Yehowa yeba nɛ ɖa-taa tɛ se tɛtʋ kaɣ pɩsʋʋ Paradisuu

1. Tɔm ndʋ nayʋ Izaayii heyi e-koobiya Izrayɛɛlɩ mba?

NAYƲ Izaayii ya Yehowa se «toovenim tɛ Ɛsɔ.» Tɔm piye nɖɩ pɛɖɛzaa se «toovenim» yɔ, ɖɩ-tɔbʋʋ lɛ se «Amɛn.» (Iza. 65:​16, pɩ-tɛɛ tɔm) «Amɛn» tɔbʋʋ lɛ se «pɩla mbʋ» yaa «pɩtʋʋ fɛyɩ.» Alɩwaatʋ ndʋ palakɩnɩ tʋmɩyɛ tɔm piye «amɛn» Bibl taa nɛ pitukuuni Yehowa yaa Yesu yɔ, pɩwɩlɩɣ se tɔm ndʋ pɔyɔɔdaa yɔ tɩkɛ toovenim. Ye mbʋ, tɔm ndʋ Izaayii heyi e-koobiya Izrayɛɛlɩ mba yɔ, tɩ-taa tʋ kpayɩ kpayɩ: Tɔm ndʋ Yehowa yɔɔdʋʋ yɔ, paa ɛzɩmtaa lɛ papɩzɩɣ nɛ pataa-tʋ liu. Yehowa wɩlaa se tɔm ndʋ tɩkɛ toovenim, mbʋ pʋyɔɔ yɔ paa ɛzɩmtaa lɛ ɛɖɔŋ ɛ-tɔm yɔɔ.

2. (a) Ɛbɛ yɔɔ ɖɩpɩzɩɣ nɛ ɖɩtaa liu tamaɣ ŋga Yehowa labɩ cee wayɩ yɔɔ yɔ? (b) Nɛ tɔm ndʋ taa ɖɩkaɣ tazʋʋ?

² Ðɩpɩzɩɣ nɛ ɖɩtaa liu ɖɔɖɔ cee wayɩ tamasɩ nzɩ Yehowa laba yɔ? Izaayii yɔɔdɩ ɛ-tɔm nɛ pɩla ɛzɩ pɩnzɩ 800 mbʋ yɔ lɛ, apostoloo Pɔɔlɩ yɔɔdɩ mbʋ pʋyɔɔ ɖa-taa pɩzɩɣ nɛ pɩtɛ se paa ɛzɩmtaa lɛ Ɛsɔ tamasɩ lakɩ yɔ. Pɔɔlɩ yɔɔdaa se: «Ɛsɔ ɛɛpɩzɩɣ nɛ ɛcɛtɩ.» (Ebr. 6:18) Lɩm mbʋ pɩwɛ leleŋ yɔ nɛ lɩm mbʋ pɩwɛ ɖɔm yɔ pɩɩpɩzɩɣ nɛ pɩlɩɩnɩ hiɖe kʋɖʋmɖɩyɛ taa, mbʋ ɖɔɖɔ Yehowa weyi ɛkɛ toovenim hiɖe yɔ ɛɛpɩzɩɣ nɛ ɛcɛtɩ. Ye mbʋ, ɖɩpɩzɩɣ nɛ ɖɩtaa liu tɔm ndʋ payɩ Yehowa yɔɔdʋʋ yɔ, pɩkpɛndɩnɩ cee wayɩ tamasɩ nzɩ ɛlabɩ-ɖʋ yɔ. Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ pʋnɛ pɩ-yɔɔ: Ɛbɛ Yehowa labɩ-ɖʋ tamaɣ se ɛkaɣ-ɖʋ haʋ cee wayɩ? Nɛ ɛzɩma Yehowa yeba nɛ ɖa-taa tɛ se tamasɩ nzɩ ɛlaba yɔ sɩkaɣ labʋ?

TAMAƔ ŊGA YEHOWA LABA?

3. (a) Tamaɣ ŋga Ɛsɔ sɛyaa sɔɔlɩ kpem? (Natʋ 21:​3, 4) (b) Suwe nabɛyɛ yɔɔdʋʋ alɩwaatʋ ndʋ ɖiheyiɣ-wɛ tamaɣ ŋga kɔ-tɔm yɔ?

³ Tamaɣ ŋga kɔ-tɔm ɖɩkaɣ yɔɔdʋʋ yɔ, ɛjaɖɛ kpeekpe yɔɔ Ɛsɔ sɛyaa sɔɔlɩ kɔ-tɔm kpem. (Kalɩ Natʋ 21:​3, 4.) Yehowa labɩ tamaɣ se alɩwaatʋ natʋyʋ kaɣ kɔm nɛ «sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.» Ða-taa sakɩyɛ kalɩɣ Bibl taa tɔm tʋnɛ tɔm susuu taa se pawɩlɩ ɛzɩma wezuu caɣʋ kaɣ wɛʋ Paradisuu taa yɔ. Suwe ɛyaa nabɛyɛ yɔɔdʋʋ alɩwaatʋ ndʋ ɖɩkalɩɣ-wɛ tɔm ndʋ yɔ? Pɩtɩla pɔyɔɔdʋʋ se: «Tɔm ndʋ tɩwɛ ɖeu, ɛlɛ mamaɣzɩɣ se tɩɩpɩzɩɣ nɛ tɩla.»

4. (a) Alɩwaatʋ ndʋ Yehowa lakaɣ paradisuu tamaɣ yɔ ɛbɛ ɛnawa se pɩkaɣ labʋ ɖa-alɩwaatʋ taa? (b) Pɩtasɩnɩ tamaɣ ŋga lɛ, ɛbɛ ɖɔɖɔ Yehowa laba?

⁴ Alɩwaatʋ ndʋ Yehowa tɩŋnɩ e-fezuu yɔɔ nɛ eheyi Yohanɛɛsɩ Paradisuu ŋgʋ kɩ-tɔm yɔ, ɛɛnawa se ɖɩkaɣ susuu lidaʋ tɔm ndʋ ɖɔɖɔ alɩwaatʋ ndʋ ɖisusuu kewiyaɣ tɔm sɔnɔ yɔ. Yehowa kaanawa ɖɔɖɔ se pɩkaɣ wɛʋ ɛyaa sakɩyɛ kaɖɛ se petisi «tɔm kɩfatʋ» ndʋ tɩ-yɔɔ. (Iza. 42:9; 60:2; 2 Kɔr. 4:​3, 4) Ye mbʋ, ɛzɩma ɖɩpɩzɩɣ nɛ ɖɩla nɛ ɖa nɛ ɛyaa lalaa ɖa-taa tɛ se tɔm ndʋ pɔyɔɔdɩ Natʋ 21:​3, 4 taa yɔ tɩkaɣ labʋ toovenim? Yehowa tɩla tamaɣ ŋga se kɛhɛzɩɣ ɖa-laŋɩyɛ yem, ɛlɛ ɛyɔɔdɩ ɖɔɖɔ lɩmaɣza wena a-yɔɔ ɖɩpɩzɩɣ nɛ ɖɩtaa liu tamaɣ ŋga yɔ a-tɔm. Lɩmaɣza wena tɔm ɛyɔɔdaa?

YEHOWA YEBA NƐ ÐA-TAA TƐ SE ƐKAƔ ÐƆM Ɛ-TƆM YƆƆ

5. Lɩmaɣza wena yɔɔ ɖɩpɩzɩɣ nɛ ɖɩtaa liu Paradisuu tamaɣ ŋga Ɛsɔ laba yɔ, nɛ le ɖɩpɩzɩɣ nɛ ɖɩna-yɛ?

⁵ Ðɩnaɣ lɩmaɣza wena a-yɔɔ ɖa-taa pɩzɩɣ nɛ pɩtɛ se Yehowa kaɣ yebu nɛ tɛtʋ pɩsɩ Paradisuu yɔ masɩ nzɩ sɩkɔŋ yɔ sɩ-taa. Pama sɩ-taa se: «Weyi ɛɛcaɣ kewiyaɣ kpelaɣ yɔɔ yɔ ɛyɔɔdɩ se: “Na! Menɖiɣni labʋ wondu tɩŋa se tɩkɛ kɩfatʋ.” Ɛtasɩ yɔɔdʋʋ se: “Ma tɔm ndʋ, mbʋ pʋyɔɔ yɔ tɩwɛ siɣsiɣ nɛ tɩkɛ toovenim.” Nɛ eheyi-m se: “Tɩlaba! Mɛkɛnɩ Alɩfaa nɛ Omega, ɖɩbazɩyɛ nɛ tɩnaɣ.”»—Natʋ 21:​5, 6a.

6. Tɔm ndʋ tɩwɛ Natʋ 21:​5, 6 taa yɔ, ɛbɛ yɔɔ tɩpɩzɩɣ nɛ tɩcɛyɩsɩ lidaʋ ŋgʋ ɖɩwɛnɩ Ɛsɔ tamaɣ yɔɔ yɔ?

⁶ Ɛbɛ yɔɔ Bibl taa tɔm ndʋ tiyeki se lidaʋ ŋgʋ ɖɩwɛnɩ Ɛsɔ tamaɣ yɔɔ yɔ kɩkpa ɖoŋ? Révélation. Dénouement takayaɣ yɔɔdɩ masɩ nzɩ sɩ-tɔm ɛzʋnɔ: «Pɩwɛ ɖeyi ɖeyi ɛzɩ Yehowa maɣmaɣ wɛɛ nɛ ɛñɩkɩɣ niye takayaɣ nakɛyɛ taa se eyele nɛ ɛyaa siɣsiɣ tɩnaa taa tɛ se paa pɩɩlabɩ ɛzɩma yɔ, ɛkaɣ ɖɔm ɛ-tɔm yɔɔ yɔ.»b Pama Ɛsɔ tamaɣ tɔm Natʋ 21:​3, 4 taa. Nɛ pʋwayɩ lɛ, Yehowa ñɩɣ niye kalɩtʋ 5 nɛ 6 taa se eyele nɛ ɖa-taa tɛ se tamaɣ ŋga ɛlaba yɔ, paa pɩɩkpawa nɛ pitii yɔ kakaɣ labʋ. Iyele nɛ ɖɩna tɔm pee wena Yehowa labɩnɩ tʋmɩyɛ se pɩsa nɛ ɖa-taa tɛ se ɛ-tamaɣ kaɣ labʋ yɔ.

7. Apaɣzɩ yɔɔdʋʋ kalɩtʋ 5 taa, nɛ ɛbɛ yɔɔ pɩwɛ ŋgee?

⁷ Kalɩtʋ 5 paɣzɩnɩ tɔm tʋnɛ: «Weyi ɛɛcaɣ kewiyaɣ kpelaɣ yɔɔ yɔ ɛyɔɔdɩ se.» (Natʋ 21:5a) Tɔm ndʋ tɩwɛ ŋgee, mbʋ pʋyɔɔ yɔ hɔɔlɩŋ 3 taa ɖeke Yehowa maɣmaɣ yɔɔdɩ Natʋ takayaɣ taa, nɛ ɩ-taa nakʋyʋ yɔ. Ye mbʋ, pɩtɩkɛ Ɛsɔ tiyiyu ɖoŋ tʋ nɔɔyʋ yɔɔdɩnɩ tɔm ndʋ, nɛ halɩ pɩtɩkɛ ɖɔɖɔ Yesu weyi ɛsɩba nɛ pefezi-i yɔ, ɛlɛ Yehowa maɣmaɣ yɔɔdɩnɩ-tʋ. Toovenim tɔm ndʋ tɩwɩlɩɣ se ɖɩpɩzɩɣ nɛ ɖɩtaa liu tɔm ndʋ ɛyɔɔdɩ pʋwayɩ yɔ kiya. Ɛbɛ yɔɔ? Mbʋ pʋyɔɔ yɔ Yehowa «ɛɛpɩzɩɣ nɛ ɛcɛtɩ.» (Tiiti 1:2) Pʋyɔɔ lɛ tɔm ndʋ tɩwɛ Natʋ 21:​5, 6 taa yɔ pɩtʋʋ fɛyɩ se tɩkaɣ labʋ.

«NA! MENÐIƔNI LABƲ WONDU TƖŊA SE TƖKƐ KƖFATƲ»

8. Tɔm ndʋ Yehowa yɔɔdaa se ɛñɩɣnɩ niye se ɛ-tamaɣ kaɣ labʋ? (Izaayii 46:10)

⁸ Iyele nɛ ɖɩmaɣzɩ tɔm piye «Na!» yɔɔ. (Natʋ 21:5) Grɛɛkɩ tɔm piye nɖɩ pɛɖɛzaa se «na!» yɔ, palabɩnɩ-ɖɩ tʋmɩyɛ tam sakɩyɛ Natʋ takayaɣ taa. Takayaɣ nakɛyɛ yɔɔdaa se palabɩnɩ tʋmɩyɛ tɔm piye nɖɩ se «peheyi kalɩyʋ se ɛka ɛ-lɩmaɣza tɔm ndʋ tɩkɔŋ pʋwayɩ yɔ tɩ-yɔɔ.» Tɔm ndʋ pɔyɔɔdɩ pʋwayɩ? Ɛsɔ yɔɔdaa se: «Menɖiɣni labʋ wondu tɩŋa se tɩkɛ kɩfatʋ.» Toovenim taa lɛ, Yehowa wɛɛ nɛ ɛyɔɔdʋʋ lɛɣzɩtʋ ndʋ tɩkaɣ kɔm cee wayɩ yɔ tɩ-tɔm na. Ɛlɛ ɛ-ɛsɩndaa lɛ, pɩtʋʋ fɛyɩ tamaɣ ŋga kɔ-yɔɔ; pʋyɔɔ ɛyɔɔdɩ tɔm ndʋ ɛzɩ tɩtɛm paɣzʋʋ labʋ yɔ.—Kalɩ Izaayii 46:10.

9. (a) Ɛbɛ tɔm loyaɣ «menɖiɣni labʋ wondu tɩŋa se tɩkɛ kɩfatʋ» wɩlɩɣ? (b) Ɛbɛ kaɣ talʋʋ «ɛsɔdaa» nɛ «tɛtʋ» ndʋ tɩwɛ sɔnɔ yɔ?

⁹ Iyele nɛ ɖɩtazɩ Natʋ 21:5 taa tɔm loyaɣ kanɛ ka-taa: «Menɖiɣni labʋ wondu tɩŋa se tɩkɛ kɩfatʋ.» Ñʋʋ ŋgʋ kɩ-taa tɔm loyaɣ ŋga, kawɩlɩɣ tʋma 2 wena Yehowa kaɣ labʋ yɔ. Kajalaɣ lɛ, ɛkaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ, nɛ nabʋlɛ lɛ, ɛkaɣ kɔnʋʋ ɛjaɖɛ kɩfaɖɛ. Natʋ 21:1 taa, pamawa se: «Ɛsɔdaa kɩbɩnʋʋ nɛ tɛtʋ kɩbɩndʋ pamʋwaa.» «Ɛsɔdaa kɩbɩnʋʋ» kɛnɩ kominawaa mba Sataŋ nɛ ɛ-aleewaa pɛwɛnɩ ɖoŋ pɔ-yɔɔ yɔ. (Mat. 4:​8, 9; 1 Yoh. 5:19) Alɩwaatʋ ndʋ palakɩnɩ tʋmɩyɛ tɔm piye «tɛtʋ» Bibl taa yɔ, pɩpɩzɩɣ nɛ pɩkɛ ɛyaa mba pɛwɛ tɛtʋ yɔɔ yɔ. (Kiɖe 11:1; Keɣ. 96:1) Pʋyɔɔ lɛ, «tɛtʋ kɩbɩndʋ» kɛ ɛyaa kɩdɛkɛdaa mba pɛwɛ sɔnɔ yɔ. Yehowa ɛɛkaɣ ñɔɔzʋʋ «ɛsɔdaa» nɛ «tɛtʋ» ndʋ tɩwɛ sɔnɔ yɔ na, ɛlɛ ɛkaɣ-wɛ ɖɩzʋʋ caɣ caɣ. Ɛkaɣ lɛɣzʋʋ ɛsɔdaa nɛ tɛtʋ ndʋ tɩwɛ lɛɛlɛɛyɔ yɔ po-lone taa «ɛsɔdaa kɩfalʋʋ nɛ tɛtʋ kɩfatʋ.» «Ɛsɔdaa kɩfalʋʋ» kɛnɩ komina kɩfalʋʋ nɛ «tɛtʋ kɩfatʋ» ñɛkɛ ɛyaa samaɣ kɩfalaɣ.

10. Wondu ndʋ Yehowa kaɣ labʋ se tɩkɛ kɩfatʋ?

¹⁰ Natʋ 21:5 taa, ɖɩnaɣ tɔm ndʋ Yehowa yɔɔdaa pɩlɩɩnɩ wondu ndʋ ɛkaɣ labʋ nɛ tɩkɛ kɩfatʋ yɔ tɩ-yɔɔ yɔ. Taasɔɔ se Yehowa tɩyɔɔdɩ se: «Menɖiɣni labʋ wondu kɩfatʋ tɩŋa.» Ɛlɛ ɛyɔɔdaa se: «Menɖiɣni labʋ wondu tɩŋa se tɩkɛ kɩfatʋ.» Yehowa kaɣ labʋ nɛ tɛtʋ pɩsɩ kɩfatʋ, nɛ ɛkaɣ labʋ nɛ ɛyaa pɩsɩ kɩfama alɩwaatʋ ndʋ eyeki nɛ pɩtɩŋa pɩtalɩ pilim yɔ. Ɛzɩ Izaayii yɔɔdʋʋ yɔ, Yehowa kaɣ labʋ nɛ tɛtʋ kpeekpe pɩsɩ lone kɩbanɖɛ ɛzɩ Edɛɛnɩ kaɖaɣ yɔ. Ɛkaɣ waʋ ɖa-taa paa weyi caɣ caɣ nɛ ɖɩpɩsɩ ɛyaa kɩfama. Ɛkaɣ waʋ kaakalasɩ, yʋlʋmaa nɛ tandamaa, nɛ halɩ ɛkaɣ fezuu sɩɖaa.—Iza. 25:8; 35:​1-7.

«TƆM NDƲ . . . TƖWƐ SIƔSIƔ NƐ TƖKƐ TOOVENIM. . . . TƖLABA!»

11. Paɣtʋ ndʋ Yehowa ɖʋ Yohanɛɛsɩ, nɛ ɛbɛ yɔɔ ɛɖʋ-ɩ paɣtʋ ndʋ?

¹¹ Tɔm ndʋ ɖɔɖɔ Ɛsɔ yɔɔdaa se eyele nɛ ɖa-taa tɛmnɩ tamaɣ ŋga ɛlaba yɔ? Yehowa heyi Yohanɛɛsɩ se: «Ma tɔm ndʋ, mbʋ pʋyɔɔ yɔ tɩwɛ siɣsiɣ nɛ tɩkɛ toovenim.» (Natʋ 21:5) Yehowa yɔɔdʋʋ se «ma tɔm ndʋ» yɔ, pɩtɩkɛ paɣtʋ yem ɛɖʋwa. Ɛyɔɔdɩ ɖɔɖɔ mbʋ pʋyɔɔ pɩwɛɛ se Yohanɛɛsɩ ɛma-tʋ yɔ. Ɛtɔm se: «Mbʋ pʋyɔɔ yɔ tɩwɛ siɣsiɣ nɛ tɩkɛ toovenim.» Pʋ-tɔbʋʋ lɛ se Ɛsɔ tɔm kɛ toovenim nɛ papɩzɩɣ nɛ pataa-tʋ liu. Ða-taa wɛ leleŋ se Yohanɛɛsɩ ñam Yehowa paɣtʋ nɛ ɛma tɔm ndʋ. Mbʋ pɩlɩ pɩ-taa yɔ lɛ se ɖɩpɩzɩɣ nɛ ɖɩkalɩ tamaɣ ŋga Ɛsɔ laba pɩlɩɩnɩ Paradisuu yɔɔ yɔ kɔ-tɔm, nɛ ɖɩpɩzɩɣ ɖɩmaɣzɩ wazasɩ kɩbanzɩ nzɩ sɩɖaŋ-ɖʋ yɔ sɩ-yɔɔ.

12. Ɛbɛ yɔɔ Yehowa yɔɔdaa se: «Tɩlaba!»?

¹² Tɔm ndʋ Ɛsɔ yɔɔdɩ pʋwayɩ? Ɛtɔm se: «Tɩlaba!» (Natʋ 21:6) Lɛɛlɛɛyɔ, Yehowa yɔɔdaa nɛ pɩwɛɛ ɛzɩ tɔm ndʋ payɩ ɛyɔɔdɩ Paradisuu tamaɣ yɔɔ yɔ tɩtɛm labʋ yɔ. Nɛ pɩmʋnaa se ɛyɔɔdɩ mbʋ, mbʋ pʋyɔɔ yɔ nabʋyʋ ɛɛpɩzɩɣ nɛ pɩɖɩɣ-ɩ nʋmɔʋ se etaayele nɛ ɛ-tamaɣ la. Pʋwayɩ, Yehowa yɔɔdɩ tɔm lɛɛtʋ ndʋ tiyeki se ɖa-taa ɛtɛ se paa pɩɩkpawa nɛ pitii yɔ ɛ-tamaɣ lakɩ yɔ. Tɔm ndʋ ɛyɔɔdaa?

«MƐKƐNƖ ALƖFAA NƐ OMEGA»

13. Ɛbɛ yɔɔ Yehowa yɔɔdaa se: «Mɛkɛnɩ Alɩfaa nɛ Omega»?

¹³ Ɛzɩ ɖɩyɔɔdʋʋ nɛ pɩɖɛɛ yɔ, natʋ ndʋ Yohanɛɛsɩ nawa yɔ tɩ-taa, Yehowa maɣmaɣ yɔɔdɩnɩ-ɩ tam nabudozo. (Natʋ 1:8; 21:​5, 6; 22:13) Hɔɔlɩŋ ɛnɩ ɩ-tɩŋa ɩ-taa, Yehowa yɔɔdaa se: «Mɛkɛnɩ Alɩfaa nɛ Omega.» Grɛɛkɩ kʋnʋŋ masɩ taa lɛ, alɩfaa kɛnɩ mayaɣ kajalaɣ ñɩŋga nɛ omega kɛnɩ mayaɣ kɛdɛzaɣ ñɩŋga. Yehowa yɔɔdʋʋ se ɛkɛ «Alɩfaa nɛ Omega» yɔ, ɛsɩnɩ-ɖʋ se ɖɩnɩɩ pɩ-taa se ye ɛpaɣzɩ nabʋyʋ labʋ yɔ, paa pɩɩkpawa nɛ pitii yɔ ɛkaɣ-pʋ tɛm.

14. (a) Ha kɩɖaʋ ŋgʋ kɩwɩlɩɣ alɩwaatʋ ndʋ Yehowa yɔɔdaa se «Alɩfaa» nɛ alɩwaatʋ ndʋ ɛkaɣ yɔɔdʋʋ se «Omega» yɔ. (b) Tɔm ndʋ tɩwɛ Kiɖe Tɛɛ Tɔm 2:​1-3 taa yɔ, tiyeki nɛ ɖa-taa tɛmnɩ we?

¹⁴ Yehowa lɩzɩ Aɖam nɛ Ɛva nɛ pɩtɛ lɛ, eheyi-wɛ kaɖʋwa ŋga ɛwɛnɩ ɛyaa nɛ tɛtʋ yɔɔ yɔ kɔ-tɔm. Bibl yɔɔdʋʋ se: «Ɛsɔ wazɩ-wɛ, nɛ Ɛsɔ heyi-wɛ se: “Ɩlʋlɩ nɛ ɩɖɔɔ, isu tɛtʋ yɔɔ nɛ ɩwɛɛnɩ ɖoŋ tɩ-yɔɔ.”» (Kiɖe 1:28) Alɩwaatʋ ndʋ tɩ-taa, pɩwɛ ɛzɩ Ɛsɔ kaawɛɛ nɛ ɛyɔɔdʋʋ se «Alɩfaa» yɔ. Ɛyɔɔdɩ kaɖʋwa ŋga ɛɛwɛna yɔ kɔ-tɔm kpayɩ kpayɩ, ŋga lɛ se alɩwaatʋ kaɣ kɔm nɛ Aɖam nɛ Ɛva pa-lʋlʋʋ taa ñɩma mba patalɩ pilim nɛ pañaŋɩ-ɩ yɔ pakaɣ suu tɛtʋ yɔɔ nɛ papɩsɩ-tʋ paradisuu. Alɩwaatʋ ndʋ ɛ-kaɖʋwa ŋga kakaɣ labʋ cee wayɩ yɔ, pɩkaɣ wɛʋ ɛzɩ Yehowa yɔɔdaa se «Omega» yɔ. Yehowa lɩzɩ «ɛsɔdaa nɛ tɛtʋ nɛ mbʋ payɩ pɩwɛ pa-taa yɔ» nɛ pɩtɛ lɛ, ɛyɔɔdɩ tɔm natʋyʋ se ɛwɩlɩ se kaɖʋwa ŋga ɛwɛna yɔ, paa pɩɩkpawa nɛ pitii yɔ kakaɣ labʋ. Tɔm ndʋ tɩwɛ Kiɖe Tɛɛ Tɔm 2:​1-3 taa. (Kalɩ Kiɖe Tɛɛ Tɔm 2:​1-3.) Yehowa lɩzɩ kɩyakʋ 7 ñɩŋgʋ se kɩkɛ kiɖeɖeu. Pʋ-tɔbʋʋ lɛ suwe? Yehowa caɣ se ɛwɩlɩ se paa pɩɩlabɩ ɛzɩma yɔ kaɖʋwa ŋga ɛwɛnɩ ɛyaa nɛ tɛtʋ yɔɔ yɔ, kakaɣ labʋ. Kɩyakʋ 7 ñɩŋgʋ tɛŋ lɛ, kakaɣ labʋ kiya.

15. Pɩtɩla, ɛbɛ yɔɔ Sataŋ pɩzaɣ se ɛmaɣzɩ se ɛpɩzɩɣ nɛ ɛɖɩɣ Yehowa nʋmɔʋ se ɛ-tamaɣ ɛtaala?

¹⁵ Aɖam nɛ Ɛva pakaɖɩnɩ Ɛsɔ nɛ pɩtɛ lɛ, papɩsɩ kɩwɛɛkɩm laɖaa nɛ pɛɖɛzɩ pa-lʋlʋʋ taa mba kɩwɛɛkɩm nɛ sɩm. (Roma 5:12) Piyeba nɛ pɩwɛɛ ɛzɩ ɛyaa mba patalɩ pilim nɛ pañaŋ Yehowa yɔ paapɩzɩɣ nɛ posu tɛtʋ yɔɔ kpa yɔ. Pɩɩwɛ ɛzɩ Sataŋ ɖɩɣ Yehowa nʋmɔʋ se ɛtaayɔɔdɩ kpa se «Omega» yɔ. Pɩtɩla Sataŋ maɣzaɣ se Yehowa ɛɛpɩzɩɣ nɛ eyele nɛ ɛ-tamaɣ la. Ɛmaɣzaɣ se Ɛsɔ kaɣ kʋʋ Aɖam nɛ Ɛva nɛ ɛlɩzɩ ɛyaa kɩfama mba patalɩ pilim yɔ se pɩsa nɛ ɛ-tamaɣ la. Ɛlɛ ye Ɛsɔ ɛɛlabɩ mbʋ yɔ, Eleeu kaakʋyɩ ɛ-yɔɔ se ɛkɛ cɛtɩyʋ. Ɛbɛ yɔɔ? Mbʋ pʋyɔɔ yɔ ɛzɩ pɔyɔɔdʋʋ Kiɖe Tɛɛ Tɔm 1:28 taa yɔ, Yehowa kaaheyi Aɖam nɛ Ɛva se pa-lʋlʋʋ taa mba kaɣnɩ suu tɛtʋ yɔɔ.

16. Pɩtɩla, ɛbɛ yɔɔ Sataŋ maɣzaɣ se ɛpɩzɩɣ nɛ ɛkʋ Yehowa tɔm se ɛkɛ kaabɩzaɣ?

¹⁶ Pɩtɩla, ɛbɛ ɖɔɖɔ Sataŋ maɣzaɣ se Yehowa kaɣ labʋ? Pɩtɩla Sataŋ maɣzaɣ se Yehowa kaɣ yebu nɛ Aɖam nɛ Ɛva palʋlɩ piya nzɩ sɩtɩtalɩ pilim yɔ nɛ sɩɩkaɣ talʋʋ pilim wiɖiyi kpa. (Ekl. 7:20; Roma 3:23) Ye pɩlabɩ mbʋ yɔ, pɩtʋʋ fɛyɩ se Eleeu kaɣ heyuu Yehowa se ɛkɛ kaabɩzaɣ. Ɛbɛ yɔɔ? Mbʋ pʋyɔɔ yɔ piyeki se tamaɣ ŋga Ɛsɔ kaawɛna se Aɖam nɛ Ɛva pa-lʋlʋʋ taa ñɩma mba patalɩ pilim nɛ pañaŋɩ-ɩ yɔ posu tɛtʋ yɔɔ yɔ kataala.

17. Sataŋ, Aɖam nɛ Ɛva pakaɖɩnɩ Yehowa lɛ, ɛzɩma Yehowa cɔnɩ tɔm ndʋ ti-ɖeɖe? Nɛ ɛbɛ pɩkaɣ tɛmnʋʋ? (Cɔnɩ ɖɔɖɔ kɩlɛmʋʋ.)

¹⁷ Sataŋ taapɩzɩɣ se ɛna ɛzɩma Yehowa kaɣaɣ labʋ yɔ kaaʋ. Sataŋ nɛ Aɖam nɛ Ɛva paakaɖɩnɩ Yehowa, paa mbʋ yɔ Yehowa kaawɛnɩ nʋmɔʋ kɩbaŋʋ ŋgʋ kɩ-yɔɔ ɛkaɣ tɩŋnʋʋ se eyele nɛ ɛ-tamaɣ la yɔ. (Keɣ. 92:5) Yehowa ha Aɖam nɛ Ɛva nʋmɔʋ se palʋlɩ piya, nɛ ɛtɩŋnɩ nʋmɔʋ ŋgʋ kɩ-yɔɔ nɛ ɛwɩlɩ se tɔm ndʋ ɛyɔɔdʋʋ yɔ tɩlakɩ, nɛ ɛtɩkɛ cɛtɩyʋ. Pɩtasɩ lɛ, Yehowa wɩlaa se ye ɛyɔɔdaa se ɛlakɩ nabʋyʋ yɔ, nabʋyʋ ɛɛpɩzɩɣ nɛ pɩɖɩɣ-ɩ nʋmɔʋ. Pɩsa nɛ tamaɣ ŋga ɛlaba yɔ kala lɛ, eyeba nɛ Aɖam «lʋlʋʋ taa tʋ» nɔɔyʋ lɩɩ se ɛya Aɖam nɛ Ɛva pa-lʋlʋʋ taa ñɩma mba pañaŋɩ-ɩ yɔ pa-ñʋʋ. (Kiɖe 3:15; 22:18) Aɖam lʋlʋʋ taa tʋ ɛnʋ, ɛkaɣ cɛlʋʋ e-wezuu se pɩkɛ kɩhɛyʋʋ pʋ-ñʋʋ taa nɛ pɩya ɛyaa ñʋʋ. Sataŋ taamaɣzɩ kpa se nʋmɔʋ ŋgʋ kɩ-yɔɔ Yehowa pɩzɩɣ nɛ ɛtɩŋna. Ɛbɛ yɔɔ? Mbʋ pʋyɔɔ yɔ sɔɔlɩm mbʋ pɩ-taa piɖeni men-ɖeke lakasɩ fɛyɩ yɔ, mbʋ seɣtini Yehowa nɛ ɛla ɖʋtʋ ndʋ. (Mat. 20:28; Yoh. 3:16) Sataŋ fɛyɩnɩ wɛtʋ kɩbandʋ ndʋ. Ɛkɛ piɖeni men-ɖeke tʋ. Ye mbʋ, ɛbɛ kaɣ lɩʋ kɩhɛyʋʋ pʋ-ñʋʋ taa ɖʋtʋ ndʋ tɩ-taa? Yesu Krɩstʋ pɩnzɩ 1000 kewiyitu tɔɔʋ tɛŋ lɛ, Aɖam nɛ Ɛva pa-lʋlʋʋ taa ñɩma mba patalɩ pilim nɛ pañaŋ Ɛsɔ yɔ, pakaɣ caɣʋ wezuu paradisuu taa tɛtʋ yɔɔ, ɛzɩ Yehowa kaalabʋ tamaɣ kiɖe tɛɛ yɔ. Alɩwaatʋ ndʋ lɛ, Yehowa kaɣ yɔɔdʋʋ se «Omega.»

ƐZƖMA ÐƖPƖZƖƔ NƐ ÐƖCƐYƖSƖ LIDAƲ ŊGƲ ÐƖWƐNƖ PARADISUU TAMAƔ ŊGA YEHOWA LABƖ-ÐƲ YƆ KƆ-YƆƆ?

18. Lɩmaɣza 3 wena yɔɔ Yehowa tɩŋnaa nɛ eyele nɛ ɖa-taa tɛ se ɛ-tamaɣ kaɣ labʋ? (Kalɩ ɖɔɖɔ aɖakaɣ «Lɩmaɣza 3 wena a-yɔɔ ɖɩpɩzɩɣ nɛ ɖɩtaa liu Yehowa tamaɣ yɔ.»)

¹⁸ Ɛzɩ ɖɩnaʋ tɔm ñʋʋ kʋnɛ kɩ-taa yɔ, ɛzɩma ɖɩpɩzɩɣ nɛ ɖɩsɩnɩ mba papɩtɩɣ Paradisuu tamaɣ ŋga Ɛsɔ laba yɔ kɔ-yɔɔ yɔ nɛ pa-taa tɛ se kakaɣ labʋ? Kajalaɣ lɛ, Yehowa maɣmaɣ labɩnɩ tamaɣ ŋga. Natʋ takayaɣ yɔɔdaa se: «Weyi ɛɛcaɣ kewiyaɣ kpelaɣ yɔɔ yɔ ɛyɔɔdɩ se: “Na! Menɖiɣni labʋ wondu tɩŋa se tɩkɛ kɩfatʋ.”» Ɛwɛnɩ lɔŋsɩnɖɛ, ɖoŋ, nɛ ɛsɔɔlaa se eyele nɛ tamaɣ ŋga kala. Nabʋlɛ lɛ, abʋta fɛyɩ tamaɣ ŋga kɔ-yɔɔ; pʋyɔɔ lɛ, Yehowa ɛsɩndaa lɛ pɩwɛ ɛzɩ kɛtɛm labʋ yɔ. Pʋyɔɔ ɛyɔɔdaa se: «Tɔm ndʋ, . . . tɩwɛ siɣsiɣ nɛ tɩkɛ toovenim. . . . Tɩlaba!» Nabudozo lɛ, ye Yehowa ɛpaɣzɩ nabʋyʋ labʋ yɔ, paa pɩɩkpawa nɛ pitii yɔ ɛkaɣ-pʋ tɛm. Pʋyɔɔ ɛyɔɔdaa se: «Mɛkɛnɩ Alɩfaa nɛ Omega.» Yehowa kaɣ wɩlʋʋ se Sataŋ kɛ cɛtɩyʋ nɛ kaabɩzaɣ.

19. Ye pɩwɛ ɛyaa kaɖɛ se petisi Paradisuu tamaɣ ŋga Ɛsɔ labɩ-ɖʋ yɔ kɔ-yɔɔ yɔ, ɛbɛ ŋpɩzɩɣ nɛ ŋla?

¹⁹ Taasɔɔ se alɩwaatʋ ndʋ payɩ ŋheyiɣ ɛyaa tɔm ndʋ Yehowa yɔɔdaa se eyele nɛ ɖa-taa tɛ se ɛ-tamaɣ kaɣ labʋ yɔ, ŋwɛɛ nɛ ŋcɛyɩsɩɣ lidaʋ ŋgʋ ña-maɣmaɣ ŋwɛnɩ ɛ-yɔɔ yɔ. Ye mbʋ, ye wiɖiyi ŋkalɩ nɔɔyʋ Paradisuu tamaɣ ŋga kɔ-tɔm pɔyɔɔdɩ Natʋ 21:4 taa yɔ nɛ ɛyʋ ɛnʋ ɛyɔɔdɩ se: «Tɔm ndʋ tɩwɛ ɖeu, ɛlɛ mamaɣzɩɣ se tɩɩpɩzɩɣ nɛ tɩla» yɔ, ɛzɩma ŋpɩzɩɣ nɛ ŋla? Ŋpɩzɩɣ nɛ ŋkalɩ-ɩ kalɩtʋ 5 nɛ 6 nɛ ŋlɩzɩ-ɩ pɩ-taa. Wɩlɩ-ɩ ɛzɩma Yehowa ñɩɣ niye tamaɣ ŋga kɔ-yɔɔ se paa pɩɩkpawa nɛ pitii yɔ kakaɣ labʋ yɔ.—Iza. 65:16.