Tɔm Cosuu Aɖakaɣ

◼ Takayɩsɩ nzɩ piya pɩzɩɣ sɩkpɛlɩkɩ nɛ sɩpɩɩ nɛ sɩcɛyɩsɩ fezuu taa?

Lʋlɩyaa mba pɛkɛ Krɩstʋ mba yɔ, pasɩɣzɩɣ pe-piya lɔŋ nɛ “maɣzɩm mbʋ pɩlɩɣnɩ [Yehowa] cɔlɔ yɔ.” (Efɛz. 6:4) Lʋlɩyaa nawa se ye pa nɛ pe-piya patazɩɣ Examinons takayaɣ taa paa tanaŋ ŋgʋ yɔ, pɩwazɩɣ-wɛ pɩdɩɩfɛyɩ. Hɔŋ pɩzɩɣ nɛ ɩcɔnɩ video hɔʋ taa Bibl kpɛlɩkʋʋ alɩwaatʋ taa yaa alɩwaatʋ lɛɛtʋ taa mbʋ yɔ. Papɩzɩɣ ɖɔɖɔ nɛ patazɩ Les jeunes s’interrogent takayaɣ taa tɔm natʋyʋ taa yaa pakpaɣ Bibl hɔɔlʋʋ nakʋyʋ nɛ pala drama tɩyɛ. Ɛlɛ pʋcɔ nɛ piya “pɩɩ fezuu taa lɛ,” pɩwɛɛ se pawɩlɩ-sɩ Bibl taa wɩlɩtʋ ndʋ tɩ-taa limaa yɔ.​—Ebree 6:1.

Maɣzɩ takayɩsɩ nzɩ ɖa nɛ ɛyaa ɖɩkpɛlɩkɩɣ tɔm susuu taa yɔ sɩ-yɔɔ nɛ ŋna. Ðɩcalɩɣ katʋʋ ɛyʋ kajalaɣ wiye yaa ɖɩpɩsɩɣ pɩsɩ nɛ ŋna-ɩ labʋ lɛ, ɖɩkpakɩɣ ɖoŋ ɖoŋ Tɔm Ndʋ Bibl Wɩlɩɣ Toovenim Taa? takayaɣ nɛ ɖa nɛ ɩ ɖɩpaɣzɩ Bibl kpɛlɩkʋʋ. Ðɩtɛŋ takayaɣ ŋga kɛ-kpɛlɩkʋʋ lɛ, ɖɩkpɛlɩkɩɣ ɖɔɖɔ “Ɩɖɔkɩ Mɩ-tɩ Kpam Ɛsɔ Sɔɔlɩm Taa.” Ɛbɛ yɔɔ? Ndʋ Bibl Wɩlɩɣ takayaɣ sɩɣnɩ Bibl kpɛlɩkɩyaa se patɩlɩ Bibl kajalaɣ wɩlɩtʋ. “Ɛsɔ Sɔɔlɩm” takayaɣ ñawɩlɩɣ Bibl kpɛlɩkɩyaa ɛzɩma pɔɖɔ wɩlɩtʋ ndʋ tɩ-yɔɔ pe-wezuu caɣʋ taa yɔ. Takayɩsɩ nzɩ, sɩ-naalɛ sɩ-kpɛlɩkʋʋ sɩɣnɩ ɛyaa kɩfama se ‘pɔñɔ lila’ nɛ paka Krɩstʋ taa nɛ ‘pɔɖɔkɩ tisuu’ kpam. (Koloosi 2:6, 7) Takayɩsɩ nzɩ sɩɩpɩzɩɣ nɛ sɩsɩnɩ ɖe-piya ɖɔɖɔ yaa we? Pʋpɔzaa se pawɩlɩ-sɩ mbʋ kɩhɛyʋʋ pʋ-ñʋʋ taa nɛ Ɛsɔ Kewiyaɣ pɛkɛnaa yɔ, pɩwɛɛ se sɩtɩlɩ wɛtʋ ndʋ taa sɩɖaa wɛɛ yɔ. Pʋmʋnaa se piya ɩtɩlɩ ɖɔɖɔ mbʋ pʋyɔɔ Ɛsɔ ha nʋmɔʋ se kʋñɔmɩŋ ɩwɛɛ nɛ mbʋ pɩwɩlɩɣ se ɖɩwɛ ɛjaɖɛ ɖɩnɛ ɖɩ-kɛdɛzaɣ kɩyakɩŋ taa yɔ. Pʋpɔzʋʋ se sɩ-maɣmaɣ sitisi se Yehowa Aseɣɖe Tɩnaa wɩlɩɣ toovenim na. Pʋmʋnaa se piya ɩnɩɩ Bibl paɣtʋ kila taa nɛ sɩhayɩsɩ sɩ-tɩ nɛ sɩkɛ ‘mba pɩmalɩnɩ-wɛ se patɩlɩ kɩbam nɛ kɩdɛkɛdɩm’ yɔ. (Ebree 5:14) Ɛlɛ pɩwɛɛ se lʋlɩyaa ɩmaɣzɩ pe-piya pɩnzɩ yɔɔ nɛ ɛzɩma sɩnɩɣ tɔm taa yɔ, pɩ-yɔɔ. Ɛlɛ, paa piya ɩtɩpaɣlɩ sakɩyɛ yɔ, sɩwɛnɩ lɛɣtʋ se sɩpɩzɩ nɛ sɩkpɛlɩkɩ nɛ sɩtɩlɩ Bibl taa wɩlɩtʋ ndʋ tilimaa yɔ.​—Luka 2:42, 46, 47.