Koobiya akpadɩyaa, ɩmʋ ñɩm ɛgbɛyɛ taa
«Mɔntɔzʋʋ mbʋ manpɩzaa nɛ mala mɛn-pɛlɛtʋ taa yɔ pɩ-yɔɔ lɛ, pɩɖɩɣzɩɣ-m kpem. Ɛlɛ lɛɛlɛɛyɔ, akpadɩyɩtʋ yeba nɛ maapɩzɩɣ se mala tʋma sakɩyɛ ɛzɩ maalabʋ nɛ pɩɖɛɛ yɔ.»—Connie, ɛwɛnɩ pɩnzɩ 83.
Pɩtɩla ña ɖɔɖɔ, ŋŋpɩzɩɣ se ŋla tʋma sakɩyɛ ɛzɩ ŋŋlabʋ alɩwaatʋ ndʋ ŋŋkɛ evebu yaa pɛlɛ yɔ. Paa ña-taa ɛtɛma se ŋɖɔkɩ ñe-siɣsiɣ wɛtʋ Yehowa ɛsɩndaa pɩnzɩ sakɩyɛ yɔ, ye ŋkpakɩɣ mbʋ ŋlakɩ sɔnɔ yɔ nɛ ŋmaɣzɩɣnɩ mbʋ ŋlakaɣ ɖooo lɛ yɔ, pɩpɩzɩɣ nɛ pitibi-ŋ yɔɔɔ. Ye ŋwɛ wɛtʋ ndʋ tɩ-taa yɔ, ɛbɛ pɩzɩɣ pɩsɩnɩ-ŋ nɛ ŋtaalesi ña-taa leleŋ?
ƐBƐ YEHOWA SƆƆLAA SE ŊLA?
Pɔzɩ ña-tɩ se: «Ɛbɛ Yehowa sɔɔlaa se mala?» Tɔm ndʋ tɩwɛ Wayɩ Wayɩ Paɣtʋ 6:5 taa yɔ, tɩpɩzɩɣ nɛ tɩhɛzɩ ña-laŋɩyɛ. Pɔyɔɔdɩ peeɖe se: «Pɩwɛɛ se ŋsɔɔlɩ ñɛ-Ɛsɔ Yehowa nɛ ña-laŋɩyɛ kpeekpe, nɛ ña-kalɩzaɣ kpeekpe nɛ ño-ɖoŋ kpeekpe.»
Ɛzɩ pɔyɔɔdʋʋ mayaɣ ŋga ka-taa yɔ, Yehowa sɔɔlaa se ŋsɛɛ-ɩ nɛ ña-laŋɩyɛ, ña-kalɩzaɣ nɛ ño-ɖoŋ kpeekpe. Tɔm ndʋ tɩpɩzɩɣ tɩsɩnɩ-ŋ nɛ ŋtaakpakɩɣ ña-tɩ nɛ ŋmaɣzɩɣnɩ ɛyaa lalaa yaa ŋtaakpakɩɣ mbʋ ŋlakɩ lɛɛlɛɛyɔ yɔ nɛ ŋmaɣzɩɣnɩ mbʋ ŋlakaɣ ɖooo lɛ yɔ.
Maɣzɩ tɔm tʋnɛ tɩ-yɔɔ nɛ ŋna: Ŋŋkɛ evebu yaa pɛlɛ lɛ, pɩtʋʋ fɛyɩ se ŋlakaɣ ño-ɖoŋ ɖeɖe Yehowa sɛtʋ taa ɛzɩ ñɛ-wɛtʋ haʋ-ŋ nʋmɔʋ alɩwaatʋ ndʋ tɩ-taa yɔ. Nɛ pɩtʋʋ fɛyɩ se ŋwɛɛ nɛ ŋlakɩ ño-ɖoŋ ɖeɖe sɔnɔ ɖɔɖɔ ɛzɩ ñɛ-wɛtʋ haʋ-ŋ nʋmɔʋ yɔ. Ye ŋmaɣzɩɣ tɔm ndʋ tɩ-yɔɔ yɔ, ŋkaɣ ɖiɣzinuu se mbʋ ŋwɛɛ nɛ ŋlakɩ Yehowa sɛtʋ taa sɔnɔ yɔ, pɩfɛyɩ ndɩ nɛ mbʋ ŋlakaɣ ɖooo lɛ yɔ. Ŋlakaɣ ño-ɖoŋ ɖeɖe alɩwaatʋ ndʋ ŋŋkɛ evebu yaa pɛlɛ yɔ, nɛ sɔnɔ ɖɔɖɔ ŋwɛɛ nɛ ŋlakɩ ño-ɖoŋ ɖeɖe.
Alɩwaatʋ ndʋ ŋŋwɛnɩ ño-ɖoŋ yɔ ŋlabɩ ño-ɖoŋ ɖeɖe Yehowa sɛtʋ taa, nɛ ña-akpadɩyɩtʋ taa ɖɔɖɔ ŋwɛɛ nɛ ŋlakɩ ño-ɖoŋ ɖeɖe
MBƲ ŊKPƐLƖKƖ ÑE-WEZUU CAƔƲ TAA YƆ PƖPƖZƖƔ NƐ PƖWAZƖ LALAA
Mbʋ ɛzɩ ŋŋmaɣzɩ mbʋ akpadɩyɩtʋ yeba nɛ ŋŋtasɩɣ pɩzʋʋ labʋ yɔ pi-ɖeke pɩ-yɔɔ lɛ, pɩwɛɣ ɖeu se ŋmaɣzɩ wala sakɩyɛ wena ŋwɛna se ŋsɩnɩ ɛyaa lalaa yɔ a-yɔɔ. Toovenim taa lɛ, lɛɛlɛɛyɔ ŋkpadɩyʋʋ yɔ, ŋpɩzɩɣ nɛ ŋla mbʋ ŋtaapɩzɩɣ se ŋla ñe-evebitu yaa ñɛ-pɛlɛtʋ taa yɔ. Mbʋ ŋpɩzɩɣ nɛ ŋla yɔ pɩ-taa nabʋyʋ yɔ:
Heyi lalaa mbʋ ŋkpɛlɩkɩ ñe-wezuu caɣʋ taa yɔ pɩ-tɔm. Maɣzɩ tɔm ndʋ pɔyɔɔdɩ masɩ sɩnɛ sɩ-taa yɔ tɩ-yɔɔ:
Wiyaʋ Daviid: «Maakɛ evebu nɛ lɛɛlɛɛyɔ mankpadɩyaa, ɛlɛ wiɖiyi mantɩna pɔlɔ ɛyʋ siɣsiɣ tʋ nɔɔyʋ, nɛ mantɩna ɖɔɖɔ e-piya ñɩnɩɣ tɔɔnaɣ.»—Keɣ. 37:25.
Yozuwee: «Lɛɛlɛɛyɔ, ɩna! Mawɩzɩ sɩbʋ, nɛ ɩsɩm camɩyɛ nɛ mɩ-laŋɩyɛ kpeekpe nɛ mɩ-kalɩzaɣ kpeekpe se tamasɩ kɩbanzɩ nzɩ payɩ mɩ-Ɛsɔ Yehowa heyi-mɩ sɩ-tɔm yɔ, sɩ-taa tɔm piye naɖɩyɛ tɩɖɛɛ yem nɛ ɖɩtɩla. Sɩ-tɩŋa payɩ sɩlaba nɛ pɩwazɩ-mɩ. Sɩ-taa tɔm piye naɖɩyɛ tɩɖɛɛ yem se ɖɩtɩla.»—Yoz. 23:14.
Pɩtɩla, alɩwaatʋ ndʋ ŋŋkɛ evebu yaa pɛlɛ yɔ, ŋyɔɔdɩ tɔm ndʋ tɩnɩɣzɩnɩ masɩ nzɩ sɩ-taa tɔm yɔ se ŋkpazɩnɩ lalaa ɖoŋ. Mbʋ Daviid nɛ Yozuwee pa-maɣmaɣ pakatɩ pe-wezuu caɣʋ taa pɩnzɩ sakɩyɛ yɔ pɩ-tɔm pɔyɔɔdaa. Pʋyɔɔ lɛ, ɖɩpɩzɩɣ nɛ ɖɩtaa pɔ-tɔm ndʋ liu.
Pɩtɩla, ŋwɛɣ nɛ ŋsɛɣ Yehowa yɔ pɩlakɩ pɩnzɩ sakɩyɛ yɔ. Ye mbʋ, ña ɖɔɖɔ ŋpɩzɩɣ nɛ ŋkɛdɩ lalaa kɩbam mbʋ Yehowa labɩ-ŋ yaa mbʋ ɛlabɩ lalaa nɛ ŋna yɔ pɩ-tɔm. Pɩtɩla ŋtɔzʋʋ se alɩwaatʋ natʋyʋ Yehowa tɩŋnɩ ŋgee nʋmɔʋ nakʋyʋ yɔɔ nɛ ɛsɩnɩ ɛ-sɛyaa. Pɩwɛɣ ɖeu se ŋkɛdɩ lalaa pɩ-tɔm, pɩpɩzɩɣ nɛ pɩwɛɛnɩ ɖoŋ kɩbaŋ pɔ-yɔɔ. Pɩtʋʋ fɛyɩ se ye ŋkɛdɩɣ lalaa mbʋ ŋkpɛlɩkɩ ñe-wezuu caɣʋ taa Yehowa sɛtʋ taa yɔ pɩ-tɔm yɔ, pɩpɩzɩɣ nɛ pɩkpazɩ-wɛ ɖoŋ siŋŋ.—Roma 1:11, 12.
Mbʋ ŋpɩzɩɣ ŋla ɖɔɖɔ nɛ ŋkpazɩ ño-koobiya ɖoŋ yɔ pɩ-taa nabʋyʋ lɛ se ŋñakɩ pana nɛ ŋwoki kediɣzisi kpaaŋ taa. Ye ŋlakɩ mbʋ yɔ, ŋpɩzɩɣ nɛ ŋkpazɩ ño-koobiya ɖoŋ, nɛ pɩpɩzɩɣ ɖɔɖɔ nɛ pɩkpazɩ-ŋ ɖoŋ. Connie weyi ɖɩyɔɔdɩ ɛ-tɔm nɛ pɩɖɛɛ yɔ ɛyɔɔdaa se: «Kediɣzisi wobu sɩɣnɩ-m nɛ piitiki-m yɔɔɔ. Sɔɔlɩm mbʋ koobiya wɩlɩɣ-m Kewiyaɣ kpaaŋ taa yɔ, piyeki nɛ maatasɩɣ nɩɣzʋʋ. Mañakɩ pana nɛ malakɩ-wɛ kʋjɔŋ cikpeŋ se mawɩlɩ-wɛ mɛ-ɛsɩmɩyɛ. Mañakɩ pana ɖɔɖɔ nɛ ma nɛ wɛ ɖɩlakɩ fezuu taa tʋma nɛ mankpazɩɣ-wɛ ɖoŋ nɛ paba ɖɔɖɔ pakpazɩɣ-m ɖoŋ.»
YEHOWA TAA WƐ LELEŊ NƐ MBƲ PAYƖ ŊLAKƖ Ɛ-SƐTƲ TAA YƆ
Bibl yɔɔdʋʋ ɛyaa sakɩyɛ tɔm se Yehowa sɔɔlɩ-wɛ paa pɛ-wɛtʋ eyeba nɛ paatasɩɣ pɩzʋʋ se pala tʋma sakɩyɛ ɛzɩ ɖooo lɛ yɔ. Pa-taa nɔɔyʋ lɛ Siimeyɔɔ, ɛɛkɛ Izrayɛɛlɩ tʋ. Palʋlɩ Yesu lɛ, ɛɛwɛ wezuu ɛlɛ ɛɛkpadɩyaa. Nɛ pɩtʋʋ fɛyɩ se alɩwaatʋ ndʋ Siimeyɔɔ wokaɣ templo taa yɔ, ɛnaɣaɣ evebiya, palakaɣ tʋma wena a-tɔm kaacɛyaa yɔ peeɖe. Nɛ pɩtɩla ɛmaɣzaɣ se ɛfɛyɩ wazaɣ Yehowa ɛsɩndaa mbʋ pʋyɔɔ yɔ ɛtaatasɩɣ pɩzʋʋ se ɛla tʋma ɛzɩ evebiya mba yɔ. Ɛlɛ Yehowa ñataamaɣzɩɣ mbʋ. Ɛ-ɛsɩndaa lɛ, Siimeyɔɔ kaawɛ «siɣsiɣ nɛ ɛñaŋ Ɛsɔ,» nɛ Yehowa kaawazɩ-ɩ nɛ ɛha-ɩ waɖɛ nɛ ɛna Yesu alɩwaatʋ ndʋ ɛlɛ kaakɛ pɩɣa yɔ. Halɩ Yehowa tɩŋnɩ ɛ-yɔɔ nɛ ɛyɔɔdɩ natʋ tɔm natʋyʋ Mesiya yɔɔ. (Luka 2:25-35) Pɩnaɣaɣ kpayɩ kpayɩ se «fezuu kiɖeɖeu kaawɛ» Siimeyɔɔ yɔɔ. Pɩtasɩ lɛ, Yehowa taaka ɛ-lɩmaɣza ɛ-akpadɩyɩtʋ yɔɔ ɛlɛ ɛɛkam-yɛ e-tisuu sɔsɔm yɔɔ.
Yehowa wazɩ Siimeyɔɔ nɛ ɛha-ɩ waɖɛ nɛ ɛna Yesu alɩwaatʋ ndʋ ɛlɛ kaakɛ pɩɣa yɔ, nɛ ɛtɩŋnɩ ɛ-yɔɔ ɖɔɖɔ nɛ ɛyɔɔdɩ se Yesu kaɣnɩ kɛʋ Mesiya
Ña ɖɔɖɔ, ña-taa pɩzɩɣ nɛ pɩtɛ se paa ŋŋpɩzɩɣ se ŋla tʋma sakɩyɛ ɛzɩ ɖooo lɛ yɔ, ñe-siɣsiɣ wɛtʋ mʋ ñɩm Yehowa ɛsɩndaa. Yehowa mʋʋ kɩlaŋ weyi ɛyʋ laɣ yɔ, «kɔzɩ kɔzɩ pɩlɩɩnɩ mbʋ ɛwɛna yɔ pɩ-cɔlɔ, [ɛlɛ] pɩɩlɩɣnɩ mbʋ ɛfɛyɩna yɔ pɩ-cɔlɔ.»—2 Kɔr. 8:12.
Ye mbʋ, ka ña-lɩmaɣza mbʋ ŋpɩzɩɣ labʋ yɔ pɩ-yɔɔ. Maɣzɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋsusi tɔm paa alɩwaatʋ pazɩ yem yɔ ɩ-yɔɔ. Maɣzɩ ɖɔɖɔ nɛ ŋna se ŋpɩzɩɣ nɛ ŋyaa koobu nɔɔyʋ yaa ŋma-ɩ takayaɣ nɛ ŋkpazɩ-ɩ ɖoŋ na. Mbʋ ŋlakɩ yɔ paa pɩwɛ kɛlɛʋ yem yɔ, pɩpɩzɩɣ nɛ pɩkpazɩ koobiya ɖoŋ siŋŋ, mbʋ pʋyɔɔ yɔ pɛ-ɛsɩndaa lɛ ŋsɛ Yehowa siɣsiɣ pɩnzɩ sakɩyɛ nɛ ŋkɛ-wɛ kɩɖaʋ kɩbaŋʋ.
Paa akpadɩyɩtʋ eyeba nɛ ŋtɩtasɩ wɛnʋʋ ɖoŋ ɛzɩ ɖooo lɛ yɔ, ŋpɩzɩɣ nɛ ŋla sakɩyɛ Yehowa sɛtʋ taa. Yele nɛ ɖɩna Afrika wɩsɩ ɖɩlɩyɛ taa koobu halɩñɩnʋ nɔɔyʋ kɩɖaʋ. Pɔyɔɔdɩ ɛ-tɔm aɖakaɣ «Koobu halɩñɩnʋ nɔɔyʋ tɩŋnɩ Bibl yɔɔ nɛ ɛya ɛyʋ nɔɔyʋ wezuu» taa.
Taasɔɔ se ɛzɩma ŋsɛ Yehowa siɣsiɣ pɩnzɩ sakɩyɛ, nɛ ɛzɩma ŋwɛɛ nɛ ŋsɛɣ-ɩ siɣsiɣ sɔnɔ yɔ pɩpɩzɩɣ nɛ pɩkpazɩ ɛyaa lalaa ɖoŋ. Ŋkɛ kɩɖaʋ kɩbaŋʋ tɩ ɖɔkʋʋ hɔɔlʋʋ taa, nɛ ña-taa pɩzɩɣ nɛ pɩtɛ se ‘Ɛsɔ wɛ siɣsiɣ nɛ pʋyɔɔ lɛ, ɛɛkaɣ sɔʋ ña-tʋmɩyɛ nɛ sɔɔlɩm mbʋ ŋwɩlɩ ɛ-hɩɖɛ yɔɔ nɛ ŋɖʋ ɛyaa kiɖeɖema lɩm nɛ ŋɖiɣni-wɛ lɩm ɖʋʋ ɖɔɖɔ yɔ pɩ-yɔɔ.’—Ebr. 6:10.
WOLO PƖ-YƆƆ NƐ ŊSƖƔNƖ LALAA ƐZƖ ŊPƖZƲƲ YƆ
Lɛɣtʋ ñɩnɩyaa yɔɔdaa se akpadɩyaa mba pasɩɣnɩ ɛyaa lalaa yɔ, pɛwɛnɩ tɔnʋʋ taa alaafɩya nɛ pɩkɩlɩ, pamaɣzɩɣ camɩyɛ nɛ pacakɩ wezuu nɛ pɩɖaɣlɩɣ.
Pɩkɛ toovenim se paa akpadɩyaa ɩlakɩ ɛyaa lalaa kɩbandʋ yɔ, pɩɩkaɣ yebu se kala wena pakatɩɣ pa-akpadɩyɩtʋ taa yɔ a-tɩŋa asɩɩ tɩnaɣ. Ɛsɔ Kewiyaɣ ɖeke kaɣnɩ yebu se kala ana asɩɩ tɩnaɣ alɩwaatʋ ndʋ kaɖɩzɩɣ mbʋ piyeba nɛ akpadɩyɩtʋ nɛ sɩm pɛwɛɛ yɔ, pʋ-tɔbʋʋ se mantɩtalɩ pilim wɛtʋ ndʋ Aɖam nɛ Ɛva pɛɖɛzɩ-ɖʋ yɔ.—Roma 5:12.
Ɛlɛ tʋma wena ŋlakɩ lɛɛlɛɛyɔ Yehowa sɛtʋ taa, pɩkpɛndɩnɩ ɛzɩma ŋsɩɣnɩ lalaa se patɩlɩ-ɩ yɔ, ayeki se ñe-lidaʋ ɛkpa ɖoŋ nɛ pɩkɩlɩ, nɛ halɩ apɩzɩɣ asɩnɩ-ŋ nɛ ŋwɛɛnɩ tɔnʋʋ taa alaafɩya. Koobiya akpadɩyaa, ɩtɩlɩ se mbʋ ɩlakɩ Yehowa sɛtʋ taa yɔ, pɩmʋ ñɩm siŋŋ ɛ-ɛsɩndaa, nɛ tisuu kɩɖaʋ ŋgʋ ɩhaɣ yɔ, kɩmʋ ñɩm siŋŋ ɖɔɖɔ ɛgbɛyɛ taa koobiya ɛsɩndaa.