Mapolotiki a no Leba Kuti Ngwa ye Amagedoni i no Dwa i Shingikala—Baibili Ikatini?

Mu mangwanana e Monday, October 10, 2022, mathumo e Russia a ka loba dzituropo dze Ukraine shule kwe ku phutuka kwa ka shingikala mazhuba mabili a ka pinda, kwa ka chinya bridge gukulu gwa ka be gu batshanya Crimea ne Russia. Shingikalo idzedzi dza ka shingikala shule kwe ku ti mangwe mapolotiki e lebe kuti ngwa ye Amagedoni i nga na i ka shingikala mu chibaka chifutshwanana.

• Ne October 6, 2022, President Joe Biden we U.S. wa ka ti: “A ti zo be pejo sa ngwenu ne Amagedoni chinga kwe [U.S. President John F.] Kennedy ne Cuban Missile Crisis. . . . A nto kumbula kuti ku na chingwe chi no fanana ne bukhoni gwe ku shingisa weapon ye nuclear ku be ku si nga pelele ne Amagedoni.”

• Ne October 8, 2022, mu BBC News, Volodymyr Zelensky, President we Ukraine wa ka buzwiwa ne kwe belelo la ka bipa le ku shingisa weapon dze nuclear, ngono wa ka ti: “Ndo duma kuti Amagedoni i no dwa i shingikala, shango yose i mu mbatsha.”

A ku shingisiwa kwe dzi-weapon dze nuclear kowo pelela ne Amagedoni. Baibili i ka tini?

A dzi-weapon dze nuclear dzowo pelela ne Amagedoni?

A. Dama “Amagedoni” lo wangwa ka ngompela koga mu Baibili mu na Zumbunulo 16:16. A li to dwa ngwa pakati kwe zwichaba ngono lo dwa ngwa pakati kwe Ndzimu ne “bomambo be shango yose.” (Zumbunulo 16:14) Ndzimu u nowo shingisa ngwa ye Amagedoni ku pedzisa mibuso ye bathu.—Daniele 2:44.

Ku zwidiya kwa ka paphidzika ne kwe kuti Amagedoni i nowo thamani ne kwe shango, bala nsholo u no ti Ngwa ye Amagedoni Ini?

A shango ne bathu ba nowo chinyiwa ne ngwa ye nuclear?

A. Nenguba babusi be bathu ba nga shingisa dzi-weapon dze nuclear mu chibaka chi no zha, Ndzimu a u towo dumilila kuti shango i chinyiwe. Baibili i ka ti:

• “Shango inogalila tjatjose.”—Nreri 1:4.

• “Balulwami banowothuwa shango bakagala muili nge kusingapele.”—Pisalema 37:29.

Ne kwa ka jalo, buporofiti gwe Baibili ne shingikalo dza ngwenu dzo lakidza kuti ti pejo kwazo ne kuti mamo e shango a lulwame. (Matewu 24:3-7; 2 Timoti 3:1-5) Bona kuti Baibili i ka tini ne kwe chibaka chi no zha u shingisa course yedu ye ku batshana ku zwidiya Baibili mahala.