Labɩnɩ fenaɣ fenaɣ takayɩsɩ kɩbɩnzɩ tʋmɩyɛ camɩyɛ
Ye pasɩ fenaɣ fenaɣ takayɩsɩ kɩbɩnzɩ yem yaa pɔlɔ-sɩ yɔ, sɩɩwazɩɣ nɔɔyʋ pʋyʋ; pʋyɔɔ lɛ pɩwɛɛ se ɖɩñaɣ pana nɛ ɖɩha-sɩ. Fenaɣ fenaɣ takayaɣ kʋyʋmaɣ pɩzɩɣ nɛ kotukuni nɔɔyʋ nɛ ɛsɔɔlɩ toovenim nɛ ɛpaɣzɩ Yehowa hɩɖɛ yaʋ. (Rom. 10:13, 14) Lɔŋ tasʋʋ mbʋ pɩkɔŋ yɔ, pɩkaɣ-ɖʋ sɩnʋʋ se ɖɩlabɩnɩ fenaɣ fenaɣ takayɩsɩ kɩbɩnzɩ tʋmɩyɛ camɩyɛ.
• Ye ɖisusuu tɔm kookasɩ nzɩ sɩ-taa paasusuu tɔm ɖoŋ ɖoŋ yɔ, ɖɩpɩzɩɣ nɛ ɖɩsɩɩ takayɩsɩ nzɩ sɩ-taa nakɛyɛ mba pɛfɛyɩ ɖɩsɩ yɔ pɛ-tɛ nɛ pɔkɔŋ lɛ, papɩzɩ nɛ pana-kɛ.
• Ye ɖisusuu tɔm samaɣ taa ɖenɖe ɛyaa sɩŋaa nɛ paɖaŋ; ɛzɩ lɔɔɖa yaa suluku ɖɩzɩŋɩyɛ mbʋ yɔ yɔ, ɖɩpɩzɩɣ nɛ ɖɩpɔzɩ ɛyaa se pɔsɔɔlaa se ɖɩcɛlɩ-wɛ nabʋyʋ nɛ pakalɩ yaa we. Nɛ ɖɩwɩlɩ-wɛ takayɩsɩ kɩbɩnzɩ cabɩ nɛ pa-maɣmaɣ palɩzɩ ŋga yaa nzɩ pɔsɔɔlaa yɔ.
• Ye ɖiwobi ɖɔkɔtɔnaa mba pɛwɛ ɖo-kooka taa yɔ pa-taa, nɛ ye pɩlakɩ yɔ, ɖɩpɩzɩɣ nɛ ɖɩcɛlɩ takayɩsɩ kɩbɩnzɩ nasɩyɩ mba pacaɣaa nɛ paɖaŋ yɔ. Ðoŋ ɖoŋ lɛ, pɩkɩlɩɣ ɖeu se weyi ɛcɔŋnɩ lone nɖɩ ɖɩ-yɔɔ yɔ ɛwɛɛ yɔ, ɖɩpɔzɩ-ɩ nʋmɔʋ pʋcɔ nɛ ɖɩha takayɩsɩ nzɩ. Ye ŋna ɖa-takayɩsɩ nasɩyɩ peeɖe yɔ, pɩkɩlɩɣ weewee se ŋtaatasɩ cɛlʋʋ takayɩsɩ lɛɛsɩ.
• Ye ŋñɔɔzʋʋ ña-tɩ se ŋwolo nɛ ŋla pɩsɩ nɛ ŋna-ɩ waa nabɛyɛ yɔ, ñɩnɩ nɛ ŋna se ɛzɩma Ɛsɔ tɔm kɛdɩnɩ weyi ŋcaɣ wobu ɛ-cɔlɔ yɔ. Ɛwɛnɩ hɔʋ na? Ɛsɔɔlɩ nʋmɔʋ wobu na? Yaa ɛsɔɔlɩ ɛ-ɖɩɣa ñɔɔzʋʋ na? Cɔnɩ takayɩsɩ kɩbɩnzɩ taa nɛ ŋna se sɩ-taa ñʋʋ nakʋyʋ pɩzɩɣ nɛ kɩkɛdɩnɩ-ɩ nɛ alɩwaatʋ ndʋ ŋwoki pɩsɩ nɛ ŋna-ɩ labʋ lɛ, ŋwɩlɩ-ɩ kʋ.
• Ye ŋkatɩ ɛyʋ weyi ŋŋcawa nɛ ŋwɩɩ ɛ-ɖɩɣa taa yɔ, ŋpɩzɩɣ nɛ ŋwɩlɩ-ɩ fenaɣ fenaɣ takayɩsɩ kɩbɩnzɩ nzɩ sɩɖɛ ɛ-yɔɔ yɔ.