Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
1-7 NOVEMBRE
ÑƖM MBƲ PƖWƐ ƐSƆTƆM TAA YƆ | YOZUWEE 18-19
“Ɛzɩma Yehowa tayɩ ɛjaɖɛ nɛ lɛɣtʋ yɔ”
it 1 933 § 5
Kamasɩ
Pɩtʋʋ fɛyɩ se pʋcɔ nɛ patayɩ tɛtʋ cejewe lɛ, pɔlɔ piye nɛ pamaɣzɩ ɖɔɖɔ paa cejewiye nɖɩ lɛ, ɖɩ-paɣlɩka yɔɔ. Pɩtɩla, piye lɔʋ yekaɣ se patɩlɩ tɛtʋ ndʋ papɩzɩɣ nɛ paha cejewiye naɖɩyɛ yɔ, nɛ hɔɔlʋʋ ŋgʋ kɩkɛɣnɩ cejewiye nɖɩ ɖɩ-ñɩm yɔ. Pɩpɩzɩɣ pɩkɛ hayo kiŋ, hadɛ kiŋ, wɩsɩ ɖɩlɩyɛ yaa wɩsɩ ɖɩɖʋyɛ hɔɔlʋʋ taa. Pɩpɩzɩɣ ɖɔɖɔ nɛ pɩkɛ kɛdɛɛŋa taa yaa pʋʋ yɔɔ. Pɔlɔʋ piye nɛ pɩtɛ lɛ, lɩmaɣzɩyɛ nɖɩ pakpakɩɣ yɔ, ɖɩkɛ Yehowa lɩmaɣzɩyɛ, nɛ piyekaɣ se cejewe ɩtaasʋsɩ ɖama nɛ ataayooni ɖama ɖɔɖɔ. (Adu 16:33) Ɛsɔ tɩŋaɣnɩ pɩ-yɔɔ nɛ eɖiyiɣ-wɛ se pɩsa nɛ paa cejewiye nɖɩ lɛ, ɖɩ-wɛtʋ ɛla nɔɔ kʋɖʋmaɣ nɛ natʋ tɔm ndʋ Yakɔɔb kaayɔɔdɩ alɩwaatʋ ndʋ ɛsɩkaɣ yɔ. Natʋ tɔm ndʋ tɩwɛ Kiɖe 49:1-33 taa.
it-1 1107 § 6
Lone nɖɩ pɛcɛlɩ paa cejewiye nɖɩ yɔ
Tɛtʋ ndʋ pɛcɛlɩ cejewe yɔ. Yehowa tayɩnɩ tɛtʋ Izrayɛɛlɩ mba nɛ ɛnʋ wɩlɩnɩ Moyizi tɛtʋ kamasɩ. (Kɩg 34:1-12; Yoz 1:4) Moyizi cɛlɩnɩ Gaadɩ pɩyalaa, Rubɛɛnɩ pɩyalaa nɛ Manaasee cejewiye hɔɔlʋʋ taa mba pɛ-tɛtʋ. (Kɩg 32:33; Yoz 14:3) Mba pɛɖɛ nɔɔ nɛ pɔtɔ piye nɛ patayɩ tɛtʋ cejewe lɛɛna yɔ mba lɛ Yozuwee nɛ Eleyaazaarɩ. (Yoz 14:1, 2) Ɛzɩ Yakɔɔb kaayɔɔdʋʋ natʋ tɔm ndʋ tɩwɛ Kiɖe Tɛɛ Tɔm 49:5, 7 yɔ tɩ-taa yɔ, patɩha Siimeyɔɔ nɛ Leevi, tɛtʋ natʋyʋ nɛ hɔɔlʋʋ. Paha Siimeyɔɔ tɛtʋ (pɩkpɛndɩnɩ yomaa tɛtʋ) Yuuda tɛtʋ hɛkʋ taa. (Yoz 19:1-9) Leevi lɛ, paha-ɩ tɛtʋ ndɩ ndɩ 48 ndʋ tɩmɩzɩ Izrayɛɛlɩ kpeekpe taa yɔ. Yehowa kaakɛnɩnɩ Leevi piya ñɩm mbʋ pʋyɔɔ yɔ, paalɩzɩ-sɩ se sɩla ŋgee tʋmɩyɛ naɖɩyɛ kediɣzaɣ kizinziku tɛɛ. Sɩmʋwaɣ hɔɔlʋʋ 10 ñɩŋgʋ, tʋmɩyɛ nɖɩ sɩlakɩ yɔ ɖi-lone taa. (Kɩg 18:20, 21; 35:6, 7) Paa hɔʋ ŋgʋ lɛ, paha-kʋ ki-cejewiye tɛtʋ hɔɔlʋʋ nakʋyʋ. Hɔŋ paɣlɩɣ nɛ pɩpɔzɩ se cajanaa ɩtayɩ pa-ñɩm piya lɛ, paɖaɣnɩɣ tayʋʋ hɔŋ tɛtʋ pazɩ pazɩ nɛ paha piya.
it-1 933 § 6
Kamasɩ
Pɔlɔʋ piye nɛ patɩlɩ lone nɖɩ pahaɣ cejewiye naɖɩyɛ yɔ nɛ pɩtɛ lɛ, patɩŋnɩ cejewiye nɖɩ ɖɩ-paɣlɩka yɔɔ nɛ patɩlɩ tɛtʋ ndʋ ɖeyi ɖeyi pɩwɛɛ se paha-ɖɩ yɔ. “Ɩkatayɩ-tʋ mi-cejewe hɛkʋ taa. Nɖɩ ɖɩɖɔwa yɔ, ɩha-ɖɩ pɩwalɩ, nɖɩ ɖɩwɛ ññɩɩ yɔ ɩha-ɖɩ ññɩɩ; pɛpɛlɩ kemaɣ lɛ, pɛcɛlɩ paa weyi lɛ e-ɖeɖe; paatayɩ tɛtʋ cejewiye-cejewiye nɛ waʋ-waʋ.” (Kɩg 33:54) Ye mbʋ, ɛzɩ piye lɔʋ wɩlʋʋ yɔ, paalɛɣzɩɣ lone nɖɩ ɖɩ-taa pɩwɛɛ se pasɩɩ cejewiye naɖɩyɛ yɔ; ɛlɛ papɩzɩɣ nɛ papasɩ yaa pɔsɔzɩ cejewiye nɖɩ tɛtʋ pɩlɩɩnɩ ɖɩ-paɣlɩka cɔlɔ. Kɩɖaʋ nakʋyʋ yɔ: Pɔkɔm nɛ peɖiɣzina se tɛtʋ ndʋ paha Yuuda cejewiye yɔ tɩkɩlɩ ɖɔʋ lɛ, papasɩ tɩ-yɔɔ nɛ pɛcɛlɩ tɩ-hɔɔlʋʋ nakʋyʋ Siimeyɔɔ cejewiye.—Yoz 19:9.
Fezuu taa ñɩm
it 1 933 § 6
Kamasɩ
Kɛdaɣ ŋga ka-taa pɔyɔɔdɩ Yɔɔrdaŋ wɩsɩ ɖɩɖʋyɛ taa tɛtʋ tayʋʋ tɔm yɔ ka-taa, Yuuda (Yoz 15:1-63), Yosɛɛfʋ (Efrayim), (Yoz 16:1-10) nɛ Manaasee cejewiye hɔɔlʋʋ ŋgʋ kɩɩwɛ Yɔɔrdaŋ wɩsɩ ɖɩɖʋyɛ taa yɔ, mba pacalɩ haʋ tɛtʋ nɛ pawɩlɩ-wɛ pɛ-tɛtʋ ndʋ tɩ-kamasɩ. (Yoz 17:1-13) Pʋwayɩ pasɩnzɩ tɛtʋ tayʋʋ tʋmɩyɛ, mbʋ pʋyɔɔ yɔ, Izrayɛɛlɩ mba kʋyɩ Gilgaalɩ nɛ powolo Siiloo. (Yoz 14:6; 18:1) Patɩyɔɔdɩ alɩwaatʋ ɛzɩma pasɩnzɩ tʋmɩyɛ nɖɩ yɔ tɩ-tɔm, ɛlɛ Yozuwee kɔm nɛ ɛkalɩ cejewe lʋbɛ wena akazaa yɔ, mbʋ pʋyɔɔ yɔ, aakɩlɩ nikaɣ nɛ ataalakɩ lɛɛ lɛɛ se amʋ a-tɛtʋ. (Yoz 18:2, 3) Pɔyɔɔdɩ lɩmaɣza ndɩ ndɩ tɔm se a-yɔɔ cejewe lʋbɛ ana awɛɛ nikaɣ mbʋ. Tɔm taa tazɩyaa nabɛyɛ maɣzɩɣ se pɩtɩla cejewe ana amaɣzaɣ se pɩtɩcɛyɩ se akʋyɩ kpɛdɛyɛ nɛ amʋ tɛtʋ ndʋ tɩkazaa yɔ, mbʋ pʋyɔɔ yɔ, alɩwaatʋ ndʋ pamʋ Kanaŋ tɛtʋ yɔ, pehiɣ ñɩm sakɩyɛ nɛ pɩtasɩ lɛ, Kanaŋ mba taapɩzɩɣ se pakʋyɩ pɔ-yɔɔ. Cejewe ana ataakʋyɩ kpɛdɛyɛ se alʋbɩnɩ tɛtʋ cikpetu ndʋ tɩɩwɛɛ nɛ tɩkaɖɩɣnɩ-yɛ yɔ. (Yoz 13:1-7) Pɩtasɩ lɛ, pɩtɩla ataatɩlɩ Lidaʋ Tɛtʋ hɔɔlʋʋ ŋgʋ camɩyɛ ɛzɩ tɛtʋ ndʋ paatɛm tayʋʋ yɔ.
8-14 NOVEMBRE
ÑƖM MBƲ PƖWƐ ƐSƆTƆM TAA YƆ | YOZUWEE 20-22
“Lɔŋ weyi ɖɩkpɛlɩkɩ ɖama kɩɩnɩnʋʋ tɔm natʋyʋ taa yɔ”
w06 15/4 5 § 3
Ɛzɩma ña nɛ ñɛ-tɛŋga ɩpɩzɩɣ nɛ ɩyɔɔdɩnɩ ɖama camɩyɛ yɔ
Ye ɩyɔɔdʋʋnɩ ɖama kpayɩ yɔ, piyeki se ɖama kɩɩnɩnʋʋ ɛtaakɔɔ mɩ-hɛkʋ taa. Ðɩkpaɣ Izrayɛɛlɩ mba tɔm tʋnɛ nɛ ɖɩñɩɣ niye pɩ-yɔɔ. Tɔm ndʋ tɩɩlabɩ alɩwaatʋ ndʋ pɛ-ɛjaɖɛ ñɔwa nɛ pitileɖi yɔ. Rubɛɛnɩ nɛ Gaadɩ cejewe nɛ Manaasee cejewiye hɔɔlʋʋ taa ñɩma mba paawɛ Yɔɔrdaŋ Pɔɔ wɩsɩ ɖɩlɩyɛ taa kiŋ yɔ, “pama altaaru sɔsɔʋ, ŋna-kʋ yɔ kɩpaɣlɩ caja” Yɔɔrdaŋ Pɔɔ cɔlɔ. Cejewe lɛɛna taa mba na mbʋ lɛ, pamaɣzɩ se papɩsɩ tisuu yebiyaa, pʋyɔɔ palabɩ mbʋ. Peeɖe Izrayɛɛlɩ ñɩma mba paawɛ wɩsɩ ɖɩɖʋyɛ taa kiŋ yɔ, pɔñɔɔzɩ pa-tɩ se powolo nɛ poyooni mba ‘pakʋyɩ’ Yehowa yɔɔ yɔ. Ɛlɛ pʋcɔ nɛ pɛɖɛɛ you lɛ, petiyi ɛyaa nabɛyɛ se powolo pɔyɔɔdɩnɩ cejewe wena aawɛ wɩsɩ ɖɩlɩyɛ taa kiŋ yɔ. Pɩɩkɛ lɩmaɣzɩyɛ kɩbanɖɛ! Ɛyaa mba powoba lɛ, panɩɩ se patɩma altaaru ŋgʋ se palaa kɩ-yɔɔ kɩlaŋ weyi pɩtɩpɔzɩ yɔ. Ɛlɛ sɔɔndʋ kpaɣaɣ cejewe wena awɛ wɩsɩ ɖɩlɩyɛ taa kiŋ yɔ se po-koobiya ɩtaakɔɔ nɛ peheyi-wɛ wiɖiyi se: “Ɩfɛyɩnɩ ɖeɖe [Yehowa] cɔlɔ.” Altaaru ŋgʋ kɩkaɣnɩ wɩlʋʋ se mba ɖɔɖɔ paakɛ Yehowa sɛyaa. (Yoz 22:10-29) Paya altaaru ŋgʋ se Aseɣɖe tʋ, pɩtʋʋ fɛyɩ se pañɩnaɣ se kɩkɛ aseɣɖe tʋ pɛ-hɛkʋ taa se Yehowa kɛnɩ Ɛsɔ toovenim tʋ.—Yoz 22:34.
w08 15/11 18 § 5
“Ðɩñɩnɩ mbʋ pɩkɔŋnɩ laŋhɛzɩyɛ yɔ”
Pɩtɩla Izrayɛɛlɩ mba nabɛyɛ kaamaɣzaa se pɩnaɣ kpayɩ kpayɩ se po-koobiya labɩ kɩwɛɛkɩm nɛ pɩkɩlɩɣ ɖeu se powolo nɛ poyooni-wɛ nɛ pataaheyi-wɛ natʋyʋ nɛ pʋcɔ. Paa mbʋ yɔ, cejewe wena aawɛ wɩsɩ ɖɩɖʋyɛ taa yɔ, atikpidisi; ɛlɛ atiyi ɛyaa nabɛyɛ se powolo nɛ pa nɛ po-koobiya pɔñɔɔzɩ tɔm. Pɔpɔzɩ-wɛ se: “Wɛɛkʋʋ mbʋ ɩwɛɛkɩ mbʋ yɔ? Pɩlabɩ ɛzɩma nɛ ɩlɔ Kɩbaɣlʋ Izrayɛɛlɩ tɛ Ɛsɔ nɛ ɩma mɩ-tɩ azuluma altaaru nɛ ɩha siɣye e-kilizaɣ?” Toovenim taa lɛ, cejewe wena aama altaaru yɔ, ataaha siɣye Yehowa. Ɛlɛ ɛzɩma cejewe ana a-taa mba kaɣ labʋ, alɩwaatʋ ndʋ cejewe lɛɛna taa mba yɔɔdʋʋ se pɛwɛɛkaa yɔ? Pakaɣ yɔɔdɩnʋʋ nɛ pana se pawɩlɩ se patɩwɛɛkɩ pʋyʋ? Yaa pakaɣ kizuu yɔɔdɩnʋʋ cejewe lɛɛna taa mba? Patɩla mbʋ, ɛlɛ pɔyɔɔdɩnɩ nɔɔ kɩbaŋa nɛ pawɩlɩ se palabɩ lakasɩ nzɩ, mbʋ pʋyɔɔ yɔ, pɔsɔɔlaa se pɛsɛɛ Yehowa. Piyeba nɛ patɩwɛɛkɩ pa nɛ Yehowa pa-taabalɩyɛ. Nɛ pɩtasɩ lɛ, patɩkpɛdɩ calɩm. Pɔyɔɔdɩnɩ ɖama nɛ nɔɔ kɩbaŋa nɛ mbʋ yebina nɛ pɔñɔɔzɩ tɔm nɛ laŋhɛzɩyɛ ɖaɣnɩ kɔm pɛ-hɛkʋ taa.—Yoz 22:13-34.
Fezuu taa ñɩm
it-1 390 § 4
Kanaŋ
Kanaŋ mba sakɩyɛ taasɩ, alɩwaatʋ ndʋ Izrayɛɛlɩ mba mʋ pɛ-tɛtʋ yɔ, paa mbʋ yɔ papɩzɩɣ nɛ pɔyɔɔdɩ se “Kɩbaɣlʋ ha Izrayɛɛlɩ tɛtʋ kpeekpe, ndʋ eeɖuuni pa-caanaa se ɛhaɣ-wɛ” yɔ, nɛ eeyeba “nɛ pɛhɛzɩ” tɛtʋ kpeekpe taa nɛ “tɔm kɩbandʋ ndʋ Kɩbaɣlʋ kaaheyi Izrayɛɛlɩ ɖɩɣa yɔ tɩ-taa paa kʋɖʋmtʋ tɩɖɛɛ yem falaa, ɛlɛ tɩ-tɩŋa payɩ tɩlaba.” (Yoz 21:43-45) Koyindinaa mba paacɔ Izrayɛɛlɩ mba nɛ pata yɔ, sɔɔndʋ kpaɣaɣ-wɛ nɛ pataapɩzɩɣ nɛ pala nabʋyʋ Izrayɛɛlɩ mba. Yehowa kaayɔɔdaa nɛ pɩɖɛɛ se ɛkaɣ ɖɔnʋʋ Kanaŋ mba “pazɩ pazɩ” se pɩsa nɛ tɛtʋ ɛtaapɩsɩ lakʋ nɛ tɛtɛgbɩna ɖɔɔ. (Ejl 23:29, 30; Wp 7:22) Paa Kanaŋ mba kaawɛnɩ you wondu sɔsɔtʋ ɛzɩ ñɩɣtʋ you kɛɛkɛɛnaa mbʋ yɔ, paapɩzɩɣ nɛ pɔtɔ se Yehowa tɩɖɔ ɛ-tɔm yɔɔ, mbʋ pʋyɔɔ yɔ, Izrayɛɛlɩ mba tɩpɩzɩ nɛ pamʋ tɛtʋ hɔɔlɩŋ nɩɩyɩ. (Yoz 17:16-18; Th 4:13) Ɛlɛ Masɩ wɩlɩɣ se Izrayɛɛlɩ mba taawɛɛ siɣsiɣ, pʋyɔɔ patɩpɩzɩ nɛ pawa yoŋ nɩɩyɩ.—Kɩg 14:44, 45; Yoz 7:1-12.
15-21 NOVEMBRE
ÑƖM MBƲ PƖWƐ ƐSƆTƆM TAA YƆ | YOZUWEE 23-24
“Lɔŋ weyi Yozuwee tasɩ samaɣ kɛdɛzaɣ ɖeɖe yɔ”
it-1 82
Ɛgbɛyɛ
Wɛtʋ ndʋ tɩ-taa Izrayɛɛlɩ mba kaawɛɛ alɩwaatʋ ndʋ pamʋ Kanaŋ tɛtʋ yaa Lidaʋ Tɛtʋ yɔ, tɩɩwɛ ndɩ. Yehowa kaaha Izrayɛɛlɩ mba waɖɛ se pamʋ tɛtʋ kpeekpe ɛzɩ ɛɛlabʋ tamaɣ pɔ-cɔzɔnaa yɔ. Pataasʋʋ tɛtʋ ndʋ tɩ-taa ɛzɩ agɔma yɔ, nɛ Yehowa ɖʋ-wɛ paɣtʋ se pataaɖʋ ɛgbɛyɛ nɛ sɩɩnaa layaa ajɛɛ wena aawɛ tɛtʋ ndʋ tɩ-taa yɔ. (Ejl 23:31-33; 34:11-16) Pɩtaapɔzɩ se Izrayɛɛlɩ mba ɩɖɔ ajɛɛ wena pakaɣ ɖɔɔnʋʋ yɔɔ a-paɣtʋ yɔɔ, ɛlɛ pɩɩwɛɛ se pɔɖɔ Yehowa ɖeke paɣtʋ yɔɔ na. (Lev 18:3, 4; 20:22-24) Kɔzɩ kɔzɩ lɛ, paaɖʋ paɣtʋ Izrayɛɛlɩ mba se pa nɛ ajɛɛ ana a-taa mba pataaɖɔkɩ nesi. Ye pa nɛ wɛ pɔɖɔkɩ nesi yɔ, piyeki nɛ nɔɔ kʋɖʋmaɣ wɛɛ pa nɛ halaa sɩɩnaa layaa nɛ paba hɔŋ taa mba pɛ-hɛkʋ taa nɛ pituyi-wɛ nɛ palaa sɩɩnaa, pasʋʋ cɛtɩm Ɛsɔ sɛtʋ taa nɛ papɩsɩ tisuu yebiyaa.—Wp 7:2-4; Ejl 34:16; Yoz 23:12, 13.
w07 1/11 26 § 19-20
Yehowa tɔm lakɩ paa ɛzɩmtaa
19 Pɩtʋʋ fɛyɩ se mbʋ ɖa-maɣmaɣ ɖɩna nɛ ɖɛ-ɛsa yɔ, piyeki nɛ ɖitisi tɔm tʋnɛ tɩ-yɔɔ: “Tɔm kɩbandʋ ndʋ ndʋ Kɩbaɣlʋ yɔɔdɩ mɩ-yɔɔ yɔ, tɩ-taa natʋyʋ tɩɖɛɛ yem nɛ tɩtɩla.” (Yozuwee 23:14) Yehowa yakɩ ɛ-sɛyaa ñʋʋ, ɛkandɩyɩɣ pɔ-yɔɔ nɛ ɛcalɩɣ-wɛ. Ŋpɩzɩɣ nɛ ŋyɔɔdɩ se ɛ-tɔm natʋyʋ tɩla alɩwaatʋ ndʋ ɛɖʋwa yɔ tɩ-yɔɔ? Paa ŋñɩnaa ŋŋnaɣ. Pɩmʋnaa se ɖɩtaa Ɛsɔtɔm liu, nɛ pɩkɛnɩ lɔŋsɩnɖɛ se ɖɩla mbʋ.
20 Nɛ cee wayɩ tɔm yɔ? Yehowa heyi-ɖʋ se ɖa-taa sakɩyɛ kaɣ caɣʋ wezuu tɛtʋ ndʋ tɩpɩsɩɣ paradisuu yɔ tɩ-yɔɔ, nɛ ɛyaa nabɛyɛ kaɣ tɔɔʋ kewiyitu ɛsɔdaa. Paa lidaʋ ŋgʋ ɖɩwɛna yɔ, pɩpɔzʋʋ se ɖɩñaɣ pana nɛ ɖɩwɛɛ siɣsiɣ ɛzɩ Yozuwee yɔ. Tamaɣ ŋga Ɛsɔ labɩ-ɖʋ yɔ, kakaɣ labʋ wiɖiyi. Puwiye ɖɩkaɣ tɔzʋʋ lidaʋ tɔm ndʋ payɩ Yehowa kaaheyi-ɖʋ yɔ tɩ-yɔɔ nɛ ɖa ɖɔɖɔ ɖɩyɔɔdɩ se: “Tɩ-taa natʋyʋ tɩɖɛɛ yem nɛ tɩtɩla.”
Fezuu taa ñɩm
w04 1/12 12 § 1
Yozuwee takayaɣ taa lɩmaɣza sɔsɔna
24:2—Abraham caa Teera sɛɣaɣ sɩɩnaa na? Kiɖe tɛɛ lɛ, Teera taasɛɣ Yehowa Ɛsɔ. Pɩwɛ ɛzɩ ɛsɛɣaɣ fenaɣ-ɛsɔ weyi payaɣ se Sîn yɔ; ɛsɔ ɛnʋ pakɩlaɣ sɛʋ Uuri tɛtʋ taa. Halɩ Yuuda mba sɔnzɩ nasɩyɩ taa, pɔtɔm se Teera lukaɣ sɩʋ kpelisi. Paa mbʋ yɔ, alɩwaatʋ ndʋ Ɛsɔ heyi Abraham se ɛlɩɩ Uuri tɛtʋ taa yɔ, Teera tɩŋɩ-ɩ nɛ ewolo Haraanɩ.—Kiɖe Tɛɛ Tɔm 11:31.
22-28 NOVEMBRE
ÑƖM MBƲ PƖWƐ ƐSƆTƆM TAA YƆ | TƆM HƲYAA 1-3
“Abalɩtʋ nɛ lɛɣtʋ labʋ nabʋyʋ kɛdaɣ”
w04 15/3 31 § 3
Ewuudi lɩ nazɩyaa nesi tɛɛ
Paa Ewuudi ɛtalɩ ɛ-kaɖʋwa yɔ, pɩɩwɩlɩɣ se ɛwɛ lɛɣtʋ yaa se e-koyindinaa fɛyɩ niye. Pɩtɩkɛ ɛyaa cɔlɔ pɩlɩɣna se Ɛsɔ tamaɣ ɛla. Ɛsɔ sɩnɩnɩ Ewuudi nɛ ɛtalɩ ɛ-kaɖʋwa. Ɛsɔ sɩnɩ-ɩ, mbʋ pʋyɔɔ yɔ ɛ-lakasɩ labɩ nɔɔ kʋɖʋmaɣ nɛ tamaɣ ŋga Ɛsɔ kaalaba se ɛyakɩ ɛ-samaɣ ñʋʋ yɔ. Nɛ nɔɔyʋ yaa nabʋyʋ taapɩzɩɣ se pɩkaɖɩnɩ tamaɣ ŋga. Yehowa lɩzɩnɩ Ewuudi, nɛ ‘Yehowa lɩzaɣ ɛ-samaɣ tɔm hʋyaa lɛ, ɛɛwɛ paa tɔm hʋyʋ weyi lɛ ɛ-cɔlɔ.’—Tɔm Hʋyaa 2:18; 3:15.
w04 15/3 31 § 1-3
Ewuudi lɩ nazɩyaa nesi tɛɛ
Kajalaɣ lɛ, Ewuudi lubi “sɩɣa lɔŋ ŋga ceemenje.” Sɩɣa ŋga katɩɖaɣlɩ, pʋyɔɔ ɛpɩzaa nɛ ɛmɛsɩ-kɛ e-toko taa. Ɛnawa se pɩtɩla pakaɣ wiluu e-toko taa. Ðoŋ ɖoŋ lɛ, mba palakɩ tʋmɩyɛ nɛ pe-nesi kɩbanzɩ yɔ, pataŋ sɩsɩ nɩmɩyɛ hiye yɔɔ se papɩzɩ nɛ palɩzɩ-sɩ kɛlɛʋ. Ewuudi ñɛkɛ nɩmɩyɛ tʋ, pʋyɔɔ “ɛtam-kɛ ɛ-tɩnaɣ taa toko tɛɛ, ɛ-nɩwaŋ hiye yɔɔ.” Nɛ pɩtʋʋ fɛyɩ se wiyaʋ yɔɔ kandɩyaa taapɩzɩɣ se pamaɣzɩ se ɛmɛsɩ sɩɣa peeɖe. Toovenim, ɛpɩzaa nɛ ɛsʋʋ kɛlɛʋ nɛ “ɛha haɖɛ Mowaabʋ wiyaʋ Egɩlɔɔnɩ.”—Tɔm Hʋyaa 3:16, 17.
Bibl tɩyɔɔdɩ mbʋ pɩɩlabɩ Egɩlɔɔnɩ kewiyaɣ ɖɩɣa taa nɛ pɩɖɛɛ yɔ pɩ-tɔm. Kɩyɔɔdɩ yem se: “Ewuudi tɩha-ɩ haɖɛ lɛ, ɛɖɛɛ ɛ nɛ ɛ-taabalaa mba paakɔnɩ-ɩ ɖɩ yɔ.” (Tɔm Hʋyaa 3:18) Ewuudi labɩ haɖɛ lɛ, ɛsɩɩ mba paakɔnɩ-ɖɩ yɔ, nɛ ɛnawa se poposini Egɩlɔɔnɩ kewiyaɣ ɖɩɣa camɩyɛ lɛ, eyebi-wɛ nɛ ɛpɩsɩ. Ɛbɛ yɔɔ? Ɛzɩ ɛyaa mba paatɩŋ ɛ-wayɩ se pakandɩyɩ ɛ-yɔɔ? Ɛzɩ paɣtʋ pɔzaɣna se patɩŋ ɛ-wayɩ? Yaa paakɛ haɖɛ ɖɔkɩyaa yem na? Ɛzɩ Ewuudi taasɔɔlɩ se nabʋyʋ ɛtalɩ-wɛ alɩwaatʋ ndʋ ɛlakɩ mbʋ ɛɛɖʋwa yɔ, pʋyɔɔ eyebi-wɛ nɛ pɛɖɛɛ? Paa pɩtɩɩkɛ suwe yɔ, Ewuudi labɩ abalɩtʋ nɛ ɛpɩsɩ e-ɖeke.
Ewuudi kɔm nɛ “ɛtalɩ Gilgaalɩ, ɖenɖe sɩʋ kpelisi kaawɛɛ yɔ lɛ, ɛsʋsɩ ɛtɔ wiyaʋ se: ‘Mɛwɛnɩ mɛsaɣ tɛɛ tɔm natʋyʋ se meheyiɣ-ŋ, hayɩ wiyaʋ.’” Masɩ tɩyɔɔdɩ ɛzɩma ɛlaba nɛ paɖaɣnɩ-ɩ sʋnʋʋ wiyaʋ cɔlɔ yɔ pɩ-tɔm. Ɛbɛ yɔɔ wiyaʋ yɔɔ kandɩyaa yebi-i nɛ ɛsʋʋ nɛ sɔɔndʋ tɩkpa-wɛ? Pamaɣzaɣ se Izrayɛɛlɩ tʋ kʋɖʋm ɛɛpɩzɩɣ nɛ ɛla pa-kɩbaɣlʋ nabʋyʋ? Ɛzɩma Ewuudi wobi e-ɖeke yɔ, piyeba nɛ pamaɣzɩ se ɛcaɣ lɩʋ ɛ-samaɣ wayɩ? Paa pɩtɩkɛ suwe yɔ, Ewuudi pɔzaa se paha-ɩ waɖɛ nɛ ewolo ɛna wiyaʋ e-ɖeke, nɛ paha-ɩ waɖɛ nɖɩ ɖɔɖɔ.—Tɔm Hʋyaa 3:19.
Fezuu taa ñɩm
w05 15/1 24 § 7
Tɔm hʋyaa takayaɣ taa lɩmaɣza sɔsɔna
2:10-12. Pɩwɛɛ se ɖɩla ɖʋtʋ camɩyɛ nɛ ɖɩkpɛlɩkɩɣ Bibl ɖoŋ ɖoŋ nɛ pɩsa nɛ ‘ɖɩtaasɔɔ Yehowa kɩbandʋ natʋyʋ yɔɔ.’ (Keɣa 102:2) Pɩpɔzʋʋ se lʋlɩyaa ɩsɩnɩ pe-piya nɛ toovenim tɔm ndʋ tɩwɛ Ɛsɔtɔm taa yɔ, titii pa-laŋa taa.—Wayɩ Wayɩ Paɣtʋ 6:6-9.
29 NOVEMBRE–5 DECEMBRE
ÑƖM MBƲ PƖWƐ ƐSƆTƆM TAA YƆ | TƆM HƲYAA 4-5
“Yehowa tɩŋnɩ halaa naalɛ yɔɔ nɛ ɛya ɛ-samaɣ ñʋʋ”
w15 1/8 13 § 1
“Ŋkʋyʋʋ se ŋkɛ ɖoo Izrayɛɛlɩ taa”
Sisera! Hɩɖɛ nɖɩ ɖɩkpaɣaɣ ɛyaa sɔɔndʋ Izrayɛɛlɩ ɛjaɖɛ taa. Kanaŋ mba Ɛsɔ sɛtʋ nɛ pɔ-sɔnzɩ seɣtaɣ-wɛ nɛ palakɩ kañatʋ lakasɩ, nɛ sɩ-taa nasɩyɩ lɛ se, pakpakɩɣ pe-piya nɛ palaɣ kɩlaŋ nɛ halaa ñalakaɣ hayitu templo taa. Ye Kanaŋ sɔdʋʋ sɔsɔ nɔɔyʋ nɛ ɛ-sɔɔjanaa pɔtɔkɩnɩ kewiyitu tɛtʋ natʋyʋ yɔɔ yɔ, ɛzɩma pɩwɛɣ tɛtʋ ndʋ tɩ-taa? Debora hendu wɩlɩɣ se ɛyaa taapɩzɩɣ se pɔɖɔ nʋmɔʋ nɛ pɩwɛ ɛzɩ ɛyaa taawɛɛ kɔfɩnaa taa yɔ. (Tɔm Hʋyaa 5:6, 7) Ðɩpɩzɩɣ ɖɩmaɣzɩ nɛ ɖɩna ɛzɩma Izrayɛɛlɩ mba mɛlaɣ lakɩŋ taa nɛ piyisi yɔɔ yɔ. Pɩtʋʋ fɛyɩ se sɔɔndʋ kpaɣaɣ-wɛ se pala tʋmɩyɛ hayɩm taa yaa pacaɣ wezuu kɔfɩnaa mba pɛfɛyɩnɩ kolonzi sɔsɔsɩ yɔ pa-taa. Pɩtʋʋ fɛyɩ ɖɔɖɔ se sɔɔndʋ kpaɣaɣ-wɛ se ye pɔɖɔm nʋmɔʋ nɛ patɩŋnɩ kɔfɩnaa taa yɔ, papɩzɩɣ nɛ pakpa pe-piya nɛ pɛɖɛna yaa pakpa pa-halaa nɛ ɖoŋ nɛ pasʋʋnɩ-wɛ.
w15 1/8 13 § 2
“Ŋkʋyʋʋ se ŋkɛ ɖoo Izrayɛɛlɩ taa”
Paanazɩ Izrayɛɛlɩ mba pɩnzɩ 20 kpem, pɩkɔɔ nɛ pɩsɩɩnɩ alɩwaatʋ ndʋ Yehowa kɔm nɛ ɛna se ɛ-samaɣ ŋga kalakaɣ kɩdɛkɛdɩm siŋŋ yɔ, kɔsɔɔlaa se kɛlɛɣzɩ yɔ. Ɛzɩ Debora nɛ Baaraakɩ peteu hendu yɔ, alɩwaatʋ ndʋ lɛ, Debora kʋyaa se ɛkɛ “ɖoo Izrayɛɛlɩ taa,” Debora kaawalɩ abalʋ weyi payaɣ se Lapidɔɔtɩ yɔ, ɛlɛ ɖɩɩsɩŋ se ɛɛwɛnɩ piya yaa ɛtaawɛɛna. Paa pɩtɩɩkɛ suwe yɔ, pɩtɩkɛ ɛ-maɣmaɣ e-piya yɔɔ pɔtɔm se ɛkʋyaa se ɛkɛ ɖoo. Toovenim taa lɛ, Yehowa kaaɖʋ Debora tʋmɩyɛ se ɛkandɩyɩ ɛ-samaɣ yɔɔ ɛzɩ ɖoyo lakʋʋ yɔ. Yehowa kaaheyi-i se ɛyaa tɔm hʋyʋ Baaraakɩ weyi e-tisuu paɣlɩ siŋŋ yɔ, nɛ eheyi-i se ɛkʋyɩ Sisera yɔɔ.—Tɔm Hʋyaa 4:3, 6, 7; 5:7.
w15 1/8 15 § 2
“Ŋkʋyʋʋ se ŋkɛ ɖoo Izrayɛɛlɩ taa”
Yayɛɛlɩ taawɛɛnɩ alɩwaatʋ sakɩyɛ se ɛmaɣzɩ nɛ ŋna mbʋ pɩwɛɛ se ɛla yɔ. Ɛwɩlɩ Sisera ɖenɖe ɛpɩzɩɣ nɛ ɛhɛzɩ yɔ. Sisera heyi-i se etaaheyi mba pɛwɛɛ nɛ pañɩnɩɣ-ɩ yɔ, pa-taa nɔɔyʋ se ɛwɛ peeɖe. Sisera hɩnaa lɛ, Yayɛɛlɩ kpaɣ pɩsaʋ nɛ ehuuzi ɛ-yɔɔ. Ɛpɔzɩ lɩm lɛ, Yayɛɛlɩ ha-ɩ naalɩm nɛ ɖom kpaɣ-ɩ nɛ ɛpaɣzɩ ɖou siŋŋ. Peeɖe Yayɛɛlɩ kpaɣ wondu naalɛ; halaa mba pasʋʋ kizinzikiŋ tɛɛ yɔ, palakɩnɩ wondu ndʋ tʋmɩyɛ camɩyɛ. Wondu ndʋ lɛ sanɖaʋ yaa kaŋgamaɣ nɛ hama. Ɛñɔtɩnɩ Sisera ɖaa nɛ eluŋ ɛ-ñʋʋ cɔlɔ se ɛla nɩŋgbaŋʋʋ hɔm tʋmɩyɛ nɖɩ Yehowa ɖʋwa yɔ. Pɩkɛ tʋmɩyɛ nɖɩ ɖɩwɛ kaɖɛ siŋŋ yɔ. Ye ɛpɩsɩnɩ wayɩ pazɩ yaa ye ɛpaɣzɩ pɩtʋʋ yɔ, pɩpɩzɩɣ pɩkɔnɩ-ɩ kaɖɛ. Ɛzɩ ɛɛwɛɛ nɛ ɛmaɣzɩɣ ɛzɩma abalʋ ɛnʋ ɛɛnazɩ Ɛsɔ samaɣ pɩnzɩ sakɩyɛ yɔ pɩ-yɔɔ? Ɛzɩ ɛwɛɛ nɛ ɛmaɣzɩɣ se pɩkɛnɩ-ɩ hɩɖɛ ɖʋʋ siŋŋ se ɛwɛɛ Yehowa hɔɔlʋʋ yɔɔ? Bibl tɩyɔɔdɩ pɩ-tɔm. Ɛlabɩ mbʋ pɩpɔzʋʋ yɔ kpɛdɛyɛ. Ɛkʋ Sisera!—Tɔm Hʋyaa 4:18-21; 5:24-27.
Fezuu taa ñɩm
w05 15/1 25 § 5
Tɔm hʋyaa takayaɣ taa lɩmaɣza sɔsɔna
5:20—Ɛzɩma tɩyɛ tɩɩnzɩ labɩ you ɛsɔdaa nɛ sɩsɩnɩ Baaraakɩ? Bibl tɩyɔɔdɩ mbʋ pɩɩlabɩ ɖeyi ɖeyi yɔ pɩ-tɔm. Ɛzɩ Ɛsɔ tiyiyaa kaasɩnɩnɩ Baaraakɩ? Ɛzɩ tɩɩnzɩ nasɩyɩ kaalɩnɩ ɛsɔdaa nɛ sɩtɔlɩ tataa nɛ Sisera lɔŋ tasɩyaa maɣzɩ se pɩkɛ yʋsaɣ ŋga kawɩlɩɣ se pakaɣ-wɛ wabʋ yɔ? Yaa Sisera kaata liu tɩɩnzɩ cɔŋɩyaa, ɛlɛ paba tɩpɩzɩ nɛ pasɩnɩ-ɩ? Paa pɩtɩɩkɛ suwe yɔ, Ɛsɔ maɣmaɣ cɔŋnɩnɩ tɔm ndʋ ti-ɖeɖe.
6-12 DECEMBRE
ÑƖM MBƲ PƖWƐ ƐSƆTƆM TAA YƆ | TƆM HƲYAA 6-7
“Wolo nɛ ña-taa ɖoŋ ɛnɩ yɔ”
w02 15/2 6-7
Paɣtʋ kila wena alɩnɩ Ɛsɔ cɔlɔ yɔ, apɩzɩɣ nɛ awazɩ-ŋ
Caanaʋ taa tɔm hʋyʋ Ebree tʋ Gideyɔɔ kaawɛnɩ lɩmaɣza wena amʋna yɔ, ɛ-tɩ yɔɔ nɛ ɛtaamaɣzɩɣ ɛ-tɩ yɔɔ nɛ pɩcɛzɩɣ ɛzɩma pɩwɛɛ se ɛmaɣzɩ yɔ. Ɛtaañɩnɩ se eɖiyi Izrayɛɛlɩ ɛjaɖɛ. Ɛlɛ alɩwaatʋ ndʋ palɩzɩ-ɩ se ɛla tʋmɩyɛ nɖɩ yɔ, ɛtɔm se ɛtɩmʋna se ɛlabɩ-ɖɩ. Ɛyɔɔdaa se: “Mankɩlɩnɩ ɛjandʋ Manaasee cejewiye taa, nɛ ma, mankɩlɩnɩ kɔzʋʋ man-caa ɖɩɣa taa.”—Tɔm Hʋyaa 6:12-16.
w05 15/7 16 § 3
“[Yehowa] nɛ Gideyɔɔ patɩnɩ laɣɖɛ!”
Pɩtʋʋ fɛyɩ se sɔɔndʋ kaakpa Madiyaŋ mba siŋŋ. Panɩ pɔyɔkɩ peeɣsi 300, payaa nɔndɔŋ 300 nɛ abalaa 300 ma kubusi. Kɔzɩ kɔzɩ lɛ, kubuka ŋga pamaba se “[Yehowa] nɛ Gideyɔɔ patɩnɩ laɣɖɛ!” yɔ, ŋga tɛzɩnɩ labʋ nɛ sɔɔndʋ kpa-wɛ nɛ mba ɖɔɖɔ papaɣzɩ mabʋ kubusi. Pɩtɩŋa piisidi yem nɛ pataapɩzɩɣ se patɩlɩ mba pɛkɛ po-koyindinaa yɔ. Gideyɔɔ ɛyaa 300 waa mba, pa-taa paa weyi sɩŋ e-ɖeɖe nɛ Ɛsɔ koyindinaa maɣmaɣ kpaɣ pa-laɣla nɛ pakʋ ɖama. Koyindinaa kaawɛɛ nɛ peseɣ nɛ Izrayɛɛlɩ mba ɖɩɣ-wɛ nʋmɔʋ. Paɖʋ mbʋ papɩzaa nɛ pese yɔ pa-wayɩ nɛ pɛtɛzɩ-wɛ kʋʋ. Madiyaŋ mba taatasɩɣ pɩzʋʋ nɛ panazɩ Izrayɛɛlɩ mba wiɖiyi. Pɩnzɩ sakɩyɛ nzɩ sɩ-taa panazaɣ nɛ pakʋʋ Ɛsɔ samaɣ yɔ, sɩsɩ tɩnaɣ.—Tɔm Hʋyaa 7:19-25; 8:10-12, 28.
Fezuu taa ñɩm
w05 15/1 26 § 6
Tɔm hʋyaa takayaɣ taa lɩmaɣza sɔsɔna
6:25-27. Gideyɔɔ kaawɛ lɛɣtʋ nɛ ɛtaala nabʋyʋ se pɩwɩzɩ e-koyindinaa yem falaa. Ða ɖɔɖɔ alɩwaatʋ ndʋ ɖisusuu laŋhɛzɩyɛ tɔm yɔ, pɩwɛɛ se ɖɩkpaɣ ɖa-tɩ nɛ ɖɩtaayɔɔdɩ tɔm natʋyʋ nɛ pɩwɩzɩ mba ɖisusuu-wɛ tɔm yɔ.
13-19 DECEMBRE
ÑƖM MBƲ PƖWƐ ƐSƆTƆM TAA YƆ | TƆM HƲYAA 8-9
“Tɩ luzuu kɩlɩ ɖeu tɩ kpazʋʋ”
w00 15/8 25 § 3
Ɛzɩma ŋpɩzɩɣ nɛ ŋñɔɔzɩ tɔm?
Alɩwaatʋ ndʋ Gideyɔɔ wɛɛ nɛ eyouni Madiyaŋ mba yɔ, paya-ɩ se ewolo nɛ ɛsɩnɩ Efrayim cejewiye taa mba. Ɛlɛ you tɛma lɛ, Efrayim mba yaa-ɩ nɛ hɔɔlʋʋ nɛ pakalɩɣ-ɩ mbʋ pʋyɔɔ yɔ, ɛtaayaa-wɛ alɩwaatʋ ndʋ you paɣzaa yɔ. Bibl yɔɔdaa se: “Pa-taa wɩɩnɩ-ɩ pɩŋŋ.” Peeɖe Gideyɔɔ heyi-wɛ se: “Ɛbɛ manpɩzaa mala ɛzɩ ɩlabʋ yɔ? Efrayim cazʋʋ tɩkɩlɩ weewee Abi-Ezɛɛrɩ viiñi pee koyuu? Mi-nesi tɛɛ Ɛsɔ ɖʋzɩ Madiyaŋ awiya Orɛɛbʋ nɛ Zeyɛɛb. Ɛbɛ manpɩzaa mala ɛzɩ ɩlabʋ yɔ?” (Tɔm Hʋyaa 8:1-3) Gideyɔɔ yɔɔdɩ lɛɣtʋ tɔm ndʋ nɛ nɔɔ kɩbaŋa lɛ, pa-laŋɩyɛ hɛɛ nɛ you tɩkɔɔ pɛ-hɛkʋ taa. Pɩtʋʋ fɛyɩ se Efrayim mba taawɛɛnɩ toovenim se pakpazɩ pa-tɩ mbʋ. Paa mbʋ yɔ, Gideyɔɔ labɩ mbʋ pɩpɔzʋʋ yɔ se pɩsa nɛ laŋhɛzɩyɛ wɛɛ ɛ nɛ wɛ pɛ-hɛkʋ taa. Ðɩpɩzɩɣ nɛ ɖɩmaɣzɩnɩ-ɩ?
Ɛbɛ yɔɔ pɩcɛyaa se ɖɩwɛɛnɩ tɩ luzuu?
15 Gideyɔɔ ha-ɖʋ kɩɖaʋ kɩbaŋʋ tɩ luzuu nʋmɔʋ taa. Alɩwaatʋ ndʋ Yehowa pɔzɩ-ɩ se ɛlɩzɩ Izrayɛɛlɩ Madiyaŋ mba nesi tɛɛ yɔ, Gideyɔɔ yɔɔdaa se: “Mankɩlɩnɩ ɛjandʋ Manaasee cejewiye taa, nɛ ma, mankɩlɩnɩ kɔzʋʋ man-caa ɖɩɣa taa.” (Th. 6:15) Gideyɔɔ tisaa se ɛlakɩ tʋmɩyɛ nɖɩ Yehowa ɖʋ-ɩ yɔ nɛ pɩtɛ lɛ, ɛñɩnɩ se ɛna mbʋ ɖeyi ɖeyi Yehowa ñɩnɩɣ se ɛla yɔ, nɛ pʋwayɩ lɛ eyele se Yehowa eɖiyi-i nɛ ɛpɩzɩ ɛlabɩ-ɖɩ. (Th. 6:36-40) Gideyɔɔ kaawɛ ɖoŋ nɛ ɛwɛɛ abalɩtʋ ɖɔɖɔ. Paa mbʋ yɔ, ɛtɩtaa ɛ-maɣmaɣ ɛ-tɩ liu, ɛlɛ ɛwɩlɩ ɛ-lakasɩ taa se ɛwɛnɩ lɔŋsɩnɖɛ nɛ ɛwɛɛ lɛɣtʋ. (Th. 6:11, 27) Ɛtɩmaɣzɩ se tʋmɩyɛ nɖɩ paɖʋ-ɩ yɔ ɖɩhaɣ-ɩ waɖɛ se ɛpɩsɩ caa akele. Ɛlɛ, alɩwaatʋ ndʋ ɛ-tʋmɩyɛ tɛma yɔ, ɛpɩsɩ ɛ-tɛ nɛ taa leleŋ.—Th. 8:22, 23, 29.
w08 15/2 9 § 9
Ðɩɖɔŋ Yehowa nʋmɔŋ taa
9 Pʋcɔ nɛ ɖɩkɛ Yehowa taabalaa lɛ, pɩwɛɛ se ‘ɖiluzuu ɖa-tɩ.’ (1Pɩ 3:8; Keɣa 137:6) Tɔm Hʋyaa ñʋʋ 9 wɩlɩɣ mbʋ pʋyɔɔ tɩ luzuu tɔm cɛyaa yɔ. Gideyɔɔ pɩyalʋ Yotam yɔɔdaa se: “Kɩyakʋ nakʋyʋ tɩŋ kʋyaa se ɩsɩɣ ɩ-tɩ wiyaʋ nɛ ɩtaa-ɩ num kiɖeɖem.” Pʋwayɩ lɛ, pɔyɔɔdɩ Oliivi, fiigi nɛ viiñi tɩŋ tɔm. Tɩŋ ɛnɩ ɩsɩŋnɩ ɛyaa kɩbama mba pataañɩnɩɣ se pɔtɔɔ kewiyitu po-koobiya Izrayɛɛlɩ mba yɔɔ yɔ. Ɛlɛ kɔnzɔka tɩʋ ŋgʋ kɩ-wazaɣ kpeekpe lɛ se pakpaɣ-kʋ nɛ palabɩnɩ ɖasɩ nɛ petiɣ miŋ yɔ, kɩsɩŋnɩ Abimelɛɛkɩ kewiyitu tɔɔʋ. Abimelɛɛkɩ kaawɛ cajayɛ nɛ eeyeba nɛ pakʋ ɛyaa sakɩyɛ mbʋ pʋyɔɔ yɔ, ɛsɔɔlaa se ɛkɛ wiyaʋ. Abimelɛɛkɩ “tɔɔ kewiyaɣ Izrayɛɛlɩ taa pɩnzɩ naadozo” nɛ pɩtɛ lɛ, ɛsɩ tuda yem. (Tɔm Hʋyaa 9:8-15, 22, 50-54) Pɩtʋʋ fɛyɩ, tɩ luzuu wazɩɣ siŋŋ!
Fezuu taa ñɩm
it-1 784 § 5
Efoodɩ, I
Gideyɔɔ kaawɛnɩ lɩmaɣza kɩbana nɛ ɛñɩnaɣ se ɛɖʋ hɩɖɛ Yehowa nɛ ɛla kazandʋ ɛzɩma ɛsɩnɩ Izrayɛɛlɩ nɛ kɩwa yɔ pɩ-yɔɔ, ɛlɛ Efoodɩ kaakɛ kpaca “Gideyɔɔ nɛ ɛ-ɖɩɣa kpeekpe” mbʋ pʋyɔɔ yɔ, Izrayɛɛlɩ mba kaapaɣzɩ-kʋ sɛʋ ɛzɩ sɩʋ kpeliɣa yɔ. (Th 8:27) Paa mbʋ yɔ, Bibl tɩyɔɔdɩ se Gideyɔɔ maɣmaɣ kaasɛ-kʋ, halɩ apostoloo Pɔɔlɩ ya ɛ-hɩɖɛ caanaʋ taa Yehowa “aseɣɖe tɩnaa mba pɛwɛ ɛzɩ ɛsɔmɩnʋʋ” yɔ pa-taa.—Ebr 11:32; 12:1.
20-26 DECEMBRE
ÑƖM MBƲ PƖWƐ ƐSƆTƆM TAA YƆ | TƆM HƲYAA 10-12
Yeftee kaakɛ fezuu taa ɛyʋ
Ye ɖɩwɛ siɣsiɣ yɔ, ɖɔ-tɔm kɛdɩɣnɩ Yehowa
Pɩtɩla yɔ, Yeftee kaakpɛlɩkɩ lɔŋ ɖɔɖɔ Ɛsɔ sɛyaa siɣsiɣ tɩnaa lalaa cɔlɔ. Pa-taa nɔɔyʋ lɛ Yosɛɛfʋ weyi ɛɛna ɛ-ɖalaa pʋtɔdɩyɛ, paa paba ‘ɩtaanaɣ-ɩ nɛ ɛsɩyɛ’ yɔ. (Kiɖe Tɛɛ Tɔm 37:4; 45:4, 5) Pʋtɔma yɔ ɛɛkpaɣ alɩwaatʋ nɛ ɛmaɣzɩ pa-kɩɖaŋ yɔɔ nɛ mbʋ sɩnɩnɩ-ɩ nɛ ɛlɩzɩ se ɛlakɩ mbʋ pɩkɛdɩnɩ Yehowa yɔ. Pɩtʋʋ fɛyɩ se e-newaa lakasɩ ɖʋ-ɩ ɖɩwɩzɩyɛ siŋŋ, paa mbʋ yɔ etikizi Yehowa sɛʋ nɛ etisaa ɖɔɖɔ se ɛsɩɣnɩ Izrayɛɛlɩ samaɣ. (Tɔm Hʋyaa 11:9) Yehowa hɩɖɛ yɔɔ lʋbʋ tɔm kaacɛyɩ Yeftee ɛsɩndaa nɛ pɩkɩlɩ ɖɩwɩzɩyɛ nɖɩ paaɖʋ-ɩ yɔ. Ɛɛtɛm ɛ-taa se ɛwɛɣ siɣsiɣ Yehowa ɛsɩndaa, piyeba nɛ pɩwazɩ ɛ-maɣmaɣ nɛ pɩwazɩ ɛyaa lalaa ɖɔɖɔ.—Ebree 11:32, 33.
it-2 1202 § 6
Yeftee
Yeftee kɛ abalʋ weyi ɛwɛ kpekpeka yɔ, nɛ ɛɛkpaɣ lɩmaɣza kpɛdɛyɛ. Etiyini takayaɣ nakɛyɛ Amooni wiyaʋ nɛ takayaɣ ŋga ka-taa ɛya-ɩ se tɔm cayʋ, mbʋ pʋyɔɔ yɔ ɛnʋ wobina se eyooni Izrayɛɛlɩ ɛjaɖɛ. Wiyaʋ cosi-i se Izrayɛɛlɩ kaamʋ Amooni tɛtʋ. (Th 11:12, 13) Peeɖe Yeftee wɩlaa se ɛtɩkɛ you laɖʋ kɩbanʋ yem, ɛlɛ ɛɛkpɛlɩkɩ ɛ-samaɣ yɔɔ tɔm, nɛ kɔzɩ kɔzɩ lɛ, taabalɩyɛ nɖɩ ɖɩɩwɛ Ɛsɔ nɛ ɛ-samaɣ pɛ-hɛkʋ taa yɔ ɖɩ-yɔɔ tɔm. Ekizi tɔm ndʋ Amooni yɔɔdaa yɔ, lɩmaɣza anɛ a-yɔɔ: (1) Izrayɛɛlɩ mba taayooni Amooni, Mowaabʋ yaa Edom (Th 11:14-18; Wp 2:9, 19, 37; 4Aw 20:10, 11); (2) Alɩwaatʋ ndʋ Izrayɛɛlɩ mba mʋwaɣ tɛtʋ ndʋ yɔ, tɩtaakɛ Amooni mba ñɩndʋ, ɛlɛ tɩɩkɛ Kanaŋ ñɩma mba pɛkɛ Amoori mba yɔ pa-ñɩndʋ, nɛ Yehowa yele nɛ Izrayɛɛlɩ mba wa pe-wiyaʋ Sihɔɔnɩ nɛ pamʋ tɛtʋ; (3) Pɩnzɩ 300 nzɩ sɩɩɖɛwa yɔ, sɩ-taa Amooni mba taakʋyɩ Izrayɛɛlɩ mba yɔɔ se tɛtʋ ndʋ tɩtɩkɛ Izrayɛɛlɩ mba ñɩndʋ. Ye mbʋ, ɛbɛ yɔɔ pɛlɛɣzɩ lɩmaɣza lɛɛlɛɛyɔ?—Th 11:19-27
it-2 1202 § 7
Yeftee
Yeftee wobi pɩ-yɔɔ nɛ ɛwɩlɩ se Ɛsɔ sɛtʋ yɔɔ tɔm ndʋ tɩkɔm pɛ-hɛkʋ taa. Ɛyɔɔdaa se Yehowa cɛlɩ tɛtʋ ndʋ Izrayɛɛlɩ mba nɛ pʋyɔɔ lɛ, Izrayɛɛlɩ mba ɩɩkaɣ haʋ tɛtʋ ndʋ tɩ-hɔɔlʋʋ nakʋyʋ paa ññɩɩ cɛtɩm ɛsɔnaa sɛyaa. Ɛyɔɔdɩ Kemɔɔsɩ tɔm se ɛkɛ Amooni mba ɛsɔ, nɛ nabɛyɛ maɣzɩɣ se piyiɣdiɣ kiyiɣduu. Ɛlɛ paa pɩkɛ toovenim se Milikɔm kɛnɩ Amooni mba ɛsɔ nɛ Kemɔɔsɩ ñɛkɛ Mowaabʋ mba ɛsɔ yɔ, nɔɔ kʋɖʋmaɣ nakɛyɛ kaawɛ ajɛɛ ana a-hɛkʋ taa: Asɛɣaɣ ɛsɔnaa sakɩyɛ. Halɩ Salomɔɔ kaalabɩ kɩmɛlɛndʋ nɛ eyele nɛ agbaaɣdaa halaa mba ɛɛkpaɣ yɔ, potuyi-i nɛ ɛsʋnɩ Kemɔɔsɩ sɛtʋ Izrayɛɛlɩ ɛjaɖɛ taa. (Th 11:24; 1 Aw 11:1, 7, 8, 33; 2 Aw 23:13) Pɩtasɩ lɛ, lɔŋsɩnɖaa nabɛyɛ maɣzɩɣ se pɩtɩla “Kemɔɔsɩ” tɔbʋʋ lɛ se “waɖʋ.” (Kalɩ takayaɣ ŋga W. Gesenius, Leipzig mawa nɛ payaɣ-kɛ se Voir Hebräisches und chaldäisches Handwörterbuch über das Alte Testament yɔ, par, 1857, tome 5, vol. 1, p. 414.) Pɩtɩla Yeftee yɔɔdɩ ɛsɔ ɛnʋ ɛ-tɔm, mbʋ pʋyɔɔ yɔ, Amooni mba maɣzaɣ se ɛwɛnɩ ɖoŋ se “ɛwa” nɛ ɛmʋ ajɛɛ lɛɛna tɛtʋ nɛ ɛcɛlɩ-wɛ.
Fezuu taa ñɩm
it-2 1201 § 2
Yeftee
Yeftee kaakɛ Galaadɩ pɩyalʋ. Yeftee ɖoo kaakɛ “halʋ hayitu laɖʋ”, ɛlɛ pɩɩwɩlɩɣ se Yeftee tɩkɛ Galaadɩ pɩyalʋ. E-ɖoo kaalabɩ hayitu nɛ pɩɖɛɛ pʋcɔ nɛ ɛkɔɔ ɛwalɩ Galaadɩ nɛ ɛkɛ ɛlɛ halʋ naalɛ ñɩnʋ, ɛzɩ Rahaabɩ kaalabʋ hayitu nɛ pɩɖɛɛ pʋcɔ nɛ ɛkɔɔ ɛwalɩ Salɩmɔɔnɩ yɔ. (Th 11:1; Yoz 2:1; Mt 1:5) Yeftee caa kajalaɣ halʋ pɩyalaa nawa se ɛtɩkɛ acɛyɛ pɩɣa, pʋyɔɔ pɔɖɔɔnɩ-ɩ se pɩsa nɛ pa nɛ ɩ pataatayɩ paa-caa ñɩm. (Th 11:2) Pɩtasɩ lɛ, Yeftee kɔma nɛ ɛkɛ Galaadɩ ñʋʋdʋ weyi paa weyi itisaa se ɛmʋnaa se ɛla tʋmɩyɛ nɖɩ yɔ (pɩwɛ ɛzɩ Yeftee caa kajalaɣ halʋ pɩyalaa kaakɛnɩ Galaadɩ ɛyaa mba pa-hɩla kaakɩlɩ sɛʋ yɔ). Pɩtasɩ ɖɔɖɔ lɛ, ɛɛla Ɛsɔ kɩlaʋ Ɛsɔ sɛtʋ kɩɖanɖʋʋ tɛɛ. (Th 11:30, 31) Ye ɛɛkɛ acɛyɛ pɩɣa yɔ, pataaha-ɩ wala ana, mbʋ pʋyɔɔ yɔ, paɣtʋ tɔŋ se: “Weyi palʋlɩ-ɩ azuluma lʋlʋʋ yɔ, ɛɛkaɣ sʋʋ Kɩbaɣlʋ samaɣ taa, nɛ e-liɖe canɖaʋ hiu ŋgʋ taa mba ɩɩkaɣ sʋʋ Kɩbaɣlʋ samaɣ taa.”—Wp 23:3.
27 DECEMBRE– 2 JANVIER
ÑƖM MBƲ PƖWƐ ƐSƆTƆM TAA YƆ | TƆM HƲYAA 13-14
“Lɔŋ weyi Manowaa nɛ ɛ-halʋ pɔ-tɔm kpɛlɩkɩɣ lʋlɩyaa?”
w13 15/8 16 § 3
Lʋlɩyaa—Ɩsɩɣzɩ mi-piya lɔŋ ɖooo pɩjatʋ taa
Ðɩkpaɣ Manowaa kɩɖaʋ. Ɛkɛ Daanɩ cejewiye taa tʋ nɛ ɛɛwɛ Caanaʋ taa Izrayɛɛlɩ tɛtʋ ndʋ payaɣ se Zora yɔ tɩ-taa. Ɛ-halʋ kaakɛ kaalʋlaɣ, ɛlɛ Yehowa tiyiyu nɔɔyʋ woba nɛ eheyi Manowaa se ɛ-halʋ ɛnʋ ɛkaɣ lʋlʋʋ abalɩbɩɣa. (Th. 13:2, 3) Pɩtʋʋ fɛyɩ se tɔm ndʋ tiiyeba nɛ Manowaa nɛ ɛ-halʋ pɛwɛɛ laŋhʋlʋmɩyɛ taa. Ɛlɛ tɩɩha-wɛ ɖɔɖɔ nɩɣzɛ siŋŋ. Pʋyɔɔ Manowaa tɩmaa se: “Kɩbaɣlʋ, yele nɛ Ɛsɔ tɛ ɛyʋ weyi ŋtiyi-i yɔ, ɛpɩsɩ ɛkɔɔ nɛ ɛwɩlɩ-ɖʋ mbʋ pɩwɛɛ se ɖɩla yɔ, palʋlʋʋ pɩɣa ŋga lɛ.” (Th. 13:8) Manowaa nɛ ɛ-halʋ paawɛɛ nɛ panɩɣzɩɣ ɛzɩma pala nɛ pasɩɣzɩ pa-pɩɣa lɔŋ camɩyɛ yɔ pɩ-yɔɔ. Pɩtʋʋ fɛyɩ se palʋlɩ pa-pɩyalʋ Samsɔɔ lɛ, paawɩlɩ-ɩ Ɛsɔtɔm. Nɛ pana wena paañaɣ yɔ alʋlɩ pee kɩbana, mbʋ pʋyɔɔ yɔ, Bibl yɔɔdaa se: “Kɩbaɣlʋ fezuu paɣzɩ ka-taa [pɩ-tɔbʋʋ se Samsɔɔ taa] tʋmɩyɛ labʋ.” Piyeba nɛ Samsɔɔ pɩzɩ nɛ ɛla ɖoŋ tʋma sɔsɔna sakɩyɛ alɩwaatʋ ndʋ ɛɛkɛ tɔm hʋyʋ Izrayɛɛlɩ ɛjaɖɛ taa yɔ.—Th. 13:25; 14:5, 6; 15:14, 15.
w05 15/3 25-26
Yehowa sɩnɩ Samsɔɔ nɛ ɛwa!
Samsɔɔ wɛɛ nɛ ɛpaɣlɩɣ lɛ, ‘Yehowa wɛɛ nɛ ɛwazɩɣ-ɩ.’ (Tɔm Hʋyaa 13:24) Kɩyakʋ nakʋyʋ Samsɔɔ woba nɛ ɛna ɛ-caa nɛ e-ɖoo nɛ eheyi-wɛ se: “Mana halʋ nɔɔyʋ Timna tɛtʋ taa, Filistii mba pɛlaa taa; ɩca-m ɩ, nɛ ɛpɩsɩ ma-halʋ.” (Tɔm Hʋyaa 14:2) Maɣzɩ nɛ ŋna ɛzɩma pɩɩɖɩɣzɩ-wɛ yɔ. Mbʋ ɛzɩ pa-pɩyalʋ kaañaɣ pana nɛ ɛlɩzɩ Izrayɛɛlɩ mba ɛyaa mba panazɩɣ-wɛ yɔ pe-nesi tɛɛ lɛ, ɛñɩnɩɣ se ɛkpaɣ ɛyaa mba pɛ-pɛlɛ nɛ ɛɖʋ-wɛ nɛ ɛgbɛyɛ. Ye ɛkpaɣ halʋ weyi ɛsɛɣ sɩɩnaa yɔ, ɛmaɣnɩ Ɛsɔ Paɣtʋ yɔɔ. (Ejipiti Lɩʋ 34:11-16) Pʋyɔɔ ɛ-lʋlɩyaa heyi-i se: “Halʋ nɔɔyʋ fɛyɩ ñe-cejewiye taa nɛ ña-samaɣ kpeekpe taa nɛ pɩwɛɛ se ŋwolo Filistii mba kɩdɩbɛlɩŋ ɩnɩ yɔ ɩ-taa se ŋkpaɣ halʋ na?” Ɛlɛ Samsɔɔ cosi se: “Ca-m ɩ, mbʋ pʋyɔɔ yɔ ɛnʋ wɛnɩ-m ɖeu.”—Tɔm Hʋyaa 14:3.
Fezuu taa ñɩm
w05 15/3 26 § 1
Yehowa sɩnɩ Samsɔɔ nɛ ɛwa!
Ɛzɩma tɩyɛ Filistii pɛlɛ ɛnʋ ‘ɛwɛ ɖeu’ Samsɔɔ ɛsɩndaa? Takayaɣ nakɛyɛ (Cyclopedia de McClintock et Strong) cosaa se pɩtɩkɛ se “pɛlɛ ɛnʋ eɖewa, ɛtʋʋzaa nɛ ɛwɛɛ cɔnʋʋ, ɛlɛ ɛpɩzaɣ se ɛsɩnɩ-ɩ nɛ ɛtalɩ kaɖʋwa nakɛyɛ.” Kaɖʋwa ŋga lɛ? Tɔm Hʋyaa 14:4 lɩzɩ pɩ-taa se: Samsɔɔ ɛnʋ ‘ɛñɩnaɣ nʋmɔʋ se ɛtɩŋnɩ kɩ-yɔɔ nɛ eyooni Filistii mba.’ Kaɖʋwa ŋga kɔ-yɔɔ Samsɔɔ ñɩnaɣ pɛlɛ ɛnʋ. Samsɔɔ paɣlaa lɛ, ‘Yehowa fezuu paɣzɩ ɛ-taa tʋmɩyɛ labʋ’ pʋ-tɔbʋʋ se kiseɣtaɣ-i se ɛla ɛ-tʋma. (Tɔm Hʋyaa 13:25) Ye mbʋ, Yehowa fezuu tuyini Samsɔɔ nɛ ɛpɔzɩ ɛ-lʋlɩyaa se pañɩnɩ-ɩ pɛlɛ ɛnʋ, nɛ ŋgʋ ɖiyini-i ɖɔɖɔ alɩwaatʋ ndʋ ɛɛkɛ tɔm hʋyʋ Izrayɛɛlɩ ɛjaɖɛ taa yɔ. Nʋmɔʋ ŋgʋ Samsɔɔ ñɩnaɣ yɔ, ɛpɩzaa nɛ ehiɣ-kʋ? Kajalaɣ lɛ, iyele nɛ ɖɩna ɛzɩma Yehowa wɩlɩ-ɩ kpayɩ kpayɩ se ɛkaɣ-ɩ sɩnʋʋ yɔ.