Mathatha a no Pelela ne Thembo
“Kowo be nge misi ya ka bangalala mu mazhuba e bupelo.”—2 TIMOTI 3:1.
A WAKA tongo hwa—kene dumbu ne ku bona—zwithu zwa ka bipa zwa ka lakidziwa pasi ipapa?
● Bugwele gwa ka bipa gu bulaya bathu banjinji.
● Zhala i no thama kuti dzi-hundred dze bathu dzi fe.
● Ku tengenyeka kwe shango ku buyala dzi-thousand dze bathu ngono ku siya banjinji ba sina pa ba no gala.
Mu zebe dzi no tobela, towo buyulila zwimo zwingwe zwe shango zwi nonga izwezwe zwi no thama kuti u kumbulule kwazo. Kakale u nowo bona kuti Baibili ha i bulo ku lebela mbeli ne kwe zwimo izwezwe zwe chibaka chi no dangwa “mazhuba e bupelo.”a
Ne kwa kajalo, mazwimisilo e misholo iyeyi, ha ti ku thama kuti u dume kwa pelela kuti to chila mu shango e zhele mathatha. Pangwe u no zwibonela mathatha iyawa ne bukuko. Mu bumo gwa ichecho, dza ka thamigwa ku ku pa thembo. Zowo lakidza kuti ku shingikadziwa kwe buporofiti igogo gu li 6, ko lakidza kuti “mazhuba e bupelo” a nowo dwa e pela chinyolocho. Kakale misholo iyeyi i nowo leba ne ku nyanyaidza kungwe ku yapo ne kwe bufakazi igogo ne ku pa mabaka a no hwikala ku duma kuti chingwe cha ka lulwama kwazo chi mbeli.
[Nkwalo u kusi]
a Kuti ini Ndzimu e lechedzela zwibaka izwezwe zwa ka bipa, bona nkwalo u noti “Why Does God Allow Evil and Suffering?” mu zebe 16 ne 17 dze nsholo iwoyo.