Ɛzɩma ŋpɩzɩɣ nɛ ŋla nesi ɖɔkʋʋ sɔnzɩ ɖʋtʋ ndʋ tɩɖʋʋ Yehowa hɩɖɛ yɔ?

1-2. Lɩmaɣza wena Yehowa wɛnɩ nesi ɖɔkʋʋ sɔnzɩ yɔɔ?

ŊWƐƐ nɛ ŋlakɩ lɩmaɣza se ŋɖɔkɩ nesi na? Ye ɛɛɛ yɔ, ŋmʋnɩ samtʋ. Pɩtʋʋ fɛyɩ se ŋwɛɛ nɛ ŋlakɩ ñe-nesi ɖɔkʋʋ sɔnzɩ ɖʋtʋ. Yehowa sɔɔlaa se ŋhiɣ taa leleŋ ñe-nesi ɖɔkʋʋ wiyea, nɛ ɛsɔɔlaa ɖɔɖɔ se ŋhiɣ taa leleŋ ñe-nesi ɖɔkʋʋ wayɩ.—Adu. 5:18; Hend. 3:11.

² Pɩcɛyaa kpem se ŋyele nɛ ñe-nesi ɖɔkʋʋ sɔnzɩ ɖʋ Yehowa hɩɖɛ. Ɛbɛ yɔɔ ɖɩyɔɔdʋʋ mbʋ? Nɛ ɛbɛ ŋpɩzɩɣ ŋla nɛ ñe-nesi ɖɔkʋʋ sɔnzɩ ɖʋ Yehowa hɩɖɛ? Mba pacaɣ ɖɔkʋʋ nesi yɔ, paa mba pɔyɔɔdʋʋnɩ tɔm ñʋʋ kʋnɛ kɩ-taa yɔ, paɣtʋ kila wena palabɩnɩ tʋmɩyɛ kɩ-taa yɔ, apɩzɩɣ nɛ asɩnɩ ɖa-tɩŋa nɛ ɖɩɖʋ Yehowa hɩɖɛ alɩwaatʋ ndʋ ɖiwoki nesi ɖɔkʋʋ sɔnzɩ nasɩyɩ taa yɔ yaa alɩwaatʋ ndʋ mba pacaɣ nesi ɖɔkʋʋ yɔ pɔpɔzʋʋ-ɖʋ lɔŋ tasʋʋ yɔ.

ƐBƐ YƆƆ PƖWƐƐ SE ÐIYELE NƐ ÐE-NESI ÐƆKƲƲ SƆNZƖ ÐƲ YEHOWA HƖÐƐ?

3. Krɩstʋ ñɩma nabɛyɛ kaalakɩ nesi ɖɔkʋʋ sɔnzɩ ɖʋtʋ lɛ, tɔm ndʋ yɔɔ pɩwɛɛ se pamaɣzɩ?

³ Krɩstʋ ñɩma nabɛyɛ kaalakɩ nesi ɖɔkʋʋ sɔnzɩ ɖʋtʋ lɛ, pɩwɛɛ se palabɩ-tʋ nɛ tɩla nɔɔ kʋɖʋmaɣ nɛ Bibl paɣtʋ kila. Ɛbɛ yɔɔ? Mbʋ pʋyɔɔ yɔ Yehowa labɩnɩ nesi ɖɔkʋʋ ɖʋtʋ. Ɛnʋ labɩnɩ nesi ɖɔkʋʋ sɔnzɩ kajalaɣ ñɩnzɩ, pʋ-tɔbʋʋ se ɛnʋ labɩnɩ Aɖam nɛ Ɛva pe-nesi ɖɔkʋʋ sɔnzɩ nɛ papɩsɩ halʋ nɛ ɛ-walʋ. (Kiɖe 1:28; 2:24) Pʋyɔɔ lɛ, Yehowa lɩmaɣza ɖeke pɩwɛɛ se mba pacaɣ nesi ɖɔkʋʋ sɔnzɩ labʋ yɔ palabɩnɩ tʋmɩyɛ.

4. Lɩmaɣzɩyɛ lɛɛɖɛ nɖɩ yɔɔ pɩwɛɛ se Krɩstʋ ñɩma mba pacaɣ nesi ɖɔkʋʋ yɔ, peyele nɛ pe-nesi ɖɔkʋʋ sɔnzɩ ɖʋ Yehowa hɩɖɛ?

⁴ Lɩmaɣzɩyɛ lɛɛɖɛ nɖɩ ɖɩ-yɔɔ pɩwɛɛ se ŋyele nɛ ñe-nesi ɖɔkʋʋ sɔnzɩ ɖʋ Yehowa hɩɖɛ yɔ, nɖɩ lɛ se ɛkɛ ña-Caa nɛ ña-taabalʋ kɩbanʋ. (Ebr. 12:9) Pɩtʋʋ fɛyɩ se ŋtɩsɔɔlɩ kaaʋ se mɩ-taabalɩyɛ ɛcɛ. Pʋyɔɔ lɛ, pɩfɛyɩ se ŋyele nɛ nabʋyʋ la ñe-nesi ɖɔkʋʋ wiye yaa pʋwayɩ nɛ pɩɖʋ-ɩ ɖɩwɩzɩyɛ. (Keɣ. 25:14) Nɛ ŋmaɣzɩɣ mbʋ payɩ Yehowa tɛmɩ-ŋ labʋ nɛ mbʋ ɛkaɣ-ŋ labʋ yɔ pɩ-yɔɔ lɛ, pɩtʋʋ fɛyɩ se ŋtisiɣ se ɛmʋnaa se ŋɖʋ-ɩ hɩɖɛ ñe-nesi ɖɔkʋʋ weyi.—Keɣ. 116:12.

ƐZƖMA ŊPƖZƖƔ ŊYELE NƐ ÑE-NESI ÐƆKƲƲ SƆNZƖ ÐƲ YEHOWA HƖÐƐ?

5. Ɛzɩma Bibl pɩzɩɣ kɩsɩnɩ mba pacaɣ ɖɔkʋʋ nesi yɔ nɛ pala pe-nesi ɖɔkʋʋ sɔnzɩ ɖʋtʋ?

⁵ Bibl tɩɖʋ paɣtʋ tete ɛzɩma pɩwɛɛ se pala nesi ɖɔkʋʋ sɔnzɩ yaa nesi ɖɔkʋʋ kazandʋ yɔ pɩ-yɔɔ. Pʋyɔɔ lɛ, mba pacaɣ ɖɔkʋʋ nesi yɔ, papɩzɩɣ pala ɖʋtʋ nɛ tɩmʋnɩ pɛ-wɛtʋ, tɩmʋnɩ ɛzɩma palakɩ nesi ɖɔkʋʋ sɔnzɩ pe-egeetiye taa yɔ nɛ mbʋ pa-maɣmaɣ pɔsɔɔlaa yɔ. Ɛlɛ pɩwɛɛ ɖɔɖɔ se toovenim Krɩstʋ ñɩma ɩña paɣtʋ ndʋ komina ɖʋwa pɩlɩɩnɩ nesi ɖɔkʋʋ yɔɔ yɔ. (Mat. 22:21) Paa lɩmaɣzɩyɛ nɖɩ nesi ɖɔkɩyaa ɩtɩɩkpaɣaa pɩlɩɩnɩ pe-nesi ɖɔkʋʋ sɔnzɩ yɔɔ yɔ, ye pɔɖɔŋ Bibl paɣtʋ kila yɔɔ yɔ, pakaɣ ɖʋʋ Yehowa hɩɖɛ nɛ peyele nɛ ɛ-taa la leleŋ. Ye mbʋ, paɣtʋ kila wena pɩzɩɣ nɛ asɩnɩ-wɛ?

6. Ɛbɛ yɔɔ pɩcɛyaa se mba pacaɣ ɖɔkʋʋ nesi yɔ pɔɖɔ paɣtʋ ndʋ komina ɖʋwa pɩlɩɩnɩ nesi ɖɔkʋʋ yɔɔ yɔ tɩ-yɔɔ?

⁶ Ðɔ komina paɣtʋ yɔɔ. (Roma 13:​1, 2) Ajɛɛ sakɩyɛ taa, pʋcɔ nɛ ɛyaa ɖɔkɩ nesi lɛ, pɩwɛɛ se pɔɖɔ paɣtʋ ndʋ komina ɖʋwa yɔ tɩ-yɔɔ. Pɩwɛɛ se Krɩstʋ ñɩma mba pacaɣ ɖɔkʋʋ nesi yɔ pañɩnɩ nɛ patɩlɩ paɣtʋ ndʋ pɛ-ɛjaɖɛ taa komina ɖʋ nesi ɖɔkʋʋ yɔɔ yɔ. Ye ŋsɔɔlaa se pasɩnɩ-ŋ nɛ ŋtɩlɩ paɣtʋ ndʋ yɔ, ŋpɩzɩɣ nɛ ŋpɔzɩ ɛgbɛyɛ taa ɛzʋtʋyaa.b

7. Wɛtʋ ndʋ pɩwɛɛ se ŋñaɣ pana nɛ tɩwɛɛ ñe-nesi ɖɔkʋʋ sɔnzɩ taa?

⁷ Yele nɛ ñamtʋ wɛɛ ñe-nesi ɖɔkʋʋ sɔnzɩ yɔɔ. (1 Kɔr. 10:​31, 32) Pɩtʋʋ fɛyɩ se ŋsɔɔlaa se pana piye nɖɩ fezuu kiɖeɖeu lʋlʋʋ yɔ ñe-nesi ɖɔkʋʋ sɔnzɩ taa nɛ ŋtɩsɔɔlɩ se pana lakasɩ nzɩ sɩlakɩ nɔɔ kʋɖʋmaɣ nɛ ɛjaɖɛ fezuu yɔ. (Gal. 5:​19-26) Ɛzɩ Bibl wɩlʋʋ yɔ, abalʋ kaɣnɩ kɛʋ ɛ-hɔʋ ñʋʋdʋ, pʋyɔɔ lɛ ɛnʋ pɩwɛɛ se ɛñaɣ pana nɛ ñamtʋ wɛɛ nesi ɖɔkʋʋ sɔnzɩ yɔɔ nɛ pɩkɛ taa leleŋ alɩwaatʋ. Ɛbɛ pɩzɩɣ piyele nɛ ñamtʋ wɛɛ nesi ɖɔkʋʋ sɔnzɩ yɔɔ? Ye pɔyɔɔdɩ nesi ɖɔkʋʋ tɔm yɔɔdʋʋ nɛ ñamtʋ, sɔɔlɩm nɛ kpekpeka yɔ pɩkaɣ sɩnʋʋ mba pɔkɔm nesi ɖɔkʋʋ sɔnzɩ taa yɔ nɛ peɖiɣzina se nesi ɖɔkʋʋ kɛ kʋjɔʋ ŋgʋ kɩlɩnɩ Ɛsɔ cɔlɔ yɔ. Pɩkaɣ-wɛ sɩnʋʋ ɖɔɖɔ nɛ pana se nesi ɖɔkʋʋ tɩkɛ aleɣya tɔm. Pʋyɔɔ koobiya sakɩyɛ lɩzɩɣ se ye pɩsaŋ yɔ, pala sɔnzɩ nzɩ Kewiyaɣ kpaaŋ taa. Ye ŋsɔɔlaa se pala nesi ɖɔkʋʋ tɔm yɔɔdʋʋ Kewiyaɣ kpaaŋ taa yɔ, pɩwɛɛ se ŋma takayaɣ ɛzʋtʋyaa ɛgbɛyɛ lɔŋ nɛ ŋpɔzɩ-wɛ se paha-mɩ Kewiyaɣ kpaaŋ.

8. Ye ŋsɔɔlaa se ŋla nesi ɖɔkʋʋ kazandʋ yɔ, ɛbɛ pɩwɛɛ se ŋla nɛ sɩɖʋ Yehowa hɩɖɛ? (Roma mba 13:13)

⁸ Kalɩ Roma mba 13:13. Ye ŋlɩzaa se pala kazandʋ ñe-nesi ɖɔkʋʋ wiye yɔ, ɛbɛ ŋpɩzɩɣ ŋla nɛ ɛjaɖɛ fezuu ɛtaawɛɛnɩ ɖoŋ sɩ-yɔɔ? Grɛɛkɩ tɔm piye nɖɩ pɛɖɛzaa se «kazandʋ ndʋ tɩ-taa pɛɖɛlɛsɩɣ niye» yɔ, ɖɩwɩlɩɣ kazandʋ ndʋ tɩ-taa ɛyaa kpaŋɩɣ sʋlʋm nɛ paɖʋʋ minziiki nɛ ɖoo ɖɛzɩɣ yɔ. (Kalɩ Roma mba 13:13 tɛ note d’étude, «fêtes débridées.») Ye ŋkpaɣ lɩmaɣza se sʋlʋm ɖoŋ ñɩmbʋ ɛwɛɛ kazandʋ taa yɔ, pɩwɛɛ se ŋcɔnɩ pi-ɖeɖe nɛ nɔɔyʋ ɛtaañɔɔ nɛ ɛɖɛlɛsɩ niye.c Ye paɖʋʋ minziiki yɔ, cɔnɩ pi-ɖeɖe nɛ pɩtaakɩlɩ wɛʋ ɖoŋ se pɩsa nɛ mba pɔkɔm kazandʋ taa yɔ papɩzɩ nɛ pɔyɔɔdʋʋ nɛ panɩɣ ɖama tɔm. Welisi minziikiwaa mba pakaɣ ɖʋʋ yɔ pa-taa tɔm camɩyɛ pʋcɔ nɛ ŋlɩzɩ-wɛ se pɩsa nɛ pataayele nɛ pituuli nɔɔyʋ.

9. Ye mba pɔɖɔkʋʋ nesi yɔ pɔsɔɔlaa se ɛyaa ɩlɩɩ nɛ pɔyɔɔdɩ tɔm natʋyʋ yaa pala aleɣya naayɛ kazandʋ taa yɔ, tɔm ndʋ yɔɔ pɩwɛɛ se pamaɣzɩ?

⁹ Ŋsɔɔlaa se pawɩlɩ kɩlɛmɩŋ nɩɩyɩ, videowaa nabɛyɛ yaa ŋsɔɔlaa se ɛyaa nabɛyɛ ɩlɩɩ nɛ pɔyɔɔdɩ tɔm natʋyʋ pazɩ yaa pala aleɣya naayɛ ñe-nesi ɖɔkʋʋ kazandʋ taa? Ðoŋ ɖoŋ lɛ mbʋ yekina se kazandʋ ɛwɛɛ ɖeu nɛ pɩkɩlɩ. Paa mbʋ yɔ, cɔnɩ pi-ɖeɖe nɛ mbʋ pakaɣ labʋ yɔ pɩkpazɩ ɛyaa ɖoŋ. (Filp. 4:8) Pɔzɩ ña-tɩ se: «Mbʋ pakaɣ labʋ yɔ pɩhaɣ ñamtʋ ɛyaa lalaa na? Pɩɖʋʋ hɩɖɛ nesi ɖɔkʋʋ ɖʋtʋ na?» Nɛ kɔzɩ kɔzɩ lɛ, pɔzɩ ña-tɩ se: «Pɩɖʋʋ Yehowa hɩɖɛ na?» Pɩkɛ toovenim se nɔɔyʋ pɩzɩɣ nɛ ɛlɩɩ nɛ ɛla tanaʋ nakʋyʋ se ɛyaa ihoŋ, ɛlɛ pɩfɛyɩ se ɛyɔɔdɩ tɔm ndʋ tiseɣtiɣ kʋzʋʋ lɩmaɣza yɔ. (Efɛz. 5:3) Ye ñɔ-hɔʋ taa mba nɛ ña-taabalaa pɔsɔɔlaa se palɩɩ nɛ pɔyɔɔdɩ natʋyʋ yɔ, yele nɛ patɩlɩ tɔm ndʋ ŋtɩsɔɔlɩ se pɔyɔɔdɩ yɔ.

10. Krɩstʋ mba nabɛyɛ kaalakɩ pe-nesi ɖɔkʋʋ sɔnzɩ ɖʋtʋ lɛ, ɛbɛ yɔɔ pɩcɛyaa se palabɩ-tʋ nɛ tɩwɛɛ kɛlɛʋ? (1 Yohanɛɛsɩ 2:​15-17)

¹⁰ La ɖʋtʋ ndʋ tɩwɛ kɛlɛʋ yɔ. (Kalɩ 1 Yohanɛɛsɩ 2:​15-17.) Alɩwaatʋ ndʋ Yehowa sɛyaa ñakɩ pana se paɖʋ-ɩ hɩɖɛ nɛ paahɔŋ ɛyaa lɩmaɣza nɛ powokini pa-maɣmaɣ pa-tɩ yɔɔ yɔ, pɩkɛdɩɣnɩ-ɩ. Pʋyɔɔ lɛ, Krɩstʋ ñɩma mba paahɔŋ ɛyaa lɩmaɣza se powoni pa-tɩ yɔɔ yɔ, paalakɩ ɖʋtʋ ndʋ tɩkpakɩɣ liidiye sakɩyɛ yɔ nɛ ndʋ tiyeki se pawɩlɩ mbʋ pɛwɛna yɔ. Ye ŋlabɩ ñe-nesi ɖɔkʋʋ sɔnzɩ ɖʋtʋ nɛ tɩwɛɛ kɛlɛʋ yɔ, wazasɩ nzɩ ŋhikiɣ? Iyele nɛ ɖɩna wazasɩ nzɩ koobu Mike hiɣaa yɔ alɩwaatʋ ndʋ ɛlabɩ mbʋ yɔ. Ɛwɛ Nɔɔrɩvɛɛjɩ ɛjaɖɛ taa. Ɛyɔɔdaa se: «Ðɩtɩtɔɔ kɩma, nɛ pɩha-ɖʋ waɖɛ nɛ ɖiwolo nʋmɔʋ lɩzʋʋ tʋmɩyɛ yɔɔ. Ðe-nesi ɖɔkʋʋ sɔnzɩ kaawɛ kɛlɛʋ ɛlɛ sɩɩwɛ ɖeu nɛ ɖɩɩsɔʋ sɩ-yɔɔ kpa.» Payaɣ koobu halɩñɩnʋ nɔɔyʋ se Tabitha, ɛwɛ Ɛndɩ ɛjaɖɛ taa. Ɛyɔɔdaa se: «Ðɩlabɩ ɖe-nesi ɖɔkʋʋ sɔnzɩ ɖʋtʋ nɛ tɩwɛɛ kɛlɛʋ. Piyeba nɛ pɩtɩha-ɖʋ nɩɣzɛ sakɩyɛ. Nɛ pɩtaacɛyɩ se ɖɩkpaɣ lɩmaɣza sakɩyɛ wena ayeki nɛ ɖɩɩnɩɣnɩ ɖama yɔ.»

11. Mba pacaɣ ɖɔkʋʋ nesi yɔ, ɛzɩma papɩzɩɣ nɛ pawɩlɩ se pɛwɛ kɛlɛʋ wondu suu nɛ pa-tɩ ñɔɔzʋʋ hɔɔlʋʋ taa? (Cɔnɩ ɖɔɖɔ kɩlɛmɩŋ.)

¹¹ Ŋtɛm lɩzʋʋ mbʋ ŋkaɣ suu ñe-nesi ɖɔkʋʋ wiye yɔ? Pɩtʋʋ fɛyɩ se ŋsɔɔlaa se ŋɖe evemiye nɖɩ nɛ pɩkɩlɩ. Halɩ Bibl alɩwaatʋ taa, mba pacaɣaɣ ɖɔkʋʋ nesi yɔ posuwaɣ wondu ndʋ tiyeki se peɖe camɩyɛ yɔ. (Iza. 61:10) Wondu ndʋ ŋkaɣ lɩzʋʋ se ŋsuu ñe-nesi ɖɔkʋʋ wiye yɔ, tɩpɩzɩɣ nɛ tɩwɛɛ ndɩ nɛ ndʋ ŋtiisuu yɔ, ɛlɛ pɩwɛɛ se tɩmaɣna. (1 Tim. 2:9) Taayele nɛ wondu suu nɛ ña-tɩ ñɔɔzʋʋ tɔm kɩlɩ cɛyʋʋ ñɛ-ɛsɩndaa.—1 Pɩy. 3:​3, 4.

12. Ɛbɛ yɔɔ pɩwɛɛ se mba pacaɣ ɖɔkʋʋ nesi yɔ pekizi pe-egeetiye taa nesi ɖɔkʋʋ sɔnzɩ nzɩ sɩɩlakɩ nɔɔ kʋɖʋmaɣ nɛ Bibl paɣtʋ kila yɔ?

¹² Kizi sɔnzɩ nzɩ sɩɩlakɩ nɔɔ kʋɖʋmaɣ nɛ Bibl paɣtʋ kila yɔ. (Natʋ 18:4) Sɔnɔ, cɛtɩm Ɛsɔ sɛtʋ sɔnzɩ nɛ feziŋ kɩdɛkɛdɩŋ yaʋ lakasɩ sidi nesi ɖɔkʋʋ sɔnzɩ nzɩ palakɩ ɛjaɖɛ yɔɔ yɔ sɩ-taa. Yehowa pakɩ-ɖʋ se ɖiposi ɖa-tɩ nɛ azuluma lakasɩ nzɩ. (2 Kɔr. 6:​14-17) Ye ŋpɔzʋʋ ña-tɩ se ɛzɩ lakasɩ nasɩyɩ kɛdɩnɩ Yehowa yaa sɩtɩkɛdɩnɩ-ɩ yɔ, ñɩnɩ sɩ-yɔɔ tɔm nɛ ŋñɩnɩ ɖɔɖɔ Bibl paɣtʋ kila wena apɩzɩɣ asɩnɩ-ŋ nɛ ŋkpaɣ lɩmaɣza kɩbana yɔ.

13. Mba pacaɣ ɖɔkʋʋ nesi yɔ, ɛzɩma papɩzɩɣ nɛ pawɩlɩ se pɛwɛnɩ Yehowa lɩmaɣza kʋjɔŋ weyi ɛyaa lakɩ-wɛ yɔ ɩ-yɔɔ?

¹³ Ðenɖe ŋwɛɛ yɔ, ɖoŋ ɖoŋ ɛyaa lakɩ kʋjɔŋ nesi ɖɔkɩyaa pe-nesi ɖɔkʋʋ wiye? Ye ɛɛɛ yɔ, pɩtʋʋ fɛyɩ se paa weyi ɛhaɣ ɛzɩ ɛ-wɛtʋ pɔzʋʋ yɔ. Pɩkɛ toovenim se peseɣtiɣ Krɩstʋ mba se pɛkɛ kʋjɔŋ laɖaa, nɛ pehikiɣ taa leleŋ alɩwaatʋ ndʋ palakɩ mbʋ yɔ. (Adu. 11:25; Tʋma 20:35) Ɛlɛ, pɩtɩmʋna se ɖiyele nɛ ɛyaa maɣzɩ se pɩkɛnɩ-wɛ kɩjɛyʋʋ se palabɩ-ɖʋ kʋjɔʋ, yaa pɩfɛyɩ se ɖiyele nɛ pamaɣzɩ se mbʋ pahawa yɔ pɩtɩlɩɩ pʋyʋ. Ye ɖɩwɛnɩ ɛsɩmɩyɛ kʋjɔŋ weyi ɛyaa lakɩ-ɖʋ nɛ pa-laŋɩyɛ pilim yɔ ɩ-yɔɔ yɔ, ɖɩwɩlɩɣ se ɖɩmaɣzɩɣnɩ Yehowa.—2 Kɔr. 9:7.

MBƲ PƖPƖZƖƔ PƖSƖNƖ-Ŋ NƐ ŊFƐƐ KALA YAA ŊLƲBƖNƖ-YƐ YƆ

14. Kala wena mba pacaɣ ɖɔkʋʋ nesi yɔ pa-taa nabɛyɛ katɩɣ?

¹⁴ Ŋŋlakɩ ñe-nesi ɖɔkʋʋ ɖʋtʋ lɛ, ŋpɩzɩɣ nɛ ŋkatɩ kala mbʋ pʋyɔɔ yɔ ŋñɩnɩɣ se ŋɖʋ Yehowa hɩɖɛ. Pɩpɩzɩɣ nɛ pɩlabɩ-ŋ kaɖɛ se ŋyele nɛ ñe-nesi ɖɔkʋʋ ɖʋtʋ wɛɛ kɛlɛʋ. Payaɣ koobu abalɩñɩnʋ nɔɔyʋ se Charlie, ɛwɛ Salomɔɔ Lɩm Hɛkʋ Taa Tɛtʋ taa. Ɛyɔɔdaa se: «Pɩɩwɛ kaɖɛ se ɖɩlɩzɩ mba ɖɩyaa ɖe-nesi ɖɔkʋʋ kazandʋ taa yɔ. Ðɩwɛnɩ taabalaa sakɩyɛ, nɛ ɖɔ-sɔnzɩ taa lɛ, pɩfɛyɩ se ŋyaa nɔɔyʋ nɛ ŋyele lɛlʋ.» Tabitha weyi ɖɩyɔɔdɩ ɛ-tɔm nɛ pɩɖɛɛ yɔ ɛyɔɔdaa se: «Ðenɖe mɛwɛɛ yɔ, ɖoŋ ɖoŋ lɛ ɛyaa kaalakɩ pe-nesi ɖɔkʋʋ kazandʋ lɛ, payaɣ ɛyaa sakɩyɛ. Pɩɩlabɩ ɖa-lʋlɩyaa kaɖɛ se petisi se ɛyaa 100 ɖeke ɖɩyaɣ ɖe-nesi ɖɔkʋʋ kazandʋ taa.» Payaɣ koobu halɩñɩnʋ nɔɔyʋ se Sarah, ɛwɛ Ɛndɩ ɛjaɖɛ taa. Ɛyɔɔdaa se: «Ɛyaa nabɛyɛ kaŋ pa-lɩmaɣza liidiye nɖɩ pɛwɛna yɔ ɖɩ-yɔɔ nɛ ndʋ lalaa maɣzɩɣ pɔ-yɔɔ yɔ tɩ-yɔɔ. Mɔ-hɔʋ taa mba nabɛyɛ labɩ nesi ɖɔkʋʋ kazandʋ sɔsɔtʋ, piyeba nɛ pɩlakɩ-m ɛzɩ pɩwɛɛ se ma ɖɔɖɔ mala nɛ pɩkɩlɩ mbʋ yɔ.» Ɛbɛ pɩzɩɣ pɩsɩnɩ-ŋ nɛ ŋwa kala ana nɛ kala lɛɛna?

15. Ɛbɛ yɔɔ pɩcɛyaa se mba pacaɣ ɖɔkʋʋ nesi yɔ patɩmɩɣ ɖoŋ ɖoŋ alɩwaatʋ ndʋ palakɩ pe-nesi ɖɔkʋʋ ɖʋtʋ yɔ?

¹⁵ Ɩɩlakɩ mi-nesi ɖɔkʋʋ ɖʋtʋ lɛ, ɩtɩmɩɣ ɖoŋ ɖoŋ. Ɩpɩzɩɣ nɛ iheyi Yehowa kala wena ɩkatɩɣ yɔ nɛ ɛzɩma pɩlakɩ-mɩ yɔ pɩ-tɔm. (Filp. 4:​6, 7) Ɩpɩzɩɣ nɛ ɩpɔzɩ-ɩ se ɛsɩnɩ-mɩ nɛ ɩkpaɣ lɩmaɣza kɩbana, ɩcaɣ ɖiɣ ɖiɣ alɩwaatʋ ndʋ ɩnɩɣzɩɣ yɔ nɛ ɛha-mɩ ɖɔɖɔ abalɩtʋ alɩwaatʋ ndʋ pɩpɔzʋʋ se ɩkpaɣ lɩmaɣza wena awɛ ndɩ nɛ lalaa ñɩna yɔ. (1 Pɩy. 5:7) Nɛ ɩnaɣ ɛzɩma Yehowa cosuu mɩ-adɩma yɔɔ yɔ lɛ, ɩkaɣ-ɩ taʋ liu nɛ pɩkɩlɩ. Tabitha weyi ɖɩyɔɔdɩ ɛ-tɔm nɛ pɩɖɛɛ yɔ ɛyɔɔdaa se: «Sɔɔndʋ kpaɣaɣ ma nɛ man-ɖaŋ se pɩtaakɛdɩ nɛ ɖa-naalɛ yaa ɖa nɛ ɖɔ-hɔŋ taa mba ɖɩɩnɩɣnɩ ɖama lɩmaɣza wena ɖɩkpakɩɣ yɔ a-taa. Pʋyɔɔ lɛ, alɩwaatʋ ndʋ payɩ ɖɩcakɩ se ɖɩyɔɔdɩ ɖe-nesi ɖɔkʋʋ ɖʋtʋ tɔm yɔ ɖɩpaɣzɩɣnɩ adɩma. Toovenim taa lɛ, Yehowa sɩnɩ-ɖʋ nɛ laŋhɛzɩyɛ wɛɛ ɖa-naalɛ ɖɛ-hɛkʋ taa nɛ ɖa nɛ ɖɔ-hɔŋ taa mba ɖɛ-hɛkʋ taa.»

16-17. Mba pacaɣ ɖɔkʋʋ nesi yɔ paalakɩ ɖʋtʋ lɛ, ye pɔyɔɔdʋʋnɩ ɖama yaa pɔ-hɔŋ taa mba nɛ ñamtʋ yɔ ɛzɩma pɩsɩɣnɩ-wɛ?

¹⁶ Ɩyɔɔdɩnɩ ɖama kpayɩ, ɛlɛ ɩla mbʋ nɛ ñamtʋ. (Adu. 15:22) Pɩkaɣ pɔzʋʋ se mɩ-naalɛ ɩkpaɣ lɩmaɣza sakɩyɛ pɩlɩɩnɩ mi-nesi ɖɔkʋʋ yɔɔ. Lɩmaɣza ana a-taa naayɛ lɛ evemiye nɖɩ ɩkaɣ ɖɔkʋʋ nesi yɔ, liidiye nɖɩ ɩkaɣ labɩnʋʋ tʋmɩyɛ yɔ, ɛyaa mba ɩkaɣ yaʋ yɔ nɛ lɩmaɣza lɛɛna. Ɛlɛ pʋcɔ nɛ ɩkpaɣ lɩmaɣza lɛ, pɩwɛɣ ɖeu se ɩyɔɔdɩ ndʋ mɩ-taa paa weyi lɛ ɛmaɣzɩɣ yɔ pɩ-tɔm nɛ ɩyɔɔdɩ ɖɔɖɔ Bibl paɣtʋ kila wena apɩzɩɣ asɩnɩ-mɩ nɛ ɩkpaɣ lɩmaɣza kɩbana yɔ a-tɔm. Pɩwɛɣ ɖeu ɖɔɖɔ se ɩyɔɔdɩ lɔŋ weyi koobiya mba papɩ fezuu taa nɛ pɛkɛ kɩɖaŋ kɩbaŋ yɔ patasɩ-mɩ yɔ ɩ-tɔm. Paa weyi ɛɛyɔɔdʋʋ mbʋ ɛsɔɔlaa se pala yɔ pɩ-tɔm lɛ, ɛyɔɔdɩnɩ nɔɔ kɩbaŋa, ɛwɩlɩ se ɛnɩɣ tɔm taa nɛ ɛtaañɔɔnɩ ndʋ ɛmaɣzɩɣ yɔ. Ye mɩ-lʋlɩyaa ɩsɔɔlaa se ɩla nabʋyʋ mi-nesi ɖɔkʋʋ wiye nɛ pɩɩkaɖɩɣnɩ Bibl paɣtʋ kila yɔ, pɩwɛɣ ɖeu se ɩɖʋ-wɛ hɩɖɛ nɛ ɩlabɩ-pʋ, mbʋ pʋyɔɔ yɔ pɩkɛnɩ paba ɖɔɖɔ taa leleŋ kɩyakʋ. Ɛlɛ ye ɩɩpɩzɩɣ se ɩla mbʋ pɔpɔzʋʋ-mɩ yɔ, iheyi-wɛ nɛ sɔɔlɩm mbʋ pʋyɔɔ ɩɩpɩzɩɣ nɛ ɩlabɩ-pʋ yɔ. (Kol. 4:6) Iheyi mɩ-hɔŋ taa mba kpayɩ se mɩ-kaɖʋwa sɔsɔɔ lɛ se mi-nesi ɖɔkʋʋ kɩyakʋ ɛkɛ taa leleŋ kɩyakʋ nɛ pɩɖʋ Yehowa hɩɖɛ.

¹⁷ Pɩpɩzɩɣ nɛ pɩwɛɛ kaɖɛ se iheyi mɩ-lʋlɩyaa mbʋ pʋyɔɔ ɩkpaɣ lɩmaɣza naayɛ yɔ, kɔzɩ kɔzɩ ye pɛfɛyɩ toovenim taa yɔ. Payaɣ koobu abalɩñɩnʋ nɔɔyʋ se Santhosh, ɛwɛ Ɛndɩ ɛjaɖɛ taa. Ɛyɔɔdaa se: «Ðɔ-hɔʋ taa mba ñɩnaɣ se ɖɩla Ɛnduu mba Ɛsɔ sɛtʋ sɔnzɩ ndɩ ndɩ ɖe-nesi ɖɔkʋʋ wiye. Ma nɛ man-ɖaŋ ɖɩlɩzaɣ-wɛ tɔm taa lɛ, pɩkpaɣ-ɖʋ alɩwaatʋ sakɩyɛ. Ɛlɛ ɖitisaa nɛ ɖɩɖɔ pa-lɩmaɣza naayɛ yɔɔ mbʋ pʋyɔɔ yɔ ataakaɖɩɣnɩ Bibl paɣtʋ kila. Kɩɖaŋ nɩɩyɩ yɔ: Ðɩlɛɣzɩ tɔɔnaɣ ŋga ɖɩɩsɔɔlaa se patɩzɩ yɔ nɛ ɖɩla ŋga pɔsɔɔlaa yɔ. Ðɩkpaɣ lɩmaɣzɩyɛ ɖɔɖɔ se ɖiyeki hendu natʋyʋ nɛ payɛ naayɛ mbʋ pʋyɔɔ yɔ aleɣya ana atɩmalɩnɩ-wɛ.»

18. Ɛbɛ pɩzɩɣ pɩsɩnɩ-mɩ nɛ mɩ-taa tɛ se mi-nesi ɖɔkʋʋ kɩyakʋ kaɣ ɖɔm camɩyɛ? (1 Kɔrɛntɩ mba 14:40) (Cɔnɩ ɖɔɖɔ kɩlɛmʋʋ.)

¹⁸ Ɩla ɖʋtʋ camɩyɛ. Ye ɩlabɩ ɖʋtʋ camɩyɛ yɔ, pɩtʋʋ fɛyɩ se pɩkaɣ yebu nɛ ɩɩkɩlɩɣ nɩɣzʋʋ mi-nesi ɖɔkʋʋ wiye. (Kalɩ 1 Kɔrɛntɩ mba 14:40.) Payaɣ koobu abalɩñɩnʋ nɔɔyʋ se Wayne, ɛwɛ Tayɩwaanɩ ɛjaɖɛ taa, ɛyɔɔdaa se: «Pɩɩkazɩ avema pazɩ se ɖe-nesi ɖɔkʋʋ evemiye ɛtalɩ lɛ, ɖa nɛ mba paha pa-tɩ se pasɩɣnɩ-ɖʋ nɛ ɖɩñɔɔzɩ ɖe-nesi ɖɔkʋʋ sɔnzɩ yɔ ɖɩla kediɣzaɣ cikpelaɣ nakɛyɛ. Ðɩɩyɔɔdɩ ɖʋtʋ ndʋ ɖɩtɛm labʋ yɔ tɩ-tɔm, nɛ ɖɩla mbʋ pakaɣ labʋ nesi ɖɔkʋʋ wiye yɔ pɩ-tɛ la ŋwɩlɩwaa se pɩsa nɛ mbʋ ɖɩkaɣ labʋ puwiye yɔ pɩɖɔ camɩyɛ.» Ye ɩlabɩ mbʋ payɩ ɩpɩzɩɣ yɔ nɛ ɩɖɔ alɩwaatʋ yɔɔ yɔ, ɩwɩlɩɣ se ɩwɛnɩ ñamtʋ mba pɔkɔŋ mi-nesi ɖɔkʋʋ taa yɔ pɔ-yɔɔ.

19. Ɛbɛ ɩpɩzɩɣ ɩla nɛ mi-nesi ɖɔkʋʋ kazandʋ ɖʋ Yehowa hɩɖɛ?

¹⁹ Ye ɩmaɣzaa nɛ ɩna kala wena apɩzɩɣ nɛ akɔɔ mi-nesi ɖɔkʋʋ kazandʋ taa nɛ mbʋ ɩpɩzɩɣ ɩla nɛ ɩlʋbɩnɩ-yɛ yɔ, pɩpɩzɩɣ pɩsɩnɩ-mɩ nɛ ɩfɛɛ-yɛ. (Adu 22:3) Pɩtɩla ɖenɖe ɩwɛɛ yɔ ɖoŋ ɖoŋ paalakɩ nesi ɖɔkʋʋ kazandʋ lɛ, ɛyaa nabɛyɛ kɔŋ paa patɩyaa-wɛ yɔ. Pɩwɛɛ se ɩmaɣzɩ nɛ ɩna se ɛbɛ ɩpɩzɩɣ ɩla nɛ pɩtaala mbʋ. Iyele nɛ mɩ-hɔŋ taa ñɩma mba pɛfɛyɩ toovenim taa yɔ patɩlɩ ɛzɩma nesi ɖɔkʋʋ kazandʋ kaɣ ɖɔm yɔ nɛ lɩmaɣza wena ɩwɛnɩ nesi ɖɔkʋʋ sɔnzɩ nasɩyɩ yɔɔ yɔ. Ɩpɩzɩɣ nɛ ɩwɩlɩ-wɛ tɔm ñʋʋ «Comment se passe un mariage chez les Témoins de Jéhovah?» kɩwɛ jw.org yɔɔ. Ɩpɩzɩɣ nɛ ɩpɔzɩ koobu weyi ɩtaɣ-ɩ liu yɔ se ɛkɛ mi-nesi ɖɔkʋʋ «kazandʋ yɔɔ cɔnɩyʋ.» (Yoh. 2:8) Ye ɩlɩzɩ-ɩ ɖʋtʋ ndʋ ɩlaba yɔ tɩ-taa camɩyɛ yɔ, ɛpɩzɩɣ ɛsɩnɩ-mɩ nɛ mi-nesi ɖɔkʋʋ sɔnzɩ ɖɔ camɩyɛ ɛzɩ ɩsɔɔlʋʋ yɔ nɛ sɩɖʋ Yehowa hɩɖɛ.

20. Tɔm ndʋ yɔɔ pɩwɛɛ se mba pacaɣ ɖɔkʋʋ nesi yɔ pɔtɔzɩ?

²⁰ Ɩɩmaɣzɩɣ mbʋ payɩ pɩpɔzʋʋ se ɩla yɔ pɩ-yɔɔ lɛ, pɩpɩzɩɣ nɛ pɩha-mɩ nɩɣzɛ. Ɛlɛ ɩtɔzɩ se evemiye kʋɖʋmɖɩyɛ ɖeke ɩkaɣ labʋ mi-nesi ɖɔkʋʋ sɔnzɩ nzɩ. Evemiye nɖɩ, ɖɩkɛ mi-wezuu caɣʋ taa alɩwaatʋ ndʋ mɩ-naalɛ ɩkpɛndɩɣ nɛ ɩsɛɛ Yehowa yɔ tɩ-ɖɩbazɩyɛ. Pʋyɔɔ lɛ, ɩla mbʋ payɩ ɩpɩzɩɣ yɔ nɛ mi-nesi ɖɔkʋʋ sɔnzɩ wɛɛ kɛlɛʋ nɛ sɩɖʋ Yehowa hɩɖɛ. Ɩtaa Yehowa liu, ɛkaɣ-mɩ sɩnʋʋ nɛ ɩpɩzɩ nɛ ɩla mi-nesi ɖɔkʋʋ sɔnzɩ ɖʋtʋ camɩyɛ. Nɛ pɩkaɣ yebu nɛ pʋwayɩ ɩtɔzʋʋ sɔnzɩ nzɩ sɩ-yɔɔ lɛ, mɩ-taa lakɩ leleŋ ɛlɛ pɩɩkɛɣnɩ agbiɖa.—Keɣ. 37:​3, 4.