12 Mazwimisilo

CHA KU NO DWA

Mazwimisilo ha te ku yemula koga—chingwe cha u no yemula kuti chi nga shingikala. Mazwimisilo e malebeswa a no shanganyila ku kumbula, ku shandushanduka, ku shinga wa ka simisa.

Mazwimisilo a nga be e chibaka chi futshwanana (a nga tola mazhuba kene dziviki ku a shinga), chibaka chi si chingapo (mingwedzi), ne chibana chilefu (gole kene ku pinda). Mazwimisilo e chibaka chilefu a nga khoneka ha ku shingisiwa e chibaka chi si chi ngapo a ka tobedzana.

INI KU FANILA

Ku khona mazwimisilo awo ku nga thama kuti u zwithembe, u simise bukhwinya gugo, ne ku paphidza ku shatha kuko.

Ku zwithemba: ha u zwibigila mazwimisilo mafutshwanana u bo u a khona, u nga be ne ku zwithemba kuti u nga khona makugwana. Kakale u nga zwithemba ha u lingisana ne mathatha e zhuba ne zhuba—a no fanana ne ku tshambilidzigwa ne bakhwinya.

Bukhwinya: Bathu ba no shathila ku be mu bathu ba no zwibigila mazwimisilo a no hwika—ba no ziba cha ba no shaka ne ku shinga kuti ba chi wane. Ne kwa ka jalo, zila i no dzi pinda dzose ye ku simisa bukhwinya wu shinga ne nthu u na mazwimisilo a no nga awo.

Ku shatha: Ha u zwibigila mazwimisilo u bo u a khona, u no zwihwa kuti wa khona.

“Ndo da ku zwibigila mazwimisilo. A no thama kuti ndi gale ndi na chingwe cha ndi no shinga ne ku ndi bigila chingwe cha ndi no shaka ku wana. Ngono ha u khona mazwimisilo awo, ko shathisa ku bona cha wa ka khona u bo u ti, ‘Ehe, nda khona dumbu! Nda khona cha nda ka be ndi shaka thama.’ ”—Christopher.

NLAYONTEWO WE BAIBILI: “Iye u no gala a ka lingilila phepo se kwa i no thama a a to dzwala, ne u no ziba makole e vula se kwa a no thama a a nga vune.”—Nreri 11:4.

CHA U NGA THAMA

Tola thambo ku zwibigila mazwimisilo ne ku a khona.

Ku zwiziba. Kwala ndongoloso ye zwithu zwi nga be mazwimisilo awo, u bo u linga kuti kwa ka fanila zha zwipi gwe kutanga—u shalula zwa u no shaka shinga gwe kutanga, gwe bubili, gwe butatu, sa ikoko.

Kumbula. Mu mazwimisilo angwe ne angwe, thama zwi no tobela:

• zwibigile chibaka chi no hwika cha u nga pedza nacho.

• Kumbula thambo dzi nga togwa.

• Kumbulila zwi nga ku dzibila, ne kuti u nga zwi khona chini.

Tola thambo. U si tongo ma kuti u be ne chingwe ne chingwe cha u no shaka shingisa ku tangisa nshingo. Zwibuzwe, ‘Ndi nga thamani gwe kutanga kuti ndi khone mazwimisilo angu?’ U bo u tangisa. Lingilila kuti nshingo uwo u no yenda chini ha u pedza thambo ingwe ne ingwe.

NLAYONTEWO YE BAIBILI: “Mano e ba na moyonlefu nge lebeswa a no tungamilila ku mbuzilo.”—Zwiani 21:5.