Ɛgbɛyɛ taa kediɣzisi labʋ pɩtɩŋnɩ visioconférence yɔɔ

Ɛjaɖɛ yɔɔ kominawaa sakɩyɛ ɖʋ paɣtʋ se ɛyaa ɩtaakɩlɩɣ ñɔtɩnʋʋ ɖama nɛ pataakpeɣliɣ ɖɔɖɔ. Yehowa Aseɣɖe Tɩnaa ɖʋ pa-taa se pañaŋ kominawaa paɣtʋ, paa pɩwɛɛ se powolo pɩ-yɔɔ nɛ palakɩ kediɣzisi yɔ. Pʋyɔɔ agbaa tɩŋɩɣnɩ Zoom nɛ visioconférence nʋmʋŋ lɛɛŋ yɔɔ nɛ alakɩ kediɣzisi.

Pɩsa nɛ ɖɩlakɩ kediɣzisi nzɩ sɩmʋnaa yɔ ɖoŋ ɖoŋ lɛ, Nɔɔɖɛyaa Ɛgbɛyɛ ha nʋmɔʋ se pakpaɣ haɖɛ nɖɩ koobiya lakɩ yɔ, ɖɩ-hɔɔlʋʋ nakʋyʋ nɛ payabɩnɩ Zoom nɛ agbaa tɩŋɩɣnɩ pɩ-yɔɔ nɛ alakɩ kediɣzisi. Pɩsɩnɩ agbaa wena afɛyɩnɩ liidiye se ahɛyɩ Zoom ŋgʋ kɩlakɩ tʋmɩyɛ camɩyɛ yɔ kɩ-yɔɔ yɔ. Pɩpɔzʋʋ liidiye CFA waa ɛzɩ 8 265 nɛ piwolo 11 020 mbʋ yɔ, pʋcɔ nɛ paya Zoom ŋgʋ. Agbaa naayɛ lakaɣnaɣ tʋmɩyɛ Zoom ŋgʋ paahɛyɩɣ kɩ-yɔɔ yɔ, ŋgʋ Zoom ŋgʋ, patɩkandɩyɩ kɩ-yɔɔ camɩyɛ, nɛ ɛyaa sakɩyɛ ɩɩpɩzɩɣ nɛ patɩŋnɩ kɩ-yɔɔ nɛ pala kediɣzaɣ alɩwaatʋ kʋɖʋmtʋ taa. Zoom ŋgʋ ɛgbɛyɛ yaba yɔ, pakandɩyɩ kɩ-yɔɔ camɩyɛ, nɛ ɛyaa sakɩyɛ pɩzɩɣ patɩŋnɩ kɩ-yɔɔ nɛ pala kediɣzisi camɩyɛ. Agbaa wena atɩŋnɩ Zoom ŋgʋ kɩ-yɔɔ nɛ ala kediɣzisi nɛ pɩkɔɔ pɩtalɩ sɔnɔ yɔ, acɛzɩ 65 000 nɛ awɛ ajɛɛ wena acɛzɩ 170 yɔ a-taa.

Ɛndoneezii ɛjaɖɛ taa, Kairagi ɛgbɛyɛ nɖɩ ɖɩwɛ Manado, Sulawesi hayo kiŋ yɔ, ɖiyebi labɩnʋʋ tʋmɩyɛ Zoom ŋgʋ paahɛyɩɣ kɩ-yɔɔ yɔ, nɛ ɖɩpaɣzɩ labɩnʋʋ tʋmɩyɛ ŋgʋ ɛgbɛyɛ yaba yɔ. Koobu Hadi Santoso yɔɔdaa se: “Halɩ koobiya halaa nɛ abalaa mba paasɩŋ labɩnʋʋ tʋmɩyɛ camɩyɛ pɔrtaabɩlɩwaa nɛ taabɩlɛɛtɩwaa yɔ, lɛɛlɛɛyɔ panɩɣ leleŋ siŋŋ kediɣzisi taa mbʋ pʋyɔɔ yɔ, ɛzɩma Zoom ɛɛcɛkɩ yɔ pɩ-yɔɔ lɛ, pɩtɩtasɩ cɛyʋʋ se pasɩnzɩ kediɣzaɣ nɛ paɖaɣnɩ-kɛ paɣzʋʋ.”

Lester Jijón,Jr., kɛ ɛzʋtʋyʋ Guayacanes Oeste ɛgbɛyɛ nɖɩ ɖɩwɛ Guayaquil, Ekʋwatɛɛrɩ ɛjaɖɛ taa yɔ ɖɩ-taa. Ɛyɔɔdaa se: “Ɛzɩma liidiye tɔm wɛ kaɖɛ koobiya sakɩyɛ yɔ pʋyɔɔ lɛ, pɩɩwɛ kaɖɛ agbaa naayɛ se apɩzɩ nɛ aya Zoom ŋgʋ kiyeki se ɛgbɛyɛ kpeekpe ɛpɩzɩ nɛ ɖɩla kediɣzaɣ yɔ. Lɛɛlɛɛyɔ, ɖɩsɛɣ ɛgbɛyɛ mbʋ pʋyɔɔ yɔ, ɖɩwɛnɩ Zoom ŋgʋ kiyeki se ɛgbɛyɛ kpeekpe ɛpɩzɩ nɛ ɖɩla kediɣzaɣ camɩyɛ yɔ. Ðɩpɩzɩɣ ɖɔɖɔ nɛ ɖɩyaa ɛyaa sakɩyɛ yem faaa kediɣzaɣ taa.

Johnson Mwanza, kɛ ɛzʋtʋyʋ Ngwerere North ɛgbɛyɛ nɖɩ ɖɩwɛ Lusaka, Sambii ɛjaɖɛ taa yɔ, ɖɩ-taa. Ɛyɔɔdaa se: “Koobiya sakɩyɛ yɔɔdaa se: ‘Zoom ŋgʋ ɛgbɛyɛ yabɩ-ɖʋ yɔ kɩhaɣ-ɖʋ waɖɛ se ɖɩñɔtɩnɩ ɖo-koobiya. Pɩtasɩ lɛ, pɩwɩlɩɣ-ɖʋ ɛzɩma Yehowa sɔɔlɩ-ɖʋ siŋŋ nɛ ɛcɔŋnɩ ɖɔ-yɔɔ yɔ’”

Liidiye nɖɩ ɛgbɛyɛ kpakɩɣ nɛ ɖɩɖʋʋnɩ nesi mba asɛyʋʋ nakʋyʋ talɩ-wɛ yɔ, ɖɩ-hɔɔlʋʋ nakʋyʋ pakpaɣ nɛ payabɩnɩ Zoom kʋnɛ. Liidiye nɖɩ, ɖɩkɛ haɖɛ nɖɩ ɛyaa ndɩ ndɩ lakɩ se paɖʋnɩ nesi tʋma wena ɛgbɛyɛ lakɩ ɛjaɖɛ kpeekpe yɔɔ yɔ. Sakɩyɛ tɩŋɩɣnɩ donate.jw.org nɛ palakɩ haɖɛ nɖɩ. Ðɩsɛɣ-mɩ mɩ-sɔɔlɩm haɖɛ yɔɔ. Ðɩsɩɣnɩ-ɖʋ nɛ ɖɩɖʋʋ nesi sɩnʋʋ tʋma lɛɛna ɛjaɖɛ kpeekpe yɔɔ.—2Kɔrɛntɩ mba 8:14.