Bumangwana gu no Shathisa

Satani ne madimona a we ha ba towo tjebela ludzi gwe bathu ku no ti ngayi. Jehova wa ka ba lasha ku dwa ku dzimu kale. (Bonyololo 12:9) Mu tjimuka, Ndzimu u nowo tolela Satani ne madimona a we thambo kakale. Mu tjilakidzilo ku dwa ku Ndzimu, mpositoli Johani wa ka ti: “A bona ntum̄wa e deluka ku dzimu a na ikopunulo tje gomba li si na tjilizanyo ne ketani mu liboko gu gwe. Ka bata hangale, nyoka ye ku tanga, iye Diabulo ne Satani, ka nsunga makole a li zana li n̄ompela. Ka mposela mu gomba li sina tjilizanyo ka li zhalila ne ki li tota pezhugwi ku kwe, ku ti a si tongo shwa e dzimidza zwitjaba ku swikila zana le makole li pinda.” (Bonyololo 20:1-3) Shule, Diabulo ne madimona a we ba nowo tjinyigwa tjose.—Bonyololo 20:10.

Bathu ba bi mu shango na ibo ba nowo pedzisiwa.—Pisalema 37:9, 10; Luke 13:5.

Bafi Ba Nowo Tjila Kakale!

Shule ha Satani ne madimona ba tsheduka, Jehova u nowu zhisila ludzi gwe nthu phazha njinji. U tja kumbulukigwa ku ti bafi ha bana butjilo, ha ba tjipo. Jesu wa ka fanidzanya lufu ne wope—wope ndefu dzi sina dziwoloto. (Johani 11:11-14) Wa ka jalo ngobe wa ka be e ziba kuti lubaka gowo zha gwe ku ti bose ba lele mu lufu ba wo musigwa mu butjilo. Wa ka ti: “Tjibaka tja swika pa nowo ti bose ba mu zwikumbu zwino kumbulukigwa . . . ba ka buda.”—Johani 5:28, 29; fanisanya Mishingo 24:15.

Ba nowu buzigwa mu butjilo muno mu shango. Mu bumo gwe dzizibiso dze kuti bathu ba fa, mbiko dzi no shathisa dzowo leba nge kwe ba ka buzigwa mu butjilo! Kowo shathisa tjini ku amutjila badiwa be du be buda mu zwikumbu!