THUTO 26
Ini Kuna ku Dziyila ne Zwithu Zwa ka Bipa?
“Ini ti shingikaligwa ne zwithu zwa ka bipa?” I buzo i no buzwiwa ne nthu shule kwe ku shingikaligwa ne ngozi. To shathila kuti Baibili i no ti pa dabilo dze buzo iyeyi!
1. Satani wa ka thamani kuti shango i pelele ya ka bipa?
Satani Diabolo haazo teedza Ndzimu, ngono wa ka nshandukila. Satani wa ka be e shaka ku busa, ndizo a ka thama kuti bathu be kutanga Adamu na Efa, ba shandukile Ndzimu. Satani wa ka thama e jalo ne ku budza Efa manyepkhwa. (Genesisi 3:1-5) Wa ka thama kuti a kumbule kuti Jehova wa ka nsumbikila chingwe cha ka lulwama cha ka nfanila. Wa ka be e dwa kuti bathu ba nga shatha koga ha ba si nga teedze kene ba si nga thame chi no shakiwa ne Ndzimu. Satani wa ka leba manyepkhwa e kutanga ne ku budza Efa kuti ha a nga fe. Ndizo, Baibili i dana Satani iti i “nnyepi kakale ndibo tate be manyepkhwa.”—Johani 8:44.
2. Adamu na Efa ba ka shalula ku thamani?
Jehova wa ka pa Adamu na Efa zojiwa zwinjinji. Wa ka ti ba je mu miti yose i mu gadeni ye Edeni kuzhe kwe u ngompela. (Genesisi 2:15-17) Ngono ba ka shalula ku ja mu nti wa ba ka be ba budziwa kuti ba si je mu uli. Efa a “katjela ntjelo kauja.” Shulenyana, Adamu a “kajabo.” (Genesisi 3:6) Bose habazo teedza Ndzimu. Ne kuti Adamu na Efa ba ka be ba sina chibi, kwa ka be ku sa ka ba simila ku thama cha ka lulwama. Ngono ku shalula kwabo ku sa teedza Ndzimu, kwa ka pelela ne kuti ba thame chibi ne ku lamba fanilo iye ye ku ba busa. Cha ba ka thama cha ka pelela ne kuti ba dziyile kwazo.—Genesisi 3:16-19.
3. Cha ka thamiwa na Adamu na Efa cho ti ama chini?
Ya ka ti Adamu na Efa be thama chibi, ba ka pelela ba sa zwilizanila, ngono ba ka pindisila ku sa zwilizanila ku bana babo bose. Ha Baibili i leba ne kwa Adamu, ikati: “Se tjibi tjakazha mu shango nge nthu nng’ompela, lufu gukazhisiwa nge tjibi, lufu gwakaandama nge bathu.”—Baroma 5:12.
Ku na mabaka manjinji a no thama kuti ti dziyile. Zwibaka zwingwe to dziyila ne mabaka e zwithu zwa ka bipa zwa ta ka shalula ku thama. Mu zwibaka zwingwe to dziyila ne mabaka e zwithu zwa ka bipa zwa ka shalugwa ne bangwe. Mu zwingwe zwibaka to dziyila ne ku be ta zwiwana ta wigwa ne ngozi.—Bala Nreri 9:11.
ZWIDIYE KWA KA NGINILILA
Bona kuti ini Ndzimu isi iye u no thama kuti ku be ne ku dziyila ne zwithu zwa ka bipa mu shango ngwenu, kakale ne kuti u no zwiwa chini ha ti dziyila.
4. Ndi yani u no thama kuti bathu ba dziyile?
Bathu banjinji ba no duma kuti Ndzimu u no laula shango yose. A ichecho malebeswa? Zana VIDIYO.
Bala Jakuba 1:13 na 1 Johani 5:19, mu be mu lebesana ne kwe buzo i no tobela:
A Ndzimu ndiye u no thama kuti ku be ne ku dziyila ne zwithu zwa ka bipa?
5. Bona kuti ini cha ka shingikala chinga kwa Satani e laula
Bala Genesisi 3:1-6, mu be mu lebesana ne kwe buzo dzi no tobela:
Satani wa ka leba manyepkhwa api?—Bona ndimana 4 ne 5.
Satani wa ka lebani cha ka thama kuti ku lingike ingati Jehova wa ka be e dzibila bathu ku be ne chingwe cha ka lulwama?
Ku yenda na Satani, a bathu ba no sheta kuti Jehova a be Nlauli wabo, kuti ba shathe?
Bala Nreri 8:9, mu be mu lebesana ne kwe buzo i no tobela:
Chinga kwa Jehova a ka misa ku laula shango, kwa ka shingikalani?
Adamu na Efa ba ka be ba si na chibi kakale be gala mu Paradaisi. Ba ka teedza Satani ne ku shandukila Jehova
Shule kwe ku shandukila Ndzimu, shango ya ka tangisa ku be ne chibi, ku dziyila, ne lufu
Jehova u nowo pedzisa chibi, ku dziyila, ne lufu. Bathu ba nowo zwilizanila ne ku gala mu Paradaisi kakale
6. Jehova u no gwadziwa ha e bona ti dziyila
A Ndzimu u no gwadziwa ha e bona ti dziyila? Bona cha ka kwagwa na She Dafite na mpostolo Pita. Bala Pisalema 31:7 na 1 Pita 5:7, mu be mu lebesana ne kwe buzo i no tobela:
Ku ziba kuti Jehova u no gwadziwa ha e bona ti dziyila ko thama kuti u zwiwe chini?
7. Ndzimu u nowo misa ku dziyila kose kwe bathu
Bala Izaya 65:17 ne Zumbunulo 21:3, 4, mu be mu lebesana ne kwe buzo i no tobela:
Ini ku nyaladza ku ziba kuti Jehova u nowo baakanya zwithu zose zwa ka bipa zwa ka shingikalila bathu?
A wa gala u ziba?
Ha Satani e nyepa gwe kutanga wa ka chinya zina la Jehova. Wa ka thama kuti bathu ba kumbule kuti Jehova ha te Mbusi wa ka lulwama. Mu chibaka chi no zha ha Jehova e misa ku dziyila kwe bathu, u nowo thama kuti zina lile li kudziwe. Ne angwe matama, u nowo lakidza kuti ku busa kukwe ndiko kwa ka lulwama dumbu. Ku kudziwa kwe zina la Jehova i khani wulu kwazo mu lubumbo gose.—Matewu 6:9, 10.
BATHU BANGWE BA KATI: “Ku dziyila i shamu ye Ndzimu.”
Iwe u nga tini?
CHA WA ZWIDIYA
Satani Diabolo ne bathu babili be kutanga ndibo ba no zwidabilila mu ku shingikala kwe zwithu zwa ka bipa mu shango. Jehova u no gwadziwa kwazo ne ku dziyila kwedu, ngono u no dwa e ku misa mu chibaka chi futshwanana.
U Nga Tini?
Satani Diabolo wa ka budza Efa manyepkhwa api?
Ku shandukila Ndzimu kwa Adamu na Efa kwa ka ama bathu bose chini?
To ziba chini kuti Jehova u no gwadziwa ne ku dziyila kwedu?
SHAKISISA
Zwidiye se kwa Baibili i thalusa chibi.
Bala kwa ka paphidzika ne kwe khani ya ka musiwa na Satani Diabolo ku gadeni ye Edeni.
“Ini Ndzimu e Dumilila ku Dziyila?” (Thungamakole, January 1, 2014)
Bona dabilo dzi no nyaladza dze buzo ya ka sima.
“Ini ku Bulawa Kwe Bathu Banjinji Kwa ka Shingakala? Ini Ndzimu a ka ku Dumilila?” (Web article)
Bona kuti nlume nngwe wa ka zwidiyani ne kwe ku dziyila kwa a ka bona ku shingikala.