Asiirii tɛtʋ ndʋ payaɣ se Niniivi yɔ, tɩ-taa ɛyaa kaawɛ kañatʋ pɩdɩɩfɛyɩ. Pʋyɔɔ Yehowa heyi nayʋ Yoonaa se ewolo Niniivi nɛ eheyi-wɛ se pɛlɛɣzɩ pa-lakasɩ. Ɛlɛ Yoonaa kpaɣ nʋmɔʋ lɛɛkʋ nɛ ese. Ɛsʋʋ mɛlɛ ŋgʋ kiwoki Tarɩsiisi yɔ se pɩsa nɛ eposi ɛ-tɩ nɛ Niniivi.

Ɛwɛ mɛlɛ taa teŋgu yɔɔ lɛ, tɛʋ ŋgʋ kɩnɩɣnɩ helim sɔsɔm yɔ kɩpaɣzɩ nɩʋ nɛ sɔɔndʋ kpa mɛlɛ sayaa. Nɛ patɩmnɩ pɛ-ɛsɔnaa nɛ pɔpɔzɩ-wɛ se: “Ɛbɛ yɔɔ kʋñɔŋ kʋnɛ kɩtalɩɣ-ɖʋ?” Pɩkɛdaa lɛ, Yoonaa heyi-wɛ se: “Mɔn-cɔlɔ pɩlɩnaa. Mɛwɛɛ nɛ menseɣ tʋmɩyɛ nɖɩ Yehowa ɖʋ-m se mala yɔ. Ɩkpaɣ-m nɛ ɩpɛɖɩ teŋgu taa nɛ helim sɩŋ.” Mɛlɛ sayaa taasɔɔlɩ se pɛpɛɖɩ Yoonaa teŋgu taa, ɛlɛ ɛwɛɛ nɛ ɛñɩkɩɣ pɔ-yɔɔ se palabɩ-ɩ mbʋ. Pɔkɔm nɛ pɛpɛɖɩ-ɩ teŋgu taa lɛ, helim sɩŋ.

Yoonaa maɣzaɣ se ɛsɩkɩ. Ɛwɛɛ nɛ etiki lɩm tɛɛ lɛ, ɛtɩmnɩ Yehowa. Yehowa tiyi kpakpayaɣ sɔsɔɔ nakɛyɛ nɛ kelibi-i, ɛlɛ katɩkʋ-ɩ. Yoonaa wɛ kpakpayaɣ lotu taa lɛ, ɛtɩmɩ se: “Monɖuwaa se mañaŋɩ-ŋ paa ɛzɩmtaa.” Yehowa kandɩyɩ Yoonaa yɔɔ nɛ ɛla kɩyakɩŋ 3 kpakpayaɣ lotu taa nɛ pʋwayɩ lɛ, eyele nɛ kpakpayaɣ tɔ-ɩ teŋgu kidiiliŋ yɔɔ.

Ɛzɩma Yehowa yabɩ Yoonaa ñʋʋ yɔ, pɩwɩlɩɣ se pɩtɩtasɩ pɔzʋʋ se ewolo Niniivi yaa we? Aayɩ. Yehowa tasɩ-ɩ heyuu se ewolo peeɖe. Nɛ lɛɛlɛɛyɔ lɛ, Yoonaa welisini Yehowa. Ewobi peeɖe lɛ, eheyi samaɣ se: “Pɩkazɩ kɩyakɩŋ 40 paɖɩzɩɣ Niniivi tɛtʋ.” Nɛ mbʋ ɛtaamaɣzɩ pɩ-yɔɔ yɔ, pɩla: Niniivi mba welisi ɛ-tɔm nɛ pɛlɛɣzɩ pa-lakasɩ. Niniivi wiyaʋ heyi ɛ-samaɣ se: “Ɩtɩmnɩ Ɛsɔ nɛ ikpiɖi mɩ-kɩwɛɛkɩm yɔɔ. Pɩtɩla yɔ ɛɛkaɣ-ɖʋ ɖɩzʋʋ.” Yehowa na ɛzɩma samaɣ kpiɖi ka-kɩwɛɛkɩm yɔɔ yɔ lɛ, ɛtɩtasɩ ɖɩzʋʋ Niniivi tɛtʋ.

Yoonaa kɔ pana se pʋyɔɔ Yehowa tɩɖɩzɩ tɛtʋ ndʋ. Maɣzɩ nɛ ŋna: Yehowa kaalɩzɩ suuɖu nɛ ɛwɩlɩ Yoonaa nɛ ɛna ɛ-pʋtɔdɩyɛ, ɛlɛ Yoonaa ɛɛcaɣ naʋ Niniivi samaɣ pʋtɔdɩyɛ. Ɛlɩɩ tɛtʋ taa nɛ ewolo ɛcaɣ loyuu nakʋyʋ tɛɛ nɛ emidiɣ. Pʋwayɩ lɛ, loyuu ŋgʋ kɩwɩlɩ nɛ pɩwɩzɩ Yoonaa siŋŋ. Peeɖe Yehowa heyi-i se: “Loyuu kʋnɛ kɩ-tɔm cɛyɩ ñɛ-ɛsɩndaa nɛ pɩkpaɖɩ Niniivi mba. Mana pa-pʋtɔdɩyɛ nɛ pehiɣ ñʋʋ yabʋ.” Lɔŋ weyi Yehowa ñɩnaɣ se Yoonaa ɛkpɛlɩkɩ? Niniivi samaɣ mʋ ñɩm siŋŋ nɛ pɩkpaɖɩ paa tɩʋ ŋgʋ.

Asiirii mba mʋ Izrayɛɛlɩ kewiyaɣ ŋga kɛwɛnɩ cejewe 10 yɔ. Lɛɛlɛɛyɔ, Asiirii wiyaʋ Senakeribʋ sɔɔlaa se ɛmʋ Yuuda kewiyaɣ ŋga kɛwɛnɩ cejewe 2 yɔ. Ɛpaɣzɩ Yuuda tɛtʋ mʋʋ kʋɖʋm kʋɖʋm. Ɛlɛ, tɛtʋ ndʋ ɛɛkɩlɩ sɔɔlʋʋ se ɛmʋ yɔ, ndʋ lɛ Yeruzalɛm. Ɛlɛ mbʋ Senakeribʋ tɩtɩlɩ yɔ lɛ se Yehowa wɛɛ nɛ ɛkandɩyɩɣ Yeruzalɛm yɔɔ.

Yuuda wiyaʋ Ezekiyaasɩ hɛyɩ liidiye sakɩyɛ Senakeribʋ se ɛtaalabɩnɩ Yeruzalɛm you. Senakeribʋ mʋ liidiye nɖɩ, ɛlɛ etiyi ɛ-sɔɔjanaa se powolo nɛ poyooni Yeruzalɛm. Sɔɔndʋ kaawɛɛ nɛ pɩkpaɣ samaɣ kpem alɩwaatʋ ndʋ Asiirii mba wɛɛ nɛ pɔñɔtʋʋnɩ pɛ-tɛtʋ yɔ. Peeɖe Ezekiyaasɩ heyi-wɛ se: “Sɔɔndʋ ɛtaakpa-mɩ. Toovenim se Asiirii mba wɛ ɖoŋ, ɛlɛ Yehowa kaɣ yebu nɛ ɖɩwɛɛ ɖoŋ nɛ pɩkɩlɩ-wɛ.”

Senakeribʋ tiyi ɛ-tɔm ɖɔkɩyʋ Rabɩsakee se ewolo Yeruzalɛm nɛ ehoŋ samaɣ. Rabɩsakee sɩŋ tɛtʋ nɔnɔɔ taa nɛ ɛma kubuka nɛ eheyi samaɣ se: “Yehowa ɛɛpɩzɩɣ nɛ ɛsɩnɩ-mɩ. Itaayele nɛ Ezekiyaasɩ cɛtɩ-mɩ. Ɛsɔ nɔɔyʋ ɛɛpɩzɩɣ nɛ ɛlɩzɩ-mɩ ɖe-nesi tɛɛ.”

Ezekiyaasɩ pɔzɩ Yehowa se ɛna se ɛbɛ pɩwɛɛ se ɛla. Yehowa cosi-i se: “Sɔɔndʋ ɛtaakpa-ŋ tɔm ndʋ Rabɩsakee yɔɔdaa yɔ tɩ-yɔɔ. Senakeribʋ ɛɛkaɣ mʋʋ Yeruzalɛm tɛtʋ.” Pʋwayɩ lɛ, Senakeribʋ ma takayɩsɩ nɛ etiyini Ezekiyaasɩ. Ɛma takayɩsɩ nzɩ sɩ-taa se: “Ɩtaakaɖɩnɩ-ɖʋ. Yehowa ɛɛpɩzɩɣ nɛ ɛya mɩ-ñʋʋ.” Ezekiyaasɩ tɩmnɩ Yehowa se: “Hayɩ Yehowa ɖitendi-ŋ, ya ɖa-ñʋʋ nɛ paa weyi ɛna se ñe-ɖeke koŋ ñɛkɛnɩnɩ Ɛsɔ toovenim tʋ.” Yehowa cosi-i se: “Asiirii wiyaʋ ɛɛkaɣ kɔm Yeruzalɛm tɛtʋ taa. Mankaɣ kandɩyʋʋ mɛn-tɛtʋ yɔɔ.”

Senakeribʋ kaamaɣzɩ kpem se Yeruzalɛm pɩsɩɣ ɛ-ñɩm. Ɛlɛ ɖoo naayɛ taa, Yehowa tiyi e-tiyiyu Yeruzalɛm tɛtʋ nɛ tɩ-wayɩ, ɖenɖe Asiirii sɔɔjanaa kaakpeɣlaa yɔ. Tiyiyu ɛnʋ ɛkʋ sɔɔjanaa 185000. Wiyaʋ Senakeribʋ sɔɔjanaa mba paaɖɔ siŋŋ yɔ pasɩ. Ɛnawa se ɛɛpɩzɩɣ nɛ ɛtasɩ nabʋyʋ labʋ lɛ, ɛɖɛɛ nɛ ekpe ɛ-tɛ. Yehowa kandɩyɩ Ezekiyaasɩ nɛ Yeruzalɛm yɔɔ, ɛzɩ ɛ-maɣmaɣ ɛɛyɔɔdʋʋ yɔ. Ye ŋŋwɛ Yeruzalɛm tɛtʋ taa alɩwaatʋ ndʋ tɩ-taa, ŋŋta Yehowa liu na?