TƆM KƖKPƐLƖKƖTƲ 03

Ŋpɩzɩɣ nɛ ŋtaa Bibl taa tɔm liu na?

Tayakaɣ maɣmaɣ

Bibl yɔɔdʋʋ lidaʋ tɔm ndɩ ndɩ nɛ kɩtasɩɣ lɔŋ sakɩyɛ ɖɔɖɔ. Pɩtɩla ŋsɔɔlaa se ŋtɩlɩ tɔm ndʋ kɩwɩlɩɣ yɔ, ɛlɛ nabʋyʋ yɔɔ lɛ ŋwɛɛ nɛ ŋkpaɣ ña-tɩ. Ðooo caanaʋ taa pama takayaɣ ŋga; pʋyɔɔ lɛ, ɛzɩ pɩwɛɛ se ɛyʋ etisi lidaʋ tɔm nɛ lɔŋ tasʋʋ ndɩ ndɩ mbʋ pɩwɛ ka-taa yɔ pɩ-yɔɔ? Toovenim lɛ, ŋtisiɣ tɔm ndʋ Bibl yɔɔdʋʋ se ɖɩpɩzɩɣ nɛ ɖɩnɩɩ wezuu leleŋ sɔnɔ sɔnɔ nɛ cee wayɩ yɔ tɩ-yɔɔ? Ɛyaa miiliyɔɔwaa sakɩyɛ tisiɣ tɩ-yɔɔ. Yele nɛ ɖɩna se ña ɖɔɖɔ ŋpɩzɩɣ nɛ ŋtisi tɩ-yɔɔ yaa we?

1. Kɛdɛsɩ nzɩ sɩwɛ Bibl taa yɔ toovenim taa lɛ sɩlaba?

Bibl heyiɣ-ɖʋ se tɔm ndʋ tɩwɛ kɩ-taa yɔ, tɩkɛ «toovenim tɔm ndʋ tɩwɛ siɣsiɣ yɔ.» (Eklezɩyasɩtɩ 12:10) Kɩkɛdɩɣ tɔm ndʋ tɩlabɩ keekee yɔ nɛ kɩyɔɔdʋʋ ɛyaa mba paacaɣ wezuu keekee yɔ pɔ-tɔm. (Kalɩ Luka 1:3; 3:1, 2.) Caanaʋ taa tɔm taa tazɩyaa nɛ tɛtɛɛ ñɩm huyiyaa sakɩyɛ lɩzɩ aseɣɖe se alɩwaatʋ, ɛyaa, lona nɛ kɛdɛsɩ nzɩ sɩwɛ Bibl taa yɔ, sɩkɛ toovenim.

2. Ɛbɛ yɔɔ ɖɩpɩzɩɣ nɛ ɖɩyɔɔdɩ se Bibl tɩkɛ takayaɣ ŋga ka-alɩwaatʋ ɖɛwa yɔ?

Bibl yɔɔdɩ toovenim tɔm ndɩ ndɩ alɩwaatʋ sakɩyɛ pʋcɔ nɛ ɛyaa tɩlɩ-tʋ. Kɩɖaʋ nakʋyʋ lɛ tɔm ndʋ kɩyɔɔdʋʋ lɛɣtʋ ñɩnʋʋ nʋmɔʋ taa yɔ. Tɔm sakɩyɛ ndʋ kɩyɔɔdʋʋ lɛɣtʋ ñɩnʋʋ nʋmɔʋ taa yɔ, ɛyaa sakɩyɛ taatisi tɩ-yɔɔ alɩwaatʋ ndʋ paama-tʋ yɔ. Ɛlɛ ɖa-alɩwaatʋ taa lɛɣtʋ ñɩnɩyaa lɩzɩ aseɣɖe se tɔm ndʋ Bibl yɔɔdʋʋ yɔ, tɩkɛ toovenim. «Tɩmʋnaa se ɛyʋ ɛtaa-tʋ liu paa ɛzɩmtaa, lɛɛlɛɛyɔ nɛ tam tam.»—Keɣa 111:8.

3. Ɛbɛ yɔɔ ɖɩpɩzɩɣ nɛ ɖitisi tɔm ndʋ Bibl yɔɔdʋʋ pɩlɩɩnɩ cee wayɩ yɔɔ yɔ tɩ-yɔɔ?

Bibl yɔɔdʋʋ ‘tɔm ndʋ tɩtɩlabɩta yɔ.’ (Izaayii 46:10) Kɩɩyɔɔdɩ mbʋ pɩlabɩ caanaʋ taa yɔ pɩ-taa sakɩyɛ tɔm alɩwaatʋ sakɩyɛ pʋcɔ nɛ tɩla. Tɔm ñʋʋ kʋnɛ kɩ-taa ɖɩkaɣ tazʋʋ Bibl natʋ tɔm natʋyʋ taa. Ɛzɩma tɩlabɩ ɖeyi ɖeyi yɔ, pɩwɛ piti kpem!

TAZƖ NƐ PILIMI

Tazɩ nɛ ŋna ɛzɩma ɖa-alɩwaatʋ taa lɛɣtʋ ñɩnɩyaa tɔm lakɩ nɔɔ kʋɖʋmaɣ nɛ Bibl taa tɔm yɔ; nɛ ŋtazɩ ɖɔɖɔ camɩyɛ Bibl natʋ tɔm ndʋ tɩwɛ piti kpem yɔ tɩ-taa natʋyʋ taa.

4. Lɛɣtʋ ñɩnɩyaa tɔm labɩ nɔɔ kʋɖʋmaɣ nɛ Bibl taa tɔm

Caanaʋ taa lɛ, ɛyaa sakɩyɛ maɣzaɣ se tɛtʋ caɣ nabʋyʋ yɔɔ. Ɩcɔnɩ VIDEO.

VIDEO: Patɩsɩɩ tɛtʋ nabʋyʋ yɔɔ (1:13)

Ðɩkalɩ tɔm natʋyʋ Yɔɔb takayaɣ taa, pamaʋ-tʋ yɔ pɩlakɩ pɩnzɩ 3500 mbʋ yɔ. Ɩkalɩ Yɔɔb 26:7, nɛ pʋwayɩ lɛ ɩtazɩ tɔm tʋnɛ tɩ-taa:

Ɛbɛ yɔɔ tɔm ndʋ Bibl yɔɔdʋʋ se tɛtʋ ‘tisusi nabʋyʋ yɔɔ’ yɔ tɩɖɩɣzɩɣ ɛyaa?

Pɩnzɩ 1800 waa taa, panɩ ɛzɩma lɩm pɩsɩɣ hohou nɛ pɩkpaɣ ɛsɔdaa nɛ pʋwayɩ pɩɖaɣnɩɣ pɩsʋʋ tɛtʋ yɔɔ yɔ pɩ-taa camɩyɛ. Ɛlɛ na tɔm ndʋ Bibl kaatɛm yɔɔdʋʋ pɩlakɩ pɩnzɩ 3500 mbʋ yɔ. Ɩkalɩ Yɔɔb 36:27, 28; nɛ pʋwayɩ lɛ ɩtazɩ tɔm tʋnɛ tɩ-taa:

Ɛzɩma lɩm pɩsɩɣ hohou nɛ pɩkpaɣ ɛsɔdaa nɛ pʋwayɩ pɩɖaɣnɩɣ pɩsʋʋ tɛtʋ yɔɔ yɔ, ŋmaɣzɩɣ suwe pɩ-yɔɔ?
Masɩ nzɩ ŋkalɩ lɛɛlɛɛyɔ yɔ, sɩkpazɩ ɖoŋ tisuu mbʋ ŋwɛnɩ Bibl yɔɔ yɔ?

Bibl yɔɔdɩ ɛzɩma lɩm pɩsɩɣ hohou nɛ pɩkpaɣ ɛsɔdaa nɛ pʋwayɩ pɩtasɩɣ pɩsʋʋ tɛtʋ yɔɔ yɔ pɩ-tɔm. Palabɩ yʋsasɩ nzɩ sɩwɩlɩɣ ɛzɩma lɩm kpaɣ ɛsɔdaa nɛ pʋwayɩ ɖɩɖaɣnɩɣ pɩsʋʋ tataa yɔ.

5. Bibl kaayɔɔdɩ mbʋ mbʋ pɩkaɣ labʋ pʋwayɩ yɔ pɩ-tɔm

Ɩkalɩ Izaayii 44:27–45:2, nɛ pʋwayɩ lɛ ɩtazɩ tɔm tʋnɛ tɩ-taa:

Babilɔɔnɩ yɔkʋʋ tɔm hɔɔlʋʋ taa lɛ, tɔm ndʋ Bibl kaayɔɔdaa nɛ pɩla pɩnzɩ 200 pʋcɔ nɛ tɩla?

Ɩcɔnɩ VIDEO.

VIDEO: Bibl kaayɔɔdɩ Babilɔɔnɩ yɔkʋʋ tɔm (0:58)

Caanaʋ taa tɔm wɩlɩɣ se Pɛrɩsɩ Wiyaʋ Siiruusi nɛ ɛ-sɔɔjanaa paayɔkɩ Babilɔɔnɩ pɩnaɣ 539 P.P.Y.a Paahɛ lɔɔʋ nakʋyʋ se pɔɔ ŋga kaacɔ Babilɔɔnɩ nɛ kata yɔ, ka-taa lɩm ikpe kɩ-taa nɛ papɩzɩ nɛ pɛtɛzɩ pɔɔ ŋga. Tɛtʋ taa mba kaatʋlɩ tɛtʋ nɔnɔsɩ nɛ pasɩɩ nɛ pɩha nʋmɔʋ sɔɔjanaa nɛ pasʋʋ tɛtʋ taa nɛ pɔyɔkɩ-tʋ, nɛ patɩla you. Pɔyɔkʋʋ Babilɔɔnɩ yɔ, pɩcɛzɩ pɩnzɩ 2500; nɛ halɩ nɛ sɔnɔ tɛtʋ ndʋ tɩkɛ njɛyɛ. Lɛɛlɛɛyɔ ɖɩtazɩ tɔm ndʋ Bibl kaayɔɔdaa yɔ tɩ-taa.

Ɩkalɩ Izaayii 13:19, 20; nɛ pʋwayɩ lɛ ɩtazɩ tɔm tʋnɛ tɩ-taa: