Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2024 Watch Tower Bible and Tract Society of Pennsylvania
4-10 NOVEMBRE
ÑƖM MBƲ PƖWƐ ƐSƆTƆM TAA YƆ KEƔA 105
«Ɛtɔzʋʋ ɛgbɛyɛ nɖɩ ɛɖʋwa yɔ ɖɩ-yɔɔ tam»
Ɛzɩma ɖɩpɩzɩɣ nɛ ɖɩcɛyɩsɩ tisuu mbʋ ɖɩwɛnɩ ɛjaɖɛ kɩfaɖɛ tamaɣ ŋga Yehowa labɩ-ɖʋ yɔ kɔ-yɔɔ?
11 Caanaʋ taa, Yehowa kaalabɩ ɛ-samaɣ tamasɩ nasɩyɩ nɛ ɛyaa ɛsɩndaa lɛ, pɩwɛ ɛzɩ sɩɩpɩzɩɣ nɛ sɩla yɔ. Iyele nɛ ɖɩna tamasɩ nzɩ sɩ-taa nasɩyɩ. Eheyi Abraham nɛ Saara se pakaɣ wɛnʋʋ pɩɣa pa-akpadɩyɩtʋ taa. (Kiɖe 17:15-17) Ɛtasɩ heyuu Abraham se ɛcɛlɩɣ ɛ-lʋlʋʋ taa mba Kanaŋ tɛtʋ. Alɩwaatʋ ndʋ Abraham lʋlʋʋ taa mba, pʋ-tɔbʋʋ se Izrayɛɛlɩ piya, kaacaɣ yomiye taa Ejipiti yɔ pɩɩwɛ ɛzɩ tamaɣ ŋga kaakaɣ labʋ yɔ. Ɛlɛ kalaba. Pʋwayɩ, paa Elizaabɛɛtɩ kaakpadɩyaa yɔ, Yehowa yɔɔdaa se ɛkaɣ wɛnʋʋ pɩɣa. Eheyi ɖɔɖɔ Maarɩɩ se ɛkaɣ lʋlʋʋ pɩɣa, ŋgʋ Maarɩɩ taatɩlɩ abalʋ; pɩɣa ŋga kɛkɛ Yehowa maɣmaɣ Pɩyalʋ. Piyekaɣ se tamaɣ ŋga Yehowa labɩ Edɛɛnɩ kaɖaɣ taa pɩnzɩ kudokiŋ sakɩyɛ yɔ kala.—Kiɖe 3:15.
12 Alɩwaatʋ ndʋ ɖɩmaɣzɩɣ tamasɩ nzɩ payɩ Yehowa laba nɛ ɛzɩma eyeba nɛ sɩla yɔ pɩ-yɔɔ yɔ, ɖɩnɩɣ pɩ-taa se ɛwɛnɩ ɖoŋ siŋŋ. Piyeki nɛ tisuu mbʋ ɖɩwɛnɩ tamaɣ ŋga ɛlaba se ɛjaɖɛ kɩfaɖɛ kaɣ kɔm yɔ kɔ-yɔɔ yɔ pɩkpa ɖoŋ. (Kalɩ Yozuwee 23:14; Izaayii 55:10, 11.) Nɛ tisuu mbʋ, pɩsɩɣnɩ-ɖʋ nɛ ɖɩñɔɔzɩ ɖa-tɩ camɩyɛ nɛ ɖɩsɩnɩ ɛyaa lalaa nɛ peɖiɣzina se tamaɣ ŋga Ɛsɔ laba se ɛjaɖɛ kɩfaɖɛ kaɣ kɔm yɔ katɩkɛ ɖoziye tɔm yaa cɛtɩm tɔm. Yehowa maɣmaɣ yɔɔdɩ ɛsɔdaa kɩfalʋʋ nɛ tɛtʋ kɩfatʋ pɔ-tɔm se: «Tɔm ndʋ, . . . tɩwɛ siɣsiɣ nɛ tɩkɛ toovenim.»—Natʋ 21:1, 5.
it-2 493 § 2
Tɔm
Yehowa nɔɔ taa tɔm wɛnɩ ɖoŋ e-wondu kɩlɩzɩtʋ kpeekpe ndʋ tɩwɛ wezuu nɛ ndʋ tɩfɛyɩ wezuu yɔɔ tɩ-yɔɔ; nɛ ɛlakɩnɩ ɛ-nɔɔ taa tɔm tʋmɩyɛ se pɩsa nɛ ɛ-tamasɩ la. (Ke 103:20; 148:8) Papɩzɩɣ nɛ pataa ɛ-tɔm liu; ye Ɛsɔ ɛlabɩ tamaɣ nakɛyɛ yɔ, ɛlakɩ ɛzɩ ɛyɔɔdʋʋ yɔ. (Wp 9:5; Ke 105:42-45) Ɛzɩ ɛ-maɣmaɣ ɛyɔɔdʋʋ yɔ, ɛ-tɔm ‘wɛɣ tam;’ tɩɩkaɣ pɩsʋʋ ɛ-cɔlɔ kpɛɖɛ, ɛlɛ tɩkaɣ labʋ mbʋ etiyi-tʋ se tɩla yɔ.—Iza 40:8; 55:10, 11; 1Pɩ 1:25.
Fezuu taa ñɩm
w86 1/11 19 § 15
Piya evelisi—waɖɛ nɖɩ ɩwɛnɩ hɔʋ ŋgʋ kɩwɛ taa leleŋ nɛ nɔɔ kʋɖʋmaɣ taa yɔ kɩ-taa?
15 «Paɖɩ [Yosɛɛfʋ] nɩŋgbanzɩ kpasɩ, pasʋzɩ e-pondone ñɩɣtʋ taa; Yehowa tɔm kaañɔɔzɩnɩ-ɩ nɛ ɛwɛɛ kele kele pɩkɔɔ pɩtalɩ alɩwaatʋ ndʋ ɛ-tɔm laba yɔ.» (Keɣa 105:17-19) Yosɛɛfʋ kaalabɩ kʋñɔŋ pɩnzɩ 13. Pɩnzɩ nzɩ sɩ-taa, ɛɛkɛ yom nɛ salaka tʋ nɛ pɩkɔɔ pɩtalɩ alɩwaatʋ ndʋ Yehowa tɔm laba yɔ. Yehowa tɩŋnɩ kaɖɛ nɖɩ ɖɩ-yɔɔ nɛ ɛfalɩsɩ-ɩ. Pɩtɩkɛ Yehowa cɔlɔ ɛ-kʋñɔmɩŋ ɛnɩ ɩlɩnaa, paa mbʋ yɔ ɛha nʋmɔʋ se ɩtalɩ-ɩ nɛ pɩsa nɛ ɛ-tamaɣ la. Yosɛɛfʋ kaɣ wobu pɩ-yɔɔ nɛ ɛtaa liu «Yehowa tɔm» kala sɔsɔna alɩwaatʋ ndʋ tɩ-taa? Ɛkaɣ pɩzʋʋ nɛ ɛñaɣ pana nɛ ɛwɛɛnɩ suuɖu, tɩ luzuu, ɛpɩɩ fezuu taa nɛ pɩkɩlɩ nɛ ɛpɩzɩ nɛ ɛla tʋmɩyɛ sɔsɔɖɛ nɖɩ pakaɣ-ɩ ɖʋʋ yɔ? Pɩtʋʋ fɛyɩ se alɩwaatʋ ndʋ Yosɛɛfʋ lɩ wɛtʋ ndʋ tɩ-taa yɔ, ɛɛwɛ ɛzɩ sika ŋga paɖʋ-kɛ miŋ taa nɛ pekelisi-kɛ yɔ, ɛɛwɛ kele kele nɛ halɩ ɛɛmʋ ñɩm Ɛsɔ ɛsɩndaa nɛ pɩkɩlɩ, nɛ Ɛsɔ tɩŋnɩ ɛ-yɔɔ nɛ ɛla tʋma sɔsɔna pʋwayɩ.—Kiɖe Tɛɛ Tɔm 41:14, 38-41, 46; 42:6, 9.
11-17 NOVEMBRE
ÑƖM MBƲ PƖWƐ ƐSƆTƆM TAA YƆ KEƔA 106
«Pɔsɔ Ɛsɔ yɔɔ, ɛnʋ weyi ɛkɛ pa-Ñʋʋ Yaɖʋ yɔ»
«Awɛ Yehowa hɔɔlʋʋ yɔɔ?»
13 Ɛzɩma Izrayɛɛlɩ piya kaana mɩndʋ tibi pʋʋ yɔɔ nɛ ɛsɔdaa yu kpemm, tɛʋ nazɩɣ nɛ sɩna ɖɔɖɔ piti lakasɩ lɛɛsɩ yɔ, piyeba nɛ sɔɔndʋ kpa-sɩ siŋŋ. Peeɖe sɩpɔzɩ Moyizi nɛ ɛlɛ tisi se ewoki Sinayii Pʋʋ ñʋʋ taa nɛ ɛyɔɔdɩnɩ Yehowa sɩ-hɩɖɛ taa. (Ejl. 20:18-21) Moyizi kpa pʋʋ ñʋʋ taa lɛ, etitii lɔŋ. Ɛzɩ sɔɔndʋ kaapaɣzɩ Izrayɛɛlɩ piya kpaʋ kañɩmbusuu taa peeɖe se pe-ɖiyiyu kɩbanʋ tɩtasɩ pɔ-cɔlɔ wɛʋ na? Pɩwɩlɩɣ se alɩwaatʋ ndʋ Moyizi wɛɣ samaɣ cɔlɔ yɔ, kɛwɛɣnɩ tisuu nɛ alɩwaatʋ ndʋ ɛɛwɛɣ yɔ lɛ, ke-tisuu paɣzɩɣ hɛʋ. Pʋyɔɔ kɔpɔzɩ Aarɔɔnɩ se: «Labɩ-ɖʋ ɛsɔ nɔɔyʋ, weyi ɛkaɣ ɖɛʋ ɖɔ-nɔɔ yɔ, mbʋ pʋyɔɔ yɔ ɖɩɩsɩŋ mbʋ pɩtalɩ Moyizi ɛnʋ yɔ, abalʋ weyi ɛlɩzɩ-ɖʋ Ejipiti ɛjaɖɛ taa yɔ.»—Ejl. 32:1, 2.
Fezuu taa ñɩm
w06 15/7 13 § 9
Keɣsi takayaɣ naadozo ñɩŋga nɛ naanza ñɩŋga taa lɩmaɣza sɔsɔna
Keɣa 106:36, 37. Masɩ sɩnɛ sɩwɩlɩɣ se nɔɔ kʋɖʋmaɣ wɛ ɛzɩma pɛsɛɣ sɩʋ kpelisi nɛ ɛzɩma palaɣ aleewaa kɩlaŋ yɔ pɩ-hɛkʋ taa. Pɩwɩlɩɣ se ye nɔɔyʋ ɛlakɩnɩ tʋmɩyɛ sɩʋ kpelisi yɔ, pɩpɩzɩɣ piyele nɛ aleewaa wɛɛnɩ ɖoŋ ɛ-yɔɔ. Bibl pakɩ-ɖʋ se: «Ɩkpa mɩ-tɩ nɛ sɩʋ kpelisi.»—1 Yohanɛɛsɩ 5:21.
18-24 NOVEMBRE
ÑƖM MBƲ PƖWƐ ƐSƆTƆM TAA YƆ KEƔSI 107-108
«Ɩsɛɛ Yehowa se ɛlabaɣ lɛ, mbʋ pʋyɔɔ yɔ ɛwɛ ɖeu»
w07 15/4 20 § 2
Ɛgbɛyɛ ɛsa Yehowa
2 Ɛgbɛyɛ tɩkɛ ɛyaa mba pekpeɣliɣ se pala aleɣya naayɛ yem yɔ. Ðɩtɩkɛ ɖɔɖɔ kooka nakɛyɛ taa ɛyaa yaa ɛyaa mba palɩnɩ ɖoli kʋɖʋm yaa ɛyaa mba pekpeɣliɣ se pala hola aleɣya naayɛ yaa pamʋ helim yɔ pe-tindimiye naɖɩyɛ. Ɛlɛ lɩmaɣzɩyɛ sɔsɔɖɛ nɖɩ ɖɩ-yɔɔ palabɩ ɖʋtʋ se ɛgbɛyɛ ɛwɛɛ yɔ nɖɩ lɛ se pɩsa nɛ pasa Ɛsɔ Yehowa. Nɛ ɛzɩ Keɣsi takayaɣ wɩlʋʋ yɔ, ɖooo lɔndaa ɖʋtʋ ndʋ tɩɩwɛɛ. Ðɩkalɩɣ Keɣa 35:18 taa se: «Ðɩnɛ ɛlɛ mankaɣ-ŋ wɩlʋʋ mɛ-ɛsɩmɩyɛ samaɣ sɔsɔɔ taa; mankaɣ-ŋ sam ɛyaa samasɩ taa.» Mbʋ ɖɔɖɔ Keɣa 107:31, 32 seɣtiɣ-ɖʋ se: «Tɛtɛ nɛ pɛsɛɛ Yehowa se ɛlabaɣ lɛ ɛ-sɔɔlɩm siɣsiɣ ñɩmbʋ yɔɔ nɛ e-piti tʋma wena ɛlakɩ ɛyaa piya yɔ a-yɔɔ. Pɛɖɛyɩ-ɩ samaɣ ŋga kekpeɣlaa yɔ ka-taa.»
w15 1/1 8 § 4
Ɩsɛɛ Yehowa mbʋ ɛlakɩ-mɩ yɔ pɩ-yɔɔ
4 Pʋcɔ nɛ ɖɩpɩzɩ nɛ ɖɩwɩlɩ Yehowa ɖɛ-ɛsɩmɩyɛ tam lɛ, pɩpɔzɩ pana ñaɣʋ. Kajalaɣ lɛ, pɩwɛɛ se ɖɩmaɣzɩ nɛ ɖɩna ɛzɩma Yehowa wazɩ-ɖʋ yɔ. Nɛ pʋwayɩ lɛ, pɩwɛɛ se ɖɩmaɣzɩ nɛ ɖɩna ɛzɩma wazasɩ nzɩ sɩwɩlɩɣ se Ɛsɔ sɔɔlɩ-ɖʋ siŋŋ yɔ. Mbʋ keɣa maɖʋ laba, nɛ ɛna se camɩyɛ lakasɩ sɔsɔsɩ nzɩ Yehowa labɩ-ɩ yɔ, sɩɖɔwa pɩdɩɩfɛyɩ nɛ sɩ-tɔm ɖɩɣzɩ-ɩ.—Kalɩ Keɣsi 40:5; 107:43.
Fezuu taa ñɩm
it-2 303 § 5
Mowaabʋ
Pʋwayɩ, alɩwaatʋ ndʋ Daviid tɔkaɣ kewiyitu yɔ, you kaaɖaɣnɩ tuluu Izrayɛɛlɩ mba nɛ Mowaabʋ mba hɛkʋ taa. Izrayɛɛlɩ mba wabɩ Mowaabʋ mba nɛ poluzi-wɛ pɛ-tɛɛ nɛ pɛhɛyɩɣ Daviid lambuu. Pɩwɛ ɛzɩ alɩwaatʋ ndʋ you ŋgʋ kɩtɛma yɔ, ye patayɩ Mowaabʋ sɔɔjanaa taa tam 3 yɔ, Izrayɛɛlɩ mba kʋ hɔɔlɩŋ 2. Pɩwɛ ɛzɩ Daviid kaayeba nɛ pahɩnɩ tataa nɛ ɛmaɣzɩ pɔ-yɔɔ nimasɩ 3: ɛmaɣzɩ nimasɩ 2 nɛ pakʋ sɩ-taa ñɩma, nɛ ɛmaɣzɩ nimaɣ kʋɖʋmaɣ nɛ eyele ka-taa ñɩma nɛ pɛwɛɛ wezuu. (2Sa 8:2, 11, 12; 1Kr 18:2, 11) Pɩwɛ ɖɔɖɔ ɛzɩ you ŋgʋ kɩ-taa Yehoyiyada pɩyalʋ Benayaa kʋ «Mowaabʋ tʋ Ariyɛɛlɩ pɩyalaa 2.» (2Sa 23:20; 1Kr 11:22) Ɛzɩma Daviid wabɩ Mowaabʋ mba yɔ piyeba nɛ natʋ tɔm ndʋ Baalam kaayɔɔdaa pɩcɛzɩɣ pɩnzɩ 400 yɔɔ yɔ tɩla. Tɩtɔŋ se: «Tɩɩŋa nakɛyɛ kaɣ lɩnʋʋ Yakɔɔb taa, nɛ kewiyaɣ ɖaʋ nakʋyʋ kaɣ kpaʋ nɛ Izrayɛɛlɩ taa. Nɛ paa pɩɩlabɩ ɛzɩma yɔ, ɛkaɣ yɔkʋʋ Mowaabʋ kiɖe nɛ puuyaɣ pɩyalaa kpeekpe ñʋmbɔɔyaɣ.» (Kɩg 24:17) Pʋtɔma ɖɔɖɔ yɔ wabɩyɛ nɖɩ ɖɩ-tɔm keɣa maɖʋ yɔɔdaɣ alɩwaatʋ ndʋ ɛmawa se Ɛsɔ kpakɩɣ Mowaabʋ se kɩkɛ ‘ñanaɣ ŋga ka-taa ɛkɔʋ lɩm yɔ.’—Ke 60:8; 108:9.
25 NOVEMBRE–1er DECEMBRE
ÑƖM MBƲ PƖWƐ ƐSƆTƆM TAA YƆ KEƔSI 109-112
Ðʋ Yesu nesi, ɛnʋ kɛnɩ Wiyaʋ!
w06 1/9 13 § 6
Keɣsi takayaɣ kagbanzɩ ñɩŋga taa lɩmaɣza sɔsɔna
Keɣa 110:1, 2—Alɩwaatʋ ndʋ «[Daviid tɛ] Kɩbaɣlʋ» Yesu Krɩstʋ caɣ Ɛsɔ nesi kɩbanzɩ yɔɔ yɔ, ɛbɛ ɛɛwɛɛ nɛ ɛlakɩ? Pefezi Yesu nɛ pɩtɛ lɛ, ɛkpa ɛsɔdaa nɛ ɛcaɣ Ɛsɔ nesi kɩbanzɩ yɔɔ nɛ ɛɖaŋ nɛ pɩkɔɔ pɩtalɩ pɩnaɣ 1914; pɩñaɣ ŋga ɛpɩsɩ Wiyaʋ nɛ ɛpaɣzɩ kewiyitu tɔɔʋ. Alɩwaatʋ ndʋ ɛɛwɛɛ nɛ ɛɖaŋɩɣ yɔ, ɛtɔkaɣ kewiyitu ɛ-wayɩ tɩŋɩyaa patam numwaa yɔɔ, eɖiyaɣ-wɛ tɔm susuu nɛ kpɛlɩkɩyaa labʋ tʋmɩyɛ taa, nɛ ɛɛwɛɛ nɛ ɛñɔzʋʋ-wɛ se pa nɛ ɩ papɩzɩ nɛ pɔtɔɔ kewiyitu e-Kewiyaɣ taa pʋwayɩ.—Maatiyee 24:14; 28:18-20; Luka 22:28-30.
w00 1/4 18 § 3
Mba poyouni Ɛsɔ yɔ paakaɣ wabʋ!
3 Kpaɣnɩ pɩnzɩ 1900 waa ɖɩbazɩyɛ taa, koyindinaa wɛɛ nɛ pakʋyʋʋ Yehowa samaɣ yɔɔ. Ajɛɛ sakɩyɛ taa, ɛyaa kɩdɛkɛdaa ñaɣ pana se posuli Yehowa samaɣ nɔɔ nɛ kataasusi Kewiyaɣ tɔm kɩbandʋ. Ðo-koyindinaa ñʋʋdʋ Eleeu seɣtiɣni-wɛ; ɛwɛɛ nɛ «ɛcɔʋ ɛzɩ mʋʋzʋʋ ŋgʋ kɩmakɩ kubusi yɔ, nɛ ɛñɩnɩɣ se ɛtɔɔ nɔɔyʋ.» (1 Pɩyɛɛrɩ 5:8) «Ajɛɛ tɛ alɩwaatʋ ndʋ paɖʋwa yɔ» tɩtɛm pɩnaɣ 1914 taa lɛ, Ɛsɔ sɩɩ ɛ-Pɩyalʋ Wiyaʋ se eɖiyi tɛtʋ, nɛ ɛɖʋ-ɩ paɣtʋ tʋnɛ: «Wolo ño-koyindinaa hɛkʋ taa nɛ ŋluzi-wɛ.» (Luka 21:24; Keɣa 110:2) Krɩstʋ labɩnɩ tʋmɩyɛ ɖoŋ weyi paha-ɩ yɔ nɛ ɛɖɔɔnɩ Sataŋ ɛsɔdaa nɛ etii tɛtʋ yɔɔ. Sataŋ nawa se alɩwaatʋ pazɩ yem pɩkazɩ-ɩ, pʋyɔɔ lɛ ɛpɩyɩɣ ɛ-pana Krɩstʋ mba patam numwaa nɛ pa-taabalaa yɔɔ. (Natʋ 12:9, 17) Koyindinaa mba, powobi pɩ-yɔɔ nɛ pakaɖɩnɩ Yehowa samaɣ mbʋ lɛ, ɛbɛ lɩ pɩ-taa?
be 76 § 2
Wolo pɩ-yɔɔ nɛ ŋɖɛɣnɩ ɛsɩndaa
Bibl seɣtiɣ-ŋ se ŋlabɩnɩ tʋmɩyɛ kʋjɔʋ ŋgʋ ŋmʋwa yɔ nɛ pɩwɩlɩɣ se ŋɖʋ ña-taa se ŋlakɩ nabʋyʋ nɛ pɩwazɩ lalaa. Ŋlakɩ ɖʋtʋ nɛ ña nɛ lalaa ɩkpɛndɩɣ nɛ isusuu tɔm na? Ŋñɩnɩɣ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋsɩnɩ ñɛ-ɛgbɛyɛ taa ñɩma mba pɛkɛ kɩfama, piya yaa mba pɛwɛnɩ tomnaɣ yɔɔ ɛjandʋ natʋyʋ yɔ? Ŋhaɣ ña-tɩ faaa nɛ ŋɖʋʋ nesi se pɔcɔnɩ Kewiyaɣ kpaaŋ ɖeɖe nɛ kɩwɛɛ cɩɖɩ cɩɖɩ yaa ŋɖʋʋ nesi tʋma ndɩ ndɩ kigbeɣliŋ cikpeŋ nɛ kigbeɣliŋ sɔsɔŋ taa? Ŋpɩzɩɣ nɛ ŋlakɩ nʋmɔʋ lɩzʋʋ sɩnɩyʋ tʋmɩyɛ nabʋyʋ taa? Ŋpɩzɩɣ nɛ ŋpɩsɩ paa ɖooye nʋmɔʋ lɩzɩyʋ na? Ye ŋkɛ koobu abalɩñɩnʋ yɔ, ŋwɛɛ nɛ ŋñakɩ pana se ŋwɛɛnɩ wɛtʋ ndʋ Masɩ pɔzʋʋ se ɛyʋ ɛwɛɛna nɛ ɛkɛ ɛgbɛyɛ taa tʋmlaɖʋ nɛ ɛgbɛyɛ taa ɛzʋtʋyʋ yɔ? Ye ŋhaɣ ña-tɩ faaa se ŋsɩna nɛ ŋtisiɣ nɛ pahaɣ-ŋ wala yɔ, ŋwɩlɩɣ se ŋwɛɛ nɛ ŋɖɛɣnɩ ɛsɩndaa.—Keɣ. 110:3.
Fezuu taa ñɩm
it-1 80 § 4
Ɛgbɛyɛ ɖʋʋ
Ɛɖʋ-ɩ nɛ ɛgbɛyɛ se ɛkɛ Cɔjɔ ɛzɩ Mɛlɩkisedɛɛkɩ yɔ. Pɔyɔɔdɩ ɛgbɛyɛ nɖɩ ɖɩ-tɔm Keɣa 110:4 taa, nɛ weyi ɛma Bibl taa takayaɣ ŋga payaɣ se Ebree mba yɔ, ɛyɔɔdɩ Ebree mba 7:1-3, 15-17 taa se Krɩstʋ tɔm pɔyɔɔdʋʋ. Yesu Krɩstʋ ɖeke Yehowa ɖʋnɩ ɛgbɛyɛ nɖɩ. Pɩwɛ ɛzɩ ɛgbɛyɛ nɖɩ ɖɩ-tɔm Yesu yɔɔdaɣ alɩwaatʋ ndʋ ɛɖʋwaɣ ɛgbɛyɛ ɛ nɛ ɛ-wayɩ tɩŋɩyaa pɛ-hɛkʋ taa se pɔtɔɔ kewiyitu kewiyaɣ taa yɔ. (Luk 22:29) Ðuutu ndʋ Yehowa ɖuwaa yɔ, tɩhaɣ waɖɛ ɛ-Pɩyalʋ Yesu Krɩstʋ se ɛkɛ cɔjɔ ɛzɩ Mɛlɩkisedɛɛkɩ yɔ. Mɛlɩkisedɛɛkɩ kaakɛ Ɛsɔ tɛ wiyaʋ nɛ ɛ-tɛ cɔjɔ tɛtʋ yɔɔ. Yesu Krɩstʋ kaɣ kɛʋ Wiyaʋ nɛ Cɔjɔ Kɩlɩm ɛsɔdaa ɛlɛ pɩtɩkɛ tɛtʋ yɔɔ. Ɛkpa ɛsɔdaa nɛ pɩtɛ lɛ paha-ɩ waɖɛ se ɛkɛ Wiyaʋ nɛ Cɔjɔ Kɩlɩm tam. (Ebr 6:20; 7:26, 28; 8:1) Ɛgbɛyɛ nɖɩ, ɖɩkaɣ wɛʋ mbʋ tam mbʋ pʋyɔɔ yɔ Yehowa kaɣ ɖiyuu Yesu nɛ ɛkɛ Wiyaʋ nɛ Cɔjɔ Kɩlɩm tam.—Ebr 7:3.
2-8 DECEMBRE
ÑƖM MBƲ PƖWƐ ƐSƆTƆM TAA YƆ KEƔSI 113-118
Ɛzɩma ɖɩpɩzɩɣ nɛ ɖɩwɩlɩ Yehowa ɖɛ-ɛsɩmɩyɛ?
w01 1/1 11 § 13
Yele nɛ sɔɔlɩm kpazɩ-ŋ ɖoŋ
13 Tɔm ndʋ Yesu yɔɔdaa yɔ tɩwɩlɩɣ kpayɩ kpayɩ se kajalaɣ lɛ pɩwɛɛ se ɖɩsɔɔlɩ Yehowa nɛ pɩ-tɔm kɩlɩnɩ cɛyʋʋ. Ɛlɛ palʋlʋʋ-ɖʋ lɛ, ɖɩɩwɛɣnɩ sɔɔlɩm siŋŋ Yehowa yɔɔ kpaagbaa. Pɩpɔzʋʋ se ɖɩñaɣ pana pʋcɔ nɛ ɖɩwɛɛnɩ sɔɔlɩm mbʋ. Alɩwaatʋ ndʋ ɖɩcalɩ nɩʋ ɛ-tɔm yɔ, tɔm ndʋ ɖɩnɩwa yɔ tɩsɩnɩ-ɖʋ nɛ ɖɩñɔtɩnɩ-ɩ. Pazɩ pazɩ lɛ, ɖɩkɔm nɛ ɖɩkpɛlɩkɩ nɛ ɖɩtɩlɩ ɛzɩma ɛñɔɔzɩ tɛtʋ se ɛyaa ɛcaɣ tɩ-yɔɔ yɔ. (Kiɖe Tɛɛ Tɔm 2:5-23) Ðɩkpɛlɩkaa nɛ ɖɩtɩlɩ wɛtʋ ndʋ ɛlɩzaa nɛ ɛwɩlɩ ɛyaa yɔ; alɩwaatʋ ndʋ ɛyaa labɩ kɩwɛɛkɩm kajalaɣ ɖeɖe yɔ ɛtɩlɔ-ɖʋ, ɛlɛ ɛkpɛzɩ nɩŋgbanzɩ nasɩyɩ se ɛya ɖa-ñʋʋ. (Kiɖe Tɛɛ Tɔm 3:1-5, 15) Ɛlabɩ camɩyɛ lakasɩ mba paawɛ siɣsiɣ yɔ, nɛ pʋwayɩ ɛcɛlɩ ɛ-Pɩyalʋ ɛgbamɩyɛ se pɩsa nɛ pekpeɣ-ɖʋ ɖa-kɩwɛɛkɩm. (Yohanɛɛsɩ 3:16, 36) Ðɩwɛɛ nɛ ɖɩtɩlɩɣ Yehowa nɛ pɩkɩlɩɣ lɛ, ɛsɩmɩyɛ nɖɩ ɖɩwɛnɩ ɛ-yɔɔ yɔ ɖɩwɛɛ nɛ ɖɩpaɣlɩɣ nɛ pɩkɩlɩɣ. (Izaayii 25:1) Wiyaʋ Daviid yɔɔdaa se ɛnʋ sɔɔlɩ Yehowa mbʋ pʋyɔɔ yɔ, Yehowa wɩlaa se ɛmaɣzɩɣ ɛ-yɔɔ. (Keɣa 116:1-9) Sɔnɔ ɖɔɖɔ Yehowa maɣzɩɣ ɖɔ-yɔɔ; eɖiyiɣ-ɖʋ, ɛkpazɩɣ-ɖʋ ɖoŋ nɛ ɛhɛzɩɣ ɖa-laŋa. Ðɩwɛɣ nɛ ɖɩkpɛlɩkɩɣ nɛ ɖɩtɩlɩɣ-ɩ nɛ pɩkɩlɩɣ lɛ, sɔɔlɩm mbʋ ɖɩwɛnɩ ɛ-yɔɔ yɔ pɩpaɣlɩɣ nɛ pɩkɩlɩɣ.—Keɣa 31:23; Sofonii 3:17; Roma mba 8:28.
w09 15/7 29 § 4-5
Wɛɛnɩ ɛsɩmɩyɛ kɩbandʋ ndʋ palakɩ-ŋ yɔ tɩ-yɔɔ nɛ ŋhanɩ ña-laŋɩyɛ pilim
Keɣa maɖʋ pɔzɩ ɛ-tɩ se: «Ɛbɛ manpɩzɩɣ nɛ mankpaɣ nɛ mɛhɛyɩnɩ Yehowa Kɩbandʋ ndʋ payɩ ɛlabɩ-m yɔ tɩ-yɔɔ?» (Keɣ. 116:12) Kɩbandʋ ndʋ Yehowa labɩ-ɩ? Yehowa sɩnɩ-ɩ alɩwaatʋ ndʋ ɛɛwɛ «kʋñɔŋ nɛ laŋwɛɛkɩyɛ» taa yɔ. Pɩtasɩ lɛ, Yehowa «holi [ɛ-kalɩzaɣ] sɩm taa.» Nɛ lɛɛlɛɛyɔ lɛ, keɣa maɖʋ sɔɔlaa se ‘ɛhɛyɩ’ Yehowa nabʋyʋ. Ɛbɛ ɛpɩzɩɣ nɛ ɛhɛyɩ? Ɛyɔɔdaa se: «Mankaɣ ɖɔm ɖuutu ndʋ monɖuu Yehowa yɔ tɩ-yɔɔ.» (Keɣ. 116:3, 4, 8, 10-14) Keɣa maɖʋ kaatɛm ɛ-taa se ɛɖɔŋ ɖuutu ndʋ payɩ eɖuu Yehowa yɔ tɩ-yɔɔ nɛ ɛla mbʋ payɩ Yehowa pɔzʋʋ-ɩ se ɛla yɔ.
Ña ɖɔɖɔ ŋpɩzɩɣ nɛ ŋla mbʋ. Ɛzɩma tɩyɛ? Pɩwɛɛ se paa ɛzɩmtaa lɛ, ŋcaɣ wezuu nɛ pɩla nɔɔ kʋɖʋmaɣ nɛ Ɛsɔ paɣtʋ nɛ ɛ-paɣtʋ kila. Pɩtasɩ lɛ, ñaɣ pana nɛ Yehowa sɛtʋ kɛ mbʋ pɩ-tɔm kɩlɩ cɛyʋʋ ñe-wezuu caɣʋ taa yɔ nɛ ŋyele nɛ e-fezuu ɖiyi-ŋ mbʋ payɩ ŋlakɩ yɔ pɩ-taa. (Ekl. 12:13; Gal. 5:16-18) Pɩkɛ toovenim se mbʋ ŋpɩzɩɣ nɛ ŋhɛyɩ Yehowa yɔ, pɩɩpɩzɩɣ nɛ pɩtalɩ mbʋ ɛlabɩ-ŋ yɔ. Paa mbʋ yɔ, ye ŋsɛɣ Yehowa nɛ ña-laŋɩyɛ pilim yɔ ‘piyeki nɛ ɛ-taa la leleŋ.’ (Adu. 27:11) Waɖɛ sɔsɔɖɛ kpem pɩkɛnaa se ŋtɩŋnɩ nʋmɔʋ ŋgʋ kɩ-yɔɔ nɛ ŋyele nɛ Yehowa taa la leleŋ!
Lɔŋ weyi ɖɩpɩzɩɣ nɛ ɖɩkpɛlɩkɩ Levitiki takayaɣ taa yɔ
9 Lɔŋ naalɛ ñɩŋ: Ðɩsɛɣ Yehowa mbʋ pʋyɔɔ yɔ ɖɩwɛnɩ ɛ-yɔɔ ɛsɩmɩyɛ. Pɩsa nɛ ɖɩñɩɣ niye pɩ-yɔɔ lɛ, iyele nɛ ɖɩyɔɔdɩ laŋhɛzɩyɛ kɩlaŋ tɔm. Ɩɩkɛ ɖɔɖɔ caanaʋ taa Izrayɛɛlɩ ñɩma toovenim Ɛsɔ sɛtʋ hɔɔlʋʋ sɔsɔʋ nakʋyʋ. Ðɩkpɛlɩkɩ Levitiki takayaɣ taa se Izrayɛɛlɩ tʋ nɔɔyʋ pɩzɩɣ nɛ ɛlaa laŋhɛzɩyɛ kɩlaʋ «se ɛwɩlɩnɩ ɛ-ɛsɩmɩyɛ.» (Lev. 7:11-13, 16-18) Pɩtɩkɛ se pɩkɛnɩ-ɩ kɩjɛyʋʋ yɔɔ ɛlaɣaɣ kɩlaʋ ŋgʋ, ɛlɛ ɛlaɣaɣ-kʋ nɛ sɔɔlɩm faaa. Ye mbʋ, pɩɩkɛ sɔɔlɩm kɩlaʋ ŋgʋ nɔɔyʋ laɣaɣ mbʋ pʋyɔɔ yɔ ɛsɔɔlɩ ɛ-Ɛsɔ Yehowa yɔ. Weyi ɛlaɣ kɩlaʋ yɔ, ɛ nɛ ɛ-hɔʋ taa ñɩma nɛ layaa pɔtɔkɩ kpɩnɛ nɖɩ palawa yɔ ɖɩ-nandʋ. Ɛlɛ kpɩnɛ nɖɩ palawa yɔ, ɖɩ-hɔɔlɩŋ nɩɩyɩ wɛɛ lɛ, Yehowa ɖeke pɛcɛlaɣ-ɩ. Hɔɔlɩŋ ɛnɩ lɛ weyi?
10 Lɔŋ naadozo ñɩŋ: Sɔɔlɩm yɔɔ lɛ, ɖɩhaɣ Yehowa mbʋ payɩ ɖɩwɛna nɛ pɩkpaɖɩ ɖeu yɔ. Yehowa ɛsɩndaa lɛ, num kɛ kpɩnɛ hɔɔlʋʋ ŋgʋ kɩkpaɖɩ ɖeu yɔ. Ɛyɔɔdaa ɖɔɖɔ se kpɩnɛ hɔɔlɩŋ nɩɩyɩ, pɩkpɛndɩnɩ kataŋgayɩsɩ kɛ mbʋ pɩmʋ ñɩm siŋŋ yɔ. (Kalɩ Levitiki 3:6, 12, 14-16.) Ye mbʋ, alɩwaatʋ ndʋ Izrayɛɛlɩ pɩɣa nakɛyɛ haɣ Yehowa faaa kpɩnɛ hɔɔlɩŋ weyi ɩmʋ ñɩm siŋŋ yɔ nɛ num lɛ, pɩkɛdɩɣnɩ-ɩ nɛ pɩkpaɖɩ. Izrayɛɛlɩ pɩɣa ŋga kalakɩ Yehowa haɖɛ nɖɩ yɔ, kawɩlɩɣ-ɩ se kɔsɔɔlaa se kaha-ɩ mbʋ kɛwɛna nɛ pɩkpaɖɩ ɖeu yɔ. Mbʋ ɖɔɖɔ Yesu kaasɔɔlɩ faaa nɛ ɛha Yehowa mbʋ ɛɛwɛna nɛ pɩkpaɖɩ ɖeu yɔ, pɩtɩŋnɩ ɛzɩma ɛlabɩ mbʋ payɩ ɛpɩzaɣ yɔ se ɛsɛɛ-ɩ, mbʋ pʋyɔɔ yɔ ɛsɔɔlɩ-ɩ yɔ. (Yoh. 14:31) Yesu ɛsɩndaa lɛ, Ɛsɔ sɔɔlɩm labʋ kaakɛnɩ-ɩ taa leleŋ pʋyʋ nɛ ɛɛsɔɔlɩ Ɛsɔ paɣtʋ siŋŋ. (Keɣa 40:8) Maɣzɩ ɛzɩma pɩɩkɛdɩnɩ Yehowa se Yesu sɛɣaɣ-ɩ nɛ sɔɔlɩm faaa yɔ pɩ-yɔɔ nɛ ŋna!
11 Tʋma wena ɖɩlakɩ Yehowa sɛtʋ taa yɔ, awɛ ɖɔɖɔ ɛzɩ laŋhɛzɩyɛ kɩlaŋ ɛnɩ yɔ, mbʋ pʋyɔɔ yɔ awɩlɩɣ Yehowa ɛzɩma ɖɩsɔɔlɩ-ɩ yɔ. Ðɩhaɣ Yehowa mbʋ ɖɩwɛna nɛ pɩkpaɖɩ ɖeu yɔ, mbʋ pʋyɔɔ yɔ ɖɩsɔɔlɩ-ɩ nɛ ɖa-laŋɩyɛ pilim. Maɣzɩ ɛzɩma pɩkɛdɩɣnɩ Yehowa se ɛyaa miiliyɔɔwaa sakɩyɛ sɛɣ-ɩ mbʋ pʋyɔɔ yɔ, pɔsɔɔlɩ-ɩ siŋŋ nɛ pɔsɔɔlɩ ɛ-paɣtʋ yɔ pɩ-yɔɔ nɛ ŋna! Ye ɖɩtɔzʋʋ se mbʋ ɖɩlakɩ yɔ, pɩtɩkɛ pi-ɖeke pɩmʋnɩ ñɩm Yehowa ɛsɩndaa, ɛlɛ mbʋ piseɣtiɣ-ɖʋ nɛ ɖɩlakɩ-pʋ yɔ pɩmʋ ñɩm ɛ-ɛsɩndaa ɖɔɖɔ yɔ, pɩpɩzɩɣ nɛ pɩhɛzɩ ɖa-laŋa. Kɩɖaʋ nakʋyʋ yɔ. Ye ŋkpadɩyaa nɛ ŋŋpɩzɩɣ se ŋtasɩ labʋ tʋma sakɩyɛ ɛzɩ ŋsɔɔlʋʋ yɔ, ña-taa ɛtɛ se Yehowa nɩɣ ñɔ-tɔm taa. Pɩpɩzɩɣ nɛ pɩlabɩ-ŋ ɛzɩ mbʋ ŋlakɩ yɔ pɩtɩɖɔɔ yɔ, ɛlɛ sɔɔlɩm sɔsɔm mbʋ piseɣtiɣ-ŋ nɛ ŋlakɩ mbʋ ŋpɩzɩɣ yɔ, Yehowa naɣ-pʋ. Nɛ pɩkɛdɩɣnɩ-ɩ se ɛmʋ mbʋ ŋwɛna nɛ pɩkpaɖɩ ɖeu nɛ ŋpɩzɩɣ nɛ ŋha-ɩ pʋ yɔ.
Fezuu taa ñɩm
w12 15/5 22 § 1-2
Tɔm ndʋ ɖa-takayɩsɩ kalɩyaa pɔzʋʋ yɔ
Ɛsɔ fezuu ɖiyi keɣa maɖʋ nɔɔyʋ nɛ etee hendu se: «Mba pɛwɛ siɣsiɣ Yehowa ɛsɩndaa yɔ, pa-sɩm tɩkɛ aleɣya tɔm [yaa mʋ ñɩm] ɛ-ɛsɩndaa.» (Keɣ. 116:15) Mba pɛsɛɣ Yehowa yɔ pa-taa paa weyi wezuu mʋ ñɩm ɛ-ɛsɩndaa. Ɛlɛ tɔm ndʋ tɩwɛ Keɣa 116 taa yɔ pɩtɩkɛ ɛyʋ nɔɔyʋ sɩm ɖeke tɔm tɩyɔɔdʋʋ.
Alɩwaatʋ ndʋ Yehowa sɛyʋ siɣsiɣ tʋ nɔɔyʋ sɩkɩ nɛ pɔyɔɔdʋʋ e-pimtu samaɣ taa tɔm yɔ, pɩɩwɛɣ ɖeu se palabɩnɩ tʋmɩyɛ Keɣa 116:15 taa tɔm. Ɛbɛ yɔɔ? Mbʋ pʋyɔɔ yɔ tɔm ndʋ keɣa maɖʋ yɔɔdɩ mayaɣ ŋga ka-taa yɔ tɩ-tɔbʋʋ nɩʋ wɛ ndɩ ndɩ. Tɩwɩlɩɣ se Ɛsɔ ɛsɩndaa lɛ ɛ-sɛyaa siɣsiɣ tɩnaa tɩŋa wezuu mʋ ñɩm nɛ ɛtɩsɔɔlɩ se pasɩ.—Cɔnɩ Keɣsi 72:14; 116:8.
9-15 DECEMBRE
ÑƖM MBƲ PƖWƐ ƐSƆTƆM TAA YƆ KEƔA 119:1-56
«Ɛzɩma evebu pɩzɩɣ nɛ ɛla nɛ ɛ-nʋmɔʋ wɛɛ kele kele?»
w87 1/11 18 § 10
Ŋwoki pɩ-yɔɔ nɛ ŋɖɔkʋʋ ñe-kele kele wɛtʋ hɔɔlɩŋ tɩŋa taa?
10 Pɔɔlɩ pakɩ-ɖʋ Efɛɛzɩ mba 5:5 taa se: «Mbʋ pʋyɔɔ yɔ ɩsɩm tɔm tʋnɛ, iɖiɣzini-tʋ mɩ-maɣmaɣ se weyi ɛcakɩ kʋzʋʋ kɩdɛkɛdʋʋ wezuu yɔ yaa azuluma tʋ yaa ɛsa naɣ naɣ tʋ, pʋ-tɔbʋʋ se sɩɩnaa layʋ, pa-taa nɔɔyʋ fɛyɩnɩ ñɩm nabʋyʋ Krɩstʋ nɛ Ɛsɔ pe-Kewiyaɣ taa.» Paa mbʋ yɔ, paa pɩnaɣ ŋga pɔhɔŋ koobiya kudokiŋ sakɩyɛ nɩŋgbaaŋ yaa palɩzɩɣ-wɛ ɛgbɛyɛ taa mbʋ pʋyɔɔ yɔ pacaɣ kʋzʋʋ kɩdɛkɛdʋʋ wezuu, pʋ-tɔbʋʋ se ‘palabɩ kɩwɛɛkɩm pa-maɣmaɣ po-tomnaɣ.’ (1 Kɔrɛntɩ mba 6:18) Ðoŋ ɖoŋ lɛ pɩlakɩ mbʋ, mbʋ pʋyɔɔ yɔ paaɖɔŋ lɔŋ tasʋʋ mbʋ pɩtɔŋ se paa weyi lɛ «pɩwɛɛ se ɛkpa ɛ-tɩ camɩyɛ nɛ ɛɖɔ ñɔ-tɔm yɔɔ» yɔ ɩ-yɔɔ. (Keɣa 119:9) Kɩɖaŋ nɩɩyɩ yɔ: Koobiya sakɩyɛ lɛ, alɩwaatʋ ndʋ pamʋʋ hɛzʋʋ tʋmɩyɛ taa se pamʋ helim yɔ palakɩ kaakendu wezuu kɩbaŋʋ caɣʋ hɔɔlʋʋ taa. Paawoki Krɩstʋ mba kediɣzisi ɛzɩ pɩpɔzʋʋ yɔ, nɛ paɖʋʋ taabalɩyɛ nɛ ɛyaa mba patɩkɛ Yehowa sɛyaa yɔ. Koobiya nabɛyɛ heyiɣ pa-tɩ se ɛyaa mba ‘pɛkɛ ɛyaa kɩbama’ nɛ pʋyɔɔ lɛ pa nɛ wɛ pɛkpɛndɩɣ nɛ palakɩ mbʋ pɩtɩla pɩtɩmʋna ɖeyi ɖeyi yɔ. Koobiya lalaa lɛ, pakɩlɩɣ taabalɩyɛ ɖʋʋ nɛ pa-tʋmɩyɛ taa mba. Ɛgbɛyɛ taa ɛzʋtʋyʋ nɔɔyʋ kɔm nɛ ɛkɩlɩɣ taabalɩyɛ ɖʋʋ nɛ ɛ-tʋmɩyɛ taa halʋ nɔɔyʋ nɛ pɩtɛmna se ɛha siɣye ɛ-hɔʋ nɛ ɛ nɛ halʋ ɛnʋ pɛwɛɛ! Piyeba nɛ palɩzɩ-ɩ ɛgbɛyɛ taa. Pɩtʋʋ fɛyɩ se Bibl taa tɔm tʋnɛ tɩkɛ toovenim: «Taabalɩyɛ kɩdɛkɛdɩyɛ wɛɛkɩɣ wɛtʋ kɩbandʋ.»—1 Kɔrɛntɩ mba 15:33.
w06 15/6 25 § 1
«Mɔnsɔɔlɩ ñɔ-tɔm kɩtɔzɩtʋ siŋŋ»
YEHOWA tɔzʋʋ ɛ-samaɣ tɔm se ɛsɩnɩ-kɛ nɛ kalʋbɩnɩ kaɖɛ alɩwaatʋ tʋnɛ tɩ-taa kala. Ðɩnaɣ ɛ-tɔm kɩtɔzɩtʋ ndʋ tɩ-taa natʋyʋ alɩwaatʋ ndʋ ɖɩkalɩɣ Bibl ɖa-tɩ yɔɔ, yaa ɖiwelisiɣ-tʋ alɩwaatʋ ndʋ koobiya yɔɔdʋʋ tɔm natʋyʋ yaa cosuu tɔm yɔɔ ɖe-kediɣzisi taa yɔ. Tɔm ndʋ ɖɩkalɩɣ yaa ɖɩnɩɣ kediɣzisi taa yɔ tɩ-taa sakɩyɛ tɩkɛ-ɖʋ tɔm kɩfatʋ. Pɩtɩla yɔ ɖɩɩtɛm tɔm ndʋ nɩʋ. Ɛlɛ ɛzɩma ɖɩsɔʋ tɔm lɛɛ lɛɛ yɔ pʋyɔɔ lɛ pɩpɔzʋʋ se pɔtɔzʋʋ-ɖʋ Yehowa tamasɩ, paɣtʋ nɛ ɛ-lɔŋ tasʋʋ ɖoŋ ɖoŋ. Pɩwɛɛ se ɖɩwɛɛnɩ ɛsɩmɩyɛ Yehowa tɔm kɩtɔzɩtʋ yɔɔ. Tɩkpazɩɣ-ɖʋ ɖoŋ nɛ tɩsɩɣnɩ-ɖʋ se ɖɩtaasɔɔ lɩmaɣza wena a-yɔɔ ɖɩlɩzaa se ɖɩcakɩ wezuu ŋgʋ kɩkɛdɩɣnɩ Ɛsɔ yɔ. Pʋyɔɔ keɣa maɖʋ te hendu se: «Mɔnsɔɔlɩ ñɔ-tɔm kɩtɔzɩtʋ siŋŋ; ndʋ tasɩɣnɩ-m lɔŋ.»—Keɣa 119:24.
w10 15/4 20 § 2
Kɛzɩ ñɛ-ɛsa nɛ ataacɔnɩ mbʋ pɩɩwazɩɣ pʋyʋ yɔ!
2 Ɛlɛ mbʋ ɖɩcɔŋna yɔ pɩpɩzɩɣ ɖɔɖɔ nɛ pɩkɔnɩ-ɖʋ kaɖɛ. Nɔɔ kʋɖʋmaɣ ŋga kɛwɛ mbʋ ɖɩnaɣ nɛ ɖa-maɣzɩm hɛkʋ taa yɔ kɛwɛ ɖoŋ siŋŋ nɛ pʋyɔɔ lɛ mbʋ ɖɩnaɣ nɛ ɖɛ-ɛsa yɔ pɩpɩzɩɣ piyele nɛ ɖe-liu wɛɛ-pʋ nɛ ɖɩpaɣzɩ ñɩnʋʋ siŋŋ se ɖɩwɛɛnɩ-pʋ. Pɩtasɩ lɛ ɖɩwɛ ɛjaɖɛ kɩdɛkɛdɩyɛ nɖɩ Sataŋ Eleeu ɖiyiɣ nɛ piɖeni men-ɖeke wɛtʋ wɛ ɖɩ-taa yɔ ɖɩ-taa, pʋyɔɔ lɛ ɖɩnaɣ kɩlɛmɩŋ nɛ ɖɩnɩɣ tɔm kususutu ndʋ tɩpɩzɩɣ nɛ tipeɣzi-ɖʋ kɛlɛʋ yem halɩ paa alɩwaatʋ pazɩ yem ɖɩna-ɩ yaa ɖɩnɩ-tʋ yɔ. (1 Yohanɛɛsɩ 5:19) Pʋyɔɔ lɛ, pɩɩɖɩzɩɣ-ɖʋ se keɣa maɖʋ tendi Ɛsɔ se: «Kɛzɩ mɛ-ɛsa nɛ ataacɔnɩ mbʋ pɩɩwazɩɣ pʋyʋ yɔ; yele nɛ mɛwɛɛ wezuu ña-nʋmɔʋ taa.»—Keɣ. 119:37.
Fezuu taa ñɩm
w05 15/4 10 § 2
Taa Yehowa Tɔm liu
2 Lɩmaɣzɩyɛ sɔsɔɖɛ nɖɩ ɖɩwɛ Keɣa 119 taa yɔ nɖɩ lɛ se Ɛsɔ tɔm mʋ ñɩm. Ɛzɩma weyi ɛma keɣa ŋga yɔ ɛlabɩnɩ tʋmɩyɛ tɔm maʋ masɩ yɔ, pɩtɩla yɔ ɛlabɩ mbʋ se pɩsa nɛ ɛyʋ pɩzɩ nɛ ɛɖɔkɩ hendu ndʋ ɛ-ñʋʋ taa kɛlɛʋ yem. Ɛzɩma pɔcɔlɩ Ebree kʋnʋŋ taa tɔm maʋ masɩ yɔ mbʋ patɩŋaa nɛ pɔcɔlɩ masɩ 176 nzɩ sɩwɛ Keɣa 119 taa yɔ. Ebree kʋnʋŋ taa lɛ patayɩ keɣa ŋga hɔɔlɩŋ 22 taa nɛ paa hɔɔlʋʋ ŋgʋ lɛ kɩ-taa nɛ masɩ 8, nɛ tɔm maʋ mayaɣ ŋga papaɣzɩnɩ hɔɔlʋʋ kajalaɣ ñɩŋgʋ yɔ, ŋgʋ papaɣzɩnɩ hɔɔlɩŋ lɛɛŋ. Keɣa ŋga kɔyɔɔdʋʋ Ɛsɔ tɔm, ɛ-paɣtʋ, ɛ-tɔm kɩtɔzɩtʋ, ɛ-nʋmɔŋ, ɛ-lɔŋ tasʋʋ, ɛ-kpalɩtʋ, nɛ ɛ-tɔm hʋʋ paɣtʋ tɔm. Tɔm ñʋʋ kʋnɛ nɛ ŋgʋ kɩkɔŋ yɔ ɩ-taa, ɖɩkaɣ labɩnʋʋ tʋmɩyɛ nɛ Bibl ŋgʋ patɩŋnɩ Ebree Bibl yɔɔ nɛ pɛɖɛzɩ-kʋ camɩyɛ yɔ nɛ ɖɩtazɩ Keɣa 119 taa. Ðɩkaɣ tazʋʋ wɛtʋ ndʋ caanaʋ taa nɛ ɖa-alɩwaatʋ taa Yehowa sɛyaa kataa yɔ tɩ-taa, nɛ pɩkaɣ-ɖʋ sɩnʋʋ nɛ ɖɩwɛɛnɩ ɛsɩmɩyɛ Keɣa 119 taa hendu yɔɔ nɛ Ɛsɔtɔm Bibl yɔɔ nɛ pɩkɩlɩ.
16-22 DECEMBRE
ÑƖM MBƲ PƖWƐ ƐSƆTƆM TAA YƆ KEƔA 119:57-120
Mbʋ pɩpɩzɩɣ pɩsɩnɩ-ŋ nɛ ŋɖɔkɩ ña-laŋɩyɛ kʋñɔŋ taa yɔ
w06 15/6 20 § 2
«Mɔnsɔɔlɩ ña-paɣtʋ mbʋ suwe!»
2 Pʋtɔma yɔ ŋpɔzʋʋ ña-tɩ se: «Ɛzɩma tɩyɛ Ɛsɔ paɣtʋ pɩzaɣ se tɩhɛzɩ keɣa maɖʋ laŋɩyɛ?» Mbʋ pɩsɩnɩ-ɩ yɔ lɛ se ɛ-taa kaatɛma se Yehowa maɣzɩɣ ɛ-yɔɔ. Keɣa maɖʋ kaaɖiɣzinaa se Ɛsɔ paɣtʋ kaayeba nɛ ɛwɛɛ taa leleŋ taa paa e-koyindinaa kaayekaɣ nɛ ɛkatɩɣ kala yɔ. Ɛɛnawa se Yehowa labɩ-ɩ camɩyɛ lakasɩ. Pɩtasɩ lɛ, ɛzɩma ɛɖɔŋaɣ Yehowa paɣtʋ yɔɔ yɔ, piyeba nɛ ɛkpaɖɩ e-koyindinaa lɔŋ nɛ halɩ pɩkandɩyɩ e-wezuu yɔɔ. Paɣtʋ ndʋ tɩ-yɔɔ ɖɔm yeba nɛ ɛwɛɛ laŋhɛzɩyɛ taa nɛ ɛwɛɛnɩ ɖɔɖɔ ɛhʋyɛ kɩbanɖɛ.—Keɣa 119:1, 9, 65, 93, 98, 165.
w00 1/12 14 § 3
Ŋsɔɔlɩ Yehowa tɔm kɩtɔzɩtʋ kpem na?
3 Keɣa maɖʋ kaasɔɔlɩ Ɛsɔ tɔm kɩtɔzɩtʋ siŋŋ pʋyɔɔ ete hendu nɛ ɛtɔ se: «Mɔnɖɔŋ ña-paɣtʋ yɔɔ lɛɛ lɛɛ, maalakɩ ninika. Kañatʋ tɩnaa nimee cɔ-m nɛ ata, ɛlɛ maasɔʋ ña-paɣtʋ yɔɔ.» (Keɣa 119:60, 61) Yehowa tɔm kɩtɔzɩtʋ sɩɣnɩ-ɖʋ se ɖɩɖɔkɩ ɖa-laŋɩyɛ nazɩm taa mbʋ pʋyɔɔ yɔ ɖa-taa tɛma se ɖa-Caa weyi ɛwɛ ɛsɔdaa yɔ ɛpɩzɩɣ nɛ ɛcɛ nimee wena koyindinaa lakɩnɩ tʋmɩyɛ se paɖɩɣ-ɖʋ nʋmɔʋ yɔ. Alɩwaatʋ kɩbandʋ yɔɔ lɛ, eholuu-ɖʋ mbʋ payɩ palakɩnɩ tʋmɩyɛ se paɖɩɣ-ɖʋ nʋmɔʋ yɔ pɩ-taa nɛ pɩsa nɛ ɖɩpɩzɩ nɛ ɖɩla Kewiyaɣ tɔm susuu tʋmɩyɛ.—Maarɩkɩ 13:10.
w06 1/9 14 § 4
Keɣsi takayaɣ kagbanzɩ ñɩŋga taa lɩmaɣza sɔsɔna
Keɣa 119:71—Ye ɖɩtɔkɩ kʋñɔŋ yɔ, kɩbam mbʋ pɩzɩɣ nɛ pɩlɩɩ pɩ-taa? Ye ɖɩkatɩɣ kaɖɛ wɛtʋ yɔ, pɩpɩzɩɣ pɩsɩnɩ-ɖʋ nɛ ɖɩtaa liu Yehowa kiya, ɖɩtɩmnɩ-ɩ nɛ ɖa-laŋɩyɛ siŋŋ nɛ pɩkɩlɩ, nɛ ɖɩkpɛlɩkɩɣ Bibl nɛ ɖɩlakɩnɩ tʋmɩyɛ mbʋ ɖɩkpɛlɩkɩɣ yɔ nɛ pɩkɩlɩ. Pɩtasɩ lɛ, ɛzɩma ɖɩlakɩ alɩwaatʋ ndʋ ɖɩkatɩɣ kaɖɛ naɖɩyɛ yɔ pɩpɩzɩɣ pɩsɩnɩ-ɖʋ nɛ ɖɩna hɔɔlʋʋ ŋgʋ kɩ-taa ɖɩwɛnɩ ɛjandʋ yɔ nɛ ɖɩñɔɔzɩ-tʋ. Alɩwaatʋ ndʋ ɖɩlakɩ kʋñɔŋ yɔ, ye ɖiyeki se kɩfalɩsɩ-ɖʋ yɔ, ɖɩɩkɔʋ pana se pʋyɔɔ kʋñɔŋ talɩ-ɖʋ.
«Mba pewiɣ yɔ, mɩ nɛ wɛ iwii»
3 Pɩtʋʋ fɛyɩ se ɖa-Caa kʋsɔɔlʋ Yehowa cɔlɔ laŋɩyɛ hɛzʋʋ siŋŋ lɩɣna. (Kalɩ 2 Kɔrɛntɩ mba 1:3, 4.) Yehowa weyi ɛkɛ pʋtɔdɩyɛ nayʋ yɔ, eheyi ɛ-samaɣ se: «Ma-maɣmaɣ mɛkɛnɩ Weyi ɛhɛzɩɣ mɩ-laŋɩyɛ yɔ.»—Iza. 51:12; Keɣ. 119:50, 52, 76.
5 Ðɩɩpɩtɩɣ se Yehowa kaɣ-ɖʋ sɩnʋʋ. Sɔɔndʋ ɛtaakpa-ɖʋ, ɖɩtɩmnɩ-ɩ nɛ ɖiheyi-i ɖa-laŋɩyɛ taa tɔm. Ye mbʋ pɩkɛnɩ-ɖʋ taa leleŋ se ɖɩtɩlɩ se Yehowa sɩm ɖa-wɩzasɩ nɛ ɛhaɣ-ɖʋ laŋhɛzɩyɛ nɖɩ ɖeyi ɖeyi pɩpɔzʋʋ yɔ. Ɛlɛ nʋmɔŋ weyi yɔɔ ɛtɩŋɩɣna nɛ ɛhɛzɩɣ ɖa-laŋɩyɛ?
Fezuu taa ñɩm
w06 1/9 14 § 5
Keɣsi takayaɣ kagbanzɩ ñɩŋga taa lɩmaɣza sɔsɔna
Keɣa 119:96—Pɔyɔɔdʋʋ se «mbʋ payɩ pɩtalɩ pilim yɔ, pɩwɛnɩ kamaɣ» yɔ, pʋ-tɔbʋʋ lɛ suwe? Mbʋ ɛyʋ maɣzɩɣ se pɩtalɩ pilim yɔ pɩ-tɔm keɣa maɖʋ wɛɛ nɛ ɛyɔɔdʋʋ. Pɩtɩla yɔ ɛñɩnaɣ yɔɔdʋʋ se mbʋ ɛyʋ maɣzɩɣ se pɩtalɩ pilim yɔ pɩwɛnɩ kamaɣ. Ɛlɛ Ɛsɔ paɣtʋ ñɛfɛyɩnɩ kamaɣ. Ɛ-lɔŋ tasʋʋ wazɩɣ ɛyʋ e-wezuu caɣʋ hɔɔlɩŋ tɩŋa taa. Bibl yɔɔdɩ tɔm ndʋ ɛzʋnɔ: «Manawa se mbʋ payɩ pɩtalɩ pilim yɔ, pɩwɛnɩ kamaɣ, ɛlɛ ña-paɣtʋ ñɛfɛyɩnɩ kamaɣ.»
23-29 DECEMBRE
ÑƖM MBƲ PƖWƐ ƐSƆTƆM TAA YƆ KEƔA 119:121-176
Ɛbɛ pɩzɩɣ pɩsɩnɩ-ŋ nɛ ŋtaawɛɛ laŋwɛɛkɩyɛ taa falaa?
Kpaɣ Ɛsɔ paɣtʋ nɛ ɛ-paɣtʋ kila nɛ ŋfalɩsɩnɩ ñɛ-ɛhʋyɛ
5 Pɩsa nɛ Ɛsɔ paɣtʋ wazɩ-ɖʋ lɛ, tɩ-kalʋʋ yem yaa tɩ-tɩlʋʋ tɩmaɣ. Ɛlɛ pɩwɛɛ se ɖiyele nɛ sɔɔlɩm nɛ ñamtʋ ndʋ ɖɩwɛnɩ paɣtʋ ndʋ tɩ-yɔɔ yɔ, pɩpaɣlɩ. Bibl yɔɔdaa se: «Ɩpaɖɩ mbʋ pɩkɛ kɩdɛkɛdɩm yɔ, nɛ ɩsɔɔlɩ mbʋ pɩkɛ kɩbam yɔ.» (Amo. 5:15) Ɛlɛ ɛzɩma ɖɩpɩzɩɣ nɛ ɖɩla mbʋ? Pɩwɛɛ se ɖiyele nɛ ɖa-lɩmaɣza la nɔɔ kʋɖʋmaɣ nɛ Yehowa ñɩna. Ðɩkpaɣ kɩɖaʋ kʋnɛ: Kpaɣ se pɩwɛ-ŋ kaɖɛ se ŋɖoo camɩyɛ. Nɛ ɖɔkɔtɔ nɔɔyʋ heyi-ŋ se pɩsa nɛ ŋɖoo camɩyɛ lɛ, pɩwɛɛ se ŋɖɔ paɣtʋ ndʋ ɛnʋ ɖʋʋ-ŋ pɩlɩɩnɩ tɔɔnaɣ tɔɔʋ, hola aleɣya labʋ nɛ wezuu caɣʋ hɔɔlɩŋ lɛɛŋ taa yɔ, tɩ-yɔɔ. Ŋɖɔm paɣtʋ ndʋ tɩ-yɔɔ lɛ, ŋna se ŋpaɣzɩ ɖou camɩyɛ! Pɩtʋʋ fɛyɩ se ŋkaɣ wɩlʋʋ ñɛ-ɛsɩmɩyɛ ɖɔkɔtɔ ɛnʋ mbʋ pʋyɔɔ yɔ, ɛsɩnɩ-ŋ nɛ ŋnɩɩ wezuu leleŋ nɛ pɩkɩlɩ.
6 Mbʋ ɖɔɖɔ ɖa-Lɩzɩyʋ ɖʋ-ɖʋ paɣtʋ se pɩkandɩyɩ ɖɔ-yɔɔ nɛ ɖɩtaasʋʋ kʋñɔmɩŋ weyi kɩdɛkɛdɩm kɔŋna yɔ ɩ-taa, nɛ paɣtʋ ndʋ tɩsɩɣnɩ-ɖʋ ɖɔɖɔ se ɖɩnɩɩ wezuu leleŋ. Maɣzɩ wazasɩ nzɩ ɖihikiɣ alɩwaatʋ ndʋ ɖɩɖɔŋ Bibl paɣtʋ ndʋ tɩtɔŋ se ɖikizi cɛtɩm, tamasɩ kɩdɛkɛdɩsɩ tam, mɩlɩm, kʋzʋʋ kɩdɛkɛdʋʋ, ñam ñam lakasɩ nɛ feziŋ kɩdɛkɛdɩŋ yaʋ yɔ, sɩ-yɔɔ nɛ ŋna. (Kalɩ Aduwa 6:16-19; Natʋ 21:8) Alɩwaatʋ ndʋ ɖɩlakɩ mbʋ pɩkɛdɩnɩ Yehowa nɛ ɖɩnaɣ se pɩkɔŋnɩ-ɖʋ wazasɩ sakɩyɛ yɔ, piyeki nɛ sɔɔlɩm mbʋ ɖɩwɛnɩ Yehowa nɛ ɛ-paɣtʋ yɔɔ yɔ pɩpaɣlɩɣ.
w93 15/4 17 12
Piya evelisi—Ɛbɛ ɩwɛɛ nɛ ɩñɩnɩɣ?
12 Kɔzɩ kɔzɩ lɛ pɩwɛɛ se ɩpaɖɩ nɛ ikizi mbʋ pɩfɛyɩ ɖeu yɔ. (Keɣa 97:10) Ɛzɩma ɩpɩzɩɣ nɛ ɩpaɖɩ mbʋ pʋtɔma yɔ kiɖe tɛɛ lɛ pɩlakɩ ɛyʋ ɛzɩ pɩtɩwɛɛkɩ pʋyʋ yɔ? Pɩwɛɛ se ɩmaɣzɩ mbʋ pɩpɩzɩɣ pɩlɩɩ pɩ-taa yɔ pɩ-yɔɔ! «Itaapeɣzi mɩ-tɩ: Paawoŋuu Ɛsɔ. Mbʋ pʋyɔɔ yɔ, mbʋ payɩ ɛyʋ ɖuu yɔ, mbʋ ɖɔɖɔ ɛkaɣ kʋm; mbʋ pʋyɔɔ yɔ weyi eɖuu se pɩwazɩ e-tomnaɣ yɔ, ɛkaɣ kʋm sɩm e-tomnaɣ taa.» (Galaatii mba 6:7, 8) Alɩwaatʋ ndʋ pɩtakɩɣ-mɩ se ɩla mbʋ pɩlakɩ-mɩ kɔɖɛyɩ yɔ, ɩmaɣzɩ kaɖɛ sɔsɔɖɛ nɖɩ pɩkɔŋna yɔ ɖɩ-yɔɔ, pʋ-tɔbʋʋ se ɛzɩma pɩɖʋʋ ɖɩwɩzɩyɛ Yehowa yɔ pɩ-yɔɔ. (Kpaɣ-tʋ nɛ ŋmaɣzɩnɩ Keɣa 78:41) Ɩmaɣzɩ ɖɔɖɔ kala lɛɛna wena apɩzɩɣ nɛ alɩɩ pɩ-taa ɛzɩ hoɣa ŋga ɩtɩɖʋna yɔ yaa kʋdɔŋ nakʋyʋ ɛzɩ SIDA mbʋ yɔ pɩ-yɔɔ. Ɩmaɣzɩ ɛzɩma pɩkaɣ cɛyʋʋ mɩ-ɛhʋyɛ nɛ ɛzɩma ilesiɣ ñamtʋ ndʋ ɩwɛna yɔ pɩ-yɔɔ. Pɩpɩzɩɣ ɖɔɖɔ nɛ pɩkɔnɩ-mɩ kala alɩwaatʋ sakɩyɛ wayɩ. Koobu halɩñɩnʋ nɔɔyʋ yɔɔdaa se: «Ma nɛ ma-walʋ ɖa-taa paa weyi kaacaɣ kʋzʋʋ wezuu pʋcɔ nɛ ɖɩkatɩ ɖama. Sɔnɔ paa ɖa-tɩŋa ɖɩkɛ Krɩstʋ mba yɔ, kʋzʋʋ wezuu ŋgʋ ɖɩɩcaɣ alɩwaatʋ ndʋ tɩ-taa yɔ piyeba nɛ nɔɔhɔnɖɛ nɛ sʋsɩ wɛɛ ɖe-nesi ɖɔkʋʋ taa.» Pɩtasɩ lɛ, pɩwɛɛ se ɩtɔzɩ se pɩpɩzɩɣ piyele nɛ ilesi teokrasɩ wala yaa palɩzɩ-mɩ ɛgbɛyɛ taa! (1 Kɔrɛntɩ mba 5:9-13) Pɩɩkɛɣnɩ lɔŋsɩnɖɛ se alɩwaatʋ pazɩ leleŋ nɩʋ yɔɔ lɛ, iyele nɛ kala ana atalɩ-mɩ.
Fezuu taa ñɩm
Ña-taa ɛtɛ se Ɛsɔ ‘tɔm kɛ toovenim’
2 Ða Yehowa sɛyaa lɛ, ɖa-taa tɛma se Yehowa kɛ «toovenim tɛ Ɛsɔ» nɛ paa ɛzɩmtaa lɛ ɛsɔɔlaa se piɖeni-ɖʋ. (Keɣ. 31:5; Iza. 48:17) Ðɩnawa se ɖɩpɩzɩɣ nɛ ɖɩtaa liu tɔm ndʋ ɖɩkalɩɣ Bibl taa yɔ, nɛ ɖitisiɣ se Ɛsɔ «tɔm tɩŋa kɛ toovenim.» (Kalɩ Keɣa 119:160.) Ðitisiɣ tɔm ndʋ Bibl taa tazɩyʋ nɔɔyʋ mawa yɔ tɩ-yɔɔ, ɛmawa se: «Tɔm ndʋ Ɛsɔ yɔɔdaa yɔ, tɩ-taa natʋyʋ tɩkɛ cɛtɩm tɔm nɛ tɩ-taa natʋyʋ ɛɛɖɛɣ yem nɛ tɩtɩla. Ɛsɔ sɛyaa tɩŋa pɩzɩɣ nɛ pataa liu tɔm ndʋ Ɛsɔ yɔɔdʋʋ yɔ, mbʋ pʋyɔɔ yɔ pataɣ liu Ɛsɔ weyi ɛyɔɔdɩ-tʋ yɔ.»
30 DECEMBRE–5 JANVIER
ÑƖM MBƲ PƖWƐ ƐSƆTƆM TAA YƆ KEƔSI 120-126
Poɖu ɖomaɣ nɛ ɛsɩtɛɣlɩm, ɛlɛ pakʋmnɩ taa leleŋ
w04 1/6 16 § 10
Mba pasaŋ Ɛsɔ yɔ pehikiɣ wazasɩ
10 Alɩwaatʋ ndʋ ɖɩkpakɩɣ Krɩstʋ tɔmkpɛlɩkɩyʋ sʋʋtʋ ɖaʋ yɔ, ɖɩwɛɛ nɛ ɖɩlʋkɩnɩ Sataŋ. Yakubu 4:7 heyiɣ-ɖʋ lidaʋ tɔm tʋnɛ: «Ɩkaɖɩnɩ Eleeu, nɛ ɛkaɣ seu mɩ-cɔlɔ.» Pɩɩwɩlɩɣ se pɩ-labʋ wɛ kɛlɛʋ. Pɩpɔzʋʋ se ɛyʋ ɛñaɣ pana siŋŋ pʋcɔ nɛ ɛpɩzɩ nɛ ɛsɛɛ Ɛsɔ. (Luka 13:24) Ɛlɛ Bibl yɔɔdʋʋ lidaʋ tɔm tʋnɛ Keɣa 126:5 taa se: «Mba poɖuu ɖomaɣ nɛ ɛsɩtɛɣlɩm yɔ, pakaɣ kʋm nɛ taa leleŋ kubusi.» Ðɩsɛɣ Ɛsɔ weyi ɛwɛnɩ ɛsɩmɩyɛ yɔ. «Ɛhɛyɩɣ mba pañɩnɩɣ-ɩ siŋŋ yɔ» nɛ ɛwazɩɣ mba pɛcɛlɩɣ-ɩ samtʋ yɔ.—Ebree mba 11:6.
Ŋkaɣ wɛnʋʋ tisuu sɔsɔm na?
17 Ñɛ-ɛyʋ kʋsɔɔlʋ nɔɔyʋ sɩba nɛ ŋwɛɛ kʋñɔwiye taa? Kpaɣ alɩwaatʋ nɛ ŋkalɩɣ Bibl taa kɛdɛsɩ nzɩ sɩ-taa pɔyɔɔdɩ ɛyaa mba pasɩba nɛ pefezi-wɛ yɔ pɔ-tɔm yɔ. Nɛ ye ŋlakɩ mbʋ yɔ, pɩcɛyɩsɩɣ tisuu mbʋ ŋwɛnɩ sɩɖaa femtu lidaʋ yɔɔ yɔ. Palɩzɩ ñɔ-hɔʋ taa tʋ nɔɔyʋ ɛgbɛyɛ taa nɛ ŋwɛɛ laŋwɛɛkɩyɛ taa? Kpɛlɩkɩ nɛ piyele nɛ ña-taa tɛ se ɛzɩma Yehowa hɔŋ ɛyaa nɩŋgbaaŋ yɔ, mbʋ kpaɖɩnɩ ɖeu paa ɛzɩmtaa. Paa kaɖɛ nɖɩ ŋwɛɛ nɛ ŋkatɩɣ yɔ, kpaɣ-ɖɩ se pɩkɛnɩ-ŋ waɖɛ nɖɩ ɖɩ-yɔɔ ŋpɩzɩɣ ŋtɩŋna nɛ ŋcɛyɩsɩ ñe-tisuu yɔ. Heyi Yehowa ɛzɩma ɖeyi ɖeyi pɩlakɩ-ŋ yɔ. Taaposi ña-tɩ nɛ ño-koobiya ɛlɛ wolo pɩ-yɔɔ nɛ ŋñɔtʋʋnɩ-wɛ. (Adu. 18:1) Lakɩ tʋma wena akaɣ-ŋ sɩnʋʋ nɛ ŋɖɔkɩ ña-tɩ yɔ, paa pɩpɔzʋʋ se ŋlakɩ-yɛ nɛ ɛsɩtɛɣlɩm yɔ. (Keɣ. 126:5, 6) Wolo pɩ-yɔɔ nɛ ŋwoki kediɣzisi, ŋsusuu tɔm, nɛ ŋkalɩɣ Bibl. Nɛ wolo pɩ-yɔɔ nɛ ŋmaɣzɩɣ wondu ndʋ Yehowa labɩ tamaɣ se ɛhaɣ-ŋ cee wayɩ yɔ tɩ-yɔɔ. Alɩwaatʋ ndʋ ŋnaɣ ɛzɩma Yehowa sɩɣnɩ-ŋ yɔ, tisuu mbʋ ŋwɛnɩ ɛ-yɔɔ yɔ pɩpaɣlɩɣ nɛ pɩkɩlɩ.
w01 15/7 18-19 § 13-14
Wolo pɩ-yɔɔ nɛ ŋlakɩ kʋmtʋ tʋmɩyɛ!
13 Tɔm ndʋ tɩwɛ Keɣa 126:5, 6 taa yɔ tɩhɛzɩɣ Ɛsɔ kʋmtʋ tʋmlaɖaa nɛ kɔzɩ kɔzɩ mba panazɩɣ-wɛ yɔ pa-laŋa siŋŋ; tɩtɔŋ se: «Mba poɖuu ɖomaɣ nɛ ɛsɩtɛɣlɩm yɔ, pakaɣ kʋm nɛ taa leleŋ kubusi. Weyi ɛkpakɩɣ ɖomaɣ e-huyuu taa nɛ ɛlɩɣ yɔ, paa ɛɖɛɣnɩ wiluu yɔ, pɩtʋʋ fɛyɩ se ɛkaɣ pɩsʋʋ nɛ taa leleŋ kubusi, ɛɖɔkɩ tɔɔnaɣ hɔɔ.» Ðomaɣ nɛ kʋmtʋ tɔm ndʋ keɣa maɖʋ yɔɔdɩ cɩnɛ yɔ, tɩwɩlɩɣ ɛzɩma Yehowa cɔnɩ mba pɩkazaa nɛ palɩɩnɩ yomiye taa Babilɔɔnɩ nɛ papɩsɩ nɛ ɛzɩma ɛwazɩ-wɛ yɔ pɩ-tɔm. Pa-taa kaalabɩ leleŋ siŋŋ alɩwaatʋ ndʋ palɩzɩ-wɛ yomiye taa yɔ, ɛlɛ pɩtɩla pewiɣaɣ alɩwaatʋ ndʋ poɖuwaɣ ɖomaɣ pɛ-tɛtʋ yɔɔ yɔ, mbʋ pʋyɔɔ yɔ pɩnzɩ 70 nzɩ paalabɩ yomiye taa yɔ sɩ-taa patɩhayɩ-tʋ. Paa mbʋ yɔ, mba powobi pɩ-yɔɔ nɛ poɖuu ɖomaɣ nɛ paɖaɣnɩɣ maʋ kuduyuŋ yɔ, pa-tʋmɩyɛ lʋlɩ pee kɩbana nɛ pehiɣ taa leleŋ.
14 Alɩwaatʋ ndʋ ɖɩkatɩɣ kala yaa alɩwaatʋ ndʋ ɖa-maɣmaɣ yaa ɖo-koobiya Krɩstʋ ñɩma ‘tɔkɩ kʋñɔŋ siɣsiɣ wɛtʋ yɔɔ yɔ,’ pɩpɩzɩɣ piyele nɛ ɖitisi ɛsɩtɛɣlɩm. (1 Pɩyɛɛrɩ 3:14) Kʋmtʋ tʋmɩyɛ nɖɩ ɖɩwɛɛ nɛ ɖɩlakɩ yɔ ɖɩ-taa, kiɖe tɛɛ lɛ pɩpɩzɩɣ nɛ pɩwɛɛ-ɖʋ kaɖɛ mbʋ pʋyɔɔ yɔ pɩlakɩ-ɖʋ ɛzɩ ɖa-pana ñaɣʋ ɛɛlʋlʋʋ pee yɔ. Ɛlɛ ye ɖiwobi pɩ-yɔɔ nɛ ɖiɖuu nɛ ɖɩmɩzɩɣ lɩm yɔ, Ɛsɔ kaɣ yebu nɛ pɩpaɣlɩ, nɛ ɖoŋ ɖoŋ lɛ pɩcɛzɩɣ ɛzɩma ɖɩɩmaɣzaa yɔ. (1 Kɔrɛntɩ mba 3:6) Ðɩtayɩɣ Bibl nɛ Bibl kpɛlɩkʋʋ takayɩsɩ nɛ pee wena pɩlʋlʋʋ yɔ, awɩlɩɣ se tɔm ndʋ tɩkɛ toovenim.
Fezuu taa ñɩm
cl 86 § 15
Ðoŋ weyi ɛkandɩyɩɣ ɖɔ-yɔɔ yɔ—«Ɛsɔ kɛnɩ ɖa-ɖɩjɔzɩyɛ»
15 Kajalaɣ lɛ, iyele nɛ ɖɩyɔɔdɩ ɛzɩma Yehowa kandɩyɩɣ ɖɔ-yɔɔ tomnaɣ yɔɔ yɔ pɩ-tɔm. Ða Yehowa sɛyaa lɛ, ɖɩpɩzɩɣ nɛ ɖɩɖaŋ se ɛkaɣ kandɩyʋʋ ɖa ɛ-samaɣ ɖɔ-yɔɔ tomnaɣ yɔɔ. Ye ɛtɩkandɩyɩ ɖɔ-yɔɔ mbʋ yɔ, pɩwɛɣ kɛlɛʋ se Sataŋ ɛɖɩzɩ-ɖʋ. Maɣzɩ tɔm tʋnɛ tɩ-yɔɔ nɛ ŋna: Sataŋ kɛnɩ «ɛjaɖɛ ɖɩnɛ ɖɩ-ñʋʋdʋ» nɛ nabʋyʋ ɛɛkaɣ-ɩ haʋ taa leleŋ nɛ pɩkɩlɩ se ɛɖɩzɩ toovenim Ɛsɔ sɛtʋ. (Yohanɛɛsɩ 12:31; Natʋ 12:17) Ɛjaɖɛ yɔɔ kominawaa ñʋndɩnaa mba pɛwɛnɩ ɖoŋ siŋŋ yɔ pa-taa nabɛyɛ ɖɩɣ nʋmɔʋ ɖɔ-tɔm susuu tʋmɩyɛ nɛ pañaɣ pana se paɖɩzɩ-ɖʋ caɣ caɣ. Paa mbʋ yɔ, Yehowa samaɣ ɖɔkɩ kpam nɛ kowobi pɩ-yɔɔ nɛ kosusuu tɔm kaahɛzaɣ! Yehowa samaɣ taa ɛyaa tɩɖɔɔ nɛ pɩwɛ ɛzɩ pɛfɛyɩnɩ yɔɔ kandɩyʋ yɔ, ye mbʋ ɛbɛ yɔɔ ñʋndɩnaa mba pɛwɛnɩ ɖoŋ siŋŋ yɔ patɩpɩzɩ nɛ pasɩnzɩ Yehowa samaɣ tʋmɩyɛ? Patɩpɩzɩ mbʋ pʋyɔɔ yɔ, Yehowa huuzi e-keŋ ɖɔ-yɔɔ!—Keɣa 17:7, 8.