Ku Batsha ha ku na “Ngwa Kose ne Makwayi e Ngwa”

Mu mazhuba iyawa e bupelo, ta ka lingilila ku “hwa ngekwe ngwa kose ne makwayi e ngwa.” (Matewu 24:6) Ne kwa ka jalo, ha bazwalani bedu ba ka lingisana ne mathatha a nonga iyawa, ba no piwa batsho ya ba no sheta. Zibiso ya Ngwenu #3 ye Gubungano li no Laula ye 2022 ya ka pa zibiso i no kutha moyo ne kwe nshingo we ku batsha u no thamiwa ku batsha bathu ba ka amiwa ne ngwa ku Ukraine ku Eastern Europe. Nshingo iwoyo we ku batsha u no thamiwa chini ha ngwa ya ka bipa ya ka dwilila mu ndawo dzi pejo? Nshingo we ku batsha wa ka ama chini bazwalani bedu ba ku Ukraine?

Ko Shetekani? Cho Tumigwa Chini?

Ne February 24, 2022, mu zhuba la ka tangisa ngwa ku Ukraine, Komiti ye Babatshanyi ya ka dumilana kuti bazwalani bedu ba ku Ukraine ba batshiwe ne mari a ngapani. Chinyolocho litabi gwe Ukraine gwa ka tangisa ku tenga zwi no sheteka mu ndawo yabo ne ku thama kuti zwi abiwe ne dzi Disaster Relief Committee dzili 27 dza ka dza shalugwa.

Ku batsha kuti nshingo iwoyo u dwilile, Ofisi Hwulu ye Shango Yose ye Bafakazi ba Jehova ya ka tangisa chinyolocho ku bona kuti ko shakika ku piwa batsho ya ka tini. Komiti ye Babatshanyi ne ye ku Tshambisa dze Gubungano li no Laula dza ka kumbila Global Purchasing Department ku shingidzana ne bazwalani be litabi gwe ku Ukraine ne Poland ku batsha ne chi no sheteka kose ne thama ndongoloso ya ba nowo shingisa. Bazwalani be Purchasing, be Shipping, ne be Legal department ye litabi gungwe ne gungwe, ne nngwe u mu Komiti ye Litabi gwe Ukraine, ne be Global Purchasing Department ba ka be be shangana zhuba ne zhuba ku bona zwi no sheteka.

Jay Swinney we Global Purchasing Department a ka ti, “Kutanga ta ka ti bona kuti ko shetekani. Ta ka ti shaka ku pa bazwalani zojiwa ne zwingwe zwi no sheteka zwa ba ka jwaela. Ne kwa ka jalo, ku bona kuti ini cha ka chi sheteka ya ka i si igo buthatha koga. Kakale ta ka ta ka fanila ziba kuti zwithu izwezwi zowo yesiwa chini ka bonako ku Ukraine ne zila ya ka bakililika ha ngwa ya ka dwilila.”

Ne dzi 9 dza March 2022, zwithu zwa ka zwi sheteka zwa ka zo zigwa. Dzibox dze zojiwa zwe ntewo, zwi nonga dzithini dze nyama ne hwobe, mathunde, rice, ne nyemba, zwa ka zwa ka fanila ku tumigwa ne zwingwe zwi no sheteka zwi nonga zwisipa ne dzi-toilet paper. Mu chibaka ichecho, kwa ka ku kumbuligwa kuti zwithu zwa ka zwi shetiwa ne nthu u ngompela mu viki dzili 4 zwa ka zwi nga tengwa ne mari a nga bo P826. Ne kuti kwa ka ku lingika kuti dzi-thousand dze bazwalani bedu ba nowo be ne zwa ba no sheta, Komiti ye Babatshanyi ya ka duma kuti ku shingisiwe mari manjinji mu ku batsha. Ngono zwithu izwezwi zwa ka zwi nga yesiwa chini ne zila i sowo longa bazwalani bedu mu mbatsha?

Ne dzi 13 dza March, bazwalani bedu babili ba no dwa ku Poland ba ka likeletsa ku yesa zwithu zwi no dwa ku litabi gwe Poland ku warehouse i pejo ne Lviv, Ukraine. Mu mazhuba a ba ka be dwa be milika, be litabi gwe Poland ne gwe Ukraine ba ka batsha bazwalani ibaba babili ku zwibaakanyila gwendo gwabo. Litabi gwa ka zhadza dzifomo dzi no sheteka dze nlayo kuti ba khone ku chuluka bodara be no yesa zwi no batsha bathu, ne ku bona kuti dzikoloi dze bazwalani dza ka kwagwa zwibuyanana kuti nde dzi no no yesa zwi no batsha, ne ku lebesana ne bazwalani ba ku Ukraine ku bona kuti bazwalani ba nga shingisa zila ipi i pejo ha ba chuluka bodara. Ne ku zwibaakanyila zwibuyanana kose ne masego a Jehova, zwi no sheteka zwe ku batsha zwa ka khona ku yesiwa ku dzi Disaster Relief Committee mu chibaka che dziawara dzili 24 ku Lviv, ngono bazwalani bedu ba ka gwilila ba ka bakililika ku Poland.

Nenguba ku likeletsa kwe kutanga kwa ka khoneka, bazwalani ba ka yesa zwithu zwi pasi kwe 1 metric ton zwe zwi no sheteka mu ku batsha. Zwithu zwi ngabe 200 metric ton zwa ka zwi cha sheteka! Zwithu zwingapangapa zwa ka zowo yesiwa chini ne ku abiwa chinyolocho?

‘Bathu Babo Banowozwipa ne ku Da’

Shule kwe ku bala dzimbiko mu jw.org ne kwe sekwa bazwalani bedu ba no amiwa ne zwi no shingikala ku Ukraine, bathu banjinji mu shango yose ba ka be shaka ku thusa. Bathu banjinji ba kulekule ba ka be dusila nshingo we shango yose we Bafakazi ba Jehova zwipo zwe mari, be ziba kuti mari a nowo shingisiwa zwibuyanana. Bathu be shango dzingwe ba no gala pejo ne dzibodara ba ka khona ku shingisa nako yabo, masimba abo, ne zwithu zwabo ku batsha. Ela njele zwilakidzilo zwi si zwingapani koga.

Ku Poland, ba no shinga ne ku da ba ka kubunganya dziphasela dza ka phuthegwa dzili dzinjinjinjinji, ngono bana ba ka ba ka dorowa mu dzikarata. “Nda ka bala kanjinji ndimana i mu na Pisalema 110:3, i no leba kuti ‘bathu ba Jehova ba nowo zwipa ne ku da,’” ko leba Bartosz Kościelniak, nngwe we be Purchasing Department ku litabi gwe Poland. “Ngono ku zwibonela ne mesho, bathu banjinjinjinji ba no shinga ne ku da be zwipa chinyolocho ba ka zwibaakanyila ku shinga, ichecho cho ndi lakidza kuti matama iyawa malebeswa dumbu.”

Nngwe we Bafakazi ba Jehova u na khampani ye tiraka dzi no senga zwithu ku dzingwe shango, wa ka dusa dzitiraka dzidze ne diesel kuti dzi shingisiwe a si nga ruwegwe wa ka ti: “Mu ndili, i chibaka che kuti ndi lakidze bazwalani bangu na Jehova ludo. Ndo shathila ku be nda batsha.” Ko kumbuligwa kuti kwa ka dusiwa zwipo zwe diesel zwi no pinda dziliithara dzili 7 700, ngono bazwalani ba ka shingisa nako yabo ne masimba abo ku draiva dzikhilomithara dzi ngabo 48 000 ku pedza zose zwa ka zwi yesiwa!

Ne kuti bazwalani ne dziazwadzi dzedu ba ka be shinga ne ludo, ku no ti March 28—mazhuba ali 15 koga shule kwe ku likeletsa kwe ku yesa zwithu kwe kutanga—kwa ka kwa chi yesiwa ku Ukraine dzi metric ton dzili 100 dze zojiwa, dze zwingwe zwi no sheteka, kose ne miti ya ka i sheteka! Ngono ne kuti bazwalani bedu ba ka be dusa zwipo ne zwingwe zwi no sheteka ne moyo nchena, mari a ka e sheteka kuti ku tengwe zwi no sheteka mu nshingo we ku batsha a ka tapudzika kwazo. Ku noti ngwenu, Bafakazi ba Jehova ba ka tumila dzi metric ton dzili 190 dze zwi no sheteka mu nshingo we ku batsha ku Ukraine. Zwithu izwezwi zwa ka yesigwa bazwalani bedu, zwa ka ba ama chini?

“Dza ka Dzi na Ludo Gwenyu Kakale!”

Ha dziphasela idzedzi dzi swika ku Lviv, dzi Disaster Relief Committee dzose dzi mu Ukraine dza ka dzi pa ba no dzi sheta. Dziphasela dze zwithu zwi no batsha dza ka yesiwa ku dzitoropo dza ka siyasiyana, dzingwe dzadzo dzili kule ku pinda dzikhilomithara dzili 1 300 ku dwa ku Lviv. Nenguba nshingo iwoyo wa ka thamiwa ne zila ya ka lulwama se kwa ku nga khoneka, wa ka tola chibaka.a

Nngwe we Komiti ye Litabi gwe Ukraine u noyi Markus Reinhardt, a ka ti: “Mu chibaka che mathatha iyawa, bazwalani banjinji ba ka zwibonegwa ludo gwa Jehova kose ne mbayilo we ku tobela zwibuyanana ndaulo ye gubungano—dumbu ne ngozi i sathu i ka shingikala. Ha ti lakidzila, bose ba no kumbuludziwa kuti ba zwibigile zojiwa kose ne vula zwi nga lizana dziviki mu mizi yabo. Ne kwe ndaulo iyeyi, nkugwana nngwe u noyi Anton u no shingila ku Kyiv wa ka ti: ‘Phuthego ya Jehova ya ka ti baakanyila mathatha a ka sima, ngono to bokela ichecho kwazo. Ku zwibigila zojiwa ne vula kose ne ku be ne radio kwa ka buluka machilo edu.’ To boka kwazo kuti bazwalani ba ka hwa ndaulo iyeyi, ne kuti ichechi cha ka thama kuti ofisi ye litabi i be ne chibaka che ku thama ndongoloso i no sheteka ye nshingo we ku batsha.”

Bazwalani ba ka zwihwa chini ha be amuchila batsho ya ka jalo? Mykola na Zinaida, ba no gala ku Kharkiv, ba ka thalusa mazwihwo abo be ti: “Ta ka shathisiwa kwazo ne zila ya mu no amika ne kwedu. To bokela kwazo zojiwa ne miti zwa ma ka ti pa. To bona kuti Jehova u no ti thokomela.” Valentyna u no gala mu ndawo iyeyo bo, wa ka ti: “Ku dwa koga mu ku tangisa kwe ngwa, kwa ka ku na dzilaini ndefundefu dze ku tenga zojiwa. Kwa ka ku si nga khoneke ku tenga zwi no sheteka. Ngono Jehova wa ka e ziba kakale e bona buthatha igogu. Wa ka shalula bazwalani ba ka be pa bathu batsho ku mizi yabo, ne dziphasela dza ka dzi na zwithu zwa ka zwi sheteka dumbu! Mu zwimo zwi no nga izwezwi zwa ka sima, zwi nga nna zwi ka thama kuti u zwitoboke, u no zwihwa ne bona u thokomegwa na Jehova ne gubungano lile ne zila ya ka shalulika. . . . Ko shathisa kwazo ku bona e ku batsha ne zwa u no sheta kwazo mu chibaka cha ka lingisana.”

Yevhen, Iryna, na Mykyta, ba ka tizha be dwa ku Mariupol, ba ka ti: “To bokela kwazo ku be mu ti thokomela ne batsha be nsha wedu. Dumbu, batsho iyeyi ya ka zha ne chibaka. Ku tanga, ta ka ti kumbula kuti dzibox idzedzi dza ka dzi na zwithu koga, ngono ta ka ti ti dzi zhula ti ka bona kuti dza ka dzi na ludo gwenyu kakale!”

Ha ku to bilayedza kuti Jehova ndiye wa ka a ka tungamila dumbu ne meya dzidze kuti batsho iyeyi ye ludo ye zwi no sheteka i yesiwe ne ku na “ngwa kose ne makwayi e ngwa.” Zwipo zwenyu zwa mu no dusila nshingo we shango yose ne ludo, bunji gwazo zwa ka dusigwa mu donate.jw.org, na izo bo zwa ka batsha kwazo. To mu bokela ku bo muli moyonchena kwazo!

Ku pa Batsho ka Bonako ne Zila ya ka Bakililika se Kwa ku Nga Khoneka

1. 

   February 24, 2022: Komiti ye Babatshanyi i no dumilana kuti bazwalani bedu ba ku Ukraine ba batshiwe ne mari a ngapani, ichecho cho thama kuti litabi gu khone ku tangisa ku pa batsho

2. 

   February 24–March 8, 2022: Litabi gwe Ukraine go tenga zwingwe zwithu mu ndawo yabo ne ku thama kuti zwi abiwe ne dzi Disaster Relief Committee. Kakale ofisi ye litabi i no baakanya ku amuchila ne ku aba zwithu zwi no dwa ku Poland

3. 

   March 9, 2022: Komiti ye Babatshanyi ya ka duma kuti ku yesiwe zwithu zwi no batsha bathu ku Ukraine

4. 

   March 10–12, 2022: Ko thamiwa ndongoloso ye ku likeletsa ku yesa zojiwa ne zwithu ku Lviv, Ukraine zwi dwa ku Poland

5. 

   March 13, 2022: Bazwalani ba no lika ku yesa zojiwa ne zwingwe zwithu ku Lviv, Ukraine zwi no dwa ku Poland, ba no thama be jalo

6. 

   March 14–16, 2022: Ku Assembly Hall i pejo ne Poznan, Poland, bashingi be Local Design/Construction ba no shangana ku baakanya dziphasela dze zojiwa ne zwingwe zwi no sheteka zwe nshingo we ku batsha

7. 

   March 17, 2022: Mazhuba ali 4 shule kwe ku likeletsiwa kwe yesa zwithu kwa khoneka, 13 metric ton dze dziphasela dzo tangisa ku yesiwa ku bodara ye Ukraine

8. 

   March 21–27, 2022: Ne zila i no fanana, dziphasela dze nshingo we ku batsha dzo baakanyiwa ku Poland ne tumiligwa ku Ukraine ngono ku dwa po dzo yesiwa kwa dzi no sheteka mu awara dzili 24

9. 

   March 28, 2022: Mu mazhuba a si nga pinde 20 shule kwe ku dumiligwa, dzi metric ton dzili 100 dze zojiwa, zwi no sheteka, ne miti zwa ka zwa chi yesiwa ku Ukraine

Kowo ti ngwenu, Bafakazi ba Jehova ba ka tumila dzi metric ton dzi no pinda 190 dze zwithu zwi no no batsha ku Ukraine.