7, 8. Ɛzɩma tɩyɛ Yehowa kaɣ-ɖʋ tɔm hʋnʋʋ ɖɔ-yɔɔdaɣ yɔɔ?

⁷ Lɩmaɣzɩyɛ tozo ñɩnɖɛ nɖɩ ɖɩ-yɔɔ pɩcɛyaa se ɖɩcɔnɩ ɖɔ-yɔɔdaɣ yɔɔ camɩyɛ yɔ, nɖɩ lɛ se Yehowa kaɣ-ɖʋ tɔm pɔzʋʋ tɔm pee wena alɩɣnɩ ɖɔ-nɔɔ taa yɔ, a-yɔɔ. Ɛzɩma ɖɩlakɩnɩ ɖa-nzʋlʋmɩyɛ tʋmɩyɛ yɔ, pɩwɛnɩ ɖoŋ taabalɩyɛ nɖɩ ɖɩwɛ ɖa nɛ Yehowa nɛ ɖa nɛ ɛyaa lɛlaa ɖɛ-hɛkʋ taa yɔ, ɖɩ-yɔɔ. Pama Yakubu 1:26 taa se: “Ye nɔɔyʋ ɛmaɣzɩɣ se ɛkɛ Ɛsɔ ɛyʋ kɩbanʋ nɛ ɛɛɖɔkʋʋ ɛ-nzʋlʋmɩyɛ nɛ ɛcɛzɩɣ ɛ-laŋɩyɛ yɔ, ɛ-Ɛsɔ ɛyʋ kɩbanʋ kɛʋ mbʋ, falaa.”b Ɛzɩ ɖɩnaɣ ñʋʋ ŋgʋ kɩɖɛwa kɩ-taa yɔ, nɔɔ kʋyʋmaɣ nakɛyɛ wɛ ɖɔ-yɔɔdaɣ nɛ ɖɛ-Ɛsɔ sɛtʋ pɛ-hɛkʋ taa. Ye ɖɩɩɖɔkʋʋ ɖa-nzʋlʋmɩyɛ nɛ ɖɩyɔɔdʋʋ kañatʋ tɔm ndʋ tiloŋ lalaa yɔ, mbʋ mbʋ ɖɩlakɩ ɖɛ-Ɛsɔ sɛtʋ taa yɔ, pɩkɛ falaa tʋmɩyɛ Ɛsɔ ɛzɩdaa. Pɩwɛɛ se ɖɩmaɣzɩ tɔm ndʋ tɩ-yɔɔ siŋŋ.​—Yakubu 3:8-10.