Ini Bafakazi ba Jehova ba si Nga Nginilile mu Mazhuba e Mazwago?

Bafakazi ba Jehova a ba to kitika dzi birthday ne kuti ba no duma kuti mizano iyeyi a i to shathisa Ndzimu. Nenguba Baibili i si nga lebe ya ka tambunuka kuti i no dzibila ku kitikiwa kwe dzi birthday, i no ti batsha kuti ti kumbulile ne kwe zwithu zwi no shingikala mu mizano iyeyi ne ku hwisisa kuti Ndzimu u no i linga. Bona zwithu zwingwe zwi li 4 kose ne milayonteo ye Baibili i no leba ne kwazo.

1. Mizano ye Birthday ya ka simulugwa ne baheitane. Funk & Wagnalls Standard Dictionary of Folklore, Mythology, and Legend, ikati: “Ku kitikiwa kwe mizano iyeyi kwa ka simulugwa mu dumilo ye kuti mu zhuba le birthday ye nthu, meya mbi i no thasela nthu u no kitika nzano iwoyo kakale bakhwinya ba no be ba li yapo kose ne ku eletsela nthu u no kitika birthday zwa ka lulwama ku thama kuti a bakililike.” Buka ye The Lore of Birthdays ikati: Mu nako dza ntolo mbiko dze birthday dza ka dzi sheteka mu ku shingisiwa kwe horoscope kwa ka teiwa mu masazigwa e ku shingisiwa kwe dzinyenyedzi.” Buka iyeyi i no phaphidza iti dzi khandlela dze dzi birthday, dzi no shingisiwa mu dumilo ye bazwadzi, dzi na magic ya ka shalulika i no thama ku ti nthu a shingikaligwe ne zwithu zwa ka lulwama.”

   Ne kwa ka jalo, Baibili a i to dumila ku shingisiwa kwe magic, khandlela, budimoni kene ‘kene zwingwe zwa ka bipa.’ (Ditironomi 18:14; Bagalatiya 5:19-21) Dumbu, chingwe cha ka thama kuti Ndzimu a si amuchile turopo ya ntolo ye Babiloni wu kuti bathu ba ka be be shingisa dzi nyenyedzi, i li chingwe chi no yendizdana ne budimoni. (Izaya 47:11-15) Bafakazi ba Jehova a ba to yenda be shakisisa kuti ngwao ingwe ne ingwe ya ka simulula ngayi, ngono ha Baibili i lakidza ichecho a ba to lecha koga ba s inga tsiboge.

2. Bakirisiti be kutanga ba ka be ba singa kitike dzi birthday. The World Book Encyclopedia ikati: “Ba ka be tola kuti ku kitikiwa kwe birthday i ngwao ye buheitane.” Baibili i no lakidza kuti baapostolo ne bangwe ba ka be be diiwa dumbu na Jesu ba ka shula zila ya ka fanila tobegwa ne Bakirisiti bose.​—2 Bathesalonika 3:6.

3. Nzano koga wa ka fanila kitikiwa ne Bakirisiti, a te we ku zwagwa ngono nde we lufu​—gwa Jesu. (Luka 22:17-20) Ichecho a chi to chenamisa, ne kuti baibili i kati “zhuba le lufu lopinda le kuzwagwa.” (Nreri 7:1) Ku bupelo gwe buchilo gugwe mu shango, Jesu wa ka a zwi thamila zina la ka naka ne Ndzimu, ichecho chi thama kuti zhuba le lufu gugwe li be likulu kwazo ku pinda zhuba le ku zwagwa kukwe.​—Bahebera 1:4.

4. A ku na Baibili pa i no leba kuti ku na nlanda we Ndzimu wa ka tongo kitika birthday. Ichechi a te ili phoso ya ka shingikala ne kuti Baibili i na mbiko mbili dze ku kitikiwa kwe dzi birthday dze bathu ba ka be ba si nga nshingile. Ne kwa ka jalo, mizano yose iyeyi mibili i no legwa ne zila i sa ka lulwama ​—Genesisi 40:20-22; Mako 6:21-29.

A bana be Bafakazi ba Jehova a ba to shathisiwa ne kuti a ba to kitika dzi birthday?

Se bazwadzi bose ba ka lulwama, Bafakazi ba Jehova ba no lakidza bana ba bo ludo mu gole lose, kakale ba no ba pa zwipo ne ku be ne dzi party dzi no shathisa. Ba no gwisa ku tobela chilakidzilo cha ka zwi lizanila che Ndzimu, u no pa bana ba be zwithu zwa ka naka mu zwibaka zose. (Matewu 7:11) Bana ba be Bafakazi ba Jehova a ba to zwihwa u ngati ba no nyimiwa chingwe se kwa kwa legwa ipapa:

• “Ko shathisa ku amuchila chipo u sa ka chi lingilila.”​—Tammy, u na makole a li 12.

• “Nenguba ndi si nga piwe zwipo mu zhuba le birthday yangu, bazwadzi bangu ba no ndi tengela zwipo mu dzi nako dzingwe. Ndo da kwa ka jalo ne kuti ko ndi chenamisa.”​—Gregory, u na makole a li 11.

• “A u no kumbula kuti mu 10 minutes ku jiwa dzi cup cake kakale ku mbiwa i phathi? U buye ku ngumba yangu ngono u bone kuti ha kuyi phathi dumbu ko dwiwani!”​—Eric, u na makole a li 6.