Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
4-10 JANVIER
ÑƖM MBƲ PƖWƐ ƐSƆTƆM TAA YƆ | LEVITIKI 18-19
“Ðɩwɛɛ kele kele ɖe-wezuu caɣʋ taa”
Ɛzɩma ɖɩpɩzɩɣ nɛ ɖɩkpa ɖa-tɩ nɛ Sataŋ kpaca nakʋyʋ yɔ
Yehowa yɔɔdaɣ lakasɩ kɩdɛkɛdɩsɩ ndɩ ndɩ nzɩ ajɛɛ lɛɛna taa ɛyaa lakaɣ yɔ sɩ-tɔm lɛ, eheyi Izrayɛɛlɩ piya se: “Ɩtaala ɛzɩ palakʋʋ . . . Kanaŋ ɛjaɖɛ taa ɖenɖe mowokini-mɩ yɔ. . . Ɛjaɖɛ pɩsɩ azuluma, [mɔhɔŋ] ɖɩ-nɩŋgbaŋʋʋ.” Kanaŋ ñɩma wezuu caɣʋ kaawɛ kʋzɔɔtʋ kpem, nɛ halɩ pɛ-ɛjaɖɛ maɣmaɣ pɩsɩ azuluma pʋyʋ Izrayɛɛlɩ tɛ Ɛsɔ kiɖeɖeu ɛsɩndaa.—Lev. 18:3, 25.
Yehowa ɖiyiɣ ɛ-samaɣ
13 Yehowa lone taa caɣyaa kaawɛ ndɩ kpem nɛ ajɛɛ lɛɛna taa awiya, mbʋ pʋyɔɔ yɔ ɛyaa lɔŋsɩnɖɛ nɛ pɛ-lɛɣtʋ peɖiyaɣni-yɛ. Kanaŋ awiya nɛ samaɣ ŋga peɖiyaɣ yɔ, palakaɣ lakasɩ kɩdɛkɛdɩsɩ siŋŋ. Ɛyaa sʋwaɣnɩ pɔ-hɔʋ taa mba, abalaa yaa halaa sʋwaɣnɩ ɖama; halɩ ɛyaa sʋwaɣnɩ kpɩna, palaɣ sɩɩnaa sakɩyɛ nɛ palaɣ pe-piya agɔlɩma. (Lev. 18:6, 21-25) Pɩtasɩ lɛ, Babilɔɔnɩ nɛ Ejipiti awiya taawɛɛnɩ cɩɖɩ cɩɖɩ wɛʋ paɣtʋ ɛzɩ paɣtʋ ndʋ Yehowa kaacɛlɩ Izrayɛɛlɩ piya yɔ. (Kɩg. 19:13) Ɛlɛ Yehowa samaɣ ñanaɣaɣ ɛzɩma ke-ninɖiɣyaa seɣtaɣ-kɛ se kɛwɛɛ kele kele fezuu taa, wezuu kɩbaŋʋ caɣʋ nʋmɔʋ taa nɛ tomnaɣ yɔɔ yɔ. Pɩwɩlɩɣ kpayɩ kpayɩ se Yehowa ɖiyaɣni-wɛ.
w14 1/7 7 §2
Mbʋ Ɛsɔ kaɣ labʋ se eɖezi kɩdɛkɛdɩm lakasɩ yɔ
Ɛbɛ kaɣ talʋʋ mba palakɩ ñʋʋ taa ɖoŋ nɛ pekiziɣ se paalɛɣzɩɣ pe-wezuu caɣʋ nɛ pɛwɛɛ palakɩ kɩdɛkɛdɩm yɔ? Maɣzɩ lidaʋ tɔm tʋnɛ tɩ-yɔɔ nɛ ŋna: “Ɛyaa mba pɛwɛ siɣsiɣ yɔ pakaɣ caɣʋ tɛtʋ yɔɔ, nɛ ɛyaa mba pɛwɛ siɣsiɣ yɔ mba kaɣnɩ wɛʋ tɩ-yɔɔ nɛ pɩkpaɣ nɛ pɩɖɛɛ. Ɛlɛ kañatʋ tɩnaa ɩɩkaɣ wɛʋ tɛtʋ yɔɔ, nɛ mba palakɩ kʋzɔɔtʋ yɔ, pakaɣ-wɛ kʋsʋʋ tɩ-yɔɔ.” (Aduwa 2:21, 22) Ɛyaa kɩdɛkɛdaa ɩɩkaɣ tasʋʋ wɛʋ tɛtʋ yɔɔ. Laŋhɛzɩyɛ yeke kaɣnɩ wɛʋ tɛtʋ yɔɔ, nɛ pazɩ pazɩ lɛ, ɛyaa siɣsiɣ tɩnaa kaɣ lɩʋ kɩwɛɛkɩm mbʋ Aɖam ɖɛzɩ-ɖʋ yɔ pi-yomiye taa.—Roma 6:17, 18, 8:21.
Fezuu taa ñɩm
w06 15/6 22 §11
“Ɛzɩ sɔɔlɩm ɖɔɖɔ lɛ mɔnsɔɔlɩnɩ ña-paɣtʋ na?”
11 Hɔɔlʋʋ naalɛ ñɩŋgʋ ŋgʋ kɩwɩlɩɣ Moyizi paɣtʋ taa se Yehowa maɣzɩɣ ɛ-samaɣ yɔɔ yɔ, ŋgʋ lɛ se ɛha waɖɛ kʋñɔndɩnaa se pacazɩɣ tɔɔnasɩ. Yehowa ɖʋ paɣtʋ se ye Izrayɛɛlɩ tʋ nɔɔyʋ ɛkʋm tɔɔnaɣ ɛ-hayɩm taa yɔ, pɩwɛɛ se paha waɖɛ kʋñɔndɩnaa nɛ pacazɩ mbʋ kʋnɖaa yebini pa-wayɩ yɔ. Pɩtɩpɔzɩ se haɖʋ ɛkʋ tɔɔnasɩ nzɩ sɩwɛ ɛ-hayɩm kpɛnzɩ yɔɔ yɔ cɩɖɩ cɩɖɩ nɛ pɩfɛyɩ ɖɔɖɔ se ɛcazɩ ajaza. Pɩfɛyɩ se ekoyi oliivi pee wena akazaa yɔ, nɛ pɩfɛyɩ ɖɔɖɔ se ɛtɔzɩ pee wena amɩzaa yɔ. Pɩkɛ sɔɔlɩm ɖʋtʋ ndʋ Yehowa kaalaba se pɩwazɩ kʋñɔndɩnaa, agɔma, solisi nɛ lelaa yɔ. Pɩkɛ toovenim se tɔɔnasɩ cazʋʋ pɔzʋʋ pana ñaɣʋ siŋŋ, ɛlɛ pɩsɩɣnɩ mba pɛwɛ kɩcɛyɩm taa yɔ se pataakɛ sʋlʋmɩyaa.—Levitiki 19:9, 10; Wayɩ Wayɩ Paɣtʋ 24:19-22; Keɣa 36:25.
11-17 JANVIER
ÑƖM MBƲ PƖWƐ ƐSƆTƆM TAA YƆ | LEVITIKI 20-21
“Yehowa lɩzɩ ɛ-samaɣ nɛ hɔɔlʋʋ”
w04 15/10 11 §12
Ŋkaɣ sʋʋ paradisuu taa?
12 Ɛlɛ pɩfɛyɩ se ɖɩsɔɔ tɔm natʋyʋ yɔɔ. Ɛsɔ kaaheyi Izrayɛɛlɩ mba se: “Ɩɖɔkɩ paɣtʋ kpeekpe, ndʋ manɖʋʋ-mɩ sɔnɔ yɔ, nɛ ɩkpa ɖoŋ nɛ ɩpɩzɩ ɩsʋʋ nɛ ɩmʋ tɛtʋ ndʋ ɩsʋʋ tɩ-taa yɔ.” (Wayɩ Wayɩ Paɣtʋ 11:8) Pɔyɔɔdɩ tɛtʋ ndʋ tɩ-tɔm ɖɔɖɔ Levitiki 20:22, 24 taa se: “Ɩɩɖɔkɩ man-paɣtʋ kpeekpe, mɔn-sɔnzɩ kpeekpe nɛ ɩɖɔ pɩ-yɔɔ, nɛ ɛjaɖɛ nɖɩ iwoki ɖɩ-taa sʋʋ se ɩcaɣ yɔ, ɖitaahoo-mɩ nɛ ɖɩtɔ. mbʋ meheyi-mɩ se: ‘Ɩkaɣ mʋʋ pɛ-tɛtʋ nɛ mankaɣ-mɩ tʋ cɛlʋʋ nɛ tɩkɛ mɩ-tɛtʋ, ndʋ tɩ-taa naalɩm nɛ tʋŋ num pekpeŋ yem yɔ.’” Toovenim, pɩɩpɔzaa se taabalɩyɛ kɩbanɖɛ ɛwɛɛ pa nɛ Yehowa pɛ-hɛkʋ taa pʋcɔ nɛ pasʋʋ Lidaʋ Tɛtʋ taa. Izrayɛɛlɩ mba taaña Ɛsɔ paɣtʋ, pʋyɔɔ ɛlɛ yeba nɛ Babilɔɔnɩ mba wabɩ-wɛ nɛ powoni-wɛ yomiye taa.
it-1 1106
Ñɩm
Ñɩm kɛ mbʋ mbʋ payɩ ɛyʋ yekini ɛ-sɛyɩnaa yaa mba pɩwɛɛ se pɛlɛɣzɩ e-lone taa ɛ-sɩm wayɩ yɔ. Ebree lakaɣ ŋga pɛɖɛzɩ mbʋ yɔ ŋga lɛ naḥal (tɔm piye: naḥalah). Lakaɣ ŋga kawɩlɩɣ ñɩm mbʋ nɔɔyʋ yekini ɛyʋ lɛlʋ yɔ, kɔzɩ kɔzɩ lɛ, pɩkɛɣnɩ weyi ɛkɛ ñɩm tɔɔyʋ yɔ. (Kɩg 26:55; Eze 46:18) Nabʋyʋ taa palakɩnɩ lakaɣ yarash tʋmɩyɛ alɩwaatʋ ndʋ pɔyɔɔdʋʋ “ñɩm tɔɔyʋ” tɔm yɔ, ɛlɛ ɖoŋ ɖoŋ lɛ lakaɣ ŋga kɔyɔɔdʋʋ “weyi pɛcɛlɩɣ ñɩm nabʋyʋ” yɔ ɛ-tɔm na; pɩpɩzɩɣ pɩla se pɩtɩkɛ ɛnʋ kɛnɩ ñɩm tɔɔyʋ. (Kiɖe 15:3; Lev 20:24) Palakɩnɩ lakaɣ ŋga tʋmɩyɛ ɖɔɖɔ sɔɔjanaa tʋmɩyɛ hɔɔlʋʋ taa, nɛ hɔɔlʋʋ ŋgʋ kɩ-taa lɛ, kɔ-tɔbʋʋ lɛ “ɖɔɔnʋʋ” yaa nabʋyʋ mʋʋ nɔɔyʋ cɔlɔ. (Wp 2:12; 31:3) Grɛɛkɩ tɔm piye nɖɩ palakɩnɩ tʋmɩyɛ alɩwaatʋ ndʋ pɔyɔɔdʋʋ ñɩm mbʋ peyekini nɔɔyʋ yɔ pɩ-tɔm yɔ, nɖɩ lɛ klêros, kiɖe tɛɛ lɛ ɖɩ-tɔbʋʋ lɛ “piye lɔʋ”, ɛlɛ pʋwayɩ lɛ pɔkɔm nɛ palɩzɩ ɖɩ-tɔbʋʋ se “tayʋʋ” nɛ “ñɩm yebinuu nɔɔyʋ.”—Mt 27:35; Tʋm 1:17; 26:18.
it-2 439 §5
Sumasɩ
Tɛʋ sɔsɔʋ wayɩ, Noowa kaakpaɣ “sumasɩ kele kele nzɩ” nɛ kpɩna naayɛ nɛ ɛlaa kɩlaʋ. (Kiɖe 8:18-20) Kpaɣnɩ alɩwaatʋ ndʋ lɛ, Ɛsɔ ha ɛyʋ nʋmɔʋ se ɛtɔɔ sumasɩ nandʋ, ɛlɛ pɩfɛyɩ se ɛtɔɔ sɩ-calɩm. (Kiɖe 9:1-4; kpaɣ-tʋ nɛ ŋmaɣzɩnɩ Lev 7:26; 17:13) Pɔyɔɔdɩ sumasɩ nasɩyɩ tɔm se sɩwɛ kele kele nɛ pɩwɩlɩɣ se alɩwaatʋ ndʋ tɩ-taa lɛ, Ɛsɔ kaaha nʋmɔʋ se pakpakɩɣ sumasɩ nasɩyɩ nɛ palaɣ-ɩ kɩlaŋ. Ɛlɛ tɔɔnaɣ hɔɔlʋʋ taa lɛ, Bibl wɩlɩɣ se pʋcɔ nɛ paɖʋʋ Moyizi Paɣtʋ lɛ, pataakpakɩɣ sumasɩ nasɩyɩ se sɩfɛyɩ kele kele. (Lev 11:13-19, 46, 47; 20:25; Wp 14:11-20) Bibl tɩyɔɔdɩ kpayɩ kpayɩ mbʋ pʋyɔɔ sumasɩ nasɩyɩ taawɛɛ kele kele kɩlaŋ laʋ hɔɔlʋʋ taa yɔ pɩ-tɔm. Pɩkɛ toovenim se sumasɩ nzɩ sɩtaawɛɛ kele kele yɔ sɩ-taa sakɩyɛ tɔkɩ mbʋ pɩsɩba yɔ, ɛlɛ pɩtɩkɛ sɩ-tɩŋa sɩlakɩnɩ mbʋ. (Kalɩ HUPPE.) Ɛzɩ Ɛsɔ kaawɩlʋʋ Pɩyɛɛrɩ natʋ natʋyʋ taa yɔ, paɣtʋ ndʋ paaɖʋwa pɩlɩɩnɩ kpɩna wena afɛyɩ kele kele yɔ a-yɔɔ yɔ, tɩsɩ tɩnaɣ alɩwaatʋ ndʋ paɖʋ ɛgbɛyɛ kɩfaɖɛ yɔ.—Tʋm 10:9-15.
Fezuu taa ñɩm
it-1 1180
Heŋ ɖʋʋ ɛyʋ maɣmaɣ tomnaɣ
Ɛsɔ Paɣtʋ wɩlɩɣ kpayɩ kpayɩ se pɩfɛyɩ se sɩɖʋ nɔɔyʋ yɔɔ lɛ, ɛyʋ ɛhɛɛ ɛ-maɣmaɣ e-tomnaɣ yɔɔ nɛ ɛɖʋ-kɛ heŋ. (Lev 19:28; 21:5; Wp 14:1) Paaɖʋ paɣtʋ ndʋ mbʋ pʋyɔɔ yɔ Izrayɛɛlɩ mba kaakɛ samaɣ ŋga kɛwɛ kele kele yɔ nɛ Yehowa lɩzɩ-kɛ nɛ ŋgee. (Wp 14:2) Nɛ pʋyɔɔ lɛ, pɩtaapɔzɩ se palakɩ sɩɩnaa layaa lakasɩ. Pɩtasɩ lɛ, pɩtɩmʋna se Ɛsɔ samaɣ ɛɖʋʋ ka-tɩ wɩzasɩ, kɛhɛɣ ko-tomnasɩ yɔɔ nɛ kaɖʋʋ ka-tɩ heŋ; mbʋ pʋyɔɔ yɔ, kasɩm wɛtʋ ndʋ tɩ-taa sɩɖaa wɛɛ yɔ camɩyɛ nɛ kɛwɛnɩ ɖɔɖɔ sɩɖaa fezuu lidaʋ. (Dan 12:13; Ebr 11:19) Pɩtasɩ ɖɔɖɔ lɛ, paɣtʋ ndʋ paaɖʋwa se ɛyʋ ɛtaaɖʋ ɛ-maɣmaɣ e-tomnaɣ heŋ yɔ, tɩsɩɣaɣnɩ Izrayɛɛlɩ mba se pɛwɛɛnɩ ñamtʋ ɛyʋ tomnaɣ yɔɔ, mbʋ pʋyɔɔ yɔ kɛkɛ wonuu kɩbaŋʋ ŋgʋ Ɛsɔ lɩzaa yɔ.
18-24 JANVIER
ÑƖM MBƲ PƖWƐ ƐSƆTƆM TAA YƆ | LEVITIKI 22-23
“Ɛbɛ pɩnaɣ taa kazandʋ kpɛlɩkɩɣ-ɖʋ?”
it-1 884 §2
Kpɔnɔ kɩtɩñɩŋʋʋ kazandʋ
Kpɔnɔ kɩtɩñɩŋʋʋ kazandʋ kajalaɣ kɩyakʋ kaakɛ ŋgee evemiye nɛ ɖɩɩkɛ ɖɔɖɔ Sabaatɩ evemiye. Kɩyakʋ naalɛ ñɩŋgʋ wiye, 16 Nisaŋ wiye, pɩɩwɛɛ se pakpaɣ kajalaɣ ɔrgɩwaa mba pakʋma yɔ pɔ-hɔɔyɛ naɖɩyɛ nɛ powoni cɔjɔ. Pɩɩkɛ tɔɔnaɣ ŋga pacalaɣ kʋm Palɛstiini yɔ. Pʋcɔ nɛ kazandʋ ndʋ tɩtalɩ lɛ, pɩtaapɔzɩ se nɔɔyʋ ɛtɔɔ tɔɔnaɣ kɩfalaɣ nakɛyɛ; paa pɩtɩɩkɛ ŋga poɖoŋaa yaa ŋga ka nɛ kɛ-lɛŋ yɔ. Cɔjɔ fiɣdiɣ hɔɔyɛ nɖɩ Yehowa ɛsɩndaa nɛ pɩwɩlɩ se ɛha-ɩ ɖɩ. Pɩwɛɛ ɖɔɖɔ se palaa pɩnaɣ kʋɖʋmaɣ heɣa ŋga kɛfɛyɩnɩ azuluma yɔ nɛ pañaɣzɩ tɔɔnaɣ miŋ nɛ kɔ-sɔzɩŋ kpa fɛmm. (Lev 23:6-14) Alɩwaatʋ ndʋ tɩ-taa lɛ, pataaɖʋ paɣtʋ natʋyʋ nɛ tɩtɔŋ se pɩwɛɛ se pañaɣzɩ tɔɔnaɣ pee yaa mʋlʋm altaaru yɔɔ, ɛzɩ cɔjɔnaa kɔm nɛ palakɩ pʋwayɩ yɔ. Pɩtasɩnɩ kɩlaŋ weyi palaɣaɣ samaɣ kpeekpe yɔɔ yɔ lɛ, ye hɔʋ nakʋyʋ nɛ ye ɛyʋ nɔɔyʋ ɛwɛnɩ ñɩm nabʋyʋ Izrayɛɛlɩ ɛjaɖɛ taa yɔ, pɩwɛɛ se ɛla haɖɛ, nɛ pakpaɣ-ɖɩ nɛ palabɩnɩ samtʋ kɩlaŋ kazandʋ alɩwaatʋ taa.—Ejl 23:19; Wp 26:1, 2; kalɩ PRÉMICES.
Mbʋ pɩwɩlɩɣ yɔ. Alɩwaatʋ ndʋ tɩ-taa, kpɔnɔ kɩñɩŋʋʋ tɔɔʋ kaalabɩ nɔɔ kʋɖʋmaɣ nɛ paɣtʋ ndʋ Yehowa kaaɖʋ Moyizi yɔ. Paɣtʋ ndʋ, tɩwɛ Ejipiti lɩʋ 12:14-20 taa. Kalɩtʋ 19 yɔɔdɩ kpayɩ se: “Kɩyakɩŋ lʋbɛ, pataana kpɔnɔ kɩñɩŋʋʋ mɩ-ɖɩsɩ taa.” Wayɩ Wayɩ Paɣtʋ 16:3 taa paya kpɔnɔ kɩtɩñɩŋʋʋ se “kʋñɔŋ kpɔnɔ” nɛ paa pɩnaɣ ŋga lɛ, pɩtɔzaɣ Yuuda mba ɛzɩma pakʋyɩ Ejipiti lɛɛ lɛɛ nɛ pɛɖɛɛ (nɛ petihiɣ alɩwaatʋ se peyele nɛ pɔ-kpɔnɔnaa ñɩŋ [Ejl 12:34]) yɔ pɩ-yɔɔ. Pɩtɔzaɣ Izrayɛɛlɩ mba ɖɔɖɔ alɩwaatʋ ndʋ palɩ kʋñɔŋ nɛ yomiye taa yɔ pɩ-yɔɔ, ɛzɩ Yehowa maɣmaɣ yɔɔdʋʋ yɔ se “ŋtɔzʋʋ ña-lɩʋ Ejipiti kɩyakʋ yɔɔ, ñe-wezuu kɩyakɩŋ kpeekpe.” Alɩwaatʋ ndʋ Izrayɛɛlɩ mba lakɩ pɩnaɣ taa kazandʋ naadozo tɛ kajalaɣ ñɩndʋ yɔ, pɔtɔzʋʋ ɛzɩma Yehowa yabɩ pa-ñʋʋ yɔ nɛ pɛɛyɛ nɖɩ ɖɩ-taa pɛwɛɛ yɔ ɖɩ-yɔɔ, nɛ pawɩlɩɣ-ɩ pɛ-ɛsɩmɩyɛ.—Wp 16:16.
it-2 527 §1
Pantekooti
Ɛzɩma pahaɣaɣ kajalaɣ blee pee wena pakʋma yɔ, pɩɩwɛ ndɩ nɛ ɛzɩma pahaɣaɣ kajalaɣ ɔrgɩ pee wena pakʋma yɔ. Pɩɩwɛɛ se pakpaɣ blee litrinaa 4,4 nɛ lɔlɔm nɛ palabɩnɩ kpɔnɔnaa naalɛ. Paaheyi Izrayɛɛlɩ mba se pɩwɛɛ se kpɔnɔnaa mba pɛkɛ “mɩ-ɖɩwɛyɛ taa kpɔnɔnaa.” Pʋ-tɔbʋʋ lɛ se pɩwɛɛ se palabɩ-wɛ nɛ pɛwɛ ɛzɩ kpɔnɔnaa mba palakɩ pa-ɖɩsɩ taa paa evemiye nɖɩ nɛ pɔtɔkɩ yɔ, nɛ pɩtaakɛ kpɔnɔnaa mba palakɩnɩ tʋmɩyɛ lone kiɖeɖeye taa yɔ. (Lev 23:17) Pakpakaɣ kpɔnɔnaa mba nɛ palaɣnɩ miŋ kɩñaɣzɩŋ kɩlaʋ nɛ kɩwɛɛkɩm kɩlaʋ. Pakpakaɣ ɖɔɖɔ heɣsi naalɛ nɛ palaɣnɩ laŋhɛzɩyɛ kɩlaŋ. Cɔjɔ ɖʋʋ e-nesi kpɔnɔnaa nɛ heɣsi abalɩñɩnzɩ nzɩ sɩ-tɛɛ, nɛ efiɣdi-wɛ Yehowa ɛsɩndaa nɛ pɩwɩlɩ se ɛha-wɛ Yehowa. Pʋwayɩ lɛ, pɩwɛɛ se cɔjɔ ɛtɔɔ kpɔnɔnaa mba nɛ heɣsi nzɩ nɛ pɩkɛnɩ laŋhɛzɩyɛ kɩlaʋ.—Lev 23:18-20.
w14 15/5 29 §11
Ña nɛ Yehowa ɛgbɛyɛ iɖiɣni ɖɔm nɛ iwokini ɛsɩndaa?
11 Yehowa ɛgbɛyɛ ñɩnɩɣ se piɖeni-ɖʋ, pʋyɔɔ ɖɩsazɩɣ-ɖʋ se ɖɩɖɔ apostoloo Pɔɔlɩ lɔŋ tasʋʋ pʋnɛ pɩ-yɔɔ: “Nɛ iyele nɛ ɖɩmaɣzɩ ɖama yɔɔ nɛ pɩsa nɛ ɖiseɣti ɖama se ɖɩwɩlɩ sɔɔlɩm nɛ ɖɩla tʋma kɩbana, ɖitaayeki ɖama kpeɣluu ɛzɩ nabɛyɛ lakʋʋ yɔ, ɛlɛ ɖɩkpazɩɣ ɖama ɖoŋ, nɛ ɖɩla mbʋ nɛ pɩkɩlɩ, ɛzɩma ɩnaɣ se kɩyakʋ ɖiɣni ñɔtʋʋ yɔ.” (Ebr. 10:24, 25) Kazandʋ ndʋ Izrayɛɛlɩ mba kpeɣlaɣ nɛ pɔtɔkɩ pɩnaɣ taa nɛ kediɣzisi lɛɛsɩ nzɩ palakaɣ se pɛsɛɛ Yehowa yɔ, pɩkpazɩɣ-wɛ ɖoŋ fezuu taa. Pɩtasɩ lɛ, ɖʋtʋ ndʋ tɩɩkɛ taa leleŋ alɩwaatʋ ɛzɩ kizinzikiŋ kazandʋ yɔ. (Ejl 23:15, 16; Neh. 8:9-18) Sɔnɔ, ɖihikiɣ wazasɩ kʋɖʋmsɩ nzɩ kediɣzisi nɛ kigbeɣliŋ pa-taa. Ðiyele nɛ ɖʋtʋ ndʋ tɩwazɩ-ɖʋ camɩyɛ nɛ ɖɩka lila fezuu taa nɛ ɖihiɣ taa leleŋ.—Tit. 2:2.
Fezuu taa ñɩm
Ðɔkɩ ña-cɩŋgɩlɩm wɛtʋ!
3 Ɛzɩma Ɛsɔ sɛyaa wɩlɩɣ se pɔɖɔkʋʋ pa-cɩŋgɩlɩm wɛtʋ? Ye pɔsɔɔlɩ Yehowa nɛ pɔñɔʋnɩ-ɩ nɛ pa-laŋɩyɛ pilim yɔ, pawɩlɩɣ se pɔɖɔkɩ pa-cɩŋgɩlɩm wɛtʋ; nɛ mbʋ yekina nɛ paa ɛzɩmtaa lɛ palakɩ mbʋ pɩkɛdɩɣnɩ-ɩ yɔ. Iyele nɛ ɖɩna ɛzɩma palabɩnɩ tʋmɩyɛ tɔm pee “cɩŋgɩlɩm wɛtʋ” Bibl taa yɔ. Bibl taa Ebree tɔm piye nɖɩ pɛɖɛzaa se “cɩŋgɩlɩm wɛtʋ” yɔ, ɖɩ-tɔbʋʋ lɛ se pilim, yaa mbʋ pɩfɛyɩnɩ ɛjandʋ natʋyʋ yɔ. Ðɩkpaɣ kɩɖaʋ nakʋyʋ: Izrayɛɛlɩ mba kpakaɣ kpɩna nɛ palaɣ Yehowa; nɛ paɣtʋ kaayɔɔdaa se pɩwɛɛ se kpɩna ana ataawɛɛnɩ ɛjandʋ natʋyʋ. (Lev. 22:21, 22) Pɩtaamʋna se Ɛsɔ samaɣ ɛlaa kpɩnɛ nɖɩ pɩcamɩ ɖɩ-nɩŋgbaŋaɣ, ɖɩ-nɩŋgbaŋʋʋ yaa ɖɩ-ɛsɩyɛ yɔ; pɩtaamʋna ɖɔɖɔ se palaa kpɩnɛ nɖɩ pɩwɩɣ-ɖɩ yɔ. Yehowa ɛsɩndaa lɛ, pɩɩcɛyaa se kpɩnɛ nɖɩ ɖɩwɛɛ pilim yaa ɖɩtaawɛɛnɩ ɛjandʋ natʋyʋ. (Mal. 1:6-9) Ðɩpɩzɩɣ nɛ ɖɩnɩɩ mbʋ pʋyɔɔ Yehowa sɔɔlaa se nabʋyʋ ɛwɛɛ pilim yaa pɩtaawɛɛnɩ ɛjandʋ natʋyʋ yɔ pɩ-taa. Alɩwaatʋ ndʋ ɖɩñɩnɩɣ yabʋ nabʋyʋ, paa pɩtɩɩkɛ tɩʋ piye naɖɩyɛ, takayaɣ nakɛyɛ yaa tʋmɩyɛ wonuu nakʋyʋ yɔ, ɖɩtɩsɔɔlɩ se ɖɩya tɩʋ piye nɖɩ ɖɩtʋlɩ pɔʋ yɔ, nɛ ɖɩtɩsɔɔlɩ ɖɔɖɔ se ɖɩya takayaɣ yaa tʋmɩyɛ wonuu ŋgʋ kɩ-hɔɔlɩŋ nɩɩyɩ fɛyɩ yɔ. Ðɩsɔɔlɩ wondu ndʋ tɩwɛ pilim nɛ tɩfɛyɩnɩ ɛjandʋ natʋyʋ yɔ. Mbʋ ɖɔɖɔ, Yehowa ñɩnɩɣ se sɔɔlɩm mbʋ ɖɩsɔɔlɩnɩ-ɩ nɛ siɣsiɣ wɛtʋ ndʋ ɖɩwɛna yɔ, pɛwɛɛ pilim nɛ pataawɛɛnɩ ɛjandʋ natʋyʋ.
25-31 JANVIER
ÑƖM MBƲ PƖWƐ ƐSƆTƆM TAA YƆ | LEVITIKI 24-25
“Ahɛnɛɛ yaa Tɩ-yɔɔ wɛʋ pɩnaɣ nɛ cee wayɩ tɩ-yɔɔ wɛʋ”
it-2 137 §3
Pɛɛyɛ
Pɛɛyɛ tɛ Ɛsɔ. Yehowa kɛ pɛɛyɛ tɛ Ɛsɔ. Ɛlɩzɩ ɛ-ɛjaɖɛ Izrayɛɛlɩ yomiye taa Ejipiti. Eheyi-wɛ se ye pɔɖɔkɩ ɛ-paɣtʋ kpam yɔ, pakaɣ wɛʋ pɛɛyɛ taa nɛ nabʋyʋ ɛɛkaɣ-wɛ tɛɖʋʋ (Wp 15:4, 5) Daviid kaayɔɔdaa se ‘laŋhɛzɩyɛ kaɣ sʋʋ pa-ɖɩsɩ taa’ Yeruzalɛm. (Keɣa 121:6, 7) Paa mbʋ yɔ paɣtʋ kaayɔɔdaa se ye nɔɔyʋ ɛpɩsɩ kʋñɔndʋ yɔ, ɛpɩzɩɣ nɛ ɛpɛdɩ ɛ-tɩ nɛ ɛpɩsɩ yom nɛ ɛpɩzɩ ɛcɔnɩ ɛ-maɣmaɣ nɛ ɛ-hɔʋ taa mba yɔɔ. Ɛlɛ paɣtʋ yɔɔdaa ɖɔɖɔ se pɩnzɩ lʋbɛ wayɩ lɛ, ɛlɩɣ yomiye nɖɩ ɖɩ-taa nɛ ɛwɛɛ ɛ-tɩ yɔɔ. (Ejl 21:2) Ahɛnɛɛ pɩnaɣ taa (pɩnaɣ 50 ñɩŋga taa) ɛjaɖɛ kpeekpe taa ɛyaa hikiɣ pɛɛyɛ nɛ pɛwɛɛ laŋhɛzɩyɛ taa. Paa yom weyi lɛ, pahaɣ-ɩ waɖɛ nɛ ɛwɛɛ ɛ-tɩ yɔɔ nɛ paa weyi lɛ, ɛmʋ tɛtʋ ndʋ tɩɩkɛ ɛ-ñɩm yɔ.—Lev 25:10-19.
it-1 1107 §7
Ñɩm
Tɛtʋ kɛ hɔʋ kʋɖʋmʋʋ ñɩm kpaɣ pɩnzɩ nɛ piwolo pɩnzɩ, pʋyɔɔ lɛ pɩfɛyɩ se pɛpɛdɩ tɛtʋ se tɩpɩsɩ nɔɔyʋ ñɩm tam. Ye pacaɣ se pɛpɛdɩ tɛtʋ natʋyʋ yɔ, ahɛnɛɛ pɩnaɣ wayɩ tɔɔnaɣ kʋmtʋ pɩnzɩ nzɩ sɩkazaa yɔ, sɩ-nɔɔ taa pɩwɛɛ se pɛpɛdɩ tɛtʋ ndʋ, nɛ ahɛnɛɛ pɩnaɣ kɩfalaɣ talɩɣ lɛ, paa weyi ɛmʋʋ tɛtʋ ndʋ tɩɩkɛ ɛ-ñɩm yɔ. (Lev 25:13, 15, 23, 24) Paɣtʋ ndʋ, titukaɣni tɛtʋ ndʋ patɩcɔzɩ-tʋ kolonzi yɔ tɩ-taa ɖɩsɩ, pakpakɩɣ ɖɩsɩ nzɩ ɛzɩ hayɩm sɩkɛnaa yɔ. Ɛlɛ ye nɔɔyʋ ɛpɛdɩ ɖɩɣa nakɛyɛ, tɛtʋ ndʋ pɔcɔzɩ-tʋ koloŋa yɔ tɩ-taa yɔ, ɛwɛnɩ waɖɛ se ɛɖaɣnɩ-kɛ yabʋ pɩnaɣ ŋga ɛpɛdaa yɔ ka-taa, ɛlɛ ye pɩcɛzɩ mbʋ yɔ kapɩsɩɣ weyi ɛyabɩ-kɛ yɔ ɛ-ñɩm. Ðɩsɩ nzɩ sɩwɛ Leevi mba tɛtʋ taa yɔ, Leevi mba wɛnɩnɩ waɖɛ se payabɩ-tʋ paa ɛzɩmtaa.—Lev 25:29-34.
it-2 70 §1
Ahɛnɛɛ
Ahɛnɛɛ pɩnaɣ paɣtʋ ñam sɩɣaɣnɩ samaɣ se kataawɛɛ pʋtɔdɩyɛ wɛtʋ ndʋ tɩ-taa ajɛɛ sakɩyɛ wɛ sɔnɔ yɔ tɩ-taa. Ajɛɛ sakɩyɛ taa ɛyaa nabɛyɛ wɛnɩ ñɩm pɩdɩɩfɛyɩ ŋgʋ lalaa ñɛwɛ tanɩm taa siŋŋ. Paɣtʋ ndʋ tɩwazaɣ paa weyi nɛ tɩkpazɩɣ samaɣ kpeekpe ɖoŋ, mbʋ pʋyɔɔ yɔ tiyekaɣ se nɔɔyʋ ɛtaawɛɛ liidiye kʋñɔŋ taa nɛ ɛpɩsɩ pɩlabɩm yaa kaapɩzaɣ. Ɛlɛ tɩsɩɣaɣnɩ paa weyi se ɛlabɩnɩ e-ɖoŋ nɛ ɛ-lɛɣtʋ tʋmɩyɛ nɛ pɩwazɩ samaɣ kpeekpe. Yehowa wazaɣ Izrayɛɛlɩ samaɣ nɛ hayɩm taa tɔɔnasɩ lakɩ camɩyɛ, nɛ ɛfalɩsaɣ-kɛ ɖɔɖɔ. Pʋyɔɔ lɛ, alɩwaatʋ ndʋ kañaŋ ɛ-paɣtʋ yɔ, pɩhaɣaɣ-kɛ waɖɛ se komina ŋgʋ kɩtalɩ pilim yɔ kiɖiyi-kɛ; nɛ teokrasɩ ɖʋtʋ yeke kaɣnɩ yebu se komina ŋgʋ kɩkɔɔ.—Iza 33:22.
Fezuu taa ñɩm
w09 1/9 22 §4
Alɩwaatʋ ndʋ paɖʋʋ-ŋ ɖɩwɩzɩyɛ yɔ
Ye Izrayɛɛlɩ tʋ nɔɔyʋ ɛkʋyɩ e-koobu yɔɔ nɛ ɛyɔkɩ ɛlɛ ɛsɩyɛ yɔ, paɣtʋ pɔzʋʋ se palabɩ-ɩ mbʋ ɛlabɩ e-koobu yɔ. Ɛlɛ pɩtɩkɛ weyi pɔyɔkɩ ɛ-ɛsɩyɛ yɔ, ɛnʋ pɩwɛɛ se ɛkpa kɩmɩyɛ weyi ɛlabɩ-ɩ kɩdɛkɛdɩm yɔ yaa ɛ-hɔʋ taa tʋ nɔɔyʋ. Pɔyɔɔdɩ Paɣtʋ taa se pɩpɔzʋʋ se ewolo nɛ ɛna ñʋndɩnaa mba palɩzaa se pɔcɔnɩ tɔm ndʋ ti-ɖeɖe yɔ, pʋ-tɔbʋʋ se tɔm hʋyaa. Ɛzɩma paɖʋ paɣtʋ se ye nɔɔyʋ ɛɖʋ ɛ-taa nɛ ɛla e-koobu kɩdɛkɛdɩm yɔ, pɩpɔzʋʋ se palabɩ-ɩ mbʋ ɛlabɩ e-koobu yɔ, piyekaɣ se ɛyaa ɩkpa pa-tɩ nɛ pataalakɩ mbʋ pɩtɩpɔzɩ yɔ. Ɛlɛ lɩmaɣzɩyɛ naɖɩyɛ yɔɔ ɖɔɖɔ paɖʋ paɣtʋ ndʋ.
1-7 FÉVRIER
ÑƖM MBƲ PƖWƐ ƐSƆTƆM TAA YƆ | LEVITIKI 26–27
“Ɛbɛ pɩwɛɛ se ɖɩla nɛ ɖihiɣ Yehowa wazasɩ?”
w08 15/4 4 §8
Ðise “mbʋ pɩtɩkɛ pʋyʋ yɔ”
8 Ɛzɩma “tomnaɣ yɔɔ ñɩm” pɩzɩɣ nɛ pɩpɩsɩ ɛsɔ? Ðɩkpaɣ pɛɛ sɔsɔna wena aawɛ caanaʋ taa Izrayɛɛlɩ mba hayɩm taa yɔ a-kɩɖaʋ. Papɩzɩɣ nɛ pakpaɣ pɛɛ ana nɛ pamanɩ ɖɩsɩ yaa kolonzi. Ɛlɛ ye pakpaɣ pɩyɛ naɖɩyɛ ɛzɩ “kumoɖe” yaa “sɩʋ kpeliɣa” yɔ, ɖɩpɩsɩɣ pɩyɛ kutuuliye Yehowa samaɣ. (Lev. 26:1) Mbʋ ɖɔɖɔ pɩwɛɛ. Liidiye wazɩɣ. Ðɩsɩɣnɩ-ɖʋ se ɖɩcɔnɩ ɖa-kɩcɛyɩm ɖeɖe nɛ ɖɩwazɩɣ-ɖʋ ɖɔɖɔ Yehowa sɛtʋ taa. (Ekl 7:12; Luka 16:9) Ɛlɛ ye ɖɩsɩ liidiye kajalaɣ lone taa ɖe-wezuu caɣʋ taa nɛ pɩɖɩkɩ-ɖʋ nʋmɔʋ se ɖɩla ɖe-fezuu taa tʋma camɩyɛ yɔ, ɖɩpɩsɩɣ-ɖʋ ɛsɔ. (Kalɩ 1 Timootee 6:9, 10.) Ɛjaɖɛ ɖɩnɛ ɖɩ-taa liidiye ñɩnʋʋ tɔm cɛyɩ ɛyaa ɛsɩndaa pɩdɩɩfɛyɩ, pʋyɔɔ pɩwɛɛ se ɖɩñaɣ pana nɛ ɖɩwɛɛnɩ lɩmaɣza wena amʋnaa yɔ liidiye yɔɔ.—1 Ti 6:17-19.
it-2 753 §2
Sɔɔndʋ
Yehowa kaalɩzɩ Moyizi nɛ ɛɖʋ-ɩ tʋmɩyɛ nɖɩ ɖɩwɛ ŋgee yɔ, pʋyɔɔ lɛ Ɛsɔ samaɣ kaawɛnɩ ñamtʋ ndʋ tɩmʋnaa yɔ (Ebree, mohraʼʹ) Moyizi yɔɔ. (Wp 34:10, 12; Ejl 19:9) Mba paawɛnɩ tisuu yɔ, peseɣaɣ sɔɔndʋ Moyizi ɖoŋ weyi Ɛsɔ ha-ɩ yɔ ɩ-yɔɔ. Panawa se ɛ-yɔɔ Ɛsɔ tɩŋɩɣna nɛ ɛyɔɔdʋʋnɩ-wɛ. Izrayɛɛlɩ mba kaawɛnɩ sɔɔndʋ ndʋ ɖɔɖɔ Yehowa kooka kiɖeɖeɣa yɔɔ. (Lev 19:30; 26:2) Pʋ-tɔbʋʋ lɛ se powokaɣ kooka kiɖeɖeɣa taa nɛ ñamtʋ, pɛsɛɣ Yehowa ɛzɩ ɛsɔɔlʋʋ yɔ nɛ pañaŋ ɛ-paɣtʋ.
w91 1/3 17 §10
Iyele nɛ “Ɛsɔ tɛ laŋhɛzɩyɛ” ɖiyi mɩ-laŋa
10 Yehowa kaaheyi Izrayɛɛlɩ mba se: “Ye ɩɖɔŋ man-paɣtʋ yɔɔ nɛ ɩɖɔkʋʋ man-paɣtʋ yɔ, malakɩ nɛ tɛʋ nɩɩ mɩ-tɛ kɩ-wɛɛ taa, tɛtʋ lakɩ tɔɔnaɣ, nɛ hayɩm taa tɩŋ lʋlʋʋ i-pee sakɩyɛ kummm. Mankaɣ-mɩ kɔnʋʋ laŋhɛzɩyɛ mɩ-ɛjaɖɛ taa nɛ ɩkaɣ ɖou fɛɛɛ yem, nɔɔyʋ ɛɛñazɩɣ-mɩ. Mankaɣ ɖɔɔnʋʋ tɔɔyɩŋ. Paakaɣ you taŋ nɩʋ mɩ-kamasɩ yɔɔ. Mankaɣ ɖɔm mɩ-hɛkʋ taa nɛ mɛnkɛ mɩ-Ɛsɔ nɛ ɩkɛ man-samaɣ.” (Levitiki 26:3, 4, 6, 12) Izrayɛɛlɩ mba kaawɛ laŋhɛzɩyɛ taa mbʋ pʋyɔɔ yɔ Yehowa kaakandɩyɩ pɔ-yɔɔ se po-koyindinaa ɩtaalabɩ-wɛ kɩdɛkɛdɩm, pataatɛɖɩɣ pʋyʋ tomnaɣ yɔɔ nɛ taabalɩyɛ kɩbanɖɛ kaawɛ pa nɛ Yehowa pɛ-hɛkʋ taa. Ɛlɛ pɩsa nɛ pɛɛyɛ nɖɩ ɖɩwɛɛ tam lɛ, pɩɩwɛɛ se pɔñɔɔnɩ Yehowa paɣtʋ.—Keɣa 118:165.
Fezuu taa ñɩm
it-2 564
Kʋdɔmɩŋ
Pee kɩdɛkɛda wena Yehowa paɣtʋ lɔʋ lʋlʋʋ yɔ. Yehowa kaaheyi Izrayɛɛlɩ mba se ye pekizaa se paaɖɔŋ ɛgbɛyɛ nɖɩ ɛ nɛ wɛ paɖʋwa yɔ ɖɩ-paɣtʋ yɔɔ yɔ, ‘ɛkaɣ tiyinuu kʋdɔmɩŋ pɛ-hɛkʋ taa.’ (Lev 26:14-16, 23-25; Wp 28:15, 21, 22) Masɩ hɔɔlɩŋ sakɩyɛ wɩlɩɣ se tɔnʋʋ taa kpeetaɣ nɛ alaafɩya kɛ wazaɣ ŋga kalɩnɩ Ɛsɔ cɔlɔ yɔ (Wp 7:12, 15; Keɣa 102:1-3; Adu 3:1, 2, 7, 8; 4:21, 22; Natʋ 21:1-4), ɛlɛ kʋdɔmɩŋ ñalɩɣnɩ kɩwɛɛkɩm nɛ mantɩtalɩ pilim wɛtʋ cɔlɔ. (Ejl 15:26; Wp 28:58-61; Iza 53:4, 5; Mt 9:2-6, 12; Yoh 5:14) Pɩkɛ toovenim se nabʋyʋ taa Yehowa maɣmaɣ kaakɔnɩ kʋdɔmɩŋ nɩɩyɩ ɛyaa nabɛyɛ yɔɔ se ɛhɔmnɩ pa-nɩŋgbaŋʋʋ ɛzɩ ɛɛlabʋ Miriyam, Uziya nɛ Gehaazi yɔ (Kɩg 12:10; 4Aw 26:16-21; 2Aw 5:25-27), ɛlɛ ɖoŋ ɖoŋ lɛ, pɩwɛ ɛzɩ kɩwɛɛkɩm nɛ tomnaɣ yɔɔ ɛjandʋ cɔlɔ kʋdɔmɩŋ lɩɣna. Ɛyaa nabɛyɛ lɛ, mbʋ poɖu po-tomnaɣ taa yɔ mbʋ pakʋŋ. (Gal 6:7, 8) Apostoloo Pɔɔlɩ yɔɔdaɣ mba palakɩ kʋzʋʋ kɩdɛkɛdʋʋ yɔ pɔ-tɔm lɛ, ɛtɔm se: “Ɛsɔ yebi-wɛ nɛ azuluma, se pɩsa nɛ paɖʋ pa-maɣmaɣ po-tomnasɩ fɛyɛ. . . palakɩ mbʋ pɩkɛ ɛzaɣtʋ yɔ nɛ pa-maɣmaɣ pamʋʋ kɩhɛyʋʋ pilim, ŋgʋ kɩmʋnɩ pa-lakasɩ kɩdɛkɛdɩsɩ yɔ.” —Rom 1:24-27.
8-14 FÉVRIER
ÑƖM MBƲ PƖWƐ ƐSƆTƆM TAA YƆ | KƖGALƲƲ 1–2
“Yehowa ñɔɔzɩ ɛ-samaɣ”
w94 1/12 9 §4
Lone nɖɩ taa pɩmʋnaa se ɖɩsɩɩ Yehowa sɛtʋ ɖe-wezuu caɣʋ taa?
4 Ye ŋŋwɛ ɖooo poliŋ taa ɛzɩ sumaɣ yɔ nɛ ŋwɛɛ nɛ ŋcɔŋnɩ Izrayɛɛlɩ mba maalika taa, ɛbɛ ŋŋnawa? Pɩtʋʋ fɛyɩ se ŋŋna kizinzikiŋ weyi pesiɣ-i camɩyɛ se pɩsa nɛ paa hɔʋ ŋgʋ lɛ kɩwɛɛ ki-lone taa yɔ; Izrayɛɛlɩ mba kaakpɛndɩ ɛyaa miiliyɔɔwaa naadozo mbʋ yɔ nɛ paañɔɔzɩ-wɛ camɩyɛ nɛ paakpeɣli-wɛ tindimiye ndɩ ndɩ taa. Paa tindimiye nɖɩ ɖɩ-taa lɛ, cejewe naadozo kaawɛna. Nabɛyɛ kaawɛ hayo kiŋ, lalaa ñɛwɛɛ hadɛ kiŋ, lalaa ñɛwɛɛ wɩsɩ ɖɩlɩyɛ taa nɛ lalaa wɩsɩ ɖɩɖʋyɛ taa. Ye ŋñɔtɩnɩ maalika yɔ, ŋnaɣ se samaɣ nakɛyɛ ñɛwɛ maalika hɛkʋ taa. Samaɣ ŋga lɛ Leevi mba, papa ñesiɣ pe-kizinzikiŋ maalika hɛkʋ taa. Maalika hɛkʋ taa ɖeyi ɖeyi lɛ, ŋnaɣ ŋgee wonuu nakʋyʋ ŋgʋ pohuuzi kɩ-yɔɔ pɩsaʋ yɔ. Wonuu ŋgʋ lɛ “kediɣzaɣ kizinziku” yaa Ɛsɔ sɛtʋ kɩɖanɖʋʋ. Yehowa kaasɩnɩnɩ Izrayɛɛlɩ ñɩma mba ‘pasɩm tʋmɩyɛ labɩnʋʋ pe-nesi camɩyɛ yɔ’ nɛ pala wonuu ŋgʋ.—Kɩgalʋʋ 1:52, 53; 2:3, 10, 17, 18, 25; Ejipiti Lɩʋ 35:10.
it-1 385
Maalika
Izrayɛɛlɩ mba maalika kaapaɣlaa pɩdɩɩfɛyɩ. Paalabɩ kɩgalʋʋ nakʋyʋ lɛ, pana se abalaa mba papɩzɩɣ nɛ pala you yɔ, pɛcɛzɩ 603 550, nɛ pataakpɛndɩnɩ halaa, piya, akpadɩyaa nɛ ajamaa, Leevi mba 22 000 nɛ agɔma “kazɩɣa sɔsɔɔ nakɛyɛ, kɛfɛyɩ kalʋʋ.” Pɩtɩla pa-tɩŋa paakpɛndɩ 3 000 000 yaa pɩɩcɛzɩ mbʋ. (Ejl 12:38, 44; Kɩg 3:21-34, 39) Pɩtʋʋ fɛyɩ se paaɖɔwa nɛ pʋyɔɔ lɛ, pɩɩpɔzaa se maalika ŋga kapaɣlɩ siŋŋ. Alɩwaatʋ ndʋ maalika ŋga kɔkɔm nɛ kɛwɛɛ Yeriikoo, Mowaabʋ kɛdɛɛnzɩ taa yɔ, pɔyɔɔdaa se kaapaɣlɩ siŋŋ kpaɣnɩ “Bɛtɩ-Yesimotɩ nɛ piwolo pɩtalɩ Abɛl-Sitiim.”—Kɩg 33:49.
Fezuu taa ñɩm
it-1 767
Kɩgalʋʋ
Ðoŋ ɖoŋ lɛ, palakɩ kɩgalʋʋ pɩlɩɩnɩ hɩɖɛ nɖɩ ɛyʋ wɛna yɔ, liɖe nɖɩ ɖɩ-taa ɛlɩnaa yɔ, cejewiye nɖɩ ɖɩ-taa ɛlɩnaa yɔ nɛ hɔʋ ŋgʋ kɩ-taa ɛlɩnaa yɔ pɩ-yɔɔ. Ɛlɛ nabʋyʋ taa paalakɩ kɩgalʋʋ se patɩlɩ ɛyaa ñʋʋ yem. Izrayɛɛlɩ mba alɩwaatʋ taa paalabɩ kɩgalʋʋ kaɖʋsɩ ndɩ ndɩ yɔɔ. Palabɩ kɩgalʋʋ lambuu hɛyʋʋ yɔɔ, yaa se patɩlɩ ɛyaa mba papɩzɩɣ nɛ pala sɔɔjatʋ tʋmɩyɛ yɔ yaa patɩlɩ mba papɩzɩɣ nɛ paɖʋ-wɛ tʋmɩyɛ kediɣzaɣ kizinziku tɛɛ yɔ (ɛzɩ Leevi mba hɔɔlʋʋ taa mbʋ yɔ).
15-21 FÉVRIER
ÑƖM MBƲ PƖWƐ ƐSƆTƆM TAA YƆ | KƖGALƲƲ 3-4
“Tʋmɩyɛ nɖɩ Leevi mba lakaɣ yɔ”
it-2 655 §5
Cɔjɔ
Paɣtʋ ɛgbɛyɛ tɛɛ. Alɩwaatʋ ndʋ Yehowa tɩŋnɩ kɩjɩkpʋʋ hiu ñɩŋgʋ yɔɔ nɛ ɛkʋ Ejipiti mba kajalaɣ piya yɔ, ɛɛlɩzɩ Izrayɛɛlɩ mba kajalaɣ piya se sɩkɛnɩ ɛ-ñɩnzɩ. (Ejl 12:29; Kɩg 3:13) Kajalaɣ piya nzɩ sɩkɛ Yehowa pʋyʋ nɛ pɩwɛɛ se sɩlabɩ-ɩ ŋgee tʋmɩyɛ naɖɩyɛ. Ɛsɔ pɩzaɣ se ɛkpaɣ kajalaɣ Izrayɛɛlɩ piya nzɩ sɩ-tɩŋa nɛ sɩkɛ cɔjɔnaa nɛ mba pɔcɔŋnɩ kediɣzaɣ kizinziku yɔɔ yɔ. Ɛlɛ ɛkpaɣ Leevi mba cejewiye taa abalaa se pala tʋmɩyɛ nɖɩ. Pʋyɔɔ ɛha nʋmɔʋ se Leevi cejewiye taa abalaa ɩlɛɣzɩ cejewe 12, lɛɛna taa kajalaɣ piya lone taa (pakpaɣ Yosɛɛfʋ pɩyalaa Efrayim nɛ Manaasee liɖe taa mba ɛzɩ cejewe naalɛ yɔ). Palabɩ akɔnta nakʋyʋ lɛ, pana se kajalaɣ abalɩbiya nzɩ sɩtɩkɛ Leevi mba yɔ, sɩcɛzɩ Leevi mba nɛ ɛyaa 273. Yehowa pɔzaa se abalɩbiya 273 nzɩ, pɛhɛyɩ sɩ-taa paa ŋga lɛ, kɔ-yɔɔ siklinaa 5 ($11). Pɛhɛyɩ liidiye nɖɩ Aarɔɔnɩ nɛ ɛ-pɩyalaa. (Kɩg 3:11-16, 40-51) Ɛlɛ pʋcɔ nɛ pɩlakɩ mbʋ lɛ, Yehowa kaatɛm lɩzʋʋ Leevi cejewiye taa, Aarɔɔnɩ hɔʋ taa mba pɛkɛ abalaa yɔ se, pɛkɛ cɔjɔnaa Izrayɛɛlɩ ɛjaɖɛ taa.—Kɩg 1:1; 3:6-10.
it-2 133 §1
Leevi mba
Tʋma. Leevi mba lɩnɩ hɔŋ naadozo ɛnɛ ɩ-taa: Gɛrɩsɔɔnɩ, Kehaatɩ nɛ Merarii. (Kiɖe 46:11; 3Aw 6:1, 16) Alɩwaatʋ ndʋ Izrayɛɛlɩ mba kaawɛ kañɩmbusuu taa yɔ, hɔŋ ɛnɩ i-kizinzikiŋ kaañɔtɩnɩ Ɛsɔ sɛtʋ kɩɖanɖʋʋ. Kehaatɩ mba, mba palɩnɩ Aarɔɔnɩ hɔʋ taa yɔ, pesiɣ pe-kizinzikiŋ Ɛsɔ sɛtʋ kɩɖanɖʋʋ ɛsɩndaa nɛ wɩsɩ ɖɩlɩyɛ taa kiŋ. Kehaatɩ mba lalaa ñesiɣ pe-kizinzikiŋ Ɛsɔ sɛtʋ kɩɖanɖʋʋ haɖɛ kiŋ hɔɔlʋʋ taa. Gɛrɩsɔɔnɩ mba wɛ wɩsɩ ɖɩɖʋyɛ hɔɔlʋʋ taa nɛ Merarii mba ñɛwɛɛ hayo kiŋ. (Kɩg 3:23, 29, 35, 38) Tʋmɩyɛ nɖɩ Leevi mba lakaɣ yɔ, nɖɩ lɛ se pesiki Ɛsɔ sɛtʋ kɩɖanɖʋʋ, pɛkpɛzɩɣ-kʋ, pasɩɣlɩɣ ki-wondu nɛ paɖaɣnɩɣ-kʋ siɣu. Alɩwaatʋ talɩɣ se pɛlɛɣzɩ lone lɛ, Aarɔɔnɩ nɛ ɛ-pɩyalaa pakpakɩɣ pɩsaʋ ŋgʋ kɩtayɩɣ Lone Kiɖeɖee nɛ Lone Kiɖeɖee Sɔsɔyɛ taa yɔ nɛ pohuuzi ɛgbɛyɛ ɖʋʋ aɖakaɣ, altaaru nɛ wondu kiɖeɖetu lɛɛtʋ yɔɔ. Nɛ pʋwayɩ lɛ, Kehaatɩ mba kpaɣ wondu ndʋ. Gɛrɩsɔɔnɩ mba kpakɩɣ Ɛsɔ sɛtʋ kɩɖanɖʋʋ yɔɔ kuhuuzuu, kediɣzaɣ kizinziku nɔnɔɔ yɔɔ pɩsaʋ kikenduu, pɩsaŋ weyi popuzaa nɛ pɔcɔzɩnɩ kadaɣ yɔ, nɛ nimee (pɩtʋʋ fɛyɩ se pɩkɛ Ɛsɔ sɛtʋ kɩɖanɖʋʋ yɔɔ nimee), Merarii pɩyalaa cɔŋnɩnɩ Ɛsɔ sɛtʋ kɩɖanɖʋʋ ɖaŋ, ki-tilima nɛ ki-nimee, (kadaɣ kaŋgamasɩ nimee) ɖeɖe.—Kɩg 1:50, 51; 3:25, 26, 30, 31, 36, 37; 4:4-33; 7:5-9.
it-2 133 §3
Leevi mba
Moyizi alɩwaatʋ taa lɛ, Leevi tʋ talɩɣ pɩnzɩ 30 lɛ, ɛpaɣzɩɣ labʋ tʋma wena paɖʋ Leevi mba yɔ, a-tɩŋa. A-taa naayɛ lɛ, Ɛsɔ sɛtʋ kɩɖanɖʋʋ siɣu, kɩ-kpɛzʋʋ nɛ ki-wondu sɩɣlʋʋ. (Kɩg 4:46-49) Ɛlɛ tʋma naayɛ wɛɛ lɛ, Leevi mba paɣzɩɣ a-labʋ alɩwaatʋ ndʋ pɛwɛɣnɩ pɩnzɩ 25 yɔ, ɛlɛ pɩtɩkɛ tʋma ɖoŋ ñɩna ɛzɩ Ɛsɔ sɛtʋ kɩɖanɖʋʋ wondu sɩɣlʋʋ mbʋ yɔ. (Kɩg 8:24) Ɛlɛ wiyaʋ Daviid alɩwaatʋ taa lɛ, papasɩ pɩnzɩ nzɩ nɛ pɩpɩsɩ pɩnzɩ 20. Daviid yɔɔdɩ lɩmaɣza wena a-yɔɔ papasɩ pɩnzɩ nzɩ yɔ a-tɔm nɛ ɛtɔ se, pɩtaatasɩ pɔzʋʋ se pɛkpɛzɩ Ɛsɔ sɛtʋ kɩɖanɖʋʋ mbʋ pʋyɔɔ yɔ, pɛlɛɣzɩ-kʋ nɛ templo. Leevi tʋ talɩɣ pɩnzɩ 50 lɛ, ɛɛtasɩɣ labʋ tʋma wena paɖʋʋ Leevi mba yɔ. (Kɩg 8:25, 26; 3Aw 23:24-26; kalɩ ÂGE.) Pɩɩpɔzaa se Leevi mba ɩtɩlɩ Paɣtʋ camɩyɛ mbʋ pʋyɔɔ yɔ, pɩɩwɛɛ se pakalɩɣ-tʋ samaɣ ɛsɩndaa nɛ pawɩlɩɣ-tʋ lalaa.—3Aw 15:27; 4Aw 5:12; 17:7-9; Neh 8:7-9.
Fezuu taa ñɩm
w06 1/8 23 §13
Wɛɛ lɛɣtʋ—Se Ɛsɔ sɔɔndʋ!
13 Daviid na ɛzɩma Yehowa sɩnɩ-ɩ kaɖɛ alɩwaatʋ taa yɔ lɛ, pɩcɛyɩsɩ e-tisuu siŋŋ nɛ ɛwɛɛnɩ Ɛsɔ sɔɔndʋ seu pɩkɩlɩ. (Keɣa 30:23-25) Ɛlɛ Daviid taataa Ɛsɔ liu alɩwaatʋ naadozo natʋyʋ taa nɛ pɩɩkɔnɩ kaɖɛ siŋŋ. Kajalaɣ lɛ, ɛlabɩ ɖʋtʋ se pakpaɣ Yehowa ɛgbɛyɛ ɖʋʋ aɖakaɣ kɛɛkɛɛ yɔɔ nɛ powoni Yeruzalɛm, ŋgʋ Ɛsɔ Paɣtʋ tɔm se Leevi mba pɩwɛɛ se pakpaɣ-kɛ pa-hazasɩ yɔɔ. Uza kɔm nɛ esezi nesi se etukuuni aɖakaɣ lɛ, elesi e-wezuu mbʋ pʋyɔɔ yɔ “ɛkataa nɛ etukuni” aɖakaɣ. Toovenim, Uza labɩ kɩwɛɛkɩm sɔsɔm, ɛlɛ ɛzɩma Daviid taaɖɔ Ɛsɔ Paɣtʋ yɔɔ yɔ, mbʋ yebina nɛ kaɖɛ nɖɩ ɖɩkɔɔ pɔ-yɔɔ. Ɛsɔ sɔɔndʋ seu tɔbʋʋ lɛ se ɖɩla mbʋ mbʋ ɛpɔzʋʋ-ɖʋ yɔ, nɛ ɖɩɖʋ nesi ɖʋtʋ ndʋ ɛlaba yɔ.—2 Samɩyɛɛlɩ 6:2-9; Kɩgalʋʋ 4:15; 7:9.
22-28 FÉVRIER
ÑƖM MBƲ PƖWƐ ƐSƆTƆM TAA YƆ | KƖGALƲƲ 5-6
“Ɛzɩma ŋpɩzɩɣ nɛ ŋmaɣzɩnɩ Naziireya mba?”
it-2 381
Naziireya tʋ
Pɩɩwɛɛ se mba poɖuwaa se pɛkɛɣ naziireya mba yɔ, pɔɖɔ paɣtʋ naadozo tʋnɛ tɩ-yɔɔ: (1) Pɩwɛɛ se pɔsɔ sʋlʋm mbʋ payɩ pɩkʋʋ ɛyʋ yɔ. Pɩtɩpɔzɩ se pɔñɔɔ sʋlʋm ñɩmɩŋ ñɩmbʋ mbʋ pɩkʋʋ ɛyʋ yɔ. Pɩtɩpɔzɩ se pɔtɔɔ mbʋ payɩ pakpaɣ viiñi pee nɛ palabɩna yɔ, nɛ viiñi pee lɛŋ ñɩna yaa kɩwɩlɛɛ. (2) Pɩtɩpɔzɩ se pahʋ pa-ñʋʋ taa ñɔsɩ. (3) Pɩtɩpɔzɩ se potukuni sɩɖʋ tomnaɣ, paa pɩtɩɩkɛ pɔ-hɔʋ taa tʋ nɔɔyʋ ɛzɩ pa-caa, po-ɖoo, pɔ-kɔɔ yaa pe-neu mbʋ yɔ.—Kɩg 6:1-7.
Ŋgee ɖuutu. Nɔɔyʋ ɛlabɩ ŋgee ɖuutu tʋnɛ yɔ, ‘ɛpɩsɩɣ kiɖeɖeu nɛ ɛha ɛ-tɩ Ɛsɔ,’ ɛlɛ ɛɛlakɩ mbʋ se ɛyaa ɩsamɩ-ɩ yaa paɖʋ-ɩ hɩɖɛ. Ɛlɛ “kɩyakɩŋ weyi ɩ-taa palɩzɩ-ɩ kɩjaʋ yɔ, ɛkɛ kiɖeɖeu Kɩbaɣlʋ ɛsɩndaa.”—Kɩg 6:2, 8; kpaɣ-tʋ nɛ ŋmaɣzɩnɩ Kiɖe 49:26.
Paɣtʋ ndʋ pɩɩwɛɛ se Naziireya mba ɩña yɔ, tɩwɛnɩ tɔbʋʋ nɩʋ Yehowa sɛtʋ taa. Ɛzɩ Naziireya tʋ yɔ, cɔjɔ sɔsɔ tʋmɩyɛ kiɖeɖee yɔɔ lɛ, pɩfɛyɩ se etukuni sɩɖʋ tomnaɣ paa pɩtɩɩkɛ ɛ-hɔʋ taa tʋ nɔɔyʋ yɔ. Cɔjɔ sɔsɔ nɛ mba paɖʋʋ-ɩ nesi yɔ, palakɩ tʋma wena awɛ ŋgee yɔ, nɛ pʋyɔɔ lɛ pɛfɛyɩnɩ waɖɛ se pɔñɔɔ vɛɛ yaa sʋlʋm ɖoŋ ñɩmbʋ nabʋyʋ alɩwaatʋ ndʋ palakɩ kele kele tʋmɩyɛ naɖɩyɛ Yehowa ɛsɩndaa yɔ.—Lev 10:8-11; 21:10, 11.
Pɩtasɩ lɛ, pɩwɛɛ se Naziireya tʋ (Ebree taa, nazirʹ) ‘eyele ɛ-ñɔsɩ ñɔ yem, wɛɛ wena a-taa pakpa-ɩ kiɖeɖeu yɔ’ nɛ pɩkɛ yʋsaɣ ŋga kawɩlɩɣ se ɛkɛ Naziireya tʋ yɔ. (Kɩg 6:5) Palakaɣnɩ ɖɔɖɔ Ebree tɔm piye nazirʹ tʋmɩyɛ nɛ pɔyɔɔdʋʋ viiñi ŋgʋ ‘patɩkpalɩ’ yɔ kɩ-tɔm, Sabaatɩ kiɖeɖeu nɛ ahɛnɛɛ pɩnzɩ alɩwaatʋ taa. (Lev 25:5, 11) Mbʋ pɩwɛ ɖeu ɖɔɖɔ lɛ se, sika wonuu ŋgʋ kɩwɛ tayɩ cɔjɔ sɔsɔ kiɖe taa, nɛ pama kɩ-yɔɔ se “Yehowa tɩnɩ kiɖeɖetu” yɔ, payaɣ-kʋ se “tɩ haʋ yʋsaɣ kiɖeɖeɣa [Ebree taa, nezer, nɔɔ kʋɖʋmaɣ wɛ tɔm piye nɖɩ nɛ tɔm piye nazirʹ pɛ-hɛkʋ taa].” (Ejl 39:30, 31) Awiya hulaɣ ŋga Izrayɛɛlɩ awiya paŋaɣ yɔ, payaɣaɣ-kɛ ɖɔɖɔ se nezer. (2Sam 1:10; 2Aw 11:12; kalɩ CONSÉCRATION; COURONNE.) Apostoloo Pɔɔlɩ yɔɔdaa se pɩha halʋ ñɔsɩ kɩɖaɣlɩsɩ se pihuuzi ɛ-ñʋʋ yɔɔ. Pɩkɛ-ɩ yʋsaɣ ŋga kɔtɔzʋʋ-ɩ se ɛwɛnɩ waɖɛ nɖɩ ɖɩwɛ ndɩ nɛ abalʋ ñɩnɖɛ yɔ, nɛ pɩwɛɛ se eluzi ɛ-tɩ ɖʋtʋ ndʋ Ɛsɔ laba yɔ tɩ-tɛɛ. Ye mbʋ, paɣtʋ ndʋ tɩtɔŋ se pataahʋ ñɔsɩ (pɩtɩmʋna se abalaa ɩsɩɩ pɔ-ñɔsɩ), pataañɔɔ sʋlʋm nɛ pɛwɛɛ kele kele yɔ, pɩtɔzʋʋ mba palabɩ ɖuutu se pɛkɛɣ Naziireya mba yɔ se paha pa-tɩ Yehowa nɛ pɩcɛyaa se pekizi pa-maɣmaɣ pɔ-sɔɔlɩm labʋ, nɛ poluzi pa-tɩ Yehowa tɛɛ nɛ pala ɛ-sɔɔlɩm.—1Kɔ 11:2-16; kalɩ CHEVEUX, POILS; COUVRIR LA TÊTE (SE); NATURE.
Fezuu taa ñɩm
w05 15/1 30 §2
Tɔm ndʋ ɖa-takayɩsɩ kalɩyaa pɔzʋʋ yɔ
Samsɔɔ kaakɛ Naziireya tʋ, ɛlɛ pɩɩwɛ ndɩ. Pʋcɔ nɛ palʋlʋʋ Samsɔɔ lɛ, Yehowa tiyiyu heyi e-ɖoo se: “Mbʋ pʋyɔɔ yɔ ŋkaɣ haɣʋ hoɣa nɛ ŋlʋlɩ pɩɣa evelaɣ nakɛyɛ. Paakaɣ kɔ-ñɔsɩ hʋm, mbʋ yɔ kakaɣ kɛʋ Ɛsɔ pʋyʋ, patɩɩhakɩ kɔ-hoɣa lɛ; ŋga kakaɣnɩ kʋyʋʋ se kalɩzɩ Izrayɛɛlɩ Filistii mba nesi tɛɛ.” (Tɔm Hʋyaa 13:5) Samsɔɔ tɩla ɖuutu se ɛkɛɣ Naziireya tʋ. Ɛsɔ maɣmaɣ lɩzɩnɩ-ɩ se ɛkɛ Naziireya tʋ, nɛ ɛkɛɣ Naziireya tʋ e-wezuu caɣʋ kpeekpe. Paɣtʋ ndʋ paɖʋwa se pataatukini sɩɖʋ tomnaɣ yɔ, titaatukuuni-i. Ye pɩtɩkɛ mbʋ yɔ, ye pɩlaba se etukuni sɩɖʋ tomnaɣ yɔ, ɛzɩma ɛlakɩ nɛ ɛtasɩ paɣzʋʋ caɣʋ wezuu ɛzɩ Naziireya tʋ yɔ, ɛnʋ weyi ɛkɛ Naziireya tʋ kpaɣnɩ alɩwaatʋ ndʋ palʋlɩ-ɩ yɔ? Pɩtʋʋ fɛyɩ se weyi palʋlɩ-ɩ nɛ ɛkɛ Naziireya tʋ kpaagbaa yɔ, mbʋ pɩpɔzʋʋ se ɛla yɔ, pɩwɛ ndɩ nɛ mbʋ pɩpɔzʋʋ se weyi ɛ-maɣmaɣ ɛlabɩ ɖuutu se ɛkɛɣ Naziireya tʋ yɔ.