Zwinjinji Zwa mu Nazo zo Batsha ku Sheta Kwe Bangwe

Bafakazi ba Jehova ba no batsha bathu mu ndawo dzi no pinda 200. Ngono ndawo dzi nga be 35 koga mu na idzedzo ndidzo dzi no amuchila zwipo zwa ka lizana ku thama zwa ba no sheta. Ndawo dzi no sheta dzo batshiwa chini?

Gubungano li no Laula le Bafakazi ba Jehova lo elanjele kuti Bafakazi ba Jehova mu shango yose ba no shetani mu ku namata kwabo ne mu nshingo wabo we ku rera. Ne njele mari a no longolosiwa ne ku shingisiwa zubuyanana. Ha litabi gu amuchila mari a no pinda a gu no sheta mu ku thama mishingo yago, go batsha shango dzi no sheta. Ndongoloso iyeyi i no thamiwa koga se kwa Bakirisiti ba ntolo ba ka be be batshana “nge ku lizalizana.” (2 Bakorinta 8:14) Ba ka shingisa zwinjinji zwa ba nazo ku batsha Bakirisiti bangwe ne zwa ba no sheta.

Bazwalani bedu ba ka batshiwa ne matabi angwe ba no zwihwa chini? Ha ti lakidzila, ku Tanzania kwa bathu ba no pinda gaswa le bathu bose ba no shingisa mari a si nga pinde P23.13 ne zhuba, mari iyawo a ka shingisiwa ku bankanya Holo ye Bushe i no shingisiwa ne Gubungano le Mafinga. Gubungano ilelo la ka ti: “Shule kwe ku bankanyiwa, palo ye ba no be yapo mu zwidiyo ya ka paphidzika kwazo! To bokela kwazo gubungano la Jehova ne bazwalani bedu mu shango yose kube be batsha ne bumoyonchena, ichecho cha ka thama kuti ti shathile ku namata Jehova pa ndawo ye ku namata ya ka naka kwa ka jalo.”

Bangwe be bazwalani bedu ku Sri Lanka ba ka amiwa ne ku thaela kwe zojiwa ne ntata ye bugwele gwe COVID-19. Imara Fernando ne nkololo uwe, Enosh, ndi bangwe ba ka amiwa ne chimo ichecho. Ne kwa ka jalo, to bokela zwipo zwi no dwa ku shango dzingwe, ne kuti ba ka wana batsho i no sheteka. Mu karata ya ba ka zwithamila, ba ka kwala be ti: “To boka bazwalani ba ka ti lakidza ludo mu zwibaka izwezwi zwa ka sima. To shathila kwazo ku be bangwe be nsha iwoyu, ngono to dwilila ti tembezela kuti Jehova ba batshe nngwe ne nngwe we bazwalani bedu mu mazhuba iyawa e bupelo.”

Ha ku to ti chingwe kuti bazwalani ne dziazwadzi dzedu ba no gala ngayi, ba no sendedzegwa ku batsha ne zwa ba na zo. Ha ti lakidzila, Enosh, wa ka zwithamila bokisi le ku dusa zwipo kuti naiyebo a khone ku batsha misha i no sheta batsho. Guadalupe Álvarez naiyebo u no pa ne ludo. U no gala mu ndawo ingwe ku Mexico kwa bathu bashomanana koga i li ibo ba no khona ku amuchila marinyana a si a chingwe kene ba si nga amuchile. Ne kwa ka jalo, u no dusa cha a nga khona. Wa ka kwala e ti: “Ndo bokela bubuya ne ludo gu no thembeka gwa Jehova. Ndo ziba kuti zwipo zwangu zowo shanganyiwa ne zwe bangwe ngono zowo khona ku batsha bazwalani bangu.”

Ofisi dze matabi dzi no tumilila mari ku ndawo dzi no sheta dzo shathila ku thama dzi jalo. Anthony Carvalho, u no shingila se ungwe we be Komiti ye Litabi ku Brazil, wa ka leba eti, “Mu makole manjinji, shango yedu ya ka be i sheta ku batshiwa ne mari ne shango dzingwe.” Ngono wa ka dwilila eti, “Ne ntata ye batsho iyeyi, ta ka be ne ku kula kukulukulu. Ngwenu, chimo chedu che mari cha ka shanduka, ngono ti na gobe le ku batsha bangwe. Bazwalani bedu mu Brazil ha ba ka lingilila nshingo we ku rera we shango yose ba no bona kuti ba nga thamani ku batsha.”

Bafakazi ba Jehova ba nga batsha chini ne zila ikulu bazwalani ne dziazwadzi dzabo ba no sheta? I si ni ne ku tumilila mari ku Ofisi dze Matabi dzi ku shango dzi no sheta, ngono ne ku dusa zwipo be dusila nshingo we shango yose. Ichechi chi nga thamiwa mu mabokisi e makubungano a ka kwagwa “Worldwide Work” kene ku shingisiwa donate.jw.org. To bokela kwazo zwipo izwezwi zose.