Nshingo we Baka wa ka Yenda Zubuyanana Bugwele gu Sathu gu ka wa

Ku dubikiwa kwe dzi hundreds dze dzi thousands dze bathu gole ne gole, ko thama kuti ku shakike mibako ya ka phaphidzika ino shingisiwa mu ku namata Jehova. Kuti ichecho chi khoneke, dzi Local Design/Construction Departments mo shango yose dza ka baakanyila ku baka kene baakanya mibako ye ku namata ino pinda 2,700 mu gole le bushingili le 2020.a

Chi no gwadza wuti, ku baakanyila ikoku a ku zo yenda zubuyanana ne mabaka e bugwele gwe COVID-19. Ku vikila ne batsha bazwalani ne dziazwadzi dzedu ku sala shule milayo ye babusi, mu chibaka cha ngwenu, Komiti ye ku Tshambisa ye Gubungano li no Laula ya ka misa bunji gwe dziporojekiti dze ku baka mu shango yose. Ne kwa ka jalo, mu gole le bushingili le 2020 bugwele igogu gu sathu guka wa, kwa ka bakiwa mibako ye ku namata i no pinda 1,700. Pezhugwi kwa ikoku, kwa ka pedziwa dziporojekiti wulu dze matabi dzi no pinda 100. Kumbula se kwa bazwalani bedu ba ka batshiwa ne ku pedziwa kwe dziporojekiti mbili dze ku baka.

Litabi gwe Cameroon. Litabi gwe kutanga, ku Douala, gwa guli gu tukununu kwazo kakale ku shakika kuti gu baakanyiwe kwa ka nginilila. Komiti ye ku Tshambisa ya ka kumbulila ku baakanya litabi, ngono kwa kowo shakika mari manjinji a no pinda mari e mibako ne bukwayo. Ba ka shakisisa kuti ini ku ngabe botuka pakati kwe ku baka mu ndawo tshwa kene ku tenga ne baakanya mbako o yapo kale, ngono kose ikoku ku ka kona.

Mu chibaka, bazwalani ba ka hwa kuti ku north we Douala, ba no laula ba ka be be baakanyila ku baka zila pejo ne ingwe ye dzi Assembly Hall dzedu. Zila iyeyi yabo yo batsha kuti ku be ne zwi no sheteka mu ndawo iyeyi. Ndicho chakabe chi shakiwa dumbu ne litabi. Ngono Gubungano li no Laula li ka dumana ne ku bakiwa kwe litabi gu tshwa mu kati kwe ndawo ya kwa ku na Assembly Hall.

Bafakazi ne be dzi contractors ba ka hiriwa, ba ka shinga bose mu porojekiti iyeyi—zila ya ka batsha kuti ku si shingisiwe chibaka ne mari manjinji. Dumbu, kwa ka shingisiwa mari a pasi ne P22 842 820.00 muna a ka be a ka fanila ku shingisiwa! Nsha we Bethele wa ka khona ku fulukila mu mibako mitshwa mu chibaka chi futshwanana bugwele gwe COVID-19 gu sathu guka wa.

Ba no gala mu Bethele ku Cameroon ba ka batshiwa kuti ba gale ne ku shingila mo mamo a ka lulwama, ngono ba no bona mbako iwoyi i li chipo chi no dwa ku na Jehova. Bangwe ba ka lobolana bakati, “To shaka ku shinga kwazo ku lakidza kuti to bokela chipo ichechi kungapani.”

Office ye ku Shandulila ye Tojolabal (RTO), Mexico. Mu makole manjinji, team ye ku shandulila ye Tojolabal ya ka be i shingila ku litabi gwe Central America gu pejo ne Mexico City. Ne kwa ka jalo, lulimi gwe Tojolabal go lebgwa kwazo ku Altamirano ne Las Margaritas—ku ngabe 1,000 kilometers (620 mi) ku dwa mu litabi! Ichecho chi ka thama kuti, bashandulili ba simigwe ne ku be ne ku dwilila ba na bunyambi gwe lulimi gwe Tojolabal. Kakale kwaka be kwa ka simila litabi ku wana bazwalani ne dziazwadzi ba no fanilika pejo ku batsha ne ku shandulila mu chi Tojolabal ne ku batsha mu dzi audio recordings.

Ne mabaka iawa, Komiti ye ku Kwala ye Gubungano li no Laula ya ka be i shaka ku fulusa team ye ku shandulila ku ndawo ya ku no lebgwa lulimi gwe Tojolabal. Ku khona ichechi, litabi gwa ka tola thambo ye ku tenga ne ku baakanya mbako. Ku thama ku jalo kwa ku shaka mari matukununu muna e ku baka kene ku renta dziofisi.

Ngwe nshadulili u no chenesa sekwa ichecho cha ka mbatsha: “Mu makole a le 10 a nda ka shingila se nshandulili ku litabi, a ndi si to ngo shangana ne nsha u ngompela u no lebeleka lulimi gwangu. Ngwenu office yedu i pakati kwe ndawo ya ku no lebgwa chi Tojolabal. Ndo shangana ne ba no leba chi Tojolabal mazhuba wose. Echi cha ka ndi batsha ku zwidiya matama manjinji ne ku thama kuti nshingo wangu ibe we mamo a pezhugwi.”

Dziporojekiti dze Gole le Bushingili le 2021

Mu gole le Bushingili le 2021, ko kumbuligwa ku shingila mu dzi RTO dzi li 75 ne Bible school facilities, ha mamo e duma. Nshingo u nowo dwilila mu dziporojekiti wulu dze matabi, ku shanganyila ne porojekiti ptshwa ye ngumba wulu ku Ramapo, New York, ne ku fulusiwa kwe matabi e Argentina ne Italy. Pezhugwi kwa ikoku, ko shakika dzi Holo dze Bushe ptswa dzi no pinda 1,000, dzi ndawo dzi no pinda 6,000, dza ku no shanganigwa mu dzili ha dzi to li mu mamo a ka lulwama kakale ko shakika kuti dzi misigwe ne dzi ptshwa, kakale dzi holo dze bushe dzi li 4,000 dza ka fanila ku baakanyiwa.

Mari e nshingo we ku baka ne ku baakanya mibako a no dwa ngai? Nzwalani Lázaro González, nngwe we be Komiti ye Litabi gwe Central America, wa ka dabila buzo iyeyi apa e leba ne kwe porojekiti ye Office ye ku shandulila ye Tojolabal. “Mu ndawo ye litabi gwedu, ti na kutukununu koga. Ha i be isi ne batsho ye ku shingidzana kwe bazwalani, kwa ko wobe ku si nga khoneke ku baka dzi ofisi dze ku shandulila ku batsha badumili naswi be nawo iyeyi. Mari a no dusiwa ne bazwalani mu shango yose aka batsha bashandulili ku be pejo ne be dzi ndawo dza ku no lebgwa lulimi gwabo. To bokela kudwa mu moyo buzwalani gwe mu shango yose, ku batsha ne kuda.” Ee, dziporojekiti idzedzi dze ku baka dzo khoneka ne zwipo zwe nshingo we shango yose, bunji zwi dusiwa ne donate.jw.org.