Siirii wiyaʋ Bɛɛnɩ-Hadaadɩ ɖʋ ɛ-taa se ɛlakɩ you nɛ Izrayɛɛlɩ. Ɛlɛ paa ɛzɩmtaa, ɛɖʋʋ ɛ-taa se ewoki nɛ ɛla you nɛ Izrayɛɛlɩ lɛ, nayʋ Eliizee tɛm naʋ nɛ eheyi Izrayɛɛlɩ wiyaʋ nɛ ɛlɛ ñɔɔzɩ ɛ-tɩ nɛ ɛfɛɛ Bɛɛnɩ-Hadaadɩ kpaca. Peeɖe Bɛɛnɩ-Hadaadɩ ɖʋ ɛ-taa se ɛkpaɣ Eliizee. Ɛñɩnaa nɛ ɛna se Eliizee wɛ Dotaanɩ tɛtʋ taa lɛ, etiyi ɛ-sɔɔjanaa se powolo nɛ pakpa-ɩ peeɖe.

Ðoo taa Siirii sɔɔjanaa wobi Dotaanɩ. Tɛʋ fema nɛ Eliizee lɩmɖʋyʋ lɩɩ awayɩ lɛ, ɛna Siirii sɔɔjanaa sakɩyɛ pɔcɔ-wɛ nɛ pata. Sɔɔndʋ kpa-ɩ nɛ ɛma kubuka nɛ ɛtɔ se: “Eliizee, ɛzɩma ɖɩlakɩ yɔ?” Eliizee cosi-i se: “Mba pɛwɛ ɖɔ-yɔɔ yɔ pɔɖɔwa nɛ pakɩlɩ mba pɛwɛ pɔ-yɔɔ yɔ.” Alɩwaatʋ ndʋ tɩ-taa lɛ, Yehowa kuli Eliizee lɩmɖʋyʋ ɛsa nɛ ɛna se you kɛɛkɛɛnaa nɛ kpaŋnaŋ kaawɛ pʋŋ yɔɔ nɛ ɩɖɔwa pɩfɛyɩ yɔɔdʋʋ.

Siirii sɔɔjanaa talaa se pakpaɣ Eliizee lɛ, ɛla adɩma nɛ eheyi Yehowa se: “Yehowa mentendi-ŋ, la nɛ payʋlʋmɩ.” Pɩla mbʋ nɛ sɔɔjanaa mba patɩtasɩ naʋ se le pɛwɛɛ. Eliizee heyi-wɛ se: “Ilebi nʋmɔʋ. Ɩtɩŋ ma-wayɩ nɛ mawɩlɩ-mɩ abalʋ weyi ɩñɩnɩɣ yɔ.” Patɩŋ Eliizee wayɩ nɛ ɛlɛ woni-wɛ Samaarii, ɖenɖe Izrayɛɛlɩ wiyaʋ wɛɛ yɔ.

Pɛ-ɛsa yɔɔ kɔm se pɩcɛkɩ lɛ, pɛtɛm talʋʋ Izrayɛɛlɩ wiyaʋ ɛsɩndaa. Izrayɛɛlɩ wiyaʋ pɔzɩ Eliizee se: “Mankʋ-wɛ?” Ɛzɩ Eliizee labɩnɩ waɖɛ nɖɩ tʋmɩyɛ nɛ ɛkpa kɩmɩyɛ mba pañɩnaɣ se palabɩ-ɩ kɩdɛkɛdɩm yɔ? Aayɩ. Eliizee tɔm se: “Taakʋ-wɛ. Ha-wɛ tɔɔnaɣ nɛ ŋyele-wɛ nɛ papɩsɩ pɛ-tɛ.” Peeɖe wiyaʋ labɩ-wɛ kazandʋ nɛ pʋwayɩ lɛ, eyele-wɛ nɛ pekpe pɛ-tɛ.

Yezaabɛɛlɩ kaawɛnɩ pɛlɛ nɔɔyʋ nɛ payaɣ-ɩ se Ataali, ɛwɛ ɖɔɖɔ kañatʋ ɛzɩ e-ɖoo yɔ. Ataali kaawalɩ Yuuda wiyaʋ. Ɛ-walʋ sɩba lɛ, ɛ-pɩyalʋ paɣzɩ tɔɔʋ kewiyitu. Ɛlɛ Ataali pɩyalʋ kɔm nɛ ɛsɩ lɛ, ɛpɩsɩ ɛ-tɩ Yuuda abiɖe. Peeɖe ɛñaɣ pana se ɛkʋ mba pa-tɩŋa payɩ papɩzaɣ se pɔtɔɔ kewiyitu e-lone taa yɔ, halɩ pɩkpɛndɩnɩ ɛ-sayɩnaa. Ɛyaa tɩŋa seɣaɣ-ɩ sɔɔndʋ.

Cɔjɔ kɩlɩm Yehoyiyada nɛ ɛ-halʋ Yehoseba paanawa se mbʋ Ataali wɛɛ nɛ ɛlakɩ yɔ pɩkɛ lakasɩ kɩdɛkɛdɩsɩ kpem. Pʋyɔɔ paɖʋ pe-wezuu kaɖɛ taa nɛ pɛmɛsɩ Ataali sayɩ Yehowaasɩ templo taa nɛ pɔcɔŋnɩ ɛ-yɔɔ peeɖe.

Yehowaasɩ kɔm nɛ ɛwɛɛnɩ pɩnzɩ 7 lɛ, Yehoyiyada kpeɣli sɔsaa nɛ Leevi mba tɩŋa nɛ eheyi-wɛ se: “Ɩcɔnɩ templo nɔnɔsɩ yɔɔ camɩyɛ nɛ itaayele nɔɔyʋ nɛ ɛsʋʋ kɩ-taa.” Pʋwayɩ lɛ, Yehoyiyada pɩsɩ Yehowaasɩ Yuuda wiyaʋ nɛ ɛpamɩ-ɩ awiya hulaɣ. Peeɖe Yuuda samaɣ mabɩ kubuka se: «Wiyaʋ wezuu ɛɖaɣlɩ!»

Abiɖe Ataali nɩ samaɣ taŋ lɛ, ese nɛ ɛkɔɔ templo taa. Ɛna wiyaʋ kɩfalʋ lɛ, ekoo nɛ ɛtɔ se: «Kɔlɔmɔtʋ! Kɔlɔmɔtʋ!» Nɛ sɔsaa kpa abiɖe kañatʋ tʋ ɛnʋ nɛ palɩzɩ-ɩ nɛ awayɩ nɛ pakʋ-ɩ. Ɛlɛ lakasɩ kɩdɛkɛdɩsɩ nzɩ eyeba nɛ sɩwɛɛ ɛjaɖɛ taa yɔ, ɛbɛ sɩkaɣ tɛmnʋʋ?

Yehoyiyada sɩnɩ samaɣ nɛ kaɖʋ ɛgbɛyɛ nɛ Yehowa, nɛ koɖuu se e-ɖeke koŋ kakaɣ sɛʋ. Yehoyiyada yɔkɩ ɖɔɖɔ Baalɩ templo nɛ sɩʋ kpelisi. Eyele nɛ cɔjɔnaa nɛ Leevi mba paɣzɩ labʋ tʋmɩyɛ templo taa se pɩsa nɛ samaɣ ɖaɣnɩ paɣzʋʋ Ɛsɔ sɛʋ peeɖe. Ɛlɩzɩ ɖɔɖɔ ɛyaa nabɛyɛ se paɖaŋ templo nɔnɔsɩ yɔɔ nɛ nɔɔyʋ ɛtaasʋʋ kɩ-taa nɛ ɛla mbʋ pɩtɩmʋna yɔ. Pʋwayɩ lɛ, Yehoyiyada nɛ sɔsaa powoni Yehowaasɩ kewiyaɣ ɖɩɣa taa nɛ pasɩɩ-ɩ wiyaʋ. Yuuda samaɣ taa la leleŋ pɩdɩɩfɛyɩ. Lɛɛlɛɛyɔ, kapɩzɩɣ nɛ kɛsɛɛ Yehowa, mbʋ pʋyɔɔ yɔ kalɩ Ataali nɛ Baalɩ sɛtʋ yomiye taa! Ŋpɩzaa nɛ ŋna ɛzɩma Yehoyiyada abalɩtʋ sɩnɩ ɛyaa sakɩyɛ yɔ?