Ðoo naayɛ taa, Wiyaʋ Nabukodonozɔɔrɩ ɖozi ɖoziye naɖɩyɛ nɛ ɖɩkpa-ɩ sɔɔndʋ pɩdɩɩfɛyɩ nɛ ɛtɩpɩzɩ nɛ eɖoo. Tɛʋ fema lɛ, ɛyaa maajiki laɖaa nɛ eheyi-wɛ se: “Monɖozi ɖoziye naɖɩyɛ, ɩlɩzɩ-m ɖɩ-taa.” Pocosi-i se: “Ðajaa wiyaʋ, ɖitendi-ŋ heyi-ɖʋ ɖoziye nɖɩ.” Ɛlɛ Nabukodonozɔɔrɩ pɩsɩnɩ-wɛ se: “Aayɩ! Mɩ-maɣmaɣ iheyi-m ɖoziye nɖɩ, pɩtɩkɛ mbʋ yɔ, mankʋʋ-mɩ.” Nɛ petendi-i se: “Heyi-ɖʋ ɖoziye nɖɩ nɛ pʋwayɩ lɛ, ɖɩɩlɩzɩ-ŋ ɖɩ-tɔbʋʋ.” Pɔyɔɔdɩ mbʋ lɛ, eheyi-wɛ se: “Mɩ-tɩŋa payɩ ɩcaɣ se ipeɣzi-m kipeɣzu. Iheyi-m ɖoziye nɖɩ monɖozaa yɔ!” Peheyi wiyaʋ se: “Ɛyʋ nɔɔyʋ fɛyɩ se ɛpɩzɩɣ nɛ ɛla mbʋ. Nɔɔyʋ fɛyɩ se ɛpɩzɩɣ nɛ ɛtɩlɩ ɛyʋ lɛlʋ ɖoziye.”

Nabukodonozɔɔrɩ kɔ pana siŋŋ nɛ ɛɖʋ paɣtʋ se pakʋ lɔŋsɩnɖaa tɩŋa ɛjaɖɛ taa. Danɩyɛɛlɩ, Sadraakɩ, Mesaakɩ nɛ Abɛdɩnego paawɛ pa-taa. Danɩyɛɛlɩ pɔzɩ wiyaʋ se ɛha-wɛ alɩwaatʋ pazɩ. Pʋwayɩ lɛ, ɛ nɛ ɛ-taabalaa patɩmnɩ Yehowa se ɛsɩnɩ-wɛ. Ɛbɛ Yehowa laba?

Yehowa tɩŋnɩ natʋ natʋyʋ yɔɔ nɛ ɛwɩlɩ Danɩyɛɛlɩ ɖoziye nɖɩ Nabukodonozɔɔrɩ ɖozaa yɔ, nɛ ɛlɩzɩ-ɩ ɖɩ-tɔbʋʋ. Tɛʋ fema lɛ, Danɩyɛɛlɩ wolo wiyaʋ lɩmɖʋyʋ cɔlɔ nɛ eheyi-i se: “Taakʋ lɔŋsɩnɖaa taa nɔɔyʋ. Manpɩzɩɣ meheyi wiyaʋ e-ɖoziye nɛ malɩzɩ-ɩ ɖɩ-tɔbʋʋ.” Wiyaʋ lɩmɖʋyʋ kpaɣ Danɩyɛɛlɩ nɛ ewoni-i Nabukodonozɔɔrɩ cɔlɔ. Danɩyɛɛlɩ heyi wiyaʋ se: “Mbʋ pɩkaɣ labʋ cee wayɩ yɔ Ɛsɔ wɩlɩ-ŋ. Ðoziye ɖɩnɛ ŋɖozaa: Ŋna sɩʋ kpeliɣa sɔsɔɔ nakɛyɛ, kɛwɛ ɛzɩ ɛyʋ yɔ. Ka-ñʋʋ kɛ sika, ka-laŋɩyɛ nɛ ke-nesi kɛ liidiye ñɩɣyʋʋ, nɛ ko-lotu nɛ ka-tala kɛ ñɩɣyʋʋ kɩsɛɛmʋʋ, ka-nɩŋgbanzɩ kɛ ñɩɣtʋ nɛ ka-naataŋ kɛ ñɩɣyʋʋ ŋgʋ kisidini cʋʋ yɔ. Pʋwayɩ lɛ, pɩyɛ naɖɩyɛ lɩɩnɩ pʋʋ nakʋyʋ yɔɔ nɛ ɖɩkɔɔ ɖɩyɔkɩ sɩʋ kpeliɣa ŋga ka-naataŋ. Sɩʋ kpeliɣa ŋga kɔyɔkɩ mulu mulu nɛ helim kpaɣ ka-mʋlʋm nɛ pɩɖɛna. Pɩyɛ nɖɩ, ɖɩpɩsɩ pʋʋ sɔsɔʋ nɛ kisu tɛtʋ kpeekpe.”

Pʋwayɩ lɛ, Danɩyɛɛlɩ se: “Ño-ɖoziye tɔbʋʋ kɔyɔ: Ñe-kewiyaɣ sɩŋnɩ sɩʋ kpeliɣa ñʋʋ ŋgʋ palabɩnɩ sika yɔ. Ña-wayɩ lɛ, kewiyaɣ ŋga kakaɣ kɔm yɔ, ŋga lɛ sɩʋ kpeliɣa hɔɔlʋʋ ŋgʋ palabɩnɩ liidiye ñɩɣyʋʋ yɔ. Nakɛyɛ kaɣ kɔm ɖɔɖɔ nɛ kɛwɛɛ ɛzɩ ñɩɣyʋʋ kɩsɛɛmʋʋ yɔ nɛ kakaɣ tɔɔʋ kewiyitu tɛtʋ kpeekpe yɔɔ. Kaka wayɩ lɛ, ŋga kɔkɔŋ yɔ, kakaɣ wɛʋ ɖoŋ ɛzɩ ñɩɣtʋ yɔ. Kɛdɛzaɣ kewiyaɣ ŋga kɔkɔŋ yɔ, ka-taa kaɣ tayʋʋ hɔɔlɩŋ ndɩ ndɩ. Hɔɔlɩŋ nɩɩyɩ kaɣ wɛʋ ɖoŋ ɛzɩ ñɩɣyʋʋ yɔ nɛ hɔɔlɩŋ lɛɛŋ ñɛwɛɛnɩ ɛjandʋ ɛzɩ cʋʋ yɔ. Pɩyɛ nɖɩ ɖɩpɩsɩ pʋʋ yɔ, nɖɩ lɛ Ɛsɔ Kewiyaɣ. Kakaɣ yɔkʋʋ kewiyisi nzɩ sɩ-tɩŋa nɛ ke-ɖeke kakaɣnɩ wɛʋ tam.”

Nabukodonozɔɔrɩ nɩ mbʋ lɛ, etii nɛ eluŋ Danɩyɛɛlɩ ɛsɩndaa nɛ ɛpa ɛ-ɛsa nɛ tɛtʋ. Ɛyɔɔdɩ se: “Ñɛ-Ɛsɔ lɩzɩnɩ-ŋ ɖoziye ɖɩnɛ ɖɩ-taa. Ɛsɔ nɔɔyʋ fɛyɩ ɛzɩ Ɛsɔ ɛnʋ yɔ.” Pʋyɔɔ lɛ, Nabukodonozɔɔrɩ tɩtasɩ kʋʋ Danɩyɛɛlɩ, ɛlɛ eyeba nɛ ɛpɩsɩ tɛtʋ taa lɔŋsɩnɖaa tɩŋa ñʋʋdʋ, nɛ ɛtɔkɩ ɖɔɖɔ kewiyitu. Ŋna ɛzɩma Yehowa cosi Danɩyɛɛlɩ adɩma yɔɔ yɔ?

Wiyaʋ Nabukodonozɔɔrɩ ɖozaa nɛ pɩla alɩwaatʋ natʋyʋ pʋwayɩ lɛ, eyele nɛ pala sika sɩʋ kpeliɣa sɔsɔɔ nakɛyɛ. Ɛlabɩ-kɛ Duura kɛdɛɛŋa taa nɛ ɛɖʋ paɣtʋ se tɛtʋ taa ɛyaa sɔsaa kpeekpe, pɩkpɛndɩnɩ Sadraakɩ, Mesaakɩ nɛ Abɛdɩnego ikpeɣli kɔ-cɔlɔ. Pekpeɣlaa lɛ, ɛɖʋ-wɛ paɣtʋ se: “Alɩwaatʋ ndʋ ɩnɩɣ aganda, cɩmɩŋ nɛ hɩsɩ taŋ lɛ, iluŋ sɩʋ kpeliɣa tɛɛ nɛ ɩpa mɩ-ɛsa nɛ tɛtʋ! Mɩ-taa weyi eeluŋuu yɔ, pɛpɛɖɩɣ-ɩ miŋ kpou taa.” Ɛzɩ Ebree evebiya 3 waa mba, pakaɣ tisuu nɛ poluŋ sɩʋ kpeliɣa ŋga kɛ-tɛɛ yaa pakaɣ lɩzʋʋ se Yehowa ɖeke pɛsɛɣ?

Pʋwayɩ lɛ, wiyaʋ ha nɔɔ se pahʋlɩ ɛgandɩyɛ. Patɩɩhʋlaa lɛ, paa anɩ eluŋ sɩʋ kpeliɣa ŋga kɛ-tɛɛ. Ɛlɛ Sadraakɩ, Mesaakɩ nɛ Abɛdɩnego pekizi nɛ patiluŋ. Sɔsaa taa nabɛyɛ na-wɛ lɛ, peheyi wiyaʋ se: “Ebree evebiya 3 waa mba, pekizaa se paasɛɣ sɩʋ kpeliɣa.” Nabukodonozɔɔrɩ heyi-wɛ se: “Mantasɩɣ-mɩ haʋ waɖɛ nabʋlɛ ɖeɖe nɛ ɩsɛɛ sɩʋ kpeliɣa. Ye ɩtɩsɛɛ-kɛ yɔ, meyeki nɛ pɔlɔ-mɩ miŋ kpou taa.” Pocosi-i se: “Pɩtɩcɛyɩ se ŋtasɩ-ɖʋ waɖɛ haʋ nabʋlɛ ɖeɖe. Ðɛ-Ɛsɔ pɩzɩɣ nɛ ɛya ɖa-ñʋʋ. Ɛlɛ paa ɛtɩya ɖa-ñʋʋ yɔ, ɖajaa wiyaʋ, tɩlɩ se ɖɩɩkaɣ ña-sɩʋ kpeliɣa ŋga sɛʋ.”

Nabukodonozɔɔrɩ taa wɩɩ siŋŋ. Eheyi ɛ-lɩmɖʋyaa se: “Ɩla nɛ miŋ kpou saa miŋ tam 7 nɛ pɩkɩlɩ ɛzɩma kɩtɩɩsaɣ miŋ yɔ!” Pʋwayɩ lɛ, eheyi ɛ-sɔɔjanaa se: “Ɩhɔkɩ-wɛ nɛ ɩpɛɖɩ-wɛ miŋ kpou taa!” Powoni-wɛ nɛ pɔlɔ miŋ kpou taa. Miŋ kpou kaasa miŋ kpem nɛ halɩ sɔɔjanaa mba paalɔ-wɛ kɩ-taa yɔ, miŋ ñaɣ-wɛ nɛ pacaŋ pasɩ. Ɛlɛ Nabukodonozɔɔrɩ cɔnɩ miŋ kpou taa lɛ, ɛna se ɛyaa 4 wɛnɩ miŋ taa nɛ pɔɖɔŋ, pɩtɩkɛ ɛyaa 3. Sɔɔndʋ kpa-ɩ nɛ ɛpɔzɩ ɛ-sɔsaa se: “Pɩtɩkɛ ɛyaa 3 ɖɩpɛɖɩ miŋ taa kɛ? Mɛwɛɛ nɛ manaɣ ɛyaa 4 nɛ lɛlʋ wɛtʋ wɛ ɛzɩ Ɛsɔ tiyiyu yɔ!”

Nabukodonozɔɔrɩ ñɔtɩnɩ miŋ kpou nɛ ekoo nɛ ɛyɔɔdɩ se: “Ɛsɔ Kɩlɩm sɛyaa mɩ, ɩlɩɩ miŋ taa nɛ ɩkɔɔ!” Pɩɖɩɣzɩ ɛyaa kpem se Sadraakɩ, Mesaakɩ nɛ Abɛdɩnego palɩ miŋ taa cɩŋgɩlɩm. Po-tomnaɣ, pɔ-ñɔsɩ nɛ wondu ndʋ paasuwa yɔ tɩtɩñaɣ miŋ, halɩ pɔ-yɔɔ ɛɛlɩɣ miŋ sɔŋ ɖɔɖɔ.

Nabukodonozɔɔrɩ yɔɔdɩ se: “Sadraakɩ, Mesaakɩ nɛ Abɛdɩnego, pɛ-Ɛsɔ kɛnɩ Kɩlɩm kedeŋa kpeekpe yɔɔ. Etiyi e-tiyiyu nɛ ɛkɔɔ ɛya pa-ñʋʋ. Ɛsɔ nɔɔyʋ fɛyɩ ɛzɩ pɛ-Ɛsɔ yɔ.”

Ŋtɛm ña-taa se ña ɖɔɖɔ ŋɖɔkʋʋ ñe-siɣsiɣ wɛtʋ kpam paa kaɖɛ nɖɩ lɛ ɖɩ-taa ɛzɩ Ebree evebiya mba palabʋ yɔ?