THUTO 43
Bakirisiti ba ka Fanila ku Linga Chini Busukwa?
Mu shango yose, bathu ba no linga busukwa ne zila dzi si nga fanane. Mu zwingwe zwibaka bangwe ba no shathila ku ngwa busukwa ne bakhwinya babo. Bangwe ba no shalula ku sa ngwa choselele. Ngono bangwe ba no ngwa ku swikilila be dakwa. Baibili i no tini ne kwe busukwa?
1. A ku ngwa busukwa ku na nlandu?
Baibili ha i to ti, ku ngwa busukwa ku nlandu. Ngono, ha i leba ne kwe zwipo zwi no dwa ku Ndzimu, i no shanganyila ne “nkumbi kushathisa moyo we nthu.” (Pisalema 104:14, 15) Balume ne bakadzi bangwe ba no thembeka mu Baibili, ba ka ngwa busukwa.—1 Timoti 5:23.
2. Baibili ikatini ne kwe ba no shalula ku ngwa?
Jehova u no benga ku ngwa kwa ka pindilila ne budakwa. (Bagalatiya 5:21) Dama lile likati: “Usibe mmwe we banogungila nkumbi we zhambi.” (Zwiani 23:20) Ha ti shalula ku ngwa busukwa, ne tili toga, atizo fanila ku ngwa kwazo kwa ti no pelela ti si nga cha khona ku kumbula zwibuyanana, ku laula cha ti no leba ne cha ti no thama, kene ti longa buchilo gwedu mu mbatsha. Ha ti si nga khone ku laula zila ya ti no ngwa nayo, ta ka fanila ku zwimisila ku misa ku ngwa choselele.
3. Ti nga teta chini cha ka shalugwa ne bangwe ha ku zha mu busukwa?
Nthu wa ka fanila ku shalula kuti a u nowo ngwa busukwa. Atizo fanila ku athula bangwe ba no shalula ku ngwa busukwa kwa ka lizanila, kakale atizo fanila ku tshambidzila bangwe kuti ba ngwe busukwa. (Baroma 14:10) To shalula ku sa ngwa ha ili kuti bangwe ba na mathatha na ko. (Bala Baroma 14:21.) Ha ti to ‘zwishakila bubuya, koga to gushakila bamwe.’—Bala 1 Bakorinta 10:23, 24.
ZWIDIYE KWA KA NGINILILA
Bona milayontewo ye Baibili ya u nga shingisa mu kuti a u nowo ngwa kene chini, kene u nga ngwa ku ngapani. Kakale bona kuti ini cha u nga thama ha u gwisana ne ku ngwa kwa ka pindilila.
4. Shalula kuti a u nowo ngwa
Jesu wa ka be e linga ku ngwa busukwa chini? Ku bona dabilo, bona jenamiso le kutanga la a ka thama. Bala Johani 2:1-11, mu be mu lebesana ne kwe buzo dzi no tobela:
Ku dwa mu jenamiso ileli, ti nga zwidiyani mu zila ya Jesu ye ku linga busukwa na ibabo ba no gu ngwa?
Jesu wa ka be a si nga dzibile ku ngwa busukwa, ngono Nkirisiti wa ka fanila ku linga chini nngwe u no shalula ku ngwa?
Ne kwa ka jalo, ku be Nkirisiti a ka sungunuka ku ngwa busukwa, ha ku to dwa kuti i chithu cha ka lulwama ku thama ku jalo nako dzose. Bala Zwiani 22:3, mu be mu lebesana ne kwe kuti zwi no tobela zwi nga thama chini kuti u shalule kuti a u nowo ngwa kene chini:
U no no draiva mota kene ku shingisa michini.
Wa ka zwisenga.
Ngangha ku ipatela ya ka ku dwa iti u si ngwe.
U no kongwa ne ku laula chilizanyo cha u no ngwa nacho.
Nlayo ha u to amuchila ko ngwiwa kwe busukwa.
U na nngwe wa ka shalula kuti a si ngwe busukwa ne kuti wa ka tongo be ne mathatha e ku gu shingisa.
Ha ku na ndobolo kene maedziso, a wa ka fanila ku pa bathu busukwa? Ku bona kuti ini chi nga ku batsha ku shalula cha u nga thama, zana VIDIYO.
Bala Baroma 13:13 ne 1 Bakorinta 10:31, 32. Shule kwe ku bala ndimana ingwe ne ingwe, lebesanani ne kwe buzo i no tobela:
Ku shingisa nlayontewo iwoyo ku nga ku batsha chini ku shalula chi nowo shathisa Jehova?
Nkirisiti nngwe ne nngwe wa ka fanila ku zwishalulila kuti a u no ngwa busukwa kene chini. Nenguba zwingwe zwibaka e ngwa busukwa, nako dzingwe u ngana a ka shalula ku si ngwe
5. Shalula kuti u nowo ngwa ku ngapani
Ha u shalula ku ngwa busukwa alakana yechi: Nenguba Jehova a si nga dzibile ku ngwa busukwa, u no dzibila ku ngwa kwa ka pindilila. Ne kutini? Bala Hosiya 4:11, 18, mu be mu lebesana ne kwe buzo i no tobela:
Ini chi nga shingikala ha nthu e ngwa busukwa kwa ka pindilila?
Ti nga zwidzibila chini kuti ti si ngwe kwazo? Ta ka fanila ku thama zwithu ne zila ya ka lizanila, kene ku ziba pa ta ka fanila ma. Bala Zwiani 11:2, mu be mu lebesana ne kwe buzo i no tobela:
Ini ili nkumbulo wa ka lulwama ku zwibigila chilizanyo cha u no ngwa nacho?
6. Ku misa ku ngwa busukwa kwa ka pindilila
Bona kuti ini cha ka batsha nngwe nlume ku misa ku ngwa busukwa kwa ka pindilila. Zana VIDIYO, mu be mu lebesana ne kwe buzo dzi no tobela.
Mu vidiyo, busukwa gwa ka ama chini zila ye ku zwibata ya Dmitry?
A wa ka khona ku misa ku ngwa chinyolocho?
Wa ka pelela a khona ku misa ku ngwa kwa ka pindilila chini?
Bala 1 Bakorinta 6:10, 11, mu be mu lebesana ne kwe buzo dzi no tobela:
Budakwa, gwa ka bipa ku ngapani?
Ini chi no lakidza kuti nthu u no ngwa kwa ka pindilila u nga shanduka?
Bala Matewu 5:30, mu be mu lebesana ne kwe buzo i no tobela:
Ku thubula liboko ko fanisa ku zwidusa chibayilo ku shathisa Jehova. U nga thamani ku gwisana ne ku misa ku ngwa busukwa kwa ka pindilila?a
Bala 1 Bakorinta 15:33, mu be mu lebesana ne kwe buzo i no tobela:
Bakhwinya ba nga ama ku ngapani chilizanyo cha u no ngwa nacho?
UNGWE U NGANA A KATI: “A ku ngwa busukwa ku na nlandu?”
U nowo dabila u tini?
CHA WA ZWIDIYA
Jehova wa ka ti pa busukwa kuti ti gu shathile, ngono ha a to amuchila ku ngwa kwa ka pindilila ne budakwa.
U Nga Tini?
Baibili ikatini ne kwe busukwa?
Ku ngwa kwa ka pindilila ku nga ti longa mu mbatsha dzipi?
Ti nga lakidza chini kuti to teta bangwe ha ku zha mu ku ngwa?
SHAKISISA
Bathu bachechana ba nga shalula chini cha ka lulwama ha ku zha mu busukwa?
Kumbula chi Ngana chi ka Shingikala ha wa Ngwa Busukwa (2:31)
Bona zwa u nga thama kuti u khone ku misa ku ngwa kwa ka pindilila.
“Ku Biga Busukwa mu Mamo Ago” (Thungamakole, January 1, 2010)
A Nkirisiti wa ka fanila ku thousta (toasting)?
“Buzo Dzi no Dwa ku Babali” (Thungamakole, February 15, 2007)
Mu mbiko i noti, “Nda ka Ndi si Nga Mise ku Ngwa,” bona se kwa nlume nngwe a ka misa ku ngwa kwa ka pindilila.
a Ibabo ba si nga khone ku chila koga ba si nga ngwe busukwa, ba ka fanila ku kumbila batsho. Ngangha ne bunji dzo kumbuludza kuti ba na buthatha gwe ku ngwa kwa ka pindilila ba ka fanila ku misa ku ngwa choselele.