Babilɔɔnɩ wiyaʋ lɛlʋ payaɣ se Dariyusi nɛ ɛkɛ Medii tʋ. Ɛɛnawa se Danɩyɛɛlɩ kaawɛ ndɩ nɛ ɛyaa lalaa, pʋyɔɔ ɛkpaɣ-ɩ se ɛkɛ e-kewiyaɣ taa ɛyaa sɔsaa ñʋʋdʋ. Sɔsaa mba, pataasɔɔlɩ Danɩyɛɛlɩ nɛ pasʋsʋʋ-ɩ, nɛ pe-liu kaawɛɛ se pakʋ-ɩ. Paanawa se Danɩyɛɛlɩ tɩmɩɣnɩ Yehowa tam nabudozo paa evemiye nɖɩ. Pʋyɔɔ powoba nɛ peheyi Dariyusi se: “Ðajaa wiyaʋ, pɩwɛɛ se ŋɖʋ paɣtʋ natʋyʋ se ñe-ɖeke koŋ pɩpɔzʋʋ se pɛsɛɛ. Nɛ ye nɔɔyʋ ɛtɩɖɔ paɣtʋ ndʋ tɩ-yɔɔ yɔ, pɛpɛɖɩɣ-ɩ mʋʋzɩŋ pɔʋ taa.” Tɔm ndʋ tɩkɛdɩnɩ wiyaʋ nɛ ɛɖʋ paɣtʋ nɛ ɛñɩɣ niye paɣtʋ takayaɣ ŋga ka-taa.

Danɩyɛɛlɩ tɩɩnɩ paɣtʋ ndʋ lɛ, ɛpɩsɩ ɛ-tɛ. Ewolo nɛ eluŋ mondoɖebɔʋ cɔlɔ nɛ ɛtɩmɩɣnɩ Yehowa. Abalaa sʋsɩ tɩnaa mba pasʋʋ ɛ-cɔlɔ nɛ pamaɣnɩ-ɩ eɖiɣni tɩmʋʋ. Pese nɛ powolo peheyi Dariyusi se: “Danɩyɛɛlɩ kizaa se ɛɛñaŋ ña-paɣtʋ. Paa evemiye nɖɩ lɛ, ɛtɩmɩɣnɩ ɛ-Ɛsɔ tam nabudozo.” Dariyusi kaasɔɔlɩ Danɩyɛɛlɩ nɛ ɛtaasɔɔlɩ se ɛsɩ. Pʋyɔɔ ɛlakaɣ lɩmaɣza se ɛna nʋmɔʋ ŋgʋ kɩ-yɔɔ ɛpɩzɩɣ nɛ ɛtɩŋna nɛ ɛya Danɩyɛɛlɩ ñʋʋ yɔ. Ɛlɛ, halɩ wiyaʋ maɣmaɣ taawɛɛnɩ waɖɛ se ɛlɛɣzɩ paɣtʋ ndʋ ɛtɛm tɩ-yɔɔ niye ñɩɣʋ yɔ. Ɛɛnaɣ se ɛla ɛzɩma lɛ, ɛtɛzɩ heyuu ɛ-ɛyaa se pakpaɣ Danɩyɛɛlɩ nɛ pɛpɛɖɩ-ɩ mʋʋzɩŋ weyi ɩɩwɛ patʋ pɩdɩɩfɛyɩ yɔ ɩ-pɔʋ taa.

Ðoo ana a-taa, Dariyusi maɣzaɣ Danɩyɛɛlɩ yɔɔ siŋŋ nɛ ɛtɩpɩzɩ nɛ eɖoo. Tɛʋ fema lɛ, ese lɛɛ lɛɛ nɛ ewolo mʋʋzɩŋ pɔʋ cɔlɔ nɛ ekoo nɛ ɛyaa Danɩyɛɛlɩ se: “Ñɛ-Ɛsɔ pɩzaa nɛ ɛya ña-ñʋʋ na?”

Dariyusi nɩɩ nɔɔyʋ nɔɔ. Pɩɩkɛ Danɩyɛɛlɩ nɔɔ! Ecosi Dariyusi se: “Yehowa tiyiyu kɔma nɛ ɛɖɩɣ mʋʋzɩŋ nɔsɩ. Mʋʋzɩŋ tɩlabɩ-m nabʋyʋ.” Nɛ Dariyusi taa la leleŋ siŋŋ. Eyele nɛ palɩzɩ Danɩyɛɛlɩ mʋʋzɩŋ pɔʋ taa. Pɩtɩtɩɩkayʋʋ Danɩyɛɛlɩ ɖoli. Pʋwayɩ lɛ, wiyaʋ yɔɔdɩ se: “Ɩkpa abalaa mba palɩ Danɩyɛɛlɩ wayɩ yɔ nɛ ɩpɛɖɩ-wɛ mʋʋzɩŋ pɔʋ ŋgʋ kɩ-taa.” Patɩɩpɛɖɩ abalaa mba lɛ, mʋʋzɩŋ pʋʋtɩ-wɛ.

Dariyusi ɖʋ paɣtʋ tʋnɛ ɛ-samaɣ: “Pɩwɛɛ se paa weyi ese sɔɔndʋ Danɩyɛɛlɩ tɛ Ɛsɔ. Ɛyabɩ ɛ-ñʋʋ mʋʋzɩŋ cɩkpaŋ tɛɛ.”

Ŋtɩmɩɣnɩ Yehowa paa evemiye nɖɩ ɛzɩ Danɩyɛɛlɩ yɔ?

Ɛsɩtɛɛrɩ kaakɛ Yuuda halɩbɩɣa nakɛyɛ nɛ ɛɛwɛ Pɛrɩsɩ tɛtʋ ndʋ payaɣ se Suuzaŋ yɔ tɩ-taa. Pɩnzɩ sakɩyɛ pʋcɔ nɛ pɩtalɩɣ mbʋ lɛ, Nabukodonozɔɔrɩ kaakpaɣ ɛ-cɔzɔnaa Yeruzalɛm nɛ ewoni-wɛ peeɖe. Ɛ-ɖɛdʋ Mɔrɩdekayɩ weyi ɛɛkɛ Wiyaʋ Asiyeruusi ɖɩɣa taa tʋmlaɖʋ yɔ, ɛnʋ cɔnɩnɩ ɛ-yɔɔ nɛ ɛpaɣlɩ.

Wiyaʋ Asiyeruusi ñɩnaɣ pɛlɛ nɔɔyʋ se ɛpɩsɩ-ɩ abiɖe. Peeɖe ɛ-lɩmɖʋyaa kɔnɩ-ɩ e-kewiyaɣ taa pɛlaa mba pakɩlɩ tʋʋzʋʋ yɔ, nɛ pa-taa lɛlʋ lɛ Ɛsɩtɛɛrɩ. Pɛlaa mba, pa-tɩŋa pa-taa lɛ, Ɛsɩtɛɛrɩ wiyaʋ lɩzaa se ɛkɛ abiɖe. Mɔrɩdekayɩ heyi Ɛsɩtɛɛrɩ se etaayele nɛ pana se ɛkɛ Yuuda tʋ.

Abalʋ cajayɛ tʋ Hamaanɩ kaakɛnɩ awumbiya kpeekpe ñʋʋdʋ. Ɛñɩnaɣ se ɛyaa tɩŋa eluŋuu ɛ-tɛɛ. Ɛlɛ Mɔrɩdekayɩ kizi se ɛɛlakɩ mbʋ, nɛ Hamaanɩ kɔ pana siŋŋ nɛ ɛñɩnɩɣ se ɛkʋ-ɩ. Hamaanɩ kɔm nɛ ɛna se Mɔrɩdekayɩ kɛ Yuuda tʋ lɛ, ɛla lɩmaɣza se ɛtɩŋnɩ nʋmɔʋ nakʋyʋ yɔɔ nɛ ɛɖɩzɩ Yuuda mba tɩŋa Pɛrɩsɩ kewiyaɣ taa. Eheyi wiyaʋ se: “Yuuda mba kɛ ɛyaa kɩdɛkɛdaa, pɩpɔzʋʋ se ŋɖɩzɩ-wɛ ñɛ-ɛjaɖɛ taa.” Asiyeruusi cosi-i se: “La mbʋ payɩ ŋsɔɔlaa yɔ,” nɛ pʋwayɩ lɛ, ɛha-ɩ waɖɛ se ɛɖʋ paɣtʋ. Hamaanɩ ɖʋ paɣtʋ nɛ eheyi samaɣ se pakʋ Yuuda mba tɩŋa Adaarɩ fenaɣ kɩyakʋ 13 ŋgʋ wiye. Yehowa kaawɛɛ nɛ ɛnaɣ mbʋ piɖiɣni labʋ yɔ.

Ɛsɩtɛɛrɩ taatɩlɩ paɣtʋ ndʋ Hamaanɩ ɖʋwa yɔ. Pʋyɔɔ Mɔrɩdekayɩ tiyini-i paɣtʋ ndʋ nɛ eheyi-i se: “Wolo nɛ ŋyɔɔdɩnɩ wiyaʋ.” Ɛsɩtɛɛrɩ cosi se: “Ye nɔɔyʋ ewobi wiyaʋ cɔlɔ nɛ wiyaʋ tɩyaa-ɩ yɔ, pakʋʋ-ɩ. Kɩyakɩŋ 30 yɔ, wiyaʋ tɩya-m. Ɛlɛ mowoki mbʋ. Ye ɛkpazɩ e-kewiyaɣ sika ɖaʋ nɛ ɛwɩlɩ-m yɔ, mancakɩ wezuu. Ɛlɛ ye ɛtɩla mbʋ yɔ, pakʋʋ-m.”

Ɛsɩtɛɛrɩ kʋyɩ nɛ ewolo wiyaʋ ɖɩɣa taa. Wiyaʋ na-ɩ lɛ, ɛkpazɩ e-kewiyaɣ sika ɖaʋ nɛ ɛwɩlɩ-ɩ. Ɛsɩtɛɛrɩ ɖɔ nɛ ɛñɔtɩnɩ wiyaʋ nɛ wiyaʋ pɔzɩ-ɩ se: “Ɛsɩtɛɛrɩ, ɛbɛ ŋsɔɔlaa se malabɩ-ŋ?” Ɛsɩtɛɛrɩ cosi se: “Mancaɣ se ña nɛ Hamaanɩ ɩkɔɔ mɛn-tɛ nɛ ɩtɔɔ tɔɔnaɣ.” Nɛ wiyaʋ nɛ Hamaanɩ powolo Ɛsɩtɛɛrɩ tɛ nɛ pɔtɔɔ tɔɔnaɣ. Paawɛɛ nɛ pɔtɔkɩ tɔɔnaɣ lɛ, Ɛsɩtɛɛrɩ heyi-wɛ se patasɩ kɔm ɛ-tɛ nɛ pɔtɔɔ tɔɔnaɣ. Papɩsaa nɛ powolo lɛ, wiyaʋ tasɩ pɔzʋʋ Ɛsɩtɛɛrɩ se: “Ɛbɛ ŋsɔɔlaa se malabɩ-ŋ?” Nɛ Ɛsɩtɛɛrɩ cosi-i se: “Nɔɔyʋ ñɩnɩɣ se ɛkʋ ma nɛ man-samaɣ. Mentendi-ŋ, ya ɖa-ñʋʋ.” Wiyaʋ pɔzɩ-ɩ se: “Añɩnɩɣ se ɛkʋ-mɩ?” Ɛsɩtɛɛrɩ cosi-i se: “Ɛyʋ kɩdɛkɛdʋ ɛnʋ yɔ, Hamaanɩ.” Asiyeruusi kɔ pana siŋŋ nɛ eyele nɛ pakʋ Hamaanɩ kpaagbaa.

Ɛlɛ nɔɔyʋ taapɩzɩɣ se ɛlɛɣzɩ paɣtʋ ndʋ Hamaanɩ ɖʋwa yɔ, halɩ pɩkpɛndɩnɩ wiyaʋ maɣmaɣ. Pʋyɔɔ wiyaʋ yeba nɛ Mɔrɩdekayɩ pɩsɩ awumbiya ñʋʋdʋ nɛ ɛha-ɩ waɖɛ se ɛɖʋ paɣtʋ kɩfatʋ. Mɔrɩdekayɩ ɖʋ paɣtʋ ndʋ tɩhaɣ Yuuda mba waɖɛ se pakandɩyɩ pa-tɩ yɔɔ yɔ. Pɩtalɩ Adaarɩ fenaɣ kɩyakʋ 13 ñɩŋgʋ wiye lɛ, Yuuda mba lʋ pa-tɩ yɔɔ nɛ pawa po-koyindinaa. Nɛ paa pɩnaɣ ŋga lɛ, palakɩ kazandʋ nɛ pɔtɔzʋʋnɩ wabɩtʋ ndʋ tɩ-yɔɔ.