Ðɩwɛɛ niye tɔm susuu taa nɛ pɩkɩlɩ—Ye pɔyɔɔdʋʋ tɔm natʋyʋ se pakaɖɩnɩ-ɖʋ tɔm susuu taa yɔ, ɛzɩma ɖɩla?
Ɛbɛ yɔɔ pɩcɛyaa?: Maɣzɩ se ŋnawa se asɛyʋʋ nakʋyʋ caɣ labʋ nɛ ŋna ɖɔɖɔ se kɩñɔtaa. Ye ɛyaa itise nɛ pɛmɛlɩ yɔ, pakaɣ sɩbʋ. Peeɖe ŋwobi ña-taabalʋ nɔɔyʋ cɔlɔ se ŋheyi-i se asɛyʋʋ ŋgʋ kɩñɔtaa lɛ, ɛcɛ ñɔ-nɔɔ yɔɔ nɛ eheyi-ŋ se pɩɖɔkɩnɩ-ɩ. Pɩtʋʋ fɛyɩ, ŋŋkaɣ sum yem mbʋ nɛ ŋɖɛɛ kpaagbaa! Ðo-kooka taa ɛyaa sakɩyɛ ɖɔɔnʋʋ-ɖʋ; paasɩŋ se tɔm ndʋ ɖiwoni-wɛ yɔ, tɩpɩzɩɣ nɛ tɩya pa-ñʋʋ. Pɩtɩla alɩwaatʋ ndʋ tɩ-taa ɖiwobi pɔ-cɔlɔ yɔ, paawɛ nɩɣzɛ naayɛ taa. (Maatiyee 24:37-39) Yaa pʋtɔma, paayɔɔdɩ pɔ-yɔɔ tɔm natʋyʋ nɛ pɛwɛɛkɩ pa-hɩɖɛ lalaa ɛzɩdaa. (Maatiyee 11:18, 19) Ɛyaa pɩzɩɣ nɛ pamaɣzɩ se ɖɩfɛyɩ ndɩ nɛ coocinaa lalaa mba pa-lakasɩ fɛyɩ ɖeu yɔ. (2 Pɩy. 2:1, 2) Ye ɖɩɣdʋ nɔɔyʋ ɛwɩlɩ kajalaɣ taa se ɖɔ-tɔm tɩkɛdɩnɩ-ɩ yɔ, ɖɩtaalɔ lɛɛ lɛɛ nɛ ɖise.
Ɛzɩma pɩwɛɛ se ɖɩla?
• Pʋcɔ nɛ ŋwolo se ŋsusuu tɔm kpaɣ ɖɩɣa nɛ ŋwolo ɖɩɣa lɛ, kpaɣ alɩwaatʋ pazɩ nɛ ŋmaɣzɩ tɔm ndʋ papɩzɩɣ nɛ pɔyɔɔdɩ se pakaɖɩnɩ-ŋ yɔ tɩ-yɔɔ; nɛ ŋñɩnɩ nɛ ŋna se ɛzɩma ŋpɩzɩɣ nɛ ŋcosi.
• Ye ɖɩɣdʋ ɛyɔɔdɩ tɔm natʋyʋ se ɛkaɖɩnɩ-ŋ yɔ, kpaɣ hɛɛɛ wɛtʋ nɛ ŋla nɛ mɩ-faawɩyɛ ɛtaasɩɩ tɩnaɣ. Pɩtɩtɩlɩ ŋpɩzɩɣ nɛ ŋsamɩ-ɩ tɔm ndʋ ɛyɔɔdaa yɔ, tɩ-yɔɔ. Kpaɣ se ɛtɔm se ɛnʋ ɖɔɖɔ ewoki cooci, ŋpɩzɩɣ nɛ ŋcosi-i se: “Ɛyaa mba pɔsɔɔlɩ Bibl taa tɔm ɛzɩ ña mbʋ yɔ, mañɩnaɣ.” Nabʋyʋ taa, ye ŋnɩɣ ɖɩɣdʋ wɛtʋ nɛ ɛ-lɩmaɣza pa-taa yɔ, pɩsɩɣnɩ-ŋ nɛ ŋwolo pɩ-yɔɔ nɛ ŋlɩzɩ aseɣɖe. Kpaɣ se ɛtɔm se e-nesi ɖɔkaa, ŋpɩzɩɣ nɛ ŋheyi-i se: “Manɩɣ pɩ-taa. Ɛlɛ pʋcɔ nɛ mɛnɖɛɛ lɛ, mañɩnaɣ se mɛncɛlɩ-ŋ takayaɣ kanɛ.” Nabʋyʋ taa ɖɔɖɔ lɛ, ye ɖɩɣdʋ ɛtɔm se ɖɔ-tɔm tɩkɛdɩnɩ-ɩ yɔ, ŋpɩzɩɣ nɛ ŋpɔzɩ-ɩ tɔm natʋyʋ. Ŋpɩzɩɣ nɛ ŋpɔzɩ-ɩ se: “Bibl ŋtɔŋ se kɩ-tɔm tɩkɛdɩnɩ-ŋ yaa Ɛsɔ sɛtʋ agbaa ŋtɔŋ se a-tɔm tɩkɛdɩnɩ-ŋ?”
• Labɩnɩ lɛɣtʋ tʋmɩyɛ. Taasɔɔ se Yehowa ɛɛkpaɣ nɔɔyʋ nɛ ɖoŋ se ekemsini-i. (Wayɩ Wayɩ Paɣtʋ 30:19) Paa weyi lɛ, ɛwɛnɩ ɛ-sʋʋtʋ Yehowa ɛzɩdaa. (Galaatɩ 6:5) Ye ɖɩɣdʋ ɛɖɔkɩ ɛ-lɩmaɣza cɩŋ nɛ ɛɛcaɣ se eyele-yɛ yɔ, pɩkɩlɩɣ ɖeu se ɖɩɖɛɛ ɖiɣ ɖiɣ nɛ ɖiyebi-i. Ye ɖɩwɩlaa se ɖiiniŋ ɛ-lɩmaɣza yɔ, pɩpɩzɩɣ piyele nɛ tɔm susuyu lɛlʋ pɩzɩ nɛ esusi-i tɔm cee wayɩ.—1 Pɩy. 3:15.
Labɩnɩ tʋmɩyɛ lɔŋ tasʋʋ pʋnɛ fenaɣ kanɛ:
• Ye ɛyʋ nɔɔyʋ ɛyɔɔdɩ tɔm natʋyʋ se ɛkaɖɩnɩ-mɩ yɔ, ɩtɛŋ faawɩyɛ ŋgʋ kɩ-labʋ nɛ ɩɖɛɛ lɛ, ña nɛ koobu weyi ɩlɩwa yɔ, ɩpɩzɩɣ nɛ ɩyɔɔdɩ nɛ ɩna se ɛzɩma ɩɩpɩzaɣ se icosi nɛ pɩla ɖeu nɛ pɩkɩlɩ.