KPƐLƖKƲƲ 2

Tɔm yɔɔdʋʋ mbʋ pɩwɛ ɛzɩ kɛdaɣ labʋ yɔ

2 Kɔrɛntɩ mba 2:17

LƖMAƔZƖYƐ SƆSƆÐƐ: Yɔɔdɩ tɔm ɛzɩ ŋtɩɩyɔɔdʋʋ yɔ, ña-taa ɛtɛmnɩ-tʋ nɛ pɩwɩlɩ lɩmaɣza wena ŋwɛnɩ ñɔ-tɔm yɔɔdʋʋ nɛ ñɔ-tɔm welisiyaa yɔɔ yɔ.

ƐZƖMA PƖWƐƐ SE ŊLA YƆ:

Tɩmɩ nɛ ŋñɔɔzɩ ña-tɩ camɩyɛ. Tɩmɩ nɛ pɩsa nɛ ŋka ñʋʋ tɔm ndʋ ŋyɔɔdʋʋ yɔ tɩ-yɔɔ, taaka ñʋʋ ña-maɣmaɣ ñɔ-yɔɔ. Yele nɛ lɩmaɣza sɔsɔna wena ŋcaɣ a-tɔm yɔɔdʋʋ yɔ, awɛɛ ña-lɩmaɣza taa. Yɔɔdɩ tɔm nɛ ña-maɣmaɣ ñɔ-tɔm pee; taayɔɔdɩ-tʋ piye piye ɛzɩ pamaʋ-tʋ takayaɣ yɔɔ yɔ.

Ye ŋɖʋwa se ŋkalɩɣ tɔm Bibl taa yaa takayaɣ nakɛyɛ taa yɔ, ñaɣ pana nɛ ŋtɩlɩ tɔm ndʋ ŋcaɣ kalʋʋ yɔ camɩyɛ se pɩsa nɛ ŋkalɩ-tʋ nɛ pɩ-taa tʋ kpayɩ kpayɩ. Ye ɛyaa nabɛyɛ ɩyɔɔdɩ tɔm natʋyʋ nɛ pama-tʋ ɖeyi ɖeyi ɛzɩ pɔyɔɔdʋʋ-tʋ yɔ, kalɩ-tʋ nɛ tɩmʋnɩ wɛtʋ ndʋ tɩ-taa pɔyɔɔdɩ tɔm ndʋ yɔ; ɛlɛ taaɖɛlɛsɩ niye.
Yɔɔdɩnɩ ña-laŋɩyɛ. Maɣzɩ mbʋ pʋyɔɔ pɩpɔzʋʋ se ñɔ-tɔm welisiyaa ɩnɩɩ tɔm ndʋ yɔ pɩ-yɔɔ. Ka ña-lɩmaɣza pɔ-yɔɔ. Pʋwayɩ lɛ, ɛzɩma ŋsɩŋɩɣ yaa ŋcakɩ, ɛzɩma ŋlakɩnɩ tʋmɩyɛ ño-tomnaɣ pilinzi nɛ ñɛ-ɛsɩndaa wɛtʋ yɔ, pɩkaɣ yebu nɛ pana se ña-taa tɛmnɩ tɔm ndʋ ŋyɔɔdʋʋ yɔ nɛ ŋwɛnɩ sɔɔlɩm siŋŋ.

Ye pɔtɔm se ŋyɔɔdɩ ɛzɩ ŋtɩɩyɔɔdʋʋ yɔ, pɩɩwɩlɩɣ se pɩwɛɛ se ŋyɔɔdɩnɩ kaañamtʋ. Yɔɔdɩ tɔm kpayɩ kpayɩ nɛ ŋɖɔ kʋnʋŋ paɣtʋ yɔɔ camɩyɛ nɛ piyele nɛ ñamtʋ wɛɛ tɔm ndʋ ŋyɔɔdʋʋ yɔ tɩ-yɔɔ.
Cɔnɩ ñɔ-tɔm welisiyaa ɛsɩndaa. Cɔnɩ ɛyaa ɛsɩndaa ye ɖenɖe ɩwɛɛ yɔ pɩtɩkɛ kaañamtʋ se pala mbʋ yɔ. Alɩwaatʋ ndʋ ŋyɔɔdʋʋ samaɣ taa tɔm yɔ, pɩwɛɣ ɖeu se ŋcɔnɩ ñɔ-tɔm welisiyaa ɛsɩndaa kʋɖʋm kʋɖʋm nɛ pɩkɩlɩ se ŋcɔnɩ ɛyaa tɩŋa kpɛɛɛ yem.