Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2025 Watch Tower Bible and Tract Society of Pennsylvania
5-11 JANVIER
ÑƖM MBƲ PƖWƐ ƐSƆTƆM TAA YƆ IZAAYII 17-20
«Mba pamɩlɩɣ ɖa-ñɩm yɔ pe-ɖeɖe lɛ»
«Men-kewiyaɣ tɩlɩɩnɩ ɛjaɖɛ yɔɔ cɩnɛ»
16 Lɛɣzɩtʋ ndʋ tɩ-tɔm cɛyɩ siŋŋ! Bibl kpaɣ ɛyaa nɛ kɩmaɣzɩnɩ teŋgu ŋgʋ kɩwɛɛ nɛ kɩwasɩɣ nɛ kɩ-lɩm hola falɩɣ yɔ, pʋ-tɔbʋʋ se kɩfɛyɩ laŋhɛzɩyɛ taa. (Iza. 17:12; 57:20, 21; Natʋ 13:1) Paa politiki labʋ eyeki nɛ ɛyaa kaɖɩɣnɩ ɖama, patayɩɣ ɖama taa nɛ palakɩ ñam ñam lakasɩ yɔ, ɖa Yehowa sɛyaa lɛ, ɖɩwɛ laŋhɛzɩyɛ nɛ nɔɔ kʋɖʋmaɣ taa. Nɛ Yehowa naɣ se ɛ-samaɣ wɛ nɔɔ kʋɖʋmaɣ taa ɛjaɖɛ nɖɩ ɖɩtayaa yɔ ɖɩ-taa lɛ, pɩlakɩ-ɩ leleŋ siŋŋ.—Kalɩ Sofonii 3:17.
Ðɩtaaɖʋ ɖɔ-nɔɔ ɛjaɖɛ ɖɩnɛ ɖɩ-tɔm taa
4 Pʋtɔma ɖenɖe ɖɩwɛɛ yɔ, komina ñʋndɩnaa ɩɩnazɩɣ-ɖʋ yaa pahaɣ-ɖʋ waɖɛ se ɖɩla ɖɛ-Ɛsɔ sɛtʋ tʋmɩyɛ faaa. Ɛlɛ, Sataŋ ɛjaɖɛ ɖɩnɛ ɖɩwɩzɩ tɛm, nɛ pʋyɔɔ lɛ pɩpɩzɩɣ nɛ pɩtakɩ-ɖʋ wiɖiyi se ɖɩɖʋ ɖɔ-nɔɔ politiki tɔm taa. Sɔnɔ ɛyaa mba paanɩɣnɩ ɖama nɛ pɛwɛ ñʋʋ taa ɖoŋ yɔ, mba suni ɛjaɖɛ yɔɔ; pʋyɔɔ lɛ ɖɩɩpɩtɩɣ se alɩwaatʋ kaaɖɛɣ lɛ, tayʋʋ kaɣ wɛʋ ajɛɛ hɛkʋ taa nɛ pɩkpaɖɩ. (2 Tim. 3:3, 4) Ajɛɛ naayɛ taa, politiki wɛtʋ lɛɣzɩ nɔɔ kʋyʋmaɣ kpɛlɩ nɛ pɩtakɩ koobiya siɣsiɣ wɛtʋ. Pʋyɔɔ pɩcɛyaa se ɖɩñaɣ pana lɛɛlɛɛyɔ nɛ ɖɩtaaɖʋ ɖɔ-nɔɔ ɛjaɖɛ tɔm taa. Ye ɖɩɖaŋaa se kaɖɛ naɖɩyɛ ɛtalɩ-ɖʋ nɛ pʋcɔ yɔ, pɩpɩzɩɣ piyele nɛ ɖɩmaanɩ Ɛsɔ paɣtʋ yɔɔ nɛ ɖɩɖʋ ɖɔ-nɔɔ ɛjaɖɛ tɔm taa. Ye mbʋ, ɛbɛ pɩzɩɣ pɩsɩnɩ-ɖʋ nɛ ɖɩtaaɖʋ ɖɔ-nɔɔ ɛjaɖɛ ɖɩnɛ ɖɩ-tɔm taa? Yele nɛ ɖɩna lɩmaɣza naanza wena akaɣ-ɖʋ sɩnʋʋ yɔ.
ip-1 198 § 20
Yehowa yɔɔdɩ tɔm ajɛɛ yɔɔ
20 Pee wena pɩlʋlʋʋ? Izaayii yɔɔdaa se: «Ðanaɣ yɔɔ lɛ, sɔɔndʋ wɛɛ. Pʋcɔ nɛ tɛʋ fe tanaŋ tɛɛ lɛ, patɩtasɩ wɛʋ. Mba pamɩlɩɣ ɖa-ñɩm yɔ pe-ɖeɖe lɛ, nɛ mba palazɩɣ ɖa-ñɩm yɔ, mbʋ pɩtɛŋnɩ-wɛ.» (Izaayii 17:14) Ɛyaa sakɩyɛ lazɩɣ Yehowa samaɣ ñɩm, palakɩ-kɛ kañatʋ nɛ paañaŋ-kɛ. Yehowa samaɣ tɩkɛ ɛjaɖɛ yɔɔ Ɛsɔ sɛtʋ agbaa sɔsɔna taa naɖɩyɛ nɛ katɩsɔɔlɩ se kɛkɛ mbʋ ɖɔɖɔ; pʋyɔɔ lɛ mba patɩsɔɔlɩ-kɛ yɔ nɛ ko-koyindinaa pamaɣzɩɣ se kɛfɛyɩnɩ ɖoŋ nɩɩyɩ nɛ papɩzɩɣ nɛ panazɩ-kɛ kɛlɛʋ yem. Ɛlɛ Ɛsɔ samaɣ taa tɛma se «tanaŋ tɛɛ» pʋ-tɔbʋʋ se alɩwaatʋ ndʋ ka-kʋñɔmɩŋ kaɣ sɩʋ tɩnaɣ yɔ tɩñɔtɩ kpam—2 Tesalooniiki mba 1:6-9; 1 Pɩyɛɛrɩ 5:6-11.
Fezuu taa ñɩm
w06 1/12 11 § 1
Izaayii takayaɣ taa lɩmaɣza sɔsɔna—I
Izaayii 20:2-5—Izaayii ɖɔm ndaakpeɖe tɛtʋ taa pɩnzɩ 3 toovenim na? Pɩtɩla yɔ Izaayii kaahɔzɩ e-toko kɩtɩnʋʋ nɛ pɩkazɩ-ɩ «pɩ-tɛɛ wondu ɖeke» nɛ ɛɖɔŋ.—1 Samɩyɛɛlɩ 19:24, pɩ-tɛɛ tɔm.
12-18 JANVIER
ÑƖM MBƲ PƖWƐ ƐSƆTƆM TAA YƆ IZAAYII 21-23
Mbʋ pɩtalɩ Sebɩna yɔ lɔŋ weyi pɩkpɛlɩkɩɣ-ɖʋ yɔ
Ɛzɩma Ɛsɔ sɩɣzɩɣ-ɖʋ lɔŋ yɔ, pɩwɩlɩɣ se ɛsɔɔlɩ-ɖʋ
7 Pɩsa nɛ ɖɩñɩɣ niye ɛzɩma pɩcɛyaa se pasɩɣzɩ-ɖʋ lɔŋ yɔ pɩ-yɔɔ lɛ, iyele nɛ ɖɩyɔɔdɩ mba Yehowa hɔm pa-nɩŋgbaŋʋʋ yɔ pa-taa naalɛ tɔm: Wiyaʋ Ezekiyaasɩ alɩwaatʋ taa abalʋ weyi payaɣ se Sebɩna yɔ nɛ ɖa-alɩwaatʋ taa koobu weyi payaɣ se Graham yɔ. Sebɩna kaakɛnɩ wiyaʋ «ɖɩɣa yɔɔ cɔnɩyʋ;» ye mbʋ ɛyaa ñaŋaɣ-ɩ siŋŋ waɖɛ sɔsɔɖɛ nɖɩ ɖɩ-yɔɔ. Paa pɩɩla ɛzɩma yɔ Ezekiyaasɩ ɖɩɣa yɔɔ ɛcɔŋaɣnaɣ. (Iza. 22:15) Pɩlabɩ pʋtɔdɩyɛ se ɛkɔma nɛ ɛpaɣzɩ ɛ-tɩ kpazʋʋ nɛ ɛñɩnɩɣ se ɛ-maɣmaɣ ɛ-hɩɖɛ ɛsɛɛ. Halɩ eehuyi ɛ-tɩ ñɩm tɩnaa pɩlaʋ nɛ ɛcakaɣ ɖɔɖɔ “samtʋ kɛɛkɛɛnaa” yɔɔ!—Iza. 22:16-18.
8 Sebɩna ñɩnaɣ se ɛ-maɣmaɣ ɛ-hɩɖɛ ɛsɛɛ, mbʋ yebina nɛ Ɛsɔ “ɖɔɔnɩ-ɩ ɛ-tʋmɩyɛ taa” nɛ ɛlɛɣzɩ e-lone taa Eliyaakim. (Iza. 22:19-21) Pɩlabɩ mbʋ alɩwaatʋ ndʋ Asiirii Wiyaʋ Senakeribʋ kaawɛɛ nɛ ɛñɔɔzʋʋ ɛ-tɩ se ewoki nɛ ɛyɔkɩ Yeruzalɛm tɛtʋ yɔ. Pɩlabɩ pazɩ lɛ, Asiirii wiyaʋ ɛnʋ etiyi ñʋndɩnaa sɔsaa nɛ sɔɔjanaa sakɩyɛ se powolo Yeruzalɛm nɛ paɖʋ sɔɔndʋ Yuuda ñɩma nɛ Wiyaʋ Ezekiyaasɩ nɛ paba tɔlɩ pɛ-tɛɛ se pawabɩ-wɛ. (2 Aw. 18:17-25) Eliyaakim petiyaa se ɛkatɩ-wɛ, ɛlɛ etiwolo e-ɖeke. Ɛyaa naalɛ kaasɩ-ɩ. Pa-taa lɛlʋ lɛ, Sebɩna nɛ lɛɛlɛɛyɔ lɛ ɛkɛ takayaɣ taa mayʋ. Tɔm tʋnɛ tɩwɩlɩɣ se paa pɩɩla ɛzɩma yɔ Sebɩna tɩmʋ pana yaa ɛtɩcaɣnɩ nɔɔyʋ, ɛlɛ eluzi ɛ-tɩ nɛ etisi nɛ ɛla tʋmɩyɛ nɖɩ paɖʋ-ɩ se ɛla yɔ, paa ɖɩtaatalɩ kajalaɣ ñɩnɖɛ yɔ. Ye mbʋ, lɔŋ weyi ɛ-tɔm ndʋ tɩ-kpɛlɩkɩɣ-ɖʋ? Yele nɛ ɖɩyɔɔdɩ ɩ-taa naadozo tɔm.
9 Kajalaɣ lɛ, Sebɩna lesi waɖɛ sɔsɔɖɛ nɖɩ ɛɛwɛna yɔ. Mbʋ pɩtalɩ-ɩ yɔ pɩñɩkɩɣ niye Bibl taa toovenim tɔm tʋnɛ tɩ-yɔɔ: «Tɩ kpazʋʋ kɔŋ lɛ asɛyʋʋ tɩŋɩɣna, nɛ ye ɛyʋ ɛwɛnɩ cajayɛ lɩmaɣza yɔ pɩkaɣ-ɩ tuuluu.» (Adu. 16:18) Ye ŋwɛnɩ wala naayɛ ɛgbɛyɛ taa nɛ nabʋyʋ taa ɛyaa ñaŋɩ-ŋ pɩ-yɔɔ yɔ, pɩwɛɣ ɖeu se ŋñaɣ pana nɛ ŋwɛɛnɩ tɩ luzuu nɛ ŋtaakpazɩ ña-tɩ kaaʋ. Ye ŋwɛ niye hɔɔlʋʋ nakʋyʋ taa yaa ŋlabɩ tʋmɩyɛ naɖɩyɛ nɛ ɛyaa saŋɩ-ŋ yɔ, pɩsɩnɩ samtʋ ndʋ nɛ ŋcɛlɩ Yehowa. (1 Kɔr. 4:7) Apostoloo Pɔɔlɩ mawa se: «Meheyiɣ mɩ-taa paa weyi se ɛtaamaɣzɩ ɛ-tɩ yɔɔ nɛ pɩcɛzɩ ɛzɩma pɩwɛɛ se ɛmaɣzɩ yɔ; ɛlɛ ɛmaɣzɩ nɛ ɛna ɛzɩma ɛpɩzɩɣ nɛ ɛwɛɛnɩ maɣzɩm mbʋ pɩwɛ kele kele yɔ.»—Roma 12:3.
Ɛzɩma Ɛsɔ sɩɣzɩɣ-ɖʋ lɔŋ yɔ, pɩwɩlɩɣ se ɛsɔɔlɩ-ɖʋ
10 Nabʋlɛ lɛ, paa Yehowa ɛhɔm Sebɩna nɩŋgbaŋʋʋ siŋŋ yɔ, ɛɛwɛnɩ lidaʋ se ɛpɩzɩɣ ɛlɛɣzɩ nɛ pɩwazɩ-ɩ. (Adu. 3:11, 12) Pɩkɛnɩ lɔŋ tasʋʋ kɩbam sɔnɔ mba pelesiɣ wala wena paawɛnɩ ɛgbɛyɛ taa yɔ! Pɩwɛɣ ɖeu se petisi nɩŋgbaŋʋʋ hɔm mbʋ se pɩkɛnɩ nʋmɔʋ ŋgʋ kɩ-yɔɔ Yehowa tɩŋɩɣna se ɛwɩlɩ-wɛ ɛ-sɔɔlɩm yɔ, nɛ pataamʋ pana yaa pataacaɣnɩ nɔɔyʋ; ɛlɛ powolo pɩ-yɔɔ nɛ palakɩ po-ɖoŋ ɖeɖe Ɛsɔ tʋmɩyɛ taa. Tɔzɩ se ɖa-Caa kɩbanʋ Yehowa ɛɛkaɣ maɣzʋʋ kaaʋ se ɖɔ-tɔm tɛma, ye ɖiluzuu ɖa-tɩ ɛ-tɛɛ yɔ. (Kalɩ 1 Pɩyɛɛrɩ 5:6, 7.) Lɔŋ weyi pasɩɣzɩɣ-ɖʋ nɛ sɔɔlɩm yɔ, ɩkɛnɩ nʋmɔʋ ŋgʋ kɩ-yɔɔ Ɛsɔ tɩŋɩɣna se ɛñɔɔzɩ-ɖʋ nɛ ɖiɖe ɛ-ɛsɩndaa yɔ. Ye mbʋ yele ña-tɩ nɛ Ɛsɔ ñɔɔzɩ-ŋ.
Ɛzɩma Ɛsɔ sɩɣzɩɣ-ɖʋ lɔŋ yɔ, pɩwɩlɩɣ se ɛsɔɔlɩ-ɖʋ
11 Nabudozo lɛ, ɛzɩma Yehowa sɩɣzɩ lɔŋ Sebɩna yɔ, pɩkpɛlɩkɩɣ lɔŋ nɩɩyɩ mba pɛwɛnɩ waɖɛ se pasɩɣzɩ lalaa lɔŋ, ɛzɩ lʋlɩyaa nɛ ɛgbɛyɛ taa ɛzʋtʋyaa mbʋ yɔ. Lɔŋ weyi pɩkpɛlɩkɩɣ-wɛ? Yehowa hɔŋ kɩwɛɛkɩm laɖʋ nɩŋgbaŋʋʋ se ɛwɩlɩ-ɩ se ɛ-lakasɩ kɩdɛkɛdɩsɩ ɛpaɖɩɣ, pɩtɩkɛ ɛ-maɣmaɣ. Ye ŋkɛ lʋlɩyʋ yaa ɛgbɛyɛ taa ɛzʋtʋyʋ yɔ, alɩwaatʋ ndʋ ŋŋsɩɣzɩɣ nɔɔyʋ lɔŋ yɔ, ŋmaɣzɩɣnɩ Yehowa nɛ ŋwɩlɩɣ se pɩtɩkɛ weyi ŋhɔŋ ɛ-nɩŋgbaŋʋʋ yɔ ɛ-maɣmaɣ ŋpaɖɩɣ, ɛlɛ ŋpaɖɩɣ ɛ-wɛtʋ kɩdɛkɛdɩtʋ na?—Yud. 22, 23.
Fezuu taa ñɩm
w06 1/12 11 § 2
Izaayii takayaɣ taa lɩmaɣza sɔsɔna—I
Izaayii 21:1—Egeetiye nɖɩ payaɣ se «teŋgu kañɩmbusuu»? Paa Babilɔɔnɩ ɛtaañɔtɩnɩ teŋgu nakʋyʋ yɔ, ŋgʋ payaɣ mbʋ. Paya-kʋ mbʋ, mbʋ pʋyɔɔ yɔ Efraatɩ nɛ Tiigri pɔsɩ kaayeba nɛ lɩm wɛɣ egeetiye nɖɩ ɖɩ-taa paa pɩnaɣ ŋga.
19-25 JANVIER
ÑƖM MBƲ PƖWƐ ƐSƆTƆM TAA YƆ IZAAYII 24-27
«Ðɛ-Ɛsɔ yɔ!»
cl 15 § 21
«Ɩna! Ðɛ-Ɛsɔ yɔ!»
21 Wiɖiyi ŋtɛm naʋ pɩɣa cikpelaɣ nakɛyɛ wɩlɩ ka-caa nesi nɛ keheyi ka-taabalaa nɛ taa leleŋ nɛ agʋnda se: «Ɩnaɣ man-caa kɛlɛ»? Ɛsɔ sɛyaa ɖɔɖɔ pɩzɩɣ nɛ pɔyɔɔdɩ tɔm kʋɖʋmtʋ ndʋ Yehowa yɔɔ. Bibl kaayɔɔdaa se alɩwaatʋ natʋyʋ taa ɛyaa siɣsiɣ tɩnaa kaɣ yɔɔdʋʋ se: «Ɩna! Ðɛ-Ɛsɔ yɔ!» (Izaayii 25:8, 9) Ŋwɛɣ nɛ ŋtɩlɩɣ Yehowa wɛtʋ kɩbandʋ nɛ pɩkɩlɩɣ lɛ, ŋkaɣ ɖiɣzinuu se ɛkɛ Caja kɩbanʋ weyi ɛkpaɖaa yɔ.
Yesu labʋ maamaaci lakasɩ nɛ kpɔnɔnaa ɖɔɔ yɔ ɛbɛ pɩkpɛlɩkɩɣ-ɖʋ?
14 Alɩwaatʋ ndʋ Yesu yɔɔdaa se ɖɩtɩmɩ «ɖa-kɩyakʋ tɔɔnaɣ» yɔɔ yɔ, ɛwɩlɩ-ɖʋ ɖɔɖɔ se ɖɩtɩmɩ se Ɛsɔ «sɔɔlɩm ɛla tataa ɛzɩ ɛsɔdaa yɔ.» (Mat. 6:9-11) Ɛzɩma ɛjaɖɛ kaɣ wɛʋ alɩwaatʋ ndʋ tɩ-taa? Bibl wɩlɩɣ se alɩwaatʋ ndʋ Ɛsɔ sɔɔlɩm kaɣ labʋ tɛtʋ yɔɔ yɔ, tɔɔnasɩ kɩbanzɩ kaɣ tɔyʋʋ tɛtʋ yɔɔ. Izaayii 25:6-8 heyiɣ-ɖʋ se tɔɔnasɩ leleŋ ñɩnzɩ kaɣ tɔyʋʋ Yehowa Kewiyaɣ tɛɛ. Pɩtasɩ lɛ, Keɣa 72:16 yɔɔdʋʋ se: «Tɔɔnaɣ pee kaɣ tɔyʋʋ tɛtʋ yɔɔ; akaɣ wadʋʋ pʋŋ ñʋŋ taa.» Ŋɖaŋ kpam se alɩwaatʋ ndʋ tɩtalɩ nɛ ŋkpaɣ tɔɔnaɣ pee ana nɛ ŋlabɩnɩ tɔɔnaɣ ŋga ŋkɩlɩ sɔɔlʋʋ yɔ yaa ŋkpɛlɩkɩ tɔɔnasɩ kɩfasɩ nasɩyɩ labʋ na? Pɩtɩla ŋɖaŋaa ɖɔɖɔ se alɩwaatʋ ndʋ tɩtalɩ nɛ ŋsɔ viiñi tɩŋ nɛ ŋtɔɔ i-pee. (Iza. 65:21, 22) Ɛyaa mba payɩ pakaɣ wɛʋ tɛtʋ yɔɔ yɔ, pakaɣ nɩʋ leleŋ ɛnɩ.
Ɛzɩma Yehowa sɔɔlɩm wazɩɣ-ɖʋ?
11 Maɣzɩ nɛ ŋna ɛzɩma wezuu caɣʋ kaɣ wɛʋ Paradisuu taa tɛtʋ yɔɔ yɔ. Ŋŋkaɣ tasʋʋ seu kʋdɔŋ yaa sɩm sɔɔndʋ. (Iza. 25:8; 33:24) Yehowa kaɣ-ŋ haɣzʋʋ mbʋ ñe-liu wɛɛ nɛ pɩmʋnaa yɔ. Ɛbɛ ŋsɔɔlaa se ŋkpɛlɩkɩ? Ŋsɔɔlaa se ŋkpɛlɩkɩ kpɩna yɔɔ tɔm nɛ pɩkɩlɩ? Yaa ŋsɔɔlaa se ŋkpɛlɩkɩ minziiki mabʋ? Yaa ŋsɔɔlaa se ŋkpɛlɩkɩ kɩlɛmɩŋ lɩzʋʋ? Pɩtʋʋ fɛyɩ se paradisuu taa, pɩkaɣ-ɖʋ pɔzʋʋ ɛyaa mba pasɩm kuduyuŋ anjaʋwaa lɩzʋʋ yaa kuduyuŋ maʋ yɔ nɛ haɖaa. Pɩtʋʋ fɛyɩ se pɩkaɣ pɔzʋʋ ɖɔɖɔ ɛyaa se patɩzɩ tɔɔnaɣ, polu wondu nɛ pɔcɔnɩ kaɖasɩ yɔɔ se sɩwɛɛ kajʋka. (Iza. 35:1; 65:21) Ðɩkaɣ caɣʋ wezuu maatɛŋ, pʋyɔɔ lɛ ɖɩwɛɣnɩ alɩwaatʋ se ɖɩkpɛlɩkɩ mbʋ payɩ ɖɩsɔɔlaa yɔ.
12 Pɩkɛɣnɩ taa leleŋ siŋŋ se ɖɩmʋ ɛyaa mba pakaɣ-wɛ fezuu yɔ. (Tʋma 24:15) Maɣzɩ ɖɔɖɔ nɛ ŋna ɛzɩma ña-taa kaɣ labʋ leleŋ alɩwaatʋ ndʋ ŋkpɛlɩkɩɣ Yehowa wondu kɩlɩzɩtʋ ndʋ tɩfɛyɩ kalʋʋ yɔ tɩ-yɔɔ tɔm se ŋtɩlɩ-ɩ nɛ pɩkpaɖɩ yɔ. (Keɣ. 104:24; Iza. 11:9) Kɔzɩ kɔzɩ lɛ, ŋŋkaɣ labʋ kɩwɛɛkɩm nabʋyʋ kaaʋ nɛ pɩpɔzɩ se ŋpɔzɩ Yehowa kpaɣʋ nɛ kpeɣu, nɛ ŋkaɣ pɩzʋʋ nɛ ŋsɛɛ-ɩ camɩyɛ. Ŋkaɣ sɔɔlʋʋ se ŋnɩɩ «kɩwɛɛkɩm leleŋ weyi eeleɖiɣ yɔ» nɛ ŋlesi cee wayɩ wazasɩ nzɩ? (Ebr. 11:25) Pɩtʋʋ fɛyɩ se aayɩ. Wazasɩ nzɩ ɖɩkaɣ hiɣu yɔ, sɩcɛzɩ kɩlaŋ weyi payɩ ɖɩlaɣ lɛɛlɛɛyɔ yɔ. Tɔzɩ se Paradisuu ɛɛkaɣ kɛnʋʋ cee wayɩ lidaʋ mbʋ tam. Wiɖiyi kɩkaɣ kɛnʋʋ lone nɖɩ ɖɩ-taa ɖɩwɛɣ paa evemiye nɖɩ yɔ. Nɛ ɖɩkaɣ hiɣu wazasɩ nzɩ sɩ-tɩŋa payɩ mbʋ pʋyɔɔ yɔ Yehowa sɔɔlɩ-ɖʋ siŋŋ nɛ ɛcɛlɩ ɛ-Pɩyalʋ ɖɔ-yɔɔ.
Fezuu taa ñɩm
w15 15/12 17 § 1-3
2013 Ɛjaɖɛ kɩfaɖɛ tɔm ɖɛzʋʋ Bibl ŋgʋ paɖaɣnɩ ñɔɔzʋʋ yɔ
Ɛbɛ yɔɔ Ɛjaɖɛ kɩfaɖɛ tɔm ɖɛzʋʋ Bibl ŋgʋ paɖaɣnɩ ñɔɔzʋʋ yɔ kɩ-taa takayɩsɩ sakɩyɛ taa lɛ pama tɔm loyisi ɛzɩ koosi yɔ? Kiɖe tɛɛ lɛ, paama Bibl hɔɔlɩŋ sakɩyɛ ɛzɩ pamaʋ koosi yɔ. Kʋnʋmɩŋ weyi pɔyɔɔdʋʋ ɖa-alɩwaatʋ taa yɔ ɩ-taa lɛ, pʋcɔ nɛ pana se takayaɣ nakɛyɛ taa tɔm natʋyʋ kɛ koosi lɛ, pɩwɛɛ se tɔm pee wena pɛtɛzɩɣnɩ tɔm loyisi yɔ a-wiu ɛlɩɩ ɖama. Ɛlɛ Ebree kʋnʋŋ taa lɛ, koosi taa tɔm loyisi wɛnɩ hɔɔlɩŋ naalɛ, tɔm loyaɣ kajalaɣ ñɩŋga yeki se panɩɩ naalɛ ñɩŋga taa yaa naalɛ ñɩŋga kaɖɩɣnɩ kajalaɣ ñɩŋga. Ebree koosi taa lɛ, tɔm pee wena atɛzɩɣnɩ tɔm loyisi yɔ, pɩtɩkɛ ɛzɩma a-wiu lɩ ɖama yɔ pɩ-tɔm cɛyɩna, ɛlɛ ɛzɩma ayeki se pɔcɔlɩ lɩmaɣzɩyɛ naɖɩyɛ yɔ pɩ-tɔm kɩlɩnɩ cɛyʋʋ.
Ɛjaɖɛ kɩfaɖɛ tɔm ɖɛzʋʋ Biblwaa kɩbɩma taa lɛ, pama Yɔɔb nɛ Keɣsi takayɩsɩ taa tɔm ɛzɩ pamaʋ koosi yɔ, mbʋ pʋyɔɔ yɔ kiɖe tɛɛ lɛ kaɖʋwa kaakɛnaa se petee sɩ-taa tɔm yaa pɔɖɔkɩ-tʋ ñʋʋ taa. Pama-tʋ ɛzɩ koosi yɔ, nɛ pɩsɩɣna se pañɩɣ niye tɔm yɔɔ nɛ papɩzɩ ɖɔɖɔ nɛ pɔɖɔkɩ-tʋ ñʋʋ taa kɛlɛʋ. Bibl ŋgʋ paɖaɣnɩ ñɔɔzʋʋ 2013 taa yɔ kɩ-taa lɛ pama Aduwa, Hendu taa Hendu nɛ natʋ takayɩsɩ taa tɔm sakɩyɛ ɛzɩ pamaʋ koosi yɔ. Palabɩ mbʋ se pawɩlɩ ɛzɩma tɔm loyaɣ kajalaɣ ñɩŋga yeki se panɩɩ naalɛ ñɩŋga taa yɔ, yaa ɛzɩma naalɛ ñɩŋga kaɖɩɣnɩ kajalaɣ ñɩŋga yɔ. Kɩɖaʋ nakʋyʋ lɛ Izaayii 24:2; mayaɣ ŋga ka-taa paa tɔm loyaɣ ŋga ka-taa lɛ, lɩmaɣzɩyɛ naalɛ ñɩnɖɛ ñɩkɩɣ niye kajalaɣ ñɩnɖɛ yɔɔ, nɛ pɩwɩlɩɣ se Yehowa tɔm hʋʋ kaɣ tukunuu paa anɩ. Ye weyi ɛkalɩɣ Bibl yɔ eɖiɣzinaa se hɔɔlʋʋ ŋgʋ ɛkalɩɣ yɔ koosi kɩkɛnaa yɔ, pɩsɩɣnɩ-ɩ nɛ ɛna se weyi ɛma Bibl hɔɔlʋʋ ŋgʋ yɔ ɛtɩma tɔm nɛ ecuuzi tɩ-taa kicuuzuu, ɛlɛ ɛtɩŋnɩ tɔm maʋ lɛɣtʋ ndʋ tɩ-yɔɔ se ɛñɩɣ niye Ɛsɔ tɔm yɔɔ na.
Ebree kʋnʋŋ taa lɛ, pɩwɛ kaɖɛ se ɛyʋ ɛtɩlɩ se takayaɣ nakɛyɛ taa tɔm kɛ koosi yaa tɩtɩkɛ koosi, pʋyɔɔ lɛ ɛzɩma pɔcɔlʋʋ tɔm loyisi Biblwaa nabɛyɛ taa yɔ pɩwɛ ndɩ nɛ ɛzɩma pɔcɔlʋʋ-sɩ Biblwaa lalaa taa yɔ. Ye mbʋ, pɩwɛɛ se tɔm ɖɛzɩyaa ɩtazɩ nɛ pana se Bibl masɩ nzɩ kɛ koosi nɛ nzɩ tɩkɛ koosi. Bibl masɩ nasɩyɩ lɛ sɩtɩkɛ koosi ɛlɛ pama sɩ-taa tɔm ɛzɩ pamaʋ koosi yɔ. Palabɩnɩ tʋmɩyɛ kɩɖaŋ nɛ tɔm pee wena ayeki se ɛyʋ ɛmaɣzɩ ɛ-ñʋʋ taa nɛ pɩsa nɛ ɛnɩɩ lɩmaɣzɩyɛ naɖɩyɛ taa kpayɩ kpayɩ yɔ.
26 JANVIER–1er FÉVRIER
ÑƖM MBƲ PƖWƐ ƐSƆTƆM TAA YƆ IZAAYII 28-29
Ðʋ Yehowa hɩɖɛ nɛ ño-ndomee nɛ ña-laŋɩyɛ
ip-1 299 § 23
Izaayii kaayɔɔdɩ Yehowa «lakasɩ nzɩ sɩwɛ piti yɔ» sɩ-tɔm
23 Yuuda Ɛsɔ sɛtʋ ñʋndɩnaa maɣzaɣ se pɛwɛnɩ fezuu taa lɔŋsɩnɖɛ, ɛlɛ toovenim taa lɛ paha Yehowa siɣye. Lɩmaɣza wena pɛwɛnɩ kɩbam nɛ kɩdɛkɛdɩm yɔɔ nɛ atɩtʋʋzɩ yɔ, ana pawɩlɩɣ samaɣ; pa-lakasɩ wɩlɩɣ se pɛfɛyɩnɩ tisuu nɛ pacakɩ wezuu kɩdɛkɛdʋʋ, nɛ piyeba nɛ samaɣ tɔm tɩtasɩ kɛdɩnʋʋ Ɛsɔ. Yehowa kaɣ tɩŋnʋʋ «piti tʋma» yɔɔ nɛ ɛla «piti lakasɩ» nɛ ɛpɔzɩ-wɛ akɔnta pɛ-tɛ pɩ-tɛɛ nɛ pɩ-yɔɔ lakasɩ yɔɔ. Ɛyɔɔdaa se: «Samaɣ kanɛ kɔñɔtʋʋnɩ-m nɛ kɔ-nɔɔ nɛ kaɖʋʋ-m hɩɖɛ nɛ ko-ndomee, ɛlɛ ka-laŋɩyɛ posini-m kpem; nɛ keseɣ-m sɔɔndʋ ndʋ yɔ, ɛyaa paɣtʋ ndʋ pawɩlɩ-kɛ yɔ tɩ-cɔlɔ tɩlɩɣna. Pʋyɔɔ lɛ, mɛnkɛ Weyi ɛkaɣ ɖaɣnʋʋ labʋ piti tʋma samaɣ kanɛ yɔ, piti lakasɩ yɔɔ piti lakasɩ lɛɛsɩ; nɛ pɔ-lɔŋsɩnɖaa lɔŋsɩnɖɛ kaɣ ɖɩm, nɛ pɛ-lɛɣtʋ tɩnaa tɔm taa nɩʋ lɛɣtʋ kaɣ mʋʋʋ.» (Izaayii 29:13, 14) Yuuda mba lɔŋsɩnɖɛ nɛ pɔ-tɔm taa nɩʋ lɛɣtʋ kaɣ ɖɩm alɩwaatʋ ndʋ Yehowa tɩŋɩɣnɩ Babilɔɔnɩ kewiyaɣ yɔɔ nɛ ɛɖɩzɩ tisuu yebiyaa mba pa-tɩŋa yɔ. Mbʋ ɖɔɖɔ talɩnɩ kajalaɣ pɩnzɩ mɩnʋʋ taa Yuuda mba Ɛsɔ sɛtʋ ñʋndɩnaa mba pelesi samaɣ yɔ. Mbʋ ɖɔɖɔ kaɣnɩ talʋʋ ɖa-alɩwaatʋ taa ñɩma mba payaɣ pa-tɩ se Krɩstʋ mba yɔ.—Maatiyee 15:8, 9; Roma mba 11:8.
Nabʋyʋ ɛɛpɩzɩɣ nɛ pɩpadɩ ɛyaa siɣsiɣ tɩnaa nɛ pɔtɔlɩ
7 Yesu alɩwaatʋ taa, ɛlabɩ abalɩtʋ nɛ ekuli Ɛsɔ sɛtʋ ñʋndɩnaa tɛ pɩ-tɛɛ nɛ pɩ-yɔɔ lakasɩ yɔɔ. Ɛwɩlaa se Farɩsɩ mba kɛ pɩ-tɛɛ nɛ pɩ-yɔɔ tɩnaa mbʋ pʋyɔɔ yɔ, pamaɣzɩɣ ɛzɩma pasaŋ pe-nesi yɔ pɩ-yɔɔ nɛ pɩkɩlɩ ɛzɩma pɔcɔnɩ pa-lʋlɩyaa yɔɔ yɔ. (Mat. 15:1-11) Pɩtɩla Yesu tɔm ɖɩɣzɩ ɛ-wayɩ tɩŋɩyaa. Pʋyɔɔ pɔpɔzɩ-ɩ se: «Ŋnawa se Farɩsɩ mba nɩ tɔm ndʋ ŋyɔɔdaa yɔ lɛ, pituuli-wɛ?» Yesu cosi se: «Tɩʋ ŋgʋ man-Caa weyi ɛwɛ ɛsɔdaa yɔ ɛtɩsɔ yɔ, pakaɣ-kʋ kpɛzʋʋ. Iyele-wɛ. Nʋmɔʋ wɩlɩyaa yʋlʋmaa pɛkɛnaa. Ye yʋlʋm ɛwɩlɩɣ yʋlʋm nʋmɔʋ yɔ, pa-naalɛ pakaɣ tɔlʋʋ pɔʋ taa.» (Mat. 15:12-14) Paa tɔm ndʋ Yesu yɔɔdaa yɔ tiyeba nɛ pɩwɩzɩ Ɛsɔ sɛtʋ ñʋndɩnaa yɔ, Yesu tiyele yɔɔdʋʋ toovenim.
Wɛɛ Yehowa kizinziku tɛɛ tam!
8 Mba «[pɔyɔɔdʋʋ] toovenim pa-laŋɩyɛ taa» yɔ, ɛyaa ɛsɩndaa lɛ, paacɛtɩɣ nɛ palakɩ ɛzɩ pañaŋ Ɛsɔ yɔ; ɛlɛ pamaɣnɩ ɛ-paɣtʋ yɔɔ alɩwaatʋ ndʋ pɛwɛɣ pe-ɖeke yɔ. (Iza. 29:13) Pekiziɣ pɩ-tɛɛ nɛ pɩ-yɔɔ lakasɩ. Pɩ-tɛɛ nɛ pɩ-yɔɔ tʋ pɩzɩɣ nɛ ɛpaɣzɩ maɣzʋʋ se Yehowa paɣtʋ ɛɛwazɩɣ paa ɛzɩmtaa. (Yak. 1:5-8) Ɛpɩzɩɣ nɛ ɛmaanɩ Yehowa paɣtʋ natʋyʋ yɔɔ hɔɔlɩŋ weyi ɛmaɣzɩɣ se ɩ-tɔm tɩcɛyɩ yɔ ɩ-taa. Pʋwayɩ, ɛkɔŋ nɛ ɛna se pɩwɛ ɛzɩ ɛ-kaañamtʋ lakasɩ nzɩ sɩtɩkɔnɩ-ɩ kɩdɛkɛdɩm nabʋyʋ lɛ, ɛpɩzɩɣ nɛ ɛpaɣzɩ labʋ kɩdɛkɛdɩm mbʋ pɩkɩlɩ mbʋ yɔ; ɖɩnɛ ɛlɛ ɛ-Ɛsɔ sɛtʋ pɩsɩɣ pɩ-tɛɛ nɛ pɩ-yɔɔ lakasɩ. (Ekl. 8:11) Ɛlɛ ɖa lɛ, ɖɩsɔɔlaa se ɖɩwɛɛ toovenim pɩtɩŋa pɩ-taa.
Fezuu taa ñɩm
it «Ariyɛɛlɩ» § 1; it «Ariyɛɛlɩ» No. 3
Ariyɛɛlɩ
(Ariyɛɛlɩ) [Ɛsɔ altaaru mɩzaɣ; yaa, Ɛsɔ tɛ mʋʋzʋʋ].
3. Palabɩnɩ tʋmɩyɛ hɩɖɛ nɖɩ Izaayii 29:1, 2, 7 taa, nɛ ɖɩsɩŋnɩ Yeruzalɛm. Ɛsɔ tɛ templo kaawɛ Yeruzalɛm tɛtʋ taa; nɛ kɩ-taa kɩlaʋ altaaru kaawɛɛ. Pʋyɔɔ lɛ, payaɣaɣ tɛtʋ ndʋ se Ɛsɔ altaaru mɩzaɣ. Tɩɩkɛ ɖɔɖɔ Yehowa sɛtʋ kele kele ñɩndʋ lone sɔsɔɖɛ. Ɛlɛ Izaayii 29:1-4 yɔɔdʋʋ ɛzɩma Babilɔɔnɩ mba kaɣ ɖɩzʋʋ Yeruzalɛm pɩnaɣ 607 P.P.Y. yɔ pɩ-tɔm. Alɩwaatʋ ndʋ lɛ hɩɖɛ nɖɩ paya-tʋ se «altaaru mɩzaɣ» yɔ, ɖɩkaɣ wɛnʋʋ tɔbʋʋ nɩʋ lɛɛbʋ: tɩkaɣ kɛʋ tɛtʋ ndʋ tɩ-taa pɛkpɛdɩ calɩm nɛ pikpeŋ yɔ, ndʋ miŋ ñaɣ-tʋ yɔ, nɛ ɛyaa mba pakʋ-wɛ yɔ po-tomnasɩ kaɣ pɛɛtʋʋ tɩ-taa. Mbʋ pʋyɔɔ asɛyʋʋ ŋgʋ kɩkaɣ-tʋ talʋʋ yɔ, pɔyɔɔdɩ pɩ-tɔm kalɩtʋ 9 piwolo 16 taa. Ɛlɛ Izaayii 29:7, 8 wɩlɩɣ se ajɛɛ wena akaɣ kɔnʋʋ asɛyʋʋ ŋgʋ Yeruzalɛm yɔɔ yɔ, aakaɣ talʋʋ a-kaɖʋwa.
2-8 FÉVRIER
ÑƖM MBƲ PƖWƐ ƐSƆTƆM TAA YƆ IZAAYII 30-32
Hiɣ ɖɩjɔzɩyɛ Yehowa keŋ tɛɛ
w01 15/11 16 § 7
Yehowa kɛnɩ ɖa-ɖɩjɔzɩyɛ
7 Yehowa kɛ ɖa-ɖɩjɔzɩyɛ, nɛ pʋyɔɔ lɛ tɔm tʋnɛ tɩhɛzɩɣ ɖa-laŋa: «Ɛkaɣ posuu e-keŋ hʋndʋ ñɔ-yɔɔ, nɛ ŋkaɣ cɔzʋʋ e-keŋ tɛɛ. E-siɣsiɣ wɛtʋ kaɣ kɛʋ kpayʋʋ sɔsɔʋ nɛ koloŋa ŋga kakandɩyɩɣ ñɔ-yɔɔ yɔ.» (Keɣa 91:4) Ɛsɔ kandɩyɩɣ ɖɔ-yɔɔ ɛzɩ sumaɣ huzuu ke-keŋ ka-pɩɣa yɔɔ se kakandɩyɩ kɔ-yɔɔ yɔ. (Izaayii 31:5) ‘Eposuu e-keŋ hʋndʋ ɖɔ-yɔɔ se kaɖɛ naɖɩyɛ ɛtaatalɩ-ɖʋ.’ Ðɩpɩzɩɣ nɛ ɖɩyɔɔdɩ se sumaɣ «keŋ hʋndʋ» sɩŋnɩ ke-keŋ. Keŋ ɛnɩ kohuuzuuni ke-piya yɔɔ nɛ kakandɩyɩɣ sɩ-yɔɔ se nabʋyʋ ɛtaakɔnɩ-sɩ kaɖɛ. Ɛzɩ sumasɩ piya yɔ, ɖɩwɛ pɛɛyɛ taa Yehowa keŋ tɛɛ, mbʋ pʋyɔɔ yɔ ɖihiɣ ɖɩjɔzɩyɛ Krɩstʋ ɛgbɛyɛ toovenim ñɩnɖɛ taa.—Ruti 2:12; Keɣa 5:1, 11.
Yehowa kaɣ-ŋ sɩnʋʋ kaɖɛ alɩwaatʋ taa
13 Mbʋ pɩpɔzʋʋ se ɖɩla yɔ. Ñaɣ pana kpem nɛ ŋtaaposi ña-tɩ nɛ ɛyaa lalaa. Ye ɖiposuu ɖa-tɩ nɛ ɛyaa lalaa yɔ, pɩpɩzɩɣ piyele nɛ ɖɩpaɣzɩ maɣzʋʋ ɖe-ɖeke ɖɔ-yɔɔ nɛ kala wena ɖɩkatɩɣ yɔ a-yɔɔ. Pɩpɩzɩɣ nɛ pɩwɛɛnɩ ɖoŋ lɩmaɣza wena ɖɩkpakɩɣ yɔ a-yɔɔ. (Adu. 18:1) Pɩkɛ toovenim se nabʋyʋ taa, ɖa-tɩŋa payɩ pɩpɩzɩɣ nɛ pɩpɔzɩ se ɖɩwɛɛ ɖe-ɖeke, kɔzɩ kɔzɩ alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ. Paa mbʋ yɔ, ye ɖiposuu ɖa-tɩ nɛ ɛyaa lalaa alɩwaatʋ sakɩyɛ yɔ, pɩpɩzɩɣ nɛ pɩla se ɖɩwɛɛ nɛ ɖikiziɣ nʋmɔʋ ŋgʋ kɩ-yɔɔ Yehowa tɩŋɩɣna se ɛsɩnɩ-ɖʋ yɔ. Pʋyɔɔ lɛ, paa pɩwɛ kaɖɛ ɛzɩma yɔ, tisi nɛ ñɔ-hɔʋ taa mba, ña-taabalaa nɛ ɛgbɛyɛ taa ɛzʋtʋyaa sɩnɩ-ŋ alɩwaatʋ ndʋ ŋkatɩɣ kaɖɛ naɖɩyɛ yɔ. Kpaɣ-wɛ se pɔ-yɔɔ Yehowa wɛɛ nɛ ɛtɩŋɩɣna se ɛsɩnɩ-ŋ.—Adu. 17:17; Iza. 32:1, 2.
Yehowa “kaɣ labʋ nɛ ŋkpa ɖoŋ”?
19 Ɛzɩma ŋpɩzɩɣ ŋla nɛ ŋkpazɩ ñe-lidaʋ ɖoŋ? Ye ŋwɛnɩ lidaʋ se ŋkaɣ caɣʋ wezuu maatɛŋ tɛtʋ yɔɔ yɔ, kalɩɣ tɔm ndʋ Bibl yɔɔdʋʋ paradisuu yɔɔ yɔ nɛ ŋmaɣzɩɣ tɩ-yɔɔ. (Iza. 25:8; 32:16-18) Maɣzɩ ɛzɩma wezuu caɣʋ kaɣ wɛʋ ɛjaɖɛ kɩfaɖɛ taa yɔ pɩ-yɔɔ. Maɣzɩ se ŋwɛ ɛjaɖɛ kɩfaɖɛ nɖɩ ɖɩ-taa. Mba ŋnaɣ? Ɛbɛ taŋ ŋnɩɣ? Ɛzɩma pɩlakɩ-ŋ? Pɩsa nɛ ŋmaɣzɩ nɛ ŋna ɛzɩma paradisuu kaɣ wɛʋ yɔ lɛ, cɔnɩ paradisuu kɩlɛmɩŋ weyi ɩwɛ ɖɛ-ɛgbɛyɛ takayɩsɩ taa yɔ, yaa cɔnɩ minziiki tɛ video nakʋyʋ, ɛzɩ Ɛjaɖɛ kɩfaɖɛ nɖɩ ɖɩkaɣ kɔm yɔ, Pɩñɔtɩ kpam, yaa Maɣzɩɣ alɩwaatʋ ndʋ tɩ-yɔɔ mbʋ yɔ. Ye ɖɩkpakɩɣ alɩwaatʋ ɖoŋ ɖoŋ nɛ ɖɩmaɣzɩɣ ɛjaɖɛ kɩfaɖɛ yɔɔ yɔ, ɖa-kʋñɔmɩŋ kaɣ wɛʋ ɖɛ-ɛsɩndaa ɛzɩ mbʋ “pɩwɛ alɩwaatʋ pazɩ nɛ pɩtɩpaɣlɩ yɔ.” (2 Kɔr. 4:17) Lidaʋ ŋgʋ Yehowa ha-ŋ yɔ, kɩkaɣ yebu nɛ ŋkpa ɖoŋ.
Fezuu taa ñɩm
it «Kpɔnɔ» § 6
Kpɔnɔ
Kɩsɩŋnɩ nabʋyʋ. Ɛzɩma palabɩnɩ tʋmɩyɛ tɔm piye «kpɔnɔ» Bibl taa yɔ pɩsɩŋnɩ mbʋ yɔ pɩɖɔwa. Kɩɖaŋ nɩɩyɩ yɔ. Yozuwee nɛ Kalɛɛb peheyi Izrayɛɛlɩ mba se Kanaŋ mba ‘kɛ-ɖʋ kpɔnɔ;’ nɛ pɩwɛ ɛzɩ pɔ-tɔm ndʋ tɩwɩlɩɣ se papɩzɩɣ nɛ pawabɩ-wɛ kɛlɛʋ yem yɔ; nɛ wabɩtʋ ndʋ tɩkaɣ haʋ Izrayɛɛlɩ mba abalɩtʋ nɛ tɩkpazɩ-wɛ ɖoŋ. (Kɩg 14:9; pɩ-tɛɛ tɔm.) Keɣa 80:5 yɔɔdʋʋ Izrayɛɛlɩ ninɖiɣyu Yehowa yɔɔ se: «Ŋcɛlɩ-kɛ ɛsɩtɛɣlɩm nɛ pɩkɛ kɔ-kpɔnɔ;» nɛ pɩwɛ ɛzɩ tɔm ndʋ tɩwɩlɩɣ siziŋ weyi ɛyʋ nɩɣ mbʋ pʋyɔɔ yɔ Yehowa lɔ-ɩ yɔ. Pɔyɔɔdɩ Yehowa tɔm ɖɔɖɔ se ɛhaɣ ɛ-samaɣ «tɔɔnaɣ [yaa kpɔnɔ]» ɛzɩ kʋñɔŋ nɛ lɩm ɛzɩ nazɩm yɔ;» nɛ pɩtʋʋ fɛyɩ se tɔm ndʋ tɩwɩlɩɣ wɛtʋ ndʋ tɩ-taa pakaɣ wɛʋ alɩwaatʋ ndʋ pɛñɛyɩɣ pɛ-tɛtʋ yɔ; nɛ wɛtʋ ndʋ tɩkaɣ wɛʋ pɛ-ɛsɩndaa ɛzɩ tɔɔnaɣ nɛ lɩm yɔ.—Iza 30:20.
9-15 FÉVRIER
ÑƖM MBƲ PƖWƐ ƐSƆTƆM TAA YƆ IZAAYII 33-35
«Ɛnʋ yekina nɛ ña-alɩwaatʋ kaŋ camɩyɛ»
Yehowa kaɣ-ŋ sɩnʋʋ kaɖɛ alɩwaatʋ taa
7 Kaɖɛ. Alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ, ɛzɩma pɩlakɩ-ɖʋ yɔ, pɩpɩzɩɣ nɛ pɩwɛɛ ndɩ nɛ ɛzɩma pɩtɩɩlakɩ-ɖʋ yɔ; nɛ ɖa-lɩmaɣza nɛ ɖa-lakasɩ pɩzɩɣ ɖɔɖɔ nɛ pɩwɛɛ ndɩ nɛ ɛzɩma pɩtɩɩwɛɣ yɔ. Ɛzɩ helim sɔsɔm nabʋyʋ cɔzʋʋ mɛlɛ teŋgu yɔɔ nɛ piwokini-kʋ hɔɔlɩŋ tɩŋa taa yɔ, mbʋ ɖɔɖɔ ɖa-lɩmaɣza pɩzɩɣ nɛ alɛɣzɩɣ yem yem. Ana weyi ɛ-tɔm ɖɩyɔɔdaa nɛ pɩɖɛɛ yɔ, ɛyɔɔdaa se alɩwaatʋ ndʋ ɛ-walʋ Luis sɩba yɔ, lɩmaɣza ndɩ ndɩ kɔm ɛ-ñʋʋ taa. Ɛyɔɔdaa se: «Alɩwaatʋ ndʋ maawɛ laŋwɛɛkɩyɛ sɔsɔyɛ taa yɔ, mɔn-tɔm paɣzɩ-m labʋ pʋtɔdɩyɛ. Man-taa wɩɣaɣ ɖɔɖɔ se ɛɖɛwa nɛ eyebi-m.» Pɩtasɩ lɛ, pɩlakaɣ Ana ɛzɩ ɛwɛ e-ɖeke yɔ nɛ pɩcɛyaɣ-ɩ siŋŋ se lɛɛlɛɛyɔ lɛ, ɛnʋ pɩwɛɛ se ɛkpaɣ lɩmaɣza hɔɔlɩŋ weyi ɩ-taa Luis kpakaɣ lɩmaɣza camɩyɛ yɔ. Nabʋyʋ taa, pɩlakaɣ-ɩ ɛzɩ ɛwɛ helim sɔsɔm nabʋyʋ taa teŋgu yɔɔ yɔ. Ɛzɩma tɩyɛ Yehowa sɩɣnɩ-ɖʋ alɩwaatʋ ndʋ lɩmaɣza ana apaɣzɩɣ kɔm ɖa-ñʋʋ taa yɔ?
8 Ɛzɩma Yehowa sɩɣnɩ-ɖʋ? Yehowa labɩ-ɖʋ tamaɣ se ɛkaɣ yebu nɛ ɖɩka camɩyɛ. (Kalɩ Izaayii 33:6.) Alɩwaatʋ ndʋ helim sɔsɔm nabʋyʋ makɩ teŋgu yɔɔ yɔ, pɩpɩzɩɣ nɛ pɩpaɣzɩ cɔzʋʋ mɛlɛ hɔɔlɩŋ tɩŋa taa. Pɩsa nɛ mɛlɛnaa lʋbɩnɩ kaɖɛ nɖɩ lɛ, paɖʋʋ wondu natʋyʋ mɛlɛnaa sakɩyɛ hɔɔlɩŋ ɛnɩ ɩ-naalɛ ɩ-yɔɔ lɩm tɛɛ se pɩsɩnɩ-wɛ nɛ paka camɩyɛ. Wondu ndʋ tɩsɩɣnɩ mɛlɛ se pɩtaakɩlɩ-kʋ cɔzʋʋ; pɩkandɩyɩɣ mba pɛwɛ mɛlɛ taa yɔ pɔ-yɔɔ nɛ piyeki nɛ pɔɖɔ nʋmɔʋ camɩyɛ. Ɛlɛ pʋcɔ nɛ wondu ndʋ tɩla tʋmɩyɛ camɩyɛ lɛ, pɩwɛɛ se mɛlɛ ɛwɛɛ nɛ kɩɖɔŋ. Mbʋ ɖɔɖɔ, pʋcɔ nɛ Yehowa yele nɛ ɖɩka camɩyɛ lɛ, pɩwɛɛ se ɖiwolo pɩ-yɔɔ nɛ ɖɩsɛɣ-ɩ siɣsiɣ paa ɖɩkatɩɣ kala yɔ.
Ɛbɛ pɩzɩɣ pɩsɩnɩ-ŋ nɛ ŋtaalesi taa leleŋ alɩwaatʋ ndʋ ŋkatɩɣ takɩm yɔ?
10 Mbʋ pɩwɛɛ se ŋla yɔ: Pɔzɩ Yehowa se ɛha-ŋ lɔŋsɩnɖɛ. Ye ɖɩsɔɔlaa se ɖɩɖɔkɩ ɖa-tɩ takɩm taa nɛ taa leleŋ yɔ, kajalaɣ lɛ, pɩwɛɛ se ɖɩpɔzɩ Yehowa adɩma taa se ɛha-ɖʋ lɔŋsɩnɖɛ nɖɩ pɩpɔzʋʋ-ɖʋ yɔ nɛ ɖɩkpaɣ lɩmaɣza kɩbana. (Kalɩ Yakubu 1:5.) Ɛbɛ pɩwɛɛ se ɖɩla ye pɩlakɩ-ɖʋ ɛzɩ Yehowa eecosuu ɖa-adɩma yɔɔ kpaagbaa yɔ? Yakubu yɔɔdaa se “ɖɩwɛɛ nɛ ɖɩpɔzʋʋ Ɛsɔ.” Ye ɖiwobi pɩ-yɔɔ nɛ ɖɩpɔzʋʋ Yehowa lɔŋsɩnɖɛ yɔ, pɩɩkaɣ-ɩ nɩʋ. Ɛ-taa ɛɛkaɣ-ɖʋ wɩnʋʋ. Alɩwaatʋ ndʋ ɖɩtɩmɩɣnɩ ɖa-Caa weyi ɛwɛ ɛsɔdaa yɔ se ɛha-ɖʋ lɔŋsɩnɖɛ nɛ ɖɩɖɔkɩ ɖa-tɩ takɩm taa yɔ, ɛhaɣ-ɖʋ ɖɩ faaa. (Keɣ. 25:12, 13) Ɛnaɣ takɩm mbʋ pɩ-taa ɖɩwɛɛ yɔ. Ɛnɩɣ ɖe-siziŋ nɛ ɛsɔɔlɩ siŋŋ se ɛsɩnɩ-ɖʋ. Pɩtʋʋ fɛyɩ se piyeki se ɖa-taa ɛla leleŋ. Ɛlɛ, nʋmɔʋ ŋgʋ yɔɔ Yehowa tɩŋɩɣna nɛ ɛhaɣ-ɖʋ lɔŋsɩnɖɛ?
11 Yehowa tɩŋɩɣnɩ ɛ-Tɔm yɔɔ nɛ ɛhaɣ-ɖʋ lɔŋsɩnɖɛ. (Adu. 2:6) Pɩsa nɛ ɖɩwɛɛnɩ lɔŋsɩnɖɛ nɖɩ lɛ, pɩpɔzʋʋ se ɖɩkpɛlɩkɩ Ɛsɔtɔm nɛ ɛgbɛyɛ takayɩsɩ. Ɛlɛ pɩtasɩnɩ kpɛlɩkʋʋ lɛ pɩwɛɛ se ɖɩla nabʋyʋ. Pɩpɔzʋʋ se ɖɩla mbʋ Ɛsɔ pɔzʋʋ-ɖʋ yɔ. Yakubu mawa se: «Ɩpɩsɩ mba pɔɖɔŋ tɔm yɔɔ yɔ nɛ ɩtaakɛ welisiyaa ɖeke.» (Yak. 1:22) Alɩwaatʋ ndʋ ɖɩɖɔŋ Ɛsɔ lɔŋ tasʋʋ yɔɔ yɔ ɖɩpɩsɩɣ laŋhɛzɩyɛ tɩnaa, ɖɩnɩɣ tɔm taa, nɛ ɖɩkɛɣ pʋtɔdɩyɛ nayaa nɛ pɩkɩlɩ. (Yak. 3:17) Wɛtʋ kɩbandʋ tʋnɛ tɩsɩɣnɩ-ɖʋ se ɖɩpɩzɩ nɛ ɖɩlʋbɩnɩ paa takɩm mbʋ nɛ ɖitaalesi ɖa-taa leleŋ.
ip-1 352-355 § 21-22
«Mba pɛwɛ peeɖe yɔ pa-taa nɔɔyʋ ɛɛkaɣ yɔɔdʋʋ se: “Pɩwɩɣ-m.”»
21 Ɛlɛ Izaayii natʋ tɔm ndʋ tɩlabɩ ɖɔɖɔ ɖa-alɩwaatʋ taa. Yehowa wa ɛ-samaɣ ŋga kɛwɛ sɔnɔ yɔ fezuu taa. Eholi-kɛ cɛtɩm wɩlɩtʋ ndɩ ndɩ yomiye taa; tɩ-taa natʋyʋ lɛ kalɩzaɣ maasɩkɩ wɩlɩtʋ, Trinita wɩlɩtʋ nɛ miŋ maatɛŋ wɩlɩtʋ. Ɛwɩlɩɣ-kɛ ɛzɩma kacaɣ wezuu kɩbaŋʋ yɔ nɛ piholuu-kɛ lakasɩ kɩdɛkɛdɩsɩ labʋ yomiye taa nɛ pɩsɩɣnɩ-kɛ se kakpaɣ lɩmaɣza kɩbana. Nɛ pɩtɩŋnɩ kɩhɛyʋʋ pʋ-ñʋʋ taa kɩlaʋ yɔɔ lɛ ka-taa mba pɩzɩɣ nɛ paɖʋ taabalɩyɛ nɛ Ɛsɔ nɛ pɛwɛɛnɩ ɛhʋyɛ kele kele ñɩnɖɛ ɛ-ɛsɩndaa. (Koloosi mba 1:13, 14; 1 Pɩyɛɛrɩ 2:24; 1 Yohanɛɛsɩ 4:10) Ɛwa-wɛ fezuu taa waʋ mbʋ yɔ, pɩkɔŋnɩ-wɛ wazasɩ tomnaɣ yɔɔ ɖɔɖɔ. Kɩɖaʋ nakʋyʋ yɔ. Krɩstʋ mba ɩɩcakɩ kʋzʋʋ kɩdɛkɛdʋʋ wezuu nɛ paañɔʋ tabakʋʋyaɣ, nɛ piyeki nɛ pɛfɛɣ kʋdɔmɩŋ weyi ɩwɛ kʋzʋʋ kɩdɛkɛdʋʋ wezuu caɣʋ taa yɔ nɛ kansɛɛrɩ kʋdɔmɩŋ nɩɩyɩ.—1 Kɔrɛntɩ mba 6:18; 2 Kɔrɛntɩ mba 7:1.
22 Pɩtasɩ lɛ, Armaagedɔɔ you wayɩ ɛjaɖɛ kɩfaɖɛ taa lɛ Izaayii 33:24 taa tɔm lakɩ nɛ pɩkpaɖɩ. Mesiya Kewiyaɣ tɛɛ, pakaɣ waʋ ɛyaa tomnaɣ yɔɔ nɛ fezuu taa nɛ pɩkpaɖɩ. (Natʋ 21:3, 4) Paɖɩzɩɣ Sataŋ ɛjaɖɛ nɛ pɩla alɩwaatʋ pazɩ lɛ, pɩtʋʋ fɛyɩ se pakaɣ labʋ maamaaci lakasɩ ɛjaɖɛ kpeekpe ɛzɩ nzɩ Yesu kaalaba alɩwaatʋ ndʋ ɛɛwɛ tɛtʋ yɔɔ yɔ. Yʋlʋmaa kaɣ naʋ, tandamaa kaɣ nɩʋ, kaakalasɩ kaɣ ɖɔm. (Izaayii 35:5, 6) Pɩkaɣ yebu nɛ mba pehikiɣ ñʋʋ yabʋ kʋñɔŋ sɔsɔʋ taa yɔ paɖʋ nesi nɛ pala tʋmɩyɛ nɛ tɛtʋ pɩsɩ paradisuu.
Fezuu taa ñɩm
Wɛɛ nɛ ŋɖɔŋ ‘habɩyɛ kiɖeɖeye’ yɔɔ
8 Nabɛyɛ pɩzɩɣ nɛ pɔyɔɔdɩ se: «Pɩtɩŋa payɩ mbʋ yɔ pɩkɛ tɔm kɩbandʋ kpem, ɛlɛ mbʋ pɩtalɩ Yuuda mba ɖooo caanaʋ taa yɔ, ɛzɩ pitukuuni-ɖʋ sɔnɔ?» Ɛɛɛ pitukuuni-ɖʋ mbʋ pʋyɔɔ yɔ mbʋ ɖɩwɛɛ nɛ ɖɩlakɩ sɔnɔ yɔ, papɩzɩɣ nɛ pakpaɣ-pʋ nɛ pamaɣzɩnɩ habɩyɛ kiɖeɖeye yaa «Kele kele wɛtʋ habɩyɛ» yɔɔ ɖɔm. Paa ɖɩkɛ patam num yaa «heŋ lɛɛŋ» taa tʋ yɔ, pɩpɔzʋʋ se ɖiwolo pɩ-yɔɔ nɛ ɖɩwɛɛ «Kele kele wɛtʋ habɩyɛ» yɔɔ; pɩkaɣ-ɖʋ sɩnʋʋ nɛ ɖiwolo pɩ-yɔɔ nɛ ɖɩsɛɣ Yehowa lɛɛlɛɛyɔ nɛ cee wayɩ alɩwaatʋ ndʋ Ɛsɔ Kewiyaɣ kaɣ ñɔɔzʋʋ tɛtʋ nɛ tɩwɛɛ ɖeu yɔ. (Yoh. 10:16) Kpaɣnɩ pɩnaɣ 1919, abalaa, halaa nɛ piya miiliyɔɔwaa sakɩyɛ lɩ Babilɔɔnɩ Sɔsɔʋ, pʋ-tɔbʋʋ lɛ se ɛjaɖɛ yɔɔ cɛtɩm Ɛsɔ sɛtʋ agbaa kɩgbɛndʋʋ taa nɛ papaɣzɩ ɖɔm habɩyɛ nɖɩ ɖɩ-yɔɔ. Pɩtɩla ŋwɛ pa-taa. Ɛyaa paɣzʋʋ ɖɔm habɩyɛ nɖɩ ɖɩ-yɔɔ yɔ pɩlakɩ ɛzɩ pɩnzɩ 100 mbʋ yɔ, ɛlɛ ɛyaa lalaa paɣzɩ ñɔɔzʋʋ habɩyɛ nɖɩ pɩnzɩ sakɩyɛ pʋcɔ nɛ pɩtalɩɣ mbʋ.
16-22 FÉVRIER
ÑƖM MBƲ PƖWƐ ƐSƆTƆM TAA YƆ IZAAYII 36-37
«Sɔɔndʋ ɛtaakpa-ŋ nɛ tɔm ndʋ ŋnɩwa yɔ»
it «Ezekiyaasɩ» No. 1 § 14
Ezekiyaasɩ
Senakeribʋ tɩpɩzɩ nɛ ɛmʋ Yeruzalɛm tɛtʋ. Ɛzɩ Ezekiyaasɩ kaamaɣzʋʋ yɔ, Senakeribʋ kaatɛm ɛ-taa se ewoki nɛ eyooni Yeruzalɛm tɛtʋ. Senakeribʋ nɛ ɛ-sɔɔjanaa paawɛɛ nɛ poyouni Lakisi tɛtʋ ɖoŋ ñɩndʋ lɛ, etiyi ɛ-sɔɔjanaa hɔɔlʋʋ lɛɛkʋ nɛ ɛ-sɔɔjanaa ñʋndɩnaa nabɛyɛ se powolo nɛ peheyi Yeruzalɛm mba se paɖʋzɩ pa-tɩ pe-nesi tɛɛ. Weyi ɛɖɛ mba petiyaa yɔ nɔɔ yɔ ɛɛkɛ Rabɩsakee (pɩtɩkɛ ɛ-hɩɖɛ lɛ, ɛlɛ pɩkɛ hɩɖɛ kɩsɛsɛyɛ nɖɩ ɛwɛnɩ sɔɔjatʋ tʋmɩyɛ taa yɔ), ɛyɔɔdaɣ Ebree kʋnʋŋ kpayɩ kpayɩ. Ɛyɔɔdɩnɩ nɔɔ kɩkʋyaɣ nɛ ehoŋ Ezekiyaasɩ nɛ ɛtʋʋ Yehowa. Ɛyɔɔdɩnɩ tɩ kpazʋʋ se ajɛɛ lɛɛna ɛsɔnaa tɩpɩzɩ nɛ poholi pɛ-sɛyaa Asiirii mba wiyaʋ nesi tɛɛ, nɛ mbʋ ɖɔɖɔ Yehowa ɛɛkaɣ pɩzʋʋ nɛ eholi Yeruzalɛm Asiirii mba wiyaʋ nesi tɛɛ.—2Aw 18:13-35; 2Kr 32:9-15; Iza 36:2-20.
ip-1 387 § 10
Pawazɩ wiyaʋ nɔɔyʋ e-tisuu yɔɔ
10 Pʋwayɩ lɛ Rabɩsakee tɔzɩ Yuuda mba se pɔ-sɔɔjanaa kɛ kaabɩzasɩ. Ɛyɔɔdɩnɩ tɩ kpazʋʋ se: «Mankaɣ-ŋ cɛlʋʋ kpaŋnaŋ 2000, ye ŋpɩzɩɣ se ŋhiɣ ɩ-tɩŋa ɩ-yɔɔ caɣyaa yɔ.» (Izaayii 36:8) Ɛlɛ toovenim taa lɛ, ɛzɩ pɩɩcɛyaa se Yuuda mba ɩwɛɛnɩ kpaŋnaŋ caɣyaa mba pafalɩsɩ-wɛ yɔ sakɩyɛ yaa pazɩ? Aayɩ, mbʋ pʋyɔɔ yɔ Yuuda mba ñʋʋ yabʋ ɛɛlɩɣnɩ pɔ-sɔɔjanaa ɖoŋ cɔlɔ na. Aduwa 21:31 lɩzɩ pɩ-taa se: «Pɔñɔɔzʋʋ kpaŋnʋ nɛ paɖaŋnɩ you evemiye, ɛlɛ Yehowa cɔlɔ ñʋʋ yabʋ lɩɣna.» Pʋwayɩ lɛ Rabɩsakee yɔɔdɩ se Yehowa wazaɣ wɛ Asiirii mba yɔɔ na ɛlɛ pɩtɩkɛ Yuuda mba yɔɔ. Halɩ ɛyɔɔdaa se ye pɩtaakɛ mbʋ yɔ Asiirii mba taapɩzɩ kpa nɛ pasʋʋ Yuuda ɛjaɖɛ taa mbʋ.—Izaayii 36:9, 10.
ip-1 388 § 13-14
Pawazɩ wiyaʋ nɔɔyʋ e-tisuu yɔɔ
13 Rabɩsakee tasɩ tɔm lɛɛtʋ yɔɔdʋʋ se eyele nɛ pitii Yuuda mba yɔɔɔ. Ɛpaɣ-wɛ se pataataa liu tɔm ndʋ Ezekiyaasɩ heyiɣ-wɛ se ‘Yehowa kaɣ-wɛ holuu’ yɔ. Rabɩsakee tɔzɩ Yuuda mba se Samaarii mba ɛsɔnaa tɩpɩzɩ nɛ pohuuzi cejewe hiu yɔɔ se Asiirii mba ɩtaawabɩ-yɛ. Nɛ ajɛɛ lɛɛna wena Asiirii mba waba yɔ a-ɛsɔnaa lɛ, ɛpɔzɩ pɔ-tɔm se: «Le Hamatɩ nɛ Arpaadɩ pɛ-ɛsɔnaa wɛɛ? Le Sefarɩvayim ɛsɔnaa wɛɛ? Ɛzɩ poholi Samaarii me-nesi tɛɛ?»—Izaayii 36:18-20
14 Toovenim taa lɛ, Rabɩsakee kaakɛ cɛtɩm ɛsɔnaa sɛyʋ nɛ pʋyɔɔ lɛ etaaɖiɣzina se tʋkaɣ sɔsɔɔ wɛ Samaarii ñɩma mba pɛkɛ tisuu yebiyaa yɔ nɛ Yeruzalɛm pɛ-hɛkʋ taa Ezekiyaasɩ kewiyitu tɔɔʋ alɩwaatʋ taa. Samaarii mba cɛtɩm ɛsɔnaa fɛyɩnɩ ɖoŋ se poholi cejewe hiu. (2 Awiya 17:7, 17, 18) Ezekiyaasɩ kewiyitu tɔɔʋ tɛɛ lɛ, Yeruzalɛm mba kaaha siɣye cɛtɩm ɛsɔnaa nɛ papaɣzɩ sɛʋ Yehowa. Ɛlɛ Yuuda ñɩma 3 mba Ezekiyaasɩ kaatiyaa yɔ patiheyi tɔm ndʋ Rabɩsakee. «Posu ɖiɣ ɖiɣ nɛ paticosi-i tɔm natʋyʋ, mbʋ pʋyɔɔ yɔ wiyaʋ kaaɖʋ-wɛ paɣtʋ tʋnɛ: “Pɩtɩpɔzɩ se icosi-i.”» (Izaayii 36:21) Eliyaakim, Sebɩna nɛ Yoowaa papɩsɩ Ezekiyaasɩ cɔlɔ nɛ pɛkɛdɩ-ɩ tɔm ndʋ Rabɩsakee yɔɔdaa yɔ.—Izaayii 36:22.
Fezuu taa ñɩm
it «Kpaŋnaŋ nɔsɩ yɔɔ ñɩɣtʋ» § 4
Kpaŋnaŋ nɔsɩ yɔɔ ñɩɣtʋ
Yehowa heyi Asiirii Wiyaʋ Senakeribʋ se: «Mankaɣ ɖʋʋ mon-kokooye ñɔ-mɔɔʋ tɛɛ nɛ manɖʋ kpaŋnaŋ nɔsɩ yɔɔ ñɩɣtʋ ño-ndomee hɛkʋ taa, nɛ mankaɣ-ŋ pɩsɩnʋʋ nɛ nʋmɔʋ ŋgʋ ŋtɩŋnaa nɛ ŋkɔɔ yɔ.» (2Aw 19:28; Iza 37:29) Senakeribʋ tɩñɛyɩ Yeruzalɛm se eyooni-kʋ ɛzɩ ɛɛɖʋʋ ɛ-taa yɔ ɛlɛ ɛpɩsɩ Niniivi; pɩtɩkɛ ɛ-maɣmaɣ ɛ-sɔɔlɩm taa ɛlɛ Yehowa yebina nɛ pɩkɛnɩ-ɩ kɩjɛyʋʋ se ɛla mbʋ. Ɛpɩsaa nɛ pɩla alɩwaatʋ natʋyʋ lɛ, ɛ-pɩyalaa maɣmaɣ kʋ-ɩ. (2Aw 19:32-37; Iza 37:33-38) Yehowa yɔɔdʋʋ se ɛɖʋʋ e-koyindinaa lɩkpaɣzasɩ taa kpaŋnaŋ nɔsɩ yɔɔ ñɩɣyʋʋ yɔ, pɩwɩlɩɣ se ɛwɛnɩ ɖoŋ kiya pɔ-yɔɔ ɛzɩ kpaŋnaŋ nɔsɩ yɔɔ ñɩɣtʋ wɛɣnʋʋ ɖoŋ kpɩna yɔɔ yɔ.—Iza 30:28.
23 FÉVRIER–1er MARS
ÑƖM MBƲ PƖWƐ ƐSƆTƆM TAA YƆ IZAAYII 38-40
«Ɛzɩ ninɖiɣyu yɔ, ɛkaɣ cɔnʋʋ e-ewiɖe yɔɔ»
Tɔm ndʋ Bibl wɩlɩɣ-ɖʋ weyi ɛ-cɔlɔ kɩlɩnaa yɔ ɛ-yɔɔ?
3 Kalɩ Izaayii 40:8. Pɩlakɩ pɩnzɩ kudokiŋ sakɩyɛ yɔ, Ɛsɔtɔm wɛʋ nɛ tɩtasɩɣ lɔŋ kɩbaŋ abalaa nɛ halaa siɣsiɣ tɩnaa yɔ. Ɛzɩma pɩɖɔma? Toovenim taa lɛ, pamaʋ Masɩ taa tɔm yɔ pɩlakɩ pɩnzɩ sakɩyɛ yɔ, nɛ wondu ndʋ tɩwɛɛkɩɣ yɔ tɩ-yɔɔ paama-tʋ; pʋyɔɔ lɛ sɔnɔ, wondu ndʋ tɩ-yɔɔ paama tɔm ndʋ kiɖe tɛɛ yɔ, tɩ-taa nakʋyʋ fɛyɩ. Ɛlɛ Yehowa yeba nɛ paɖaɣnɩ maʋ masɩ kiɖeɖesi nzɩ takayɩsɩ lɛɛsɩ yɔɔ. Ɛyaa mba paɖaɣnɩ tɔm ndʋ maʋ nɛ nesi takayɩsɩ lɛɛsɩ yɔɔ yɔ, paa patɩtalɩ pilim yɔ pañaɣ pana siŋŋ se pitaayiɣdi-wɛ. Bibl taa tazɩyʋ nɔɔyʋ yɔɔdaɣ Ebree Masɩ tɔm lɛ, ɛtɔm se: «Papɩzɩɣ nɛ pɔyɔɔdɩnɩ laŋɩyɛ kpayɩ se caanaʋ taa takayɩsɩ taa payɩ lɛ, masɩ nzɩ si-ɖeke sɩtalɩnɩ-ɖʋ nɛ sɩ-taa tɔm tɩlɛɣzɩ.» Ye mbʋ, paa alɩwaatʋ ɛɖɛwa, paa wondu ndʋ palabɩnɩ tʋmɩyɛ yɔ tɩwɛɛkɩɣ, nɛ paa mba paɖaɣnɩ tɔm maʋ nɛ nesi yɔ patɩtalɩ pilim yɔ, ɖa-taa pɩzɩɣ nɛ pɩtɛ se tɔm ndʋ ɖɩkalɩɣ Bibl taa sɔnɔ yɔ, tɩkɛ Yehowa lɩmaɣza; nɛ ɛ-cɔlɔ Bibl lɩnaa.
4 Yehowa cɔlɔ «paa kʋjɔʋ kɩbaŋʋ ŋgʋ nɛ paa haɖɛ pilim ñɩnɖɛ nɖɩ lɛ,» ɖɩlɩɣna. (Yak. 1:17) Kʋjɔŋ weyi Yehowa labɩ-ɖʋ nɛ ɩwɛɛ ɖeu nɛ pɩkpaɖɩ yɔ, ɩ-taa nakʋyʋ lɛ Bibl. Alɩwaatʋ ndʋ nɔɔyʋ lakɩ-ɖʋ kʋjɔʋ nakʋyʋ yɔ, kɩwɩlɩɣ-ɖʋ se ɛsɩm-ɖʋ camɩyɛ nɛ ɛsɩm ɖɔɖɔ ɖa-kɩcɛyɩm. Tɔm ndʋ tɩkɛ toovenim ɖɔɖɔ weyi ɛha-ɖʋ Bibl yɔ ɛ-hɔɔlʋʋ taa. Alɩwaatʋ ndʋ ɖɩtazɩɣ Bibl taa yɔ, ɖɩkpɛlɩkɩɣ tɔm sakɩyɛ Yehowa yɔɔ. Ðɩkpɛlɩkɩɣ se ɛsɩm-ɖʋ nɛ ɛsɩm ɖɔɖɔ ɖa-kɩcɛyɩm camɩyɛ. Tɔm ñʋʋ kʋnɛ kɩ-taa, ɖɩkaɣ naʋ tɔm ndʋ Bibl yɔɔdʋʋ Yehowa wɛtʋ 3 tʋnɛ tɩ-yɔɔ yɔ: ɛ-lɔŋsɩnɖɛ, e-siɣsiɣ wɛtʋ nɛ ɛ-sɔɔlɩm. Kajalaɣ taa lɛ, iyele nɛ ɖɩna ɛzɩma Bibl wɩlɩɣ se Ɛsɔ wɛnɩ lɔŋsɩnɖɛ yɔ.
cl 70 § 7
Ðoŋ weyi ɛkandɩyɩɣ ɖɔ-yɔɔ yɔ—«Ɛsɔ kɛnɩ ɖa-ɖɩjɔzɩyɛ»
7 Yehowa kpaɣ ɛ-tɩ nɛ ɛmaɣzɩnɩ ninɖiɣyu, nɛ ɛtɩŋnɩ nʋmɔʋ ŋgʋ kɩ-yɔɔ se eyele nɛ ɖa-taa tɛ se ɛsɔɔlɩ siŋŋ se ɛkandɩyɩ ɖɔ-yɔɔ. (Ezekɩyɛɛlɩ 34:11-16) Tɔzɩ tɔm ndʋ pɔyɔɔdɩ Yehowa yɔɔ Izaayii 40:11 taa yɔ tɩ-yɔɔ; patazɩ tɩ-taa takayaɣ kanɛ ka-ñʋʋ 2 taa. Pɔyɔɔdaa se: «Ɛzɩ ninɖiɣyu yɔ, ɛkaɣ cɔnʋʋ e-ewiɖe yɔɔ. Ɛkaɣ kpeɣluu heɣsi nɛ ɛ-nɩŋgbɛɛŋa, nɛ ɛkaɣ-sɩ kpaɣʋ ɛ-nɔkɔyʋʋ taa.» Ɛzɩma pɩɖɔŋ nɛ heɣa wɛɛ ninɖiɣyu «nɔkɔyʋʋ» taa, e-toko kɩtɩnʋʋ taa? Kapɩzɩɣ nɛ kɔñɔtɩnɩ ninɖiɣyu, nɛ halɩ kɔyɔkʋʋ-ɩ ka-ñʋʋ se ɛna se kɛwɛɛ. Ɛlɛ ninɖiɣyu pɩwɛɛ se eluŋ, ɛkpaɣ heɣa ŋga nɛ ɛnʋʋ-kɛ ɛ-nɔkɔyʋʋ taa nɛ sɔɔlɩm nɛ kɛwɛɛ pɛɛyɛ taa. Pɩkɛ kɩɖaʋ ŋgʋ kitukuuni-ɖʋ siŋŋ yɔ; kɩwɩlɩɣ ɛzɩma ɖe-Ninɖiɣyu Sɔsɔ sɔɔlɩ faaa se ehuuzi ɖɔ-yɔɔ nɛ ɛkandɩyɩ ɖɔ-yɔɔ yɔ!
‘Ɛkpazɩɣ weyi ehowa yɔ ɖoŋ’
4 Kalɩ Izaayii 40:26. Wiɖiyi nɔɔyʋ tɩpɩzɩ nɛ ɛkalɩ tɩɩnzɩ nzɩ sɩwɛ kedeŋa yɔɔ yɔ. Lɛɣtʋ ñɩnɩyaa maɣzɩɣ se tɩɩnzɩ tindimiye nɖɩ ɖɩ-taa tɛtʋ wɛɛ yɔ ɖɩ-taa, tɩɩnzɩ ɛzɩ miiliyaarɩwaa 400 mbʋ yɔ wɛna. Ɛlɛ paa tɩɩŋa ŋga lɛ, Yehowa ha-kɛ hɩɖɛ. Lɔŋ weyi pɩkpɛlɩkɩɣ-ɖʋ? Ye Yehowa ɛmaɣzɩɣ wondu ndʋ tiifeziɣ yɔ tɩ-yɔɔ yɔ, pɩtʋʋ fɛyɩ se ña weyi ŋsɛɣ-ɩ nɛ sɔɔlɩm faaa yɔ, ɛmaɣzɩɣ ñɔ-yɔɔ pɩdɩɩfɛyɩ nɛ ñɔ-tɔm kɛdɩɣnɩ-ɩ. (Keɣ. 19:1, 3, 14) Ða-Caa kʋsɔɔlʋ sɩm wɛtʋ ndʋ tɩ-taa ɖeyi ɖeyi ŋwɛɛ yɔ. Halɩ ɛsɩm “ña-ñʋʋ taa ñɔsɩ tɩŋa.” (Mat. 10:30) Keɣa maɖʋ ha-ɖʋ lidaʋ se: «Yehowa sɩm kaɖɛ nɖɩ ɛyaa mba pɛfɛyɩnɩ kɩwɛɛkɩtʋ natʋyʋ yɔ pakatɩɣ yɔ.» (Keɣ. 37:18) Toovenim Yehowa ɖiɣni kʋñɔmɩŋ weyi ŋkatɩɣ yɔ naʋ nɛ ɛpɩzɩɣ nɛ ɛsɩnɩ-ŋ nɛ ɛkpazɩ-ŋ ɖoŋ nɛ ŋlʋbɩnɩ ɩ-tɩŋa.
5 Kalɩ Izaayii 40:28. Yehowa kɛnɩnɩ ɖoŋ tɩŋa tʋ. Maɣzɩ ɖoŋ sɔsɔŋ weyi Yehowa labɩnɩ wɩsɩ yɔ ɩ-yɔɔ nɛ ŋna. Lɛɣtʋ ñɩnɩyʋ weyi payaɣ se David Bodanis yɔ ɛkɛdaa se: «Ðoŋ weyi wɩsɩ lɩzɩɣ nɛ pɩhaɣ pɩñalɩmɩyɛ kɛlɛm kʋɖʋmʋʋ taa yɔ, papɩzɩɣ nɛ pakpaɣ-ɩ nɛ pamaɣzɩnɩ bɔmbɩwaa miiliyaarɩwaa sakɩyɛ ɖoŋ.» Lɛɣtʋ ñɩnɩyʋ lɛlʋ ñalabɩ akɔnta se ɖoŋ weyi wɩsɩ haɣ kɛlɛm kʋɖʋmʋʋ taa yɔ, papɩzɩɣ nɛ palabɩnɩ-ɩ tʋmɩyɛ nɛ pɔcɔnɩ kedeŋa kpeekpe yɔɔ ɛyaa kɩcɛyɩm ɖeɖe ɛzɩ pɩnzɩ 200000 mbʋ yɔ! Ðɩɩpɩtɩɣ se weyi ɛlabɩ wɩsɩ nɛ «ɖoŋ» ɛnɩ yɔ, ɛpɩzɩɣ nɛ ɛkpazɩ-ɖʋ ɖoŋ nɛ ɖɩlʋbɩnɩ kala wena ɖɩkatɩɣ yɔ.
6 Kalɩ Izaayii 40:29. Yehowa sɛtʋ haɣnɩ taa leleŋ siŋŋ. Yesu heyi ɛ-tɔmkpɛlɩkɩyaa se: «Ɩkpaɣ man-sʋʋtʋ ɖaʋ nɛ ɩhɔɔlɩ.» Nɛ ewolo pʋyɔɔ nɛ eheyi-wɛ se: «Ɩkaɣ hiɣu laŋɩyɛ hɛzʋʋ. Mbʋ pʋyɔɔ yɔ man-sʋʋtʋ ɖaʋ fɛyɩ yuŋ, nɛ man-sʋʋtʋ wɛ hʋnjaŋ.» (Mat. 11:28-30) Tɔm tʋnɛ tɩkɛ toovenim. Nabʋyʋ taa pɩpɩzɩɣ nɛ pɩwɛɛ-ɖʋ feendu se ɖiwolo kediɣzaɣ nakɛyɛ yaa ɖɩlɩɩ tɔm susuu. Ɛlɛ ye ŋñaɣ pana nɛ ŋwolo yɔ, alɩwaatʋ ndʋ ŋpɩsɩɣ ɖɩɣa yɔ, ɛzɩma pɩlakɩ-ŋ? Pɩtʋʋ fɛyɩ se pɩhaɣ-ŋ laŋhɛzɩyɛ nɛ pɩsɩɣnɩ-ŋ ɖɔɖɔ se ŋñɔɔzɩ ña-tɩ camɩyɛ nɛ ŋlʋbɩnɩ kala wena ŋɖiɣni katʋʋ ñe-wezuu caɣʋ taa yɔ. Toovenim, Yesu sʋʋtʋ sɩɣlʋʋ fɛyɩ kaɖɛ!
Fezuu taa ñɩm
ip-1 400 § 7
«Ɩhɛzɩ man-samaɣ laŋɩyɛ»
7 Pɩtɩkɛ alɩwaatʋ ndʋ Yehowa yeba nɛ Izrayɛɛlɩ mba lɩɩnɩ yomiye taa nɛ papɩsɩ Yeruzalɛm pɩnzɩ mɩnʋʋ 6 P.P.Y. yɔ tɩ-taa ɖeke natʋ tɔm ndʋ tɩlaba. Tɩ-hɔɔlʋʋ nakʋyʋ laba ɖɔɖɔ kajalaɣ pɩnzɩ mɩnʋʋ taa. Izaayii 40:3 yɔɔdaa se nɔɔyʋ nɔɔ «ɖiɣni mabʋ kubusi kañɩmbusuu taa;» pʋdʋ ɛnʋ lɛ Yohanɛɛsɩ Lɩm Mɩyɩsɩyʋ. (Luka 3:1-6) Fezuu kiɖeɖeu ɖiyi Yohanɛɛsɩ nɛ ɛyɔɔdɩ se ɛ-yɔɔ natʋ ndʋ tɩlaba. (Yohanɛɛsɩ 1:19-23) Kpaɣnɩ pɩnaɣ 29 lɛ, Yohanɛɛsɩ paɣzɩ ñɔɔzʋʋ nʋmɔʋ Yesu Krɩstʋ. Tɔm ndʋ Yohanɛɛsɩ susaa yɔ, tiseɣti ɛyaa se paɖaŋ Mesiya weyi ɛ-tɔm paayɔɔdaa yɔ, nɛ ɛkɔŋ lɛ pewelisini-i nɛ patɩŋɩ-ɩ. (Luka 1:13-17, 76) Yehowa kaɣ tɩŋnʋʋ Yesu yɔɔ nɛ eɖiyi mba pekpiɖiɣ yɔ nɛ pehiɣ tɩ-yɔɔ wɛʋ mbʋ Ɛsɔ Kewiyaɣ ɖeke haɣna yɔ, pʋ-tɔbʋʋ se eholuu-wɛ kɩwɛɛkɩm nɛ sɩm yomiye taa. (Yohanɛɛsɩ 1:29; 8:32) Pɩnaɣ 1919 taa poholi fezuu taa Izrayɛɛlɩ taa ñɩma mba pɩkazaa yɔ Babilɔɔnɩ sɔsɔʋ yomiye taa nɛ paɖaɣnɩ paɣzʋʋ kele kele Ɛsɔ sɛtʋ, piyeba nɛ tɔm ndʋ Izaayii yɔɔdaa yɔ tɩla nɛ pɩkpaɖɩ.