Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
2-8 DÉCEMBRE
ÑƖM MBƲ PƖWƐ ƐSƆTƆM TAA YƆ | NATƲ 7-9
“Yehowa wazɩ samaɣ sɔsɔɔ ŋga kɛfɛyɩ kalʋʋ yɔ”
(Natʋ 7:9) Pʋwayɩ lɛ, na, mana samaɣ sɔsɔɔ nakɛyɛ, ŋga ɛyʋ nɔɔyʋ taapɩzɩɣ-kɛ kalʋʋ yɔ, kalɩnɩ ajɛɛ kpeekpe nɛ cejewe kpeekpe nɛ samasɩ kpeekpe nɛ kʋnʋmɩŋ kpeekpe taa, kasɩŋ kewiyaɣ kpelaɣ ɛsɩndaa nɛ Heɣa ɛsɩndaa, kosu tokonaa kɩɖaɣlaa kʋhʋlʋmaa; nɛ paadɛtʋ kaawɛ ke-nesi taa.
it-1 1014 § 2
Samaɣ sɔsɔɔ
Piyeba nɛ ɖɩpɔzʋʋ ɖa-tɩ tɔm tʋnɛ: Ye “samaɣ sɔsɔɔ” ehikiɣ ñʋʋ yabʋ se kɛwɛɛ tɛtʋ yɔɔ yɔ, ɛbɛ yɔɔ pɔyɔɔdʋʋ se “kasɩŋ kewiyaɣ kpelaɣ ɛsɩndaa nɛ Heɣa ɛsɩndaa”? (Nat 7:9) Bibl taa lɛ, nabʋyʋ taa, ye pɔtɔm se ɛyʋ nɔɔyʋ ‘sɩŋ’ nɔɔyʋ ɛsɩndaa yɔ, pɩwɩlɩɣ se weyi ɛsɩŋaa yɔ, ɛ-tɔm kɛdɩnɩ weyi ɛ-ɛsɩndaa ɛsɩŋaa yɔ. (Keɣa 1:5; 5:5; Adu 22:29; Lk 1:19) Toovenim taa lɛ, pɔyɔɔdɩ “tɛtʋ yɔɔ awiya, kaɖɩsɩ sɔsɔsɩ, sɔɔjanaa ñʋndɩnaa, ñɩm tɩnaa, ɖoŋ tɩnaa, paa yom weyi, nɛ ɛyaa mba pɛwɛ pa-tɩ yɔɔ yɔ pa-tɩŋa” pɔ-yɔɔ tɔm Natʋ takayaɣ ñʋʋ loɖo ñɩŋgʋ ŋgʋ kɩɖɛwa yɔ, kɩ-taa se pɛwɛɛ nɛ peseɣ se pɛmɛlɩ nɛ pɔtɔŋ se: “Weyi ɛcaɣ kewiyaɣ kpelaɣ yɔɔ yɔ ɛtaana-ɖʋ, nɛ Heɣa pana ɛtaakɔɔ ɖɔ-yɔɔ mbʋ pʋyɔɔ yɔ pa-pana kɩyakʋ sɔsɔʋ talaa, nɛ apɩzɩɣ nɛ ɛsɩŋ kɩ-ɛsɩndaa?” (Nat 6:15-17; kpaɣ-tʋ nɛ ŋmaɣzɩnɩ Lk 21:36) Ye mbʋ pɩwɛ ɛzɩ “samaɣ sɔsɔɔ” taa mba kɛnɩ ɛyaa mba payabɩ pa-ñʋʋ pana alɩwaatʋ ndʋ tɩ-taa nɛ papɩzɩ ‘pasɩŋ’ ɛzɩ ɛyaa mba Ɛsɔ nɛ Heɣa pɔsɔɔlɩ pɔ-tɔm yɔ.
(Natʋ 7:14) Peeɖe meheyi-i kpaagbaa se: “Man-kɩbaɣlʋ, ñasɩmna.” Nɛ eheyi-m se: “Mba lɛ ɛyaa mba palɩnɩ kʋñɔŋ sɔsɔʋ taa yɔ, nɛ pɔcɔtɩ po-tokonaa kɩɖaɣlaa nɛ pahʋlʋnzɩ-wɛ Heɣa calɩm taa.
it-2 1104 § 4
Kʋñɔŋ sɔsɔʋ
Paɖɩzɩ Yeruzalɛm nɛ pɩla pɩnzɩ niidozo mbʋ yɔ lɛ, peheyi apostoloo Yohanɛɛsɩ tɔm pɩlɩɩnɩ samaɣ sɔsɔɔ ŋga kalɩnɩ ajɛɛ ndɩ ndɩ nɛ cejewe ndɩ ndɩ taa yɔ kɔ-yɔɔ se: “Mba lɛ ɛyaa mba palɩnɩ kʋñɔŋ sɔsɔʋ taa yɔ.” (Nat 7:13, 14) Pɔyɔɔdʋʋ se samaɣ sɔsɔɔ ‘lɩnɩ kʋñɔŋ sɔsɔʋ taa’ yɔ, pɩwɩlɩɣ se kehiɣ ñʋʋ yabɩtʋ. Tɔm ndʋ tɩwɛ Tʋma labʋ 7:9, 10 taa nɛ tɩtɔŋ se: “Ɛsɔ kaawɛ [Yosɛɛfʋ] cɔlɔ, nɛ eholi-i ɛ-kʋñɔmɩŋ kpeekpe taa” yɔ, tɩñɩkɩɣ niye tɔm ndʋ tɩ-yɔɔ. Ye pɔtɔm se poholi Yosɛɛfʋ ɛ-kʋñɔmɩŋ taa yɔ, pɩwɩlɩɣ se pɩtasɩna se ɛɖɔkɩ ɛ-tɩ kʋñɔmɩŋ ɛnɩ ɩ-taa lɛ, ɛlɩ kʋñɔmɩŋ ɛnɩ ɩ-taa ɖɔɖɔ.
(Natʋ 7:15-17) Pʋyɔɔ pɛwɛ Ɛsɔ kewiyaɣ kpelaɣ ɛsɩndaa, nɛ palakɩ-ɩ tʋmɩyɛ kiɖeɖee wɩsɩ nɛ ɖoo e-templo taa; nɛ Weyi ɛcaɣ kewiyaɣ kpelaɣ yɔɔ yɔ ɛkaɣ posuu e-kizinziku pɔ-yɔɔ. 16 Ñɔɔsɩ ɛɛkaɣ-wɛ tasʋʋ wɩʋ nɛ lɔkɔtʋ ɛɛtasɩɣ-wɛ ɖɛʋ ɖɔɖɔ, nɛ wɩsɩ ɛɛkaɣ-wɛ tasʋʋ ñaɣʋ nɛ soŋaɣ sɔsɔɔ nakɛyɛ ɛɛtasɩɣ-wɛ kʋʋ, 17 mbʋ pʋyɔɔ yɔ Heɣa ŋga kɛwɛ kewiyaɣ kpelaɣ hɛkʋ taa yɔ, kakaɣ-wɛ ɖiyuu nɛ kowoni-wɛ wezuu lɩm hila cɔlɔ. Nɛ Ɛsɔ kaɣ hɩzʋʋ ɛsɩtɛɣlɩm tɩŋa pɛ-ɛsɩndaa.”
it-1 1014 § 1
Samaɣ sɔsɔɔ
Ka-tɩlʋʋ. Tɔm ndʋ Natʋ 7 nɛ masɩ lɛɛsɩ yɔɔdɩ “samaɣ sɔsɔɔ” yɔɔ yɔ, tɩsɩnɩ-ɖʋ nɛ ɖɩtɩlɩ samaɣ sɔsɔɔ. Natʋ 7:15-17 yɔɔdɩ Ɛsɔ tɔm ɛzɩ weyi “ɛkaɣ posuu e-kizinziku pɔ-yɔɔ” yɔ nɛ weyi ɛkaɣ-wɛ ɖiyuu nɛ ewoni-wɛ “wezuu lɩm hila cɔlɔ” yɔ, nɛ ɛnʋ ɖɔɖɔ ɛkaɣnɩ hɩzʋʋ “ɛsɩtɛɣlɩm tɩŋa pɛ-ɛsɩndaa.” Ðɩnaɣ tɔm ndʋ tɩ-ɖɔndɩ ɖɔɖɔ Natʋ 21:2-4 taa; tɩtɔŋ se: “Ɛsɔ kizinziku wɛ ɛyaa cɔlɔ,” “ɛkaɣ hɩzʋʋ ɛsɩtɛɣlɩm kpeekpe pɛ-ɛsɩndaa” nɛ “sɩm ɛɛkaɣ tasʋʋ wɛʋ ɖɔɖɔ.” Natʋ tɔm ndʋ pɔyɔɔdɩ cɩnɛ yɔ, tiitukuuni mba pɛwɛ ɛsɔdaa ɖenɖe ‘Yeruzalɛm kɩfalʋʋ lɩɣna se kitii’ yɔ, ɛlɛ titukuuni ɛyaa mba pɛwɛ tɛtʋ yɔɔ yɔ.
Ðɩñɩnɩ fezuu taa ñɩm
(Natʋ 7:1) Pʋwayɩ lɛ, mana Ɛsɔ tiyiyaa naanza, pasɩŋ tɛtʋ kɔnanaa naanza taa, pakpa tɛtʋ yɔɔ helim naanza, se pɩsa nɛ helim ɛtaama tɛtʋ yɔɔ yaa teŋgu yɔɔ yaa tɩʋ nakʋyʋ yɔɔ.
re 115 § 4
Pañɩɣ mayaɣ Ɛsɔ tɛ Izrayɛɛlɩ yɔɔ
4 Pɩtʋʋ fɛyɩ se Ɛsɔ tiyiyaa naanza waa panɛ pasɩŋnɩ tiyiyaa canɖaŋ naanza waa mba Yehowa lɩzaa se pɔcɔna nɛ tɔm hʋʋ kɩyakʋ talɩ pʋcɔ nɛ pahʋʋ-tʋ yɔ. Alɩwaatʋ ndʋ tiyiyaa mba, peyeki helim mbʋ pɩlɩnɩ hayo, hadɛ, wɩsɩ ɖɩlɩyɛ nɛ wɩsɩ ɖɩɖʋyɛ taa kpaagbaa yɔ, mbʋ pɩwɛɛkɩɣ yɔ, pɩɖɔʋ kpem. Pɩkaɣ cɛzʋʋ helim naanza mbʋ Yehowa kaalabɩnɩ tʋmɩyɛ nɛ ɛfalɩnɩ caanaʋ taa Elam mba nɛ ɛkʋ-wɛ caɣ caɣ yɔ. (Yereemii 49:36-38) Pɩkaɣ kɛʋ helim sɔsɔm nɛ pɩmakɩ ɖoŋ nɛ pɩcɛzɩ mbʋ Yehowa kaalabɩnɩ tʋmɩyɛ nɛ ɛkʋnɩ Amooni tɛtʋ taa mba yɔ. (Amoosi 1:13-15) Sataŋ ɛjaɖɛ hɔɔlʋʋ nakʋyʋ ɛɛkaɣ pɩzʋʋ nɛ kɩkaɖɩnɩ Yehowa ɛ-pana kɩyakʋ sɔsɔʋ ŋgʋ ki-wiye, alɩwaatʋ ndʋ ɛlʋkɩ e-kewiyitu kɩkɩlɩtʋ ndʋ tɩwɛɣ tam yɔ tɩ-yɔɔ yɔ.—Keɣa 82:16, 18; Izaayii 29:5, 6.
(Natʋ 9:11) Kɩwɛnɩ wiyaʋ nɔɔyʋ, pɔʋ sɔsɔʋ tɛ tiyiyu. Ebree taa lɛ, ɛ-hɩɖɛ lɛ Abadɔɔnɩ, ɛlɛ Grɛɛkɩ taa lɛ, ɛ-hɩɖɛ lɛ Apoliyɔɔnɩ.
it-1 12 § 3, 4
Abadɔɔnɩ
Anɩ Abadɔɔnɩ, pɔʋ sɔsɔʋ tɛ tiyiyu kɛnaa?
Natʋ 9:11 taa, palabɩnɩ tʋmɩyɛ tɔm piye “Abadɔɔnɩ” nɛ payaanɩ “pɔʋ sɔsɔʋ tɛ tiyiyu.” Grɛɛkɩ tɔm piye nɖɩ, ɖɩmʋnɩ hɩɖɛ nɖɩ yɔ, nɖɩ lɛ “Apoliyɔɔnɩ” nɛ ɖɩ-tɔbʋʋ lɛ “Ðɩzɩyʋ.” Pɩnzɩ 1800 waa taa, ɛyaa ñaɣ pana se pawɩlɩ se tɔm tʋnɛ tɩkɛ natʋ tɔm nɛ titukuni ɛyaa nabɛyɛ ɛzɩ sɔdʋʋ Fɛspazɩyɛ, Mahomet nɛ halɩ Napoléon mbʋ yɔ, nɛ pamaɣzaɣ se tiyiyu ɛnʋ ɛkɛ “Sataŋ tiyiyu.” Ɛlɛ ɖɩyʋsɩ se Natʋ 20:1-3 taa lɛ, tiyiyu weyi ɛɖɔkɩ “pɔʋ sɔsɔʋ ñɩmɩyɛ” yɔ, ɛtɩkɛ Sataŋ tiyiyu ɛlɛ ɛkɛ Ɛsɔ lone taa caɣyʋ, ɛhɔkɩ Sataŋ nɛ ɛpɛɖɩ-ɩ pɔʋ sɔsɔʋ taa. The Interpreter’s Bible yɔɔdaɣ Natʋ 9:11 tɔm lɛ, kɩyɔɔdaa se: “Abadɔɔnɩ tɩkɛ Sataŋ tiyiyu, ɛlɛ Ɛsɔ tiyiyu ɛkɛnaa nɛ ɛlakɩ ɖɩzʋʋ tʋmɩyɛ ɛzɩ Ɛsɔ sɔɔlʋʋ yɔ.”
Ɛzɩ ɖɩnaʋ Ebree masɩ nzɩ sɩ-taa ɖɩtazɩ lɛɛlɛɛyɔ yɔ sɩ-taa yɔ, pɩtʋ kpayɩ kpayɩ se ʼavad·dohnʹ kɛnɩ pɩlaʋ yaa sɩm. Yesu yɔɔdɩ Natʋ 1:18 taa se: “Mɛwɛ wezuu tamtam, nɛ mɛwɛnɩ sɩm nɛ Pɩlaʋ ñɩma.” Pawɩlɩ ɛzɩma ɛwɛnɩ ɖoŋ pɔʋ sɔsɔʋ yɔɔ yɔ Luka 8:31 taa. Ebree mba 2:14 wɩlɩ kpayɩ ɖoŋ weyi Yesu wɛna se ɛɖɩzɩ pɩkpɛndɩnɩ Sataŋ yɔ. Mayaɣ ŋga kɔyɔɔdɩ Yesu tɔm se ɛpɩsɩ calɩm nɛ tomnaɣ se pɩsa nɛ “pɩtɩŋnɩ ɛ-sɩm yɔɔ lɛ, ɛpɩzɩ nɛ ɛɖɩzɩ weyi ɛwɛnɩ ɖoŋ se ɛkɔnɩ sɩm yɔ, pʋ-tɔbʋʋ se Eleeu.” Natʋ 19:11-16 taa, pɔyɔɔdɩ Yesu tɔm kpayɩ kpayɩ se ɛkɛ weyi Ɛsɔ lɩzaa se ɛla ɖɩzɩyʋ tʋmɩyɛ yɔ.—Kalɩ APOLLYÔN
9-15 DÉCEMBRE
ÑƖM MBƲ PƖWƐ ƐSƆTƆM TAA YƆ | NATƲ 10-12
“Pakʋ ‘aseɣɖe tɩnaa naalɛ’ nɛ paɖaɣnɩ-wɛ fezuu”
(Natʋ 11:3) Mankaɣ yebu nɛ ma-aseɣɖe tɩnaa naalɛ suu fɔlɔtɔnaa nɛ pɔyɔɔdɩ natʋ tɔm kɩyakɩŋ 1260.”
w14 15/11 30
Tɔm ndʋ ɖa-takayɩsɩ kalɩyaa pɔzʋʋ yɔ
Mba kɛnɩ aseɣɖe tɩnaa naalɛ waa mba pɔ-tɔm pɔyɔɔdɩ Natʋ ñʋʋ 11 taa yɔ?
Natʋ 11:3 yɔɔdɩ aseɣɖe tɩnaa mba pakpaɣ kɩyakɩŋ 1260 nɛ pɔyɔɔdɩnɩ natʋ tɔm yɔ. Pɔyɔɔdaa se tɛtɛgbɩnɛ kaɣ-wɛ ‘wabʋ nɛ ɖɩkʋ-wɛ.’ Ɛlɛ “kɩyakɩŋ naadozo nɛ hɔɔlʋʋ” wayɩ lɛ, aseɣɖe tɩnaa naalɛ waa mba, pakaɣ-wɛ fezuu nɛ pɩɖɩɣzɩ mba pɛwɛɛ nɛ pɔcɔŋnɩ-wɛ yɔ.—Natʋ 11:7, 11.
Mba kɛnɩ aseɣɖe tɩnaa naalɛ waa mba? Ɛzɩma patazɩ tɔm taa yɔ, pɩsɩɣnɩ-ɖʋ se ɖɩtɩlɩ-wɛ. Kajalaɣ lɛ, peheyi-ɖʋ se pasɩŋnɩ “oliivi tɩŋ naalɛ . . . nɛ kanɖʋnaa ɖɩzɩyɛ naalɛ.” (Natʋ 11:4) Pɩtɔzʋʋ-ɖʋ kanɖʋnaa ɖɩzɩyɛ nɛ oliivi tɩŋ naalɛ waa mba pɔ-tɔm pɔyɔɔdɩ Zakarii natʋ tɔm taa yɔ pɔ-yɔɔ. Pɔtɔm se oliivi tɩŋ ɛnɩ, ɩsɩŋnɩ “num kiɖeɖem pɩyalaa naalɛ” nɛ mba lɛ Zorobabɛɛlɩ nɛ cɔjɔ sɔsɔ Yozuwee mba “pasɩŋɩɣ tɛtʋ kpeekpe Ñazɩyʋ cɔlɔ yɔ.” (Zek. 4:1-3, 14) Nabʋlɛ lɛ, pɔyɔɔdaa se aseɣɖe tɩnaa naalɛ waa mba pɛwɛɛ palakɩ piti lakasɩ nzɩ sɩnɩɣzɩnɩ nzɩ Moyizi nɛ Eliya paalaba yɔ.—Kpaɣ Natʋ 11:5, 6 nɛ ŋmaɣzɩnɩ Kɩgalʋʋ 16:1-7, 28-35 nɛ 1 Awiya 17:1; 18:41-45.
Nɔɔ kʋɖʋmaɣ ŋga wɛ masɩ sɩnɛ sɩ-hɛkʋ taa? Paa hɔɔlʋʋ ŋgʋ lɛ, kɩyɔɔdɩ Ɛsɔ tɛ patam num nɔɔyʋ weyi ɛɖɛɣ nɔɔ kaɖɛ alɩwaatʋ natʋyʋ taa yɔ ɛ-tɔm. Pʋyɔɔ Natʋ ñʋʋ 11 taa tɔm labɩ alɩwaatʋ ndʋ pasɩ Ɛsɔ Kewiyaɣ ɛsɔdaa pɩnaɣ 1914 taa nɛ koobiya patam numwaa mba paaɖɛ nɔɔ yɔ, posuu “fɔlɔtɔnaa” nɛ posusi tɔm pɩnzɩ naadozo nɛ hɔɔlʋʋ yɔ.
Posuu fɔlɔtɔnaa nɛ posusi tɔm nɛ pɩtɛ lɛ, pɛwɛɛ wɛtʋ ndʋ tɩnɩɣzɩnɩ sɩm yɔ tɩ-taa, pɩtɩŋnɩ ɛzɩma paɖɩɣ-wɛ salaka yɔ pɩ-yɔɔ, nɛ pacaɣ peeɖe nɛ pala alɩwaatʋ pazɩ, nɛ alɩwaatʋ ndʋ natʋ tɔm kpaɣaa nɛ tɩmaɣzɩnɩ kɩyakɩŋ naadozo nɛ hɔɔlʋʋ. Ɛsɔ samaɣ koyindinaa na mbʋ lɛ, pamaɣzɩ se Ɛsɔ samaɣ tʋmɩyɛ sɩ tɩnaɣ nɛ pa-taa la leleŋ siŋŋ.—Natʋ 11:8-10.
Paa mbʋ yɔ, ɛzɩ natʋ tɔm ndʋ tɩyɔɔdʋʋ yɔ, kɩyakɩŋ naadozo nɛ hɔɔlʋʋ tɛma lɛ, pefezi aseɣɖe tɩnaa naalɛ waa mba. Pɩtasɩna se palɩzɩ patam numwaa mba salaka taa lɛ, pa-taa mba pɔɖɔkɩ pe-siɣsiɣ wɛtʋ yɔ, Ɛsɔ tɩŋnɩ pa-Kɩbaɣlʋ Yesu Krɩstʋ yɔɔ nɛ ɛɖʋ-wɛ ŋgee tʋmɩyɛ naɖɩyɛ. Pɩnaɣ 1919 taa lɛ, paawɛ mba palɩzaa se pɛkɛ “yom siɣsiɣ tʋ nɛ lɔŋsɩnɖʋ” yɔ pa-taa nɛ pɔcɔŋnɩ Ɛsɔ samaɣ fezuu taa kɩcɛyɩm ɖeɖe kɛdɛzaɣ kɩyakɩŋ taa.—Mat. 24:45-47; Natʋ 11:11, 12.
Tɔm kɩbandʋ lɛ se Natʋ 11:1, 2 yɔɔdɩ nɔɔ kʋɖʋmaɣ ŋga kɛwɛ tɔm tʋnɛ nɛ alɩwaatʋ ndʋ pakaɣ maɣzʋʋ fezuu taa templo yɔ pa-taa. Malakiya ñʋʋ 3 yɔɔdɩ tɔm kʋɖʋmtʋ ndʋ. Kɩyɔɔdaa se pɔkɔŋ Ɛsɔ tɛ templo yɔɔ kilimuu nɛ pʋwayɩ lɛ pañalɩ kɩ-yɔɔ. (Malakiya 3:1-4) Alɩwaatʋ ɛzɩma templo yɔɔ kilimuu nɛ kɩ-yɔɔ ñalʋʋ kpaɣaa? Pɩkpaɣnɩ 1914 nɛ pɩsɩɩnɩ 1919 ɖɩbazɩyɛ. Kɩyakɩŋ 1260 (fenasɩ 42) nɛ kɩyakɩŋ naadozo nɛ hɔɔlʋʋ tɔm ndʋ pɔyɔɔdɩ Natʋ 11 taa yɔ, tɩwɛ templo yɔɔ kilimuu nɛ kɩ-yɔɔ ñalʋʋ alɩwaatʋ taa.
Ða-taa wɛ leleŋ kpem se Yehowa labɩ ɖʋtʋ tʋnɛ nɛ ɛñalɩ ɛ-samaɣ yɔɔ fezuu taa nɛ kala tʋma kɩbana. (Tiiti 2:14) Pɩtasɩ lɛ, ɖa-taa wɛ leleŋ nɛ patam numwaa mba paaɖɔkɩ pe-siɣsiɣ wɛtʋ nɛ pɛɖɛɛ nɔɔ kaɖɛ alɩwaatʋ ndʋ tɩ-taa nɛ pasɩŋnɩ aseɣɖe tɩnaa naalɛ waa mba yɔ.
(Natʋ 11:7) Alɩwaatʋ ndʋ pɛtɛŋ pa-aseɣɖe lɩzʋʋ yɔ, tɛtɛgbɩnɛ nɖɩ ɖɩlɩnɩ pɔʋ sɔsɔʋ taa nɛ ɖɩkpaɣ yɔ, ɖɩkaɣ-wɛ yonuu nɛ ɖɩwabɩ-wɛ nɛ ɖɩkʋ-wɛ.
(Natʋ 11:11) Kɩyakɩŋ naadozo nɛ hɔɔlʋʋ ɛnɩ ɩ-wayɩ lɛ, wezuu fezuu ŋgʋ kɩlɩnɩ Ɛsɔ cɔlɔ yɔ kɩsʋʋ pa-taa, nɛ pakʋyɩ pasɩŋ pa-nɩŋgbanzɩ yɔɔ, nɛ sɔɔndʋ sɔsɔtʋ kpa mba pana-wɛ yɔ.
Ðɩñɩnɩ fezuu taa ñɩm
(Natʋ 10:9, 10) Nɛ mowolo Ɛsɔ tiyiyu cɔlɔ nɛ meheyi-i se ɛcɛlɩ-m takayaɣ kikpiyaɣ cikpelaɣ. Eheyi-m se: “Mʋ-kɛ nɛ ŋtɔɔ-kɛ, nɛ kakaɣ labʋ nɛ ño-lotu taa kpa ñaŋ, ɛlɛ ñɔ-nɔɔ taa lɛ, kakaɣ wɛʋ leleŋ ɛzɩ tʋŋ num yɔ.” 10 Mamʋ takayaɣ kikpiyaɣ cikpelaɣ ŋga Ɛsɔ tiyiyu nesi tɛɛ nɛ mɔntɔɔ-kɛ, nɛ kaawɛ leleŋ mɔ-nɔɔ taa ɛzɩ tʋŋ num yɔ, ɛlɛ mɔntɔɔ-kɛ nɛ pɩtɛ lɛ, mo-lotu taa kpa ñaŋ.
it-2 821
Takayaɣ kikpiyaɣ
Mbʋ pɩsɩŋnaa yɔ. Bibl taa lɛ, hɔɔlɩŋ sakɩyɛ taa lɛ, palabɩnɩ tʋmɩyɛ tɔm piye “takayaɣ kikpiyaɣ” nɛ pɩsɩŋnɩ nabʋyʋ. Ezekɩyɛɛlɩ nɛ Zakarii pa-taa paa weyi na takayaɣ kikpiyaɣ ŋga pama tɔm ka-taa nɛ ka-wayɩ yɔ. Ɛzɩma pama tɔm ka-taa nɛ ka-wayɩ yɔ, pɩwɩlɩɣ se tɔm ndʋ tɩwɛ ka-taa yɔ, tɩwɛ yuŋ, tɩ-tɔm cɛyɩ siŋŋ nɛ tɩkɛnɩ nɩŋgbaŋʋʋ hɔm tɔm, mbʋ pʋyɔɔ yɔ ɖoŋ ɖoŋ lɛ, takayaɣ kikpiyaɣ hɔɔlʋʋ kʋɖʋmʋʋ yɔɔ pamaɣaɣ tɔm. (Eze 2:9–3:3; Zek 5:1-4) Weyi ɛcaɣ kewiyaɣ kpelaɣ yɔɔ natʋ takayaɣ taa yɔ, ɛɖɔkɩ e-nesi kɩbanzɩ taa takayaɣ kikpiyaɣ ŋga pataaɖɩ-kɛ nɛ kɩtaaɖɩŋ lʋbɛ yɔ. Nɛ ɛzɩma pataaɖɩ-kɛ yɔ, pɩɖɩɣ nʋmɔʋ se pataana tɔm ndʋ pama ka-taa yɔ pɩkɔɔ pɩsɩɩnɩ alɩwaatʋ ndʋ Ɛsɔ Heɣa kuli-kɛ yɔ. (Nat 5:1, 12; 6:1, 12-14) Nɛ pʋwayɩ pɛcɛlɩ Yohanɛɛsɩ takayaɣ kikpiyaɣ nakɛyɛ se ɛtɔɔ-kɛ. Kɔ-tɔɔʋ kaawɛ leleŋ ɛ-nɔɔ taa ɛlɛ ɛtɔɔ-kɛ nɛ pɩtɛ lɛ, e-lotu taa kpa ñaŋ. Ɛzɩma pokuli takayaɣ kikpiyaɣ nɛ patɩtaaɖɩ-kɛ yɔ, pɩwɩlɩɣ se papɩzɩɣ panɩɩ tɔm ndʋ pama ka-taa yɔ tɩ-taa. Yohanɛɛsɩ taa kaawɛ “leleŋ” nɛ natʋ tɔm ndʋ tɩɩwɛ takayaɣ taa yɔ, ɛlɛ pɩɩwɛ-ɩ kaɖɛ se esusi natʋ tɔm ndʋ ɛzɩ peheyuu-i yɔ. (Nat 10:1-11) Mbʋ ɖɔɖɔ pɩɩtalɩ Ezekɩyɛɛlɩ alɩwaatʋ ndʋ pɛcɛlɩ-ɩ takayaɣ kikpiyaɣ ŋga ka-taa nɛ “mɔla nɛ kʋñɔŋ wondu” yɔ.—Eze 2:9.
(Natʋ 12:1-5) Ðɩnɛ ɛlɛ yʋsaɣ sɔsɔɔ nakɛyɛ lɩɩ ɛsɔdaa: Halʋ nɔɔyʋ su wɩsɩ, nɛ fenaɣ wɛɛ ɛ-nɩŋgbanzɩ tɛɛ, nɛ ɛ-ñʋʋ taa nɛ awiya hulaɣ nakɛyɛ ŋga palabɩ-kɛ nɛ tɩɩnzɩ 12 yɔ, 2 nɛ ɛɛhaɣ hoɣa. Nɛ ɛzɩma ɛɛwɩzɩ lʋlʋʋ yɔ pʋyɔɔ lɛ, ɛmakaɣ kubusi mbʋ pʋyɔɔ yɔ ɛnɩɣaɣ lʋlʋʋ wɩzasɩ. 3 Yʋsaɣ lɛɛka lɩɩ ɛsɔdaa. Na! Ðʋmanʋʋ sɔsɔʋ nakʋyʋ, kɩsɛ ɛzɩ miŋ yɔ, kɩwɛnɩ ñʋŋ lʋbɛ nɛ hɩŋ hiu nɛ kɩ-ñʋŋ yɔɔ nɛ ñɩɣlɩm hulasɩ lʋbɛ; 4 nɛ ki-suu hɔŋ ɛsɔdaa tɩɩnzɩ hɔɔlʋʋ naadozo ñɩŋgʋ, nɛ kɩlɔ-sɩ tɛtʋ yɔɔ. Nɛ ɖʋmanʋʋ sɩŋ halʋ weyi ɛɛwɩzɩ lʋlʋʋ yɔ ɛ-ɛsɩndaa, se pɩsa nɛ alɩwaatʋ ndʋ ɛlʋlʋʋ yɔ, kɩpɩzɩ nɛ kɩtɔɔ ɛ-pɩɣa. 5 Nɛ ɛlʋlɩ pɩɣa nakɛyɛ, abalɩbɩɣa, ŋga kakaɣ ɖiyuu ajɛɛ kpeekpe nɛ ñɩɣyʋʋ ɖaʋ yɔ. Nɛ pico ɛ-pɩɣa nɛ pɩkpazɩ-kɛ Ɛsɔ nɛ e-kewiyaɣ kpelaɣ pɔ-cɔlɔ.
it-2673 § 5-7
Lʋlʋʋ wɩzasɩ
Apostoloo Yohanɛɛsɩ na halʋ nɔɔyʋ ɛsɔdaa, nɛ “ɛzɩma ɛɛwɩzɩ lʋlʋʋ yɔ pʋyɔɔ lɛ, ɛmakaɣ kubusi mbʋ pʋyɔɔ yɔ ɛnɩɣaɣ lʋlʋʋ wɩzasɩ.” Pɩɣa ŋga palʋlaa yɔ, kɛkɛ “abalɩbɩɣa, ŋga kakaɣ ɖiyuu ajɛɛ kpeekpe nɛ ñɩɣyʋʋ ɖaʋ yɔ.” Paa ɖʋmanʋʋ ɛɛwɛ nɛ kɩñakɩ pana se kɩkʋ-kɛ yɔ, pɩkpaɣ pɩɣa ŋga nɛ “pɩkpazɩ-kɛ Ɛsɔ nɛ e-kewiyaɣ kpelaɣ pɔ-cɔlɔ.” (Nat 12:1, 2, 4-6) Pɩkpaɣʋ pɩɣa ŋga nɛ pɩkpazɩ-kɛ Ɛsɔ cɔlɔ yɔ, pɩwɩlɩɣ se Ɛsɔ tisaa nɛ ɛmʋ-kɛ ɛzɩ ɛ-maɣmaɣ ɛ-pɩɣa yɔ, nɛ pɩɩwɛ ɛzɩ palakʋʋ caanaʋ taa yɔ, alɩwaatʋ ndʋ powokini pɩɣa cɩɩɩ ka-caa cɔlɔ se ɛlɛ ɛmʋ-kɛ yɔ. (Kalɩ NAISSANCE.) Pɩpɩzɩɣ pɩwɩlɩ se “Halʋ” ɛnʋ ɛsɩŋnɩ Ɛsɔ “halʋ” pʋ-tɔbʋʋ se “ɛsɔdaa Yeruzalɛm” ŋgʋ kɩkɛ Krɩstʋ nɛ e-koobiya patam numwaa “ɖoo” yɔ.—Gal 4:26; Ebr 2:11, 12, 17.
Ɛsɔ halʋ weyi ɛwɛ ɛsɔdaa yɔ, ɛtalɩ pilim nɛ alɩwaatʋ ndʋ ɛlʋlʋʋ yɔ, ɛɛnɩɣ tomnaɣ yɔɔ wɩzasɩ. Ye mbʋ, pɔyɔɔdʋʋ se ɛnɩɣ lʋlʋʋ wɩzasɩ yɔ, pɩwɩlɩɣ se eɖiɣzinaa se ɛ-lʋlʋʋ alɩwaatʋ talaa, nɛ ɛɖaŋ kpam se ɛlʋlɩ.—Nat 12:2.
Anɩ ‘pɩɣa, abalɩbɩɣa’ ŋga kɛkɛnaa? “Kakaɣ ɖiyuu ajɛɛ kpeekpe nɛ ñɩɣyʋʋ ɖaʋ.” Tɔm ndʋ ɖɔɖɔ paayɔɔdɩ Mesiya weyi ɛkɛ Ɛsɔ Kewiyaɣ Wiyaʋ yɔ ɛ-yɔɔ Keɣa 2:6-9 taa. Ɛlɛ palʋlɩ Yesu tɛtʋ yɔɔ, ɛsɩ nɛ pefezi-i nɛ pɩla pɩnzɩ sakɩyɛ wayɩ lɛ, Yohanɛɛsɩ na natʋ tɔm tʋnɛ. Ye mbʋ natʋ tʋnɛ, titukuuni Mesiya Kewiyaɣ ŋga kɛwɛ Ɛsɔ Pɩyalʋ Yesu Krɩstʋ nesi tɛɛ yɔ. Ɛnʋ weyi pefezi-i nɛ “ɛcaɣ Ɛsɔ nesi kɩbanzɩ yɔɔ, kpaɣnɩ mbʋ lɛ, ɛwɛ ɖaŋʋʋ yɔɔ pɩkɔɔ pɩsɩɩnɩ alɩwaatʋ ndʋ papɩsɩɣ e-koyindinaa ɛ-nɩŋgbanzɩ ɖɩzɩyɛ yɔ.”—Ebr 10:12, 13; Keɣa 109:1; Nat 12:10.
16-22 DÉCEMBRE
ÑƖM MBƲ PƖWƐ ƐSƆTƆM TAA YƆ | NATƲ 13-16
“Taase sɔɔndʋ tɛtɛgbɩnɛ nɖɩ ɖɩcaɣ sɔɔndʋ yɔ”
(Natʋ 13:1, 2) Nɛ kɩsɩŋ teŋgu kañɩŋa yɔɔ. Nɛ mana tɛtɛgbɩnɛ naɖɩyɛ, ɖɩlɩnɩ teŋgu taa nɛ ɖɩkpaɣ, ɖɩwɛnɩ hɩŋ hiu nɛ ñʋŋ lʋbɛ, nɛ ɖɩ-hɩŋ yɔɔ nɛ ñɩɣlɩm hulasɩ hiu, ɛlɛ ɖɩ-ñʋŋ yɔɔ nɛ hɩla wena ayɔɔdʋʋ tɔm kɩdɛkɛdɩtʋ Ɛsɔ yɔɔ yɔ. 2 Nɛ tɛtɛgbɩnɛ nɖɩ manawa yɔ, ɖɩɩwɛ ɛzɩ kpou yɔ, ɛlɛ ɖɩ-nɩŋgbanzɩ kaawɛ ɛzɩ kpemtɔɔyaɣ ñɩnzɩ yɔ, nɛ ɖɩ-nɔɔ kaawɛ ɛzɩ mʋʋzʋʋ nɔɔ yɔ. Nɛ ɖʋmanʋʋ cɛlɩ kpɩnɛ nɖɩ ki-ɖoŋ nɛ ki-kewiyaɣ kpelaɣ nɛ ɖoŋ sɔsɔŋ.
w12 15/6 8 § 6
Yehowa “kuluuni [mɛsaɣ tɛɛ] tɔm” yɔɔ
6 Kajalaɣ pɩnzɩ mɩnʋʋ taa lɛ, Yesu weyi pefezaa yɔ, ɛwɩlɩ natʋ tɔm ndɩ ndɩ ndʋ tɩcaɣ sɔɔndʋ yɔ apostoloo Yohanɛɛsɩ. (Natʋ 1:1) Natʋ ndʋ, tɩ-taa natʋyʋ taa lɛ, ɛna ɖʋmanʋʋ ŋgʋ kɩsɩŋnɩ Eleeu yɔ teŋgu kidiiliŋ yɔɔ. (Kalɩ Natʋ 13:1, 2.) Yohanɛɛsɩ na ɖɔɖɔ kpɩnɛ nɖɩ ɖɩcaɣ sɔɔndʋ yɔ, ɖɩlɩnɩ teŋgu taa nɛ Eleeu ha-ɖɩ ɖoŋ sɔsɔŋ. Pʋwayɩ Ɛsɔ tiyiyu nɔɔyʋ lɩzɩ Yohanɛɛsɩ pɩ-taa se kpɩnɛ nɖɩ ɖɩsɛ cɩɩɩ nɛ ɖɩwɛɛnɩ hɩŋ lʋbɛ, nɛ ɖɩkɛ kpɩnɛ nɖɩ pɔyɔɔdɩ ɖɩ-tɔm Natʋ 13:1 taa yɔ ɖɩ-sɩʋ kpeliɣa yɔ, ɖɩsɩŋnɩ “awiya lʋbɛ” yaa kominawaa. (Natʋ 13:1, 14, 15; 17:3, 9, 10) Alɩwaatʋ ndʋ Yohanɛɛsɩ maɣaɣ natʋ tɔm ndʋ yɔ, awiya kagbanzɩ kaatɔlaa, kʋɖʋm kaawɛɛ nɛ ɛtɔkɩ kewiyitu, nɛ “lɛlʋ tɩtɩɩkɔmta.” Yʋsasɩ nzɩ patɩlɩɣnɩ awiya ana? Iyele nɛ ɖɩtazɩ nɛ ɖɩna se ɛbɛ kpɩnɛ nɖɩ pɔyɔɔdɩ ɖɩ-tɔm natʋ takayaɣ taa yɔ ɖɩ-ñʋŋ sɩŋnaa? Pɩnzɩ mɩnɩŋ sakɩyɛ pʋcɔ nɛ awiya ana apaɣzɩ a-kewiyitu tɔɔʋ lɛ, Danɩyɛɛlɩ ma natʋ tɔm ndʋ tiyeki se ɖɩtɩlɩ awiya ana a-yɔɔ tɔm nɛ pɩkɩlɩ yɔ. Nɛ ɖɩkaɣ-tʋ naʋ ɖɔɖɔ.
(Natʋ 13:11) Pʋwayɩ lɛ mana tɛtɛgbɩnɛ lɛɛɖɛ, ɖɩlɩnɩ tɛtɛɛ nɛ ɖɩkpaɣ, nɛ ɖɩwɛnɩ hɩŋ naalɛ ɛzɩ heɣa yɔ, ɛlɛ ɖɩpaɣzɩ yɔɔdʋʋ ɛzɩ ɖʋmanʋʋ yɔ.
(Natʋ 13:15) Nɛ paaha-ɖɩ nʋmɔʋ se ɖɩha fezuu tɛtɛgbɩnɛ sɩʋ kpeliɣa, se pɩsa nɛ tɛtɛgbɩnɛ sɩʋ kpeliɣa pɩzɩ kɔyɔɔdɩ nɛ keyele ɖɔɖɔ nɛ pakʋ mba payɩ pekiziɣ se paasɛɣ tɛtɛgbɩnɛ sɩʋ kpeliɣa yɔ.
re 194 § 26
Kpɩna naalɛ wena awɛ ñaŋ siŋŋ yɔ a-yonuu
26 Ɛbɛ pɩpɩzɩɣ pɩkɛnaa? Anglo-Amerika Kewiyaɣ: Kewiyaɣ ŋga, kasɩŋnɩ tɛtɛgbɩnɛ kajalaɣ ñɩnɖɛ tɛ ñʋʋ lʋbɛ ñɩŋgʋ, nɛ natʋ tɔm tukuuni-kɛ siŋŋ. Natʋ tɔm yɔɔdʋʋ tɛtɛgbɩnɛ nɖɩ ɖɩ-tɔm nɛ hɔɔlʋʋ yɔ, pɩsɩɣnɩ-ɖʋ se ɖɩna kpayɩ kpayɩ mbʋ pʋyɔɔ tɛtʋ kpeekpe yɔɔ lɛ, kewiyaɣ ŋga kɛwɛ ka-tɩ yɔɔ yɔ. Tɛtɛgbɩnɛ nɖɩ, ɖɩ-hɩŋ naalɛ sɩŋnɩ awiya naalɛ wena awɛ a-tɩ yɔɔ nɛ atɔkɩ kewiyitu alɩwaatʋ kʋɖʋmtʋ taa nɛ alakɩ tʋmɩyɛ nɔɔ kʋɖʋmaɣ taa yɔ. Ðɩwɛnɩ hɩŋ naalɛ “ɛzɩ heɣa yɔ” nɛ pɩwɩlɩɣ se kewiyaɣ ŋga, kapɩsɩ ka-tɩ ɛzɩ kewiyaɣ ŋga kɛwɛ hɛɛ nɛ ka-taa nɛ laŋhɛzɩyɛ nɛ ɛjaɖɛ kpeekpe pɩzɩɣ ɖɩɖʋ kʋyʋʋ kɛ-tɛɛ mbʋ pʋyɔɔ yɔ siɣsiɣ wɛtʋ wɛ ka-taa. Ɛlɛ kɔyɔɔdʋʋ “ɛzɩ ɖʋmanʋʋ yɔ” pʋ-tɔbʋʋ lɛ se kɛkɛ kewiyaɣ ŋga kañɩkɩɣ ɛyaa yɔɔ nɛ ɖoŋ nɛ halɩ kalakɩ puuyaɣ lakasɩ ɖenɖe ɛyaa iitisiɣ se kɔtɔɔ kewiyitu pɔ-yɔɔ yɔ. Katɩpɩzɩ keseɣti ɛyaa se poluzi pa-tɩ Ɛsɔ Kewiyaɣ ŋga ka-ñʋʋdʋ kɛ Ɛsɔ heɣa yɔ kɛ-tɛɛ; ɛlɛ, keseɣtiɣ ɛyaa kiseɣtu se poluzi pa-tɩ Sataŋ ɖʋmanʋʋ sɔsɔʋ tɛɛ nɛ pala ɛlɛ sɔɔlɩm. Keseɣti ɛyaa se pɛwɛɛnɩ ɛjaɖɛ sɔɔlʋʋ lɩmaɣza nɛ piyeba nɛ pɩkɔnɩ tayʋʋ nɛ paɖɩyɛ ɛyaa hɛkʋ taa nɛ papaɣzɩ sɛʋ tɛtɛgbɩnɛ kajalaɣ ñɩnɖɛ nɛ pɩkɩlɩ.
re 195 § 30-31
Kpɩna naalɛ wena awɛ ñaŋ siŋŋ yɔ a-yonuu
30 Mbʋ mbʋ pɩlaba nɛ pɩɖɛɛ yɔ, piyeba nɛ ɖɩtɩlɩ se tɛtɛgbɩnɛ sɩʋ kpelaɣ ŋga, kɛkɛ Ajɛɛ Kɩgbɛndʋʋ Ɛgbɛyɛ nɖɩ Aŋgletɛɛrɩ nɛ Etaazuunii pakpaɣ lɩmaɣzɩyɛ nɛ palɩzɩ yɔ. Paɖʋ nesi nɛ peseɣti ɛyaa se patɩnɩ ɖɩ-yɔɔ. Nɛ ɛgbɛyɛ nɖɩ payaɣaɣ kajalaɣ taa se SDN. Pʋwayɩ ɛzɩ Natʋ ñʋʋ 17 yɔɔdʋʋ yɔ, ɛgbɛyɛ nɖɩ ɖɩkaɣ lɛɣzʋʋ mbʋ pʋyɔɔ yɔ, pɔyɔɔdaa se tɛtɛgbɩnɛ nɖɩ ɖɩsɛ cɩɩɩ yɔ, ɖɩha-ɖɩ “fezuu” se ɖɩwɛɛ ɖɩ-tɩ yɔɔ. Ɛjaɖɛ kpeekpe yɔɔ Ajɛɛ Kɩgbɛndʋʋ Ɛgbɛyɛ nɖɩ, ‘ɖɩyɔɔdʋʋ’ pʋ-tɔbʋʋ lɛ se ɖɩkpazɩɣ ɖɩ-tɩ se ɖi-yeke ɖɩpɩzɩɣna nɛ ɖɩkɔnɩ laŋhɛzɩyɛ nɛ pɛɛyɛ ɛyaa samaɣ. Toovenim taa lɛ, ɖɩkɛ ɛgbɛyɛ nɖɩ ɖɩ-yɔɔ ajɛɛ tɩŋɩɣna nɛ ahɔŋ ɖama nɛ tɔm nɛ atʋʋ ɖama yɔ. Pɩtasɩ lɛ, ajɛɛ yaa ɛyaa samaɣ ŋga kekiziɣ se kaaluzuu ka-tɩ ɛgbɛyɛ nɖɩ ɖɩ-tɛɛ yɔ, pɔhɔŋ ka-nɩŋgbaŋʋʋ siŋŋ nɛ halɩ pɩpɩzɩɣ nɛ pɩtɛmnɩ-kɛ sɩm. Toovenim taa lɛ, Ajɛɛ Kɩgbɛndʋʋ Ɛgbɛyɛ SDN ɖɔɔnɩ ajɛɛ wena akizaa se aaɖɔŋ ɖɩ-ɖʋtʋ yɔɔ yɔ. Kʋñɔŋ sɔsɔʋ paɣzɩɣ lɛ, tɛtɛgbɩnɛ sɩʋ kpelaɣ “hɩŋ” weyi ɩwɛ ɛzɩ sɔɔjanaa yɔ, ɩkaɣ tɔyɩtʋʋ wondu kpem.—Natʋ 7:14; 17:8, 16.
31 Kpaɣnɩ Caama You II lɛ, tɛtɛgbɩnɛ sɩʋ kpelaɣ lɛɣzaa nɛ ɖɩpɩsɩ Ajɛɛ Kɩgbɛndʋʋ Ɛgbɛyɛ nɖɩ payaɣ se ONU yɔ, nɛ ɖɩtɛm kpɛdʋʋ calɩm siŋŋ. Pɩnaɣ 1950 taa, ONU ɖʋ nɔɔ you ŋgʋ kɩɩwɛ Hayo Kiŋ tɛ Kooree nɛ Hadɛ Kiŋ tɛ Kooree pɛ-hɛkʋ taa yɔ kɩ-taa. ONU nɛ Hadɛ Kiŋ tɛ Kooree palabɩ nɔɔ nɛ poyooni Hayo Kiŋ tɛ Kooree nɛ Siini nɛ pakʋ pa-taa ɛyaa mba patalɩ ɛzɩ 1420000 yɔ. Mbʋ ɖɔɖɔ, you ŋgʋ kiituli Kɔŋgoo (Kinsaasaa) 1960 nɛ piwolo 1964 taa yɔ, ONU tiyini sɔɔjanaa nɛ pɛkpɛdɩ calɩm kɩ-taa. Pɩtasɩ ɖɔɖɔ lɛ ɛjaɖɛ yɔɔ ñʋndɩnaa sɔsaa, pɩkpɛndɩnɩ Papa Paul VI nɛ Papa Jean-Paul II powobi pɩ-yɔɔ nɛ pɔyɔɔdʋʋ kaɣlaa se tɛtɛgbɩnɛ sɩʋ kpelaɣ ŋga ke-ɖeke kapɩzɩɣna nɛ kɔkɔnɩ ɛyaa laŋhɛzɩyɛ. Pɔyɔɔdʋʋ ɖɔɖɔ se ye ɛyaa ikizaa se paaluzuu pa-tɩ kpɩnɛ nɖɩ ɖɩ-tɛɛ yɔ, ɛjaɖɛ kaɣ yɔkʋʋ. Ye mbʋ pɩwɛ ɛzɩ peyeki se pakʋ mba pekiziɣ se paatɩnɩɣ tɛtɛgbɩnɛ sɩʋ kpelaɣ ŋga kɔ-yɔɔ nɛ pɛsɛɛ-kɛ yɔ—Wayɩ Wayɩ Paɣtʋ 5:8, 9.
(Natʋ 13:16, 17) Ðɩñɩkɩɣ ɛyaa tɩŋa yɔɔ—cikpema nɛ sɔsaa, ñɩm tɩnaa nɛ kʋñɔndɩnaa, mba pɛwɛ pa-tɩ yɔɔ yɔ nɛ yomaa—se pɩwɛɛ se peyele nɛ payʋsɩ pe-nesi kɩbanzɩ yɔɔ yaa pe-kila taa, 17 nɛ ɖɔɖɔ se nɔɔyʋ ɛtaapɩzɩ ɛya yaa ɛpɛdɩ ye pɩtɩkɛ ɛyʋ weyi ɛwɛnɩ tɛtɛgbɩnɛ yʋsaɣ, ɖɩ-hɩɖɛ yaa ɖɩ-hɩɖɛ mayaɣ yɔ.
w09 15/2 4 § 2
Natʋ takayaɣ taa lɩmaɣza sɔsɔna—II
13:16, 17. Paa ɖɩkatɩɣ tɩlasɩ ɖa-avema tʋma wena awɛ ɛzɩ ‘wondu yabʋ nɛ wondu pɛdʋʋ yɔ a-taa’ yɔ, pɩfɛyɩ se ɖiyele ɖa-tɩ kaaʋ nɛ tɛtɛgbɩnɛ wɛɛnɩ ɖoŋ ɖe-wezuu caɣʋ yɔɔ. Ye ɖitisaa nɛ tɛtɛgbɩnɛ la yʋsaɣ ‘ɖe-nesi nɛ ɖe-kila taa’ yɔ, pɩwɛɣ ɛzɩ ɖɩha nʋmɔʋ se tɛtɛgbɩnɛ nɖɩ ɖiɖiyi ɖa-lakasɩ yaa ɖɩwɛɛnɩ ɖoŋ ɖa-maɣzɩm yɔɔ.
Ðɩñɩnɩ fezuu taa ñɩm
(Natʋ 16:13, 14) Nɛ mana azuluma fezuu taa tɔm naadozo ndʋ tɩwɛ ɛzɩ saya yɔ, tɩlɩnɩ ɖʋmanʋʋ nɔɔ taa nɛ tɛtɛgbɩnɛ nɔɔ taa nɛ cɛtɩm nayʋ nɔɔ taa. 14 Toovenim taa lɛ, tɩkɛ tɔm ndʋ tɩlɩnɩ aleewaa cɔlɔ yɔ nɛ tɩlakɩ yʋsasɩ, nɛ tiwoki tɛtʋ kpeekpe yɔɔ awiya cɔlɔ, se tikpeɣli-yɛ Ɛsɔ Ðoŋ Tɩŋa Tʋ tɛ kɩyakʋ sɔsɔʋ you taa.
w09 15/2 4 § 5
Natʋ takayaɣ taa lɩmaɣza sɔsɔna—II
16:13-16. “Azuluma fezuu taa tɔm” sɩŋnɩ tɔm ndʋ aleewaa susuu se pɩsa nɛ tɛtʋ yɔɔ awiya itaayele nɛ Ɛsɔ pana tɛ ñanzɩ lʋbɛ nzɩ papɩyɩɣ yɔ, awɛɛnɩ ɖoŋ awiya ana a-yɔɔ nɛ pɩcamɩ-yɛ. Ɛlɛ aleewaa tɩŋɩɣnɩ tɔm ndʋ tɩ-yɔɔ nɛ peseɣtiɣ awiya ana se akaɖɩnɩ Yehowa.—Mat. 24:42, 44.
(Natʋ 16:21) Nɛ ɖɔmbɛɛ sɔsɔna lɩɩnɩ ɛsɔdaa nɛ atɔlɩ ɛyaa yɔɔ, paa nɖɩ lɛ ɖɩwɛ yuŋ ɛzɩ talaŋ kʋɖʋmʋʋ yɔ, nɛ ɛyaa yɔɔdɩ tɔm kɩdɛkɛdɩtʋ Ɛsɔ yɔɔ ɖɔmbɛɛ kɩjɩkpʋʋ yɔɔ, mbʋ pʋyɔɔ yɔ kɩjɩkpʋʋ ŋgʋ kɩɩpaɣlaa pɩfɛyɩ yɔɔdʋʋ.
w15 15/7 16 § 9
Ða-ñʋʋ yabɩtʋ ñɔtɩ kpam
9 Pɩtɩkɛ kʋñɔŋ sɔsɔʋ alɩwaatʋ taa ɖɩkaɣ susuu “Kewiyaɣ tɔm kɩbandʋ.” Alɩwaatʋ ndʋ pɩɩwɛɛ se posusi tɔm ndʋ yɔ tɩtɛm ɖɛʋ. “Ɛjaɖɛ tɛm” alɩwaatʋ talɩna. (Maatiyee 24:14) Pɩtʋʋ fɛyɩ se Ɛsɔ samaɣ kaɣ susuu nɩŋgbaaŋʋʋ hɔm tɔm natʋyʋ nɛ abalɩtʋ nɛ titukuni ɛyaa tɩŋa. Pɩtɩla pakaɣ susuu se alɩwaatʋ talaa se peɖezi Sataŋ ɛjaɖɛ. Bibl kpaɣ tɔm ndʋ pakaɣ susuu yɔ nɛ kɩmaɣzɩnɩ “ɖɔmbɛɛ sɔsɔna.” Kɩyɔɔdaa se: “Nɛ ɖɔmbɛɛ sɔsɔna, atɔkɩ ɛzɩ kilonaa nɩɩnaza mbʋ yɔ, lɩɩnɩ ɛsɔdaa nɛ atɔlɩ ɛyaa yɔɔ, nɛ ɛyaa tʋʋ Ɛsɔ, ɖɔmbɛɛ ana a-yɔɔ; ɛɛɛ, akɔnɩ kʋñɔŋ sɔsɔʋ.”—Natʋ 16:21.
23-29 DÉCEMBRE
ÑƖM MBƲ PƖWƐ ƐSƆTƆM TAA YƆ | NATƲ 17-19
“You ŋgʋ Ɛsɔ kaɣ labʋ nɛ ɛsɩnzɩ yoŋ tɩŋa yɔ”
(Natʋ 19:11) Mana ɛsɔdaa tʋlaa, nɛ na, kpaŋnʋ kʋhʋlʋm nɔɔyʋ. Nɛ weyi ɛcaɣ ɛ-yɔɔ yɔ, payaɣ-ɩ se Siɣsiɣ Tʋ nɛ Toovenim Tʋ, nɛ ɛhʋʋ tɔm nɛ ɛlakɩ you nɛ siɣsiɣ wɛtʋ.
(Natʋ 19:14-16) Pɩtasɩ lɛ, ɛsɔdaa yoyaa tɩŋaɣ ɛ-wayɩ kpaŋnaŋ kʋhʋlʋmɩŋ yɔɔ, nɛ posu wondu ndʋ tɩhʋlʋmaa, tɩwɛɛ cɩɖɩ cɩɖɩ nɛ tɩkɛ kɩbandʋ yɔ. 15 Nɛ laɣɖɛ naɖɩyɛ, nɖɩ ɖɩwɛ lɔŋ nɛ ɖɩɖaɣlɩ yɔ ɖɩlɩɣnɩ ɛ-nɔɔ taa, nɖɩ eloŋni ajɛɛ, nɛ ɛkaɣ-yɛ ɖiyuu nɛ ñɩɣyʋʋ ɖaʋ. Pɩtasɩ lɛ, ɛfɛyɩɣ viiñi Ɛsɔ Ðoŋ Tɩŋa Tʋ pana sɔsɔna tɛ viiñi ɖɩfɛyɩyɛ taa. 16 Pama hɩɖɛ naɖɩyɛ e-toko kɩtɩnʋʋ yɔɔ, ɛɛɛ, ɛ-taɖɩyɛ yɔɔ, awiya taa Wiyaʋ nɛ kɩbaɣlaa taa Kɩbaɣlʋ.
w08 1/4 8 § 3-4
Armaagedɔɔ kɛ you ŋgʋ Ɛsɔ kaɣ labʋ nɛ ɛsɩnzɩ yoŋ tɩŋa yɔ
Ye ɛyaa kɩdɛkɛdaa ɩtɔkɩnɩ kewiyitu yɔ, ɛyaa siɣsiɣ tɩnaa ɩɩpɩzɩɣ nɛ pehiɣ laŋhɛzɩyɛ nɛ pɛɛyɛ. (Aduwa 29:2; Eklesɩyastɩ 8:9) Toovenim taa lɛ, ɛyaa kɩdɛkɛdaa cɔlɔ mulum lakasɩ nɛ kɩdɛkɛdɩm palɩɣna. Ye mbʋ pɩsa nɛ lakasɩ nzɩ sɩsɩɩ tɩnaɣ lɛ, pɩpɔzʋʋ se paɖɩzɩ ɛyaa mba. Pʋyɔɔ Salomɔɔ mawa se: “Kañatʋ tʋ wazɩɣ ɛyʋ siɣsiɣ tʋ ñʋʋ yabɩtʋ.”—Aduwa 21:18.
Ɛsɔ hʋʋ tɔm siɣsiɣ. Ye mbʋ ɖa-taa pɩzɩɣ nɛ pɩtɛ se ɛkaɣ hʋnʋʋ ɛyaa kɩdɛkɛdaa tɔm siɣsiɣ. Abraham pɔzɩ-ɩ se: “Ɛzɩ tɛtʋ kpeekpe tɔm hʋyʋ eeɖeziɣ tɔm?” Tɔm ndʋ pocosi Abraham yɔ tɩkpɛlɩkɩ-ɩ se paa ɛzɩmtaa lɛ, Yehowa hʋʋ tɔm siɣsiɣ. (Kiɖe Tɛɛ Tɔm 18:25) Pɩtasɩ lɛ Bibl wɩlɩ-ɖʋ kpayɩ kpayɩ se Yehowa taa ɛɛlakɩ leleŋ nɛ ɛyaa kɩdɛkɛdaa ɖɩzʋʋ; ɛlɛ ye pekizi lɛɣzʋʋ yɔ, pʋbʋ lɛ ɛɖɩzɩɣ-wɛ.—Ezekɩyɛɛlɩ 18:32; 2 Pɩyɛɛrɩ 3:9.
it-1439 § 5
Kpaŋnʋ
Natʋ ndʋ pawɩlɩ apostoloo Yohanɛɛsɩ yɔ tɩ-taa, ɛna Yesu Krɩstʋ weyi paha-ɩ ɖoŋ yɔ kpaŋnʋ kʋhʋlʋmʋʋ yɔɔ, nɛ you laɖaa tɩŋɩɣ ɛ-wayɩ, nɛ pa-tɩŋa pɛwɛ kpaŋnaŋ kʋhʋlʋmɩŋ yɔɔ. Pawɩlɩ Yohanɛɛsɩ natʋ ndʋ se ɛtɩlɩ se Yesu Krɩstʋ kaɣ lʋbʋ ɛ-Caa Yehowa Ɛsɔ hɩɖɛ yɔɔ alɩwaatʋ ndʋ ɛkaɣ labʋ you ŋgʋ kɩwɛ siɣsiɣ yɔ se ɛɖɩzɩ koyindinaa yɔ. (Nat 19:11, 14) Yohanɛɛsɩ kaatɛm naʋ natʋ lɛɛtʋ taa, Yesu Krɩstʋ weyi paha ɖoŋ se ɛtɔɔ kewiyitu yɔ. Ɛcaɣ kpaŋnʋ yɔɔ nɛ ɛlɩɩ, nɛ kpaŋnaŋ caɣyaa mba patɩŋaɣ ɛ-wayɩ yɔ, pasɩŋnɩ kʋñɔmɩŋ ndɩ ndɩ.—Nat 6:2-8.
(Natʋ 19:19, 20) Nɛ mana tɛtɛgbɩnɛ nɛ tɛtʋ yɔɔ awiya nɛ a-yoyaa, pekpeɣlaa se poyooni weyi ɛcaɣ kpaŋnʋ yɔɔ yɔ nɛ e-yoyaa. 20 Nɛ pakpa tɛtɛgbɩnɛ, ɖɩ nɛ cɛtɩm nayʋ weyi ɛlabɩ ɖɩ-ɛsɩndaa yʋsasɩ nzɩ sɩ-yɔɔ ɛtɩŋnaa nɛ epeɣzi mba pamʋ tɛtɛgbɩnɛ yʋsaɣ nɛ mba pɛsɛɣ ɖɩ-sɩʋ kpeliɣa yɔ. Pakpaɣ pa-naalɛ nɛ pɔlɔ-wɛ nɛ pɛ-ɛsa miŋ lɩyɛ nɖɩ ɖɩ-taa wɛ tɩm nɛ ɖɩmʋʋ siŋŋ yɔ ɖɩ-taa.
re 286 § 24
Wiyaʋ weyi ɛkɛ you laɖʋ yɔ, ɛwabɩ Armaagedɔɔ you taa
24 Tɛtɛgbɩnɛ nɖɩ ɖɩlɩnɩ teŋgu taa, ɖɩwɛnɩ ñʋŋ lʋbɛ nɛ hɩŋ hiu yɔ, ɖɩsɩŋnɩ Sataŋ tɛ politiki ɛgbɛyɛ nɖɩ ɖɩwɛ tɛtʋ yɔɔ yɔ. Pɔsɔ Politiki ɛgbɛyɛ nɖɩ, cɛtɩm nayʋ nɛ ɛjaɖɛ yɔɔ kewiyaɣ lʋbɛ ñɩŋga pɔ-yɔɔ. (Natʋ 13:1, 11-13; 16:13) Pa-tɩŋa paawɛ wezuu pʋ-tɔbʋʋ se palakaɣ tʋmɩyɛ nɔɔ kʋɖʋmaɣ taa nɛ pakaɖɩɣnɩ Ɛsɔ samaɣ lɛ, pɔlɔ-wɛ “miŋ lɩyɛ” taa. Ɛzɩ miŋ maɣmaɣ pɩkɛnaa? Aayɩ, mbʋ pʋyɔɔ yɔ tɛtɛgbɩnɛ nɛ cɛtɩm nayʋ patɩkɛ kpɩna maɣmaɣ. Ye mbʋ, miŋ lɩyɛ sɩŋnɩ kpaagbaa ɖɩzʋʋ. Nɛ peeɖe pakaɣ lɔʋ sɩm, Hadɛɛsɩ nɛ Eleeu maɣmaɣ. (Natʋ 20:10, 14) Ye mbʋ miŋ lɩyɛ tɩkɛ miŋ maatɛŋ, lone nɖɩ ɖɩ-taa panazɩɣ ɛyaa kɩdɛkɛdaa tam yɔ, mbʋ pʋyɔɔ yɔ, Yehowa paɖɩɣ lakasɩ nzɩ pɩdɩɩfɛyɩ.—Yereemii 19:5; 32:35; 1 Yohanɛɛsɩ 4:8, 16.
(Natʋ 19:21) Ɛlɛ mba pɩkazaa yɔ, pakʋ-wɛ nɛ laɣɖɛ kɩɖaɣlɩyɛ nɖɩ ɖɩlɩɣaɣnɩ weyi ɛcaɣ kpaŋnʋ yɔɔ yɔ ɛ-nɔɔ taa yɔ. Nɛ sumasɩ tɩŋa tɔɔ pa-nandʋ nɛ sɩhaɣ.
re 286 § 25
Wiyaʋ weyi ɛkɛ you laɖʋ yɔ, ɛwabɩ Armaagedɔɔ you taa
25 Ɛyaa mba paaɖʋʋ pɔ-nɔɔ politiki tɔm taa ɛlɛ pɛwɛ ɛjaɖɛ kɩdɛkɛdɩyɛ ɖɩnɛ ɖɩ-hɔɔlʋʋ yɔɔ yɔ, pakaɣ pa-tɩŋa kʋʋ nɛ “laɣɖɛ kɩɖaɣlɩyɛ nɖɩ ɖɩlɩɣaɣnɩ weyi ɛcaɣ kpaŋnʋ yɔɔ yɔ ɛ-nɔɔ taa yɔ.” Yesu kaɣ-wɛ heyuu se pamʋnɩ sɩm. Paa patɩyɔɔdɩ se pakaɣ-wɛ lɔʋ miŋ lɩyɛ taa yɔ, ɛzɩ pɩwɛɛ se ɖɩmaɣzɩ se pakaɣ-wɛ fezuu na? Patɩyɔɔdɩ ɖoli se ɛyaa mba Yehowa tɔm hʋyʋ Yesu ɖɩzɩ alɩwaatʋ ndʋ yɔ, pefeziɣ-wɛ. Ɛzɩ Yesu maɣmaɣ yɔɔdʋʋ yɔ, mba patɩkɛ heŋ yɔ, pakaɣ wobu “miŋ maatɛŋ weyi pɔñɔɔzaa nɛ pasɩɩ Eleeu nɛ e-tiyiyaa yɔ ɩ-taa” pʋ-tɔbʋʋ se “ɖɩzʋʋ maatɛŋ taa.” (Maatiyee 25:33, 41, 46) Kɩyakʋ ŋgʋ lɛ ‘ɛyaa mba paañaŋ Ɛsɔ yɔ pa-ɖɩzʋʋ kɩyakʋ sɔsɔʋ wiye.’—2 Pɩyɛɛrɩ 3:7; Nahum 1:2, 7-9; Malakiya 4:1.
Ðɩñɩnɩ fezuu taa ñɩm
(Natʋ 17:8) Tɛtɛgbɩnɛ nɖɩ ŋnawa yɔ, ɖɩɩwɛɛ, ɛlɛ ɖɩtɩtasɩ wɛʋ, nɛ ɖɩwɩzɩ lɩnʋʋ pɔʋ sɔsɔʋ taa se ɖɩkpa, nɛ ɖɩkaɣ wobu ɖɩzʋʋ taa. Nɛ pɩkaɣ ɖɩɣzʋʋ tɛtʋ yɔɔ ɛyaa—mba patɩma pa-hɩla wezuu takayaɣ kikpiyaɣ taa kpaɣnɩ alɩwaatʋ ndʋ pasɩ ɛjaɖɛ tigiɖe yɔ—alɩwaatʋ ndʋ panaɣ ɛzɩma tɛtɛgbɩnɛ kaawɛɛ, ɛlɛ ɖɩtɩtasɩ wɛʋ, nɛ ɖɩkaɣ tasʋʋ wɛʋ yɔ.
re 247-248 § 5-6
Palɩzɩ natʋ tɔm ndʋ tɩcaɣ sɔɔndʋ yɔ tɩ-taa
5 “Tɛtɛgbɩnɛ nɖɩ . . . ɖɩɩwɛɛ.” Toovenim, ɖɩɩwɛ alɩwaatʋ ndʋ ɖɩɩkɛ Ajɛɛ Kɩgbɛndʋʋ ŋgʋ payaɣ se SDN kpaɣnɩ 10 Janvier 1920 yɔ. Nɛ ajɛɛ 63 kaakpɛndɩna nɛ ala tʋmɩyɛ ɛgbɛyɛ nɖɩ ɖɩ-taa alɩwaatʋ ndɩ ndɩ taa. Alɩwaatʋ kɔm nɛ tɩɖɛɣ lɛ, Japɔŋ, Caama nɛ Itaalii palɩɩ ɖɩ-taa, nɛ pʋwayɩ lɛ, palɩzɩ Iniyɔɔ Soviyetiiki ɖɩ-taa. Pɩtalɩ Septembre 1939 lɛ, Caama ɛjaɖɛ ñʋʋdʋ, weyi ɛwɛ ñʋʋ taa ɖoŋ yɔ, eyele nɛ papaɣzɩ Caama You II. SDN ɛgbɛyɛ tɩpɩzɩ nɛ ɖɩkɔnɩ laŋhɛzɩyɛ ɛjaɖɛ yɔɔ, piyeba nɛ pɔlɔ-ɖɩ pɔʋ sɔsɔʋ taa yaa pamʋ ɖoŋ ɖɩ-cɔlɔ. Nɛ pɩtalɩ pɩnaɣ 1942 lɛ, pɛtɛzɩ ɖɩ-tɔm nɛ pɩla se pɔsɔ ɖɩ-yɔɔ. Kaɖɛ alɩwaatʋ ndʋ tɩ-taa keekee Yehowa sɩnɩ ɛ-samaɣ nɛ kanɩɩ natʋ tɔm ndʋ tɩwɛ Natʋ 17:8 taa yɔ tɩ-tɔbʋʋ. Pʋyɔɔ Nathan Knorr pɩzaa nɛ ɛyɔɔdɩ Teokrasɩ kigbeɣluu nakʋyʋ taa pɩlɩɩnɩ natʋ tɔm ndʋ tɩ-yɔɔ se: “Tɛtɛgbɩnɛ nɖɩ . . . ɖɩtɩtasɩ wɛʋ.” Pʋwayɩ lɛ, ɛpɔzɩ tɔm tʋnɛ samaɣ se: “Ɛgbɛyɛ nɖɩ ɖɩkaɣ wɛʋ pɔʋ sɔsɔʋ taa mbʋ tam?” Ɛlabɩnɩ tʋmɩyɛ Natʋ 17:8 nɛ ecosini tɔm ndʋ ɛpɔzaa yɔ tɩ-yɔɔ se: “Ajɛɛ Kɩgbɛndʋʋ Ɛgbɛyɛ kaɣ tasʋʋ fem.” Nɛ toovenim taa lɛ, mbʋ ɖeyi ɖeyi pɩlaba ɛzɩ Yehowa natʋ tɔm yɔɔdʋʋ yɔ.
Ðɩlɩnɩ pɔʋ sɔsɔʋ taa nɛ ɖɩkpaɣ
6 Toovenim, tɛtɛgbɩnɛ nɖɩ ɖɩsɛ cɩɩɩ yɔ, ɖɩlɩnɩ pɔʋ sɔsɔʋ taa nɛ ɖɩkpaɣ. Pɩtalɩ 26 Juin 1945 lɛ, ajɛɛ 50 ñɩɣ niye takayaɣ taa Etaazuunii ɛjaɖɛ hɔɔlʋʋ ŋgʋ payaɣ se San Francisco yɔ kɩ-taa nɛ palɩzɩ Ajɛɛ Kɩgbɛndʋʋ Ɛgbɛyɛ nɖɩ payaɣ se ONU yɔ. ONU kaɖʋwa lɛ se: “Laŋhɛzɩyɛ nɛ pɛɛyɛ pɛwɛɛ ɛjaɖɛ kpeekpe yɔɔ.” SDN nɛ ONU panɩɣzɩnɩ ɖama hɔɔlɩŋ sakɩyɛ taa. Takayaɣ nakɛyɛ (The World Book Encyclopedia) yɔɔdaa se: “ONU nɩɣzɩnɩ SDN ɛgbɛyɛ nɖɩ palɩzɩ Caama You I wayɩ yɔ hɔɔlɩŋ nɩɩyɩ taa . . . Ajɛɛ wena aakpɛndaa nɛ alɩzɩ SDN yɔ, a-taa sakɩyɛ kpɛndɩna nɛ alɩzɩ ONU. Kaɖʋwa ŋga SDN kaawɛna se laŋhɛzɩyɛ ɛwɛɛ ajɛɛ hɛkʋ taa yɔ ŋga ɖɔɖɔ ONU wɛna. ONU wɛnɩ pilinzi ndɩ ndɩ ɛzɩ pɩɩwɛʋ ɖɔɖɔ SDN hɔɔlʋʋ taa yɔ.” Ye mbʋ tɛtɛgbɩnɛ nɖɩ ɖɩsɛ cɩɩɩ yɔ, nɖɩ lɛɣzɩna nɛ ɖɩpɩsɩ ONU. Ajɛɛ 190 mbʋ yɔ wɛnɩ ONU taa ŋgʋ 63 ɖeke kaawɛnɩ SDN taa, pɩtasɩ lɛ, paa ONU ɛlɛɣzɩ SDN lone taa yɔ, tʋma wena ONU lakɩ yɔ acɛzɩ wena SDN lakaɣ yɔ siŋŋ.
(Natʋ 17:16, 17) Nɛ hɩŋ hiu weyi ŋnawa yɔ, nɛ tɛtɛgbɩnɛ, pakaɣ paɖʋʋ halʋ tɩ pɛdɩyʋ nɛ pakaɣ wɛɛkʋʋ ɛ-ñɩm tɩŋa nɛ peyebi-i ndaakpeɖe, nɛ pakaɣ tɔɔʋ e-tomnaɣ nɛ pañaɣzɩ-ɩ miŋ caɣ caɣ. 17 Mbʋ pʋyɔɔ yɔ Ɛsɔ ɖʋ pa-laŋa taa se pala ɛ-lɩmaɣzɩyɛ yɔɔ, ɛɛɛ, se pala pa-lɩmaɣzɩyɛ kʋɖʋmɖɩyɛ yɔɔ pɩtɩŋnɩ ɛzɩma pɛcɛlɩɣ tɛtɛgbɩnɛ pe-kewiyaɣ yɔ, nɛ pɩkɔɔ pɩsɩɩnɩ alɩwaatʋ ndʋ Ɛsɔ tɔm lakɩ yɔ.
w12 15/6 18 § 17
Yehowa kuluu “mbʋ piileɖiɣ lɛ, pɩwɛɛ se pɩla yɔ” pɩ-yɔɔ
17 Cɛtɩm Ɛsɔ sɛtʋ ɛɛkaɣ mʋʋ yem pazɩ pazɩ. Halʋ tɩ pɛdɩyʋ kaɣ wobu pɩ-yɔɔ nɛ ɛwɛɣnɩ ɖoŋ awiya yɔɔ nɛ epeɣziɣ-yɛ pɩkɔɔ pɩsɩɩnɩ alɩwaatʋ ndʋ Ɛsɔ ɖʋʋ lɩmaɣzɩyɛ naɖɩyɛ ɛjaɖɛ yɔɔ awiya laŋa taa yɔ. (Kalɩ Natʋ 17:16, 17) Piileɖiɣ lɛ, Ɛsɔ kaɣ tuyuu Sataŋ tɛ politiki ɛjaɖɛ hɔɔlʋʋ ŋgʋ kɩsɩŋnɩ ONU yɔ nɛ kɩkʋyɩ cɛtɩm Ɛsɔ sɛtʋ agbaa yɔɔ. ONU kaɣ mʋʋ ɖoŋ halʋ tɩ pɛdɩyʋ ɛnʋ ɛ-cɔlɔ nɛ ɛwɛɛkɩ ɛ-ñɩm caɣ caɣ. Pɩnzɩ nzɩ sɩɖɛwa yɔ sɩ-taa, nɔɔyʋ taapɩzɩɣ se ɛmaɣzɩ se pɩpɩzɩɣ nɛ pɩla mbʋ. Sɔnɔ ɛzɩma halʋ tɩ pɛdɩyʋ caɣ tɛtɛgbɩnɛ nɖɩ ɖɩsɛ cɩɩɩ yɔ ɖɩ-yɔɔ yɔ, pɩwɩlɩɣ se ɛcaɣ tɔlʋʋ. Paa mbʋ yɔ ɛɛkaɣ tɔlʋʋ hɛɛɛ. Ɛkaɣ tɔlʋʋ yem tuda nɛ pɩɩwɛɣ cɔnʋʋ.—Natʋ 18:7, 8, 15-19.
30 DÉCEMBRE–5 JANVIER
ÑƖM MBƲ PƖWƐ ƐSƆTƆM TAA YƆ | NATƲ 20-22
“Na! Menɖiɣni labʋ wondu tɩŋa se tɩkɛ kɩfatʋ”
(Natʋ 21:1) Nɛ mana ɛsɔdaa kɩfalʋʋ nakʋyʋ nɛ tɛtʋ kɩfatʋ natʋyʋ; mbʋ pʋyɔɔ yɔ ɛsɔdaa kɩbɩnʋʋ nɛ tɛtʋ kɩbɩndʋ pamʋwaa, nɛ teŋgu tɩtasɩ wɛʋ.
re 301 § 2
Ɛsɔdaa kɩfalʋʋ nakʋyʋ nɛ tɛtʋ kɩfatʋ natʋyʋ
2 Pɩnzɩ mɩnɩŋ sakɩyɛ pʋcɔ nɛ Yohanɛɛsɩ naɣ natʋ ndʋ lɛ, Yehowa kaatɛm heyuu Izaayii se: “Ɩna, mankaɣ lɩzʋʋ ɛsɔdaa kɩfalʋʋ nɛ tɛtʋ kɩfatʋ, nɛ paakaɣ tasʋʋ tɔzʋʋ ndʋ tɩɖɛwa yɔ tɩ-yɔɔ nɛ tɩɩkaɣ tasʋʋ kpaʋ laŋɩyɛ taa.” (Izaayii 65:17; 66:22) Natʋ tɔm tʋnɛ, tɩlabɩ kajalaɣ ɖeɖe alɩwaatʋ ndʋ Yuuda ñɩma mba pɛwɛ siɣsiɣ yɔ, pacaɣ Yomiye taa Babilɔɔnɩ pɩnzɩ 70, nɛ pʋwayɩ palɩzɩ-wɛ pɩnaɣ 537 P.P.Y nɛ papɩsɩ Yeruzalɛm yɔ. Patalɩ Yeruzalɛm lɛ, papɩsɩ samaɣ ŋga kɛwɛ kele kele yɔ, pʋ-tɔbʋʋ se “tɛtʋ kɩfatʋ” nɛ pɛwɛ komina kɩfalʋʋ tɛɛ pʋ-tɔbʋʋ se “ɛsɔdaa kɩfalʋʋ.” Ɛlɛ, apostoloo Pɩyɛɛrɩ kpaɣ natʋ tɔm ndʋ nɛ ɛmaɣzɩnɩ tɩ-hɔɔlʋʋ sɔsɔʋ ŋgʋ kɩkaɣ labʋ cee wayɩ yɔ nɛ ɛyɔɔdɩ se: “Ɛlɛ ɖɩɖaŋ ɛsɔdaa kɩfalʋʋ nɛ tɛtʋ kɩfatʋ ɛzɩ ɛlabʋ tamaɣ yɔ, nɛ siɣsiɣ wɛtʋ kaɣ wɛʋ pa-taa.” (2 Pɩyɛɛrɩ 3:13) Hɔɔlʋʋ kʋnɛ kɩ-taa lɛ, Yohanɛɛsɩ wɩlɩɣ se natʋ ndʋ ɛnawa yɔ, tɩkaɣ labʋ Kɩbaɣlʋ kɩyakʋ wiye. “Ɛsɔdaa kɩbɩnʋʋ nɛ tɛtʋ kɩbɩndʋ,” ndʋ tɩsɩŋnɩ Sataŋ ɛjaɖɛ nɛ ɖɩ-ñʋndɩnaa mba pɔ-yɔɔ Sataŋ nɛ ɛ-aleewaa pɛwɛnɩ ɖoŋ yɔ, pakaɣ mʋʋ. “Teŋgu” ŋgʋ kɩwɛɛ nɛ kiciɣdiɣ yɔ, kɩsɩŋnɩ ɛyaa kɩdɛkɛdaa mba pakaɖɩɣnɩ Ɛsɔ yɔ, nɛ kɩɩkaɣ tasʋʋ wɛʋ. Nɛ ki-lone taa lɛ, “ɛsɔdaa kɩfalʋʋ nɛ tɛtʋ kɩfatʋ”—ndʋ tɩsɩŋnɩ samaɣ kɩfalaɣ ŋga Ɛsɔ kewiyaɣ ɖiyiɣ yɔ. Mba kaɣnɩ wɛʋ alɩwaatʋ ndʋ tɩ-taa.—Kpaɣ-tʋ nɛ ŋmaɣzɩnɩ Natʋ 20:11.
(Natʋ 21:3, 4) Ðɩnɛ ɛlɛ manɩɩ nɔɔ ɖoŋ ñɩŋga nakɛyɛ lɩnɩ kewiyaɣ kpelaɣ cɔlɔ nɛ kɔtɔŋ se: “Na! Ɛsɔ kizinziku wɛ ɛyaa cɔlɔ, nɛ ɛkaɣ wɛʋ pɔ-cɔlɔ, nɛ pakaɣ kɛʋ ɛ-samaɣ. Nɛ Ɛsɔ maɣmaɣ kaɣ wɛʋ pɔ-cɔlɔ. 4 Nɛ ɛkaɣ hɩzʋʋ ɛsɩtɛɣlɩm kpeekpe pɛ-ɛsɩndaa, nɛ sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ. Wondu kɩbɩndʋ mʋwaa.”
w13 1/12 11 § 2-4
“Na! Menɖiɣni labʋ wondu tɩŋa se tɩkɛ kɩfatʋ”
“[Ɛsɔ kaɣ] hɩzʋʋ ɛsɩtɛɣlɩm kpeekpe pɛ-ɛsɩndaa.” (Natʋ 21:4) Ɛsɩtɛɣlɩm mbʋ ɛkaɣ hɩzʋʋ? Pɩtɩkɛ ɛsɩtɛɣlɩm mbʋ pikpeŋ ɖɛ-ɛsɩndaa alɩwaatʋ ndʋ ɖa-taa wɛ leleŋ yɔ, yaa mbʋ pɩñalɩɣ ɖɛ-ɛsa pee yɔɔ yɔ. Tɔm ndʋ Ɛsɔ yɔɔdaa yɔ, tɩwɩlɩɣ se pɩkɛnɩ ɛsɩtɛɣlɩm mbʋ kʋñɔŋ nɛ wɩzasɩ yeki nɛ pikpeŋ ɖɛ-ɛsɩndaa yɔ. Ɛsɔ ɛɛkaɣ hɩzʋʋ ɛsɩtɛɣlɩm mbʋ yem ɖɛ-ɛsɩndaa, ɛlɛ ɛkaɣ ɖɩzʋʋ kʋñɔmɩŋ nɛ wɩzasɩ nzɩ payɩ siyeki nɛ ɛsɩtɛɣlɩm mbʋ pikpeŋ yɔ kpaagbaa ɖɩzʋʋ.
“Sɩm ɛɛkaɣ tasʋʋ wɛʋ.” (Natʋ 21:4) Sɩm kɛ koyindu sɔsɔ weyi eyeki nɛ ɖɛ-ɛsɩtɛɣlɩm kɩlɩɣ kpem yɔ. Yehowa kaɣ yabʋ ɛyaa mba pañaŋɩ-ɩ yɔ pa-ñʋʋ sɩm nesi tɛɛ. Ɛzɩma tɩyɛ? Ɛkaɣ ɖɩzʋʋ mbʋ pɩkɔnɩ sɩm yɔ. Mbʋ pɩkɔnɩ sɩm yɔ, mbʋ lɛ kɩwɛɛkɩm mbʋ Aɖam ɖɛzɩ ɛ-sayɩnaa yɔ. (Roma mba 5:12) Yehowa kaɣ yebu nɛ ɛyaa mba pañaŋɩ-ɩ yɔ patalɩ pilim pɩtɩŋnɩ Yesu kɩhɛyʋʋ pʋ-ñʋʋ taa kɩlaʋ yɔɔ. Nɛ “kɛdɛzaɣ koyindu weyi pakaɣ-ɩ ɖɩzʋʋ yɔ, ɛnʋ lɛ sɩm.” (1 Kɔrɛntɩ mba 15:26) Ɛyaa mba pɛwɛ siɣsiɣ yɔ, pakaɣ caɣʋ wezuu tam tam nɛ pɛwɛɛnɩ tɔnʋʋ taa alaafɩya kiya ɛzɩ Ɛsɔ labʋ-wɛ tamaɣ yɔ.
‘Wɩzasɩ ɩɩkaɣ tasʋʋ wɛʋ ɖɔɖɔ.’ (Natʋ 21:4) Wɩzasɩ nzɩ ɩɩkaɣ tasʋʋ wɛʋ? Wɩzasɩ nzɩ kɩwɛɛkɩm nɛ mantɩtalɩ pilim wɛtʋ yeba nɛ ɛyaa miiliyɔɔwaa sakɩyɛ sʋʋ kʋñɔŋ taa nɛ panɩɣ siziŋ pa-maɣzɩm taa nɛ po-tomnaɣ taa yɔ, sɩɩkaɣ tasʋʋ wɛʋ.
(Natʋ 21:5) Nɛ Weyi ɛɛcaɣ kewiyaɣ kpelaɣ yɔɔ yɔ ɛtɔ se: “Na! Menɖiɣni labʋ wondu tɩŋa se tɩkɛ kɩfatʋ.” Ɛtasɩ yɔɔdʋʋ se: “Ma, mbʋ pʋyɔɔ yɔ tɔm ndʋ tɩwɛ siɣsiɣ nɛ tɩkɛ toovenim.”
w03 1/8 12 § 14
Yehowa kɛ Ɛsɔ toovenim tʋ
14 Pɩwɛɛ se tɔm ndʋ Ɛsɔ heyiɣ-ɖʋ ɛ-tɔm Bibl taa yɔ, tɩmʋ ñɩm ɖɛ-ɛsɩndaa. Ɛsɔ kɛ weyi ɛyɔɔdaa se ɛkɛnaa yɔ, nɛ ɛkaɣ labʋ mbʋ ɛyɔɔdaa se ɛkaɣ labʋ yɔ. Nɛ ɖɩwɛnɩ lɩmaɣza sakɩyɛ wena a-yɔɔ ɖɩpɩzɩɣ nɛ ɖɩtaa-ɩ liu yɔ. Ðɩpɩzɩɣ nɛ ɖɩtaa liu tɔm ndʋ Yehowa yɔɔdaa se “ɛkpaɣ kɩmɩyɛ mba paasɩŋ Ɛsɔ nɛ mba paañaŋ ɖa-Kɩbaɣlʋ Yesu yɔɔ tɔm kɩbandʋ” yɔ. (2 Tesalooniiki mba 1:8) Ðɩpɩzɩɣ nɛ ɖɩtaa liu ɖɔɖɔ tɔm ndʋ Yehowa yɔɔdaa se ɛsɔɔlɩ mba pañɩnɩɣ siɣsiɣ wɛtʋ yɔ, nɛ ɖɔɖɔ se ɛkaɣ haʋ wezuu maatɛŋ mba pɛwɛnɩ tisuu ɛ-yɔɔ yɔ, nɛ ndʋ ɛyɔɔdaa se ɛkaɣ ɖɩzʋʋ kʋñɔmɩŋ, wɩzasɩ, kubusi mabʋ, nɛ halɩ pɩkpɛndɩnɩ sɩm yɔ. Yehowa ñɩɣ niye natʋ tɔm ndʋ ɛyɔɔdaa yɔ tɩ-yɔɔ se tɩmʋnaa se pataa-tʋ liu, pʋyɔɔ eheyi Yohanɛɛsɩ se: “Ma, mbʋ pʋyɔɔ yɔ tɔm ndʋ tɩwɛ siɣsiɣ nɛ tɩkɛ toovenim.”—Natʋ 21:4, 5; Aduwa 15:9; Yohanɛɛsɩ 3:36.
Ðɩñɩnɩ fezuu taa ñɩm
(Natʋ 20:5) (Sɩɖaa mba pɩkazaa yɔ, patife pɩkɔɔ pɩsɩɩnɩ alɩwaatʋ ndʋ pɩnzɩ 1000 ŋgʋ kɩtɛma yɔ.) Kajalaɣ femtu lɛ.
it-2 1149 § 6
Wezuu
Ɛsɔ ɖʋwaɣ paɣtʋ Aɖam lɛ, eheyi-i se ye ɛɖɔm tɩ-yɔɔ yɔ, ɛɛsɩkɩ. (Kiɖe 2:17) Ye mbʋ, ɛyaa mba pañaŋ Ɛsɔ yɔ pɔ-hɔɔlʋʋ taa lɛ, alɩwaatʋ ndʋ paɖɩzɩɣ ɛyaa koyindu kɛdɛzaɣ ñɩnʋ, sɩm yɔ, kɩwɛɛkɩm ɛɛkaɣ tasʋʋ wɛnʋʋ ɖoŋ po-tomnasɩ yɔɔ se piyele nɛ pasɩ. Pakaɣ caɣʋ wezuu tam tam, wiɖiyi paakaɣ tasʋʋ sɩbʋ. (1Kɔ 15:26) Ɛzɩ natʋ takayaɣ wɩlʋʋ yɔ, Krɩstʋ tɔkɩ kewiyitu pɩnzɩ kudoku nɛ pɩtɛ lɛ, pakaɣ ɖɩzʋʋ sɩm kpaagbaa ɖɩzʋʋ. Cɩnɛ lɛ, pɔyɔɔdɩ mba pakaɣ pɩsʋʋ awiya nɛ cɔjɔnaa nɛ pa nɛ Yesu pɔtɔɔ kewiyitu yɔ pɔ-yɔɔ se pefema nɛ “pa nɛ Krɩstʋ pɔtɔɔ kewiyitu pɩnzɩ 1000.” “Sɩɖaa mba pɩkazaa” nɛ “patife pɩkɔɔ pɩsɩɩnɩ alɩwaatʋ ndʋ pɩnzɩ 1000 tɛma yɔ,” pɛkɛɣnɩ ɛyaa mba pɛwɛɣ wezuu alɩwaatʋ ndʋ pɩnzɩ kudoku tɛŋ yɔ. Ɛlɛ tɔm tʋnɛ, tɩlakɩ pʋcɔ nɛ palɩzɩ Sataŋ pɔʋ sɔsɔʋ taa nɛ ɛkɔnɩ takɩm kɛdɛzaɣ ñɩmbʋ ɛyaa yɔɔ. Krɩstʋ pɩnzɩ kudoku kewiyitu tɔɔʋ tɛŋ lɛ, ɛyaa mba payɩ pɛwɛ tɛtʋ yɔɔ yɔ, pakaɣ talʋʋ pilim ɛzɩ Aɖam nɛ Ɛva paatalʋʋ pilim pʋcɔ nɛ palakɩ kɩwɛɛkɩm yɔ. Alɩwaatʋ ndʋ, pakaɣ wɛnʋʋ wezuu ŋgʋ kɩtalɩ pilim yɔ. Palɩzɩɣ Sataŋ pɔʋ sɔsɔʋ taa nɛ ɛtakɩ ɛyaa alɩwaatʋ pazɩ nɛ pɩtɛ lɛ, mba pakaɣ ɖɔkʋʋ pa-cɩŋgɩlɩm wɛtʋ kpam takɩm mbʋ pɩ-taa yɔ, pakaɣ caɣʋ wezuu tam tam.—Natʋ 20:4-10.
(Natʋ 20:14, 15) Nɛ pɔlɔ sɩm nɛ Pɩlaʋ miŋ lɩyɛ taa. Miŋ lɩyɛ nɖɩ, ɖɩsɩŋnɩ sɩm naalɛ ñɩmbʋ. 15 Pɩtasɩ lɛ, weyi patɩna ɛ-hɩɖɛ wezuu takayaɣ taa yɔ, pɔlɔ-ɩ miŋ lɩyɛ taa.
it-2101-102
Miŋ lɩyɛ
Tɔm ndʋ, natʋ takayaɣ taa ɖeke panaɣ-tʋ, nɛ pɩnaɣ kpayɩ kpayɩ se pɩsɩŋnɩ nabʋyʋ na. Bibl maɣmaɣ lɩzɩ mbʋ pɩsɩŋna yɔ pɩ-taa nɛ kɩyɔɔdɩ se: “Miŋ lɩyɛ nɖɩ, ɖɩsɩŋnɩ sɩm naalɛ ñɩmbʋ” —Natʋ 20:14; 21:8.
Tɔm lɛɛtʋ wɛ natʋ takayaɣ taa nɛ tɩwɩlɩɣ kpayɩ kpayɩ se toovenim lɛ, nabʋyʋ miŋ lɩyɛ sɩŋnaa. Pɔyɔɔdaa se pɔlɔ sɩm miŋ lɩyɛ nɖɩ ɖɩ-taa. (Natʋ 19:20; 20:14) Toovenim taa lɛ, sɩm tɩkɛ mbʋ miŋ pɩzɩɣ nɛ pɩñaɣ yɔ. Pɩtasɩ lɛ, Eleeu weyi ɛkɛ fezuu taa ɛyʋ weyi paanaɣ yɔ, pakaɣ-ɩ lɔʋ miŋ ɛnɩ ɩ-taa ɖɔɖɔ. Sataŋ kɛ fezuu nɛ pʋyɔɔ lɛ, miŋ ɛɛpɩzɩɣ nɛ pɩñaɣ-ɩ.—Nat 20:10; kpaɣ-tʋ nɛ ŋmaɣzɩnɩ Ejl 3:2 nɛ Th 13:20.
Miŋ lɩyɛ sɩŋnɩ “sɩm naalɛ ñɩmbʋ” nɛ Natʋ 20:14 yɔɔdʋʋ ɖɔɖɔ se pɔlɔ “sɩm nɛ pɩlaʋ” miŋ lɩyɛ nɖɩ ɖɩ-taa, pɩwɩlɩɣ kpayɩ kpayɩ se miŋ lɩyɛ ɛɛpɩzɩɣ nɛ pɩsɩŋnɩ sɩm mbʋ Aɖam kɩwɛɛkɩm kɔnaa yɔ (Rom 5:12), yaa pɩɩpɩzɩɣ nɛ pɩsɩŋnɩ ɖɔɖɔ pɩlaʋ (Hadɛɛsɩ). Ye mbʋ, miŋ lɩyɛ sɩŋnɩ sɩm nabʋyʋ; sɩm mbʋ ɛyʋ sɩkɩ nɛ ɛɛtasɩɣ wɛnʋʋ waɖɛ se pefezi-i yɔ, mbʋ pʋyɔɔ yɔ, patɩyɔɔdɩ ɖoli se “lɩyɛ” lɩzɩ sɩɖaa mba pɛwɛ ɖɩ-taa yɔ ɛzɩ sɩm nɛ pɩlaʋ (Hadɛɛsɩ) palɩzʋʋ mba pasɩba yɔ. (Nat 20:13) Pɩtasɩ lɛ, mba patɩna pa-hɩla “wezuu takayaɣ” kikpiyaɣ taa yɔ, pʋ-tɔbʋʋ se mba pakaɖɩɣnɩ Ɛsɔ kewiyitu kɩkɩlɩtʋ yɔ, pɔlɔ-wɛ miŋ lɩyɛ taa, pʋ-tɔbʋʋ se tam tam ɖɩzʋʋ, yaa sɩm naalɛ ñɩmbʋ.—Nat 20:15.