Kewiyaɣ wabɩtʋ​—Palʋbɩ laŋhɛzɩyɛ tɔm yɔɔ tɔm hʋyaa ɛzɩdaa

KƖYAKƲ nakʋyʋ ɩwɛɛ nɛ isusuu tɔm kpaɣ ɖɩɣa nɛ ŋwolo ɖɩɣa. Pɩkɛdaa lɛ, ŋnaɣ ɛyaa samaɣ nakɛyɛ poliŋ taa. Kɛwɛɛ nɛ kɔñɔtʋʋnɩ-mɩ alɩwaatʋ ndʋ ŋwɛɛ nɛ ŋsusuu tɔm ɖɩɣdʋ nɔɔyʋ yɔ. Patalɩ mɩ-cɔlɔ lɛ, sɔɔndʋ kpa koobu weyi ña nɛ ɩ ɩlɩ tɔm susuu yɔ nɛ ekisi nɛ ɛcɔŋnɩ-wɛ. Abalʋ nɔɔyʋ ñɔtɩnɩ-mɩ nɛ ɛpɔzɩ-mɩ se: “Mɩ-naalɛ iwokini kpaɣ ɖɩɣa nɛ ŋwolo ɖɩɣa nɛ iheyiɣ ɛyaa Bibl taa tɔm yaa we? Ɛyaa wɛɛ nɛ papɩɣyɩɣ mɩ-tɔm.” Icosi-wɛ nɛ ñamtʋ se ɩkɛ Yehowa Aseɣɖe Tɩnaa. Ɛbɛ kaɣ labʋ pʋwayɩ?

Pɩlɩɣnɩ ɛjaɖɛ nɖɩ ɖɩ-taa ŋwɛɛ yɔ ɖɩ-paɣtʋ cɔlɔ. Pɩnzɩ nzɩ sɩɖɛwa yɔ sɩ-taa, lɩmaɣza wena ñɛ-ɛjaɖɛ taa komina kaawɛnɩ Yehowa Aseɣɖe Tɩnaa yɔɔ? Kɩhaɣaɣ Ɛsɔ sɛtʋ agbaa nʋmɔʋ faaa se ala a-tʋma na? Ye ɛɛɛ kɔyɔ, pɩtʋʋ fɛyɩ se pɩlɩnɩ ɛzɩma mi-koobiya kaañaɣ pana pɩnzɩ sakɩyɛ nɛ ‘palʋ tɔm kɩbandʋ yɔɔ’ yɔ pɩ-cɔlɔ. (Filiipu 1:7) Paa le ŋtɩɩwɛɛ yɔ, ye ŋmaɣzɩ ɛzɩma Yehowa Aseɣɖe Tɩnaa lʋbɩ tɔm ɖɩhʋyɛ nɛ pawa yɔ pɩ-yɔɔ yɔ, pɩkpazɩɣ ñe-tisuu ɖoŋ siŋŋ. Hɔɔlʋʋ kʋnɛ kɩkaɣ yɔɔdʋʋ wabɩtʋ ndʋ tɩ-taa natʋyʋ tɔm. Wabɩtʋ ndʋ, tɩwɩlɩɣ se toovenim taa lɛ Ɛsɔ Kewiyaɣ paɣzɩ ka-tʋmɩyɛ, mbʋ pʋyɔɔ yɔ ye pɩkɛ ɖa-maɣmaɣ ɖo-ɖoŋ taa kɔyɔ, ɖɩɩpɩzɩɣ nɛ ɖɩwa mbʋ.