Wɩlɩ se ɖo-koobiya siɣsiɣ tɩnaa mba pakpadɩyaa yɔ pamʋ ñɩm ñɛ-ɛsɩndaa

1-2. (a) Ɛzɩ Aduwa 16:31 yɔɔdʋʋ yɔ, lɩmaɣza wena pɩwɛɛ se ɖɩwɛɛnɩ ɖo-koobiya siɣsiɣ tɩnaa mba pakpadɩyaa yɔ pɔ-yɔɔ? (b) Tɔm pɔzʋʋ mbʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

KAÐAƔ nakɛyɛ wɛ Etaazuunii tɛtʋ ndʋ payaɣ se Arɩkanzaasɩ yɔ tɩ-taa. Mba powoki peeɖe yɔ, papɩzɩɣ nɛ pana diyaamaa tataa yem. Ɛlɛ diyaamaa ŋgʋ patɩñɔɔzɩtɩ-kʋ se palabɩnɩ ajana wondu. Pʋyɔɔ lɛ, mba panaɣ-kʋ yɔ pa-taa sakɩyɛ pɩzɩɣ pɔɖɔ pɛɖɛɛ kɩ-yɔɔ nɛ paaɖiɣziɣna se ñɩm sɔsɔm pɩkɛnaa.

² Hɔɔlɩŋ nɩɩyɩ taa lɛ, ɖo-koobiya akpadɩyaa mba pɛwɛ siɣsiɣ yɔ pɛwɛ ɛzɩ diyaamaa ŋgʋ yɔ; pɛkɛnɩ ñɩm sɔsɔm siŋŋ. Ɛsɔtɔm kpaɣ ñʋʋ nɛ panzɩ nɛ tɩmaɣzɩnɩ sɔsɔtʋ hulaɣ. (Kalɩ Aduwa 16:31; 20:29) Ɛlɛ pɩpɩzɩɣ pɩla se ɖa-paa fɛyɩnɩ ñɩm mbʋ. Koobiya mba pa nɛ po-ɖoŋ yɔ, pa-taa mba peɖiɣziɣna se koobiya mba pakpadɩyaa yɔ pamʋ ñɩm siŋŋ yɔ, pehikiɣ mbʋ pɩmʋ ñɩm siŋŋ nɛ pɩkpaɖɩ ñɩm maɣmaɣ yɔ pɔ-cɔlɔ. Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ naadozo pʋnɛ pɩ-yɔɔ: Ɛbɛ yɔɔ koobiya siɣsiɣ tɩnaa mba pakpadɩyaa yɔ pamʋ ñɩm Yehowa ɛsɩndaa? Ɛbɛ yɔɔ koobiya siɣsiɣ tɩnaa mba, pamʋ ñɩm Yehowa ɛgbɛyɛ taa? Ɛbɛ ɖɩpɩzɩɣ ɖɩla nɛ ɖɩkpɛlɩkɩ lɔŋ pɔ-cɔlɔ?

ƐBƐ YƆƆ KOOBIYA SIƔSIƔ TƖNAA MBA PAKPADƖYAA YƆ PAMƲ ÑƖM YEHOWA ƐSƖNDAA?

3. Ɛzɩ Keɣa 91:13-16 yɔɔdʋʋ yɔ, ɛbɛ yɔɔ koobiya siɣsiɣ tɩnaa mba pakpadɩyaa yɔ pamʋ ñɩm Yehowa ɛsɩndaa?

³ Koobiya siɣsiɣ tɩnaa mba pakpadɩyaa yɔ pamʋ ñɩm Ɛsɔ Yehowa ɛsɩndaa. Ɛnaɣ ɛyaa mba pɛkɛnɩ ɖooo pa-laŋɩyɛ taa yɔ, nɛ ɛsɩm wɛtʋ kɩbandʋ ndʋ pɛwɛna yɔ, nɛ tɩmʋ ñɩm ɛ-ɛsɩndaa. Alɩwaatʋ ndʋ koobiya akpadɩyaa mba, pɛɖɛzɩɣ koobiya mba pa nɛ po-ɖoŋ yɔ lɔŋsɩnɖɛ nɖɩ pɛkpɛlɩkaa yɔ, pɩkɛdɩɣnɩ Yehowa. Pɛkpɛlɩkɩ lɔŋsɩnɖɛ nɖɩ pɩnzɩ sakɩyɛ nzɩ pakpaɣaa nɛ pɛsɛɛnɩ Yehowa siɣsiɣ yɔ sɩ-taa. (Yɔɔb 12:12; Adu. 1:1-4) Pa-laŋɩyɛ ɖɔkʋʋ ɖɔɖɔ mʋ ñɩm Yehowa ɛsɩndaa. (Mal. 3:16) Pakatɩ kala pe-wezuu caɣʋ taa; ɛlɛ, tisuu mbʋ pɛwɛnɩ Yehowa yɔɔ yɔ pɩtɩhɛɛ kaaʋ. Lidaʋ ŋgʋ pɛwɛnɩ cee wayɩ yɔɔ yɔ, kɩkpa ɖoŋ nɛ pɩkɩlɩ ŋgʋ paawɛna alɩwaatʋ ndʋ pacalɩ tɩlʋʋ toovenim yɔ. Nɛ Yehowa sɔɔlɩ-wɛ mbʋ pʋyɔɔ yɔ powobi pɩ-yɔɔ nɛ posusuu ɛ-hɩɖɛ pɩkpɛndɩnɩ ‘pa-akpadɩyɩtʋ taa.’—Kalɩ Keɣa 91:13-16.

4. Tɔm ndʋ pɩzɩɣ nɛ tɩkpazɩ ɖoŋ ɖo-koobiya siɣsiɣ tɩnaa mba pakpadɩyaa yɔ?

⁴ Ye ŋwɛɛ nɛ ŋkpadɩyɩɣ yɔ, ña-taa ɛtɛ se Yehowa tɔzʋʋ tʋmɩyɛ nɖɩ ŋtɛm labʋ nɛ pɩɖɛɛ yɔ ɖɩ-yɔɔ. (Ebr. 6:10) Ŋɖʋ nesi tɔm susuu tʋmɩyɛ nɛ kpekpeka, nɛ pɩkɛdɩnɩ ɖa-Caa weyi ɛwɛ ɛsɔdaa yɔ. Ŋɖɔkɩ ña-laŋɩyɛ kala taa, pɩkpɛndɩnɩ wena akɔnɩ-ŋ laŋwɛɛkɩyɛ siŋŋ yɔ a-taa. Ŋɖɔm Bibl paɣtʋ kila yɔɔ nɛ ŋlʋ a-yɔɔ, ŋla tʋma wena Yehowa ɛgbɛyɛ ɖʋ-ŋ yɔ camɩyɛ, nɛ ŋfalɩsɩ ɛyaa lalaa. Ŋñaɣ pana nɛ lɛɣzɩtʋ sakɩyɛ ndʋ Yehowa ɛgbɛyɛ laba yɔ tɩmalɩnɩ-ŋ. “Ŋɖʋ nesi” mba pɛwɛ alɩwaatʋ tɩŋa Ɛsɔ sɛtʋ tʋmɩyɛ taa yɔ nɛ “ŋkpazɩ-wɛ ɖoŋ.” Yehowa Ɛsɔ sɔɔlɩ-ŋ siŋŋ mbʋ pʋyɔɔ yɔ ŋɖɔkɩ ñe-siɣsiɣ wɛtʋ. Ɛlabɩ tamaɣ se “ɛɛlɔʋ ɛ-ɛgbaɣdɩnaa.” (Keɣa 36:28) Ɛha-ŋ lidaʋ kʋnɛ: ‘Mankaɣ-ŋ ɖɔkʋʋ nɛ ŋkɔɔ ŋñɔ ñʋʋ nɛ panzɩ.’ (Iza. 46:4) Ye mbʋ taamaɣzɩ se ŋkpadɩyaa nɛ pʋyɔɔ lɛ, ŋtɩtasɩ wɛʋ wazaɣ Yehowa ɛgbɛyɛ taa. Ŋwɛ wazaɣ siŋŋ!

KOOBIYA MBA PAKPADƖYAA YƆ, PAMƲ ÑƖM YEHOWA ƐGBƐYƐ TAA

5. Tɔm ndʋ yɔɔ pɩwɛɛ se koobiya akpadɩyaa ɩtɔzʋʋ?

⁵ Koobiya mba pakpadɩyaa yɔ papɩzɩɣ nɛ pɛwɛɛ wazaɣ Yehowa ɛgbɛyɛ taa hɔɔlɩŋ sakɩyɛ taa. Pɩpɩzɩɣ pɩla se pɛfɛyɩnɩ ɖoŋ weyi paawɛna yɔ; paa mbʋ yɔ, pɛwɛnɩ lɛɣtʋ. Pɛkpɛlɩkɩ lɛɣtʋ ndʋ pɩnzɩ sakɩyɛ nzɩ pakpaɣ nɛ pɛsɛɛnɩ Yehowa yɔ sɩ-taa. Yehowa pɩzɩɣ ewolo pɩ-yɔɔ nɛ ɛlabɩnɩ-wɛ tʋmɩyɛ hɔɔlɩŋ sakɩyɛ taa, ɛzɩ ɖɩkɔŋʋʋ naʋ caanaʋ taa kɩɖaŋ nɛ sɔnɔ sɔnɔ kɩɖaŋ nɩɩyɩ taa yɔ.

6-7. Ha Bibl taa akpadɩyaa mba Yehowa wazɩ-wɛ pe-siɣsiɣ wɛtʋ yɔɔ yɔ pa-taa nabɛyɛ kɩɖaŋ.

⁶ Ðɩpɩzɩɣ nɛ ɖɩna ɛyaa siɣsiɣ tɩnaa mba pɛsɛ Yehowa nɛ kpekpeka pa-akpadɩyɩtʋ taa yɔ, pa-kɩɖaŋ Bibl taa. Moyizi kaawɛnɩ pɩnzɩ 80 mbʋ yɔ alɩwaatʋ ndʋ Yehowa lɩzɩ-ɩ se ɛkɛ nayʋ nɛ Izrayɛɛlɩ samaɣ nɔɔɖɛyʋ yɔ. Danɩyɛɛlɩ pɩnzɩ kaacɛzɩ 90 yɔɔ, paa mbʋ yɔ ɛɛkpɛndɩ ɛkɛ Yehowa nayʋ mbʋ. Pɩtʋʋ fɛyɩ se apostoloo Yohanɛɛsɩ kaawɛnɩ pɩnzɩ 90 mbʋ yɔ alɩwaatʋ ndʋ fezuu kiɖeɖeu sɩnɩ-ɩ nɛ ɛma Natʋ takayaɣ yɔ.

⁷ Akpadɩyaa siɣsiɣ tɩnaa sakɩyɛ lalaa hɩla tɩsɛɛ, nɛ ɛyaa pɩzaɣ se pɔsɔɔ pɔ-yɔɔ kɛlɛʋ yem. Paa mbʋ yɔ, Yehowa tɩsɔɔ pɔ-yɔɔ nɛ ɛɛhɛyɩ-wɛ pe-siɣsiɣ wɛtʋ yɔɔ. Siimeyɔɔ kaakɛ abalʋ weyi “ɛɛwɛ siɣsiɣ nɛ ɛñaŋ Ɛsɔ” yɔ nɛ pɔyɔɔdɩ ɛ-tɔm tobi yem Bibl taa. Paa mbʋ yɔ, Yehowa kaasɩm ɛyʋ weyi ɛkɛnaa yɔ nɛ ɛha-ɩ waɖɛ se ɛna pɩɣa Yesu nɛ ɛyɔɔdɩ natʋ tɔm pɩlɩɩnɩ pɩɣa ŋga nɛ ko-ɖoo pɔ-yɔɔ. (Luka 2:22, 25-35) Maɣzɩ ɖɔɖɔ nayʋ halɩñɩnʋ Ana weyi ɛɛkɛ lelu yɔ ɛ-yɔɔ nɛ ŋna. Ɛɛwɛnɩ pɩnzɩ 84, ɛlɛ “ewokaɣ templo taa tam.” Ewokaɣ templo taa ɖoŋ ɖoŋ nɛ pʋyɔɔ lɛ Yehowa wazɩ-ɩ nɛ ɛna pɩɣa Yesu. Siimeyɔɔ nɛ Ana paamʋ ñɩm Yehowa ɛsɩndaa.—Luka 2:36-38.

8-9. Koobiya halɩñɩma mba pɛkɛ lelaa yɔ, ɛbɛ powoki pɩ-yɔɔ nɛ palakɩ nɛ paɖʋʋ nesi Yehowa ɛgbɛyɛ?

⁸ Alɩwaatʋ tʋnɛ tɩ-taa, koobiya akpadɩyaa siɣsiɣ tɩnaa sakɩyɛ kɛ kɩɖaŋ kɩbaŋ siŋŋ koobiya mba pa nɛ po-ɖoŋ yɔ. Iyele nɛ ɖɩna koobu halɩñɩnʋ Lois Didur kɩɖaʋ. Alɩwaatʋ ndʋ ɛpaɣzɩ nʋmɔʋ lɩzɩyʋ kiya tʋmɩyɛ Kanadaa ɛjaɖɛ taa yɔ, pɩnzɩ 21 ɖeke ɛɛwɛna. Pʋwayɩ lɛ, ɛ nɛ ɛ-walʋ John pala pɩnzɩ sakɩyɛ egeetiye yɔɔ cɔnʋʋ tʋmɩyɛ taa. Pʋwayɩ lɛ, pala tʋmɩyɛ Kanadaa Betɛɛlɩ taa nɛ pɩcɛzɩ pɩnzɩ 20. Lois wɛnɩ pɩnzɩ 58 lɛ, peheyi ɛ nɛ ɛ-walʋ John se powolo nɛ pala tʋmɩyɛ naɖɩyɛ Ukrɛɛnɩ ɛjaɖɛ taa. Ɛzɩma pakaɣ labʋ? Pakaɣ kɔʋ tɔm ñʋʋ se pakɩlɩ kpadɩyʋʋ nɛ paapɩzɩɣ nɛ pala Ɛsɔ sɛtʋ tʋmɩyɛ ɛjaɖɛ lɛɛɖɛ taa? Petisaa se palakɩ tʋmɩyɛ kɩfaɖɛ nɖɩ, nɛ paha waɖɛ John se ɛkɛ peeɖe Ɛgbɛyɛ piliŋa kɔɔmiite taa tʋ. Pɩlabɩ pɩnzɩ lʋbɛ lɛ John sɩ, ɛlɛ Lois kpaɣ lɩmaɣza se ewoki pɩ-yɔɔ nɛ ɛlakɩ ɛ-Ɛsɔ sɛtʋ tʋmɩyɛ. Lɛɛlɛɛyɔ, Lois wɛnɩ pɩnzɩ 81, ewobi pɩ-yɔɔ nɛ ɛsɛɣ Yehowa siɣsiɣ Ukrɛɛnɩ Betɛɛlɩ hɔʋ taa, nɛ Betɛɛlɩ hɔʋ taa ñɩma sɔɔlɩ-ɩ siŋŋ.

⁹ Mba pɛkɛ lelaa ɛzɩ Lois yɔ, pɩtɩla yɔ pɩɩnaɣ-wɛ ɛzɩ alɩwaatʋ ndʋ pa-walaa kaawɛnɩ pɛ-ɛsa yɔ; paa mbʋ yɔ pɛkpɛndɩ pamʋ ñɩm siŋŋ. Koobiya halɩñɩma mba paɖʋ pa-walaa nesi pɩnzɩ sakɩyɛ nɛ lɛɛlɛɛyɔ lɛ powoki pɩ-yɔɔ nɛ pɔɖɔkʋʋ pe-siɣsiɣ wɛtʋ yɔ, pamʋ ñɩm Yehowa ɛsɩndaa siŋŋ. (1 Tim. 5:3) Pɩtasɩ lɛ, pakpazɩɣ ɖoŋ koobiya mba pa nɛ po-ɖoŋ yɔ.

10. Kɩɖaʋ kɩbaŋʋ ŋgʋ Tony hawa?

¹⁰ Koobiya siɣsiɣ tɩnaa mba pakpadɩyaa nɛ pɛwɛ ɖɩsɩ nzɩ sɩ-taa pasɩɣ akpadɩyaa nɛ kʋdɔndɩnaa yɔ, pamʋ ñɩm ɖɔɖɔ. Payaɣ koobu nɔɔyʋ se Tony, lɛɛlɛɛyɔ ɛwɛ ɖɩsɩ nzɩ sɩ-taa nakɛyɛ taa. Pamɩyɩsɩ-ɩ lɩm Etaazuunii tɛtʋ ndʋ payaɣ se Pɛnɩsilivaanii yɔ tɩ-taa août 1942 taa. Alɩwaatʋ ndʋ lɛ, ɛɛwɛnɩ pɩnzɩ 20. Pamɩyɩsɩ-ɩ lɩm nɛ pitileɖi lɛ, peheyi-i se ɛsʋʋ sɔɔjatʋ tʋmɩyɛ taa nɛ ekizaa lɛ, pakpa-ɩ nɛ paɖʋ salaka pɩnzɩ naalɛ nɛ hɔɔlʋʋ. Ɛ nɛ ɛ-halʋ Hilda pɛwɛnɩ piya naalɛ, nɛ pasɩnɩ-sɩ nɛ sɩpaɣlɩ toovenim taa. Tony kaakɛ ɛgbɛyɛ taa ɛzʋtʋyaa ɛgbɛyɛ ñʋʋdʋ (lɛɛlɛɛyɔ lɛ, weyi ɛlakɩ tʋmɩyɛ nɖɩ yɔ ɛnʋ payaɣ se ɛgbɛyɛ taa ɛzʋtʋyaa tʋmɩyɛ kpɛndɩyʋ) nɛ ɛɛkɛ ɖɔɖɔ egeetiye kigbeɣluu yɔɔ cɔnɩyʋ pɩnzɩ sakɩyɛ. Ewokaɣ salaka taa nɛ ɛcɔŋnɩ kediɣzisi yɔɔ, nɛ ɛkpɛlɩkɩɣnɩ salaka tɩnaa Bibl. Lɛɛlɛɛyɔ Tony wɛnɩ pɩnzɩ 98, ɛlɛ ɛtɩsɔɔlɩ se eyele Yehowa tʋmɩyɛ labʋ. Ɛwɛɛ nɛ ɛlakɩ e-ɖoŋ ɖeɖe, nɛ ɛ nɛ ɛgbɛyɛ taa koobiya pɛkpɛndɩɣ nɛ pɛsɛɣ Yehowa.

11. Ɛzɩma ɖɩpɩzɩɣ nɛ ɖɩwɩlɩ se koobiya mba pɛwɛ ɖɩsɩ nzɩ sɩ-taa pasɩɣ akpadɩyaa nɛ kʋdɔndɩnaa yɔ pamʋ ñɩm ɖɛ-ɛsɩndaa?

¹¹ Ɛzɩma ɖɩpɩzɩɣ nɛ ɖɩɖʋ hɩɖɛ koobiya mba pakpadɩyaa nɛ pɛwɛ ɖɩsɩ nzɩ sɩ-taa pasɩɣ akpadɩyaa nɛ kʋdɔndɩnaa yɔ? Ye pɩsaŋ yɔ, ɛgbɛyɛ taa ɛzʋtʋyaa pɩzɩɣ nɛ pasɩnɩ-wɛ nɛ powolo kediɣzisi yaa pewelisi sɩ-taa tɔm. Papɩzɩɣ pasɩnɩ-wɛ ɖɔɖɔ nɛ posusi tɔm. Ðɩpɩzɩɣ nɛ ɖɩwɩlɩ se ɖɩmaɣzɩɣ pɔ-yɔɔ ye ɖiwoki nɛ ɖɩnaɣ-wɛ yaa ɖɩtɩŋɩɣnɩ vidéoconférence yɔɔ nɛ ɖɩyaɣ-wɛ yɔ. Pɩtɩla koobiya mba pakpadɩyaa yɔ pa-taa nabɛyɛ wɛ ɖɩsɩ nzɩ sɩ-taa pasɩɣ akpadɩyaa nɛ kʋdɔndɩnaa yɔ, sɩ-taa nakɛyɛ taa nɛ poposini pɛ-ɛgbɛyɛ. Ðɩsɔɔlaa se ɖɩwɩlɩ se ɖɩmaɣzɩɣ pɔ-yɔɔ siŋŋ. Ye ɖɩtɩtɩlɩ labʋ yɔ, ɖɩpɩzɩɣ nɛ ɖɩsɔɔ koobiya mba pɔ-yɔɔ. Alɩwaatʋ ndʋ ɖɩyɔɔdʋʋnɩ-wɛ yɔ pɩtɩla pɩɩwɛɣ pa-taa nabɛyɛ kɛlɛʋ yaa pamaɣzɩɣ se pɩtɩmʋna se pɔyɔɔdɩ pɔ-yɔɔ tɔm. Ɛlɛ ye ɖɩkpakɩɣ alɩwaatʋ nɛ ɖɩpɔzʋʋ-wɛ tɔm nɛ ɖiwelisiɣni-wɛ alɩwaatʋ ndʋ pɔyɔɔdʋʋ taa leleŋ weyi pehiɣ Yehowa ɛgbɛyɛ taa yɔ ɩ-tɔm yɔ, pɩkpazɩɣ-ɖʋ ɖoŋ siŋŋ.

12. Ɛbɛ ɖɩpɩzɩɣ nɛ ɖɩna ɖɛ-ɛgbɛyɛ maɣmaɣ taa?

¹² Pɩpɩzɩɣ pɩɖɩɣzɩ-ɖʋ se koobiya siɣsiɣ tɩnaa mba pakpadɩyaa nɛ pɛkɛ kɩɖaŋ kɩbaŋ yɔ, pɛwɛ ɖɛ-ɛgbɛyɛ maɣmaɣ taa. Payaɣ koobu halɩñɩnʋ nɔɔyʋ se Harriette, ɛsɛ Yehowa siɣsiɣ pɩnzɩ sakɩyɛ ɛ-ɛgbɛyɛ taa Niyuu Jɛrɩsee, Etaazuunii ɛjaɖɛ taa. Pʋwayɩ lɛ, ɛkʋyɩ peeɖe nɛ ewolo ɛcaɣ ɛ-pɛlɛ cɔlɔ. Ɛ-ɛgbɛyɛ kɩfaɖɛ taa koobiya kpaɣ alɩwaatʋ nɛ patɩlɩ-ɩ lɛ, peɖiɣzina se ɛkɛnɩ kɩɖaʋ kɩbaŋʋ siŋŋ tisuu nʋmɔʋ taa. Ɛkɛdɩ-wɛ ɛzɩma palakaɣ tɔm susuu tʋmɩyɛ alɩwaatʋ ndʋ ɛmʋ toovenim pɩnzɩ 1920 waa taa yɔ nɛ pɩkpazɩ-wɛ ɖoŋ. Paa ɛzɩmtaa ɛlɩɣ tɔm susuu lɛ, ɛɖɔkʋʋ wonuu ŋgʋ pañalɩɣnɩ kela yɔɔ yɔ, mbʋ pʋyɔɔ yɔ papɩzaɣ se pakpa-ɩ paa ɛzɩmtaa nɛ paɖʋ-ɩ salaka. Pɩnaɣ 1933 taa pakpa-ɩ tam nabʋlɛ nɛ paɖʋ-ɩ salaka. Ɛlabɩ kpɩtaʋ kʋɖʋmʋʋ kajalaɣ ɖeɖe, nɛ nabʋlɛ ɖeɖe ɖɔɖɔ lɛ ɛla kpɩtaʋ kʋɖʋmʋʋ. Alɩwaatʋ ndʋ tɩ-taa, ɛ-walʋ taakɛ Yehowa Aseɣɖe Tʋ, ɛlɛ ɛɖʋ-ɩ nesi. Alɩwaatʋ ndʋ pakpa-ɩ nɛ paɖʋ salaka yɔ, ɛ-walʋ kaawɛna nɛ ɛcɔŋnɩ pe-piya naadozo yɔɔ. Pɩtʋʋ fɛyɩ se koobiya akpadɩyaa siɣsiɣ tɩnaa mba pɛwɛ ɛzɩ Harriette yɔ, pamʋnaa se paɖʋ-wɛ hɩɖɛ.

13. Ɛbɛ ɖɩkpɛlɩkɩ wazaɣ ŋga akpadɩyaa wɛnɩ Yehowa ɛgbɛyɛ taa yɔ kɔ-yɔɔ?

¹³ Ðo-koobiya mba pakpadɩyaa yɔ pɛwɛnɩ tʋmɩyɛ kɩcɛyɩyɛ naɖɩyɛ Yehowa ɛgbɛyɛ taa. Pana ɛzɩma Yehowa wazɩ pa nɛ ɛ-ɛgbɛyɛ hɔɔlɩŋ ndɩ ndɩ sakɩyɛ taa yɔ. Hɔɔlɩŋ weyi ɩ-taa picoɖi-wɛ yɔ, pɛkpɛlɩkɩ lɔŋ ɩ-taa. Kpaɣ-wɛ ɛzɩ “lɔŋ ɖɩlɩyɛ” nɛ ŋkpɛlɩkɩ lɔŋ pɔ-cɔlɔ. (Adu. 18:4) Ye ŋkpaɣ alɩwaatʋ nɛ ŋtɩlɩ-wɛ yɔ, ñe-tisuu pɩzɩɣ pɩkpa ɖoŋ nɛ ŋkaɣ kpɛlɩkʋʋ lɔŋ sakɩyɛ.

YELE NƐ AKPADƖYAA KƖÐAŊ WAZƖ-Ŋ CAMƖYƐ

14. Wayɩ Wayɩ Paɣtʋ 32:7 seɣtiɣ koobiya mba pa nɛ po-ɖoŋ yɔ se pala we?

¹⁴ Ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋyɔɔdɩnɩ akpadɩyaa yɔ. (Kalɩ Wayɩ Wayɩ Paɣtʋ 32:7.) Pɩkɛ toovenim se paatasɩɣ naʋ camɩyɛ, paapɩzɩɣ ɖɔm lɛɛ lɛɛ, nɛ paapɩzɩɣ yɔɔdʋʋ ɛzɩ ɖooo lɛ yɔ, ɛlɛ pɔsɔɔlaa se powolo pɩ-yɔɔ nɛ pɛwɛɛ kpekpeka, nɛ pɛwɛnɩ “hɩɖɛ kɩbanɖɛ” Yehowa ɛsɩndaa. (Ekl. 7:1) Tɔzɩ mbʋ pʋyɔɔ pamʋ ñɩm Yehowa ɛsɩndaa yɔ pɩ-yɔɔ. Wolo pɩ-yɔɔ nɛ ŋɖʋʋ-wɛ hɩɖɛ. Wɛɛ ɛzɩ Eliizee yɔ. Ɛñɩɣ Eliya yɔɔ se ɛlɛ etisi nɛ ɛnʋ caɣ ɛ-cɔlɔ ɛ-kɛdɛzaɣ kɩyakɩŋ taa. Eliizee yɔɔdɩ tam nabudozo se: “Maakaɣ-ŋ yebu.”—2 Aw. 2:2, 4, 6.

15. Tɔm ndʋ ɖɩpɩzɩɣ nɛ ɖɩpɔzɩ koobiya mba pakpadɩyaa yɔ?

¹⁵ Pɔzʋʋ koobiya mba pakpadɩyaa yɔ tɔm nɛ nɔɔ kɩbaŋa nɛ ŋwɩlɩ se ŋmaɣzɩɣ pɔ-yɔɔ siŋŋ. (Adu. 1:5; 20:5; 1 Tim. 5:1, 2) Ŋpɩzɩɣ nɛ ŋpɔzɩ-wɛ tɔm tʋnɛ: “Alɩwaatʋ ndʋ ŋŋkɛ evebu yaa pɛlɛ yɔ, ɛbɛ yeba nɛ ña-taa tɛ se ŋlɩ toovenim yɔɔ?” “Ɛbɛ labɩ ñe-wezuu caɣʋ taa nɛ pɩsɩnɩ-ŋ nɛ ŋñɔtɩnɩ Yehowa nɛ pɩkɩlɩ?” “Ɛbɛ sɩnɩ-ŋ nɛ ŋwɛɛ taa leleŋ taa tam Yehowa sɛtʋ taa?” (1 Tim. 6:6-8) Pʋwayɩ lɛ, welisini-wɛ alɩwaatʋ ndʋ pɛkɛdɩɣ-ŋ pɔ-yɔɔ tɔm yɔ.

16. Ye koobu weyi ɛkpadɩyaa yɔ nɛ koobu weyi ɛ nɛ e-ɖoŋ yɔ pacakɩ nɛ pɛkɛdɩɣ yɔ, ɛzɩma pɩpɩzɩɣ nɛ pɩkpazɩ ɖoŋ pa-naalɛ?

¹⁶ Alɩwaatʋ ndʋ koobu weyi ɛkpadɩyaa yɔ nɛ koobu weyi ɛ nɛ e-ɖoŋ yɔ pacakɩ nɛ pɛkɛdɩɣ yɔ, pɩkpazɩɣ pa-naalɛ ɖoŋ. (Roma 1:12) Ña weyi ña nɛ ño-ɖoŋ yɔ, ña-taa kaɣ tɛm se Yehowa cɔŋnɩ ɛ-sɛyaa yɔɔ, nɛ koobu akpadɩyʋ ɛnʋ ɛkaɣ naʋ se ŋsɔɔlɩ-ɩ. Pɩkaɣ-ɩ kɛdɩnʋʋ se eheyi-ŋ ɛzɩma Yehowa wazɩ-ɩ yɔ pɩ-tɔm.

17. Ɛbɛ yɔɔ ɖɩpɩzɩɣ nɛ ɖɩyɔɔdɩ se koobiya siɣsiɣ tɩnaa mba pakpadɩyaa yɔ, pɩnzɩ wɛɣ nɛ sɩɖɛɣ lɛ peɖeɣ nɛ pɩkɩlɩɣ?

¹⁷ Ðoŋ ɖoŋ lɛ, ɛyʋ wɛɣ nɛ ɛkpadɩyɩɣ lɛ, ɛsa yɔɔ keɖeɣa cadɩɣ, ɛlɛ mba pɔɖɔkʋʋ pe-siɣsiɣ wɛtʋ Yehowa ɛsɩndaa yɔ, pɩnzɩ kaaɖɛɣ lɛ, pɛwɛɣ peɖeɣ nɛ pɩkɩlɩɣ. (1 Tes. 1:2, 3) Ɛbɛ yɔɔ tɔm ndʋ tɩkɛ toovenim? Mbʋ pʋyɔɔ yɔ pɩnzɩ wɛɣ nɛ sɩɖɛɣ lɛ, peyeki nɛ Ɛsɔ fezuu falɩsɩɣ-wɛ nɛ kɩsɩɣnɩ-wɛ se pɛwɛɛnɩ wɛtʋ kɩbandʋ. Ye ɖɩñakɩ pana se ɖɩtɩlɩ koobiya mba pakpadɩyaa yɔ nɛ ɖɩɖʋʋ-wɛ hɩɖɛ nɛ ɖɩkpɛlɩkɩɣ lɔŋ pɔ-cɔlɔ nɛ pɩkɩlɩɣ yɔ, ɖɩkaɣ-wɛ kpaɣʋ ɛzɩ koobiya mba pamʋ ñɩm siŋŋ yɔ nɛ pɩkɩlɩ.

18. Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

¹⁸ Pɩtɩkɛ alɩwaatʋ ndʋ koobiya mba pa nɛ po-ɖoŋ yɔ paɖʋʋ hɩɖɛ koobiya mba pakpadɩyaa yɔ, ti-ɖeke tɩ-taa ɛgbɛyɛ kpaɣ ɖoŋ, ɛlɛ ɖɩkpaɣ ɖoŋ ɖɔɖɔ alɩwaatʋ ndʋ koobiya mba pakpadɩyaa yɔ paɖʋʋ hɩɖɛ koobiya mba pa nɛ po-ɖoŋ yɔ. Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ ɛzɩma koobiya mba pakpadɩyaa yɔ papɩzɩɣ nɛ pawɩlɩ se ɛgbɛyɛ taa koobiya mba pa nɛ po-ɖoŋ yɔ pamʋ ñɩm yɔ.