɛ sɔsɔɖɛ se ɛkɛnɩ Loliyu Yehowa nɛ fezuu taa Izrayɛɛlɩ pɛ-hɛkʋ taa. Ɛlɛ Yehowa cɔlɔ ɛgbɛyɛ nɖɩ ɖɩlɩnaa; Yesu yɔɔ ɛtɩŋnaa nɛ ɛɖʋ-ɖɩ. Ɛzɩma Yesu kɛnɩnɩ Loliyu yɔ pʋyɔɔ lɛ, ɛ nɛ ɛyaa kajalaɣ ñɩma mba paawɛ ɛgbɛyɛ nɖɩ ɖɩ-taa yɔ, paakɛ ɛgbaɣdɩnaa. (Luka 22:20, 28, 29) Pɩtasɩ lɛ, ɛnʋ mʋnɩna se ɛlaa kɩlaʋ ŋgʋ kɩ-yɔɔ patɩŋɩɣna nɛ paɖʋ ɛgbɛyɛ nɖɩ yɔ. Pɩtɩkɛ kpɩna ɛkpaɣ nɛ ɛlaa kɩlaʋ ɛlɛ e-wezuu ŋgʋ kɩtalɩ pilim yɔ, ŋgʋ ɛkpaɣ nɛ ɛlaa. Pʋyɔɔ apostoloo Pɔɔlɩ yɔɔdɩ Yesu tɔm se ɛkɛnɩ ɛyʋ weyi ɛɖʋ ɛgbɛyɛ kɩfaɖɛ yɔ. “Krɩstʋ . . . [sʋ] ɛsɔdaa maɣmaɣ, se pɩsa nɛ lɛɛlɛɛyɔ lɛ, ɛlɩɩ Ɛsɔ ɛsɩndaa ɖɔ-yɔɔ” nɛ piyele nɛ ɛgbɛyɛ kɩfaɖɛ paɣzɩ ɖɩ-tʋmɩyɛ.—Ebree mba 9:12-14, 24.
Pɔɔlɩ yɔɔdʋʋ Moyizi nɛ Yesu pɔ-tɔm se pɛkɛ ɛyaa mba paɖʋ agbaa yɔ, pɩɩwɩlɩɣ se pɔ-cɔlɔ agbaa ana alɩnaa, ɛlɛ Ɛsɔ cɔlɔ alɩnaa. Ɛlɛ pɛkɛ loliyaa mba paɖʋ nesi nɛ paɖʋ agbaa ana yɔ. Nɛ paa ɛgbɛyɛ nɖɩ ɖɩ-hɔɔlʋʋ taa lɛ, pɩpɔzɩ sɩm: Paakʋ kpɩna Moyizi lone taa, nɛ Yesu hɔɔlʋʋ taa lɛ, ɛla ɛ-maɣmaɣ e-wezuu mba pɛwɛ ɛgbɛyɛ kɩfaɖɛ taa yɔ pɔ-yɔɔ.
(Ebree mba 10:5-7) Pʋyɔɔ alɩwaatʋ ndʋ ɛkɔm ɛjaɖɛ yɔɔ yɔ, ɛyɔɔdaa se: “‘Ŋtɩsɔɔlɩ kɩlaŋ nɛ haɖɛ, ɛlɛ ŋñɔɔzɩ-m tomnaɣ. 6 Kɩlaŋ kɩñaɣzɩŋ nɛ kɩwɛɛkɩm kɩlaŋ tɩkɛdɩnɩ-ŋ.’ 7 Ðɩnɛ ɛlɛ mɔntɔ se: ‘Na! Mɔnkɔm (pama mɔn-tɔm takayaɣ kikpiyaɣ taa) se mala ñɔ-sɔɔlɩm, hayɩ Ɛsɔ.’”
it-1 263-264
Lɩm mɩyɩsʋʋ
Luka yɔɔdaa se alɩwaatʋ ndʋ pamɩyɩsaɣ Yesu lɩm yɔ, ɛɛwɛɛ nɛ ɛtɩmɩɣ. (Lk 3:21) Pʋwayɩ, Ebree mba takayaɣ mayʋ yɔɔdɩ Yesu tɔm se “ɛkɔm ɛjaɖɛ yɔɔ” (pɩtɩkɛ ɛ-lʋlʋʋ tɔm pɔyɔɔdʋʋ, mbʋ pʋyɔɔ yɔ, alɩwaatʋ ndʋ palʋlɩ-ɩ yɔ, ɛtaapɩzɩɣ se ɛkalɩ nɛ ɛyɔɔdɩ tɔm tʋnɛ, ɛlɛ alɩwaatʋ ndʋ pamɩyɩsɩ-ɩ lɩm nɛ ɛpaɣzɩ tɔm susuu yɔ tɩ-tɔm pɔyɔɔdʋʋ), ɛtɩŋnɩ tɔm ndʋ tɩwɛ Keɣa 39:7-9 yɔ tɩ-yɔɔ nɛ ɛyɔɔdɩ se: “Ŋtɩsɔɔlɩ kɩlaŋ nɛ haɖɛ, ɛlɛ ŋñɔɔzɩ-m tomnaɣ. . . . Na! Mɔnkɔm (pama mɔn-tɔm takayaɣ kikpiyaɣ taa) se mala ñɔ-sɔɔlɩm, hayɩ Ɛsɔ.” (Ebr 10:5-9) Yesu kaakɛ Yuuda tʋ, nɛ ɛgbɛyɛ naɖɩyɛ kaawɛ Yuuda mba nɛ Ɛsɔ pɛ-hɛkʋ taa, nɖɩ lɛ Paɣtʋ ɛgbɛyɛ. (Ejl 19:5-8; Gal 4:4) Lɩmaɣzɩyɛ nɖɩ ɖɩ-yɔɔ lɛ, ɛgbɛyɛ naɖɩyɛ kaatɛm wɛʋ Yehowa nɛ Yesu pɛ-hɛkʋ taa pʋcɔ nɛ ewoki se Yohanɛɛsɩ ɛmɩyɩsɩ-ɩ lɩm. Pɩwɩlɩɣ se Yesu laba nɛ pɩkpaɖɩ mbʋ paɣtʋ pɔzaɣ-ɩ yɔ. Ewobi ɛ-Caa Yehowa ɛsɩndaa se ɛla ɛ-Caa “sɔɔlɩm.” Ɛ-Caa sɔɔlɩm mbʋ lɛ se ɛñɔɔzɩ ɛ-maɣmaɣ e-tomnaɣ nɛ palabɩnɩ kɩlaʋ ŋgʋ kɩnɩɣzɩnɩ kpɩna kɩlaŋ weyi palaɣaɣ Paɣtʋ tɛɛ yɔ. Apostoloo Pɔɔlɩ yɔɔdɩ pɩ-tɔm se: “Pɩtɩŋnɩ ‘sɔɔlɩm’ mbʋ pɩ-yɔɔ lɛ, papɩsɩ-ɖʋ kele kele tɩnaa pɩtɩŋnɩ ɛzɩma Yesu Krɩstʋ la e-tomnaɣ tam kʋɖʋm nɛ pɩkpaɣ pɩɖɛɛ yɔ pɩ-yɔɔ.” (Ebr 10:10) Ɛ-Caa sɔɔlɩm ɖɔɖɔ lɛ se ɛla Kewiyaɣ tʋma, nɛ tʋma ana a-yɔɔ ɖɔɖɔ Yesu wobi ɛ-Caa ɛsɩndaa. (Lk 4:43; 17:20, 21) Yehowa tisaa nɛ ɛmʋ ɛ-Pɩyalʋ kɩlaʋ nɛ ɛta-ɩ num nɛ fezuu kiɖeɖeu nɛ ɛtɔ se: “Ŋkɛ man-Pɩyalʋ, weyi mɔnsɔɔlɩ-ɩ yɔ; ñɔ-tɔm kɛdɩnɩ-m.”—Mk 1:9-11; Lk 3:21-23; Mt 3:13-17.
16-22 SEPTEMBRE
ÑƖM MBƲ PƖWƐ ƐSƆTƆM TAA YƆ | EBREE MBA 11
“Mbʋ pʋyɔɔ tisuu tɔm cɛyaa yɔ”
(Ebree mba 11:1) Tisuu kɛnɩ mbʋ ɖɩtaɣ liu yɔ pɩ-ɖaŋʋʋ kpam, mbʋ pɩwɛ keekee ɛlɛ paanaɣ-pʋ yɔ pɩ-wɩlʋʋ kaɣlaa.
Ɩwɛɛnɩ tisuu Yehowa lidaʋ tɔm yɔɔ
6 Ebree 11:1 wɩlɩɣ-ɖʋ mbʋ tisuu kɛnaa yɔ. (Kalɩ Ebree 11:1.) (1) Tisuu kɛ “lidaʋ” ŋgʋ ɖɩwɛnɩ mbʋ ɖɩɖaŋaa yɔ pɩ-yɔɔ yɔ. Pɩ-taa nabʋyʋ lɛ wazasɩ nzɩ Yehowa yɔɔdaa se ɛkaɣ-ɖʋ kɔnʋʋ cee wayɩ yɔ. Ɛyɔɔdaa se ɛkaɣ ɖezuu kañatʋ lakasɩ nɛ ɛkɔnɩ ɛjaɖɛ kɩfaɖɛ, nɛ ɖɩɩpɩtɩɣ se ɛkaɣ labʋ mbʋ. (2) Tisuu kɛ ɖɔɖɔ mbʋ pɩwɛ keekee ɛlɛ ‘paanaɣ-pʋ’ yɔ. Mbʋ pɩwɛ keekee ɛlɛ paanaɣ-pʋ yɔ pɩ-taa nabʋyʋ lɛ Yehowa, Yesu, Ɛsɔ tiyiyaa nɛ Ɛsɔ Kewiyaɣ. (Ebr. 11:3) Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ lidaʋ nɛ ɖɩɩpɩtɩɣ mbʋ Bibl tɔŋ se pɩwɛɛ, ɛlɛ ɖɩɩnaɣ-pʋ yɔ pɩ-yɔɔ? Pɩwɛɛ se ɖɩtɩŋnɩ ɖe-wezuu caɣʋ, ɖɔ-yɔɔdaɣ nɛ ɖa-lakasɩ yɔɔ nɛ ɖɩwɩlɩ se ɖɩwɛnɩ lidaʋ ŋgʋ.
(Ebree mba 11:6) Pɩtasɩ lɛ, tisuu ɛfɛyɩ kɔyɔ, ɛyʋ tɔm ɛɛpɩzɩɣ nɛ tɩkɛdɩnɩ Ɛsɔ, mbʋ pʋyɔɔ yɔ weyi ɛñɔtʋʋnɩ Ɛsɔ yɔ, pɩwɛɛ se etisi se ɛwɛɛ nɛ ɛhɛyɩɣ mba pañɩnɩɣ-ɩ siŋŋ yɔ.
w13 1/11 11 § 2-5
“Ɛhɛyɩɣ mba pañɩnɩɣ-ɩ siŋŋ yɔ”
Ɛbɛ pɩwɛɛ se ɛyʋ ɛla nɛ ɛ-tɔm kɛdɩnɩ Yehowa? Pɔɔlɩ mawa se: “Tisuu ɛfɛyɩ kɔyɔ, ɛyʋ tɔm ɛɛpɩzɩɣ nɛ tɩkɛdɩnɩ Ɛsɔ.” Yʋsɩ se Pɔɔlɩ tɩyɔɔdɩ se pɩwɛɣ kaɖɛ se ɛyʋ tɔm ɛkɛdɩnɩ Ɛsɔ, ye ɛfɛyɩnɩ tisuu yɔ. Ɛlɛ ɛtɔm se ɛ-tɔm ɛɛpɩzɩɣ nɛ tɩkɛdɩnɩ Ɛsɔ. Ye mbʋ, pɩcɛyɩ siŋŋ se ɛyʋ ɛwɛɛnɩ tisuu pʋcɔ nɛ ɛ-tɔm kɛdɩnɩ Ɛsɔ.
Tisuu mbʋ pɩwɛɛ se ɛyʋ ɛwɛɛna nɛ ɛ-tɔm kɛdɩnɩ Ɛsɔ? Pɩwɛɛ se tisuu mbʋ ɖɩwɛnɩ Ɛsɔ yɔɔ yɔ, pɩwɛɛnɩ hɔɔlɩŋ naalɛ. Kajalaɣ lɛ, pɩwɛɛ se ‘ɖitisi se ɛwɛɛ.’ Pɛɖɛzɩ tɔm ndʋ Biblwaa nabɛyɛ taa se: “Ðɩwɛɛnɩ tisuu se toovenim lɛ ɛwɛɛ” nɛ “ɖɩtaapɩtɩ se ɛwɛɛ.” Ɛzɩma ɖɔ-tɔm pɩzɩɣ nɛ tɩkɛdɩnɩ Ɛsɔ ye ɖɩpɩtɩɣ se ɛwɛɛ yɔ? Ɛlɛ pɩfɛyɩ se ɖe-tisuu ɛsɩɩnɩ peeɖe, mbʋ pʋyɔɔ yɔ halɩ aleewaa tisiɣ ɖɔɖɔ se Yehowa wɛɛ. (Yakubu 2:19) Pɩwɛɛ se tisuu mbʋ ɖɩwɛnɩ Ɛsɔ yɔɔ yɔ, pituyi-ɖʋ nɛ ɖɩcaɣ wezuu ŋgʋ kɩkɛdɩɣnɩ-ɩ yɔ.—Yakubu 2:20, 26.
Nabʋlɛ lɛ, pɩwɛɛ se ɖitisi se “ɛhɛyɩɣ mba pañɩnɩɣ-ɩ siŋŋ yɔ.” Weyi ɛwɛnɩ tisuu siŋŋ Ɛsɔ yɔɔ yɔ, ɛɛpɩtɩɣ se ɛkaɣ-ɩ hɛyʋʋ pana wena ɛñakɩ se ɛla ɛ-sɔɔlɩm yɔ a-yɔɔ. (1 Kɔrɛntɩ mba 15:58) Ɛzɩma ɖɔ-tɔm pɩzɩɣ nɛ tɩkɛdɩnɩ Ɛsɔ ye ɖɩmaɣzɩɣ se ɛɛpɩzɩɣ nɛ ɛhɛyɩ-ɖʋ yɔ? (Yakubu 1:17; 1 Pɩyɛɛrɩ 5:7) Weyi ɛɛsɩŋ Ɛsɔ weyi pɔyɔɔdɩ ɛ-tɔm Bibl taa yɔ, ɛnʋ pɩzɩɣna nɛ ɛmaɣzɩ se Ɛsɔ paa fɛyɩnɩ ɛyaa, ɛɛcɔŋnɩ pe-ɖeɖe yaa ɛtɩkɛ kʋjɔʋ tʋ.
Mba Ɛsɔ kaɣ hɛyʋʋ? Pɔɔlɩ yɔɔdaa se “mba pañɩnɩɣ-ɩ siŋŋ yɔ.” Tɔm ɖɛzʋʋ takayaɣ nakɛyɛ yɔɔdaa se Grɛɛkɩ tɔm loyaɣ “pañɩnɩɣ-ɩ siŋŋ” ɛɛwɩlɩɣ se “palɩɩ nɛ pañɩnɩ-ɩ”, ɛlɛ powolo ɛ-cɔlɔ “ɛ-sɛtʋ taa.” Tɔm ñɩnʋʋ takayaɣ nakɛyɛ ɖɔɖɔ yɔɔdaa se tɔm piye pañɩnɩ tɔbʋʋ lɛ pañaɣ pana siŋŋ. Toovenim, Yehowa wazɩɣ mba pe-tisuu tuyuu-wɛ se pɛsɛɛ-ɩ nɛ laŋɩyɛ pilim nɛ kpekpeka yɔ.—Maatiyee 22:37.
(Ebree mba 11:33-38) Pɩtɩŋnɩ tisuu yɔɔ lɛ, pawabɩ kewiyisi, peyele nɛ siɣsiɣ wɛtʋ la, pehiɣ lidaʋ tɔm ndʋ paayɔɔdaa yɔ, paɖɩɣ mʋʋzɩŋ nɔsɩ, 34 paɖɩzɩ miŋ ɖoŋ, palɩɩ laɣɖɛ nesi tɛɛ, pakpazɩ-wɛ ɖoŋ pɛ-ɛjandʋ taa, papɩsɩ ɖoŋ tɩnaa you taa, pawa sɔɔjanaa mba pɔkɔm wadʋʋ tɛtʋ yɔɔ yɔ. 35 Halaa mʋ pa-sɩɖaa pɩtɩŋnɩ femtu yɔɔ, ɛlɛ pawɩlɩ ɛyaa lalaa kʋñɔŋ mbʋ pʋyɔɔ yɔ, pataatisi se pɛhɛyɩ kɩhɛyʋʋ nakʋyʋ nɛ poholi-wɛ, se pɩsa nɛ pehiɣ femtu ndʋ tɩkɩlɩ ɖeu yɔ. 36 Ɛɛɛ, lalaa ñakatɩ takɩm pɩtɩŋnɩ woŋa nɛ mabʋtʋ yɔɔ; toovenim taa lɛ, palabɩ-wɛ nɛ pɩcɛzɩ mbʋ, pɔhɔkɩ-wɛ kpasɩ nɛ paɖʋ-wɛ salaka. 37 Paɖabɩ-wɛ pɛɛ, patakɩ-wɛ, pafaɣ-wɛ nabʋlɛ, pakʋ-wɛ nɛ laɣɖɛ, posu heŋ tɔna nɛ pʋŋ tɔna nɛ poyotuu, alɩwaatʋ ndʋ paawɛ kɩcɛyɩm taa, kʋñɔŋ taa, nɛ alɩwaatʋ ndʋ pawɩlaɣ-wɛ ñaŋ yɔ; 38 nɛ ɛjaɖɛ taamʋnɩ-wɛ. Pɔcɔwaɣ kañɩmbusuu taa nɛ pʋŋ taa nɛ ɛwasɩ pɔŋ taa nɛ tɛtʋ pɛŋla taa.
Ɩcɛyɩsɩ mi-tisuu lidaʋ ŋgʋ ɩwɛna yɔ kɩ-yɔɔ
10 Ebree ñʋʋ 11 taa, apostoloo Pɔɔlɩ kɛdɩ kʋñɔmɩŋ weyi Ɛsɔ sɛyaa nabɛyɛ kataa yɔ ɩ-tɔm, ɛlɛ ɛtɩyaa pa-hɩla. Ɛyɔɔdɩ halaa mba paawɛnɩ tisuu yɔ pɔ-tɔm se pe-piya kaasɩba, ɛlɛ pʋwayɩ lɛ sife. Ɛyɔɔdɩ ɖɔɖɔ ɛyaa lalaa tɔm nɛ ɛtɔ se paatisaa se “paɖʋ-wɛ kʋñɔŋ nɛ pɔkɔɔ pasɩ, mbʋ pʋyɔɔ yɔ, paakizaa se pataayebi-wɛ. Paawɛnɩ lidaʋ Ɛsɔ yɔɔ se paa pasɩba yɔ, efeziɣ-wɛ nɛ pacaɣ wezuu ŋgʋ kɩkɩlɩ ɖeu ŋgʋ kɩ-taa paawɛɛ yɔ.” (Ebr. 11:35, ABT) Paa ɖɩtɩtɩlɩ ɛyaa mba ɖeyi ɖeyi Pɔɔlɩ yɔɔdaɣ pɔ-tɔm yɔ pa-hɩla yɔ, ɖɩnawa se paɖabɩ nabɛyɛ pɛɛ ɛzɩ Naabɔɔtɩ nɛ Zekariya mbʋ yɔ nɛ pasɩ, mbʋ pʋyɔɔ yɔ pañaŋaɣ Ɛsɔ nɛ palakɩ ɛ-sɔɔlɩm. (1 Aw. 21:3,15; 4 Aw. 24:20, 21) Danɩyɛɛlɩ nɛ ɛ-taabalaa papɩzaɣ se pɔlɔ pe-siɣsiɣ wɛtʋ nɛ ‘peyebi-wɛ’ nazʋʋ. Ɛlɛ patɩla mbʋ. Ɛzɩma pataɣaɣ Yehowa liu yɔ pʋyɔɔ lɛ, papɩzaa nɛ “paɖɩɣ mʋʋzɩŋ nɔsɩ, nɛ peɖezi miŋ sɔsɔŋ.”—Ebr. 11:33, 34; Dan. 3:16-18, 20, 95 (28); 6:14, 17, 22-24.
11 “Pohoŋ” nayaa ɛzɩ Mikayiya nɛ Yereemii mbʋ yɔ nɛ “paɖʋ-wɛ salaka” pe-tisuu yɔɔ. Lalaa ɛzɩ Eliya mbʋ yɔ ‘yotaɣ lakʋ taa, pʋŋ taa, kpɔɔŋ taa, tɛtʋ pɛŋla taa.’ Pa-tɩŋa paaɖɔkɩ pa-tɩ, mbʋ pʋyɔɔ yɔ paaɖaŋnɩ “lidaʋ” wazasɩ nzɩ sɩwɛnɩ ɛsɩndaa yɔ.—Ebr. 11:1, 36-38; 1 Aw. 18:13; 22:24-27; Yer. 20:1, 2; 28:10, 11; 32:2.
Ðɩñɩnɩ fezuu taa ñɩm
(Ebree mba 11:4) Tisuu yɔɔ Aabɛɛlɩ la Ɛsɔ kɩlaʋ ŋgʋ kɩwɛ ñɩm nɛ pɩkpaɖɩ Kayɩnɩ ñɩŋgʋ yɔ, nɛ pɩtɩŋnɩ tisuu mbʋ pɩ-yɔɔ lɛ, palɩzɩ-ɩ aseɣɖe se ɛɛwɛ siɣsiɣ, mbʋ pʋyɔɔ yɔ ɛ-kʋjɔŋ kaakɛdɩnɩ Ɛsɔ, nɛ paa ɛsɩba yɔ, eɖiɣni yɔɔdʋʋ pɩtɩŋnɩ e-tisuu yɔɔ.
it-1 907 § 7
Tisuu
Caanaʋ taa tisuu kɩɖaŋ. “Aseɣɖe tɩnaa canɖaʋ sɔsɔʋ” taa mba tɩŋa mba pɔ-tɔm Pɔɔlɩ yɔɔdaa yɔ, (Ebr 12:1) paawɛnɩ tisuu siŋŋ. Aabɛɛlɩ kaasɩm lidaʋ tɔm ndʋ Ɛsɔ yɔɔdaa pɩlɩɩnɩ “pʋlʋlaɣ” ŋga kakaɣ yɔkʋʋ “ɖʋm” ñʋʋ yɔ kɔ-yɔɔ. Nɛ ɛna ɛzɩma nɩŋgbaŋʋʋ hɔm tɔm ndʋ Yehowa kaaheyi ɛ-lʋlɩyaa yɔ, tɩlabɩ Edɛɛnɩ kaɖaɣ taa yɔ. Pɔɖɔɔnɩ Aɖam nɛ Ɛva Edɛɛnɩ kaɖaɣ taa lɛ, pa nɛ pɔ-hɔʋ petikaɣ soŋaɣ pʋcɔ nɛ pɔtɔkɩ mbʋ pʋyɔɔ yɔ, pɔlɔ tɛtʋ yɔɔ nɔɔ nɛ tɩlʋlʋʋ sɔɔ nɛ eliizona. Pɩtasɩ lɛ, Aabɛɛlɩ kaana ɛzɩma Ɛva liu kaawɛ Aɖam yɔɔ nɛ ɛlɛ ñazɩɣ-ɩ yɔ. Pɩtʋʋ fɛyɩ se e-ɖoo heyi-i ɖɔɖɔ ɛzɩma ɛnɩɣ wɩzasɩ alɩwaatʋ ndʋ ɛhakɩ hoɣa yɔ. Pɩtasɩ lɛ, ɛna ɛzɩma kerebimwaa mba pɔɖɔkɩ laɣɖɛ nɖɩ ɖɩmʋʋ miŋ nɛ ɖɩcɔʋ tam yɔ, paɖaŋaɣ Edɛɛnɩ kaɖaɣ nɔnɔɔ taa yɔ. (Kiɖe 3:14-19, 24) Pɩtɩŋa payɩ mbʋ yɔ, pɩwɩlɩ-ɩ “kaɣlaa” se “pʋlʋlaɣ” kaɣ kɔnʋʋ ñʋʋ yabɩtʋ. Pʋyɔɔ tisuu tuyi-i nɛ ɛlaa “Ɛsɔ kɩlaʋ ŋgʋ kɩwɛ ñɩm nɛ pɩkpaɖɩ Kayɩnɩ ñɩŋgʋ yɔ.”—Ebr 11:1, 4.
(Ebree mba 11:5) Tisuu yɔɔ pɛkɛzɩ Enɔɔkɩ lone se ɛtaana sɩm, nɛ nɔɔyʋ taapɩzɩɣ se ɛna-ɩ ɖoli, mbʋ pʋyɔɔ yɔ Ɛsɔ kɛzɩ-ɩ lone; mbʋ pʋyɔɔ yɔ pʋcɔ nɛ pɛkɛzɩ-ɩ lone lɛ, palɩzɩ-ɩ aseɣɖe se ɛ-tɔm kaakɛdɩnɩ Ɛsɔ siŋŋ.
“Eɖeni Ɛsɔ”
Ye mbʋ, pɔyɔɔdʋʋ se “Enɔɔkɩ mʋʋ yem nɛ ɛtɩɖɩŋ sɩm” yɔ, pʋ-tɔbʋʋ lɛ suwe? Pɩtʋʋ fɛyɩ se Yehowa yeba nɛ Enɔɔkɩ sɩ nɛ ɛtɩha nʋmɔʋ e-koyindinaa se pawɩlɩ-ɩ ñaŋ pʋcɔ nɛ pakʋ-ɩ. Ɛlɛ pʋcɔ nɛ pɩlakɩ mbʋ lɛ, “palɩzɩ aseɣɖe [Enɔɔkɩ] yɔɔ se eɖeni Ɛsɔ.” Ɛzɩma tɩyɛ? Pʋtɔma yɔ, pʋcɔ nɛ ɛsɩkɩ lɛ, Ɛsɔ wɩlɩ-ɩ ɛzɩma tɛtʋ kaɣ pɩsʋʋ paradisuu yɔ natʋ natʋyʋ taa. Nɛ Enɔɔkɩ na natʋ ndʋ lɛ, eɖiɣzina se eɖe Ɛsɔ ɛsɩndaa pʋcɔ nɛ ɛsɩ. Apostoloo Pɔɔlɩ yɔɔdaɣ Enɔɔkɩ nɛ halaa nɛ abalaa siɣsiɣ tɩnaa lalaa tɔm lɛ, ecuuzaa se: “Tisuu taa pe-kpeekpe pasɩba.” (Ebree 11:13) Pɩtɩtɩlɩ yɔ, Enɔɔkɩ sɩm wayɩ lɛ, e-koyindinaa ñɩnaɣ e-tomnaɣ, ɛlɛ patɩna-kɛ. “Patɩtasɩ-ɩ naʋ” mbʋ pʋyɔɔ yɔ, pɩtɩla Yehowa laba nɛ e-tomnaɣ mʋʋ se pɩtaaha nʋmɔʋ e-koyindinaa se pakpaɣ-kɛ nɛ palabɩnɩ mbʋ pɩtɩmʋna yɔ.
23-29 SEPTEMBRE
ÑƖM MBƲ PƖWƐ ƐSƆTƆM TAA YƆ | EBREE MBA 12-13
Lɔŋ sɩɣzʋʋ kɛ Yehowa sɔɔlɩm wɩlʋʋ
(Ebree mba 12:5) Nɛ ɩsɔ tɔm ndʋ pɔyɔɔdaa se pasazɩnɩ-mɩ ɛzɩ pɩyalaa yɔ tɩ-yɔɔ caɣ caɣ: “Man-pɩyalʋ, taani lɔŋ sɩɣzʋʋ mbʋ pɩlɩnɩ Yehowa cɔlɔ yɔ, pitaatibi-ŋ ɖɔɖɔ yɔɔɔ alɩwaatʋ ndʋ ɛñɔɔzʋʋ-ŋ yɔ;
w12 15/3 29 § 18
Taacɔŋnɩ ‘wondu ndʋ ŋyebini ña-wayɩ yɔ’
18 Lɔŋ sɩɣzʋʋ mbʋ pɩtɩkɛdɩnɩ-ŋ yɔ. Ɛbɛ kaɣ labʋ ye ŋmaɣzɩɣ lɔŋ weyi patasɩ-ŋ nɛ pɩɖɛɛ yɔ ɩ-yɔɔ nɛ pɩwɩzɩɣ-ŋ yɔ? Pɩpɩzɩɣ pɩɖʋ-ŋ wɩzasɩ nɛ piyele ɖɔɖɔ nɛ ‘pitibi-ŋ yɔɔɔ.’ (Ebr 12:5) Ye ‘ŋnim’ lɔŋ sɩɣzʋʋ nɛ ŋkizi se ŋŋmʋʋ-pʋ yaa ye ŋmʋ-pʋ nɛ pʋwayɩ ŋkizi se ŋŋlakɩnɩ-pʋ tʋmɩyɛ nɛ ŋyele nɛ ‘pitibi-ŋ yɔɔɔ’ yɔ, pɩɩkaɣ-ŋ wazʋʋ nɛ pɩsɩnɩ-ŋ nɛ ŋñɔɔzɩ ñe-wezuu caɣʋ. Pʋyɔɔ pɩkɩlɩɣ ɖeu se ɖɩlabɩnɩ tʋmɩyɛ Salomɔɔ lɔŋ tasʋʋ pʋnɛ: “Ðɔkɩ ñamtʋ [yaa lɔŋ sɩɣzʋʋ], taayele; ɖɔkɩ-tʋ, mbʋ yɔ tɩkɛ ñe-wezuu.” (Adu. 4:13) Ɛzɩ lɔɔɖɩyɛ sayʋ weyi ɛñaŋ habɩyɛ yɔɔ paɣtʋ yɔ, pɩwɛɛ se ɖitisi nɛ ɖɩmʋ lɔŋ sɩɣzʋʋ, ɖɩlabɩnɩ-pʋ tʋmɩyɛ nɛ ɖiwobini ɛsɩndaa.—Adu. 4:26, 27; kalɩ Ebree mba 12:12, 13.
(Ebree mba 12:6, 7) mbʋ pʋyɔɔ yɔ mba Yehowa sɔɔlɩ-wɛ yɔ, ɛsɩɣzɩɣ-wɛ lɔŋ, toovenim taa lɛ, ɛmakɩ weyi ɛmʋʋ-ɩ ɛzɩ pɩyalʋ yɔ.” 7 Pɩpɔzʋʋ se ɩɖɔkɩ mɩ-laŋɩyɛ mbʋ pʋyɔɔ yɔ pɩkɛ mɩ-lɔŋ sɩɣzʋʋ hɔɔlʋʋ nakʋyʋ. Ɛsɔ kpaɣ-mɩ ɛzɩ pɩyalaa yɔ. Mbʋ pʋyɔɔ yɔ pɩyalʋ weyi wɛɛ se ɛ-caa ɛɛsɩɣzɩɣ-ɩ lɔŋ?
w12 1/7 21 § 3
“Pɩwɛɛ se ɩtɩmɩ ɛzʋnɔ ‘Ða-Caa’”
Caja kʋsɔɔlʋ sɩɣzɩɣ lɔŋ e-piya se ɛsɩnɩ-sɩ nɛ sɩkɛ ɛyaa kɩbama cee wayɩ. (Efɛɛzɩ mba 6:4) Caja ɛnʋ, eeyeki e-piya se sɩla mbʋ sɩsɔɔlaa yɔ; ɛlɛ ɛɛsɩɣzɩɣ-sɩ lɔŋ lɛ ɛɛlakɩ-sɩ ñaŋ. Mbʋ ɖɔɖɔ Ða-Caa weyi ɛwɛ ɛsɔdaa yɔ, nabʋyʋ taa ɛnaɣ se pɩpɔzʋʋ se ɛsɩɣzɩ-ɖʋ lɔŋ. Paa mbʋ yɔ ɛɛlakɩ-ɖʋ ñaŋ ɛlɛ ɛsɩɣzɩɣ-ɖʋ lɔŋ nɛ sɔɔlɩm. Ɛzɩ ɛ-Caa yɔ, Yesu tɩla kañatʋ wiɖiyi kpa, halɩ pɩkpɛndɩnɩ alɩwaatʋ ndʋ tɩ-taa pɩɩwɛ ɛ-tɔmkpɛlɩkɩyaa kaɖɛ se pamʋ ɛ-lɔŋ sɩɣzʋʋ yɔ.—Maatiyee 20:20-28; Luka 22:24-30.
(Ebree mba 12:11) Toovenim lɛ, lɔŋ sɩɣzʋʋ nabʋyʋ fɛyɩ se pɩkɛ taa leleŋ pʋyʋ lɛɛlɛɛyɔ, ɛlɛ pɩkɛ wɩzasɩ; paa mbʋ yɔ, pʋwayɩ lɛ, mba pɩfalɩsɩ-wɛ yɔ pɩlʋlʋʋ-wɛ siɣsiɣ wɛtʋ tɛ laŋhɛzɩyɛ piye.
“Iwelisi tɔm kɩwɩlɩtʋ nɛ ɩwɛɛ lɔŋ”
18 Paa nɩŋgbaŋʋʋ hɔm ɛhaɣ wɩzasɩ yɔ, nabʋyʋ haɣ wɩzasɩ nɛ pɩkpaɖɩ. Mbʋ lɛ ɛyʋ kizuu nɩŋgbaŋʋʋ hɔm yɔ. (Ebr. 12:11) Yele nɛ ɖɩyɔɔdɩ Kayɩnɩ nɛ Wiyaʋ Zidikiya pɔ-tɔm. Alɩwaatʋ ndʋ Kayɩnɩ taa paɣzɩ wɩnʋʋ Aabɛɛlɩ yɔ, Ɛsɔ pɔzɩ-ɩ se: “Pɩlabɩ ɛzɩma nɛ pɩwɩzɩ-ŋ nɛ ñɛ-ɛsɩndaa ñɩŋ? Ye ña-taa ɛwɛ ɖeu, ŋŋkʋsʋʋ ña-ñʋʋ? Ɛlɛ ye ña-taa ɛfɛyɩ ɖeu kɔyɔ, kɩwɛɛkɩm wɛ ñɔ-nɔnɔɔ taa, pi-liu tɛɛ kɔtʋʋnɩ-ŋ, nɛ pɩwɛnɩ-ŋ se ŋñazɩ-pʋ.” (Kiɖe 4:6, 7) Ɛlɛ Kayɩnɩ tiwelisini Ɛsɔ. Eyeba nɛ kɩdɛkɛdɩm wabɩ-ɩ. Ɛkɔnɩ ɛ-tɩ kʋñɔŋ nɛ wɩzasɩ falaa. (Kiɖe 4:11, 12) Ye ɛɛmʋ lɔŋ weyi Yehowa tasɩ-ɩ yɔ, wɩzasɩ nzɩ ɛɛnɩwa yɔ sɩtaatalɩ nzɩ ñʋʋ taa ɖoŋ kɔnɩ-ɩ yɔ.
Ðɩñɩnɩ fezuu taa ñɩm
(Ebree mba 12:1) Ye mbʋ, ɛzɩma ɖɩwɛnɩ aseɣɖe tɩnaa mba pɛwɛ ɛzɩ ɛsɔmɩnʋʋ sɔsɔʋ nɛ pɔcɔɔ-ɖʋ nɛ pata yɔ pʋyɔɔ lɛ, iyele ɖɔɖɔ nɛ ɖɩlɔ paa sʋʋtʋ ndʋ nɛ kɩwɛɛkɩm mbʋ pɩkaɣdɩɣ-ɖʋ kɛlɛʋ yɔ, nɛ ɖise seya wena pasɩ ɖɛ-ɛsɩndaa yɔ nɛ laŋɩyɛ ɖɔkʋʋ,
w11 9/15 17-18 § 11
Ðise seya nɛ laŋɩyɛ ɖɔkʋʋ
11 ‘Aseɣɖe tɩnaa mba pɛwɛ ɛzɩ ɛsɔmɩnʋʋ sɔsɔʋ’ yɔ, pataacaɣ yem nɛ pɔcɔŋnɩ mba peseɣaɣ yɔ nɛ pataɣ liu se mba pɔsɔɔlaa yɔ mba ɩwabɩna. Ɛlɛ pa-maɣmaɣ paakɛ seyaa. Nɛ pese camɩyɛ nɛ halɩ pawa. Lɛɛlɛɛyɔ pasɩba, ɛlɛ ye sɔnɔ seyaa ɩmaɣzɩɣ caanaʋ taa mba mba pɔ-yɔɔ yɔ, pɩkpazɩɣ-wɛ ɖoŋ. Kpaɣ se nɔɔyʋ wɛɛ eseɣ seya naayɛ, nɛ ɛna se ɛyaa mba pɔcɔ-ɩ nɛ pɩta nɛ pɛwɛɛ nɛ pɔcɔŋnɩ-ɩ yɔ, pa-taa nabɛyɛ kaakɛ seyaa sɔsaa siŋŋ, ɛzɩma pɩlakɩ-ɩ? Pɩɩkpazɩɣ-ɩ ɖoŋ nɛ ɛñaɣ pana siŋŋ nɛ ese camɩyɛ na? Caanaʋ taa seyaa mba, pa-kɩɖaŋ wɩlɩɣ se paa ɛbɛ taa ɖɩtɩɩwɛɛ yɔ ɖɩpɩzɩɣ ɖise fezuu taa seya nɛ ɖɩwa. “Aseɣɖe tɩnaa mba pɛwɛ ɛzɩ ɛsɔmɩnʋʋ sɔsɔʋ” yɔ, pa-kɩɖaŋ yɔɔ maɣzʋʋ kpazɩ-ɖoŋ kajalaɣ Krɩstʋ mba nɛ pese seyaa wena paasɩ pɛ-ɛsɩndaa yɔ nɛ laŋɩyɛ ɖɔkʋʋ; pɩpɩzɩɣ nɛ pɩkpazɩ ɖa ɖɔɖɔ ɖoŋ sɔnɔ.
(Ebree mba 13:9) Itaayele nɛ wɩlɩtʋ ndɩ ndɩ nɛ agbaaɣdaa wɩlɩtʋ pepeɣzi-mɩ, mbʋ pʋyɔɔ yɔ pɩkɩlɩ ɖeu se lootiye ɛkpazɩnɩ laŋɩyɛ ɖoŋ, nɛ pɩtaakɛ tɔɔnasɩ, nzɩ sɩɩwazɩɣ mba pɔñɔʋnɩ-sɩ yɔ.
w89 15/12 22 § 10
Ðɩlaa kɩlaŋ weyi ɩkɛdɩɣnɩ Yehowa yɔ
10 Pɩɩpɔzaa se Ebree mba ɩkpa pa-tɩ nɛ “wɩlɩtʋ ndɩ ndɩ nɛ agbaaɣdaa wɩlɩtʋ” ndʋ tɩlɩɣnɩ Yuuda tɔm wɩlɩyaa cɔlɔ yɔ. (Galaatii mba 5:1-6) ‘Ɛsɔ lootiye kpazɩɣnɩ pa-laŋa ɖoŋ’ nɛ pɔɖɔkɩ kpam toovenim taa, pɩtɩkɛ wɩlɩtʋ ndʋ. Nabɛyɛ hɔŋaɣ tɔm pɩlɩɩnɩ tɔɔnasɩ nɛ kɩlaŋ pɔ-yɔɔ, pʋyɔɔ Pɔɔlɩ yɔɔdaa se pɩtɩkɛ “tɔɔnasɩ nzɩ sɩɩwazɩɣ mba pɔñɔʋnɩ-sɩ yɔ” nzɩ kpazɩɣnɩ laŋɩyɛ ɖoŋ. Pɩtɩkɛ tɔɔnasɩ nasɩyɩ tɔɔʋ yaa ŋgee avema naayɛ kɔŋnɩnɩ ɛyʋ fezuu taa wazasɩ, ɛlɛ Ɛsɔ ñɔnʋʋ nɛ ɛsɩmɩyɛ wɛnʋʋ Yesu kɩlaʋ yɔɔ. (Roma mba 14:5-9) Toovenim taa lɛ, Yesu kɩlaʋ yeba nɛ kɩlaŋ weyi palaɣaɣ Paɣtʋ tɛɛ yɔ ɩsɩɩ tɩnaɣ.—Ebree mba 9:9-14; 10:5-10.
30 SEPTEMBRE–6 OCTOBRE
ÑƖM MBƲ PƖWƐ ƐSƆTƆM TAA YƆ | YAKUBU 1-2
“Mbʋ piwokini ɛyʋ kɩdɛkɛdɩm nɛ sɩm pa-taa yɔ”
(Yakubu 1:14) Ɛlɛ paa weyi lɛ, pɩtakɩɣ-ɩ alɩwaatʋ ndʋ ɛ-maɣmaɣ ɛ-kɔɖɛyɩ hɔŋɩ-ɩ nɛ kipeɣziɣ-i yɔ.
g17.4 14
Takɩm
Pɩtakɩɣ-ŋ alɩwaatʋ ndʋ pituyuu-ŋ se ŋla nabʋyʋ kɔzɩ kɔzɩ mbʋ pɩfɛyɩ ɖeu yɔ. Ðɩkpaɣ kɩɖaʋ nakʋyʋ: Kpaɣ se ŋwobi faɣɖɛ taa nɛ ŋna wonuu nakʋyʋ nɛ kɩlabɩ-ŋ liu. Nɛ ŋmaɣzɩ se ŋpɩzɩɣ nɛ ŋmɩlɩ-kʋ nɛ nɔɔyʋ ɛɛkpaɣ-ŋ. Ɛlɛ ñɛ-ɛhʋyɛ heyi-ŋ se pɩfɛyɩ ɖeu. Peeɖe ŋlɔ lɩmaɣza kɩdɛkɛda ana nɛ ŋɖɛɛ. Ye mbʋ ŋwabɩ takɩm mbʋ.
NDƲ BIBL YƆƆDƲƲ YƆ
Paa pɩtakɩɣ-ŋ yɔ, pɩɩwɩlɩɣ se ŋkɛ ɛyʋ kɩdɛkɛdʋʋ. Bibl yɔɔdaa se pɩtakɩɣ ɖa-tɩŋa. (1 Kɔrɛntɩ mba 10:13) Ɛlɛ mbʋ ɖɩlakɩ alɩwaatʋ ndʋ pɩtakɩɣ-ɖʋ yɔ pɩ-tɔm cɛyɩna. Ye ŋyeba nɛ lɩmaɣza kɩdɛkɛda wɛɛnɩ ɖoŋ ñɔ-yɔɔ yɔ, paa pɩɩla ɛzɩma wiɖiyi akaɣ-ŋ tuyuu nɛ ŋla mbʋ pɩfɛyɩ ɖeu yɔ. Ɛlɛ ye ŋlɔʋ-yɛ kpaagbaa yɔ, pɩsɩɣnɩ-ŋ nɛ ŋla kɩbam.
“Ɛlɛ paa weyi lɛ, pɩtakɩɣ-ɩ alɩwaatʋ ndʋ ɛ-maɣmaɣ ɛ-kɔɖɛyɩ hɔŋɩ-ɩ nɛ kipeɣziɣ-i yɔ.”—Yakubu 1:14.
(Yakubu 1:15) Nɛ alɩwaatʋ ndʋ kɔɖɛyɩ paɣlɩɣ yɔ, kɩlʋlʋʋ kɩwɛɛkɩm; piyele nɛ alɩwaatʋ ndʋ ɛyʋ lakɩ kɩwɛɛkɩm nɛ pɩtɛ yɔ, pɩlʋlʋʋ sɩm.
g17.4 14
Takɩm
Bibl yɔɔdɩ nɩŋgbanzɩ nzɩ sɩ-kpɛzʋʋ wokini kɩdɛkɛdɩm taa yɔ sɩ-tɔm. Yakubu 1:15 yɔɔdaa se: “Alɩwaatʋ ndʋ kɔɖɛyɩ [kɩdɛkɛdʋʋ] paɣlɩɣ yɔ [Piye piye, “kɔɖɛyɩ hakɩ hoɣa yɔ”], kɩlʋlʋʋ kɩwɛɛkɩm.” Ye mbʋ ye lɩmaɣza kɩdɛkɛda ɩkɔm ɖa-ñʋʋ taa nɛ ɖɩwɛɛ nɛ ɖɩmaɣzɩɣ a-yɔɔ yɔ, ɖɩwɛɣ ɛzɩ halʋ hoɣa tʋ weyi paa pɩɩlabɩ ɛzɩma ɛkaɣ lʋlʋʋ yɔ. Ɛlɛ, ɖɩpɩzɩɣ ɖɩlʋbɩnɩ lɩmaɣza kɩdɛkɛda se ataawɛɛnɩ ɖoŋ ɖɔ-yɔɔ. Ðɩpɩzɩɣ nɛ ɖɩwabɩ-yɛ.
Ðɩñɩnɩ fezuu taa ñɩm
(Yakubu 1:17) Paa kʋjɔʋ kɩbaŋʋ ŋgʋ nɛ paa haɖɛ pilim ñɩnɖɛ nɖɩ lɛ, ɖɩlɩɣnɩ hayo, ɖɩlɩɣnɩ ɛsɔdaa mintʋsʋŋ Caa cɔlɔ nɛ ɖitiki, ɛnʋ weyi ɛɛlɛɣzɩɣ ɛzɩ kuzotiŋ weyi ɩlɛɣzɩɣ yɔ.
it-2 167 § 3
Mintʋsʋʋ
Yehowa kɛnɩnɩ “ɛsɔdaa mintʋsʋŋ Caa.” (Yak 1:17) “Ɛɖʋ wɩsɩ nɛ sɩñandɩɣ wɩsɩ taa, ɛɖʋ paɣtʋ fenaɣ nɛ tɩɩnzɩ se sɩñandɩɣ ɖoo taa.” (Yer 31:35) Pɩtasɩ lɛ ɛ-cɔlɔ fezuu taa ñalɩmɩyɛ lɩɣna. (2Kɔ 4:6) Ɛ-paɣtʋ, ɛ-tɔm hʋʋ nɛ ɛ-tɔm wɛ ɛzɩ mintʋsʋʋ ŋgʋ kɩñandɩɣ mba peyeki pa-tɩ se eɖiyi-wɛ yɔ pɔ-yɔɔ yɔ. (Keɣa 42:3; 119:105; Adu 6:23; Iza 51:4) Keɣa maɖʋ yɔɔdaa se: “Ña-mintʋsʋʋ taa lɛ, ɖɩnaɣ mintʋsʋʋ. (Keɣa 35:10; Kpaɣ-tʋ nɛ ŋmaɣzɩnɩ Keɣsi 26:1; 42:3) Ɛzɩ ñalɩmɩyɛ wokuu pɩ-yɔɔ nɛ ɖɩñɩlɩsɩɣ pazɩ pazɩ “pɩkɔɔ pɩtalɩ wɩsɩ taa” yɔ, mbʋ ɖɔɖɔ ɛyʋ siɣsiɣ tʋ weyi Ɛsɔ lɔŋsɩnɖɛ ɖiyiɣ yɔ, ɛ-nʋmɔʋ ñɩlɩsɩɣ pazɩ pazɩ. (Adu 4:18) Pɩsa nɛ ɖɩpɩzɩ nɛ ɖɩɖɔ Yehowa nʋmɔŋ taa lɛ, pɩpɔzʋʋ se ɖiyele nɛ e-mintʋsʋʋ ñandɩ-ɖʋ. (Iza 2:3-5) Ɛlɛ weyi ɛlakɩ mbʋ pɩfɛyɩ kele kele yaa ɛwɛnɩ lɩmaɣza kɩdɛkɛda yɔ, ɛwɛ fezuu taa cɩkpɛndʋʋ sɔsɔʋ taa. Ɛzɩ Yesu yɔɔdʋʋ yɔ, “Ye ñɛ-ɛsɩyɛ ɛkɛ kɩdɛkɛdɩyɛ yɔ, ño-tomnaɣ tɩŋa kaɣ yuu cɩkpɛndʋʋ. Ye ñalɩmɩyɛ nɖɩ ɖɩwɛ ña-taa yɔ, ɖɩkɛ cɩkpɛndʋʋ toovenim yɔ, cɩkpɛndʋʋ sɔsɔʋ ŋgʋ lɛ mbʋ yɔ!”—Mt 6:23; Wp 15:9; 28:54-57; Adu 28:22; 2Pɩ 2:14.
(Yakubu 2:8) Ye lɛɛlɛɛyɔ, ɩɖɔŋ wiyaʋ paɣtʋ yɔɔ ɛzɩ mayaɣ yɔɔdʋʋ yɔ se: “Sɔɔlɩ ña-taabalʋ ɛzɩ ña-maɣmaɣ yɔ,” ɩlakɩ camɩyɛ.
it-2 162 § 7
Paɣtʋ
“Wiyaʋ Paɣtʋ.” “Wiyaʋ paɣtʋ” mʋ ñɩm siŋŋ nɛ tɩ-tɔm cɛyaa nɛ pɩkpaɖɩ paɣtʋ lɛɛtʋ ndʋ payɩ ɛyaa awiyaa pɩzɩɣ nɛ aɖʋ se tiɖiyiɣ ɛyaa pa-lakasɩ taa yɔ. (Yak 2:8) Paɣtʋ ɛgbɛyɛ taa, sɔɔlɩm kɛnɩnɩ paɣʋ tigiɖe nɛ: “Sɔɔlɩ ña-taabalʋ ɛzɩ ña-maɣmaɣ yɔ.” (Wiyaʋ paɣtʋ) kɛnɩnɩ paɣtʋ naalɛ ñɩndʋ ndʋ tɩ-taa Paɣtʋ kpeekpe nɛ Nayaa tɔm palɩnaa yɔ. (Mt 22:37-40) Paa Krɩstʋ mba ɩfɛyɩ ɛgbɛyɛ tɛɛ yɔ, pɩtɩŋnɩ ɛgbɛyɛ kɩfaɖɛ yɔɔ lɛ, pɛwɛ Wiyaʋ Yehowa nɛ ɛ-Pɩyalʋ Wiyaʋ Yesu Krɩstʋ paɣtʋ tɛɛ.