Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
5-11 SEPTEMBRE
ÑƖM MBƲ PƖWƐ ƐSƆTƆM TAA YƆ | 1 AWIYA 9–10
“Ðɩsa Yehowa ɛ-lɔŋsɩnɖɛ yɔɔ”
w99 1/7 30 § 6
Ɛgɔndʋ wobu mbʋ pɩkɔnɩ wazaɣ sɔsɔɔ yɔ
Abiɖe tɩɩkatɩ Salomɔɔ lɛ, ɛpaɣzɩ-ɩ ‘takʋʋ nɛ ɖimɖimɖanaa.’ (1 Awiya 10:1) Ebree tɔm piye nɖɩ palabɩnɩ tʋmɩyɛ cɩnɛ yɔ, papɩzɩɣ nɛ pɛɖɛzɩ-ɖɩ ɖɔɖɔ se “tɔm kaɖɛ ñɩndʋ.” Ɛlɛ tɔm tʋnɛ tɩɩwɩlɩɣ se abiɖe wobi Salomɔɔ cɔlɔ se ɛ nɛ ɩ patɩŋnɩ ɖimɖimɖanaa yɔɔ nɛ pala faawɩyɛ yem. Kɩɖaʋ nakʋyʋ yɔ: Keɣa 48:5 taa, palabɩnɩ tʋmɩyɛ Ebree tɔm piye nɖɩ alɩwaatʋ ndʋ pɔyɔɔdaɣ tɔm kɩcɛyɩtʋ ndɩ ndɩ tɔm ɛzɩ kɩwɛɛkɩm, sɩm nɛ ñʋʋ yabʋ tɔm mbʋ yɔ. Ye mbʋ pɩtʋʋ fɛyɩ se Seba abiɖe wobi Salomɔɔ cɔlɔ nɛ ɛtɩŋnɩ tɔm kɩcɛyɩtʋ ndɩ ndɩ yɔɔ se ɛtakɩnɩ Salomɔɔ lɔŋsɩnɖɛ. Bibl yɔɔdʋʋ se abiɖe heyi-i “ndʋ ndʋ tɩwɛ ɛ-laŋɩyɛ taa yɔ ti-kpeekpe.” Nɛ Salomɔɔ “cosi tɔm kpeekpe ndʋ ɖɩpɔzaa yɔ: Tɔm natʋyʋ fɛyɩ se tɩmɛlɩ wiyaʋ nɛ eticosi-i tʋ.”—1 Awiya 10:2b, 3.
w99 1/11 20 § 6
Kʋjɔʋ labʋ wɛtʋ sɔsɔtʋ
Tɔm ndʋ Abiɖe nɩwa nɛ mbʋ ɛnawa yɔ, pɩɩɖɩɣzɩ-ɩ. Piyeba nɛ ecosi nɛ tɩ luzuu se: “Koboyaɣ tɩnaa kɛlɛ ña-lɩmɖʋyaa panɛ yɔ, mba pasɩŋɩɣ ñɛ-ɛsɩndaa tam nɛ panɩɣ ñɔ-tɔm yɔ!” (1 Awiya 10:4-8) Abiɖe tɩyɔɔdɩ se pɛkɛ koboyaɣ tɩnaa mbʋ pʋyɔɔ yɔ pɛwɛ ñɩm sakɩyɛ taa, paa pɩɩkɛ mbʋ toovenim kɔyɔ. Ɛlɛ ɛtɔm se Salomɔɔ lɩmɖʋyaa kɛ koboyaɣ tɩnaa mbʋ pʋyɔɔ yɔ paawɛnɩ waɖɛ nɛ pewelisiɣ paa ɛzɩmtaa lɔŋsɩnɖɛ nɖɩ Ɛsɔ ha Salomɔɔ yɔ. Seeba abiɖe ha kɩɖaʋ kɩbaŋʋ Yehowa samaɣ ŋga kɛwɛ sɔnɔ yɔ, mbʋ pʋyɔɔ yɔ kɛwɛ Lɩzɩyʋ maɣmaɣ nɛ ɛ-Pɩyalʋ Yesu Krɩstʋ pɔ-lɔŋsɩnɖɛ ñalɩmɩyɛ taa!
w99 1/7 30-31
Ɛgɔndʋ wobu mbʋ pɩkɔnɩ wazaɣ sɔsɔɔ yɔ
Salomɔɔ lɔŋsɩnɖɛ nɖɩ Seba abiɖe welisaa nɛ e-kewiyaɣ taa ñɩm mbʋ ɖɩnawa yɔ piyeba nɛ “pɩɖɩɣzɩ-ɖɩ yem.” (1 Awiya 10:4, 5) Nabɛyɛ maɣzɩɣ se tɔm tʋnɛ tɩwɩlɩɣ se mbʋ abiɖe nawa yɔ piyeba nɛ “fezuu tɩtasɩ ɖɩ-taa wɛʋ.” Halɩ lɔŋsɩnɖʋ nɔɔyʋ yɔɔdaa se ɖifiɣnaa! Ɛlɛ paa pɩtɩɩkɛ suwe yɔ, tɔm ndʋ tɩwɩlɩɣ se mbʋ abiɖe nawa nɛ tɔm ndʋ ɛnɩwa yɔ, pɩɖɩɣzɩ-ɩ siŋŋ. Ɛya Salomɔɔ lɩmɖʋyaa se koboyaɣ tɩnaa mbʋ pʋyɔɔ yɔ, paahiɣ waɖɛ nɛ pewelisiɣ wiyaʋ lɔŋsɩnɖɛ, nɛ ɛsam Yehowa mbʋ pʋyɔɔ yɔ eyeba nɛ Salomɔɔ pɩsɩ wiyaʋ. Pʋwayɩ lɛ, ɛha wiyaʋ kʋjɔŋ weyi ɩmʋ ñɩm pɩdɩɩfɛyɩ yɔ. Sika ɖeke liidiye kaakpɛndɩ ɖa-alɩwaatʋ tʋnɛ tɩ-taa dɔlaarɩwaa 40000000. Salomɔɔ ɖɔɖɔ ha abiɖe kʋjɔŋ sakɩyɛ, ɛha-ɩ “pɩtɩŋa mbʋ ɖɩpɔzɩ-ɩ yɔ.”—1 Awiya 10:6-13.
Fezuu taa ñɩm
w08 1/11 22 § 4-6
Ŋŋsɩm-tʋ?
Sika ŋga Wiyaʋ Salomɔɔ kaawɛna yɔ, kaaɖɔ ɛzɩma?
Masɩ yɔɔdʋʋ se Tiiri wiyaʋ Iram tiyini Salomɔɔ sika tɔɔnɩwaa naanza, abiɖe ñaha-ɩ sika ŋga yɔ, kaaɖɔ mbʋ ɖɔɖɔ, nɛ Salomɔɔ mɛlɛnaa kpaɣ sika ŋga kɛcɛzɩ tɔɔnɩwaa 15 yɔ Ofiiri tɛtʋ taa nɛ pɔkɔna. Masɩ yɔɔdʋʋ se: “pɔkɔŋnaɣ Salomɔɔ sika liidiye nɖɩ pɩnaɣ pɩnaɣ yɔ, ɖi-yuŋ kɛ sika taŋga nɛ mɩnʋʋ nɛ hiŋ loɖo nɛ loɖo” yaa kaacɛzɩ tɔɔnɩwaa 25. (1 Awiya 9: 14, 28; 10:10, 14) Tɔm tʋnɛ tɩwɛ nɩʋ na? Caanaʋ taa awiya sika kaaɖɔ ɛzɩma?
Palɩ caanaʋ tɔm natʋyʋ yɔɔ, ndʋ lɔŋsɩnɖaa taɣ-tʋ liu yɔ; nɛ tɩyɔɔdʋʋ se Ejipiti Farawɔɔ Thoutmosis III (ɛtɔɔ kewiyitu pɩnzɩ kudoku naalɛ ñɩŋgʋ taa pʋcɔ nɛ palʋlʋʋ Yesu) woni sika tɔɔnɩwaa 13,5 Karnak, Amôn-Râ templo taa. Pɩnzɩ mɩnʋʋ lutozo ñɩŋgʋ taa P.P.Y, Asiirii Wiyaʋ Tiglath-piléser III mʋ lambuu ŋgʋ Tiiri cɔlɔ yɔ, kɩcɛzɩ sika tɔɔnɩwaa 4; nɛ Sargon II ñaha sika ŋga Babilɔɔnɩ ɛsɔnaa yɔ, kɔ-ɖɔʋ kaatalɩ mbʋ ɖɔɖɔ. Takayɩsɩ nasɩyɩ yɔɔdʋʋ se Masedonii Wɩyaʋ Philippe II (359-336 P.P.Y.) kaahuyi Pangée sika ɖihuyiye nɖɩ ɖɩwɛ Thrace yɔ ɖɩ-taa sika ŋga yɔ, kɛcɛzɩ tɔɔnɩwaa 28.
Pɔyɔɔdaa ɖɔɖɔ se alɩwaatʋ ndʋ Philippe pɩyalʋ Alexandre le Grand (336-323 P.P.Y.) mʋ Pɛrɩsɩ mba tɛtʋ Susa yɔ, ɛkpaɣ peeɖe sika ŋga yɔ, katalɩɣ tɔɔnɩwaa 1,18; nɛ ɛtasɩ kpaɣʋ Pɛrɩsɩ kpeekpe taa sɩka ŋga yɔ, kɔñɔtɩnɩ tɔɔnɩwaa 7000. Ye mbʋ ɖɩkpaɣ-tʋ nɛ ɖɩmaɣzɩnɩ tɔm ndʋ Bibl yɔɔdʋʋ Wiyaʋ Salomɔɔ sika ɖɔʋ yɔɔ yɔ, kɩtɩɖɛlɛsɩ niye.
12-18 SEPTEMBRE
ÑƖM MBƲ PƖWƐ ƐSƆTƆM TAA YƆ | 1 AWIYA 11–12
“Lɩzɩ weyi ña nɛ ɩ ɩkaɣ ɖɔkʋʋ nesi yɔ nɛ lɔŋsɩnɖɛ”
‘Awɛ Yehowa hɔɔlʋʋ yɔɔ?’
7 Wiyaʋ Salomɔɔ kɩɖaʋ kpɛlɩkɩɣ-ɖʋ lɔŋ sakɩyɛ. Eyeba nɛ Yehowa ɖiyi-i e-evebitu taa. Ɛsɔ ha-ɩ lɛɣtʋ siŋŋ nɛ ɛɖʋ-ɩ tʋmɩyɛ se ɛma templo ŋgʋ kɩ-wayɩ fɛyɩ yɔ Yeruzalɛm tɛtʋ taa. Ɛlɛ Salomɔɔ yeba nɛ taabalɩyɛ nɖɩ ɖɩɩwɛ ɛ nɛ Yehowa pɛ-hɛkʋ taa yɔ ɖɩwɛɛkɩ. (1 Aw. 3:12; 11:1, 2) Ɛsɔ paɣtʋ kaayɔɔdɩ kpayɩ se Yuuda wiyaʋ nɔɔyʋ “etaakuu halaa nɛ ɛkaa;” pɩtɩkɛ mbʋ yɔ, “paawɛkɩ ɛ-laŋɩyɛ.” (Wp. 17:17) Salomɔɔ tɩña Ɛsɔ paɣtʋ, pʋyɔɔ ɛkpaɣ halaa 700. Pɩtasɩ lɛ, ɛɛwɛnɩ ɖɔɖɔ ɖaŋnaa 300. (1 Aw. 11:3) Ɛ-halaa sakɩyɛ taakɛ Izrayɛɛlɩ ñɩma nɛ pɛsɛɣaɣ cɛtɩm ɛsɔnaa. Pɩwɩlɩɣ se Salomɔɔ kaamanɩ ɖɔɖɔ paɣtʋ ndʋ Ɛsɔ kaaɖʋwa se abalaa ɩtaakpaɣ halaa mba patɩkɛ Izrayɛɛlɩ piya yɔ tɩ-yɔɔ.—Wp. 7:3, 4.
Ɛzɩma ŋpɩzɩɣ nɛ ŋcɔnɩ ña-laŋɩyɛ yɔɔ camɩyɛ?
6 Sataŋ sɔɔlaa se ɖɩla ɛzɩ ɛnʋ yɔ: Ðɩkaɖɩnɩ Yehowa nɛ ɖikizi ɛ-paɣtʋ yɔɔ ɖɔm nɛ ɖɩñɩnɩ ɖa-maɣmaɣ ɖɛ-kɛzɛɣa. Ɛlɛ Sataŋ ɛɛpɩzɩɣ nɛ ɛkpa-ɖʋ nɛ ɖoŋ se ɖɩwɛɛnɩ ɛ-maɣzɩm nɛ ɛ-lakasɩ. Pʋyɔɔ ɛtɩŋɩɣnɩ nʋmɔŋ lɛɛŋ yɔɔ se ɛtalɩ ɛ-kaɖʋwa. Eyeba nɛ mba pɛwɛnɩ ɛ-maɣzɩm yɔ pɔcɔɔ-ɖʋ nɛ pata. (1 Yoh. 5:19) Ɛñɩnɩɣ se ɖa nɛ wɛ ɖɩɖʋ taabalɩyɛ paa ɖɩnawa se taabalɩyɛ nɖɩ ɖɩpɩzɩɣ nɛ ‘ɖɩwɛɛkɩ’ yaa ‘ɖipisi’ ɖa-maɣzɩm nɛ ɖa-lakasɩ yɔ. (1 Kɔr. 15:33; pɩ-tɛɛ tɔm.) Nʋmɔʋ ŋgʋ kɩ-yɔɔ ɛtɩŋnaa nɛ ehiɣ Wiyaʋ Salomɔɔ. Ɛɛkpaɣ halaa mba paakɛ sɩɩnaa layaa yɔ, nɛ pɔkɔɔ nɛ pɛwɛɛnɩ ɖoŋ ɛ-yɔɔ siŋŋ nɛ pazɩ pazɩ lɛ, ‘papɩsɩ ɛ-laŋɩyɛ’ nɛ eposi ɛ-tɩ nɛ Yehowa.—1 Aw. 11:3.
‘Awɛ Yehowa hɔɔlʋʋ yɔɔ?’
9 Ɛlɛ Yehowa eehuuzuu ɛ-ɛsa kɩwɛɛkɩm yɔɔ kaaʋ. Bibl heyiɣ-ɖʋ se: “Mbʋ pʋyɔɔ [Yehowa] hɔyɛ wɩnɩ Salomɔɔ se ɛha siɣye [Yehowa] . . . , weyi ɛwɩlɩ-ɩ ɛ-tɩ tam nabʋlɛ yɔ nɛ ɛɖʋ-ɩ paɣtʋ se ɛtaatɩŋ agbaaɣdaa agɔlɩma wayɩ; nɛ ɛtɩɖɔkɩ paɣtʋ ndʋ [Yehowa] ɖʋ-ɩ yɔ.” Piyeba nɛ samtʋ ndʋ Salomɔɔ haɣaɣ Ɛsɔ yɔ, tɩtɩtasɩ ɛlɛ kɛdɩnʋʋ. Salomɔɔ sɩm wayɩ lɛ, Izrayɛɛlɩ kewiyaɣ tayɩ nɛ awiya wena atɔɔ kewiyitu pʋwayɩ yɔ, akatɩ kala ndɩ ndɩ pɩnzɩ sakɩyɛ.—1 Aw. 11:9-13.
Fezuu taa ñɩm
Ɛ-tɔm pɩzaɣ se tɩkɛdɩnɩ Ɛsɔ
Cejewe ana akaɖɩnɩ Rehabam mbʋ lɛ, ɛlɛ ñɔɔzɩ ɛ-sɔɔjanaa se eyooni-yɛ. Ɛlɛ Yehowa tɩŋnɩ nayʋ Semayaa yɔɔ nɛ ɛɖʋ nɔɔ tɔm ndʋ tɩ-taa. Ɛyɔɔdaa se: “Ɩtaakpa se iyou mi-koobiya Izrayɛɛlɩ piya; abalʋ ɛpɩsɩ ɛ-ɖɩɣa taa, malabɩna tɔm ndʋ.”—1 Aw. 12:21-24.
Pɩtɩpɔzɩ se wiyaʋ ewolo nɛ ɛla you. Maɣzɩ nɛ ŋna ɛzɩma pɩpɩzaɣ se pitii Rehabam yɔɔɔ yɔ! Lɩmaɣza wena samaɣ kaɣ wɛnʋʋ wiyaʋ weyi ɛɖʋ ɛ-taa se ɛmakɩ mba pakaɖɩɣnɩ-ɩ yɔ nɛ “pɩjɩsɩ,” nɛ lɛɛlɛɛyɔ lɛ, esu tamɩyɛ nɛ ɛcɔŋnɩ-wɛ yɔ, ɛ-yɔɔ? (Kalɩ tɔm ndʋ tɩwɛ 4 Awiya 13:7 taa yɔ.) Paa ɛyaa ɩmaɣzɩɣ suwe yɔ, wiyaʋ nɛ ɛ-sɔɔjanaa “pewelisi [Yehowa] tɔm nɛ papɩsɩ nʋmɔʋ, ɛzɩ [Yehowa] heyuu-wɛ yɔ.”
Lɔŋ weyi pɩkpɛlɩkɩɣ-ɖʋ? Pɩkpɛlɩkɩɣ-ɖʋ se pɩkɛɣnɩ lɔŋsɩnɖɛ se ɖiwelisini Ɛsɔ paa piyeki se ɛyaa ihoŋ-ɖʋ yɔ. Ye ɖɩñaŋ Ɛsɔ yɔ, ɖɔ-tɔm kɛdɩɣnɩ-ɩ nɛ ɛwazɩ-ɖʋ.—Wp. 28:2.
Pʋwayɩ lɛ, ɛbɛ Rehabam laba? Eluzi ɛ-tɩ nɛ eyele you labʋ nɛ samaɣ ŋga kalɩzɩ ka-tɩ yɔ lɛ, ɛkpaɣ lɩmaɣzɩyɛ se ɛñɔɔzʋʋ Yuuda nɛ Bɛnjamɛɛ cejewe wena a-yɔɔ ɛtɔkaɣ kewiyitu yɔ. Ɛkpazɩ tɛtʋ ndʋ “ɖoŋ pɩdɩɩfɛyɩ.” (4 Aw. 11:5-12) Mbʋ pɩtasɩ labʋ ɖeu yɔ lɛ se alɩwaatʋ natʋyʋ taa lɛ ɛɖɔŋaɣ Yehowa paɣtʋ yɔɔ. Alɩwaatʋ ndʋ Izrayɛɛlɩ cejewe 10 wena Yarobam ɖiyaɣ yɔ apaɣzɩ sɩɩnaa laʋ yɔ, a-taa ɛyaa sakɩyɛ ‘kpazaɣ ɖoŋ Rehabam’ pɩtɩŋnɩ ɛzɩma pɔɖɔŋaɣ nɛ powoki Yeruzalɛm se paɖʋ nesi toovenim Ɛsɔ sɛtʋ yɔ. (4 Aw. 11:16, 17) Ɛzɩma Rehabam luzaɣ ɛ-tɩ yɔ piyeba nɛ e-kewiyaɣ kpa ɖoŋ.
19-25 SEPTEMBRE
ÑƖM MBƲ PƖWƐ ƐSƆTƆM TAA YƆ | 1 AWIYA 13–14
Ɛbɛ yɔɔ pɩwɛɛ se ɖe-liu ɛsɩbɩnɩ mbʋ ɖɩwɛna yɔ nɛ ɖɩtɩlɩ ɖɔɖɔ ɖo-ɖoŋ kamaɣ?
w08 15/8 8 § 4
Ðɔkɩ ñe-siɣsiɣ wɛtʋ nɛ ña-laŋɩyɛ pilim
4 Pʋwayɩ lɛ Yerobowam heyi Ɛsɔ tɛ ɛyʋ se: “Kɔɔ ma nɛ ŋ ɖɩsʋʋ ɖɩɣa, ŋtɔɔ tɔɔnaɣ nɛ malabɩ-ŋ kʋjɔŋ.” (1Aw 13:7) Lɛɛlɛɛyɔ ɛzɩma nayʋ lakɩ? Nɩŋgbaŋʋʋ hɔm tɔm ndʋ eheyi wiyaʋ yɔ tɩ-wayɩ pɩwɛɛ se etisi nɛ ɛlɛ mʋ-ɩ ɛgɔndʋ na? (Keɣa 118:113) Yaa pɩwɛɛ se ekizi paa wiyaʋ ɛsɩndaa ɛwɛ ɛzɩ ekpiɖi ɛ-kɩwɛɛkɩm yɔɔ yɔ? Pɩtʋʋ fɛyɩ se Yerobowam kaawɛnɩ ɖoŋ se ɛpɩzɩ nɛ ɛla ɛ-taabalaa kʋjɔŋ sɔsɔŋ weyi ɩmʋ ñɩm pɩdɩɩfɛyɩ yɔ. Ye Ɛsɔ tɛ nayʋ liu tɛɛ kaakɔtaɣnɩ tomnaɣ yɔɔ wondu mɛsaɣ tɛɛ yɔ, pɩtʋʋ fɛyɩ se wiyaʋ kʋjɔʋ kʋnɛ kɩkaɣ-ɩ kɛʋ takɩm sɔsɔm. Ɛlɛ Yehowa kaaɖʋ paɣtʋ nayʋ se: “Taatɔɔ tɔɔnaɣ nɛ taañɔɔ lɩm nɛ taapɩsɩ ŋkɔɔnɩ nʋmɔʋ ŋgʋ ŋwobinaa yɔ.” Pʋyɔɔ nayʋ cosi-i kpayɩ se : “Paa ŋŋcɛlɩ-m ña-ɖɩɣa hɔɔlʋʋ kɔyɔ, maakaɣ tɩŋʋʋ ña-wayɩ nɛ maakaɣ tɔɔʋ tɔɔnaɣ nɛ maakaɣ lɩm ñɔʋ lone nɖɩ yɔ ɖɩ-taa.” Nɛ nayʋ lɩɩ Betɛɛlɩ nɛ ɛkpaɣ nʋmɔʋ lɛɛkʋ. (1 Aw. 13:8-10) Lɩmaɣza wena nayʋ kpaɣaa yɔ, lɔŋ weyi pɩkpɛlɩkɩɣ-ɖʋ ɛzɩma pɩwɛɛ se ɖɩɖɔkɩ ɖe-siɣsiɣ wɛtʋ nɛ ɖa-laŋɩyɛ pilim yɔ pɩ-yɔɔ?—Rom. 15:4.
w08 15/8 11 § 15
Ðɔkɩ ñe-siɣsiɣ wɛtʋ nɛ ña-laŋɩyɛ pilim
15 Ɛzɩma picoɖi Yuuda nayʋ ɛnɛ yɔ, lɔŋ weyi ɖɔɖɔ ɖɩpɩzɩɣ nɛ ɖɩkpɛlɩkɩ? Aduwa 3:5 yɔɔdʋʋ se:“Taa Kɩbaɣlʋ liu nɛ ña-laŋɩyɛ pilim nɛ taataa ña-maɣmaɣ ñɔ-lɔŋ liu.” Mbʋ ɛzɩ eewobi pɩ-yɔɔ nɛ ɛtaa Yehowa liu ɛzɩ ɛtɩɩlakʋʋ yɔ lɛ, tɔm tʋnɛ tɩ-taa lɛ, Yuuda nayʋ ta ɛ-maɣmaɣ ɛ-lɩmaɣza liu. Kɩɖaʋ kʋnɛ kɩwɩlɩɣ kpayɩ kpayɩ se pɩcɛyaa se ɖɩwɩlɩ se ɖɩsɩm ɖo-ɖoŋ kamaɣ nɛ ɖɩsɛɛ Yehowa nɛ siɣsiɣ wɛtʋ.
w08 15/8 9 § 10
Ðɔkɩ ñe-siɣsiɣ wɛtʋ nɛ ña-laŋɩyɛ pilim
10 Pɩɩwɛɛ se Yuuda nayʋ ɛnɛ ɛpɩzɩ nɛ ɛna ajitu lakasɩ nzɩ nayʋ akpadɩyʋ laba yɔ. Pɩɩwɛɛ se ɛpɔzɩ ɛ-tɩ se: ‘Ɛzɩma Yehowa pɩzɩɣ nɛ etiyi tiyiyu ɛyʋ lɛlʋ cɔlɔ se ɛlɛ ɛkɔɔ nɛ eheyi-m tɔm ndʋ tɩwɛ ndɩ nɛ tɔm ndʋ Ɛsɔ kaaheyi-m yɔ?’ Nayʋ pɩzaɣ se ɛpɔzɩ Yehowa nɛ ɛlɩzɩ-ɩ tɔm taa camɩyɛ, ɛlɛ Masɩ wɩlɩɣ se nayʋ ɛnʋ ɛtɩla mbʋ. Ɛlɛ, ɛtɩŋ nayʋ akpadɩyʋ nɛ ‘ɛpɩsɩnɩ ɛ-wayɩ nɛ ɛtɔɔ tɔɔnaɣ nɛ ɛñɔɔ lɩm’. Pɩtaakɛdɩnɩ Yehowa. Nayʋ ɛnʋ ɛkʋyɩ pʋwayɩ ɛkpaɣ ɛ-nʋmɔʋ se ɛpɩsɩɣ Yuuda lɛ, tɔɔyʋʋ nakʋyʋ lɩɩ ɛ-yɔɔ nɛ kɩkʋ-ɩ. Mbʋ pɩtalɩ nayʋ ɛnɛ yɔ pɩlabɩ pʋtɔdɩyɛ kpem!—1 Aw 13:19-25.
Fezuu taa ñɩm
w10 1/7 29 § 5
Ɛcɔŋna se ɛna mbʋ pɩkɛ kɩbam yɔ
Kɔzɩ kɔzɩ lɛ, tɔm ndʋ tɩwɛ 1 Awiya 14:13 taa yɔ, tɩwɩlɩɣ-ɖʋ lɩmaɣza kɩbana naayɛ Yehowa yɔɔ nɛ mbʋ ɛsɔɔlaa se ɛna ɖa-taa yɔ. Tɔzɩ se “pana” pʋyʋ kɩbam nabʋyʋ Abiya taa. Pɩwɩlɩɣ se Yehowa ñɩnɩ Abiya laŋɩyɛ taa nɛ ɛkɔɔ nɛ ɛna kɩbam nabʋyʋ. Ye ɖɩkpaɣ-ɩ nɛ ɖɩmaɣzɩnɩ ɛ-hɔʋ taa ñɩma yɔ, ɛzɩ lɔŋsɩnɖʋ nɔɔyʋ yɔɔdʋʋ yɔ, ɛwɛ ɛzɩ kijiɣa yɔ kaaŋ cikpeŋ huuye naɖɩyɛ taa. Kɩbam mbʋ Yehowa nawa yɔ, pɩkɛdɩnɩ-ɩ nɛ ɛwazɩ pɩ-yɔɔ nɛ ɛna ɛyʋ ɛnɛ ɛ-pʋtɔdɩyɛ hɔʋ kɩdɛkɛdʋʋ kʋnɛ kɩ-taa.
26 SEPTEMBRE–2 OCTOBRE
ÑƖM MBƲ PƖWƐ ƐSƆTƆM TAA YƆ | 1 AWIYA 15–16
Aazaa wɩlaa se ɛwɛ abalɩtʋ—Ña yɔ?
w12 15/8 8 § 4
“Pakaɣ-ŋ hɛyʋʋ tʋmɩyɛ nɖɩ ŋlaba yɔ ɖɩ-yɔɔ”
Pɩnzɩ 20 nzɩ sɩ-taa Izrayɛɛlɩ ɛjaɖɛ tayaa nɛ ɖɩpɩsɩ kewiyisi naalɛ yɔ, Yuuda ɛjaɖɛ yeba nɛ sɩɩnaa latʋ pisi-ɖɩ pɩdɩɩfɛyɩ. Alɩwaatʋ ndʋ Aazaa pɩsɩ wiyaʋ pɩnaɣ 977 P.P.Y. yɔ Kanaŋ lʋlʋʋ ɛsɔnaa kaawɛnɩ ɖoŋ halɩ pɩkpɛndɩnɩ wiyaʋ ɖɩɣa taa mba yɔɔ. Ɛlɛ Aazaa kewiyitu tɔɔʋ tɔm ndʋ fezuu yeba nɛ pama yɔ, tɩyɔɔdʋʋ se ‘Aazaa labɩ mbʋ pɩkɛ kɩbam nɛ pɩkɛdɩnɩ ɛ-Ɛsɔ Yehowa yɔ’. “Ɛyɔkɩ sɩɩnaa pɛɛ nɛ ɛsɔ miŋ apandama.” (4 Awiya. 14:2, 3) Pɩtasɩ lɛ, Aazaa ɖɔɔnɩ Yuuda kewiyaɣ taa “hatiye tɩnaa,” pʋ-tɔbʋʋ se mba paakɛ abalaa nɛ pasʋʋnɩ abalaa lalaa pɛ-Ɛsɔ sɛtʋ nʋmɔʋ taa yɔ. Aazaa tɩsɩɩnɩ ɛyaa panɛ pɔ-ɖɔnʋʋ ɖeke. Eseɣti ɖɔɖɔ Yuuda samaɣ se ‘kañɩnɩ Yehowa ka-caanaa tɛ Ɛsɔ’ nɛ kɔɖɔ ‘Ɛsɔ paɣtʋ yɔɔ nɛ ɛ-kpalɩtʋ kpeekpe yɔɔ.’—3 Aw. 15:12, 13; 4 Aw. 14:3.
Sɛɛ Yehowa nɛ laŋɩyɛ pilim!
7 Pɩwɛɛ se ɖa-taa paa anɩ ɛtazɩ ɛ-taa nɛ ɛna se ɛsɛɣ Ɛsɔ nɛ laŋɩyɛ pilim yaa we. Pɔzɩ ña-tɩ se: ‘Mɛntɛm man-taa se malakɩ Yehowa sɔɔlɩm nɛ malʋ toovenim Ɛsɔ sɛtʋ yɔɔ nɛ mankandɩyɩ Ɛsɔ samaɣ yɔɔ nɛ kɩdɛkɛdɩm nabʋyʋ ɛtaawɛɛnɩ ɖoŋ kɔ-yɔɔ?’ Pɩtʋʋ fɛyɩ se pɩɩpɔzɩ Aaza abalɩtʋ siŋŋ pʋcɔ nɛ ɛpɩzɩ nɛ ɛlʋbɩnɩ Maaka weyi ɛɛkɛ “abiɖe” tɛtʋ taa yɔ. Pɩtɩla ŋŋsɩŋ nɔɔyʋ se ɛlakɩ kɩdɛkɛdɩm mbʋ ɖeyi ɖeyi Maaka kaalaba yɔ, ɛlɛ ŋkaɣ katʋʋ wɛtʋ ndʋ tɩ-taa pɩkaɣ pɔzʋʋ se ŋwɛɛ abalɩtʋ ɛzɩ Aaza yɔ. Ðɩkpaɣ se ña-taabalʋ yaa ñɔ-hɔʋ taa tʋ nɔɔyʋ labɩ kɩwɛɛkɩm nɛ ekizi se eekpiɖiɣ nɛ palɩzɩ-ɩ ɛgbɛyɛ taa. Ɛzɩma ŋlakɩ? Ŋpɩzɩɣ nɛ ŋtɛ ña-taa nɛ ŋcɛ ña nɛ ɩ mɩ-taabalɩyɛ na? Ɛbɛ ña-laŋɩyɛ kaɣ-ŋ seɣtuu se ŋla alɩwaatʋ ndʋ tɩ-taa?
it-1 194-195
Aazaa
Paa ɛtaawɛɛnɩ lɔŋsɩnɖɛ nɛ fezuu taa sɩmtʋ alɩwaatʋ natʋyʋ taa yɔ, Aazaa wɛtʋ kɩbandʋ nɛ ɛzɩma ɛɖɔɔnɩ tisuu yebiyaa yɔ, pɩɩmʋ ñɩm siŋŋ nɛ pihuuzi ɛ-ɛjandʋ yɔɔ. Pʋyɔɔ paɖʋ-ɩ Yuuda awiya siɣsiɣ ñɩma hɛkʋ taa. (4Aw 15:17) Pɩnzɩ 41 nzɩ Aazaa tɔɔ kewiyitu yɔ, sɩkpaɣ alɩwaatʋ ndʋ Izrayɛɛlɩ awiya lutozo anɛ atɔɔ kewiyitu yɔ: Yerobowam, Naadaabʋ, Baasa, Ela, Zimirii, Omirii, Tibini nɛ Ahaabɩ. (1Aw 15:9, 25, 33; 16:8, 15, 16, 21, 23, 29) Aazaa sɩm wayɩ lɛ, ɛ-pɩyalʋ Yozafaatɩ pɩsɩ wiyaʋ.—1Aw 15:24.
Fezuu taa ñɩm
w98 15/9 21-22
Ña-naʋ taa lɛ Ɛsɔ wɛ keekee?
Kɩɖaʋ nakʋyʋ yɔ: Natʋ natʋyʋ kaayɔɔdaa se pakaɣ hɔm mba paɖaɣnɩ maʋ Yeriikoo tɛtʋ yɔ pa-nɩŋgbaŋʋʋ. Kalɩ natʋ tɔm ndʋ nɛ pʋwayɩ lɛ ŋtazɩ nɛ ŋna ɛzɩma tɩlaba yɔ. Yozuwee 6:25b-26 yɔɔdʋʋ se: “Puwiye lɛ, Yozuwee ɖuwaa se ‘Piyoo [Yehowa] ɛsɩndaa ɛyʋ weyi ɛkaɣ kʋyʋʋ se ɛɖaɣnɩ maʋ Yeriikoo tɛtʋ yɔ; ɛ-kajalaɣ pɩɣa ɛkaɣnɩ sɩʋ tigiɖe; ɛ-pɩyalʋ tɩnʋʋ ɛkaɣnɩ tɛya kʋsʋʋ.’” Tɔm ndʋ tɩlaba pɩnzɩ 500 wayɩ mbʋ pʋyɔɔ yɔ ɖɩkalɩɣ 1 Awiya 16:34 taa se: “[Wiyaʋ Ahaabɩ] wɛɛ taa Betɛɛlɩ tʋ Hiyɛɛlɩ ma Yeriikoo tɛtʋ; ɛ-pɩyalʋ kɔɔnɔɔ tʋ Abiram yɔɔ ɛsɩ ti-tigiɖe nɛ ɛ-pɩyalʋ tɩnʋʋ Seguubu ɛɖɩɣnɩ tɩ-taya, ɛzɩ Kɩbaɣlʋ tɔm kaayɔɔdʋʋ yɔ, ndʋ eeheyini Nuuni pɩyalʋ Yozuwee nɔɔ yɔ.” Ɛsɔ weyi ɛwɛ keekee yɔ ɛ-ɖeke ɛpɩzɩɣna nɛ ɛyɔɔdɩ natʋ tɔm ɛzɩ tʋnɛ yɔ nɛ eyele nɛ tɩla ɖɔɖɔ.
3-9 OCTOBRE
ÑƖM MBƲ PƖWƐ ƐSƆTƆM TAA YƆ | 1 AWIYA 17–18
“Ɩwɛɣ nɛ ikpiliɣni hɔɔlɩŋ naalɛ yɔɔ pɩkɔɔ nɛ pɩsɩɩnɩ ɖooye?”
Wɛɛnɩ tisuu nɛ ŋkpaɣ lɩmaɣza kɩbana
6 Yele nɛ ɖɩmaɣzɩ caanaʋ taa Izrayɛɛlɩ piya tɔm natʋyʋ yɔɔ pazɩ. Sɩtalɩ Kanaŋ ɛjaɖɛ taa lɛ, pɩɩpɔzaa se sɩkpaɣ lɩmaɣzɩyɛ sɔsɔyɛ naɖɩyɛ: Sɩkaɣ Yehowa sɛʋ na, yaa ɛsɔnaa lalaa sɩkaɣ sɛʋ? (Kalɩ Yozuwee 24:15.) Ðɩpɩzɩɣ nɛ ɖɩmaɣzɩ se lɩmaɣzɩyɛ nɖɩ ɖɩ-kpaɣʋ fɛyɩ kaɖɛ. Ɛlɛ pɩɩkɛ sɩm nɛ wezuu tɔm. Tam sakɩyɛ lɛ, Izrayɛɛlɩ piya kpaɣ lɩmaɣza kɩdɛkɛda tɔm hʋyaa alɩwaatʋ taa nɛ sɩla cɛtɩm ɛsɔnaa sɔɔlɩm nɛ sɩha siɣye Yehowa. (Th. 2:3, 11-23) Pɩkɔma nɛ pɩtalɩ Eliya alɩwaatʋ taa ɖɔɖɔ lɛ, pɩɩkɛnɩ Izrayɛɛlɩ piya kɩjɛyʋʋ se sɩtasɩ lɩmaɣza sɔsɔna naayɛ kpaɣʋ. Peeɖe nayʋ Eliya heyi-wɛ kpayɩ mbʋ pɩwɛɛ se pala yɔ: Papɩzaɣ se pɛsɛɛ Yehowa yaa cɛtɩm ɛsɔ weyi payaɣ se Baalɩ yɔ. (1 Aw. 18:21) Eliya kaakalɩ samaɣ mbʋ pʋyɔɔ yɔ, kaawɛɛ nɛ kekpiliɣni hɔɔlɩŋ naalɛ yɔɔ. Nɛ ŋpɩzɩɣ ŋtasɩ maɣzʋʋ ɖɔɖɔ se lɩmaɣza ana a-kpaɣʋ taawɛɛ kaɖɛ mbʋ pʋyɔɔ yɔ ɖɩnawa se ye ɛyʋ ɛlɩzaa se ɛsɛɣ Yehowa yɔ, pɩkɛ lɩmaɣzɩyɛ kɩbanɖɛ nɛ ɛ-maɣmaɣ pɩwazɩɣ. Toovenim taa lɛ, ye ɛyʋ ɛmaɣzɩ camɩyɛ yɔ, ɛɛpɩzɩɣ nɛ ɛlɩzɩ se ɛsɛɣ Baalɩ. Paa mbʋ yɔ Izrayɛɛlɩ piya kaawɛɛ nɛ ‘sikpiliɣni hɔɔlɩŋ naalɛ yɔ’. Pʋyɔɔ Eliya seɣti-sɩ se sɩkpaɣ lɩmaɣza kɩbana nɛ sɩsɛɛ Yehowa.
Ɛlʋbɩ kele kele Ɛsɔ sɛtʋ yɔɔ
15 Ɛyɔɔdaɣ mbʋ lɛ, pɩtɛzɩ seɣtuu Baalɩ cɔjɔnaa nɛ “pɛwɛɛ pamakɩ kubusi ɖoŋ nɛ pɔsɔkɩ pa-tɩ laɣɖa nɛ kɩgbɛzɛŋ, ɛzɩ pɛ-tɛ sɔnzɩ pɔzʋʋ yɔ, nɛ calɩm kpeŋ pɔ-yɔɔ.” Ɛlɛ pɩtɩŋa mbʋ yɔ kpɛɖɛ, ‘paanɩɣ nɔɔ nakɛyɛ nɛ nɔɔyʋ eecosuu, paanɩɣ pa-tɩmʋʋ.’ (1 Aw. 18:28, 29) Toovenim lɛ, Baalɩ tɩkɛ Ɛsɔ. Sataŋ lubuni lɩmaɣzɩyɛ nɖɩ se epeɣzi ɛyaa nɛ paha Yehowa siɣye. Toovenim, ye ɖɩlɩzɩ nɔɔyʋ se ɛkɛ ɖa-kɩbaɣlʋ nɛ pɩtɩkɛ Yehowa yɔ, pʋɖʋzʋʋ-ɖʋ nɛ halɩ ɖɩkaɣ tɔɔʋ fɛyɛ.—Kalɩ Keɣsi 24:3; 113B:4-8.
Ɛlʋbɩ kele kele Ɛsɔ sɛtʋ yɔɔ
18 Pʋcɔ nɛ Eliya paɣzɩ ɛ-adɩma lɛ, pɩtʋʋ fɛyɩ se samaɣ kaaɖiɣni ka-tɩ pɔzʋʋ se ɛzɩ Yehowa kaɣ kɛʋ kaabɩzaɣ ɛzɩ Baalɩ yɔ. Eliya tɩɩtɛm adɩma lɛ, pocosi pɔ-tɔm pɔzʋʋ mbʋ pɩ-yɔɔ. Bibl tɔm se: “[Yehowa] miŋ tii nɛ ɩñaɣ kɩlaʋ kpɩnɛ nɛ ɖasɩ nɛ pɛɛ, nɛ lɩm ɖɔɖɔ mbʋ pɩɩwɛ hɛɛʋ taa yɔ.” (1 Aw. 18:38) Ɛzɩma Yehowa cosi tɔm yɔɔ yɔ, pɩlabɩ piti pɩdɩɩfɛyɩ. Ɛbɛ samaɣ ñalaba?
Fezuu taa ñɩm
w08 1/4 19, aɖakaɣ
Ɛcɔnaa nɛ ɛɖaŋ
Wɩlɩŋ weyi ɛɛkɔm Eliya alɩwaatʋ taa yɔ, alɩwaatʋ ɛzɩma pɩkpaɣaa?
Yehowa tɛ nayʋ Eliya kaaheyi Wiyaʋ Ahaabɩ se pɩkazɩ pazɩ wɩlɩŋ sɩɣ tɩnaɣ. Nɛ tɔm ndʋ tɩlabɩ pɩnaɣ naadozo ŋga taa, kpaɣnɩ alɩwaatʋ ndʋ Eliya yɔɔdɩ wɩlɩŋ tɔm ndʋ yɔ. (1 Awiya 18:1) Eliya yɔɔdaa se Yehowa kaɣ yebu nɛ tɛʋ nɩɩ nɛ pitileɖi lɛ Yehowa yele nɛ pɩla mbʋ. Tɛʋ nɩwa. Nabɛyɛ pɩzɩɣ nɛ pɔyɔɔdɩ se wɩlɩŋ sɩ tɩnaɣ pɩnaɣ naadozo ñɩŋga taa nɛ pʋyɔɔ lɛ wɩlɩŋ alɩwaatʋ tɩtalɩ pɩnzɩ naadozo. Paa mbʋ yɔ, Yesu nɛ Yakubu peheyi-ɖʋ se wɩlɩŋ alɩwaatʋ kpaɣ “pɩnzɩ naadozo nɛ fenasɩ loɖo.” (Luka 4:25; Yakubu 5:17) Ɛzɩ tɔm tʋnɛ tɩkaɖɩɣnɩ ɖama?
Aayɩ tɩɩkaɖɩɣnɩ ɖama. Caanaʋ taa Izrayɛɛlɩ taa lɛ, wɩlɩŋ alɩwaatʋ pɩzɩɣ nɛ pɩkpaɣ fenasɩ loɖo. Pɩtʋʋ fɛyɩ se wɩlɩŋ alɩwaatʋ kaatɛm paɣzʋʋ nɛ pɩwɛɛ nɛ pileɖiɣ nɛ pɩkpaɣ ɖoŋ pʋcɔ nɛ Eliya kɔɔ nɛ eheyi Ahaabɩ pɩ-tɔm. Wɩlɩŋ kaapaɣzɩ fenasɩ loɖo pʋcɔ nɛ ɛyɔɔdʋʋ tɔm ndʋ. Ye mbʋ, kpaɣnɩ alɩwaatʋ ndʋ Eliya calɩ yɔɔdʋʋ wɩlɩŋ tɔm nɛ pɩkɔɔ pɩsɩɩnɩ alɩwaatʋ ndʋ ɛyɔɔdaa se wɩlɩŋ sɩɣ tɩnaɣ “pɩnaɣ naadozo ŋga taa” yɔ, wɩlɩŋ kaatɛm leɖuu pɩnzɩ naadozo nɛ fenasɩ loɖo. Wɩlɩŋ tɛm kpaʋ nɛ pɩla “pɩnzɩ naadozo nɛ fenasɩ loɖo” pʋcɔ nɛ samaɣ kpeɣli Karmɛɛlɩ Pʋʋ yɔɔ se kana piti lakasɩ sɔsɔsɩ.
Maɣzɩ alɩwaatʋ ndʋ Eliya kaacalɩ Ahaabɩ cɔlɔ wobu yɔ tɩ-yɔɔ nɛ ŋna. Ɛyaa maɣzaɣ se Baalɩ kɛnɩ “mɩndʋ yɔɔ caɣyʋ,” pʋ-tɔbʋʋ se ɛsɔ weyi ɛkaɣ kɔnʋʋ tɛʋ nɛ eyele nɛ wɩlɩŋ sɩɩ tɩnaɣ yɔ. Wɩlɩŋ alɩwaatʋ leɖaɣ nɛ pɩcɛzɩɣ alɩwaatʋ ndʋ pɩtɩɩkpakɩɣ yɔ lɛ, ɛyaa pɔzaɣ pa-tɩ se: ‘Ɛzɩ le Baalɩ wɛɛ? Ɛzɩmtaa ɛkaɣ tɛʋ kɔnʋʋ?’ Pɩtʋʋ fɛyɩ se tɔm ndʋ Eliya yɔɔdaa se tɛʋ ɛɛkaɣ nɩʋ nɛ ɖoluu ɛɛkaɣ kpaʋ pɩkɔɔ nɛ pɩsɩɩnɩ alɩwaatʋ ndʋ ɛnʋ yɔɔdʋʋ se tɛʋ ɛnɩɩ yɔ, pɩɩcɛyɩ Baalɩ sɛyaa siŋŋ.—1 Awiya 17:1.
10-16 OCTOBRE
ÑƖM MBƲ PƖWƐ ƐSƆTƆM TAA YƆ | 1 AWIYA 19–20
“Ñɩnɩ laŋɩyɛ hɛzʋʋ Yehowa cɔlɔ”
Taa Yehowa liu nɩɣzɛ alɩwaatʋ taa
5 Kalɩ 1 Awiya 19:1-4. Ɛlɛ sɔɔndʋ kɔm nɛ pɩkpa Eliya alɩwaatʋ ndʋ Yezaabɛɛlɩ ñɩnaɣ se ɛkʋ-ɩ yɔ. Pʋyɔɔ esewa nɛ ewolo lone nɖɩ payaɣ se Bɛrsaabee yɔ ɖɩ-taa. Piitibi-i yɔɔɔ siŋŋ, nɛ pʋyɔɔ lɛ “ɛpɔzɩ se sɩm ɛkpaɣ-ɩ.” Ɛbɛ yeba nɛ ɛwɛɛnɩ lɩmaɣza ana? Eliya taatalɩ pilim, nɛ ‘ɛɛkɛ ɛyʋ ɛzɩ ɖa yɔ.’ (Yak. 5:17) Pɩtɩla, nɩɣzɛ nɛ ɛzɩma pɩɩnɩ-ɩ siŋŋ yɔ, mbʋ yebina nɛ pitibi-i yɔɔɔ. Pɩtɩla ɖɔɖɔ yɔ, Eliya maɣzaɣ se pana wena payɩ ɛñaɣaa nɛ ɛlʋ Ɛsɔ sɛtʋ kele kele ñɩndʋ yɔɔ yɔ, atɩwazɩ pʋyʋ, nɛ pɩtɩlɛɣzɩ nabʋyʋ Izrayɛɛlɩ ɛjaɖɛ taa. Ɛmaɣzaɣ ɖɔɖɔ se e-ɖeke ɛɖɔkɩnɩ Yehowa sɛtʋ kpam. (1 Aw. 18:3, 4, 13; 19:10, 14) Pɩtɩla, pɩɖɩɣzɩɣ-ɖʋ se pitibi nayʋ siɣsiɣ tʋ ɛnʋ yɔɔɔ. Ɛlɛ Yehowa nɩ ɛ-tɔm taa.
Ɛ-Ɛsɔ hɛzɩ ɛ-laŋɩyɛ
13 Ŋmaɣzɩɣ se ɛzɩma pɩlakɩ Yehowa alɩwaatʋ ndʋ ɛcɔŋnaɣ ɛ-nayʋ kɩbanʋ ɛnʋ hɔɖʋʋ tɛɛ kañɩmbusuu taa eɖiɣni pɔzʋʋ se sɩm ɛkpaɣ-ɩ yɔ? Bibl sɩɣnɩ-ɖʋ nɛ ɖicosi tɔm ndʋ tɩ-yɔɔ. Eliya hɩnaa nɛ eɖou lɛ, Yehowa tiyi e-tiyiyu nɔɔyʋ nɛ ɛlɛ ñotukuni-i hɛɛɛ nɛ efezi-i nɛ ɖom yɔɔ nɛ eheyi-i se: “Kʋyɩ ŋtɔɔ.” Nɛ Eliya la mbʋ ɖɔɖɔ. Tiyiyu ɛnʋ ɛɛsɩ-ɩ kakandɛɛʋ nɛ lɩm kokoɖe. Eliya sɛ tiyiyu ɛnʋ se ɛlabaɣ lɛ yaa we? Bibl yɔɔdɩ tobi yem se ɛtɔɔwaa nɛ ɛñɔɔ nɛ ɛɖaɣnɩ ɖou. Pɩɩkɩlɩ-ɩ tibu yɔɔɔ na nɛ ɛtaapɩzɩɣ se ɛyɔɔdɩ yaa we? Paa pɩtɩɩkɛ suwe yɔ, tiyiyu tasɩ-ɩ kʋsʋʋ tɛbɩyɛ tɛɛ nɛ eheyi-i se: “Kʋyɩ ŋtɔɔ!” Nɛ ɛtasɩ-ɩ heyuu tɔm kɩcɛyɩtʋ tʋnɛ: “Mbʋ yɔ pɩkazɩ-ŋ nʋmɔʋ sɔsɔʋ.”—1 Aw. 19:5-7.
Ɛ-Ɛsɔ hɛzɩ ɛ-laŋɩyɛ
21 Paa hɔɔlʋʋ ŋgʋ kɩ-taa lɛ, kɛdaɣ tɔzʋʋ-ɖʋ se Yehowa taawɛɛ maamaaci lakasɩ nzɩ sɩ-taa. Eliya kaanawa se Yehowa fɛyɩ ɛzɩ ɛsɔnaa yaa agɔlɩma wena ɛyaa maɣmaɣ luba nɛ pamaɣzɩɣ se ana tɩna ɛjaɖɛ yɔɔ ɖoŋ yɔ. Cɛtɩm ɛsɔnaa mba, pa-taa lɛlʋ lɛ Baalɩ weyi ɛ-sɛyaa ɖɛyaɣ-ɩ se ɛkɛ “mɩndʋ talɩyʋ” yɔ, pʋ-tɔbʋʋ lɛ se ɛnʋ yekina nɛ tɛʋ nɩɣ. Toovenim taa lɛ, Yehowa cɔlɔ ɛjaɖɛ yɔɔ ɖoŋ tɩŋa lɩnaa, ɛlɛ ɛ-maɣmaɣ ɛpaɣlaa kpem nɛ ɛkɩlɩ mbʋ mbʋ payɩ ɛlɩzaa yɔ. Halɩ ɛɛmakɩ ɛsɔdaa. (1 Aw. 8:27) Ɛlɛ, ɛzɩma tɩyɛ maamaaci lakasɩ nzɩ sɩsɩnɩ Eliya? Tɔzɩ se sɔɔndʋ kpaɣaɣ-ɩ. Yehowa Ɛsɔ ɖoŋ tɩŋa tʋ kaawɛ ɛ-cɔlɔ kpam, ye mbʋ pɩtaapɔzɩ se sɔɔndʋ natʋyʋ ɛkpa-ɩ nɛ Ahaabɩ yaa Yezaabɛɛlɩ.—Kalɩ Keɣa 117:6.
Ɛ-Ɛsɔ hɛzɩ ɛ-laŋɩyɛ
22 Miŋ mʋwa nɛ pɩtɛ lɛ, pusu limm nɛ ɛzɩ paamaʋ ɖooo kiɖe tɛɛ Ebree masɩ taa yɔ, Eliya nɩɩ “nɔɔ hɛɛɛ ñɩŋga nakɛyɛ taŋ.” Nɔɔ ŋga keheyi Eliya se ɛtasɩ yɔɔdʋʋ ndʋ tɩwɛ ɛ-taa yɔ. Peeɖe ɛɖaɣnɩ yɔɔdʋʋ ndʋ tɩcɛyaɣ-ɩ yɔ. Pɩtɔma yɔ, pɩɖaɣnɩ ɛ-laŋɩyɛ hɛzʋʋ. Ɛlɛ pɩtʋʋ fɛyɩ se tɔm ndʋ nɔɔ hɛɛɛ ñɩŋga ŋga katasɩ yɔɔdʋʋ yɔ, tɩhɛzɩ Eliya laŋɩyɛ nɛ pɩkɩlɩ. Yehowa heyi Eliya se ɛwɛnɩ wazaɣ ɛ-ɛzɩdaa. Ɛzɩma tɩyɛ? Ɛsɔ wɩlɩ-ɩ lɩmaɣza wena eɖiɣni kpaɣʋ se eɖezi Baalɩ sɛtʋ Izrayɛɛlɩ tɛtʋ taa yɔ. Toovenim taa lɛ, Eliya taala falaa tʋmɩyɛ, mbʋ pʋyɔɔ yɔ lɩmaɣza wena Ɛsɔ labɩ Baalɩ sɛtʋ yɔɔ yɔ, aakaɣ fetuu. Pɩtasɩ lɛ, Yehowa kaɣ tɩŋnʋʋ Eliya yɔɔ na nɛ ɛla ɛ-lɩmaɣza ana a-yɔɔ. Pʋyɔɔ Yehowa ɖaɣnɩ-ɩ ɖʋʋ tʋmɩyɛ nɛ ɛha-ɩ paɣtʋ ndʋ tɩ-yɔɔ pɩwɛɛ se ɛɖɔ yɔ.—1 Aw. 19:12-17.
Fezuu taa ñɩm
w97 1/11 31 § 2
Tɩ laʋ nɛ siɣsiɣ wɛtʋ kɩɖaʋ nakʋyʋ
Sɔnɔ Yehowa sɛyaa sakɩyɛ wɩlɩɣ ɖɔɖɔ se pɛwɛnɩ tɩ laʋ lɩmaɣza. Nabɛyɛ yebi “hayɩm” yaa mbʋ palakaɣ nɛ pɔcɔŋnɩ pa-tɩ yɔɔ yɔ, nɛ pɛɖɛɛ se posusi laŋhɛzɩyɛ tɔm kɩbandʋ lona wena aposaa yɔ a-taa yaa pɛkɛ Betɛɛlɩ hɔʋ taa ñɩma. Nabɛyɛ ɖɔm nʋmɔʋ nɛ powolo ajɛɛ lɛɛna taa se paɖʋ nesi Yehowa Aseɣɖe Tɩnaa ɛgbɛyɛ kuduyuŋ maʋ ɖʋtʋ. Pa-taa sakɩyɛ tisaa nɛ palakɩ tʋma wena ɛyaa maɣzɩɣ se atɩlɩɩ pʋyʋ yɔ. Paa mbʋ yɔ, Yehowa lɩmɖʋyaa tʋmɩyɛ naɖɩyɛ fɛyɩ se ɖɩtɩlɩɩ pʋyʋ. Yehowa taa lakɩ leleŋ nɛ mba pɛsɛɣ-ɩ nɛ sɔɔlɩm faaa yɔ nɛ ɛwazɩɣ tɩ laʋ lɩmaɣza wena pɛwɛna yɔ a-yɔɔ.—Maarɩkɩ 10:29, 30.
17-23 OCTOBRE
ÑƖM MBƲ PƖWƐ ƐSƆTƆM TAA YƆ | 1 AWIYA 21–22
“Maɣzɩnɩ Yehowa alɩwaatʋ ndʋ ŋlakɩnɩ tʋmɩyɛ ñʋʋdʋ waɖɛ nɖɩ ŋwɛna yɔ”
it-1 1265
Yoyaa tɛ Yehowa
Yozuwee na tiyiyu nɔɔyʋ Yeriikoo tɛtʋ cɔlɔ nɛ ɛpɔzɩ-ɩ se Izrayɛɛlɩ hɔɔlʋʋ yɔɔ ɛwɛɛ yaa koyindinaa hɔɔlʋʋ yɔɔ ɛwɛɛ lɛ, tiyiyu cosi-i se: “Pɩlɩ pɩlɩ, ɛlɛ mɛnkɛ [Yehowa] sɔɔjanaa taa sɔsɔ, nɛ lɛɛlɛɛyɔ mɔnkɔma.” (Yoz 5:13-15) Nayʋ Mikayiya heyi Wiyaʋ Ahaabɩ nɛ Wiyaʋ Yozafaatɩ se: “Mana [Yehowa] caɣ e-kewiyaɣ kpelaɣ yɔɔ nɛ ɛsɔdaa wondu kpeekpe ɖʋ-ɩ hɛkʋ nɩwaŋ yɔɔ nɛ nɩmɩyɛ yɔɔ.” Pɩtʋʋ fɛyɩ se Yehowa fezuu taa piya paya cɩnɛ se ɛsɔdaa wondu. (1Aw 22:19-21) Ɛzɩma palabɩnɩ tʋmɩyɛ tɔm pee “Yoyaa tɛ [Yehowa]” yɔ pɩmʋnaa, mbʋ pʋyɔɔ yɔ pɩtasɩnɩ se pɛwɛnɩ tʋma ndɩ ndɩ ɛzɩ kerebimwaa, serafimwaa nɛ tiyiyaa lɛ, (Iza 6:2, 3; Kiɖe 3:24; Nat 5:11) pɛwɛ ɖɔɖɔ tindima ndɩ ndɩ, pʋyɔɔ Yesu yɔɔdaa se ɛwɛnɩ tiyiyaa “tikasɩ 12” nɛ ɛpɩzɩɣ nɛ ɛyaa-wɛ paa ɛzɩmtaa. (Mat 26:53) Alɩwaatʋ ndʋ Ezekiyaasɩ tendi Yehowa se ɛsɩnɩ-ɩ yɔ, ɛya-ɩ se “Yoyaa Kpeekpe Tʋ, Izrayɛɛlɩ tɛ Ɛsɔ, ñacaɣnɩ Kerebimwaa yɔɔ.” Pɩtʋʋ fɛyɩ se ɛyɔɔdaɣ ɛgbɛyɛ aɖakaɣ nɛ kerebimwaa mba pɛwɛ sulaɣ yɔɔ yɔ pɔ-tɔm na, nɛ pɩsɩŋnɩ Yehowa kewiyaɣ kpelaɣ ŋga kɛwɛ ɛsɔdaa yɔ. (Iza 37:16; kpaɣ-tʋ nɛ ŋmaɣzɩnɩ 1Sam 4:4; 2Sam 6:2.) Sɔɔndʋ kpa Eliizee lɩmɖʋyʋ lɛ, Yehowa tɩŋnɩ piti lakasɩ yɔɔ nɛ ɛwɩlɩ-ɩ “kpaŋnaŋ nɛ miŋ kɛɛkɛɛnaa,” pɩcɔ tɛtʋ ndʋ tɩ-taa nayʋ kaawɛɛ yɔ nɛ pɩta, nɛ pɩkpazɩ lɩmɖʋyʋ ɖoŋ. Yehowa ɛsɔdaa yoyaa hɔɔlʋʋ nakʋyʋ paanawa.—2Aw 6:15-17.
“Paa abalʋ weyi lɛ, ɛ-ñʋʋdʋ lɛ Krɩstʋ”
9 Tɩ luzuu. Yehowa kɛnɩ Ɛyʋ weyi ɛkpaɖɩ lɔŋ kedeŋa kpeekpe yɔɔ yɔ. Paa mbʋ yɔ, ewelisiɣ ɛ-sɛyaa lɩmaɣza. (Kiɖe 18:23, 24, 32) Ɛhaɣ waɖɛ mba ɛkɛ pa-ñʋʋdʋ yɔ se pɔyɔɔdɩ pa-lɩmaɣza. (1 Aw. 22:19-22) Yehowa talɩ pilim, paa mbʋ yɔ ɛɛɖaŋɩɣ se ɖɩla mbʋ pɩtalɩ pilim yɔ. Ɛlɛ, ɛsɩɣnɩ ɛyaa mantɩtalɩ pilimwaa mba pɛsɛɣ-ɩ yɔ se piɖeni-wɛ. (Keɣa 112:6, 7) Halɩ Bibl yɔɔdɩ Yehowa tɔm se ɛkɛ “sɩnɩyʋ.” (Keɣa 26:9; Ebr. 13:6) Wiyaʋ Daviid yɔɔdaa se mbʋ pi-ɖeke pɩsɩnɩ-ɩ nɛ ɛla tʋmɩyɛ sɔsɔyɛ nɖɩ ɛlaba yɔ, mbʋ lɛ se Yehowa luzi ɛ-tɩ nɛ ɛsɩnɩ-ɩ.—2 Sam. 22:36.
it-2 255
Cɛtɩm
Ɛsɔ Yehowa ha nʋmɔʋ “Sataŋ ɖoŋ” se ɩla tʋmɩyɛ mba pɔsɔɔlɩ cɛtɩm tɔm yɔ pɔ-yɔɔ “se pɩsa nɛ petisi cɛtɩm tɔm yɔɔ” nɛ peyele tisuu Yesu Krɩstʋ tɔm kɩbandʋ yɔɔ. (2Te 2:9-12) Mbʋ pɩɩtalɩ wiyaʋ Ahaabɩ pɩlakɩ pɩnzɩ mɩnɩŋ sakɩyɛ yɔ, pɩñɩkɩɣ niye lɩmaɣzɩyɛ nɖɩ ɖɩ-yɔɔ. Cɛtɩm nayaa heyi Ahaabɩ se ɛkaɣ wabʋ you ŋgʋ ɛlakɩnɩ Ramɔɔtɩ Galaadɩ yɔ. Ɛlɛ Yehowa tɛ nayʋ Mikayiya ñeheyi-i se ɛɛkaɣ wabʋ. Pʋ-tɔbʋʋ lɛ se fezuu kʋnɛ kɩlabɩnɩ ki-ɖoŋ tʋmɩyɛ pɔ-yɔɔ se pataayɔɔdɩ toovenim ɛlɛ pɔyɔɔdɩ tɔm ndʋ pa-maɣmaɣ pɔsɔɔlɩ yɔɔdʋʋ yɔ nɛ tɔm ndʋ Ahaabɩ sɔɔlaa se ɛnɩɩ yɔ. Paatɛm heyuu Ahaabɩ mbʋ pɩkaɣ labʋ yɔ; ɛlɛ paa mbʋ yɔ, eyeba nɛ pepeɣzi-i nɛ ɛtɩŋ cɛtɩm tɔm nɛ pɩkɔnɩ-ɩ sɩm.—1Aw 22:1-38; 4Aw 18.
Fezuu taa ñɩm
Ye pɔtɔm se nɔɔyʋ kpiɖi siŋŋ yɔ pʋ-tɔbʋʋ lɛ suwe?
4 Alɩwaatʋ wɛɛ nɛ tɩɖɛɣ lɛ, Yehowa suuɖu ɖʋʋ kɔm nɛ pɩsɩɩ tɩnaɣ. Etiyi Eliya se eheyi Ahaabɩ nɛ Yezaabɛɛlɩ se ɛnʋ kaɣ pa-nɩŋgbaŋʋʋ hɔm. Pakaɣ ɖɩzʋʋ pa-lʋlʋʋ taa mba tɩŋa. Eliya tɔm ndʋ tiyeba nɛ Ahaabɩ sʋʋ laŋwɛɛkɩyɛ taa siŋŋ. Pɩlabɩ piti se abalʋ tɩ kpazɩyʋ ɛnʋ “eluzi ɛ-tɩ.”—1 Aw. 21:19-29.
5 Paa Ahaabɩ kaaluzi ɛ-tɩ alɩwaatʋ ndʋ tɩ-taa yɔ, mbʋ ɛlabɩ pʋwayɩ yɔ pɩwɩlaa se etikpiɖi siŋŋ. Ɛtɩñaɣ pana se ɛɖɩzɩ Baalɩ sɛtʋ e-kewiyaɣ taa. Nɛ etiseɣti ɛyaa lalaa se pɛsɛɛ Yehowa. Ahaabɩ labɩ lakasɩ lɛɛsɩ ɖɔɖɔ nɛ pɩwɩlɩ se etikpiɖi.
6 Pʋwayɩ, alɩwaatʋ ndʋ Ahaabɩ pɔzɩ Yuuda Wiyaʋ kɩbanʋ Yosafaatɩ se ɛsɩnɩ-ɩ nɛ poyooni Siirii mba yɔ, ɛlɛ tasɩ-ɩ lɔŋ se pacalɩnɩ pɔzʋʋ Yehowa tɛ nayʋ. Kajalaɣ taa lɛ, Ahaabɩ kizi lɔŋ tasʋʋ mbʋ nɛ ɛyɔɔdɩ se: “Pɩkazɩ kʋyʋm, weyi ɖɩpɩzɩɣ ɖɩtɩŋnɩ ɛ-yɔɔ nɛ ɖɩpɔzɩ [Yehowa] yɔ; ɛlɛ maanaɣ-ɩ nɛ ɛsɩyɛ, mbʋ yɔ ɛɛtɩyɩɣ-m tɔm kɩbandʋ, ɛlɛ kɩdɛkɛdɩtʋ.” Paa mbʋ yɔ, pɔpɔzɩ nayʋ Mikayiya lɔŋ tasʋʋ. Ahaabɩ kaawɛnɩ toovenim. Ɛsɔ tɛ nayʋ yɔɔdɩ tɔm kɩdɛkɛdɩtʋ Ahaabɩ yɔɔ. Mbʋ ɛzɩ Ahaabɩ kaakpiɖaa nɛ ɛpɔzɩ Yehowa se ekpeɣ-i lɛ, eyeba nɛ paɖʋ nayʋ salaka. (1 Aw. 22:7-9, 23, 27) Paa Ahaabɩ ɛpɩzaa nɛ ɛɖʋ Mikayiya salaka yɔ, ɛtaapɩzɩɣ se ɛɖɩɣ natʋ tɔm ndʋ nʋmɔʋ se tɩtaala. You ŋgʋ palabɩ pʋwayɩ yɔ kɩ-taa, pakʋ Ahaabɩ.—1 Aw. 22:34-38.
24-30 OCTOBRE
ÑƖM MBƲ PƖWƐ ƐSƆTƆM TAA YƆ | 2 AWIYA 1–2
“Falɩsʋʋ kɩɖaʋ kɩbaŋʋ”
w15 1/4 18 § 15
Ɛzɩma ɛzʋtʋyaa falɩsɩɣ lalaa se pala ɛgbɛyɛ taa tʋma yɔ
15 Eliizee tɔm wɩlɩɣ-ɖʋ ɖɔɖɔ se pɩcɛyaa se koobiya abalɩñɩma ɩña ɛgbɛyɛ taa ɛzʋtʋyaa mba papɩ pa-tʋmɩyɛ labʋ taa yɔ. Eliya nɛ Eliizee powoba nɛ pana Yeriikoo tɛtʋ taa nayaa nabɛyɛ nɛ pɩtɛ lɛ, pa-naalɛ powolo Yɔɔrdaŋ Pɔɔ nɔɔ. Peeɖe “Eliya kpaɣ e-ekusuye nɛ ekpiyi-ɖɩ nɛ ɛma lɩm yɔɔ” nɛ lɩm faɣ nabʋlɛ nɛ pɩha nʋmɔʋ hɛkʋ taa. Pɔɖɔ tɛtʋ waɣɖɛ yɔɔ nɛ pɛtɛzɩ pɔɔ. Nɛ pɛtɛzaa lɛ, pɛwɛɛ nɛ pɔɖɔŋ nɛ pɔyɔɔdʋʋ. Eliizee welisaɣ tɔm ndʋ payɩ ɛ-falɩsɩyʋ Eliya heyaɣ-ɩ yɔ camɩyɛ, nɛ ɛkpɛlɩkɩɣ tɔm sakɩyɛ ɛ-cɔlɔ. Eliizee taamaɣzɩ kpa se ɛtɛm sɩm pɩtɩŋa. Pʋwayɩ pɩkʋsɩ Eliya kancʋʋlaɣ nakɛyɛ taa nɛ pɩɖɛna lɛ, Eliizee pɩsɩ Yɔɔrdaŋ Pɔɔ nɔɔ. Peeɖe ɛkpaɣ Eliya ekusuye nɛ ɛma lɩm yɔɔ nɛ ɛtɔ se: “Eliya tɛ Kɩbaɣlʋ Ɛsɔ wɛ le, ɛwɛ le lɛɛlɛɛyɔ?” Nɛ lɩm tasɩ faɣʋ nabʋlɛ.—2 Aw. 2:8-14.
w15 1/4 18 § 16
Ɛzɩma ɛzʋtʋyaa falɩsɩɣ lalaa se pala ɛgbɛyɛ taa tʋma yɔ
16 Ŋpɩzaa nɛ ŋna se maamaaci lakasɩ nzɩ Eliizee labɩ kajalaɣ ɖeɖe yɔ, nzɩ ɖeyi ɖeyi Eliya kaalabɩ kɛdɛzaɣ ɖeɖe na? Ɛbɛ pɩkpɛlɩkɩɣ-ɖʋ? Eliizee tɩmaɣzɩ se lɛɛlɛɛyɔ ɛpɩsɩ nayʋ yɔ, pɩwɛɛ se ɛlɛɣzɩ mbʋ Eliya lakaɣ yɔ kpaagbaa. Ɛlɛ, Eliizee maɣzɩnɩ Eliya ɛ-tʋmɩyɛ labʋ taa nɛ pɩwɩlɩ se ɛñaŋɩ-ɩ; nɛ mbʋ yebina nɛ nayaa lalaa taa-ɩ liu. (2 Aw. 2:15) Eliizee labɩ nayʋ tʋmɩyɛ pɩnzɩ 60, nɛ Yehowa ha-ɩ ɖoŋ nɛ ɛla maamaaci lakasɩ sakɩyɛ nɛ pɩkɩlɩ Eliya. Koobiya mba pafalɩsɩɣ-wɛ sɔnɔ yɔ, lɔŋ weyi tɔm tʋnɛ tɩkpɛlɩkɩɣ-wɛ?
Fezuu taa ñɩm
w05 1/8 9 § 1
Awiya takayaɣ naanza ñɩŋga taa lɩmaɣza sɔsɔna
2:11—“Ɛsɔdaa” ŋgʋ taa Eliya ɖɛwa alɩwaatʋ ndʋ ɛkpa “ɛsɔdaa kancʋʋlaɣ taa” yɔ? Pɩtɩkɛ kedeŋa hɔɔlɩŋ weyi ɩwɛ poliŋ taa yɔ, ɩ-taa nakʋyʋ tɔm pɔyɔɔdʋʋ nɛ pɩtɩkɛ ɖɔɖɔ fezuu taa lone nɖɩ ɖɩ-taa Ɛsɔ nɛ ɛ-tiyiyaa pɛwɛɛ yɔ ɖɩ-tɔm pɔyɔɔdʋʋ. (Wayɩ Wayɩ Paɣtʋ 4:19; Keɣa 10:4; Maatiyee 6:9; 18:10) “Ɛsɔdaa” ŋgʋ kɩ-taa Eliya kpawa yɔ, ŋgʋ lɛ ɛsɔdaa ɖenɖe helim wɛɛ yɔ. (Keɣa 77:26; Maatiyee 6:26) Miŋ kɛɛkɛɛ ŋgʋ kɩɩwɛɛ nɛ kiseɣ ɛsɔdaa helim taa yɔ, pɩtʋʋ fɛyɩ se kɩkpaɣ Eliya nɛ kɩɖɛnɩ tɛtʋ hɔɔlʋʋ nakʋyʋ taa nɛ ɛcaɣ peeɖe wezuu alɩwaatʋ natʋyʋ. Pɩnzɩ sakɩyɛ wayɩ lɛ, Eliya ma takayaɣ Yuuda wiyaʋ Yehoram.—4 Awiya 21:1, 12-15.
31 OCTOBRE–6 NOVEMBRE
ÑƖM MBƲ PƖWƐ ƐSƆTƆM TAA YƆ | 2 AWIYA 3–4
“Kpaɣ ña-pɩyalʋ”
“Manawa se efeŋ”
7 Eliizee weyi ɛlɛɣzɩ nayʋ Eliya lone taa yɔ, ɛnʋ fezini ɛyʋ naalɛ ñɩnʋ weyi Bibl kɛdɩ ɛ-tɔm se ɛsɩba nɛ pefezi-i yɔ. Izrayɛɛlɩ halʋ nɔɔyʋ kaamʋ Eliizee ɛgɔndʋ camɩyɛ. Halʋ ɛnʋ ɛ-tɛ kaawɛ Sunɛm tɛtʋ taa nɛ ɛ-hɩɖɛ kaasɛwa. Halʋ ɛnʋ ɛɛkɛ kaalʋlaɣ nɛ ɛ-walʋ ñaakpadɩyaa, ɛlɛ Ɛsɔ tɩŋnɩ nayʋ yɔɔ nɛ ɛwazɩ-wɛ nɛ palʋlɩ abalɩbɩɣa. Pɩlabɩ pɩnzɩ cabɩ lɛ, abalɩbɩɣa ŋga kasɩ. Maɣzɩ nɛ ŋna laŋwɛɛkɩyɛ nɖɩ ɖɩ-taa halʋ ɛnʋ ɛsʋwa yɔ! Pɩlabɩ mbʋ lɛ, ɛpɔzɩ nʋmɔʋ ɛ-walʋ nɛ ɛɖɔ nʋmɔʋ ɛzɩ kilomɛtanaa 30 mbʋ yɔ nɛ ewolo Karmɛɛlɩ pʋʋ yɔɔ Eliizee cɔlɔ. Halʋ talɩ Eliizee cɔlɔ lɛ, ɛlɛ kʋsɩ ɛ-lɩmɖʋyʋ Gehaazi se ɛɖɛɛ-wɛ nɔɔ nɛ ewolo Sunɛm nɛ efezi pɩɣa ŋga kasɩba yɔ. Ɛlɛ Gehaazi tɩpɩzɩ nɛ efezi-kɛ. Peeɖe halʋ nɛ nayʋ Eliizee patalaa.—2 Aw. 4:8-31.
“Manawa se efeŋ”
8 Eliizee talɩ sɩɖʋ cɔlɔ lɛ, ɛtɩmnɩ Ɛsɔ. Nɛ piti lakasɩ nasɩyɩ la nɛ pɩɣa ŋga kasɩba yɔ kefe nɛ pɩla ko-ɖoo leleŋ kpem nɛ ɛmʋ-kɛ atuu. (2 Awiya 4:32-37.) Pɩtɩla halʋ ɛnʋ ɛtɔzɩ ɛzɩma Hana weyi ɛɛkɛ kaalʋlaɣ yɔ, ɛɛtɩmnɩ Ɛsɔ alɩwaatʋ ndʋ ewoni ɛ-pɩyalʋ Samɩyɛɛlɩ se ɛsɛɛ Yehowa kizinziku tɛɛ yɔ pɩ-yɔɔ. Hana kaatɩmnɩ Ɛsɔ se: “[Yehowa] . . . ɛnʋ etisiɣni hadɛ nɛ ɛnʋ ɛkpazɩɣnɩ hayo.” (1 Sam. 2:6) Ye mbʋ ɖɩnɩɣ pɩ-taa kpayɩ kpayɩ se Yehowa fezini Sunɛm halʋ ɛnʋ ɛ-pɩɣa, nɛ pɩwɩlɩɣ se ɛwɛnɩ ɖoŋ se efezi sɩɖaa.
Fezuu taa ñɩm
it-2 672 § 2
Nayʋ
“Nayaa pɩyalaa.” Ɛzɩ takayaɣ nakɛyɛ (Grammaire de l’hébreu biblique, par P. Joüon, Rome, 1923, § 129 j) lɩzʋʋ pɩ-taa yɔ, Ebree tɔm piye ben (pɩyalʋ) yaa benehʹ (pɩyalaa) pɩzɩɣ nɛ pɩwɩlɩ “ɛyʋ yaa ɛyaa mba pɛwɛ ɛgbɛyɛ yaa cejewiye (yaa tindimiye) naɖɩyɛ taa yɔ.” (Kpaɣ-tʋ nɛ ŋmaɣzɩnɩ Neh 3:8 ɖenɖe Bibl waa nabɛyɛ ya “num sidiyaa taa tʋ nɔɔyʋ” se “num sidiyaa pɩyalʋ yɔ.”) Ye mbʋ hɩɖɛ “nayaa pɩyalaa” pɩzɩɣ nɛ pɩkɛnɩ sukuli ŋgʋ kɩ-taa pafalɩsɩɣ mba pakaɣ pɩsʋʋ nayaa yɔ yaa pɩpɩzɩɣ nɛ pɩkɛnɩ nayaa ɛgbɛyɛ naɖɩyɛ. Nayaa tindima ana pɔyɔɔdɩ a-tɔm se aawɛ Betɛɛlɩ, Yeriikoo nɛ Gilgaalɩ. (2Aw 2:3, 5; 4:38; kpaɣ-tʋ nɛ ŋmaɣzɩnɩ 1Sam 10:5, 10.) Samɩyɛɛlɩ kaakɛ tindima ana a-taa naɖɩyɛ ñʋʋdʋ Ramaa (1Sam 19:19, 20), nɛ pɩwɛ ɛzɩ Eliizee kaakɛ ɖɔɖɔ ɛ-alɩwaatʋ taa tindimiye naɖɩyɛ ñʋʋdʋ. (2Aw 4:38; 6:1-3; kpaɣ-tʋ nɛ ŋmaɣzɩnɩ 1Aw 18:13.) Pɔyɔɔdɩ pɔ-tɔm se pamaɣaɣ pa-maɣmaɣ pa-ɖɩjaɣyɛ nɛ palakaɣnɩ tʋmɩyɛ wonuu ŋgʋ pakɩndɩ kɩkɩndʋ yɔ. Pɩtɩla pɩwɩlɩɣ se pacakaɣ wezuu kɛlɛʋ. Ðoŋ ɖoŋ lɛ, pacakaɣ lona kʋyʋma taa nɛ pɛkpɛndɩɣ nɛ pɔtɔkɩ tɔɔnaɣ, ɛlɛ pɩtʋʋ fɛyɩ se paa weyi lɛ, ɛɛwɛnɩ nayʋ tʋmɩyɛ nɖɩ paɖʋ-ɩ yɔ nɛ ɛlakɩ.—1Aw 20:35-42; 2Aw 4:1, 2, 39; 6:1-7; 9:1, 2.