Wɛɛ toovenim pɩtɩŋa pɩ-taa

Paa anɩ ɛsɔɔlaa se ɛwɛɛnɩ taabalaa mba pɛwɛ toovenim yɔ. Yehowa ɖɔɖɔ sɔɔlaa se ɛ-taabalaa ɩwɛɛ toovenim. Ɛlɛ pɩfɛyɩ kɛlɛʋ, mbʋ pʋyɔɔ yɔ sɔnɔ ɛyaa sakɩyɛ fɛyɩ toovenim. Ye ɛyʋ ɛwɛ toovenim pɩtɩŋa pɩ-taa yɔ, wazasɩ nzɩ ehikiɣ?

1. Lɩmaɣzɩyɛ sɔsɔɖɛ nɖɩ yɔɔ pɩwɛɛ se ɛyʋ ɛwɛɛ toovenim?

Ye ɖɩwɛ toovenim yɔ, ɖɩwɩlɩɣ se ɖɩsɔɔlɩ Yehowa nɛ ɖɩñaŋɩ-ɩ. Tɔzɩ se Yehowa naɣ ɖa-maɣzɩm tɩŋa nɛ ɛnaɣ ɖɔɖɔ mbʋ payɩ ɖɩlakɩ yɔ. (Ebree mba 4:13) Alɩwaatʋ ndʋ ɖɩlɩzɩɣ se ɖɩwɛɣ toovenim yɔ, ɛnaɣ nɛ pɩkɛdɩɣnɩ-ɩ. Bibl yɔɔdʋʋ se: «Yehowa paɖɩɣ pɩ-tɛɛ nɛ pɩ-yɔɔ tʋ, ɛlɛ ɛɖʋʋ taabalɩyɛ kɩbanɖɛ nɛ ɛyʋ siɣsiɣ tʋ.»—Aduwa 3:32.

2. Hɔɔlɩŋ weyi ɩ-taa ɖɩpɩzɩɣ nɛ ɖɩwɩlɩ paa evemiye nɖɩ se ɖɩwɛ toovenim?

Yehowa sɔɔlaa se «[ɖiheyi] ɖama toovenim.» (Zakarii 8:16, 17) Pʋ-tɔbʋʋ lɛ suwe? Alɩwaatʋ ndʋ ɖɩyɔɔdʋʋnɩ ɖɔ-hɔʋ taa tʋ, ɖa-tʋmɩyɛ taa tʋ, ɖo-koobu yaa komina lone taa caɣyʋ nɔɔyʋ yɔ, ɖɩɩcɛtɩɣ yaa ɖɩɩyɔɔdʋʋ tɔm ndʋ tɩtɩkɛ toovenim ɖeyi ɖeyi yɔ. Mba pɛwɛ toovenim yɔ, paamɩlɩɣ lalaa yaa paamuluu-wɛ. (Kalɩ Aduwa 24:28 nɛ Efɛɛzɩ mba 4:28.) Pɛhɛyɩɣ lambuu ɛzɩ paɣtʋ pɔzʋʋ yɔ. (Roma mba 13:5-7) Tobi lɛ, ɖɩsɔɔlaa se «ɖɩwɛɛ toovenim pɩtɩŋa pɩ-taa.»—Ebree mba 13:18.

3. Ye ɛyʋ ɛwɛ toovenim yɔ, wazasɩ nzɩ ehikiɣ?

Ye ɛyaa ɩsɩm-ɖʋ se ɖɩwɛ toovenim yɔ, pataɣ-ɖʋ liu. Piyeki nɛ ɛgbɛyɛ taa mba taɣ-ɖʋ liu ɛzɩ ɖɩkɛ pɔ-hɔʋ taa mba yɔ. Ðɩwɛɣnɩ ɛhʋyɛ kɩbanɖɛ. Ye ɖɩwɛ toovenim yɔ, «[pɩcanɩɣ] ɖa-Ñʋʋ Yaɖʋ Ɛsɔ wɩlɩtʋ,» nɛ pɩhɔŋ ɖɔɖɔ lalaa se pɔkɔɔ nɛ pɛsɛɛ Yehowa.—Tiiti 2:10.

TAZƖ NƐ PILIMI

4. Toovenim wɛʋ kɛdɩɣnɩ Yehowa

Ɩkalɩ Keɣa 44:21 nɛ Malakii 3:16, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ pɩtɩkɛnɩ lɔŋsɩnɖɛ se ɛyʋ ɛmaɣzɩ se ɛpɩzɩɣ nɛ ɛmɛsɩ toovenim?

• Ŋmaɣzɩɣ se alɩwaatʋ ndʋ ɖɩyɔɔdʋʋ toovenim, paa pɩ-yɔɔdʋʋ ɛwɛ-ɖʋ kaɖɛ yɔ, ɛzɩma pɩlakɩ Yehowa?

5. Wɛɛ toovenim paa ɛzɩmtaa

VIDEO: Mbʋ piyeki nɛ ɛyʋ wɛɣ laŋhʋlʋmɩyɛ taa yɔ—Ɛhʋyɛ kɩbanɖɛ (2:32)

Ɩkalɩ Ebree mba 13:18, nɛ pʋwayɩ lɛ ɩtazɩ nɛ ɩna ɛzɩma ɖɩpɩzɩɣ nɛ ɖɩwɛɛ toovenim . . .

• ɖɔ-hɔʋ taa yɔ.

• tʋmɩyɛ taa yaa sukuli taa yɔ.

• hɔɔlɩŋ lɛɛŋ taa yɔ.

6. Toovenim wɛʋ kɔŋnɩ-ɖʋ wazasɩ

Toovenim wɛʋ pɩzɩɣ nɛ pɩkɔnɩ kala naayɛ. Ɛlɛ toovenim taa lɛ, toovenim wɛʋ kpaɖɩnɩ ɖeu. Ɩkalɩ Keɣa 34:12-16, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩma toovenim wɛʋ yeki se piɖeni-ŋ ñe-wezuu caɣʋ taa nɛ pɩkpaɖɩ?

1. Ye halʋ nɛ ɛ-walʋ peheyiɣ ɖama toovenim yɔ pɩcɛyɩsɩɣ pe-nesi ɖɔkʋʋ.

2. Tʋmlaɖaa mba pɛwɛ toovenim yɔ pa-tʋmɩyɛ ñʋʋdʋ taɣ-wɛ liu.

3. Tɛtʋ taa ñɩma mba pɛwɛ toovenim yɔ pɔ-tɔm kɛdɩɣnɩ komina lone taa caɣyaa.

TOBI LƐ

Yehowa sɔɔlaa se ɛ-taabalaa ɩwɛɛ toovenim mbʋ payɩ palakɩ yɔ pɩ-taa.

Tɔm taa tazʋʋ

• Nʋmɔŋ weyi ɩ-yɔɔ ɛyʋ tɩŋɩɣna nɛ ɛwɩlɩɣ se ɛwɛ toovenim yɔ ɩ-taa nɩɩyɩ lɛ weyi?

• Ɛbɛ yɔɔ pɩtɩkɛnɩ lɔŋsɩnɖɛ se ɖɩmaɣzɩ se ɖɩpɩzɩɣ nɛ ɖɩmɛsɩ toovenim?

• Ɛbɛ yɔɔ ŋsɔɔlaa se ŋwɛɛ toovenim paa ɛzɩmtaa?

WONDU LƐƐTƲ

Ɛzɩma lʋlɩyaa pɩzɩɣ nɛ pasɩnɩ pe-piya nɛ sɩwɛɛ toovenim?

Wɛɛ toovenim (1:44)

Ye ɖɩɖɔŋ ɖɔ-tɔm yɔɔ yɔ wazasɩ nzɩ ɖihikiɣ?

Ye ɖɩɖɔŋ ɖɔ-tɔm yɔɔ yɔ pɩkɔŋnɩ-ɖʋ wazasɩ (9:09)

Kalɩ nɛ ŋna mbʋ pʋyɔɔ pɩwɛɛ se ɖɩhɛyɩ lambuu, paa paalakɩnɩ-kʋ tʋmɩyɛ camɩyɛ yɔ.

«Faut-il payer ses impôts?» (La Tour de Garde, 1^er septembre 2011)

Ɛbɛ seɣti abalʋ weyi ɛtaawɛɛ toovenim yɔ nɛ ɛlɛɣzɩ nɛ ɛpaɣzɩ labʋ tʋmɩyɛ nɖɩ ɖɩ-taa ɛwɛ toovenim yɔ?

«Menɖiɣzinaa se Yehowa naɣ pʋtɔdɩyɛ nɛ ekpeɣu» (Feŋuu Tilimiye, 1^er mai 2015)