A Dumbu Diabolo Uyapo?

Dabilo ye Baibili

Ee, Diabolo u yapo. Ndiye ‘u no busa shango,’ chibumbiwa che chimeya cha ka bipa cha ka shandukila Ndzimu. (Johani 14:30; Baefesiya 6:11, 12) Baibili i no lakidza buthu gwa Diabolo ne mazina awe ne ku nthalusa ne zila i no tobela:

• Satani, ku no dwiwa “N’nyanyaidzi.”​—Jobe 1:6.

• Diabolo, ku no dwiwa “Nsebi.”​—Zumbunulo 12:9.

• Nyoka, i no shingisiwa mu Baibili ku milila “Nchebeli.”​—2 Bakorinta 11:3.

• Nliki.​—Matewu 4:3.

• N’nyepi.​—Johani 8:44.

Ha te i li nlawontewo kene buthu gwa ka bipa

Bangwe ba no tola kuti Satani Diabolo u nlawontewo koga kene buthu gwa ka bipa gu mu tili. Ne kwa ka jalo, Baibili i na mbiko ye ku lebeleka kwa Satani ne Ndzimu. Ne kuti Ndzimu wa ka zwilizanila, a ku nga ke ku ka khoneka kuti wa ka be e lebeleka ne mbipo ingwe i mu nli. (Ditironomi 32:4; Jobe 2:1-6) Kakale, Satani wa ka lika Jesu, u si na chibi. (Matewu 4:8-10; 1 Johani 3:5) Ndizo ke, Baibili i no lakidza kuti Satani u yapo dumbu, ha te i li buthu koga gwa ka bipa.

A ta ka fanila chenamisiwa ne kuti bathu banjinji a ba to duma kuti Satani u yapo dumbu? A ku zo jalo choselele, ne kuti Baibili i kati Satani u no shingisa buchebeli ku thama mazwimisilo awe. (2 Bathesalonika 2:9, 10) Zila ingwe wulu ya a no tsietsa nayo wu thama kuti bathu ba si tongo duma kuti u yapo.​—2 Bakorinta 4:4.

Manyepkhwa a ka paphidzika nekwa Diabolo

Malebeswa: Dama le Chihebera li mu Dzibaibili dzingwe li no shanduligwa kuyi “Lusifa” lo dwa “u no penya.” (Izaya 14:12) Matama a ka poteleka ipapa a no lakidza kuti dama ileli lo dwa lutshinga, kene tobedzana kwa boshe, be Babiloni, ba ka bowo batisiwa shoni ne Ndzimu ne kuti ba ka be zwikudza. (Izaya 14:4, 13-20) Matama a no ti “u no penya” a ka e shingisiwa ku suta lutshinga gwe Bababiloni shule kwe kuti ba kundiwe.

Malebeswa: Satani i chita che Ndzimu, i si nlanda uwe. Satani u no nyanyaidza ne leba manyepkhwa nekwe bathu ba no shingila Ndzimu​—1 Pita 5:8; Zumbunulo 12:10.