Labɩnɩ tʋmɩyɛ «fezuu taa kʋjɔʋ» ŋgʋ ŋwɛna yɔ

Alɩwaatʋ ndʋ ɖa nɛ ɖo-koobiya ɖikpeɣliɣ yɔ, pɩkpazɩɣ-ɖʋ ɖoŋ. Pɩsa nɛ ɖɩkpazɩ ɖama ɖoŋ alɩwaatʋ ndʋ tɩ-taa lɛ, pɩfɛyɩ se ɖɩcaɣ ɖama cɔlɔ yem. Bibl yaɣ waɖɛ nɖɩ ɖɩwɛna se ɖɩkpazɩ ɖama tisuu ɖoŋ yɔ se «fezuu taa kʋjɔʋ.» (Roma 1:​11, 12) Ɛzɩma ɖɩpɩzɩɣ nɛ ɖɩlabɩnɩ kʋjɔʋ ŋgʋ tʋmɩyɛ camɩyɛ?

Tɩŋnɩ ndʋ ŋyɔɔdʋʋ yɔ tɩ-yɔɔ nɛ ŋla lalaa kʋjɔʋ. Ye ŋwɛɛ nɛ ŋcosuu tɔm ɛgbɛyɛ taa kediɣzaɣ nakɛyɛ taa yɔ, kpa ña-tɩ nɛ ŋtaakɩlɩɣ yɔɔdʋʋ ñɔ-yɔɔ tɔm ɖeke, ɛlɛ yɔɔdʋʋ ndʋ ŋkpɛlɩkɩ Bibl taa, Yehowa nɛ ɛ-samaɣ pɔ-yɔɔ yɔ pɩ-tɔm. Alɩwaatʋ ndʋ payɩ ña nɛ ño-koobiya ɩlakɩ kɛdaɣ yɔ, yɔɔdʋʋ tɔm ndʋ tɩpɩzɩɣ nɛ tɩkpazɩ pe-tisuu ɖoŋ yɔ.

Tɩŋnɩ lɩmaɣza wena ŋkpakɩɣ yɔ nɛ ña-lakasɩ yɔɔ nɛ ŋkpazɩ lalaa ɖoŋ. Pɩtɩla nabɛyɛ lɩzaa se powoki pɩ-yɔɔ nɛ palakɩ alɩwaatʋ tɩŋa Ɛsɔ sɛtʋ tʋmɩyɛ paa pɛwɛɛ nɛ pakatɩɣ kala yɔ. Lalaa lɛ, paa pɩɖɔkɩnɩ-wɛ pa-tʋma taa yaa palʋkɩnɩ kʋdɔŋ sɔsɔʋ nakʋyʋ yɔ, pañakɩ pana nɛ powoki kpɩtaʋ hɛkʋ taa kediɣzisi ɖoŋ ɖoŋ. Alɩwaatʋ ndʋ koobiya lalaa naɣ mbʋ yɔ pɩkpazɩɣ-wɛ ɖoŋ.

Tɔm ndʋ ŋyɔɔdʋʋ yɔ nɛ mbʋ ŋlakɩ yɔ pɩkpazɩɣ ño-koobiya ɖoŋ na? Nɛ ŋyeki se mbʋ ño-koobiya lakɩ yɔ, pɩkpazɩ-ŋ ɖoŋ na?