THUTHO 33
Bushe Gwe Ndzimu Gowo Thamani?
Bushe gwe Ndzimu go busa. Mu chibaka chi pejo gowo shandula zwithu ne zila i no chenemisa mu shango. Ima ti lingilile zwingwe zwe zwithu zwa ka lulwama zwa u nga lingilila mu ku busa kwe Bushe gwe Ndzimu.
1. Bushe gwe Ndzimu gowo zhisa chini mbakiso ne ndulamo kakale mu shango?
Jesu, She we Bushe gwe Ndzimu, u nowo chinya bathu ba ka bipa ne mibuso ku nghwa ye Amagedoni. (Zumbunulo 16:14, 16) Mu chibaka ichecho, thembiso iyeyi ye Baibili i nowo be ya shingikadziwa ne buzhalo: mu “tjibakana koga, babi banowobe basitjipo.” (Pisalema 37:10) Jesu u nowo shingisa Bushe kuti ku be ne mbakiso ne ndulamo mu shango yose.—Bala Izaya 11:4.
2. Buchilo gowo be gwa ka tini ha ku da kwe Ndzimu ku shingikadziwa mu shango?
Mu mbuso we Bushe gwe Ndzimu, “balulwami banowothuwa shango bakagala muili nge kusingapele.” (Pisalema 37:29) Kumbula koga u gala mu shango ina bathu bose ba ka lulwama ba no lakidzana ludo kakale be da Jehova! A kuna u nowo gwala, ngono nngwe ne nngwe u nowo chilila chose.
3. Bushe gwe Ndzimu gowo thamani shule kwe ku chinyiwa kwe bathu ba ka bipa?
Shule kwe ku chinyiwa kwe bathu ba ka bipa, Jesu u nowo busa ali She ne makole ali 1 000. Mu chibaka ichecho, iye ne bali 144 000 ba a nowo be e busa nabo, ba nowo batsha bathu mu shango kuti ba zwilizanile, ba sina chibi. Kowoti chibaka ichecho chi pinda, shango yose i nowo be ya chi shanduka ku be paradaisi ya ka naka, ili zhele ne bathu ba ka shatha ne kuti ba nowo be, be tobela milayo ya Jehova. Ku dwa ipapo, Jesu u nowo gwiliza Bushe kuna Tate babe Jehova. Ichecho chowo thama kuti, zina la Jehova “liyengamadziwe” ne zila i sathu ika tongo shingikala. (Matewu 6:9, 10) Kowo boneka dumbu kuti Jehova i Mbusi wa ka lulwama u no da bathu babe. Ku dwa ipapo Jehova u nowo chinya Satani, madimoni, ne bathu bose ba ka shalula ku lamba bulauli gugwe. (Zumbunulo 20:7-10) Mamo e buchilo a ka zwilizanila a nowo zhisiwa ne Bushe gwe Ndzimu kakale a nowo galila cha chose.
ZWIDIYE KWA KA NGINILILA
Bona kuti ini ti nga themba kuti Ndzimu u nowo shingisa Bushe, ku shingikadza thembeso dzose dze Baibili, mu chibaka cha swika.
4. Bushe gwe Ndzimu gowo chinya mibuso ye bathu
“Bathu bakabhatisana kunolema behwisana zogwadza.” (Nreri 8:9) Jehova u nowo shingisa Bushe gugwe ku misa ku sa be ne ndulamo.
Bala Daniele 2:44 ne 2 Bathesalonika 1:6-8, mu be mu lebesana ne kwe buzo dzi no tobela:
Jehova na Jesu ba nowo thamani ne kwe mibuso ye bathu ne batobeli bayo?
Ta zwidiya kuti Jehova na Jesu ba nowo be ba ka tambuka kakale ba ka lulwama. Ini ti themba ichecho?
5. Jesu i She i no fanila dumbu
Jesu, She we Bushe gwe Ndzimu, u nowo thama kunjinji ku batsha bathu ba a nowo be e ba busa mu shango. Zana VIDIYO ku bona kuti Jesu wa ka lakidza chini kuti u no shaka ku batsha bathu, kakale u na masimba a a ka piwa ne Ndzimu ku thama e jalo.
Zwithu zwa ka thamiwa na Jesu ha ali mu shango zo lakidza kuti Bushe gwe Ndzimu gowo thamani. I zwithu zwipi zwi no shathisa zwa ka lakidziwa ipapa zwa wa ka lingilila ku bona zwi shingikala? Bala ndimana dza ka lakidziwa kuti u khone ku hwisisa zwibuyanana zwithu izwezwi zwi no shathisa.
HA ALI MU SHANGO JESU WA KA . . . |
HA ALI KU KUDZIMU JESU U NOWO . . . |
|---|---|
|
|
|
|
|
|
|
|
6. Bushe gwe Ndzimu gowo zhisa mbakiso
Bushe gowo shingikadza, Jehova cha a ka be a ka zwimisila ku chi thamila bathu gwe kutanga. Bathu ba nowo chilila chose mu shango ye paradaisi. Zana VIDIYO ku bona kuti Jehova u no shingisa Jesu chini ku shingikadza mazwimisilo awe.
Bala Pisalema 145:16, mu be mu lebesana ne kwe buzo i no tobela:
Ku ziba kuti Jehova u nowo “gutsha njemulo dze zose zwinotjila,” ko thama kuti u zwiwe chini?
BATHU BANGWE BA KATI: “Ha ti shingidzana tose, ti nga misa mathatha a mu shango.”
Bushe gwe Ndzimu gowo misa mathatha api, a ka kona mibuso ye bathu?
CHA WA ZWIDIYA
Bushe gwe Ndzimu gowo thama chi no shakiwa ne Ndzimu. Gowo shandula shango yose kuti i be paradaisi i na bathu ba ka lulwama, ba nowo be be namata Jehova ne ku singapele.
U Nga Tini?
Bushe gwe Ndzimu gowo yengemadza zina la Jehova chini?
Ini ti nga duma kuti Bushe gwe Ndzimu gowo shingikadza cha ka thembesiwa ne Baibili?
Ini cha wa ka lingilila kwazo chi nowo shingakadziwa ne Bushe?
SHAKISISA
Bona kuti Amagedoni ini.
Bona chi nowo shingikala mu makole ali 1 000 ne ku bupelo gwe ku busa kwa Jesu.
Bona se kwa misha i nga batshana ku kumbula ne kwe se kwa ba nowo shathila ku busiwa ne Bushe gwe Ndzimu mu paradaisi.
Mu nsholo u noti “Nda ka Dziyidziwa ne Buzo Dzinjinji” zwidiye se kwa nngwe we dzipolotoki a ka bona dzidabilo dze buzo dza a ka be a nadzo.
“Baibili i no Shandula Machilo” (Thungamakole, January 1, 2012)