MWBR19 10 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
7-13 OCTOBRE
ÑƖM MBƲ PƖWƐ ƐSƆTƆM TAA YƆ | YAKUBU 3-5
“Wɩlɩ se ŋwɛnɩ Ɛsɔ lɔŋsɩnɖɛ”
(Yakubu 3:17) Ɛlɛ lɔŋsɩnɖɛ nɖɩ ɖɩlɩnɩ hayo yɔ, kajalaɣ lɛ, ɖɩwɛ kele kele, pʋwayɩ lɛ ɖɩkɔŋnɩ laŋhɛzɩyɛ, ɖɩnɩɣ tɔm taa, ɖitisiɣ faaa nɛ ɖɩñaŋ, ɖɩ-taa suni pʋtɔdɩyɛ naʋ nɛ pee kɩbana ɖo, ɖɩɩɖʋʋ tʋkaɣ ɛyaa taa, ɖɩɩlakɩ pɩ-tɛɛ nɛ pɩ-yɔɔ lakasɩ.
cl 221-222 § 9-10
Ŋlakɩnɩ tʋmɩyɛ “Ɛsɔ lɔŋsɩnɖɛ” ñe-wezuu caɣʋ taa?
9 “Kajalaɣ lɛ, ɖɩwɛ kele kele.” Pɩsa nɛ ɛyʋ wɛɛ kele kele lɛ, pɩpɔzʋʋ se ɛwɛ cɩɖɩ cɩɖɩ e-tomnaɣ yɔɔ nɛ ɛ-laŋɩyɛ taa ɖɔɖɔ. Bibl wɩlɩɣ se nɔɔ kʋɖʋmaɣ nakɛyɛ wɛɛ lɔŋsɩnɖɛ nɛ laŋɩyɛ pɛ-hɛkʋ taa. Ɛlɛ lɔŋsɩnɖɛ nɖɩ ɖɩlɩnɩ hayo yɔ, ɖɩɩpɩzɩɣ nɛ ɖitii laŋɩyɛ nɖɩ ɖɩ-taa nɛ lɩmaɣza kɩdɛkɛda yɔ, ɖɩ-taa. (Aduwa 2:10; Maatiyee 15:19, 20) Ɛlɛ ye ɖa-laŋɩyɛ taa ɛwɛ kele kele yɔ, paa ɖɩkɛ ɛyaa mantɩtalɩ pilimwaa yɔ, ɖɩpɩzɩɣ nɛ ‘ɖɩha kɩwɛɛkɩm siɣye nɛ ɖɩla camɩyɛ.’ (Keɣa 36:27; Aduwa 3:7) Ye mbʋ, pɩmʋnaa se kele kele wɛtʋ ɛkɛnɩ Ɛsɔ lɔŋsɩnɖɛ wɛtʋ kajalaɣ ñɩndʋ na? Toovenim taa lɛ, ye ɖɩfɛyɩ kele kele ɖe-wezuu caɣʋ taa nɛ fezuu taa yɔ, ɖɩɩpɩzɩɣ nɛ ɖɩwɛɛnɩ Ɛsɔ lɔŋsɩnɖɛ wɛtʋ lɛɛtʋ.
10 “Pʋwayɩ lɛ, ɖɩkɔŋnɩ laŋhɛzɩyɛ.” Lɔŋsɩnɖɛ nɖɩ ɖɩlɩnɩ hayo yɔ, ɖiseɣtiɣ-ɖʋ se ɖɩñɩnɩ laŋhɛzɩyɛ nɖɩ ɖɩkɛ Ɛsɔ fezuu piye hɔɔlʋʋ nakʋyʋ yɔ. (Galaatii mba 5:22) Ðɩñakɩ pana se ɖɩtaacɛ “laŋhɛzɩyɛ tomiye nɖɩ” ɖɩhɔkɩ Yehowa samaɣ yɔ. (Efɛɛzɩ mba 4:3) Ðɩñakɩ pana ɖɔɖɔ se ɖɩñɔɔzɩ tɔm nɛ laŋhɛzɩyɛ ɖaɣnɩ kɔm ɖɛ-hɛkʋ taa. Ɛbɛ yɔɔ pɩcɛyaa? Bibl yɔɔdaa se: “Ɩcaɣ wezuu laŋhɛzɩyɛ taa; nɛ sɔɔlɩm nɛ laŋhɛzɩyɛ tɛ Ɛsɔ kaɣ wɛʋ mɩ-cɔlɔ.” (2 Kɔrɛntɩ mba 13:11) Ye mbʋ, ye laŋhɛzɩyɛ ɛwɛ ɖɛ-hɛkʋ taa yɔ, laŋhɛzɩyɛ tɛ Ɛsɔ kaɣ wɛʋ ɖɔ-cɔlɔ. Wɛtʋ ndʋ ɖɩwɛnɩ ɖo-koobiya yɔɔ yɔ, tɩwɛnɩ ɖoŋ ɖa nɛ Yehowa ɖa-taabalɩyɛ yɔɔ. Ɛzɩma ɖɩpɩzɩɣ nɛ ɖɩwɩlɩ se ɖɩkɛ laŋhɛzɩyɛ tɩnaa? Ðɩtazɩ kɩɖaʋ nakʋyʋ taa.
(Yakubu 3:17) Ɛlɛ lɔŋsɩnɖɛ nɖɩ ɖɩlɩnɩ hayo yɔ, kajalaɣ lɛ, ɖɩwɛ kele kele, pʋwayɩ lɛ ɖɩkɔŋnɩ laŋhɛzɩyɛ, ɖɩnɩɣ tɔm taa, ɖitisiɣ faaa nɛ ɖɩñaŋ, ɖɩ-taa suni pʋtɔdɩyɛ naʋ nɛ pee kɩbana ɖo, ɖɩɩɖʋʋ tʋkaɣ ɛyaa taa, ɖɩɩlakɩ pɩ-tɛɛ nɛ pɩ-yɔɔ lakasɩ.
cl 223-224 § 12
Ŋlakɩnɩ tʋmɩyɛ “Ɛsɔ lɔŋsɩnɖɛ” ñe-wezuu caɣʋ taa?
12 “Ðɩnɩɣ tɔm taa.” Pɔtɔm se ɛyʋ nɩɣ tɔm taa, pɩ-tɔbʋʋ lɛ suwe? Tɔm taa tazɩyaa nabɛyɛ yɔɔdaa se Grɛɛkɩ tɔm piye nɖɩ pɛɖɛzaa se “ɖɩnɩɣ tɔm taa” Yakubu 3:17 taa yɔ, ɖɩ-ɖɛzʋʋ wɛ kaɖɛ. Tɔm ɖɛzɩyaa labɩnɩ tʋmɩyɛ tɔm pee ndɩ ndɩ ɛzɩ “ɖɩwɛ ɖeu,” “ɖɩnaɣ pʋtɔdɩyɛ” nɛ “ɖɩmaɣzɩɣ lalaa yɔ.” Ɛjaɖɛ Kɩfaɖɛ Tɔm Ðɛzʋʋ tɛ pɩ-tɛɛ tɔm taa pɛɖɛzɩ-ɖɩ se “ɖɩ-tɔm fɛyɩ kaɖɛ.” Ɛzɩma ɖɩpɩzɩɣ nɛ ɖɩwɩlɩɣ se ɖɩlakɩnɩ tʋmɩyɛ lɔŋsɩnɖɛ nɖɩ ɖɩlɩnɩ hayo yɔ, ɖɩ-wɛtʋ tʋnɛ?
cl 224-225 § 14-15
Ŋlakɩnɩ tʋmɩyɛ “Ɛsɔ lɔŋsɩnɖɛ” ñe-wezuu caɣʋ taa?
14 “Ðitisiɣ faaa nɛ ɖɩñaŋ.” Grɛɛkɩ tɔm piye nɖɩ pɛɖɛzaa se “ɖitisiɣ faaa nɛ ɖɩñaŋ” yɔ, ɖɩtɩtasɩ wɛʋ Grɛɛkɩ Masɩ hɔɔlʋʋ nakʋyʋ taa. Tɔm taa tazɩyaa nabɛyɛ yɔɔdaa se “ɖoŋ ɖoŋ palakɩnɩ-ɖɩ tʋmɩyɛ alɩwaatʋ ndʋ pɔyɔɔdʋʋ ñamtʋ ndʋ sɔɔjanaa wɛna yɔ, tɩ-tɔm yɔ.” Ðɩwɩlɩɣ se “ɛyʋ tisiɣ ndʋ peheyi-i yɔ kɛlɛʋ” nɛ “eluzuu ɛ-tɩ.” Weyi Ɛsɔ lɔŋsɩnɖɛ ɖiyiɣ yɔ, etisiɣ faaa nɛ ɛñaŋ Masɩ. Ɛkɛ weyi ɛmaɣzɩɣ Masɩ yɔɔ, nɛ eetisiɣ se nabʋyʋ etuyi-i nɛ ɛmaanɩ sɩ-yɔɔ. Ye ɛnawa se ɛwɛ nʋmɔʋ kɩdɛkɛdʋʋ taa yɔ, ɛlɛɣzɩ kpaagbaa nɛ ɛɖɔ Masɩ taa tɔm yɔɔ. Pasɩmɩ-ŋ se ŋwɛ mbʋ?
“Ðɩ-taa suni pʋtɔdɩyɛ naʋ nɛ pee kɩbana ɖo.”
15 “Ðɩ-taa suni pʋtɔdɩyɛ naʋ nɛ pee kɩbana ɖo.” Pʋtɔdɩyɛ naʋ kɛ lɔŋsɩnɖɛ nɖɩ ɖɩlɩnɩ hayo yɔ, tɩ-wɛtʋ sɔsɔtʋ natʋyʋ. Yʋsɩ se Yakubu kpɛndɩ pʋtɔdɩyɛ naʋ nɛ pee kɩbana. Nɛ ɛwɛnɩ toovenim se ɛla mbʋ, mbʋ pʋyɔɔ yɔ, Bibl taa lɛ, pʋtɔdɩyɛ naʋ kɛ maɣzɩm mbʋ pituyuu ɛyʋ se ɛsɩnɩ lalaa yaa ɛlabɩ-wɛ kɩbandʋ yɔ. Tɔm taa tazʋʋ takayaɣ nakɛyɛ lɩzɩ pɩ-taa se pɩkɛ “wɩzasɩ nɩʋ lalaa kʋñɔmɩŋ yɔɔ nɛ pana ñaɣʋ se ɖɩsɩnɩ-wɛ.” Ye mbʋ, Ɛsɔ lɔŋsɩnɖɛ tɩkɛ lalaa siziŋ nɩʋ ɖeke, ɖɩkɛ wɛtʋ ndʋ tiɖiyiɣ-ɖʋ se ɖɩla nabʋyʋ nɛ ɖɩsɩnɩ lalaa yɔ. Ɛzɩma ɖɩpɩzɩɣ nɛ ɖɩwɩlɩ se ɖɩkɛ pʋtɔdɩyɛ nayaa?
(Yakubu 3:17) Ɛlɛ lɔŋsɩnɖɛ nɖɩ ɖɩlɩnɩ hayo yɔ, kajalaɣ lɛ, ɖɩwɛ kele kele, pʋwayɩ lɛ ɖɩkɔŋnɩ laŋhɛzɩyɛ, ɖɩnɩɣ tɔm taa, ɖitisiɣ faaa nɛ ɖɩñaŋ, ɖɩ-taa suni pʋtɔdɩyɛ naʋ nɛ pee kɩbana ɖo, ɖɩɩɖʋʋ tʋkaɣ ɛyaa taa, ɖɩɩlakɩ pɩ-tɛɛ nɛ pɩ-yɔɔ lakasɩ.
cl 226-227 § 18-19
Ŋlakɩnɩ tʋmɩyɛ “Ɛsɔ lɔŋsɩnɖɛ” ñe-wezuu caɣʋ taa?
18 “Ðɩɩɖʋʋ tʋkaɣ ɛyaa taa.” Ɛsɔ lɔŋsɩnɖɛ ɛɛɖʋʋ tʋkaɣ ɛyaa taa pɩlɩɩnɩ pɛ-ɛjaɖɛ yaa po-tomnaɣ tɔlɩm yɔɔ. Weyi lɔŋsɩnɖɛ nɖɩ ɖiɖiyiɣ yɔ, ɛñakɩ pana se ese tɛ-yɔɔ tɛ-yɔɔ lakasɩ. (Yakubu 2:9) Pʋyɔɔ ɖɩɩmaɣzɩɣ se sukuli ŋgʋ nɔɔyʋ laba yɔ, tʋmɩyɛ nɖɩ ɛlakɩ yɔ yaa wala wena ɛwɛnɩ ɛgbɛyɛ taa yɔ, a-yɔɔ lɛ, ɛkpaɖɩ lalaa. Nɛ ɖiiniŋ ɖo-koobiya mba pɛfɛyɩnɩ ñɩm yaa patɩla sukuli sakɩyɛ yɔ. Yehowa sɔɔlɩ-wɛ nɛ pɩwɛɛ se ɖɩsɔɔlɩ-wɛ mbʋ ɖɔɖɔ.
19 “Ðɩɩlakɩ pɩ-tɛɛ nɛ pɩ-yɔɔ lakasɩ.” Grɛɛkɩ tɔm piye nɖɩ pɛɖɛzaa se “pɩ-tɛɛ nɛ pɩ-yɔɔ lakasɩ” yɔ, ɖitukuuni mba palakɩ aleɣya wena payaɣ se théâtre yɔ. Mba palakaɣ aleɣya ana caanaʋ Grɛɛkɩ mba nɛ Roma mba alɩwaatʋ taa yɔ, pohuuzaɣ nabʋyʋ pɛ-ɛsa yɔɔ se pataatɩlɩ-wɛ, pʋyɔɔ palakɩnɩ tʋmɩyɛ tɔm piye nɖɩ alɩwaatʋ ndʋ pɔyɔɔdʋʋ weyi epeɣzi lalaa nɛ ɛmɛsɩɣ-wɛ mbʋ ɖeyi ɖeyi ɛkɛnaa yɔ. Pɩwɛɛ se Ɛsɔ lɔŋsɩnɖɛ hɔɔlʋʋ wɛtʋ ndʋ tɩwɛɛnɩ ɖoŋ lɩmaɣza wena ɖɩwɛnɩ lalaa yɔɔ yɔ nɛ mbʋ mbʋ ɖɩlakɩ-wɛ yɔ, pɩ-yɔɔ.
Ðɩñɩnɩ fezuu taa ñɩm
(Yakubu 4:5) Yaa ɩmaɣzɩɣ se falaa yem mayaɣ yɔɔdʋʋ se: “Fezuu ŋgʋ kihiɣ ɖɩjaɣyɛ ɖa-taa yɔ, ki-liu wɛ pɩtɩŋa siŋŋ nɛ ɛsɩsɛmɩyɛ” yaa we?
w08 15/11 20 § 6
Yakubu nɛ Pɩyɛɛrɩ takayɩsɩ taa tɔm kɩcɛyɩtʋ
4:5—Mayaɣ ŋga tɔm Yakubu yɔɔdʋʋ cɩnɛ? Pɩtɩkɛ mayaɣ nakɛyɛ tɔm Yakubu yɔɔdʋʋ cɩnɛ. Ɛlɛ tɔm ndʋ ɛyɔɔdaa yɔ, tɩlabɩ nɔɔ kʋɖʋmaɣ nɛ lɩmaɣza wena awɛ Kiɖe Tɛɛ Tɔm 6:5; 8:21; Aduwa 21:10 nɛ Galaatii mba 5:17 taa yɔ.
(Yakubu 4:11, 12) Koobiya, iyele tɔm kɩdɛkɛdɩtʋ yɔɔdʋʋ ɖama yɔɔ. Weyi ɛyɔɔdʋʋ tɔm kɩdɛkɛdɩtʋ koobu nɔɔyʋ yɔɔ yaa ɛhʋʋnɩ e-koobu tɔm yɔ, paɣtʋ yɔɔ ɛyɔɔdʋʋ tɔm kɩdɛkɛdɩtʋ nɛ paɣtʋ ɛhʋʋnɩ tɔm. Ŋgʋ, ye ŋhʋʋnɩ paɣtʋ tɔm yɔ, ŋtɩkɛ weyi ɛɖɔŋ paɣtʋ yɔɔ yɔ, ɛlɛ ŋkɛ tɔm hʋyʋ. 12 Paɣtʋ Ðʋyʋ nɛ Tɔm Hʋyʋ kʋɖʋm ɖeke wɛna, weyi ɛpɩzɩɣ ɛya ñʋʋ nɛ ɛpɩzɩɣ ɛɖɩzɩ yɔ. Ɛlɛ ña yɔ, anɩ ŋkɛnaa nɛ ŋhʋʋnɩ ña-taabalʋ tɔm?
w97 15/11 20-21 § 8
8 Tɔm kɩdɛkɛdɩtʋ yɔɔdʋʋ koobiya yɔɔ kɛ kɩdɛkɛdɩm. (Yakubu 4:11, 12) Ɛlɛ nabɛyɛ yɔɔdʋʋ tɔm kɩdɛkɛdɩtʋ po-koobiya yɔɔ, mbʋ pʋyɔɔ yɔ, pamaɣzɩɣ se pɛwɛ siɣsiɣ nɛ pɩkpaɖɩ-wɛ yaa pañɩnɩɣ se penim-wɛ. (Keɣa 49:20; Aduwa 3:29) Grɛɛkɩ tɔm piye nɖɩ pɛɖɛzaa se tɔm kɩdɛkɛdɩtʋ yɔɔdʋʋ yɔ, tɩwɩlɩɣ se papaɖɩɣ weyi pɔyɔɔdʋʋ ɛ-tɔm yɔ, nɛ palakɩ ɛ-yɔɔ kɔlɔmɔtʋ. Pɩwɩlɩɣ se pakʋʋ pʋdʋ ɛnʋ ɛ-tɔm. Ɛzɩma tɩyɛ pɩkɛnɩ tɔm hʋnʋʋ Ɛsɔ paɣtʋ? Ðɩtɔzɩ se takayɩsɩ mayaa nɛ Farɩsɩ mba patɩŋaɣnɩ ‘ajitu nʋmɔŋ yɔɔ nɛ pɛkɛzɩɣ Ɛsɔ paɣtʋ hɔɔlʋʋ’ se pɩsa nɛ patɩŋnɩ pa-maɣmaɣ pa-paɣtʋ yɔɔ nɛ pahʋʋnɩ lalaa tɔm. (Maarkɩ 7:1-13) Mbʋ ɖɔɖɔ ye ɖɩkʋʋ koobu nɔɔyʋ tɔm, nɛ Yehowa tɩkʋ ɛ-tɔm yɔ, ɖɩwɛɛnɩ ɖɩhʋʋnɩ Ɛsɔ paɣtʋ tɔm, mbʋ pʋyɔɔ yɔ ɖɩwɛɛ nɛ ɖɩwɩlɩɣ se tɩtɩmʋna. Pɩtasɩ lɛ, ye ɖɩkʋ ɖo-koobu tɔm falaa yɔ, ɖɩɩɖɔŋ sɔɔlɩm paɣtʋ yɔɔ.—Roma mba 13:8-10.
Bibl kalʋʋ
(Yakubu 3:1-18) Mon-koobiya, mɩ-taa sakɩyɛ ɩtaapɩsɩ wɩlɩyaa, ɩsɩm mbʋ se pakaɣ-ɖʋ tɔm hʋnʋʋ siŋŋ nɛ pɩkɩlɩ. 2 Mbʋ pʋyɔɔ yɔ pituuluu ɖa-tɩŋa tam sakɩyɛ. Ye piituuluu nɔɔyʋ yɔɔdaɣ taa yɔ, ɛkɛ ɛyʋ weyi ɛtalɩ pilim yɔ, weyi ɛpɩzɩɣ nɛ ɛɖɔkɩ ɖɔɖɔ e-tomnaɣ kpeekpe yɔ. 3 Ye ɖɩɖʋʋ ñɩɣtʋ kpaŋnaŋ nɔsɩ taa se ɖɩla nɛ ɩñam-ɖʋ yɔ, ɖiɖiyiɣ ɖɔɖɔ i-tomnaɣ kpeekpe. 4 Ɩcɔnɩ ɖɔɖɔ mɛlɛnaa: Paa papaɣlaa siŋŋ nɛ paa helim ɖoŋ ñɩmbʋ etuyuuni-wɛ yɔ, ɖaʋ cikpeluu nakʋyʋ yɔɔ weyi ɛsaɣ mɛlɛ yɔ ɛtɩŋɩɣna nɛ eɖiyiɣ-kʋ nɛ ewokini ɖenɖe ɛsɔɔlaa se ewolo yɔ. 5 Mbʋ ɖɔɖɔ, nzʋlʋmɩyɛ kɛ tomnaɣ hɔɔlʋʋ cikpeluu nakʋyʋ, paa mbʋ yɔ ɖɩkpazɩɣ ɖɩ-tɩ siŋŋ. Ɩna ɛzɩma miŋ cikpeŋ pɩzɩɣ nɛ ɩñaɣ laʋ sɔsɔʋ yɔ! 6 Nzʋlʋmɩyɛ kɛ ɖɔɖɔ miŋ. Nzʋlʋmɩyɛ sɩŋnɩ mbʋ pɩfɛyɩ siɣsiɣ yɔ pɩ-ɛjaɖɛ ɖo-tomnaɣ pilinzi taa, mbʋ pʋyɔɔ yɔ ɖipisiɣ tomnaɣ tɩŋa nɛ ɖɩñaɣzɩɣ wezuu caɣʋ kpeekpe miŋ, nɛ Gehena ñaɣzɩɣnɩ-ɖɩ miŋ. 7 Mbʋ pʋyɔɔ yɔ, paa tɛtɛgbɩnɛ nɖɩ nɛ paa sumaɣ ŋga nɛ paa kpɩnɛ nɖɩ ɖituu yɔ, nɛ paa teŋgu taa kpɩnɛ nɖɩ lɛ, ɛyaa pɩzɩɣ nɛ pahayɩsɩ-ɖɩ nɛ ɖɩña, nɛ mbʋ palaba ɖɔɖɔ. 8 Ɛlɛ nɔɔyʋ ɛɛpɩzɩɣ nɛ ɛhayɩsɩ nzʋlʋmɩyɛ nɛ ɖɩña. Ðɩkɛ mbʋ ɛyʋ ɛɛpɩzɩɣ nɛ ɛwɛɛnɩ ɖoŋ pɩ-yɔɔ kɛlɛʋ yɔ nɛ ɖɩkɛ kɩdɛkɛdɩyɛ, ɖɩ-taa suni sɔtʋ ndʋ tɩkʋʋ yɔ ɖo. 9 Ðɩtɩŋɩɣnɩ ɖɩ-yɔɔ nɛ ɖɩsaŋ Yehowa, weyi ɛkɛ Caa yɔ, ɛlɛ ɖɩtɩŋɩɣnɩ ɖɩ-yɔɔ ɖɔɖɔ nɛ ɖɩlɔʋ nɔɔ kɩdɛkɛdaɣ mba palɩzɩ-wɛ nɛ “pɛwɛɛ ɛzɩ Ɛsɔ” yɔ pɔ-yɔɔ. 10 Nɔɔ kʋɖʋmaɣ ŋga ka-taa wazaɣ nɛ nɔɔ kɩdɛkɛdaɣ lɔʋ palɩɣna. Mon-koobiya, pɩtɩmʋna se pɩwɛɛ nɛ pɩlakɩ mbʋ. 11 Lɩm leleŋ ñɩmbʋ nɛ lɩm ñaŋ ñɩmbʋ paapɩzɩɣ nɛ palɩɩnɩ hiɖe kʋɖʋmɖɩyɛ taa, yaa we? 12 Mon-koobiya, fiigi tɩʋ ɛɛpɩzɩɣ nɛ kɩlʋlɩ oliivi pee, yaa viiñi ɛɛpɩzɩɣ nɛ kɩlʋlɩ fiigi pee, yaa we? Hiɖe nɖɩ ɖɩ-taa lɩm wɛ ɖɔm yɔ, lɩm mbʋ pɩwɛ leleŋ yɔ pɩɩpɩzɩɣ ɖɔɖɔ nɛ pɩlɩɩnɩ ɖɩ-taa. 13 Mɩ-taa anɩ pʋdʋ wɛ lɔŋ nɛ ɛwɛɛnɩ tɔm taa nɩʋ lɛɣtʋ? Ɛtɩŋnɩ ɛ-ɖɔnɛ kɩbanɖɛ yɔɔ nɛ ɛwɩlɩ tʋma wena ɛlabɩ-yɛ nɛ hɛɛɛ wɛtʋ ndʋ tɩlɩnɩ lɔŋsɩnɖɛ taa yɔ. 14 Ɛlɛ, ye ɩwɛnɩ sʋsɩ kadadayaɣ nɛ nɔɔhɔnɖɛ mɩ-laŋa taa yɔ, ɩtaawɛɛ nɛ ɩkpazɩɣ mɩ-tɩ nɛ ɩcɛtɩɣnɩ toovenim taa. 15 Pɩtɩkɛnɩ lɔŋsɩnɖɛ nɖɩ ɖɩlɩnɩ hayo yɔ; pɩkɛ tɛtʋ yɔɔ ñɩnɖɛ, kpɩna ñɩnɖɛ, aleewaa ñɩnɖɛ. 16 Mbʋ pʋyɔɔ yɔ ɖenɖe sʋsɩ nɛ nɔɔhɔnɖɛ pɛwɛɛ yɔ, peeɖe ɖɔɖɔ yem yem lakasɩ nɛ paa kɩdɛkɛdɩm lakasɩ nzɩ lɛ, sɩkaɣ wɛʋ. 17 Ɛlɛ lɔŋsɩnɖɛ nɖɩ ɖɩlɩnɩ hayo yɔ, kajalaɣ lɛ, ɖɩwɛ kele kele, pʋwayɩ lɛ ɖɩkɔŋnɩ laŋhɛzɩyɛ, ɖɩnɩɣ tɔm taa, ɖitisiɣ faaa nɛ ɖɩñaŋ, ɖɩ-taa suni pʋtɔdɩyɛ naʋ nɛ pee kɩbana ɖo, ɖɩɩɖʋʋ tʋkaɣ ɛyaa taa, ɖɩɩlakɩ pɩ-tɛɛ nɛ pɩ-yɔɔ lakasɩ. 18 Pɩtasɩ lɛ, poɖuu siɣsiɣ wɛtʋ piye laŋhɛzɩyɛ taa, mba palakɩ laŋhɛzɩyɛ yɔ pɔ-yɔɔ.
14-20 OCTOBRE
ÑƖM MBƲ PƖWƐ ƐSƆTƆM TAA YƆ | 1 PƖYƐƐRƖ 1-2
“Pɩwɛɛ se ɩkɛ kiɖeɖema”
(1 Pɩyɛɛrɩ 1:14, 15) Ɛzɩ piya nzɩ sɩñaŋ yɔ, ɩtaatasɩ yebu nɛ kɔɖɛyɩ ŋgʋ ɩɩwɛnɩ ɖooo lɔŋ mɩ-kɩɩsɩŋɩyɩtʋ taa yɔ, kɩwɛɛnɩ ɖoŋ mɩ-yɔɔ, 15 ɛlɛ ɛzɩ Kiɖeɖeu weyi ɛya-mɩ yɔ, mɩ-maɣmaɣ ɩpɩsɩ kiɖeɖema mɩ-ɖɔnɛ kpeekpe taa,
Kɩhɛyʋʋ pʋ-ñʋʋ taa kɩlaʋ kɛ “kʋjɔʋ kɩbaŋʋ” ŋgʋ kɩlɩnɩ Caa cɔlɔ yɔ
5 Ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ Yehowa hɩɖɛ? Ðɩpɩzɩɣ nɛ ɖɩtɩŋnɩ ɖe-wezuu caɣʋ yɔɔ nɛ ɖɩla mbʋ. Yehowa pɔzʋʋ-ɖʋ se ɖɩkɛ kiɖeɖema yaa ɖɩwɛɛ kele kele. (Kalɩ 1 Pɩyɛɛrɩ 1:15, 16.) Pʋ-tɔbʋʋ lɛ se pɩwɛɛ se ɖɩsɛɛ Yehowa ɖeke nɛ ɖɩñamɩ-ɩ nɛ ɖa-laŋɩyɛ pilim. Paa panazɩɣ-ɖʋ yɔ, ɖɩñakɩ pana nɛ ɖɩɖɔ Yehowa paɣtʋ nɛ ɛ-paɣtʋ kila yɔɔ. Ye ɖɩwɛnɩ lakasɩ kɩbanzɩ yɔ, ɖa-mintʋsʋʋ ñandɩɣ nɛ pɩkaɣ yebu nɛ Yehowa hɩɖɛ sɛɛ. (Mat. 5:14-16) Ye ɖɩwɛ kele kele yɔ, ɖɩtɩŋɩɣnɩ ɖe-wezuu caɣʋ yɔɔ nɛ ɖɩwɩlɩ se Yehowa paɣtʋ wɛ ɖeu nɛ tɔm ndʋ Sataŋ yɔɔdaa yɔ, tɩkɛ cɛtɩm. Ða-tɩŋa ɖɩkɛ kɩwɛɛkɩm laɖaa, nɛ pʋyɔɔ lɛ ye ɖɩlabɩ kɩwɛɛkɩm yɔ, pɩwɛɛ se ɖikpiɖi nɛ ɖa-laŋɩyɛ pilim nɛ ɖiyele labʋ lakasɩ nzɩ sɩɩɖʋʋ Yehowa hɩɖɛ yɔ.—Keɣa 78:9.
(1 Pɩyɛɛrɩ 1:16) mbʋ pʋyɔɔ yɔ pamawa se: “Pɩwɛɛ se ɩkɛ kiɖeɖema, mbʋ pʋyɔɔ yɔ mɛnkɛ kiɖeɖeu.”
Ɛzɩma pɩwɛɛ se ɖɩlɩzɩ aleɣya wena ɖɩlakɩ
6 Yehowa heyi-ɖʋ se: “Ɩkaɣ kɛʋ kiɖeɖema, mbʋ pʋyɔɔ yɔ, ma, mɛnkɛ kiɖeɖeu.” (1 Pɩyɛɛrɩ 1:14-16; 2 Pɩyɛɛrɩ 3:11) Ye ɖɛ-sɛtʋ ɛfɛyɩ kele kele yɔ, Yehowa ɛɛpɩzɩɣ nɛ ɛmʋ-tʋ. (Wayɩ Wayɩ Paɣtʋ 15:21) Ye ɖɩlakɩ mbʋ Yehowa paɖɩɣ yɔ ɛzɩ kʋzʋʋ kɩdɛkɛdʋʋ, puuyaɣ lakasɩ yaa feziŋ kɩdɛkɛdɩŋ yaʋ mbʋ yɔ yɔ, ɖɛ-sɛtʋ ɛɛpɩzɩɣ nɛ tɩwɛɛ kele kele. (Roma 6:12-14; 8:13) Pɩtasɩ lɛ, ye ɖɩlakɩ aleɣya wena a-taa lakasɩ nzɩ sɩwɛɛ yɔ, pɩɩkɛdɩɣnɩ ɖɔɖɔ Yehowa. Piyeki nɛ ɖɛ-Ɛsɔ sɛtʋ ɛɛtasɩɣ wɛʋ kele kele nɛ pʋyɔɔ lɛ, Yehowa ɛɛpɩzɩɣ nɛ etisi nɛ ɛmʋ-tʋ. Pɩtasɩ lɛ, aleɣya ana awɛɛkɩɣ ɖa nɛ Yehowa ɖa-taabalɩyɛ siŋŋ.
Ðɩñɩnɩ fezuu taa ñɩm
(1 Pɩyɛɛrɩ 1:10-12) Nayaa mba paayɔɔdɩ lootiye nɖɩ palabɩ-mɩ yɔ ɖɩ-tɔm yɔ, patazɩ ñʋʋ yabɩtʋ ndʋ tɩ-tɔm taa tete nɛ pañɩnɩ camɩyɛ. 11 Paawɛ pana ñaɣʋ yɔɔ se patɩlɩ alɩwaatʋ ndʋ ɖeyi ɖeyi yaa wɩyɛ nɖɩ fezuu ŋgʋ kɩwɛ pa-taa yɔ kɩwɩlaɣ Krɩstʋ yɔɔ yɔ, alɩwaatʋ ndʋ kɩlɛyɩ lɩzʋʋ aseɣɖe kʋñɔmɩŋ weyi Krɩstʋ kaɣ tɔɔʋ yɔ ɩ-yɔɔ nɛ samtʋ ndʋ tɩkɔŋaɣ pʋwayɩ yɔ tɩ-yɔɔ yɔ. 12 Piikulaa nɛ pɩwɩlɩ-wɛ se pɩtɩkɛ pa-maɣmaɣ pa-tɩ paɖʋwaɣ lɩm, ɛlɛ mɩ, pɩlɩɩnɩ tɔm ndʋ peheyi-mɩ lɛɛlɛɛyɔ yɔ tɩ-yɔɔ; mba patɩŋnɩ fezuu kiɖeɖeu ŋgʋ petiyini ɛsɔdaa yɔ kɩ-yɔɔ nɛ posusi-mɩ tɔm kɩbandʋ yɔ, mba heyini-mɩ tʋ. Wondu ndʋ tɩ-yɔɔ ɖeyi ɖeyi Ɛsɔ tiyiyaa liu wɛɛ siŋŋ se paka pɛ-ɛsa.
w08 15/11 21 § 10
Yakubu nɛ Pɩyɛɛrɩ takayɩsɩ taa tɔm kɩcɛyɩtʋ
1:10-12. Ɛsɔ tiyiyaa sɔɔlaa se panɩɩ toovenim tɔm cukaŋ ñɩndʋ ndʋ Ɛsɔ tɩŋnɩ nayaa yɔɔ caanaʋ taa nɛ ɛma pɩlɩɩnɩ Krɩstʋ mba patam numwaa ɛgbɛyɛ yɔɔ yɔ tɩ-taa. Ɛlɛ, alɩwaatʋ ndʋ Yehowa pazɩ labɩnʋʋ tʋmɩyɛ Krɩstʋ ɛgbɛyɛ yɔ panɩ tɔm ndʋ tɩ-taa. (Efɛz. 3:10) Pɩɩwɛɣ ɖeu se ɖɩmaɣzɩnɩ Ɛsɔ tiyiyaa kɩɖaʋ kɩbaŋʋ ŋgʋ nɛ ɖɩñaɣ pana se ɖɩnɩɩ “Ɛsɔ wondu ndʋ tɩwɛ cukaŋ yɔ, tɩ-taa”?—1 Kɔr. 2:10.
(1 Pɩyɛɛrɩ 2:25) Mbʋ pʋyɔɔ yɔ ɩɩwɛ ɛzɩ heŋ weyi iɖiɣni lebu yɔ, ɛlɛ lɛɛlɛɛyɔ lɛ ɩpɩsɩ mɩ-kalɩzasɩ ninɖiɣyu nɛ sɩ-yɔɔ cɔnɩyʋ cɔlɔ.
it-2 1021 § 4
Ninɖiɣyu
Ninɖiɣyu Sɔsɔ. Pɩtʋʋ fɛyɩ se tɔm ndʋ Pɩyɛɛrɩ ma 1 Pɩyɛɛrɩ 2:25 taa yɔ, ɛlɩzɩ-tʋ nɛ Izaayii 53:6, ɖenɖe pɔyɔɔdɩ ‘heŋ weyi iyotuu yɔ’ ɩ-tɔm yɔ, ɛlɛ Pɩyɛɛrɩ wobi pɩ-yɔɔ nɛ ɛyɔɔdɩ se “ɛlɛ lɛɛlɛɛyɔ lɛ ɩpɩsɩ mɩ-kalɩzasɩ ninɖiɣyu nɛ sɩ-yɔɔ cɔnɩyʋ cɔlɔ.” Yehowa Ɛsɔ tɔm Pɩyɛɛrɩ yɔɔdaɣ mbʋ pʋyɔɔ yɔ, mba Pɩyɛɛrɩ ma tɔm ndʋ yɔ, pataaposini Krɩstʋ Yesu, ɛlɛ ɛ-yɔɔ pɩtɩŋnaa nɛ pɩɖaɣnɩ pɩsʋʋ Yehowa weyi ɛkɛ ɛ-samaɣ Ninɖiɣyu Sɔsɔ yɔ ɛ-cɔlɔ. (Keɣa 22:1; 79:1; Yer 23:3; Eze 34:12) Yehowa kɛ ɖɔɖɔ ninɖiɣyu weyi ewiliɣ ɛ-sɛyaa yɔɔ yɔ. (Keɣa 16:3) Tɔm piye ‘wiluu’ (Grɛɛkɩ, episkopeʹ) wɩlɩɣ se nabʋyʋ taa ɛhʋʋnɩ ɛ-samaɣ tɔm nɛ ɛkʋʋ kɔ-tɔm ɛzɩ ɛɛlabʋʋ Yeruzalɛm taa ñɩma kajalaɣ pɩnzɩ mɩnʋʋ taa yɔ, ɛzɩma petiɖiɣzina alɩwaatʋ ndʋ ‘ekilimi pɔ-yɔɔ yɔ [Grɛɛkɩ, episkopesʹ].’ (Lk 19:44) Ɛlɛ ɖɩwɩlɩɣ ɖɔɖɔ se nabʋyʋ taa ɛhʋʋnɩ ɛ-samaɣ tɔm nɛ pɔ-tɔm kɛdɩɣnɩ-ɩ ɛzɩ mba pasaŋ Ɛsɔ “e-kilimuu kɩyakʋ wiye [Grɛɛkɩ, episkopesʹ]” yɔ.—1Pɩ 2:12.
Bibl kalʋʋ
(1 Pɩyɛɛrɩ 1:1-16) Ma Pɩyɛɛrɩ, Yesu Krɩstʋ tɛ apostoloo, mamaɣnɩ takayaɣ kanɛ mba pɛwɛ ɛjaɖɛ yɔɔ alɩwaatʋ pazɩ nɛ pamɩzɩ Pɔntɩ, Galaatii, Kapaadoosi, Aazii, nɛ Bitinii taa yɔ, mba palɩzɩ-wɛ 2 nɛ pɩla nɔɔ kʋɖʋmaɣ nɛ tɔm ndʋ Caa Ɛsɔ kaasɩm ɖooo lɔŋ yɔ, mba fezuu pɩsɩ-wɛ kele kele yɔ, se pɩsa nɛ pɛwɛɛnɩ ñamtʋ nɛ pamɩzɩ pɔ-yɔɔ Yesu Krɩstʋ calɩm: Tɛtɛ nɛ pɔsɔzɩ-mɩ lootiye nɛ laŋhɛzɩyɛ. 3 Pasa Ɛsɔ, ɖa-Kɩbaɣlʋ Yesu Krɩstʋ Caa, mbʋ pʋyɔɔ yɔ ɛ-pʋtɔdɩyɛ naʋ sɔsɔm yɔɔ lɛ, ɛɖaɣnɩ-ɖʋ lʋlʋʋ se ɖɩwɛɛnɩ lidaʋ ŋgʋ kɩwɛ wezuu yɔ, pɩtɩŋnɩ ɛzɩma Yesu Krɩstʋ femni sɩɖaa taa yɔ pɩ-yɔɔ, 4 nɛ ɖɩwɛɛnɩ ñɩm mbʋ pɩɩɖazɩɣ nɛ pɩfɛyɩnɩ azuluma nɛ pɩɩcadɩɣ yɔ. Pɔñɔɔzɩ-mɩ pʋ nɛ pasɩɩ ɛsɔdaa, 5 mɩ mba Ɛsɔ ɖoŋ ɖiɣni mɩ-yɔɔ kandɩyʋʋ pɩtɩŋnɩ tisuu yɔɔ se ihiɣ ñʋʋ yabɩtʋ ndʋ pawɩzɩ tɩ-yɔɔ kuluu se pawɩlɩ kɛdɛzaɣ alɩwaatʋ taa yɔ. 6 Pʋyɔɔ lɛ, iɖiɣni mɛyʋʋ amɛya siŋŋ, paa pɩwɛɛ se takɩm ndɩ ndɩ ɩkɔnɩ-mɩ kʋñɔmɩŋ alɩwaatʋ pazɩ yɔ, 7 se pɩsa nɛ mi-tisuu mbʋ patakɩ-pʋ yɔ, mbʋ pɩwɛ ñɩm siŋŋ nɛ pɩkpaɖɩ sika ŋga kɛwɛɛkɩɣ paa patakɩ-kɛ nɛ miŋ yɔ, pɩkɔnɩ-mɩ samtʋ nɛ hɩɖɛ ɖʋʋ nɛ ñamtʋ alɩwaatʋ ndʋ pokuluu Yesu Krɩstʋ yɔɔ nɛ pawɩlɩ yɔ. 8 Paa wiɖiyi ɩtɩna-ɩ yɔ, ɩsɔɔlɩ-ɩ. Paa ɩɩnaɣ-ɩ lɛɛlɛɛyɔ yɔ, ɩwɛnɩ tisuu ɛ-yɔɔ nɛ ɩmɛyɩɣ amɛya siŋŋ nɛ taa leleŋ sɔsɔŋ weyi ɩ-wayɩ fɛyɩ yɔ, 9 mbʋ pʋyɔɔ yɔ ɩtalɩ mi-tisuu kaɖʋwa: mɩ-ñʋʋ yabɩtʋ. 10 Nayaa mba paayɔɔdɩ lootiye nɖɩ palabɩ-mɩ yɔ ɖɩ-tɔm yɔ, patazɩ ñʋʋ yabɩtʋ ndʋ tɩ-tɔm taa tete nɛ pañɩnɩ camɩyɛ. 11 Paawɛ pana ñaɣʋ yɔɔ se patɩlɩ alɩwaatʋ ndʋ ɖeyi ɖeyi yaa wɩyɛ nɖɩ fezuu ŋgʋ kɩwɛ pa-taa yɔ kɩwɩlaɣ Krɩstʋ yɔɔ yɔ, alɩwaatʋ ndʋ kɩlɛyɩ lɩzʋʋ aseɣɖe kʋñɔmɩŋ weyi Krɩstʋ kaɣ tɔɔʋ yɔ ɩ-yɔɔ nɛ samtʋ ndʋ tɩkɔŋaɣ pʋwayɩ yɔ tɩ-yɔɔ yɔ. 12 Piikulaa nɛ pɩwɩlɩ-wɛ se pɩtɩkɛ pa-maɣmaɣ pa-tɩ paɖʋwaɣ lɩm, ɛlɛ mɩ, pɩlɩɩnɩ tɔm ndʋ peheyi-mɩ lɛɛlɛɛyɔ yɔ tɩ-yɔɔ; mba patɩŋnɩ fezuu kiɖeɖeu ŋgʋ petiyini ɛsɔdaa yɔ kɩ-yɔɔ nɛ posusi-mɩ tɔm kɩbandʋ yɔ, mba heyini-mɩ tʋ. Wondu ndʋ tɩ-yɔɔ ɖeyi ɖeyi Ɛsɔ tiyiyaa liu wɛɛ siŋŋ se paka pɛ-ɛsa. 13 Ye mbʋ, ɩñɔɔzɩ mɩ-maɣzɩm nɛ ɩla tʋmɩyɛ; ɩɖɔkɩ mɩ-maɣzɩm pɩtɩŋa pɩ-taa; ɩɖʋ mi-lidaʋ lootiye nɖɩ pakaɣ-mɩ kɔnʋʋ alɩwaatʋ ndʋ pokuluu Yesu Krɩstʋ yɔɔ nɛ pawɩlɩ yɔ ɖɩ-yɔɔ. 14 Ɛzɩ piya nzɩ sɩñaŋ yɔ, ɩtaatasɩ yebu nɛ kɔɖɛyɩ ŋgʋ ɩɩwɛnɩ ɖooo lɔŋ mɩ-kɩɩsɩŋɩyɩtʋ taa yɔ, kɩwɛɛnɩ ɖoŋ mɩ-yɔɔ, 15 ɛlɛ ɛzɩ Kiɖeɖeu weyi ɛya-mɩ yɔ, mɩ-maɣmaɣ ɩpɩsɩ kiɖeɖema mɩ-ɖɔnɛ kpeekpe taa, 16 mbʋ pʋyɔɔ yɔ pamawa se: “Pɩwɛɛ se ɩkɛ kiɖeɖema, mbʋ pʋyɔɔ yɔ mɛnkɛ kiɖeɖeu.”
21-27 OCTOBRE
ÑƖM MBƲ PƖWƐ ƐSƆTƆM TAA YƆ | 1 PETER 3-5
“Wondu tɩŋa tɛmtʋ ñɔtaa”
(1 Pɩyɛɛrɩ 4:7) Ɛlɛ wondu tɩŋa tɛmtʋ ñɔtaa. Pʋyɔɔ lɛ, ɩwɛɛnɩ maɣzɩm mbʋ pɩmʋnaa yɔ, nɛ ɩcaɣnɩ mɩ-ɛsa adɩma hɔɔlʋʋ taa.
w13 15/11 3 § 1
“Ɩcaɣnɩ mɩ-ɛsa adɩma hɔɔlʋʋ taa”
Ðoo taa feŋiyu kɩbɩnʋ nɔɔyʋ yɔɔdaa se: “Ðoo alɩwaatʋ ndʋ tɩ-taa pɩwɛ feŋiyaa kaɖɛ se pacaɣnɩ pɛ-ɛsa yɔ lɛ tɛbɩyɛ tɛɛ.” Nɛ pɩtʋʋ fɛyɩ se mba palabɩ feŋiyu tʋmɩyɛ nɛ pana yɔ petisiɣ tɔm ndʋ tɩ-yɔɔ. Sɔnɔ Krɩstʋ mba wɛ kaɖɛ nɖɩ ɖɩ-taa ɖɔɖɔ, mbʋ pʋyɔɔ yɔ Sataŋ ɛjaɖɛ ɖɩnɛ ɖɩwɛ ɛzɩ ɖoo wena ayuwa pileɖaa yɔ nɛ lɛɛlɛɛyɔ lɛ ɖɩwɛ ɖɩ-tɛbɩyɛ tɛɛ. (Roma 13:12) Kɛdɛzaɣ alɩwaatʋ tʋnɛ tɩ-taa, ye ɖɩkpɛndɩ ɖɩwɛɛ nɛ ɖiɖou yɔ pɩkɛɣnɩ-ɖʋ kaɖɛ sɔsɔɖɛ. Pɩcɛyɩ kpem se ‘ɖɩwɛɛnɩ maɣzɩm mbʋ pɩmʋnaa yɔ,’ nɛ ɛzɩ Bibl seɣtuu-ɖʋ yɔ, ‘ɖɩcaɣnɩ ɖɛ-ɛsa adɩma hɔɔlʋʋ taa.’—1 Pɩy. 4:7.
(1 Pɩyɛɛrɩ 4:8) Kɔzɩ kɔzɩ lɛ, ɩsɔɔlɩ ɖama siŋŋ, mbʋ pʋyɔɔ yɔ sɔɔlɩm huuzuu kɩwɛɛkɩm sakɩyɛ yɔɔ.
w99 15/4 22 § 3
Ɛzɩma pɩwɛɛ se ɖɩla nɛ ɖiɖiɣzini fezuu taa ɛjandʋ natʋyʋ nɛ ɖɩwabɩ-tʋ yɔ
Ðɩtaasɔɔ apostoloo Pɩyɛɛrɩ lɔŋ kɩbaŋ ɛnɛ ɩ-yɔɔ: “Wondu tɩŋa tɛmtʋ ñɔtaa. Pʋyɔɔ lɛ, ɩwɛɛnɩ maɣzɩm mbʋ pɩmʋnaa yɔ, nɛ ɩcaɣnɩ mɩ-ɛsa adɩma hɔɔlʋʋ taa. Kɔzɩ kɔzɩ lɛ, ɩsɔɔlɩ ɖama siŋŋ, mbʋ pʋyɔɔ yɔ sɔɔlɩm huuzuu kɩwɛɛkɩm sakɩyɛ yɔɔ.” (1 Pɩyɛɛrɩ 4:7, 8) Pɩwɛ kɛlɛʋ yem se ɖiyele nɛ ɖɛ-ɛjandʋ yaa ɛyaa lalaa ñɩndʋ wɛɛnɩ ɖoŋ ɖa-laŋɩyɛ nɛ ɖa-maɣzɩm pɔ-yɔɔ nɛ pɩkɔɔ pituuli-ɖʋ. Sataŋ sɩm ɛyaa ɛjandʋ ndʋ camɩyɛ. E-ajitu nʋmɔʋ lɛɛkʋ lɛ se ɛtayɩ ɛyaa taa nɛ ɛwabɩ-wɛ. Pʋyɔɔ pɩwɛɛ se ɖɩla lɛɛ lɛɛ nɛ ɖɩkpaɣ sɔɔlɩm nɛ ɖihuuzi ɖama kɩwɛɛkɩm yɔɔ se pɩsa nɛ ‘ɖɩtaaha Eleeu waɖɛ naɖɩyɛ.’—Efɛɛzɩ mba 4:25-27.
(1 Pɩyɛɛrɩ 4:9) Ɩmʋ ɖama camɩyɛ, miduu ɛtaawɛɛ pɩ-taa.
2 Mbʋ Pɩyɛɛrɩ seɣti Krɩstʋ ñɩma mba se pala yɔ, pɩ-taa lɛɛbʋ yɔ se ‘pamʋ ɖama ɛgɔndʋ.’ (1 Pɩy. 4:9) Grɛɛkɩ tɔm piye nɖɩ pɛɖɛzaa se ‘ɛgɔndʋ mʋʋ’ yɔ, ɖɩ-tɔbʋʋ lɛ se “pɔsɔɔlɩ agɔma yaa pala camɩyɛ agɔma.” Yʋsɩ se Pɩyɛɛrɩ seɣti Krɩstʋ mba se pamʋ “ɖama” ɛgɔndʋ; pɩwɩlɩɣ se pɩwɛɛ se pamʋ ɛyaa mba paatɛm-wɛ sɩm nɛ pa nɛ pɛwɛɛ yɔ. Ye pamʋʋ ɖama ɛgɔndʋ, ɛzɩma pɩsɩɣnɩ-wɛ?
3 Pɩsɩɣnɩ-wɛ nɛ pɔñɔɔnɩ ɖama kpam. Maɣzɩ alɩwaatʋ ndʋ koobu nɔɔyʋ mʋ-ŋ ɛgɔndʋ yɔ tɩ-yɔɔ nɛ ŋna! Pɩtaalabɩ-ŋ leleŋ yaa we? Pɩtɩla ŋŋsɔʋ kɩyakʋ ŋgʋ kɩ-yɔɔ. Alɩwaatʋ ndʋ ña nɛ ñɛ-ɛgbɛyɛ taa koobiya nabɛyɛ ɩkpɛndaa nɛ ɩmʋ helim yaa ɩla aleɣya naayɛ yɔ, taabalɩyɛ nɖɩ ɖɩwɛ mɩ-hɛkʋ taa yɔ, ɖɩtɩcɛyɩsɩ nɛ pɩkpaɖɩ yaa we? Ye ɖɩmʋʋ ɖo-koobiya ɛgɔndʋ yɔ, pɩsɩɣnɩ-ɖʋ nɛ ɖɩtɩlɩ-wɛ camɩyɛ nɛ pɩkɩlɩ. Pɩɩcɛyaa se Pɩyɛɛrɩ alɩwaatʋ taa Krɩstʋ mba ɩñɔɔnɩ ɖama nɛ pɩkɩlɩ, mbʋ pʋyɔɔ yɔ paawɛɛ nɛ pasʋʋ kaɖɛ alɩwaatʋ taa siŋŋ. Mbʋ ɖɔɖɔ pɩcɛyaa se Krɩstʋ ñɩma mba pɛwɛ “wayɩ wayɩ wɛɛ [yaa kɛdɛzaɣ kɩyakɩŋ]” ɛnɛ ɩ-taa yɔ pala.—2 Tim. 3:1.
Ðɩñɩnɩ fezuu taa ñɩm
(1 Pɩyɛɛrɩ 3:19, 20) Nɛ wɛtʋ ndʋ tɩ-taa ɛwɛɛ nɛ ewolo esusi tɔm feziŋ salaka taa, 20 feziŋ weyi ɩtaaña, alɩwaatʋ ndʋ Ɛsɔ ɖaŋaɣnɩ suuɖu Noowa kɩyakɩŋ taa yɔ, alɩwaatʋ ndʋ pasakaɣ aɖakaɣ, ŋga ka-taa ɛyaa pazɩ, pʋ-tɔbʋʋ se kalɩzasɩ lutozo, hiɣ ñʋʋ yabʋ lɩm yɔɔ yɔ.
w13 15/6 23
Tɔm ndʋ ɖa-takayɩsɩ kalɩyaa pɔzʋʋ yɔ
Bibl tɔm se Yesu woba “esusi tɔm feziŋ salaka taa.” (1 Pɩy. 3:19) Pɩ-tɔbʋʋ lɛ suwe?
▪ Apostoloo Pɩyɛɛrɩ yɔɔdɩ feziŋ ɛnɩ ɩ-tɔm se ɩnɩ lɛ “weyi ɩtaaña, alɩwaatʋ ndʋ Ɛsɔ ɖaŋaɣnɩ suuɖu Noowa kɩyakɩŋ taa yɔ.” (1 Pɩy. 3:20) Pɩtʋʋ fɛyɩ se ɛyɔɔdaɣ tiyiyaa mba pakpaɣ lɩmaɣzɩyɛ se patɩnɩɣ Sataŋ yɔɔ yɔ pɔ-tɔm na. Yuudi ñɔyɔɔdɩ “tiyiyaa mba peyebi lone nɖɩ paawɛnɩ kiɖe tɛɛ, nɛ peyele pa-maɣmaɣ pa-ɖɩjaɣyɛ yɔ” pɔ-tɔm nɛ ɛsɔzɩ se Ɛsɔ “hɔkɩ-wɛ tamtam kpasɩ nɛ ɛɖʋ-wɛ cɩkpɛndʋʋ sɔsɔʋ taa nɛ ɛsɩɩ-wɛ se pahʋʋnɩ-wɛ tɔm kɩyakʋ sɔsɔʋ wiye.”—Yuudi 6.
Ɛzɩma tɩyɛ tiyiyaa mba paalabɩ kaañamtʋ Noowa alɩwaatʋ taa? Pʋcɔ nɛ tɛʋ sɔsɔʋ nɩɣ lɛ, tiyiyaa kɩdɛkɛdaa kpaɣ ɛyaa tomnasɩ, ŋgʋ Ɛsɔ taaha-wɛ nʋmɔʋ se pala mbʋ. (Kiɖe 6:2, 4) Pɩtasɩ lɛ, tiyiyaa mba paasʋnɩ halaa. Pɩɩkɛnɩ mbʋ pɩtɩmʋna yɔ, mbʋ pʋyɔɔ yɔ Ɛsɔ tɩlɩzɩ tiyiyaa se pa nɛ halaa pasʋʋnɩ ɖama. (Kiɖe 5:2) Ɛ-alɩwaatʋ talɩɣ lɛ, ɛkaɣ ɖɩzʋʋ tiyiyaa kɩdɛkɛdaa panɛ. Ɛlɛ lɛɛlɛɛyɔ lɛ, ɛzɩ Yuudi yɔɔdʋʋ yɔ, pɛwɛ “cɩkpɛndʋʋ sɔsɔʋ taa” yaa salaka taa fezuu taa.
Ɛzɩmtaa nɛ ɛzɩma tɩyɛ Yesu susi tɔm ‘feziŋ ɛnɩ salaka taa’? Pɩyɛɛrɩ mawa se kajalaɣ lɛ, ‘pefezi Yesu fezuu taa.’ (1 Pɩy. 3:18, 19) Yʋsɩ ɖɔɖɔ se ɛyɔɔdaa se Yesu ‘wolo esusi tɔm.’ Pɩyɛɛrɩ yɔɔdɩ-tʋ ɛzɩ tɩtɛm labʋ yɔ, pɩwɩlɩɣ se Yesu tɛm tɔm ndʋ susuu pʋcɔ nɛ Pɩyɛɛrɩ maɣ ɛ-takayaɣ kajalaɣ ñɩŋga. Pɩtɩla pefezi Yesu nɛ pitileɖi lɛ, esusi feziŋ kɩdɛkɛdɩŋ nɩŋgbaŋʋʋ hɔmtʋ tɔm ndʋ tɩɖaŋ-wɛ yɔ tɩ-tɔm. Tɔm ndʋ tɩtaahaɣ-wɛ lidaʋ nakʋyʋ kaaʋ. Pɩɩkɛnɩ nɩŋgbaŋʋʋ hɔmtʋ tɔm. (Yon. 1:1, 2) Yesu wɛnɩ toovenim se esusi nɩŋgbaŋʋʋ hɔmtʋ tɔm ndʋ, mbʋ pʋyɔɔ yɔ ɛɖɔkɩ e-tisuu nɛ e-siɣsiɣ wɛtʋ pɩkɔɔ pɩtalɩ sɩm taa, nɛ pʋwayɩ pefezi-i nɛ pɩwɩlɩɣ se Sataŋ fɛyɩnɩ ɖoŋ nɩɩyɩ ɛ-yɔɔ.—Yoh. 14:30; 16:8-11.
Piileɖiɣ lɛ, Yesu kaɣ hɔkʋʋ Sataŋ nɛ tiyiyaa kɩdɛkɛdaa mba nɛ ɛpɛɖɩ-wɛ pɔʋ sɔsɔʋ taa. (Luka 8:30, 31; Natʋ 20:1-3) Ɛlɛ lɛɛlɛɛyɔ lɛ, tiyiyaa kɩdɛkɛdaa mba pɛwɛ fezuu taa cɩkpɛndʋʋ sɔsɔʋ nakʋyʋ taa nɛ paa pɩɩlabɩ ɛzɩma pakaɣ-wɛ ɖɩzʋʋ.—Natʋ 20:7-10.
(1 Pɩyɛɛrɩ 4:6) Toovenim taa lɛ, pʋyɔɔ posusi ɖɔɖɔ tɔm kɩbandʋ sɩɖaa, se pɩsa nɛ paa pahʋnɩ-wɛ tɔm tomnaɣ taa ɛzɩ ɛyaa maɣzʋʋ yɔ, papɩzɩ nɛ pacaɣ wezuu nɛ pɩla nɔɔ kʋɖʋmaɣ nɛ fezuu ɛzɩ Ɛsɔ maɣzʋʋ yɔ.
w08 15/11 21 § 8
Yakubu nɛ Pɩyɛɛrɩ takayɩsɩ taa tɔm kɩcɛyɩtʋ
4:6—Mba kɛnɩ “sɩɖaa” mba ‘posusi-wɛ tɔm kɩbandʋ’ yɔ? Mba lɛ mba paasɩbɩ ‘pa-kɩdɛkɛdɩm nɛ pa-kɩwɛɛkɩm taa’ yɔ yaa mba paasɩbɩ fezuu taa pʋcɔ nɛ panɩɣ laŋhɛzɩyɛ tɔm yɔ. (Efɛz. 2:1) Kpaɣnɩ alɩwaatʋ ndʋ pewelisi kewiyaɣ tɔm nɛ pɛwɛɛnɩ tisuu tɩ-yɔɔ yɔ, papɩsaa pɔkɔɔ “wezuu” fezuu taa.
Bibl kalʋʋ
(1 Pɩyɛɛrɩ 3:8-22) Kɛdɛzaɣ lɛ, mɩ-tɩŋa ɩwɛɛnɩ maɣzɩm kʋɖʋmʋm, ɩnɩɩ ɖama siziŋ, ɩwɛɛnɩ koobiye sɔɔlɩm, pʋtɔdɩyɛ naʋ siŋŋ, nɛ tɩ luzuu. 9 Ɩtaahɛyɩ kɩdɛkɛdɩm kɩdɛkɛdɩm lone taa yaa tʋtʋ tʋtʋ lone taa. Ɛlɛ ɩwazɩ kɩwazʋ, mbʋ pʋyɔɔ yɔ, nʋmɔʋ ŋgʋ kɩ-taa paya-mɩ, se pɩsa nɛ ɩpɩzɩ ɩmʋ wazaɣ. 10 Mbʋ pʋyɔɔ yɔ “weyi ɛñɩnɩɣ se ɛsɔɔlɩ wezuu nɛ ɛna kɩyakɩŋ kɩbaŋ yɔ, pɩwɛɛ se ɛɖaŋ ɛ-nzʋlʋmɩyɛ nɛ kɩdɛkɛdɩm tɔm nɛ ɛɖɔkɩ e-ndomee nɛ pɔbɔtʋ tɔm yɔɔdʋʋ. 11 Ɛha siɣye mbʋ pɩfɛyɩ ɖeu yɔ nɛ ɛla mbʋ pɩwɛ ɖeu yɔ; ɛñɩnɩ laŋhɛzɩyɛ nɛ ese ɖɩ-wayɩ. 12 Mbʋ pʋyɔɔ yɔ Yehowa ɛsa wɛ siɣsiɣ tɩnaa yɔɔ, nɛ ɛ-nɩŋgbaaŋ welisiɣ pe-tenduu, ɛlɛ Yehowa haɣ siɣye mba palakɩ kɩdɛkɛdɩm yɔ.” 13 Toovenim taa lɛ, akaɣ-mɩ labʋ kɩdɛkɛdɩm ye ɩwɛ kpekpeka mbʋ pɩwɛ ɖeu yɔ pɩ-labʋ taa yɔ? 14 Ɛlɛ paa pɩwɛɛ se ɩtɔɔ kʋñɔŋ siɣsiɣ wɛtʋ yɔɔ yɔ, ɩkɛ koboyaɣ tɩnaa. Ɛlɛ, itaase sɔɔndʋ mbʋ pɩkpaɣ-wɛ sɔɔndʋ yɔ, nɛ mɩ-laŋɩyɛ ɛtaamaa. 15 Ɛlɛ ɩla nɛ Krɩstʋ weyi ɛkɛ Kɩbaɣlʋ yɔ ɛpɩsɩ kiɖeɖeu mɩ-laŋa taa, paa ɛzɩmtaa lɛ, ɩɖaŋ kpam se ɩlʋ lidaʋ ŋgʋ ɩwɛna yɔ kɩ-yɔɔ weyi ɛpɔzʋʋ-mɩ mbʋ pʋyɔɔ ɩwɛnɩ-kʋ yɔ ɛ-ɛsɩndaa, ɛlɛ ɩlakɩ mbʋ nɛ hɛɛɛ wɛtʋ nɛ ñamtʋ sɔsɔtʋ. 16 Ɩwɛɛnɩ ɛhʋyɛ kɩbanɖɛ tam, se pɩsa nɛ mbʋ pɩ-taa payɩ pɔyɔɔdʋʋ mɩ-yɔɔ tɔm kɩdɛkɛdɩtʋ yɔ, fɛyɛ kpa mba pɔyɔɔdʋʋ mɩ-yɔɔ tɔm kɩdɛkɛdɩtʋ yɔ, mbʋ pʋyɔɔ yɔ ɩɖɔŋ ɖɔnɛ kɩbanɖɛ ɛzɩ Krɩstʋ wayɩ tɩŋɩyaa yɔ. 17 Mbʋ pʋyɔɔ yɔ pɩwɛ ɖeu se ɩtɔɔ kʋñɔŋ kɩbandʋ labʋ yɔɔ, ye pɩkɛ Ɛsɔ sɔɔlɩm yɔ, nɛ pɩkɩlɩ se ɩtɔɔ kʋñɔŋ kɩdɛkɛdɩm labʋ yɔɔ. 18 Mbʋ pʋyɔɔ yɔ, Krɩstʋ sɩbɩ kɩwɛɛkɩm yɔɔ tam kʋɖʋm nɛ pɩkpaɣ pɩɖɛɛ, ɛyʋ siɣsiɣ tʋ sɩbɩ ɛyaa mba pɛfɛyɩ siɣsiɣ yɔ pɔ-yɔɔ, se pɩsa nɛ eɖiyi-mɩ nɛ ewoni Ɛsɔ cɔlɔ. Pakʋ-ɩ tomnaɣ taa, ɛlɛ pefezi-i fezuu taa. 19 Nɛ wɛtʋ ndʋ tɩ-taa ɛwɛɛ nɛ ewolo esusi tɔm feziŋ salaka taa, 20 feziŋ weyi ɩtaaña, alɩwaatʋ ndʋ Ɛsɔ ɖaŋaɣnɩ suuɖu Noowa kɩyakɩŋ taa yɔ, alɩwaatʋ ndʋ pasakaɣ aɖakaɣ, ŋga ka-taa ɛyaa pazɩ, pʋ-tɔbʋʋ se kalɩzasɩ lutozo, hiɣ ñʋʋ yabʋ lɩm yɔɔ yɔ. 21 Lɩm mɩyɩsʋʋ mbʋ pɩnɩɣzɩnɩ lakasɩ nzɩ yɔ, pɩyakɩ mɩ-ñʋʋ ɖɔɖɔ lɛɛlɛɛyɔ (pɩɩtɩŋɩɣnɩ tomnaɣ yɔɔ azuluma hɩzʋʋ yɔɔ, ɛlɛ pɩtɩŋɩɣnɩ ɛzɩma ɛyʋ pɔzʋʋ Ɛsɔ ɛhʋyɛ kɩbanɖɛ yɔ pɩ-yɔɔ), pɩtɩŋnɩ Yesu Krɩstʋ femtu yɔɔ. 22 Ɛwɛ Ɛsɔ nesi kɩbanzɩ yɔɔ, mbʋ pʋyɔɔ yɔ ɛkpa ɛsɔdaa, nɛ poluzi Ɛsɔ tiyiyaa nɛ ñʋndɩnaa nɛ ɖoŋ tɩnaa ɛ-tɛɛ.
28 OCTOBRE–3 NOVEMBRE
ÑƖM MBƲ PƖWƐ ƐSƆTƆM TAA YƆ | 2 PƖYƐƐRƖ 1-3
“Ɩɖaŋ nɛ ɩtɔzʋʋ tam Yehowa kɩyakʋ wɛʋ alɩwaatʋ yɔɔ”
(2 Pɩyɛɛrɩ 3:9, 10) Yehowa fɛyɩ ninika e-lidaʋ tɔm labʋ yɔɔ, ɛzɩ nabɛyɛ nɩʋ ninika tɔbʋʋ yɔ, ɛlɛ ɛwɛ suuɖu mɩ-yɔɔ, mbʋ pʋyɔɔ yɔ ɛtɩsɔɔlɩ se paɖɩzɩ nɔɔyʋ, ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ. 10 Ɛlɛ Yehowa kɩyakʋ kaɣ kɔm ɛzɩ mɩlʋ yɔ, nɛ ki-wiye lɛ, ɛsɔdaa kaɣ mʋʋʋ kɔkɔɖɛ sɔsɔɖɛ naɖɩyɛ taa, ɛlɛ wondu ndʋ tɩsa miŋ kaŋ kaŋ yɔ tɩkaɣ yoluu, nɛ pɩkaɣ kuluu tɛtʋ nɛ tɩ-yɔɔ tʋma yɔɔ.
w06 15/12 27 § 11
Yehowa ‘kaɣ ɖezuu ɛyaa tɔm’
11 Ye mbʋ tɔm ndʋ Yesu yɔɔdaa se Ɛsɔ kaɣ ɖezuu ɛyaa tɔm “lɛɛ lɛɛ” yɔ tɩ-tɔbʋʋ lɛ suwe? Ɛsɔtɔm wɩlɩɣ se paa ‘Yehowa ɛwɛ suuɖu’ yɔ, ɛkaɣ hʋnʋʋ ɛya tɔm lɛɛ lɛɛ alɩwaatʋ talɩɣ lɛ. (Luka 18:7, 8; 2 Pɩyɛɛrɩ 3:9, 10) Noowa alɩwaatʋ taa alɩwaatʋ ndʋ tɛʋ sɔsɔʋ paɣzaa lɛ, ɛtɩtasɩ haʋ ɛyaa kɩdɛkɛdaa alɩwaatʋ se pɛlɛɣzɩ. Mbʋ ɖɔɖɔ Lɔɔtɩ alɩwaatʋ taa, miŋ paɣzɩ lɩnʋʋ ɛsɔdaa lɛ, ɛya kɩdɛkɛdaa kpeekpe kaasɩba. Yesu yɔɔdaa se: “Mbʋ ɖɔɖɔ pɩkaɣ wɛʋ kɩyakʋ ŋgʋ ki-wiye, alɩwaatʋ ndʋ pokuluu ɛyʋ Pɩyalʋ yɔɔ nɛ pawɩlɩ yɔ.” (Luka 17:27-30) Ye mbʋ “ɖɩzʋʋ mbʋ patɩɖʋna” yɔ, mbʋ kaɣnɩ talʋʋ ɛyaa kɩdɛkɛdaa. (1 Tesalooniiki mba 5:2, 3) Toovenim taa lɛ, ɖɩpɩzɩɣ ɖɩwɛɛnɩ lidaʋ se Yehowa kaɣ ɖezuu Sataŋ ɛjaɖɛ alɩwaatʋ ndʋ ɛɖʋwa yɔ tɩ-yɔɔ ɖeyi ɖeyi.
(2 Pɩyɛɛrɩ 3:11, 12) Ɛzɩma pɩtɩŋa payɩ pɩkaɣ yoluu mbʋ yɔ, pʋyɔɔ lɛ, ɩmaɣzɩ nɛ ɩna ɛyaa mba pɩwɛɛ se ɩkɛna yɔ ɖɔnɛ kiɖeɖee taa nɛ lakasɩ nzɩ sɩwɩlɩɣ se ɩñɔnɩ Ɛsɔ yɔ sɩ-taa, 12 alɩwaatʋ ndʋ ɩɖaŋaa nɛ ɩtɔzʋʋ tam Yehowa kɩyakʋ wɛʋ alɩwaatʋ yɔɔ yɔ, ŋgʋ kɩ-yɔɔ pɩkaɣ tɩŋnʋʋ nɛ paɖɩzɩ ɛsɔdaa miŋ nzʋlʋma taa nɛ wondu yoli mbʋ pɩsa miŋ kaŋ kaŋ yɔ pɩ-taa yɔ!
w06 15/12 19 § 18
“Yehowa kɩyakʋ sɔsɔʋ ñɔtɩ kpam”
18 Apostoloo Pɩyɛɛrɩ paɣ-ɖʋ se ‘ɖɩɖaŋ nɛ ɖɩtɔzʋʋ tam Yehowa kɩyakʋ yɔɔ.’ Ɛzɩma ɖɩpɩzɩɣ nɛ ɖɩla mbʋ? Nʋmɔŋ weyi ɩ-yɔɔ ɖɩpɩzɩɣ ɖɩtɩŋna yɔ, ɩ-taa lɛɛkʋ lɛ se ‘ɖɩɖɔ ɖɔnɛ kiɖeɖee taa nɛ lakasɩ nzɩ sɩwɩlɩɣ se ɖɩñɔnɩ Ɛsɔ yɔ sɩ-taa.’ (2 Pɩyɛɛrɩ 3:11, 12) Ye ɖɩkaŋ ɖa-lɩmaɣza tʋma ana a-labʋ yɔɔ yɔ, pɩsɩɣnɩ-ɖʋ se ɖɩtaasɔɔ “Yehowa kɩyakʋ” yɔɔ. Grɛɛkɩ tɔm piye nɖɩ pɛɖɛzaa se “ɩɖaŋ nɛ ɩtaasɔɔ yɔ” ɖɩ-tɔbʋʋ lɛ se “ɖɩka ɖa-ñʋʋ.” Ye mbʋ pɩwɛɛ se ɖɩka ñʋʋ nɛ tʋma ana pʋcɔ nɛ Yehowa kɩyakʋ talɩ. Ye ɖɩkam ñʋʋ nɛ Yehowa tʋma labʋ yɔ, piyeki nɛ alɩwaatʋ ɖɛʋ lɛɛ lɛɛ ɖɛ-ɛsɩndaa.—1 Kɔrɛntɩ mba 15:58.
Ðɩñɩnɩ fezuu taa ñɩm
(2 Pɩyɛɛrɩ 1:19) Pʋyɔɔ lɛ, lidaʋ ŋgʋ ɖɩwɛnɩ natʋ tɔm yɔɔ yɔ, kɩcɛyɩ camɩyɛ nɛ pɩkɩlɩ, nɛ ɩlakɩ camɩyɛ se ikemsiɣni-tʋ ɛzɩ kanɖʋ ŋgʋ kiɖiɣni ñandʋʋ cɩkpɛndʋʋ lone naɖɩyɛ taa (pɩkɔɔ pɩtalɩ alɩwaatʋ ndʋ tɛʋ fema nɛ tɩmbalʋʋ lɩɩ) mɩ-laŋa taa yɔ.
w08 15/11 22 § 2
Yakubu nɛ Pɩyɛɛrɩ takayɩsɩ taa tɔm kɩcɛyɩtʋ
1:19—Akɛnɩ “tɩmbalʋʋ” yaa tɩɩŋa ŋga kalɩɣ tanaŋ tɛɛ pala yɔ? Alɩwaatʋ ndʋ kalɩwa? Nɛ ɛzɩma ɖɩlaba nɛ ɖɩna? “Tɩmbalʋʋ” kɛnɩnɩ Yesu Krɩstʋ weyi paha-ɩ ɖoŋ se ɛtɔɔ kewiyitu yɔ. (Natʋ 22:16) Pɩnaɣ 1914 taa Yesu Krɩstʋ kʋyɩ wondu kɩlɩzɩtʋ kpeekpe ɛsɩndaa nɛ ɛpɩsɩ Mesiya Kewiyaɣ Wiyaʋ, nɛ pɩwɩlɩ se evemiye kɩfaɖɛ naɖɩyɛ paɣzaa. Natʋ ndʋ tɩ-taa Yesu Krɩstʋ wɛtʋ kaalɛɣzɩ ɛ-apostoloowaa ɛsɩndaa yɔ, tɩwɩlaɣ ɛzɩma pakaɣ-ɩ haʋ ɖoŋ se ɛtɔɔ kewiyitu yɔ, nɛ pɩwɩlɩɣ ɖɔɖɔ se Bibl taa natʋ tɔm kɛ toovenim. Ye ɖɩkpɛlɩkɩɣ-tʋ yɔ, tɩsɩɣnɩ-ɖʋ nɛ ɖɩka ɖa-lɩmaɣza tɩmbalʋʋ yaa tɩɩŋa ŋga kalɩ tanaŋ tɛɛ pala yɔ, kɔ-yɔɔ.
(2 Pɩyɛɛrɩ 2:4) Toovenim taa lɛ, Ɛsɔ tiyele hɔm tiyiyaa mba palabɩ kɩwɛɛkɩm yɔ pa-nɩŋgbaaŋ, ɛlɛ ɛpɛɖɩ-wɛ Tarɩtaarɩ taa, nɛ ɛɖʋ-wɛ cɩkpɛndʋʋ sɔsɔʋ kpasɩ nɛ ɛsɩɩ-wɛ se pahʋʋnɩ-wɛ tɔm.
w08 15/11 22 § 3
Yakubu nɛ Pɩyɛɛrɩ takayɩsɩ taa tɔm kɩcɛyɩtʋ
2:4—Ɛbɛ “Tarɩtaarɩ” kɛnaa? Nɛ alɩwaatʋ ndʋ pɛpɛɖɩ Ɛsɔ tiyiyaa kaañamtʋ tɩnaa kɩ-taa? Tarɩtaarɩ kɛnɩ wɛtʋ ndʋ tɩnɩɣzɩnɩ salaka taa wɛʋ yɔ, ɛlɛ paaɖʋʋ ɛyaa wɛtʋ ndʋ tɩ-taa, feziŋ ɖeke paɖʋʋ wɛtʋ ndʋ tɩ-taa. Mba pɛwɛ wɛtʋ ndʋ tɩ-taa yɔ, pɛwɛ lɩmaɣza taa cɩkpɛndʋʋ taa, nɛ pʋyɔɔ lɛ, pɛfɛyɩnɩ ñalɩmɩyɛ nɖɩ ɖiyeki se panɩɩ Ɛsɔ tamaɣ taa yɔ. Mba pɛwɛ Tarɩtaarɩ taa yɔ pɛfɛyɩnɩ lidaʋ nakʋyʋ cee wayɩ yɔɔ. Ɛsɔ kaapɛɖɩ Ɛsɔ tiyiyaa kaañamtʋ tɩnaa Tarɩtaarɩ taa Noowa alɩwaatʋ taa, nɛ pɛwɛɣ wɛtʋ ndʋ tɩ-taa pɩkɔɔ pɩtalɩ alɩwaatʋ ndʋ paɖɩzɩɣ-wɛ cɩɖɩ cɩɖɩ yɔ.
Bibl kalʋʋ
(2 Pɩyɛɛrɩ 1:1-15) Ma Siimɔɔ Pɩyɛɛrɩ, Yesu Krɩstʋ yom nɛ ɛ-tɛ apostoloo, mamaɣnɩ takayaɣ kanɛ mba pehiɣ tisuu mbʋ pɩwɛ ñɩm ɛzɩ ɖa-ñɩmbʋ yɔ, pɩtɩŋnɩ ɖɛ-Ɛsɔ nɛ Ñʋʋ Yaɖʋ Yesu Krɩstʋ pe-siɣsiɣ wɛtʋ yɔɔ: 2 Tɛtɛ nɛ pɔsɔzɩ-mɩ lootiye nɛ laŋhɛzɩyɛ pɩtɩŋnɩ Ɛsɔ nɛ ɖa-Kɩbaɣlʋ Yesu pɔ-yɔɔ toovenim sɩmtʋ yɔɔ, 3 mbʋ pʋyɔɔ yɔ Ɛsɔ ɖoŋ ha-ɖʋ wondu ndʋ payɩ tiyeki se ɖɩcaɣ wezuu nɛ ɖɩñɔɔnɩ Ɛsɔ yɔ, pɩtɩŋnɩ Weyi ɛtɩŋnɩ ɛ-maɣmaɣ ɛ-samtʋ nɛ ɛ-wɛtʋ kɩbandʋ yɔɔ nɛ ɛyaa-ɖʋ yɔ e-toovenim sɩmtʋ yɔɔ. 4 Ɛtɩŋnɩ wondu ndʋ tɩ-yɔɔ nɛ ɛha-ɖʋ lidaʋ tɔm ndʋ tɩwɛ ñɩm nɛ tɩpaɣlɩ pɩdɩɩfɛyɩ yɔ, se pɩsa nɛ pɩtɩŋnɩ tɩ-yɔɔ lɛ, ɩkaa Ɛsɔ wɛtʋ, mbʋ pʋyɔɔ yɔ ɩlɩ mbʋ pɩwɛ ɛjaɖɛ yɔɔ nɛ pɩɖazɩɣ nɛ pɩlɩnɩ kɔɖɛyɩ kɩdɛkɛdʋʋ cɔlɔ yɔ pi-nesi tɛɛ. 5 Lɩmaɣzɩyɛ nɖɩ ɖɩ-yɔɔ ɖeyi ɖeyi lɛ, ɩñaɣ pana siŋŋ nɛ ɩsɔzɩ mi-tisuu yɔɔ wɛtʋ kɩbandʋ, mɩ-wɛtʋ kɩbandʋ yɔɔ sɩmtʋ, 6 mɩ-sɩmtʋ yɔɔ tɩ ɖɔkʋʋ, mɩ-tɩ ɖɔkʋʋ yɔɔ laŋɩyɛ ɖɔkʋʋ, mɩ-laŋɩyɛ ɖɔkʋʋ yɔɔ Ɛsɔ ñɔnʋʋ, 7 mɩ-Ɛsɔ ñɔnʋʋ yɔɔ koobiye sɔɔlɩm, mi-koobiye sɔɔlɩm yɔɔ sɔɔlɩm. 8 Mbʋ pʋyɔɔ yɔ ye ɩwɛnɩ wɛtʋ ndʋ nɛ tɩwadɩ yɔ, tɩkaɣ-mɩ ɖaŋʋʋ se ɩtaakɛ mba paalakɩ naɖɩyɛ yɔ yaa mba paalʋlʋʋ pee ɖa-Kɩbaɣlʋ Yesu Krɩstʋ toovenim sɩmtʋ hɔɔlʋʋ taa yɔ. 9 Mbʋ pʋyɔɔ yɔ weyi ɛfɛyɩnɩ wɛtʋ ndʋ yɔ, ɛkɛ yʋlʋm, nɛ ehuuzi ɛ-ɛsa se ɛtaana ñalɩmɩyɛ, nɛ ɛpɩsɩ weyi ɛsɔwa se pañalɩ ɛ-kɩwɛɛkɩm mbʋ ɛɛlabɩ ɖooo lɔŋ yɔ. 10 Pʋyɔɔ lɛ, koobiya, ɩñaɣ pana siŋŋ nɛ pɩkɩlɩ nɛ ɩɖɔkɩ mɩ-yatʋ nɛ mɩ-lɩzʋʋ kpam, mbʋ pʋyɔɔ yɔ ye iwoki pɩ-yɔɔ nɛ ɩlakɩ mbʋ yɔ, ɩɩkaɣ tɔlʋʋ wiɖiyi kaaʋ. 11 Toovenim taa lɛ, ye ɩlakɩ mbʋ yɔ, pakaɣ-mɩ haʋ waɖɛ siŋŋ nɛ ɩsʋʋ ɖa-Kɩbaɣlʋ nɛ ɖa-Ñʋʋ Yaɖʋ Yesu Krɩstʋ tamtam Kewiyaɣ taa. 12 Lɩmaɣzɩyɛ nɖɩ ɖɩ-yɔɔ manɖʋ man-taa se paa ɛzɩmtaa lɛ, mɔntɔzʋʋ-mɩ tɔm ndʋ, paa ɩɩsɩm-tʋ nɛ ɩka camɩyɛ toovenim mbʋ pɩwɛ mɩ-taa yɔ pɩ-taa yɔ. 13 Ɛlɛ mamaɣzɩɣ se pɩmʋnaa se alɩwaatʋ ndʋ mɛnkpɛndɩ mɛwɛ kizinziku kʋnɛ kɩ-tɛɛ yɔ, mɔntɔzʋʋ-mɩ tɔm ndʋ se menseɣtini-mɩ, 14 mbʋ pʋyɔɔ yɔ mansɩm mbʋ se piileɖiɣ lɛ, pakʋsʋʋ men-kizinziku, ɛzɩ ɖa-Kɩbaɣlʋ Yesu Krɩstʋ wɩlʋʋ-m ɖɔɖɔ kpayɩ kpayɩ yɔ. 15 Mankaɣ labʋ mbʋ payɩ manpɩzɩɣ yɔ paa ɛzɩmtaa se pɩsa nɛ mɛn-ɖɛʋ wayɩ lɛ, mɩ-maɣmaɣ ɩpɩzɩ nɛ ɩtɔzɩ tɔm ndʋ tɩ-yɔɔ.