Ɛzɩma palɩzɩɣ takayaɣ ŋga kakpaɖɩ takayɩsɩ tɩŋa yɔ

“Manɖaŋʋʋ-kʋ yɔ, pɩlakɩ pɩnzɩ 19 yɔ!” Ɛbɛ tɔm ɖo-koobu yɔɔdʋʋ? Bibl ŋgʋ payaɣ se Ɛjaɖɛ kɩfaɖɛ Tɔm Ðɛzʋʋ Krɩstʋ Mba Grɛɛkɩ Masɩ ɛ-kʋnʋŋ ŋgʋ payaɣ se Bengali yɔ kɩ-taa. Mbʋ pɩlabɩ ɛyaa sakɩyɛ alɩwaatʋ ndʋ palɩzɩ Ɛjaɖɛ Kɩfaɖɛ Tɔm Ðɛzʋʋ Bibl pa-kʋnʋŋ taa yɔ. Ɛlɛ wiɖiyi ŋtɛm ña tɩ pɔzʋʋ se ɛbɛ nɛ ɛbɛ pɩpɔzʋʋ se pala nɛ papɩzɩ nɛ pɛɖɛzɩ Biblwaa mba nɛ palɩzɩ-wɛ kʋnʋmɩŋ sakɩyɛ taa?

Kajalaɣ lɛ, Nɔɔɖɛyaa Ɛgbɛyɛ tɛ Takayɩsɩ Maʋ Kɔɔmiite haɣ nʋmɔʋ nɛ palɩzɩ koobiya halaa nɛ abalaa mba pakaɣ labʋ tʋmɩyɛ nɖɩ yɔ. Alɩwaatʋ ɛzɩma pɩpɔzʋʋ se pɛɖɛzɩnɩ Bibl? Nicholas Ahladis weyi ɛwɛ tɔm ɖɛzʋʋ tʋmɩyɛ nɖɩ ɖɩwɛ ɖa-tʋmɩyɛ ɖɩlaɖɛ sɔsɔɖɛ taa Warwick Etaazuunii tɛtʋ taa yɔ, ɖɩ-taa yɔ, ɛyɔɔdaa se: “Pɩlɩɣnɩ wɛtʋ ndɩ ndɩ cɔlɔ ɛzɩ tɔm ɖɛzɩyaa mba papɩzɩɣ nɛ pala tʋmɩyɛ nɖɩ yɔ, ɛzɩma kʋnʋŋ ŋgʋ kɩ-taa pɛɖɛzɩɣ tɔm yɔ, kɩwɛ kaɖɛ yɔ, tɔm ndʋ kalɩyaa sɩm Bibl yɔɔ yɔ nɛ ɛzɩma pɔyɔɔdʋʋ kʋnʋŋ ŋgʋ ageeta ndɩ ndɩ taa yɔ. Ðoŋ ɖoŋ lɛ, pɩpɔzʋʋ kpaɣnɩ pɩnaɣ nɛ piwolo pɩnzɩ naadozo nɛ pɛɖɛzɩnɩ Krɩstʋ Mba Grɛɛkɩ Masɩ. Bibl tɩŋa ɖɛzʋʋ kpakɩɣ pɩnzɩ naanza yaa pɩcɛzɩɣ mbʋ. Nɛ ye pɩkɛ ndamaa kʋnʋŋ taa pɛɖɛzɩɣ yɔ, alɩwaatʋ ndʋ pɩkpakɩɣ yɔ, tɩcɛzɩɣ mbʋ.”

Pɩtasɩnɩ tɔm ɖɛzɩyaa lɛ, koobiya lalaa ɖʋʋ nesi tʋmɩyɛ nɖɩ. Pahaɣ waɖɛ koobiya nabɛyɛ mba pɛfɛyɩ tɔm ɖɛzɩyaa taa yɔ se pɔyɔɔdɩ ndʋ pamaɣzɩɣ pɩlɩɩnɩ ndʋ pɛɖɛzɩɣ yɔ tɩ-yɔɔ. Koobiya mba pɛwɛ wɛtʋ ndɩ ndɩ taa nɛ papɩzɩɣ nɛ pɛwɛɛ ajɛɛ ndɩ ndɩ taa. Tɔm ndʋ pɔyɔɔdʋʋ yɔ, tɩpɩzɩɣ nɛ tɩsɩnɩ tɔm ɖɛzɩyaa nɛ pɛɖɛzɩ Bibl ŋgʋ kɩ-taa tɔm labɩ nɔɔ kʋɖʋmaɣ nɛ kiɖe tɛɛ Masɩ nɛ kɩ-kalʋʋ fɛyɩ kaɖɛ yɔ. Afrika Hadɛ Kiŋ Bibl ɖɛzɩyaa falɩsɩyʋ nɔɔyʋ yɔɔdaɣ ɛzɩma pɩlakɩ Bibl ɖɛzɩyaa yɔ pɩ-tɔm lɛ, ɛtɔm se: “Pamaɣzɩɣ se Bibl ɖɛzʋʋ kɛnɩ-wɛ sʋʋtʋ sɔsɔtʋ Yehowa ɛsɩndaa, nɛ mba pakalɩɣ Ɛsɔtɔm yɔ pɛ-ɛsɩndaa ɖɔɖɔ.”

Pɛtɛŋ tɔm ɖɛzʋʋ tʋmɩyɛ lɛ, palɩzɩ Bibl takayɩsɩ nɛ pɛkpɛndɩ-sɩ. Takayɩsɩ lɩzʋʋ menziiniwaa lakɩnɩ tʋmɩyɛ wondu ndɩ ndɩ hiu mbʋ yɔ ɛzɩ takayɩsɩ, encre, takayɩsɩ huyiŋ, kɩtaaɖɩŋ nɛ wonuu ŋgʋ pɛkpɛndɩɣnɩ takayɩsɩ yɔ mbʋ yɔ. Pɩnaɣ 2019 taa liidiye dɔlaarɩwaa miiliyɔɔwaa 20 pakpaɣ nɛ payabɩnɩ wondu ndʋ palakɩnɩ Bibl yɔ. Pɩnaɣ ŋga ka-taa ɖɔɖɔ koobiya mba paha pa-tɩ faaa nɛ pala tʋmɩyɛ takayɩsɩ ɖɩlɩzɩyɛ se pɩsa nɛ palɩzɩ Biblwaa se patayɩ-wɛ yɔ, palabɩ tʋmɩyɛ ñɩɣtʋ ndʋ tɩcɛzɩ 300 000 yɔ.

Ɛbɛ yɔɔ ɖɩkpakɩɣ alɩwaatʋ sakɩyɛ nɛ liidiye sakɩyɛ nɛ ɖɩlakɩnɩ tʋma ana? Joel Blue weyi ɛlakɩ tʋmɩyɛ takayɩsɩ lɩzʋʋ tʋmɩyɛ sɔsɔɖɛ taa yɔ, ɛyɔɔdaa se: “Takayɩsɩ nzɩ payɩ ɖɩlɩzɩɣ yɔ, sɩ-taa lɛ, Bibl kpaɖɩna. Pʋyɔɔ ɖɩsɔɔlaa se kɩ-wɛtʋ ɛɖʋ hɩɖɛ Ɛsɔ weyi ɖɩsɛɣ yɔ, nɛ tɔm ndʋ ɖisusuu yɔ.”

Pɩtasɩna se ɖɩlɩzɩɣ Ɛjaɖɛ kɩfaɖɛ tɔm ɖɛzʋʋ Biblwaa masɩ nzɩ sɩtɔyaa yɔ, sɩ-taa yɔ lɛ, ɖɩlɩzɩɣ ɖɔɖɔ Biblwaa mba papɩzɩɣ nɛ pawazɩ ɛyaa nabɛyɛ koŋ yɔ. Kɩɖaʋ nakʋyʋ yɔ: Ðɩlɩzɩ Ɛjaɖɛ kɩfaɖɛ tɔm ɖɛzʋʋ ndamaa kʋnʋŋ hiu taa. Pɩsa nɛ palɩzɩ Bibl kʋɖʋmʋʋ ndamaa kʋnʋŋ taa lɛ, pɩpɔzʋʋ ñɩɣtʋ lutozo. Nɛ ye pɛkpɛndɩ kɩ-takayɩsɩ yɔ, sɩ-ɖaɣlɩkɩŋ pɩzɩɣ nɛ pɩtalɩ mɛtanaa ɛzɩ 2,3 mbʋ yɔ. Ðɩlɩzɩɣ ɖɔɖɔ Biblwaa mba pawazɩɣ mba pɛwɛ salakanaa mba pa-taa Biblwaa mba pa-hatʋ wɛ lɛfɩɩ yɔ pe-ɖeke papɩzɩɣ nɛ pasʋna yɔ.

Ɛjaɖɛ kɩfaɖɛ tɔm ɖɛzʋʋ Bibl wazɩɣ kɩ-kalɩyaa pɩdɩɩfɛyɩ. Iyele nɛ ɖɩyɔɔdɩ mbʋ pɩlabɩ Kɔŋgoo Kinsaasaa ɛgbɛyɛ naɖɩyɛ taa yɔ pɩ-tɔm. Ɛgbɛyɛ nɖɩ ɖɩwɛ Tombe nɛ ɖɩlakɩnɩ tʋmɩyɛ kʋnʋŋ ŋgʋ payaɣ se Kiluba yɔ. Tombe tɛtʋ posini tɛtʋ sɔsɔtʋ ndʋ payaɣ se Kinsaasaa yɔ nɛ kilomɛtanaa ɛzɩ 1 700 mbʋ yɔ. Bibl kʋɖʋmʋʋ ɖeke Tombe koobiya mba pɔyɔɔdʋʋ Kiluba kʋnʋŋ yɔ, paawɛna. Nɛ tɔm pee wena palabɩnɩ tʋmɩyɛ Bibl ŋgʋ kɩ-taa yɔ, ɛyaa sakɩyɛ ɩɩtasɩɣ labɩnʋʋ tʋmɩyɛ a-taa sakɩyɛ. Ye paha koobu nɔɔyʋ tʋmɩyɛ kediɣzaɣ taa yɔ, pɩwɛɛ se ɛpɔzɩ nɛ pakɩndɩ-ɩ Bibl kʋɖʋmʋʋ ŋgʋ nɛ ɛñɔɔzɩnɩ ɛ-tʋmɩyɛ. Ɛlɛ kpaɣnɩ Août 2018 lɛ, paa koobu weyi ɛgbɛyɛ taa ɛpɩzaa nɛ ɛwɛɛnɩ Ɛjaɖɛ kɩfaɖɛ tɔm ɖɛzʋʋ Bibl tɩŋa. Nɛ Bibl ŋgʋ kɩ-taa palabɩnɩ tʋmɩyɛ Kiluba tɔm pee wena ɛyaa lakɩnɩ tʋmɩyɛ sɔnɔ yɔ.

Koobu halɩñɩnʋ nɔɔyʋ weyi ɛ-kʋnʋŋ kɛ Caama kʋnʋŋ yɔ, ɛyɔɔdɩ Ɛjaɖɛ kɩfaɖɛ tɔm ɖɛzʋʋ Bibl ŋgʋ paɖaɣnɩ ñɔɔzʋʋ yɔ kɩ-yɔɔ se: “Maatasɩɣ yɔɔdʋʋ yem se: ‘Pɩwɛɛ se mankalɩ Bibl, ɛlɛ mankalɩɣ-kʋ nɛ pɩtɛ lɛ, piselitiɣ-m se mantasɩ kalʋʋ.’ ” Salaka tʋ nɔɔyʋ mawa se: “Paha-m Ɛjaɖɛ kɩfaɖɛ tɔm ɖɛzʋʋ Bibl nakʋyʋ nɛ kɩlɛɣzɩ me-wezuu caɣʋ. Wiɖiyi mantɩkalɩ Bibl nɛ manɩɩ kɩ-taa camɩyɛ ɛzɩ mankalʋʋ kʋnɛ nɛ manɩɣ kɩ-taa camɩyɛ kpayɩ kpayɩ yɔ. Mɔnsɔɔlaa se mantɩlɩ Yehowa Aseɣɖe Tɩnaa camɩyɛ nɛ mantɩlɩ ɖɔɖɔ mbʋ pɩwɛɛ se mala nɛ manpɩsɩ pa-taa lɛlʋ yɔ.”

Ɛyaa mba payɩ pakalɩɣ Ɛjaɖɛ kɩfaɖɛ tɔm ɖɛzʋʋ Bibl yɔ pawɩlɩɣ pɛ-ɛsɩmɩyɛ haɖɛ nɖɩ ɖɩsɩɣna se palɩzɩ Bibl ŋgʋ yɔ, ɖɩ-yɔɔ. Ye ɩsɔɔlaa se ɩɖʋ nesi ɛjaɖɛ kpeekpe yɔɔ tʋmɩyɛ ɖɩnɛ yɔ, ɩpɩzɩɣ nɛ ɩna nʋmɔŋ weyi ɩ-yɔɔ ɩpɩzɩɣ nɛ ɩtɩŋna nɛ ɩla haɖɛ yɔ donate.jw.org yɔɔ. Ðɩsɛɣ-mɩ pɩdɩɩfɛyɩ mɩ-kʋjɔŋ labʋ yɔɔ.