Jobe u no Dwilila e Thembeka

AKU NGA shingikala kuti bathu ba thembeke mu Ndzimu ha be likiwa ne zila ya ka sima ne ku lingika ku thembeka kwabo ku sina mbayilo? I buzo ya ka tongo buzwiwa​—ngono i ka dabigwa—​ku legwa ne kwa Jobe.

Baiziraele ba ka ti ba chi ku Egypt, Jobe, we gamu la Abhurahama, wa ka be e gala mu shango i no dangwa ngwenu kuyi Arabia. Mu chibaka ichecho, baengele be kudzimu ba ka be be kubungana mbeli kwe Ndzimu, ngono Satani we bukomba wa ka be a nabo. Mu gubungano ilelo le kudzimu, Jehova Wa ka lakidza kuti u no themba nlanda uwe u no thembeka Jobe. Dumbu, Jehova Wa kati ha ku nthu u no thembeka sa Jobe. Ngono Satani wa ka leba kuti Jobe u no shingila Ndzimu koga ne kuti Ndzimu wa ka nkombolela ne ku mbakilila. Satani wa ka ti ha Jobe a nga tolegwa chingwe ne chingwe cha a nacho,u nowo zwilandula Ndzimu.

Ndzimu wa ka lecha Satani kuti a tolele Jobe fumwa iye, bana babe ne ku thama kuti a gwale. Ne ku sa ziba kuti Satani ndiye wa ka nzhisila mathatha iyawa, Jobe wa ka be a singa zibe kuti ini Ndzimu e nzhisila mathatha a ka jali. Ne kwa ka jalo, Jobe ha a zo tongo zwilandula Ndzimu.

Bakhwinya ba Jobe batatu ba sina malebeswa ba ka zha ku nli. Be leba zwithu zwinjinji zwa ka kwagwa mu buka ya Jobe, ba ka be tsietsa Jobe kuti a dume kuti Ndzimu u no nchemelela zwibi zwizwe zwa a ka thama. Kakale be leba kuti Ndzimu ha a to da balanda babe naiko ku ba themba dumbu. Jobe wa ka ba nyanyayidzila ku sa linga zwithu kwabo ne zila ya ka fanila. Jobe wa ka ba budza a singa che kuti u nowo dwilila e thembeka ku swikilila e fa!

Ngono Jobe a ka pelela e thama phoso ye ku zwithemba kwa ka pindilila. Elihu, wa ka be a ka ba wilila ha be lebeleka, ngono a ka ba dabila. Elihu wa ka chemelela Jobe ku kongwa ku lebelekela fanilo ya Jehova Ndzimu ye ku busa mu bumo gwe ku lebelekela nthu. Elihu kakale wa ka chemela bakhwinya ba Jobe a ka simisa.

Jehova Ndzimu A ka lebeleka na Jobe, e baakanya nkumbulo uwe. Jehova Wa ka lakidza Jobe lubumbo gugwe,ku ndiya ne kwe butukununu gwe nthu ha e fanidzanyiwa ne bukulu gwe Ndzimu. Jobe wa ka amuchila ku chemegwa ne Ndzimu ne ku zwiyesa pasi. Jehova, se i li Ndzimu we “mahwilo zogwadza ne ngoni,” wa ka podza Jobe, a ka mpaphidzila fumwa ya a ka be a nayo, kakale a ka mpa bana ba li 10. (Jakuba 5:11) Jobe wa ka thembeka mu na Jehova a li mu ndiko ya ka sima, ne ku lakidza manyepkhwa a Satani e kuti bathu ha ba nga thembeke mu Ndzimu ha ba ka lingisana ne dzindiko.

​—Cha ka kwagwa mu buka ya Jobe.