Zila ye Buchilo ye ku be Vegan—Baibili Ikatini?

Mu shango yose, bathu ba no kgathegela kwazo chi no dangwa kuyi veganism.

• “Veganism i zila ye ku kumbula ne ku chila, bathu be thama kose kwa ba nga khona kuti ba si tongo kubadza kene ku ja dziphuka kene be dzi shingisa mu zwiambalo kene ne zila dzingwe koga.”—The Vegan Society.

Bathu bangwe ba no be dzi-vegan, ba singa thamiwe koga ne kuti ba no amika ne kwe dziphuka ngono kakale ne kuti ba no shaka ku thokomela shango, ku thokomela mamuko abo kene be thamiwa ne mabaka e budumili.

• “Veganism ha i to fanana ne ku thopha kuti nthu u no jani koga ne kuti kanjinji bathu ba no ku tola ili budumili, khani ye mazwibato kakale ili zila nthu nngwe ne nngwe ya a nga shalula shango nayo kuti i be butuka.”—Britannica Academic.

A veganism ndiyo i nowo pedzisa mathatha e shango? Baibili ikatini?

Mbumbi wedu u no linga chini bathu kose ne dziphuka

Baibili i no lakidza kuti Mbumbi wedu, Jehova Ndzimu,a u no tola bathu bali pezhugwi kwe dziphuka. Kakale, wa ka pa bathu ndaulo ye ku dzi laula. (Genesisi 1:27, 28) Ndzimu wa ka dumila bathu kuti ba shingise dziphuka se zojiwa. (Genesisi 9:3) Ne kwa ka jalo, ha to dumila kuti phuka dzi tshwenyiwe.—Zwiani 12:10.

Ku yenda ne Baibili, nthu nngwe ne nngwe wa ka fanila ku zwishalulila kuti u no ja nyama kene ha to i ja.b Cha ti no shalula ha chi to thama kuti ti be butuka mu Ndzimu. (1 Bakorinta 8:8) Ha ku zha mu khani ye kuti to shalula kuti to jani, a kuna wa ka fanila bona nngwe nlandu.—Baroma 14:3.

Zila i no pelela ne mazhuba a no zha a butuka

Baibili i no lakidza kuti zila ya ti no shalula ku chila nayo, a i to baakanya mathatha e shango. Mathatha manjinji a no thamiwa ne dzipolotiki, ndongoloso ye ichaba, kose ne ikhonomi ye shango iyeyi, ngono ha kuna u nga khona ku a baakanya. Baibili ikati:

• “Tjakakombama atjingatambunudziwe.”—Nreri 1:15.

Mbumbi wedu u nowo baakanya mathatha a ta ka lingisana nawo. Baibili i no shingisa ndebo ye chifaniso ku thalusa cha a nowo thama.

• “Kudwa ipapo abona kudzimu kutshwa ne shango tshwa, ngobe kudzimu kwe kutanga ne shango ye kutanga zwakabe zwapinda, ne gungwa lisitjipo.”—Zumbunulo 21:1.

Ndzimu u nowo dusa dzihurumente dze bathu, kene “kudzimu kwe kutanga,” e be e thama kuti ku buse “kudzimu kutshwa,” hurumete we Bushe gugwe gu kudzimu. Bushe gugwe gowo dusa “shango ye kutanga,” bathu ba ka bipa, ngono gowo busa “shango tshwa,” kene bathu ba no duma ku busiwa nago.

A ku busa Bushe gwe Ndzimu ndiko koga bathu kwa ba nowo chila ne mbakiso ne dziphuka kose ne ku thokomela shango.—Izaya 11:6-9.