Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
6-12 NOVEMBRE
ÑƖM MBƲ PƖWƐ ƐSƆTƆM TAA YƆ | YƆƆB 13-14
«Ye ɛyʋ ɛsɩba yɔ, ɛpɩzɩɣ nɛ ɛtasɩ caɣʋ wezuu na?»
w99 15/10 3 § 1-3
Ɛzɩma ɛyaa wɛɛ nɛ pañɩnɩɣ wezuu kɩɖaɣlʋʋ yɔ
TƆM ndʋ pɔyɔɔdaa pɩlɩɩnɩ ɛzɩma wezuu wɛ tobi yɔ pɩ-yɔɔ yɔ, halɩ nɛ sɔnɔ ɛyaa pazɩ yem iitisiɣni tɩ-yɔɔ, paa pamaʋ tɔm ndʋ yɔ pɩlakɩ pɩnzɩ 3500 yɔ. Pɩɩkɛdɩɣnɩ ɛyaa se pɛkɛ evebu yaa pɛlɛ alɩwaatʋ natʋyʋ nɛ pʋwayɩ lɛ pakpadɩyɩ nɛ pasɩ. Pʋyɔɔ lɛ, ɛyaa wezuu caɣʋ taa, ɛyaa tɩŋnɩ nʋmɔŋ ndɩ ndɩ yɔɔ se pɩsa nɛ ɛyʋ caɣ wezuu nɛ pɩɖaɣlɩ.
Yɔɔb alɩwaatʋ taa, Ejipiti mba tɔkaɣ kpɩna ladɩwee se pɩsa nɛ paɖaɣnɩ pɩsʋʋ evebiya yaa pɛlaa, ɛlɛ pɩtɩpɩzɩ nɛ pɩla mbʋ. Pʋwayɩ lɛ, kɔ laɖaa kaɖʋsɩ sɔsɔsɩ taa lɛɛka kaakɛnaa se palɩzɩ kɔyɛ nɖɩ ɖiyeki nɛ ɛyʋ caɣ wezuu kɩɖaɣlʋʋ yɔ. Wezuu kɩɖaɣlʋʋ kɔ laɖaa maɣzaɣ se sika pɩzɩɣ piyele nɛ ɛyʋ caɣ wezuu maatɛŋ; nɛ pamaɣzaɣ se ye ɛyʋ ɛtɔkɩ tɔɔnaɣ sika ñanzɩ taa yɔ, piyeki nɛ e-wezuu ɖaɣlɩ nɛ pɩkɩlɩ. Caanaʋ taa Siini ñɩma mba payaɣaɣ se Tawoyisɩtɩ waa yɔ, pamaɣzaɣ se papɩzɩɣ nɛ patɩŋnɩ nʋmɔŋ nɩɩyɩ yɔɔ nɛ pɛlɛɣzɩ ɛzɩma tomnaɣ lakɩ tʋmɩyɛ yɔ nɛ pɩsa nɛ pacaɣ wezuu maatɛŋ. Nʋmɔŋ ɛnɩ ɩ-taa nɩɩyɩ yɔ: Tɔm yɔɔ maɣzʋʋ, hola aleɣya wena a-taa pɛkpɛlɩkɩɣ fezuu yɔ, nɛ ŋgee tɔɔnasɩ tɔɔʋ.
Payaɣ Ɛsɩpaañɔɔlɩ abalʋ nɔɔyʋ se Juan Ponce de León, ɛɛɖɔm nʋmɔʋ nɛ ewolo tɛtʋ hɔɔlɩŋ ndɩ ndɩ taa nɛ pasɩmɩ-ɩ se ɛɛñɩnɩ mbʋ piyeki nɛ ɛyʋ kɛ evebu yaa pɛlɛ yɔ kaahɛzaɣ. Fɛɖʋ nɔɔyʋ kaacaɣ wezuu pɩlakɩ pɩnzɩ 300 yɔ. Ɛyɔɔdɩ ɛ-takayaɣ ŋga payaɣ se Hermippus Redivivus yɔ ka-taa se pɩnaɣ alɩwaatʋ natʋyʋ taa lɛ, pɩwɛɛ se paɖɩɣ pɛlaa mba patɩtɩlɩ abalʋ yɔ ɖaŋ cikpeluu nakʋyʋ tɛɛ nɛ posuu helim mbʋ pefeziɣ yɔ kpalɩbanaa taa nɛ palabɩnɩ kɔyɛ nɖɩ ɖiyeki nɛ ɛyʋ caɣ wezuu kɩɖaɣlʋʋ yɔ. Pɩlabɩ pʋtɔdɩyɛ se nʋmɔŋ ɛnɩ ɩ-taa nakʋyʋ tɩla tʋmɩyɛ.
w15 1/8 31 § 1-2
Tɩʋ ŋgʋ pɛsɛtaa yɔ, kɩpɩzɩɣ nɛ kɩtasɩ yɛzʋʋ na?
YE PAKPAƔ oliivi tɩʋ nɛ pamaɣzɩnɩ Libaŋ tɩʋ ŋgʋ payaɣ se sɛɛdrɩ yɔ, oliivi tɩʋ tɩlɩɩ pʋyʋ. Ɛlɛ paa wɩlɩŋ, yaa miŋ, yaa kaɖɛ nɖɩ taa oliivi tɩŋ ɩwɛɛ kɔyɔ, ɩɩsɩkɩ lɔŋ. Oliivi tɩŋ nɩɩyɩ wɛnɩ ɛzɩ pɩnzɩ 1000 mbʋ yɔ. Oliivi tɩʋ lila tibi tɛtɛɛ camɩyɛ, nɛ paa pɛsɛtɩ-kʋ yɔ lila ana asɩɣnɩ-kʋ se kɩtasɩ yɛzʋʋ. Ye ki-lila ɩwɛnɩ a-lɛŋ yɔ, kɩkaɣ tasʋʋ yɛzʋʋ.
Caanaʋ taa caja Yɔɔb kaawɛnɩ tisuu se paa ɛsɩba yɔ, ɛkaɣ fem nɛ ɛtasɩ caɣʋ wezuu. (Yɔɔb 14:13-15) Pɩsa nɛ ɛwɩlɩ se ɛwɛnɩ tisuu se Ɛsɔ kaɣ-ɩ fezuu lɛ, ɛtɩŋnɩ tɩʋ nakʋyʋ kɩɖaʋ yɔɔ, nɛ pʋtɔma yɔ pɩɩkɛ oliivi tɩʋ. Ɛyɔɔdaa se: «Halɩ tɩʋ maɣmaɣ wɛnɩ lidaʋ. Ye pɛsɛtɩ-kʋ yɔ, kɩkaɣ ɖaɣnʋʋ hɔʋ.» Ye wɩlɩŋ sɔsɔŋ ɛkpawa nɛ oliivi tɩʋ kiɖe wɩlɩ yɔ, alɩwaatʋ ndʋ tɛʋ nɩɣ yɔ, ki-lila yeki nɛ ‘kɩlɩɩ pilinzi ɛzɩ tɩʋ kɩfalʋʋ yɔ.’—Yɔɔb 14:7-9.
w11 1/3 22 § 5
«Ñe-liu kaɣ wɛʋ pɩŋŋ»
Tɔm ndʋ Yɔɔb yɔɔdaa yɔ, tɩkpɛlɩkɩɣ-ɖʋ lɔŋ kɩbaŋ nɩɩyɩ Yehowa yɔɔ. Lɔŋ ɛnɩ yɔ: Ɛyaa mba paɖʋzʋʋ pa-tɩ Yehowa nesi tɛɛ nɛ peyeki se ɛma-wɛ nɛ ɛñɔɔzɩ-wɛ nɛ pɛkɛ ɛyaa mba pɔ-tɔm kɛdɩnɩ-ɩ ɛzɩ Yɔɔb kaalabʋ yɔ, ɛsɔɔlʋʋ-wɛ siŋŋ. (Izaayii 64:8) Mba pɛsɛɣ Yehowa siɣsiɣ yɔ, pamʋ ñɩm ɛ-ɛsɩndaa siŋŋ. Ɛ-sɛyaa siɣsiɣ tɩnaa mba pasɩba yɔ, ‘e-liu wɛ-wɛ pɩŋŋ.’ Bibl taa tazɩyʋ nɔɔyʋ yɔɔdaa se: «Ebree tɔm piye nɖɩ pɛɖɛzɩ mbʋ yɔ pɩtʋʋ fɛyɩ se ɖɩkɛ tɔm pee wena atukuuni ɛyʋ siŋŋ nɛ pɩkɩlɩ yɔ a-taa naɖɩyɛ, nɛ ɖɩwɩlɩɣ ɛzɩma ɛyʋ liu wɛɣ nabʋyʋ kpem yɔ.» Toovenim taa lɛ, pɩtasɩna se Yehowa tɔzʋʋ ɛ-sɛyaa yɔɔ lɛ e-liu wɛ pɩŋŋ se efezi-wɛ nɛ paɖaɣnɩ caɣʋ wezuu.
Fezuu taa ñɩm
it-1 191
Tɔlɩma
Palakaɣnɩ ɖɔɖɔ tʋmɩyɛ tɔm piye tɔlɩma nɛ pawɩlɩɣ mbʋ pɩtɩlɩɩ pʋyʋ yaa mbʋ pɩtɩmʋ ñɩm yɔ. Kɩɖaʋ nakʋyʋ yɔ: Abraham yɔɔdɩ Yehowa ɛsɩndaa se: «Mɛnkɛ mʋzʋʋ nɛ tɔlɩma.» (Kiɖ 18:27; kalɩ ɖɔɖɔ Iza 44:20; Yɔb 30:19.) Nɛ Yɔɔb kpaɣ tɔm ndʋ ɛ-laŋɩyɛ hɛzɩyaa pɔbɔtʋ tɩnaa yɔɔdaa yɔ nɛ ɛmaɣzɩnɩ «tɔlɩma aduwa.»—Yɔɔb 13:12.
13-19 NOVEMBRE
ÑƖM MBƲ PƖWƐ ƐSƆTƆM TAA YƆ | YƆƆB 15-17
«Alɩwaatʋ ndʋ ŋhɛzɩɣ nɔɔyʋ laŋɩyɛ yɔ, taamaɣzɩnɩ Eliifaazɩ»
w05 15/9 26 § 4-5
Ðɩkaɖɩnɩ lɩmaɣza kɩdɛkɛda!
Tɔm ndʋ Eliifaazɩ yɔɔdɩ tam nabudozo yɔ tɩ-tɩŋa tɩ-taa, ɛwɩlaa se Ɛsɔ tɔm caɣ kaɖɛ siŋŋ nɛ pʋyɔɔ lɛ mbʋ payɩ ɛ-sɛyaa lakɩ yɔ pɩ-taa nabʋyʋ ɛɛkɛdɩɣnɩ-ɩ. Eliifaazɩ heyi Yɔɔb se: «Na! Ɛɛtaɣ ɛ-lɩmɖʋyaa liu, nɛ ɛnaɣ kɩwɛɛkɩm e-tiyiyaa yɔɔ.» (Yɔb 4:18) Pʋwayɩ Eliifaazɩ yɔɔda Ɛsɔ se «ɛɛtaɣ liu e-kiɖeɖema, nɛ halɩ ɛsɔdaa maɣmaɣ fɛyɩ kele kele ɛ-ɛsɩndaa.» (Yɔb 15:15) Nɛ ɛpɔzɩ se: «Ye ŋwɛ siɣsiɣ, piheyiɣ Ðoŋ Tɩŋa Tʋ natʋyʋ yaa we?» (Yɔb 22:3) Bilɩdaadɩ tisi tɔm ndʋ tɩ-yɔɔ mbʋ pʋyɔɔ yɔ ɛyɔɔdaa se: «Halɩ fenaɣ maɣmaɣ ɛɛñandɩɣ nɛ tɩɩnzɩ fɛyɩ kele kele [Ɛsɔ] ɛsɩndaa.»—Yɔb 25:5.
Pɩwɛɛ se ɖɩkpa ɖa-tɩ nɛ lɩmaɣza ana ataawɛɛnɩ ɖoŋ ɖɔ-yɔɔ. Apɩzɩɣ ayele nɛ ɖɩmaɣzɩ se mbʋ Ɛsɔ pɔzʋʋ-ɖʋ yɔ pɩkɩlɩ ɖɔʋ. Lɩmaɣza ana awɛɣnɩ ɖoŋ kɩdɛkɛdɩŋ ɖa nɛ Yehowa ɖa-taabalɩyɛ yɔɔ. Pɩtasɩ lɛ, ye ɖɩwɛnɩ lɩmaɣza ana yɔ, ɛzɩma ɖɩkaɣ labʋ alɩwaatʋ ndʋ patasɩɣ-ɖʋ lɔŋ weyi pɩpɔzʋʋ yɔ? Ðiiluzuu ɖa-tɩ nɛ ɖɩmʋ lɔŋ sɩɣzʋʋ, ɛlɛ ‘ɖa-taa wɩɣnɩ Yehowa’ nɛ pɩpɩzɩɣ piyele nɛ ɖɩcaɣnɩ-ɩ. (Aduwa 19:3) Ye ɖɩlabɩ mbʋ yɔ, pɩkɔŋnɩ-ɖʋ kaɖɛ siŋŋ fezuu taa!
w15 15/2 11 § 16
Maɣzɩnɩ Yesu tɩ luzuu nɛ ɛ-pʋtɔdɩyɛ naʋ
16 Ðɩwɛɛnɩ pʋtɔdɩyɛ naʋ yɔɔdaɣ. Ye ɖɩnaɣ lalaa pʋtɔdɩyɛ yɔ, pɩkaɣ-ɖʋ seɣtuu se ‘ɖɩyɔɔdɩnɩ nɔɔ kɩbaŋa mba pɛwɛ laŋwɛɛkɩyɛ taa yɔ.’ (1 Tes. 5:14) Tɔm ndʋ ɖɩpɩzɩɣ nɛ ɖiheyi-wɛ nɛ pɩkpazɩ-wɛ ɖoŋ? Ðɩpɩzɩɣ nɛ ɖiheyi-wɛ se ɖɩwɛɛ nɛ ɖɩmaɣzɩɣ pɔ-yɔɔ siŋŋ. Ðɩpɩzɩɣ nɛ ɖɩsam-wɛ nɛ ɖɩsɩnɩ-wɛ nɛ pana se pɛwɛnɩ wɛtʋ kɩbandʋ nɛ pɛwɛ wazaɣ. Ðɩpɩzɩɣ nɛ ɖɩtɔzɩ-wɛ se ye Yehowa ɛsɩnɩ-wɛ nɛ patɩlɩ toovenim yɔ, pɩwɩlɩɣ se pɛwɛ ñɩm siŋŋ ɛ-ɛsɩndaa. (Yoh. 6:44) Ðɩpɩzɩɣ nɛ ɖɩhɛzɩ pa-laŋɩyɛ se Yehowa cɔŋnɩ ɛ-sɛyaa «mba pa-laŋa pʋʋtaa yɔ» yaa «mba pɛwɛ laŋwɛɛkɩyɛ taa yɔ» pɔ-yɔɔ. (Keɣ. 34:18) Ye ɖɩwɛnɩ pʋtɔdɩyɛ naʋ yɔɔdaɣ yɔ, pɩpɩzɩɣ nɛ pɩhɛzɩ mba pɛwɛ kɩcɛyɩm taa yɔ pa-laŋa siŋŋ.—Adu. 16:24.
Fezuu taa ñɩm
w06 15/3 14 § 11
Yɔɔb takayaɣ taa lɩmaɣza sɔsɔna
7:9, 10; 10:21; 16:22—Tɔm ndʋ tɩwɩlɩɣ se Yɔɔb taawɛɛnɩ tisuu sɩɖaa femtu lidaʋ yɔɔ? Mbʋ pɩkaɣaɣ talʋʋ Yɔɔb alɩwaatʋ pazɩ taa yɔ pɩ-tɔm ɛyɔɔdɩ masɩ nzɩ sɩ-taa. Ye mbʋ suwe ɛñɩnaɣ yɔɔdʋʋ? Pɩtɩla yɔ tɔm ndʋ ɛñɩnaɣ yɔɔdʋʋ yɔ ndʋ yɔ: ye ɛsɩba yɔ ɛ-alɩwaatʋ taa mba ɩɩkaɣ-ɩ tasʋʋ naʋ. Pa-naʋ taa lɛ, ɛtaapɩzɩɣ se ɛɖaɣnɩ pɩsʋʋ ɛ-ɖɩɣa nɛ ɛtaatasɩɣ natʋyʋ sɩm pɩkɔɔ nɛ pɩsɩɩnɩ alɩwaatʋ ndʋ Ɛsɔ ɖʋwa yɔ. Pɩtɩla ɖɔɖɔ yɔ Yɔɔb ñɩnaɣ yɔɔdʋʋ se nɔɔyʋ ɛɛpɩzɩɣ nɛ ɛlɩɩnɩ Sewɔɔlɩ yaa Pɩlaʋ taa ɛ-maɣmaɣ e-ɖoŋ taa. Yɔɔb 14:13-15 wɩlɩɣ kpayɩ kpayɩ se Yɔɔb kaawɛnɩ lidaʋ se pakaɣ fezuu sɩɖaa cee wayɩ.
20-26 NOVEMBRE
ÑƖM MBƲ PƖWƐ ƐSƆTƆM TAA YƆ | YƆƆB 18-19
«Pɩlakaɣ abalʋ siɣsiɣ tʋ nɔɔyʋ ɛzɩ pɔlɔ-ɩ yɔ»
Lɔŋ weyi Yesu ɛsɩtɛɣlɩm pɩzɩɣ nɛ pɩkpɛlɩkɩ-ɖʋ yɔ
9 Ŋpɩzɩɣ nɛ ŋsɩnɩ mba pɛwɛ kʋñɔwiye taa yɔ. Pɩtasɩna se Yesu sɩnɩ Maarɩɩ nɛ Maarta wiu lɛ, ewelisini-wɛ nɛ ɛhɛzɩ pa-laŋa. Ðɩpɩzɩɣ nɛ ɖɩla mbʋ ɖɔɖɔ alɩwaatʋ ndʋ lalaa wɛ kʋñɔwiye taa yɔ. Dan kɛ ɛgbɛyɛ taa ɛzʋtʋyʋ nɛ ɛwɛ Ositralii ɛjaɖɛ taa. Ɛyɔɔdaa se: «Alɩwaatʋ ndʋ ma-halʋ sɩba yɔ, pɩɩpɔzaa se pasɩnɩ-m. Koobiya sakɩyɛ nɛ pa-halaa, paha pa-tɩ faaa nɛ pewelisiɣni-m wɩsɩ nɛ ɖoo. Paha-m nʋmɔʋ faaa se mɔyɔɔdɩ ɛzɩma manɩɣaɣ siziŋ yɔ, nɛ alɩwaatʋ ndʋ mewiɣaɣ yɔ pɩtaacɛyɩɣ-wɛ. Pɩtasɩ lɛ, paaha pa-tɩ faaa nɛ palakɩ tʋma naayɛ se pasɩnɩ-m. A-taa naayɛ yɔ: pañalaɣ mɔ-lɔɔɖɩyɛ, powoki payakɩ-m wondu, nɛ palakɩ-m tɔɔnaɣ. Ma-maɣmaɣ mantaapɩzɩɣ se mala tʋma ana alɩwaatʋ ndʋ tɩ-taa. Nɛ ɖoŋ ɖoŋ lɛ, ma nɛ wɛ ɖɩkpɛndaɣ nɛ ɖɩlakɩ adɩma. Pawɩlaa se pɛkɛ taabalaa kɩbama siŋŋ nɛ koobiya mba ‘palʋlɩ-wɛ se pasɩna kʋñɔŋ alɩwaatʋ taa yɔ.’»—Adu. 17:17.
Alɩwaatʋ ndʋ ñɛ-ɛyʋ kʋsɔɔlʋ nɔɔyʋ yeki Yehowa sɛʋ yɔ
16 Wolo pɩ-yɔɔ nɛ ŋɖʋʋ nesi hɔʋ taa ñɩma mba pɛwɛ siɣsiɣ yɔ. Lɛɛlɛɛyɔ kpem pɩpɔzaa se ŋwɩlɩ-wɛ sɔɔlɩm nɛ ŋkpazɩ-wɛ ɖoŋ. (Ebr. 10:24, 25) Nabʋyʋ taa, weyi palɩzɩ-ɩ ɛgbɛyɛ taa yɔ ɛ-hɔʋ taa ñɩma ɖiɣziɣna se ɛgbɛyɛ taa ñɩma nabɛyɛ ɩɩyɔɔdʋʋnɩ-wɛ, nɛ pakpakɩɣ-wɛ ɛzɩ palɩzɩ-wɛ ɖɔɖɔ ɛgbɛyɛ taa yɔ. Ðɩtɩsɔɔlɩ se ɖiyele nɛ pɛwɛɛnɩ lɩmaɣza ana. Kɔzɩ kɔzɩ lɛ, pɩpɔzʋʋ se ɖɩsaŋ piya nzɩ sɩ-lʋlɩyaa kizi toovenim yɔ nɛ ɖɩkpazɩ-sɩ ɖoŋ. Palɩzɩ Maria walʋ ɛgbɛyɛ taa nɛ ɛɖɛɛ nɛ eyele ɛ-hɔʋ. Maria yɔɔdaa se: «Man-taabalaa nabɛyɛ kɔŋ nɛ palakɩ-ɖʋ tɔɔnaɣ nɛ pasɩɣnɩ-m nɛ mɛnkpɛlɩkɩɣnɩ men-piya. Panɩ men-siziŋ nɛ pasɩnɩ-m wiu. Palʋbɩ mɔ-yɔɔ alɩwaatʋ ndʋ ɛyaa yɔɔdaɣ cɛtɩm tɔm mɔ-yɔɔ yɔ. Paakpazɩ-m ɖoŋ siŋŋ!»—Roma 12:13, 15.
w90 1/9 22 § 20
Ŋwɛɛ nɛ ŋñɩnɩɣ se paha-ŋ waɖɛ naɖɩyɛ?
20 Pɩwɛɛ se ɛgbɛyɛ taa ɛzʋtʋyaa ɩtɩlɩ se ye koobu nɔɔyʋ ɛɛkɛ ɛgbɛyɛ taa ɛzʋtʋyʋ yaa ɛgbɛyɛ taa tʋmlaɖʋ nɛ pamʋ waɖɛ nɖɩ ɛ-cɔlɔ, yaa halɩ paa ɛ-maɣmaɣ ekizini-ɖɩ yɔ, pɩpɩzɩɣ nɛ pitibi-i yɔɔɔ. Ye patɩlɩzɩ-ɩ ɛgbɛyɛ taa, ɛlɛ ɛgbɛyɛ taa ɛzʋtʋyaa ɖiɣzina se pitibi-i yɔɔɔ yɔ, pɩpɔzʋʋ se pasɩnɩ-ɩ fezuu taa nɛ sɔɔlɩm. (1 Tesalooniiki mba 5:14) Pɩwɛɛ se pasɩnɩ-ɩ nɛ ɛnɩɩ pɩ-taa se ɛ-tɔm cɛyɩ ɛgbɛyɛ taa. Halɩ paa paatasɩ koobu nɔɔyʋ lɔŋ yɔ, ye ɛwɛnɩ tɩ luzuu nɛ ɛsɩmɩyɛ yɔ pɩtɩla pɩɩkaɣ pɔzʋʋ se ɛɖaŋ alɩwaatʋ sakɩyɛ pʋcɔ nɛ paɖaɣnɩ-ɩ sɔzʋʋ wala lɛɛna ɛgbɛyɛ taa.
Fezuu taa ñɩm
w94 1/10 32
Ðoŋ weyi tɔm kɩbandʋ wɛna yɔ
Ɛlɛ, alɩwaatʋ ndʋ pɩɩpɔzaa se pakpazɩ Yɔɔb maɣmaɣ ɖoŋ yɔ, Eliifaazɩ nɛ ɛ-taabalaa pataaheyi-i tɔm kɩbandʋ. Pakʋ ɛ-tɔm se ɛ-maɣmaɣ ɛ-cɔlɔ ɛ-kʋñɔmɩŋ lɩnaa; pɔ-tɔm ndʋ tɩwɩlaɣ se ɛlabɩ kɩwɛɛkɩm nabʋyʋ nɛ ɛmɛsɩ. (Yɔɔb 4:8) Bibl ŋgʋ payaɣ se The Interpreter’s Bible yɔ kɩyɔɔdaa se: «Pɩɩpɔzɩ Yɔɔb tɔm ndʋ tɩhɛzɩɣ ɛyʋ laŋɩyɛ yɔ. Ɛlɛ tɔm ndʋ ɛnɩɣaɣ yɔ tɩɩkɛ tɔm ndʋ Ɛsɔ sɛtʋ agbaa yɔɔdʋʋ ɖoŋ ɖoŋ nɛ ɛyaa maɣzɩɣ se tɩkɛ ‘toovenim’ nɛ tɩwɛ ɖeu kpem yɔ.» Yɔɔb nɩɣaɣ Eliifaazɩ nɛ ɛ-taabalaa pɔ-tɔm lɛ, piyeba nɛ ɛsʋʋ laŋwɛɛkɩyɛ taa siŋŋ nɛ ɛma kubuka se: «Ɩwɛɣ nɛ ɩɖʋʋ man-kalɩzaɣ ɖɩwɩzɩyɛ nɛ ɩtɔyɩtʋʋ-m nɛ mɩ-tɔm pee nɛ pɩkɔɔ pɩsɩɩnɩ ɖooye?»—Yɔɔb 19:2.
Pɩtɩpɔzɩ kpa se ɖiyele nɛ ɖo-koobu nɔɔyʋ ma laŋwɛɛkɩyɛ kubuka mbʋ pʋyɔɔ yɔ ɖɩtɩmaɣzɩ nɛ ɖɩyɔɔdɩ tɔm kɩdɛkɛdɩtʋ. (Kpaɣ-tʋ nɛ ŋmaɣzɩnɩ Wayɩ Wayɩ Paɣtʋ 24:15.) Bibl taa eduuye naɖɩyɛ pakɩ-ɖʋ se: «Sɩm nɛ wezuu wɛ nzʋlʋmɩyɛ ɖoŋ tɛɛ; mba pɔsɔɔlɩ-ɖɩ labɩnʋʋ tʋmɩyɛ yɔ, pakaɣ tɔɔʋ ɖi-pee.»—Aduwa 18:21.
27 NOVEMBRE–3 DÉCEMBRE
ÑƖM MBƲ PƖWƐ ƐSƆTƆM TAA YƆ | YƆƆB 20-21
«Zofaarɩ nɛ Yɔɔb pɔhɔmnɩ ɖama tɔm»
w07 1/8 29 § 12
Ŋkɛ «ñɩm tʋ Ɛsɔ ɛsɩndaa»?
12 Tɔm loyaɣ ŋga ka-taa, Yesu ñɩnaɣ se ɛwɩlɩ tʋkaɣ ŋga kɛwɛ ɛyʋ weyi ɛkɛ ñɩm tʋ Ɛsɔ ɛsɩndaa nɛ ɛyʋ weyi ɛcazɩɣ ɛ-tɩ tomnaɣ yɔɔ ñɩm nɛ ɛkpazɩɣ huwa yɔ pɛ-hɛkʋ taa yɔ. Ye mbʋ, Yesu ñɩnaɣ yɔɔdʋʋ se ɖitaayele nɛ tomnaɣ yɔɔ ñɩm ñɩnʋʋ yaa mbʋ ɖɩwɛna yɔ pɩ-yɔɔ leleŋ nɩʋ kɛ mbʋ pɩ-tɔm kɩlɩ cɛyʋʋ ɖe-wezuu caɣʋ taa yɔ. Ɛlɛ pɩwɛɛ se ɖɩlabɩnɩ tʋmɩyɛ mbʋ ɖɩwɛna yɔ nɛ ɖɩkɛ ñɩm tɩnaa Yehowa ɛsɩndaa yaa ɖɩcɛyɩsɩ ɖa nɛ ɩ ɖa-taabalɩyɛ. Ye ɖɩlakɩ mbʋ yɔ, pɩtʋʋ fɛyɩ se ɖɩkɛɣ ñɩm tɩnaa Ɛsɔ ɛsɩndaa. Ɛbɛ yɔɔ? Mbʋ pʋyɔɔ yɔ pɩtʋlʋʋ-ɖʋ nɔnɔsɩ nzɩ siyeki se Ɛsɔ ɛwazɩ-ɖʋ siŋŋ yɔ. Bibl heyiɣ-ɖʋ se: «Yehowa wazaɣ pɩsɩɣnɩ ɛyʋ ñɩm tʋ, nɛ ɛɛsɔzʋʋ wɩzasɩ nasɩyɩ kɔ-yɔɔ.»—Aduwa 10:22.
Fezuu taa ñɩm
w95 1/1 9 § 19
Ðɩwa Sataŋ nɛ ɛ-tʋma
19 Sataŋ kaatɩŋnɩ Eliifaazɩ nɛ Zofaarɩ yɔɔ nɛ eyele nɛ Ɛsɔ sɛyʋ Yɔɔb ‘lɩmaɣza taa sidi;’ nɛ pɩwɛ ɖeu se ɖiɖiɣzina se pɩɩwɛ se Yɔɔb ɛlʋbɩnɩ lɩmaɣza ana. (Yɔɔb 4:13-18; 20:2, 3) Pɩɖʋ Yɔɔb «wɩzasɩ», piyeba nɛ «sɔɔndʋ» kpa-ɩ nɛ ɛyɔɔdɩ «kpaanzɩyʋ tɔm.» (Yɔɔb 6:2-4; 30:15, 16) Eliihu kaasum ɖiɣ ɖiɣ nɛ ewelisini Yɔɔb nɛ ɛsɩnɩ-ɩ nɛ ɛ-laŋɩyɛ pilim se ɛna ɛzɩma Yehowa cɔŋnɩ tɔm ɖeɖe nɛ lɔŋsɩnɖɛ yɔ. Mbʋ ɖɔɖɔ sɔnɔ, ɛgbɛyɛ taa ɛzʋtʋyaa mba panɩɣ tɔm taa yɔ, pawɩlɩɣ se pamaɣzɩɣ mba pɛwɛ kʋñɔŋ taa yɔ pɔ-yɔɔ nɛ paayɔɔdʋʋ «tɔm ndʋ» tiyeki se ɛyaa mba panɩɩ siziŋ nɛ pɩkɩlɩ yɔ. Ɛlɛ ɛzɩ Eliihu yɔ, paɖʋʋ suuɖu nɛ pewelisiɣni-wɛ camɩyɛ nɛ pʋwayɩ lɛ patɩŋnɩ Ɛsɔtɔm yɔɔ nɛ pataa-wɛ num, pʋ-tɔbʋʋ se pɛhɛzɩ pa-laŋa. (Yɔɔb 33:1-3, 7; Yakubu 5:13-15) Pʋyɔɔ lɛ, ye nɔɔyʋ lɩmaɣza taa esidaa yaa pɩlakɩ-ɩ ɛzɩ ɛ-lɩmaɣza taa sidaa, yaa ye ‘ɖoza nɛ natʋ’ eyeba nɛ sɔɔndʋ kpaɣ-ɩ ɛzɩ pɩɩkpaʋ Yɔɔb yɔ, ɛpɩzɩɣ nɛ ehiɣ laŋɩyɛ hɛzʋʋ mbʋ pɩlɩɣnɩ Masɩ taa yɔ ɛgbɛyɛ taa.—Yɔɔb 7:14; Yakubu 4:7.
4-10 DÉCEMBRE
ÑƖM MBƲ PƖWƐ ƐSƆTƆM TAA YƆ | YƆƆB 22-24
«Ɛyʋ pɩzɩɣ nɛ ɛwɛɛ Ɛsɔ wazaɣ yaa we?»
w05 15/9 27 § 1-3
Lʋbɩnɩ lɩmaɣza kɩdɛkɛda!
Ɛyaa yɔɔdʋʋ tɔm lɛɛtʋ nɛ tɩnɩɣzɩnɩ ndʋ pɔyɔɔdʋʋ se Ɛsɔ tɔm caɣ kaɖɛ kpem yɔ. Ndʋ yɔ: Ɛsɔ ɛsɩndaa lɛ, ɛyaa fɛyɩ wazaɣ nakɛyɛ. Eliifaazɩ tɔm yɔɔdʋʋ naadozo ñɩmbʋ taa ɛpɔzɩ tɔm tʋnɛ: «Ɛyʋ pɩzɩɣ nɛ ɛwɛɛ Ɛsɔ wazaɣ yaa we? Ɛyʋ weyi ɛwɛnɩ lɛɣtʋ yɔ, ɛpɩzɩɣ nɛ ɛwazɩ-ɩ pʋyʋ yaa we?» (Yɔɔb 22:2) Eliifaazɩ tɔm ndʋ tɩwɩlɩɣ se ɛyʋ fɛyɩ wazaɣ Ɛsɔ ɛsɩndaa. Bilɩdaadɩ yɔɔdɩ tɔm ndʋ tɩ-ɖɔndɩ. Ɛyɔɔdaa se: «Ɛzɩma ɛyʋ pɩzɩɣ nɛ ɛwɛɛ siɣsiɣ Ɛsɔ ɛsɩndaa? Yaa ɛzɩma ɛyʋ weyi halʋ lʋlaa yɔ ɛpɩzɩɣ nɛ ɛwɛɛ kele kele?» (Yɔɔb 25:4) Ɛzɩ tɔm ndʋ tɩwɩlʋʋ yɔ, pañɩnɩɣ pɔyɔɔdɩ se ɛzɩma Yɔɔb weyi ɛkɛ ɛyʋ yem yɔ ɛpɩzɩɣ nɛ ɛmaɣzɩ se ɛwɛ siɣsiɣ Ɛsɔ ɛsɩndaa?
Sɔnɔ, ɛyaa nabɛyɛ wɛnɩ lɩmaɣza kɩdɛkɛda pa-maɣmaɣ pa-tɩ yɔɔ. Pɩtɩla yɔ hɔʋ ŋgʋ kɩ-taa pacaɣaa nɛ papaɣlɩ, wezuu caɣʋ taa kala yaa ɛzɩma ɛyaa paɖɩɣ ɛyaa mba pɛwɛnɩ tomnaɣ tɔlɩm nabʋyʋ yaa pɔyɔɔdʋʋ kʋnʋŋ nakʋyʋ yɔ pɩ-cɔlɔ pɩlɩnaa. Ɛlɛ alɩwaatʋ ndʋ pitiki ɛyaa yɔɔɔ yɔ, pɩkɛdɩɣnɩ Sataŋ nɛ ɛ-aleewaa ɖɔɖɔ. Ye papɩzaa nɛ peyele nɛ nɔɔyʋ maɣzɩ se mbʋ payɩ ɛlakɩ yɔ pɩɩkɛdɩɣnɩ Ɛsɔ Ðoŋ Tɩŋa Tʋ yɔ, pɩwɛɣ kɛlɛʋ nɛ pɩkɩlɩ se pitibi-i yɔɔɔ. Alɩwaatʋ wɛɣ nɛ tɩɖɛɣ lɛ, ɛyʋ ɛnʋ ɛpɩzɩɣ nɛ ele nʋmɔʋ, nɛ halɩ eposini Ɛsɔ ɛsadʋ.—Ebree mba 2:1; 3:12.
Akpadɩyɩtʋ yaa nɛ kʋdɔŋ pɩzɩɣ piyele nɛ ɖɩɩpɩzɩɣ se ɖɩla mbʋ payɩ ɖɩsɔɔlaa yɔ. Ye ɖɩkpakɩɣ mbʋ ɖɩlakɩ Kewiyaɣ tʋma taa yɔ nɛ ɖɩmaɣzɩɣnɩ mbʋ ɖɩɩlaba ɖe-evebitu taa yaa ɖɛ-pɛlɛtʋ taa yaa alɩwaatʋ ndʋ ɖɩɩwɛnɩ tɔnʋʋ taa alaafɩya nɛ alɩwaatʋ ndʋ ɖɩɩwɛ ɖoŋ yɔ, pɩpɩzɩɣ nɛ pɩlakɩ-ɖʋ ɛzɩ mbʋ ɖɩlakɩ lɛɛlɛɛyɔ yɔ, pɩtɩlɩɩ pʋyʋ. Pɩcɛyɩ kpem se ɖɩtɩlɩ se Sataŋ nɛ ɛ-aleewaa pɔsɔɔlaa se ɖɩmaɣzɩ se mbʋ ɖɩlakɩ yɔ pɩɩkɛdɩɣnɩ Ɛsɔ! Pɩwɛɛ se ɖɩlʋbɩnɩ lɩmaɣza ana.
w95 15/2 27 § 6
Lɔŋ tasʋʋ mbʋ pɩsɩɣnɩ ɛyʋ se ɛtɩlɩ ɛzɩma ɛcɔnɩ kala ɖeɖe yɔ
Yɔɔb taabalaa mba, pa-naadozo pɔyɔɔdɩ pa-maɣmaɣ pa-lɩmaɣza nɛ patɩyɔɔdɩ tɔm ndʋ tɩlakɩ nɔɔ kʋɖʋmaɣ nɛ Ɛsɔ lɔŋsɩnɖɛ yɔ, nɛ piyeba nɛ pitii Yɔɔb yɔɔɔ nɛ pɩkɩlɩ. Halɩ Eliifaazɩ yɔɔdaa se ‘Ɛsɔ ɛɛtaɣ ɛ-lɩmɖʋyaa liu’ nɛ ɛyɔɔdaa ɖɔɖɔ se paa Yɔɔb ɛwɛ siɣsiɣ yaa ɛfɛyɩ siɣsiɣ yɔ, piiheyiɣ Yehowa natʋyʋ. (Yɔɔb 4:18; 22:2, 3) Pɩwɛɣ kaɖɛ se ɛyʋ ɛnɩɩ tɔm kɩdɛkɛdɩtʋ yaa cɛtɩm tɔm ndʋ tiyeki se pititibi-i yɔɔɔ yɔ nɛ pɩkɩlɩ tʋnɛ. Pɩɩlakɩ-ɖʋ piti se pʋwayɩ Yehowa kalɩ Eliifaazɩ nɛ ɛ-taabalaa tɔm kɩdɛkɛdɩtʋ ndʋ pɔyɔɔdaa yɔ tɩ-yɔɔ. Eheyi-wɛ se: «Ɩtɩyɔɔdɩ toovenim tɔm mɔ-yɔɔ.» (Yɔɔb 42:7) Ɛlɛ tɔm ndʋ tɩɖʋʋ ɛyʋ ɖɩwɩzɩyɛ nɛ pɩkɩlɩ yɔ tɩɩwɛnɩ ɛsɩndaa.
w03 15/4 14-15 § 10-12
Piya evelisi nzɩ siyeki nɛ Yehowa taa lakɩ leleŋ yɔ
10 Ɛzɩ Bibl wɩlʋʋ yɔ, pɩtɩkɛ Yɔɔb ɖeke tɔm Sataŋ kʋwa se ɛɛsɛɣ Ɛsɔ nɛ ɛ-laŋɩyɛ pilim, ɛlɛ ɛkʋ ɖɔɖɔ Ɛsɔ sɛyaa kpeekpe tɔm se paasɛɣ Ɛsɔ nɛ pa-laŋɩyɛ pilim, pɩwɩlɩɣ se ña ɖɔɖɔ ŋwɛ pa-taa. Toovenim taa lɛ, Sataŋ yɔɔdaɣ ɛyaa tɩŋa tɔm lɛ eheyi Yehowa se: «Ɛyʋ kɛyɩɣ mbʋ payɩ ɛwɛna yɔ nɛ ɛcɛlɩ e-wezuu yɔɔ [ye mbʋ pɩtɩkɛ Yɔɔb ɖeke ɛlɛ paa ɛyʋ weyi].» (Yɔɔb 2:4) Ŋnaɣ ɛzɩma tɔm ndʋ titukuuni-ŋ yɔ? Ɛzɩ Aduwa 27:11 yɔɔdʋʋ yɔ, Yehowa wɛɛ nɛ ɛtɔŋ se nabʋyʋ wɛɛ nɛ ŋpɩzɩɣ nɛ ŋha-ɩ pʋ nɛ ɛtɩŋnɩ pɩ-yɔɔ nɛ ecosi Sataŋ weyi ɛwɛɛ nɛ ɛyɔɔdʋʋ tɔm kɩdɛkɛdɩtʋ ɛ-yɔɔ yɔ. Maɣzɩ pɩ-yɔɔ nɛ ŋna; kedeŋa kpeekpe Wiyaʋ pɔzʋʋ-ŋ se ŋɖʋ nesi nɛ pocosi tɔm ndʋ tɩ-tɔm kɩlɩ cɛyʋʋ yɔ tɩ-yɔɔ. Pɩkɛnɩ-ŋ sʋʋtʋ sɔsɔtʋ nɛ waɖɛ sɔsɔɖɛ kpem! Ŋpɩzɩɣ nɛ ŋla mbʋ Yehowa pɔzʋʋ-ŋ yɔ? Yɔɔb pɩzaa nɛ ɛla mbʋ. (Yɔɔb 2:9, 10) Ɛyaa wezuu caɣʋ kpeekpe taa, Yesu nɛ ɛyaa lalaa sakɩyɛ pɩkpɛndɩnɩ piya evelisi palabɩ mbʋ. (Filiipi mba 2:8; Natʋ 6:9) Ña ɖɔɖɔ ŋpɩzɩɣ nɛ ŋla mbʋ. Taayele nɛ piyiɣdi-ŋ, mbʋ pʋyɔɔ yɔ ɛyʋ ɛɛpɩzɩɣ nɛ ɛlɩzɩ se ɛɛtɩnɩɣ hɔɔlʋʋ nakʋyʋ yɔɔ tɔm ndʋ tɩ-taa. Pɩtɩŋnɩ ñe-wezuu caɣʋ yɔɔ lɛ, ŋkaɣ wɩlʋʋ se ŋtɩnɩɣ tɔm kɩdɛkɛdɩtʋ ndʋ Sataŋ yɔɔdʋʋ yɔ tɩ-yɔɔ yaa ŋtɩnɩɣ tɔm ndʋ Yehowa cosuu-i yɔ tɩ-yɔɔ. A-yɔɔ ŋkaɣ tɩnʋʋ?
Yehowa maɣzɩɣ ñɔ-yɔɔ!
11 Mbʋ ŋlɩzɩɣ se ŋlakɩ yɔ, ɛzɩ toovenim taa lɛ pɩ-tɔm cɛyɩ Yehowa ɛsɩndaa? Ɛzɩ ɛyaa sakɩyɛ tɩtɛ ɖɔkʋʋ pe-siɣsiɣ wɛtʋ Yehowa ɛsɩndaa se pɩha-ɩ waɖɛ nɛ ecosi Sataŋ? Toovenim taa lɛ Sataŋ yɔɔdaa se nɔɔyʋ fɛyɩ se sɔɔlɩm seɣtiɣni-i nɛ ɛsɛɣ Yehowa, nɛ pɩtɛm naʋ kaɣlaa se tɔm ndʋ tɩkɛ cɛtɩm. Paa mbʋ yɔ, Yehowa sɔɔlaa se ŋtɩnɩ e-kewiyitu kɩkɩlɩtʋ tɔɔʋ yɔɔ mbʋ pʋyɔɔ yɔ ɛmaɣzɩɣ ñɔ-yɔɔ. Yesu yɔɔdaa se: «Man-Caa weyi ɛwɛ ɛsɔdaa yɔ ɛtɩsɔɔlɩ se piya cikpesi sɩnɛ yɔ, sɩ-taa paa kʋɖʋmaɣ maɣmaɣ ele.»—Maatiyee 18:14.
12 Pɩnaɣ kpayɩ kpayɩ se wezuu ŋgʋ ŋlɩzɩɣ se ŋcakɩ yɔ kɩ-tɔm cɛyɩ Yehowa ɛsɩndaa. Kɔzɩ kɔzɩ lɛ, kitukuuni ɛzɩma pɩlakɩ-ɩ yɔ. Bibl wɩlɩɣ se ɛyaa lakasɩ kɩbanzɩ yaa pa-lakasɩ kɩdɛkɛdɩsɩ pɩzɩɣ siyele nɛ Yehowa taa la leleŋ yaa ɛnɩɩ siziŋ. Kɩɖaʋ nakʋyʋ yɔ: Alɩwaatʋ ndʋ Izrayɛɛlɩ mba kaɖaɣnɩ Yehowa tam sakɩyɛ yɔ, piyeba nɛ ɛwɛɛ «laŋwɛɛkɩyɛ taa.» (Keɣa 78:40, 41) Pʋcɔ nɛ tɛʋ sɔsɔʋ nɩɣ Noowa alɩwaatʋ taa lɛ, «ɛyʋ kañatʋ paɣlɩ tɛtʋ yɔɔ» nɛ piiyeba nɛ Yehowa «laŋɩyɛ wɛɛkɩ.» (Kiɖe Tɛɛ Tɔm 6:5, 6) Ŋnɩ tɔm ndʋ tɩ-tɔbʋʋ na? Ye ŋcaɣ wezuu kɩdɛkɛdʋʋ yɔ, pɩpɩzɩɣ piyele nɛ ña-Lɩzɩyʋ wɛɛ laŋwɛɛkɩyɛ taa. Pɩɩwɩlɩɣ se Ɛsɔ wɛnɩ ɛjandʋ yaa ɛzɩma pɩlakɩ-ɩ yɔ pɩwɛnɩ ɖoŋ ɛ-yɔɔ. Ɛlɛ, ɛsɔɔlɩ-ŋ nɛ ɛñɩnɩɣ se piɖeni-ŋ. Hɔɔlʋʋ lɛɛkʋ taa lɛ, ye ŋlakɩ mbʋ pɩtʋʋzaa yɔ, Yehowa taa lakɩ leleŋ. Pɩtasɩna se ɛ-taa lakɩ leleŋ se ɛpɩzɩɣ nɛ ecosi Sataŋ lɛ, ɛ-taa lakɩ leleŋ ɖɔɖɔ mbʋ pʋyɔɔ yɔ ɛpɩzɩɣ nɛ ɛhɛyɩ-ŋ. Nɛ ɛsɔɔlaa se ɛhɛyɩ-ŋ. (Ebree mba 11:6) Toovenim taa lɛ, Yehowa kɛ Caja sɔɔlɩm tʋ weyi ŋwɛna yɔ!
Fezuu taa ñɩm
w04 15/7 21-22
Ðʋ ña-tɩ fezuu taa kaɖʋsɩ nɛ pɩsa nɛ ŋsa ña-Lɩzɩyʋ
Maɣzɩ ɛzɩma Yehowa lɩzɩ kedeŋa yɔ pɩ-yɔɔ nɛ ŋna. Tɔm loyaɣ «ɖanaɣ ɖanɩ nɛ tɛʋ fe» wɩlɩɣ se Yehowa ɖʋ tʋkaɣ alɩwaatʋ ndɩ ndɩ ndʋ ɛkpaɣ nɛ ɛlɩzɩnɩ wondu yɔ tɩ-hɛkʋ taa. (Kiɖe Tɛɛ Tɔm 1:5, 8, 13, 19, 23, 31) Alɩwaatʋ ndɩ ndɩ ndʋ ɛkpaɣ nɛ ɛlɩzɩnɩ wondu yɔ tɩ-taa paa ndʋ lɛ tɩ-ɖɩbazɩyɛ lɛ, ɛɛsɩm kaɖʋwa ŋga ɛsɔɔlaa se ɛtalɩ paa evemiye nɖɩ yɔ camɩyɛ. Nɛ Ɛsɔ talɩ kaɖʋwa ŋgʋ ɛɛwɛna se ɛlɩzɩɣ wondu yɔ. (Natʋ 4:11) Yɔɔb yɔɔdaa se: «Ye [Yehowa] ɛsɔɔlaa se ɛla nabʋyʋ yɔ ɛlakɩ-pʋ.» (Yɔɔb 23:13) Pɩɩkɛdɩnɩ Yehowa kpem se ɛna «mbʋ payɩ ɛlɩzaa yɔ» nɛ ɛyɔɔdɩ se pɩwɛ «ɖeu siŋŋ!»—Kiɖe Tɛɛ Tɔm 1:31.
Pɩsa nɛ ɖɩtalɩ ɖa-kaɖʋsɩ lɛ, pɩpɔzʋʋ se ɖa ɖɔɖɔ ɖɩsɔɔlɩ siŋŋ se ɖɩtalɩ-sɩ. Ɛkaɣ-ɖʋ sɩnʋʋ nɛ ɖɩsɔɔlɩ siŋŋ se ɖɩtalɩ-sɩ? Halɩ alɩwaatʋ ndʋ tɛtʋ kaawɛ yem soyi nɛ nabʋyʋ taawɛɛ tɩ-yɔɔ yɔ, Yehowa kaatɛm naʋ mbʋ tɩkaɣ pɩsʋʋ yɔ. Ɛɛnawa se tɩkaɣ pɩsʋʋ lone kɩbanɖɛ nɖɩ ɖɩkaɣ yebu nɛ pasamɩ-ɩ nɛ paɖʋ-ɩ hɩɖɛ yɔ. Mbʋ ɖɔɖɔ, ye ɖɩmaɣzɩɣ wazasɩ nzɩ ɖihikiɣ nɛ pee kɩbana wena ɖɩtalɩɣ ɖa-kaɖʋsɩ nzɩ nɛ pɩlʋlɩ yɔ pɩ-yɔɔ yɔ, piyeki nɛ ɖɩsɔɔlɩ siŋŋ se ɖɩñaɣ pana nɛ ɖɩtalɩ-sɩ. Mbʋ pɩlabɩ Tony hɔɔlʋʋ taa alɩwaatʋ ndʋ ɛwɛnɩ pɩnzɩ 19 yɔ. Eewoba nɛ ekilimi Yehowa Aseɣɖe Tɩnaa ɛgbɛyɛ piliŋa nakɛyɛ taa Erɔɔpɩ wɩsɩ ɖɩɖʋyɛ taa kajalaɣ ɖeɖe nɛ ɛna mbʋ yɔ pɩɖɩɣzɩ-ɩ kpem nɛ wiɖiyi ɛtɩsɔɔ pɩ-yɔɔ. Kpaɣnɩ kɩyakʋ ŋgʋ lɛ, ɛɛwɛɛ nɛ ɛpɔzʋʋ ɛ-tɩ tɔm tʋnɛ: ‘Ye mɛwɛ lone ɛzɩ ɖɩnɛ yɔ ɖɩ-taa nɛ malakɩ tʋmɩyɛ yɔ, ɛzɩma me-wezuu caɣʋ wɛɣ?’ Tony wobi pɩ-yɔɔ nɛ ɛmaɣzɩɣ ɛzɩma ɛpɩzɩɣ nɛ ɛla mbʋ yɔ pɩ-yɔɔ, nɛ ewolo pɩ-yɔɔ nɛ ɛñaɣ pana se ɛtalɩ ɛ-kaɖʋwa ŋga. Ɛñɩɣ niye takayaɣ taa se paha-ɩ waɖɛ nɛ ɛla tʋmɩyɛ ɛgbɛyɛ piliŋa taa nɛ pɩla pɩnzɩ sakɩyɛ lɛ, paha-ɩ waɖɛ nɖɩ nɛ ɛ-taa kaalabɩ leleŋ kpem!
11-17 DÉCEMBRE
ÑƖM MBƲ PƖWƐ ƐSƆTƆM TAA YƆ | YƆƆB 25-27
«Pɩtɩcɛyɩ se ɛyʋ ɛtalɩ pilim pʋcɔ nɛ ɛpɩzɩ nɛ ɛɖɔkɩ ɛ-cɩŋgɩlɩm wɛtʋ»
it-1 1210 § 4
Cɩŋgɩlɩm wɛtʋ
Yɔɔb. Pɩtʋʋ fɛyɩ se Yɔɔb kaacaɣ wezuu Yosɛɛfʋ sɩm nɛ alɩwaatʋ ndʋ Moyizi kaacaɣ wezuu yɔ tɩ-hɛkʋ taa. Nɛ pɔyɔɔdɩ Yɔɔb tɔm se ɛkɛ abalʋ weyi «ɛtaawɛɛnɩ kɩwɛɛkɩtʋ natʋyʋ [Ebree, tam] nɛ ɛɛwɛ siɣsiɣ; eseɣaɣ Ɛsɔ sɔɔndʋ nɛ ekiziɣ mbʋ pɩfɛyɩ ɖeu yɔ.» (Yɔɔb 1:1; kalɩ YƆƆB.) Tɔm ndʋ Ɛsɔ Yehowa pɔzɩ e-koyindu Sataŋ pɩlɩɩnɩ Yɔɔb yɔɔ alɩwaatʋ ndʋ Sataŋ wobi kediɣzaɣ ŋga Ɛsɔ tiyiyaa lakaɣ ɛsɔdaa yɔ ka-taa yɔ, tɩwɩlɩɣ kpayɩ kpayɩ se tɔm ndʋ tɩwɛ Yehowa nɛ Sataŋ pɛ-hɛkʋ taa yɔ, tɩ-taa natʋyʋ lɛ ɛyaa cɩŋgɩlɩm wɛtʋ tɔm. Sataŋ yɔɔdaa se pɩtɩkɛ lɩmaɣza kɩbana seɣtaɣni Yɔɔb nɛ ɛsɛɣ Ɛsɔ; ɛyɔɔdaa se pɩtɩkɛ sɔɔlɩm seɣtaɣni-i nɛ ɛsɛɣ Ɛsɔ ɛlɛ wazasɩ nzɩ ehikaɣ yɔ sɩ-yɔɔ ɛsɛɣ-ɩ. Ye mbʋ Sataŋ maɣzɩɣ se pɩtɩkɛ lɩmaɣza kɩbana yɔɔ Yɔɔb ɖɔkɩ ɛ-cɩŋgɩlɩm wɛtʋ. Yehowa ha Sataŋ nʋmɔʋ nɛ ɛwɛɛkɩ Yɔɔb ñɩm nɛ ɛkʋ e-piya, paa mbʋ yɔ ɛtɩpɩzɩ eyele nɛ Yɔɔb lesi ɛ-cɩŋgɩlɩm wɛtʋ. (Yɔɔb 1:6–2:3) Pʋwayɩ Sataŋ yɔɔdaa se Yɔɔb pɩzaa nɛ ɛɖɔkɩ ɛ-laŋɩyɛ alɩwaatʋ ndʋ elesi ɛ-ñɩm nɛ e-piya yɔ mbʋ pʋyɔɔ yɔ kaɖɛ naɖɩyɛ tɩtalɩ e-tomnaɣ nandʋ. (Yɔɔb 2:4, 5) Pʋwayɩ Yɔɔb tɔlɩ kʋdɔŋ nɛ piyele nɛ ɛnɩɣ siziŋ, ɛ-halʋ heyi-i tɔm ndʋ tiyeki se pitibi-i yɔɔɔ yɔ, nɛ ɛ-taabalaa heyi-i tɔm ndʋ tɩɩlakɩ nɔɔ kʋɖʋmaɣ nɛ Ɛsɔ lɩmaɣza nɛ ɛ-kaɖʋsɩ yɔ. (Yɔɔb 2:6-13; 22:1, 5-11) Ɛlɛ Yɔɔb yɔɔdaa se ɛnʋ ɛɛkaɣ yebu ɛ-cɩŋgɩlɩm wɛtʋ. Ɛtɔm se: «Maakaɣ yebu man-cɩŋgɩlɩm wɛtʋ pɩkɔɔ nɛ pɩtalɩ alɩwaatʋ ndʋ mansɩba yɔ! Mankaɣ ɖɔkʋʋ men-siɣsiɣ wɛtʋ nɛ maakaɣ-tʋ yebu kpa; ma-laŋɩyɛ ɛɛkaɣ kʋʋ mɔn-tɔm me-wezuu caɣʋ kɩyakɩŋ kpeekpe.» (Yɔɔb 27:5, 6) Yɔɔb ɖɔkɩ ɛ-cɩŋgɩlɩm wɛtʋ nɛ ɛwɩlɩ se Ɛsɔ koyindu kɛ cɛtɩyʋ.
Ðɔkɩ ña-cɩŋgɩlɩm wɛtʋ!
3 Ɛzɩma Ɛsɔ sɛyaa wɩlɩɣ se pɔɖɔkʋʋ pa-cɩŋgɩlɩm wɛtʋ? Ye pɔsɔɔlɩ Yehowa nɛ pɔñɔʋnɩ-ɩ nɛ pa-laŋɩyɛ pilim yɔ, pawɩlɩɣ se pɔɖɔkɩ pa-cɩŋgɩlɩm wɛtʋ; nɛ mbʋ yekina nɛ paa ɛzɩmtaa lɛ palakɩ mbʋ pɩkɛdɩɣnɩ-ɩ yɔ. Iyele nɛ ɖɩna ɛzɩma palabɩnɩ tʋmɩyɛ tɔm pee «cɩŋgɩlɩm wɛtʋ» Bibl taa yɔ. Bibl taa Ebree tɔm piye nɖɩ pɛɖɛzaa se «cɩŋgɩlɩm wɛtʋ» yɔ, ɖɩ-tɔbʋʋ lɛ se pilim, yaa mbʋ pɩfɛyɩnɩ ɛjandʋ natʋyʋ yɔ. Ðɩkpaɣ kɩɖaʋ nakʋyʋ. Izrayɛɛlɩ mba kpakaɣ kpɩna nɛ palaɣ Yehowa; nɛ paɣtʋ kaayɔɔdaa se pɩwɛɛ se kpɩna ana ataawɛɛnɩ ɛjandʋ natʋyʋ. (Lev. 22:21, 22) Pɩtaamʋna se Ɛsɔ samaɣ ɛlaa kpɩnɛ nɖɩ pɩcamɩ ɖɩ-nɩŋgbaŋaɣ, ɖɩ-nɩŋgbaŋʋʋ yaa ɖɩ-ɛsɩyɛ yɔ; pɩtaamʋna ɖɔɖɔ se palaa kpɩnɛ nɖɩ pɩwɩɣ-ɖɩ yɔ. Yehowa ɛsɩndaa lɛ, pɩɩcɛyaa se kpɩnɛ nɖɩ ɖɩwɛɛ pilim yaa ɖɩtaawɛɛnɩ ɛjandʋ natʋyʋ. (Mal. 1:6-9) Ðɩpɩzɩɣ nɛ ɖɩnɩɩ mbʋ pʋyɔɔ Yehowa sɔɔlaa se nabʋyʋ ɛwɛɛ pilim yaa pɩtaawɛɛnɩ ɛjandʋ natʋyʋ yɔ pɩ-taa. Alɩwaatʋ ndʋ ɖɩñɩnɩɣ yabʋ nabʋyʋ, paa pɩtɩɩkɛ tɩʋ piye naɖɩyɛ, takayaɣ nakɛyɛ yaa tʋmɩyɛ wonuu nakʋyʋ yɔ, ɖɩtɩsɔɔlɩ se ɖɩya tɩʋ piye nɖɩ ɖɩtʋlɩ pɔʋ yɔ, nɛ ɖɩtɩsɔɔlɩ ɖɔɖɔ se ɖɩya takayaɣ yaa tʋmɩyɛ wonuu ŋgʋ kɩ-hɔɔlɩŋ nɩɩyɩ fɛyɩ yɔ. Ðɩsɔɔlɩ wondu ndʋ tɩwɛ pilim nɛ tɩfɛyɩnɩ ɛjandʋ natʋyʋ yɔ. Mbʋ ɖɔɖɔ, Yehowa ñɩnɩɣ se sɔɔlɩm mbʋ ɖɩsɔɔlɩnɩ-ɩ nɛ siɣsiɣ wɛtʋ ndʋ ɖɩwɛna yɔ, pɛwɛɛ pilim nɛ pɩtaawɛɛnɩ ɛjandʋ natʋyʋ.
4 Ɛzɩ pɩwɛɛ se ɖɩmaɣzɩ se pɩcɛyaa se ɖɩtalɩ pilim pʋcɔ nɛ ɖɩɖɔkɩ ɖa-cɩŋgɩlɩm wɛtʋ na? Pɩkɛ toovenim se pɩyʋsʋʋnɩ-ɖʋ tam sakɩyɛ nɛ pɩpɩzɩɣ nɛ pɩlabɩ-ɖʋ ɛzɩ ɖɩɩkaɣ pɩzʋʋ nɛ ɖɩla mbʋ pɩtʋʋzaa yɔ. Iyele nɛ ɖɩna lɩmaɣza naalɛ wena a-yɔɔ pɩtɩmʋna se sɔɔndʋ ɛkpa-ɖʋ yɔ. Kajalaɣ lɛ, Yehowa ɛɛkaŋ ɛ-lɩmaɣza ɖɛ-ɛjandʋ yɔɔ. Ɛ-tɔm heyiɣ-ɖʋ se: «Ye ŋŋkaŋaɣ ñɛ-ɛsa kɩdɛkɛdɩm yɔɔ, ɖɩnɛ ɛlɛ, hayɩ Yehowa, aapɩzaa nɛ ɛsɩŋ?» (Keɣ. 130:3) Ɛnawa se ɖɩtɩtalɩ pilim, ɖɩkɛ kɩwɛɛkɩm laɖaa nɛ ekpeɣu-ɖʋ faaa. (Keɣ. 86:5) Nabʋlɛ lɛ, Yehowa sɩm ɖo-ɖoŋ kamaɣ nɛ ɛɛpɔzʋʋ-ɖʋ se ɖɩla mbʋ pɩcɛzɩ ɖo-ɖoŋ ɖeɖe yɔ. (Kalɩ Keɣa 103:12-14.) Ye mbʋ, ɛzɩma tɩyɛ ɖɩpɩzɩɣ nɛ ɖɩwɩlɩ se ɖɩfɛyɩnɩ ɛjandʋ natʋyʋ ɛ-ɛsɩndaa?
5 Pʋcɔ nɛ Yehowa sɛyaa pɩzɩ nɛ pɔɖɔkɩ pa-cɩŋgɩlɩm wɛtʋ lɛ, pɩwɛɛ se pɛwɛɛnɩ sɔɔlɩm. Pɩpɔzaa se sɔɔlɩm mbʋ ɖɩwɛnɩ Ɛsɔ yɔɔ, nɛ ɛzɩma ɖɩñɔnɩ ɖa-Caa weyi ɛwɛ ɛsɔdaa yɔ, pɩwɛɛ pilim nɛ pɩtaawɛɛnɩ ɛjandʋ natʋyʋ. Ye ɖɔ-sɔɔlɩm ɛwɛ mbʋ, halɩ pɩkpɛndɩnɩ alɩwaatʋ ndʋ pɩtakɩɣ-ɖʋ yɔ, ɖɩnɛ ɛlɛ ɖɩwɩlɩɣ se ɖɩwɛ cɩŋgɩlɩm. (1 Kro. 28:9; Mat. 22:37) Ðɩtasɩ maɣzʋʋ Yehowa Aseɣɖe Tɩnaa naadozo mba ɖɩyɔɔdɩ pɔ-tɔm kiɖe tɛɛ yɔ pɔ-yɔɔ. Ɛbɛ yɔɔ palɩzaa se palakɩ ɛzɩ palabʋ yɔ? Ɛzɩ pɩɣa peleɣa ŋga, kataasɔɔlɩ leɣyuu sukuli taa? Pɩɣa evelaɣ ŋga, kaasɔɔlaa se pohoŋ-kɛ ɖɩɣa nakɛyɛ taa? Yaa hɔʋ ñʋʋdʋ ɛnʋ ɛɛsɔɔlaa se elesi ɛ-tʋmɩyɛ? Pɩtʋʋ fɛyɩ se aayɩ. Ɛlɛ panawa se Yehowa ɖʋ paɣtʋ ndʋ yɔ tɩwɛ siɣsiɣ; nɛ paakam pa-lɩmaɣza mbʋ pɩkɛdɩɣnɩ pa-Caa weyi ɛwɛ ɛsɔdaa yɔ pɩ-yɔɔ. Sɔɔlɩm mbʋ pɛwɛnɩ ɛ-yɔɔ yɔ, mbʋ tuzini-wɛ se pamaɣzɩ ɛ-yɔɔ pʋcɔ nɛ pakpaɣ lɩmaɣzɩyɛ. Piyeba nɛ pɔɖɔkɩ pa-cɩŋgɩlɩm wɛtʋ.
Fezuu taa ñɩm
Yehowa tɩŋɩɣnɩ Bibl yɔɔ nɛ ɛñɔɔzʋʋ ɛ-ɛgbɛyɛ
3 Wondu ndʋ Yehowa lɩzaa yɔ, tɩwɩlɩɣ se ɛkɛ Ɛsɔ weyi ɛñɔɔzʋʋ wondu camɩyɛ yɔ. Bibl yɔɔdʋʋ se: «Lɔŋsɩnɖɛ Yehowa sɩnɩ tɛtʋ tigiɖe. Lɛɣtʋ ɛcaɣzɩnɩ ɛsɔdaa camɩyɛ.» (Adu. 3:19) Ɛsɔ «nʋmɔŋ kpɛnzɩ ɖeke» ɖɩsɩma, nɛ «tɔm ndʋ ɖɩnɩ ɛ-yɔɔ yɔ tɩwɛ yem ɛzɩ pɛwɛɛtʋʋ tɔm yɔ.» (Yɔb 26:14) Paa mbʋ yɔ, tɔm pazɩ ndʋ ɖɩsɩm Yehowa wondu kɩlɩzɩtʋ yɔɔ yɔ, tɩwɩlɩɣ se Yehowa ñɔɔzɩ-tʋ camɩyɛ. (Keɣ. 8:3, 4) Tɩɩnzɩ miiliyɔɔwaa sakɩyɛ cɔʋ ɛsɔdaa, ɛlɛ siiyouni ɖama. Pɩtasɩ lɛ, tɛtʋ nɛ lona wena awɛ tɛtʋ tɩyɛ yɔ, pɔcɔʋ wɩsɩ nɛ pataŋ nɛ paayouni ɖama ɖɔɖɔ. Ɛzɩma wondu ndʋ tɩ-tɩŋa tɩɖɔŋ camɩyɛ cɔlɩɩɩ yɔ, pɩwɩlɩɣ kaɣlaa se Yehowa ‘labɩ ɛsɔdaa nɛ tɛtʋ nɛ lɛɣtʋ’ nɛ ɛmʋnaa se ɖɩsamɩ-ɩ, ɖɩñɔɔnɩ-ɩ nɛ ɖɩsɛɛ-ɩ.—Keɣ. 136:1, 5-9.
18-24 DECEMBRE
ÑƖM MBƲ PƖWƐ ƐSƆTƆM TAA YƆ | YƆƆB 28-29
«Ŋwɛnɩ hɩɖɛ kɩbanɖɛ ɛzɩ Yɔɔb yɔ?»
w02 15/5 22 § 19
Wɩlɩ sɔɔlɩm siɣsiɣ ñɩmbʋ ɛyaa mba pɛwɛ kɩcɛyɩm taa yɔ
19 Bibl kɛdɛsɩ nzɩ sɩ-taa ɖɩtazaa yɔ sɩwɩlɩ kaɣlaa se pɩpɔzʋʋ se pawɩlɩ sɔɔlɩm siɣsiɣ ñɩmbʋ ɛyaa mba pɛwɛnɩ kɩcɛyɩm nɛ pa-maɣmaɣ paapɩzɩɣ se pɔcɔnɩ pi-ɖeɖe yɔ. Pɩsa nɛ Abraham wolo pɩ-yɔɔ nɛ ɛwɛɛnɩ lʋlʋʋ taa mba lɛ, pɩɩpɔzaa se Betuwɛɛlɩ ɛsɩnɩ-ɩ. Pɩsa nɛ pepi Yakɔɔb Kanaŋ ɛzɩ ɛɛsɔɔlʋʋ yɔ lɛ, pɩɩpɔzaa se Yosɛɛfʋ ɛsɩnɩ-ɩ. Nɛ pɩsa nɛ Nawomii wɛɛnɩ weyi pakaɣ cɛlʋʋ ɛ-ñɩm yɔ lɛ, pɩɩpɔzaa se Ruti ɛsɩnɩ-ɩ. Abraham, Yakɔɔb nɛ Nawomii pa-taa nɔɔyʋ taapɩzɩɣ se ɛcɔnɩ ɛ-kɩcɛyɩm mbʋ pi-ɖeɖe ye patɩsɩnɩ-ɩ yɔ. Mbʋ ɖɔɖɔ sɔnɔ, pɩpɔzʋʋ se pawɩlɩ sɔɔlɩm siɣsiɣ ñɩmbʋ kɔzɩ kɔzɩ ɛyaa mba pɛwɛ kɩcɛyɩm taa yɔ. (Aduwa 19:17) Yɔɔb sɩɣaɣnɩ «kʋñɔndʋ weyi ɛmakaɣ kubusi se pasɩnɩ-ɩ yɔ» nɛ «pɩɣa ŋga kɛfɛyɩ caa yɔ nɛ weyi ɛfɛyɩnɩ sɩnɩyʋ yɔ,» pɩkpɛndɩnɩ weyi «ɛwɩzɩ sɩbʋ yɔ.» Pɩtasɩ lɛ, Yɔɔb ‘lakaɣ nɛ lelu laŋɩyɛ nɩɣ leleŋ’ nɛ ‘ɛɛpɩsɩ yʋlʋm ɛsa nɛ taɖɩyɛ tʋ nɩŋgbanzɩ.’—Yɔɔb 29:12-15.
it-1 655 § 10
Wondu kususutu
Palabɩnɩ ɖɔɖɔ tʋmɩyɛ wondu kususutu tam sakɩyɛ Bibl taa nɛ pɩsɩŋnɩ nabʋyʋ. Ɛyʋ nɔɔyʋ wondu suu yaa ŋgee wondu kususutu natʋyʋ wɩlɩɣ se ɛwɛ ɛgbɛyɛ naɖɩyɛ taa yaa se ɛɖʋʋ nesi ɛgbɛyɛ naɖɩyɛ. Mbʋ ɖɔɖɔ Bibl labɩnɩ tʋmɩyɛ wondu kususutu nɛ kɩwɩlɩ lone nɖɩ ɛyʋ nɔɔyʋ wɛnɩ samaɣ taa yɔ yaa tʋma wena ɛlakɩ yɔ. Kɩɖaʋ nakʋyʋ yɔ: Yesu yɔɔdɩ nesi ɖɔkʋʋ toko tɔm eduuye naɖɩyɛ taa. (Mat 22:11, 12; kalɩ COIFFURE; SANDALE.) Natʋ 16:14, 15 taa, Kɩbaɣlʋ Yesu Krɩstʋ paɣ Krɩstʋ mba se pakpa pa-tɩ nɛ pataaɖou fezuu taa nɛ piyele nɛ pɔhɔzɩ po-toko ŋgʋ kɩwɩlɩɣ se pɛkɛ Ɛsɔ toovenim tʋ tɛ aseɣɖe tɩnaa siɣsiɣ tɩnaa yɔ. «Ɛsɔ Ðoŋ Tɩŋa Tʋ tɛ kɩyakʋ sɔsɔʋ you» ñɔtɩ kpam, nɛ ye ɛyʋ ɛtɔlɩ kpaca ŋgʋ kɩ-taa yɔ, pɩpɩzɩɣ nɛ pɩkɔnɩ-ɩ asɛyʋʋ.
w09 1/2 15 § 3-4
Mbʋ pʋyɔɔ payaɣ ɛyʋ hɩla naayɛ yɔ
Alɩwaatʋ ndʋ palʋlʋʋ-ɖʋ yɔ pɩtɩkɛ ɖa-maɣmaɣ ɖɩlɩzɩɣnɩ hɩɖɛ nɖɩ payaɣ-ɖʋ yɔ. Ɛlɛ, pʋwayɩ lɛ ɖa-lakasɩ kaɣnɩ yebu nɛ payaa-ɖʋ hɩɖɛ naɖɩyɛ. (Aduwa 20:11) Pɩwɛɣ ɖeu se ŋpɔzɩ ña-tɩ se: «Ye Yesu nɛ apostoloowaa paawɛnɩ waɖɛ se paha-m hɩɖɛ, hɩɖɛ nɖɩ paaha-m? Hɩɖɛ nɖɩ kaɣaɣ mʋnʋʋ mɛ-wɛtʋ sɔsɔtʋ nɛ ma-lakasɩ?»
Pɩcɛyaa se ɖɩmaɣzɩ tɔm ndʋ tɩ-yɔɔ siŋŋ. Ɛbɛ yɔɔ? Mbʋ pʋyɔɔ yɔ wiyaʋ lɔŋsɩnɖʋ Salomɔɔ mawa se: «Pɩwɛ weewee se ɛyʋ ɛlɩzɩ se ɛwɛɣnɩ hɩɖɛ kɩbanɖɛ nɛ pɩkɩlɩ se ɛwɛɛnɩ ñɩm sakɩyɛ.» (Aduwa 22:1) Pɩtʋʋ fɛyɩ se ye ɖɩñaɣ pana nɛ ɖɩwɛɛnɩ hɩɖɛ kɩbanɖɛ yaa lakasɩ kɩbanzɩ samaɣ taa yɔ pɩkɛɣnɩ-ɖʋ ñɩm sɔsɔm. Kɔzɩ kɔzɩ lɛ, ye ɖɩñaɣ pana nɛ ɖɩwɛɛnɩ hɩɖɛ kɩbanɖɛ Ɛsɔ ɛsɩndaa yɔ, ɖɩkaɣ wɛnʋʋ ñɩm mbʋ pɩwɛɣ tam yɔ. Ɛzɩma tɩyɛ? Ɛsɔ labɩ tamaɣ se ɛkaɣ maʋ ɛ-tɛ «tɔzʋʋ takayaɣ» taa ɛyaa mba peseɣ-i sɔɔndʋ yɔ pa-hɩla nɛ ɛkaɣ-wɛ haʋ wezuu maatɛŋ.—Malakii 3:16; Natʋ 3:5; 20:12-15.
Fezuu taa ñɩm
g00 8/7 11 § 3
Mʋʋyʋʋ—Pɩwazɩɣ-ŋ!
Ɛzɩ amʋʋya wazɩɣ toovenim na? Ŋtɔzʋʋ alɩwaatʋ ndʋ nɔɔyʋ mʋʋyɩnɩ-ŋ nɛ piyele nɛ ña-laŋɩyɛ hɛɛ yɔ tɩ-yɔɔ? Yaa ŋtɔzʋʋ alɩwaatʋ ndʋ nɔɔyʋ tɩmʋʋyɩnɩ-ŋ nɛ piyele nɛ ŋnɩɣzɩɣ yaa pɩlakɩ-ŋ ɛzɩ pɔlɔ-ŋ yɔ tɩ-yɔɔ? Toovenim taa lɛ, amʋʋya wɛnɩ wazaɣ. Pɩwazɩɣ weyi ɛmʋʋyʋʋ yɔ nɛ pɩwazɩɣ ɖɔɖɔ weyi ɛmʋʋyʋʋna yɔ. Bibl taa abalʋ weyi payaɣ se Yɔɔb yɔ ɛyɔɔdɩ mba pakaɖaɣnɩ-ɩ yɔ pɔ-tɔm se: «Mamʋʋyaɣnɩ-wɛ lɛ, pɩɖɩɣzaɣ-wɛ yem; mɛ-ɛsɩndaa ñalɩmɩyɛ hɛzaɣ pa-laŋa.» (Yɔɔb 29:24) Pɩtɩla yɔ Yɔɔb ɛsɩndaa «ñalɩmɩyɛ» wɩlɩɣ se ɛ-taa fɛyɩnɩ-wɛ nɛ natʋyʋ yaa ɛ-taa wɛ leleŋ.
25-31 DECEMBRE
ÑƖM MBƲ PƖWƐ ƐSƆTƆM TAA YƆ | YƆƆB 30-31
«Mbʋ pɩsɩnɩ Yɔɔb nɛ ewolo pɩ-yɔɔ ɛwɛɛ kele kele yɔ»
w10 15/4 21 § 8
Kɛzɩ ñɛ-ɛsa nɛ ɛtaacɔnɩ mbʋ pɩɩwazɩɣ pʋyʋ yɔ!
8 Ɛsa kɔɖɛyɩ nɛ tomnaɣ kɔɖɛyɩ pɩzɩɣ nɛ pɩwɛɛnɩ ɖoŋ toovenim Krɩstʋ mba yɔɔ ɖɔɖɔ. Pʋyɔɔ Ɛsɔtɔm seɣtiɣ-ɖʋ se ɖɩwɛɛnɩ tɩ ɖɔkʋʋ mbʋ ɖɩcɔŋna nɛ mbʋ ɖe-liu wɛɛ yɔ pɩ-hɔɔlʋʋ taa. (1 Kɔr. 9:25, 27; kalɩ 1 Yohanɛɛsɩ 2:15-17.) Ɛyʋ siɣsiɣ tʋ Yɔɔb kaaɖiɣzinaa se nɔɔ kʋɖʋmaɣ wɛ mbʋ ɖɩcɔŋna nɛ mbʋ ɖe-liu wɛɛ yɔ pɩ-hɛkʋ taa. Ɛyɔɔdaa se: «Ma nɛ mɛ-ɛsa ɖɩɖʋ ɛgbɛyɛ. Ye mbʋ, ɛzɩma manpɩzɩɣ nɛ mɔncɔnɩ pɛlɛ nɔɔyʋ nɛ lɩmaɣza kɩdɛkɛda?» (Yɔɔb 31:1) Pɩtasɩnɩ se Yɔɔb tɛm ɛ-taa se eetukuuni halʋ nɔɔyʋ nɛ lɩmaɣza kɩdɛkɛda lɛ, ɛɛtɛm ɛ-taa ɖɔɖɔ se ɛɛwɛɣnɩ lɩmaɣza ana. Yesu ñɩɣ niye pɩ-yɔɔ se pɩcɛyaa se ɖɩtaawɛɛnɩ kʋzʋʋ kɩdɛkɛdʋʋ lɩmaɣza. Ɛyɔɔdaa se: «Ye nɔɔyʋ ɛwɛɛ nɛ ɛcɔŋnɩ halʋ nɔɔyʋ nɛ e-liu tɛɛ kɔtʋʋnɩ-ɩ yɔ, ɛtɛm labʋ acɛyɛ nɛ halʋ ɛnʋ, ɛ-laŋɩyɛ taa.»—Mat. 5:28.
w08 1/9 11 § 4
Maɣzɩ «mbʋ pɩkaɣ tɛmnʋʋ yɔ pɩ-yɔɔ»
Pʋcɔ ŋpaɣzɩ nʋmɔʋ ŋgʋ kɩ-taa ɖɔm lɛ, pɔzɩ ña-tɩ se: «Le nʋmɔʋ ŋgʋ kiwokini-m?» Ye ŋkpaɣ alɩwaatʋ pazɩ nɛ ŋmaɣzɩ mbʋ pɩpɩzɩɣ nɛ ‘pɩtɛmna’ yɔ pɩ-yɔɔ yɔ, pɩpɩzɩɣ pɩsɩnɩ-ŋ nɛ ŋtaala mbʋ pɩpɩzɩɣ pɩkɔnɩ-ŋ kala sɔsɔna yɔ. Mba palɩzaa se paawelisiɣ paɣʋ mbʋ Yehowa pakɩ-wɛ kʋzʋʋ kɩdɛkɛdʋʋ wezuu caɣʋ nʋmɔʋ taa yɔ mbʋ pɩtalɩɣ-wɛ yɔ pɩ-taa nabʋyʋ yɔ: SIDA nɛ kʋdɔmɩŋ weyi kʋzʋʋ kɩdɛkɛdʋʋ wezuu caɣʋ kɔŋna yɔ ɛkpaɣ-wɛ, pahakɩ hosi nzɩ patɩɖʋna yɔ, palɩzɩɣ hosi, pɩwɛɛkɩɣ taabalɩyɛ nɖɩ ɖɩwɛ hɔʋ taa yɔ, nɛ pɛ-ɛhʋyɛ cɛyɩɣ-wɛ. Apostoloo Pɔɔlɩ yɔɔdɩ mbʋ pɩtɛŋnɩ mba pacakɩ kʋzʋʋ kɩdɛkɛdʋʋ wezuu yɔ pɔ-tɔm kpayɩ kpayɩ. Ɛyɔɔdaa se: ‘Paakaɣ hiɣu Ɛsɔ Kewiyaɣ.’—1 Kɔrɛntɩ mba 6:9, 10.
w10 15/11 5-6 § 15-16
Piya evelisi—Iyele nɛ Ɛsɔtɔm ɖiyi-mɩ
15 Ŋmaɣzɩɣ se alɩwaatʋ ndʋ taa pɩpɩzɩɣ nɛ pɩtakɩ ñe-siɣsiɣ wɛtʋ Ɛsɔ ɛsɩndaa nɛ pɩkɩlɩ? Alɩwaatʋ ndʋ ña nɛ lalaa ɩwɛɣ yɔ yaa alɩwaatʋ ndʋ ŋwɛɣ ñe-ɖeke yɔ? Pɩtʋʋ fɛyɩ se alɩwaatʋ ndʋ ŋwɛɣ sukuli taa yaa tʋmɩyɛ taa yɔ ŋcakɩnɩ ñɛ-ɛsa fezuu taa nɛ pɩkɩlɩɣ. Ŋcakɩnɩ ñɛ-ɛsa se ŋpɩzɩ nɛ ŋna mbʋ payɩ pɩpɩzɩɣ nɛ pɩkɔnɩ-ŋ kaɖɛ fezuu taa yɔ. Alɩwaatʋ ndʋ ŋwɛɣ ñe-ɖeke nɛ ŋŋcakɩnɩ ñɛ-ɛsa yɔ tɩ-taa pɩwɛɣ kɛlɛʋ se ŋmaanɩ wezuu kɩbaŋʋ caɣʋ paɣtʋ yɔɔ.
16 Ɛbɛ yɔɔ ŋsɔɔlaa se ŋña Yehowa halɩ pɩkpɛndɩnɩ alɩwaatʋ ndʋ ŋwɛɣ ñe-ɖeke yɔ tɩ-taa? Tɔzɩ tɔm tʋnɛ tɩ-yɔɔ: ŋpɩzɩɣ nɛ ŋyele nɛ Yehowa nɩɩ siziŋ yaa ɛ-taa laa leleŋ. (Kiɖe 6:5, 6; Adu. 27:11) Ña-lakasɩ wɛnɩ ɖoŋ ɛzɩma pɩlakɩ Yehowa yɔ pɩ-yɔɔ mbʋ pʋyɔɔ yɔ ‘ɛcɔŋnɩ ñɔ-yɔɔ.’ (1 Pɩy. 5:7) Ɛsɔɔlaa se ŋwelisini-i nɛ pɩsa nɛ pɩwazɩ ña-maɣmaɣ. (Iza. 48:17, 18) Alɩwaatʋ ndʋ caanaʋ taa Izrayɛɛlɩ taa Yehowa sɛyaa nabɛyɛ kizi ɖɔm ɛ-lɔŋ tasʋʋ yɔɔ yɔ, piyeba nɛ Yehowa nɩɩ siziŋ. (Keɣ. 78:40, 41) Ɛlɛ Yehowa kaasɔɔlɩ nayʋ Danɩyɛɛlɩ siŋŋ, mbʋ pʋyɔɔ yɔ tiyiyu nɔɔyʋ ya-ɩ se «ɛyʋ weyi ɛmʋ ñɩm siŋŋ yɔ.» (Dan. 10:11) Ɛbɛ yɔɔ? Mbʋ pʋyɔɔ yɔ Danɩyɛɛlɩ wobi pɩ-yɔɔ nɛ ɛɖɔkɩ e-siɣsiɣ wɛtʋ Ɛsɔ ɛsɩndaa alɩwaatʋ ndʋ ɛwɛ ɛyaa hɛkʋ taa nɛ alɩwaatʋ ndʋ ɛwɛ e-ɖeke yɔ.—Kalɩ Danɩyɛɛlɩ 6:10.
Fezuu taa ñɩm
w05 15/11 11 § 3
Lɔŋ taasʋʋ mbʋ pɩsɩɣnɩ ɛyʋ se ewelisini ɛyaa lalaa nɛ sɔɔlɩm yɔ
Yɔɔb taabalaa welisi ɛ-tɔm yɔɔdʋʋ mbʋ yɔ, paa pɩtɩɖɔɔ yɔ pɩtalɩ 10. Paa mbʋ yɔ, Yɔɔb yɔɔdaa se: «Ɛbɛ kaalaba se nɔɔyʋ welisaɣni-m!» (Yɔɔb 31:35) Ɛbɛ yɔɔ? Mbʋ pʋyɔɔ yɔ ɛzɩma ɛ-taabalaa mba pewelisini-i yɔ pɩtɩhɛzɩ ɛ-laŋɩyɛ. Patɩwɩlɩ se pamaɣzɩɣ Yɔɔb yɔɔ nɛ pataasɔɔlɩ ɖɔɖɔ se panɩɩ ɛzɩma pɩlakɩ-ɩ yɔ pɩ-taa. Pɩtʋʋ fɛyɩ se pataakɛ welisiyaa mba panɩɣ ɛyʋ siziŋ yɔ. Ɛlɛ apostoloo Pɩyɛɛrɩ tasɩɣ-ɖʋ lɔŋ ɛnɛ: «Mɩ-tɩŋa ɩwɛɛnɩ maɣzɩm kʋɖʋmʋm, ɩnɩɩ ɖama siziŋ, ɩwɛɛnɩ koobiye sɔɔlɩm, pʋtɔdɩyɛ naʋ siŋŋ, nɛ tɩ luzuu.» (1 Pɩyɛɛrɩ 3:8) Ɛzɩma ɖɩpɩzɩɣ nɛ ɖɩwɩlɩ se ɖɩnɩɣ ɛyaa siziŋ? Nʋmɔŋ weyi ɩ-yɔɔ ɖɩpɩzɩɣ nɛ ɖɩtɩŋna nɛ ɖɩla mbʋ yɔ ɩ-taa nakʋyʋ lɛ se ɖɩwɩlɩ se ɖɩmaɣzɩɣ ɛzɩma pɩlakɩ ɛyʋ lɛlʋ yɔ pɩ-yɔɔ nɛ ɖɩñaɣ pana nɛ ɖɩnɩɩ ɛzɩma pɩlakɩ-ɩ yɔ pɩ-taa. Nʋmɔʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩwɩlɩ se ɖɩmaɣzɩɣ ɛyʋ lɛlʋ yɔɔ yɔ ŋgʋ lɛ se ɖɩpɩzɩɣ nɛ ɖiheyi-i tɔm ndʋ tɩwɩlɩɣ se ɖɩnɩɣ e-siɣsiɣ yɔ. Tɩ-taa natʋyʋ yɔ: «Pɩtʋʋ fɛyɩ se pɩɖʋ-ŋ ɖɩwɩzɩyɛ» yaa «pɩtɩla patɩnɩɩ mbʋ ŋlaba yɔ (tɔm ndʋ ŋyɔɔdaa yɔ) pɩ-taa camɩyɛ.» Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩla mbʋ yɔ lɛ se ɖɩpɩzɩɣ nɛ ɖɩlabɩnɩ tʋmɩyɛ ɖa-maɣmaɣ ɖɔ-tɔm pee nɛ ɖɩɖaɣnɩ yɔɔdʋʋ tɔm ndʋ ɛyʋ ɛnʋ ɛyɔɔdaa yɔ nɛ ɖɩwɩlɩ-ɩ se ɖɩnɩ tɔm ndʋ ɛyɔɔdaa yɔ tɩ-taa. Ye pɔtɔm se ɛyʋ ewelisini lɛlʋ nɛ sɔɔlɩm yɔ, pʋ-tɔbʋʋ lɛ se ewelisi tɔm ndʋ ɛyɔɔdʋʋ yɔ camɩyɛ nɛ ɛñaɣ pana ɖɔɖɔ nɛ ɛtɩlɩ ɛzɩma pɩlakɩ-ɩ yɔ, paa pɩɩnaɣ kaɣlaa yɔ.