Madimona a no Nyepa e Ti Bafi Ba no Tjila

Baibili i no leba ku ti Satani “u no dzimidza shango yose i gegwe.” (Bonyololo 12:9) Satani ne madimona a we ha ba to shaka ku ti ti dumile Dama le Ndzimu, Baibili. Ba no gwisa thama ku ti bathu ba dumile ku ti bafi ba no tjila mu bugalo gwe meya. A ti boneni ku ti oku ba no ku yeta tjini.

Budumili gwe Manyepkhwa

Budumili bunji go diya ku ti nthu m̄we ne m̄we u na meya dzi no pindila ku bugalo gwe meya shule kwe lufu gwe mbili. Ba no leba ku ti mbili u no fa koga meya a dzi to fa. Ku papha, ba no tshambidzila ku ti meya a dzi nga khone fa, ku ti a dzi to fa.

Ngono Dama le Ndzimu a li to diya itjetjo. Baibili i no lakidzila ku ti meya nthu, a te tjim̄we mukati kwe nthu. Nge ifaniso, ha e leba nge kwe ku bumbiwa kwa Adamu, Baibili i ka ti: “Jehova Ndzimu u ka dwilila u ka bumba nlume ne wuluba ye mavu, ne ku femela mu zwimilo zwi zwe meya dze butjilo, nlume ka be meya dzi no tjila.” (Genesisi 2:7) Sa ikoku Adamu ha a zo piwa meya; wa ka be a li meya.

Dziphuka na idzo dzo dan̄wa meya.—Genesisi 1:20, 21, 24, 30.

Se Dama le Baibili “meya” li dwa nthu nge ku kwe, ku si tongo ti tjenamisa ku hwa ku ti meya dzo khona fa ne ku ti dzo fa. Hwalo dzo ti:

• “Meya i no tjinya—i nowo fa iyo.—Ezekiele 18:4.

• “Samusoni ka dwilila e ti: ‘Meya yangu nga i fe ne Bafilisitiya.’”—Basumikilisi 16:30, NW.

• “Apa nge kwe nlayo pa sabata ku yeta ndulamo kene ku yeta bubi, ku biganya kene ku bulaya meya?”—Mako 3:4, NW.

Hwalo dzim̄we dzo lakidza ku ti meya i nga tjinyiwa (Genesisi 17:14), bulayiwa ne bukanu (Joshua 10:37), khamiwa (Jobe 7:15), ne ku fa nge nkokhwi (Jona 2:5). Sa ikoku, meya i no fa.

Ha u nga bala Baibili ku dwa mu khavara ku no ti ku khavara, ha u nga fe wa wana dama“meya i si nga fe.” Meya ye nthu a te nthu we tjimeya. Thutho ye meya i si nga fe a te thutho ye Baibili. I thutho ya Satani ne madimona a we. Jehova u no yila manyepkhwa ose e budumili.—Zwiani 6:16-19; 1 Timoti 4:1, 2.

Balebesa Badzimu

Satani zila i m̄we ya a no dzimidza bathu ndi yo nge ye balebesa badzimu. Nlebesa badzimu nthu u no khona amutjila ndayilo nge tambunuko ku dwa mu shango ye meya. Bunji gu kulu gwe bathu, ku shinganyila na ibo balebesa badzimu, ba no duma ku ti ndayilo i dzedzi dzo dwa ku meya dze bafi. Ngono se kwa ta bona mu Baibili, e tji a tji to khoneka.—Nreri 9:5, 6, 10.

Ngono, ndayilo idzedzi, dzo dwa poni kene? Madimona tje kwawo! Madimona a no khona bona nthu a tja tjila; ba no ziba se kwe nthu a ka be e lebeleka, tjifano tji tje, tja a ka thama, ne tja a ka be e ziba. Ndizo ku li ku lelu ku ti ba yedze bathu ba ka fa.—1 Samuele 28:3-19.

Khani dze Manyepkhwa

I m̄we zila ya Satani ya a no dwilidza nyepkhwa nge kwe bafi nge ye khani dze manyepkhwa. Khani dza ka jalo kanji dzo leyanya bathu ne lebeswa le Baibili.—2 Timoti 4:4.

Mu Afrika kuna khani nji nge kwe bathu ba ka bon̄wa be tjila ba sino fa. Kanji, bon̄wa i koku ko yetikala kule kule ne kwa ka be ku gala nthu. Tongo zwi buzwa: ‘Apa ku na nkumbula ku ti ha i li ku ti nthu wa ka be a na simba le ku shanduka ku bafi, wa be a nga bgwilila ku bugalo gu kule kule ne nsha uwe ne bazwalani?’

Kakale ku nga be i si ku ti pam̄we nthu wa ka bon̄wa wa be e fanana ne nthu wa ka fa koga? Nge ifaniso, bashingili be Bakrisiti ba li babili ba ka be be diya mu mizi ba ka bona nthuntana a ka ba tobelela nge lubaka. Ha be mbuzwa, ba ka wana i li ku ti nlume wa ka be e kumbula ku ti m̄we we bashingili wa ka be a li nkulu u we wa ka be a fa mu makole a ka pinda. Nakale, wa ka be a leyanya, ngono ka lamba ku duma ku ti wa leyanya. Tongo alakana khani ye nthuntana ya a ka budza bazwalani ba be ne babakilani gwa shule!

Zwilakidzilo, Dziwoloto, ne Mahwi

Kuzhe kwe mbilayilo u no ziba nge kwe zwithu zwi sa ka jayegwa zwa ka bon̄wa, hwiwa, kene wolotiwa nge bathu. Zwiyetikalo zwa ka jalo zwi no pinda simba le nthu kanji zo tjisa beni. Marein, wa ka be e gala ku West Afrika, wa ka be e shwa e hwa hwi le nfi kuku ba be be ndana busiku. Nge lutjo, Marein ka mimila, e musa nsha uwe ose. Gwa shule, ka lashikigwa nge nkumbulo.

Ngwenu, ha bafi ba nga be bi tjila, apa ku na nkumbulo ku ti ba nga tjisa badiwa ba bo? A ku nga be ku ka be i ko. Pa no dwa ndayilo dza ka jalo dzi no kubadza ndi mumadimona.

Ngono ku im̄wi nge kwe ndayilo dzi no nga dzi no batsha ne ku nyaladza? Nge ifaniso, Gbassay, ku dwa mu Sierra Leone, wa ka be e gwala. Ka wolota e bona tate ba be ba ka fa. Ba ka ndwa ku ti a yende ku m̄we nti, a tole zhani, a li shanganye ne vula, a be e nwa. Wa ka be a sa ka fanila lebesa nthu a sathu ka thama sa i koku. A ka be e thama sa i koku e be i pola.

M̄we nkadzi wa ka leba ku ti wa ka bona nlume uwe busiku gu m̄we shule a sino fa. Wa ka ti wa ka be a ka lulama kwazo a ka ambala zwiambalo zwa ka naka.

Ndayilo dza ka jalo ne zwilakidzo dzo lingika dza ka lulama kakale dzi batsha. Apa dzo dwa ku Ndzimu? A, a dzi to dwa ko. Jehova i “Ndzimu we lebeswa.” (Pisalema 31:5) Ha a nga dume ti tjengedzwa kene ti tjebegwa. Madimona oga ndi wo a nga jalo.

Apa ngono ku na madimona a ka lulama? A. Ne nguba ba nga be se ba no batsha mu mabaka mam̄we, ibo bose babi. Ha Diabulo e lebeleka na Eva, wa ka be e nga u na buzwalani. (Genesisi 3:1) Ngono belelo ya ka be ni shule kwe ku n’teedza ne ku yeta tja a ka leba? Wa ka fa.

U no ziba ku ti a te bushudzi ku ti nthu mbi a zwi zwalanye ne ba a no shaka tjebela ne tjengedza. “Meno matjena, moyo ntema,” ko jalo tjiani tje tji Afrika. Ne Dama le Ndzimu lo ti: “Satani iye u no zwi fanidza ne ntum̄wa we tjedza.”—2 Bakorinta 11:14.

Ndzimu ha a tja lezwana ne bathu mu shango nge ku shingisa dziwoloto, zwilakidzo, kene mahwi a no dwa mu shango ye meya. U no ba tungamila ne ku ba diya nge Baibili, i nga thama nthu ku ti “a zwi misile nja m̄we ne m̄we wa ka lulama.”—2 Timoti 3:17.

Ndizo, ha Jehova e ti tjemela nge kwe bupitipiti gwa Diabulo, u no ku yeta ngobe u no ti da. U no ziba kuti madimona zwita zwi mbatsha.