Ku Thamiwa Kwe Dzividiyo Dze Ndongoloso ye Nshangano we Ntuthu we “Shathani Misi Yose”! we 2020

Dzividiyo ku nshangano wedu we ntuthu dza ka kutha mimoyo yedu ngono dzi ka paphidza ku hwisisa kwedu zwidiyo zwe Baibili. Nshangano wedu we ntuthu we “Shathani Misi Yose”! we 2020 u no lakidza dzividiyo dzi li 114, ku shanganyila ndebo dzi li 43 dza ka piwa ne be Gubungano li no Laula ne babatshi babo. A wa ka tongo zwibuzwa kuti ko shingisiwa masimba mangapani ne dzi chinyikilo mu ku thamiwa kwe dzividiyo idzedzi?

Bazwalani ne azwadzi dzedu ba nga bo 900 ku dwa mu shango ba ka shingisa chibaka chabo ne bunyambi gwabo ku batsha ku thama ndongoloso. Chibaka chose cha ba ka tola, chi nga be dziawara dzi li 100,000, chibaka che makole mabili ba li mu porojekiti iyeyi. Ichechi cho shanganyila dziawara dzi li 70,000 dzi no sheteka ku widza drama ye Baibili ya Nehemiya ye 76-minutes i noyi: “The Joy of Jehovah Is Your Stronghold.”

Se kwa u nga kumbulila, ku na dzichinyikilo njinji dzi no shanganyigwa mu ku pa bashingi ba no zwidusa chibayilo ba singa ruwegwe zwa ba no sheta zwe buchilo, kose ne zwe technical infrastructure, zwishingisiwa, ne zwi no sheteka ku widza nshingo.

“Komiti ye ku Diya ye Gubungano li no Laula i no khategela kwazo kuti ku be ne zwilenje ne dzindawo dzi singa fanane dzi no lakidziwa mu dzividiyo dzedu. Ku thama ichechi ko batsha kuti ku lakidziwe zubuyanana chimo che bazwalani bedu mu shango yose,” ko leba ku jalo Jared Gossman, u no shingila ku Audio/Video Services. “Ku thama mazwimisilo iyawa, team dzi li 24 mu shango dzi li 11 dzi singa fanane dza ka dzi shinga mu porojekiti. Nshingo iwoyu we masimba we shango yose u na chinyikilo dzi si shoma, ndongoloso, ne shingidzana.”

Kakale bunji gwe dzividiyo dzedu dzo shaka equipment ya ka shalulika ne dzi-sets. Ha ti lakidzila, sets ya Nehemiah: “The Joy of Jehovah Is Your Stronghold” dza ka bakigwa mukati kwe Mt. Ebo studio pejo ne Patterson, New York, U.S.A. Ku thama kuti mari e zwipo a shingisiwe zubuyanana kwazo ngono ku thamiwa kuti filimi i lakidze histori ya ka lingisana, bazwalani ba ka baka zwipithu zwe set zwi singa leme zwa ka thamiwa ku lingika se makuma a ntolo e Jerusalema. Mbako ingwe ne ingwe ya ka i na dzifureimi dze mapango dzi li bulefu gwe dzimithara dzi li 6 (20 ft) dza ka khavariwa ne foumu, dzi peleledziwa ne faux i no lingika se bgwe. “Makuma” iyawa a ka be a ka bigiwa kuti a lingike ne zila dzi singa fanane, ku tapudza palo ye set dzose dza ka dzi sheteka. Ne kwa ka jalo, kwa ka be ku sheteka mari a ngabe P1 133 380.00 ku baka dzi sets dze drama koga.a

Ku ziba zwithu izwizwe ko paphidza ku bokela kwedu ndongoloso ye nshangano we ntuthu we gole ileli. To themba kuti masimba a ka shanganyigwa mu ku thama ndongoloso iyeyi a no pelela ne ku kudziwa kwa Jehova mu shango yose. To mu bokela ku dusila nshingo we shango yose zwipo zenyu ne moyo nchena mu donate.jw.org kose ne zila dzingwe.