JW Satellite Channel i no Shinga mu Ndawo Dzi Sina Inthanete

Ngwedzi ne ngwedzi to gala ta ka lindila ndongoloso ye zwithu zwe Ndzimu ne dzividiyo dzi no lakidziwa mu JW Broadcasting. Ne kwa ka jalo, bunji gwe bazwalani bedu mu Africa a ba to khona ku bona ndongoloso iyeyo mu Inthanete. Ne ku tini?

Bunji gwe ndawo dze Africa a dzi na Inthanete. Ngono mu ndawo dzi na Inthanete, ka njinji a i to shinga zwibuyanana kakale i no tura. Ha ti lakidzila, mpoteleki nngwe ku Madagascar wa ka tongo dawunlouda JW Broadcasting ye ngwedzi ku Internet café. Wa ka ruwela P175.99, ili mari a no pinda a no amuchigwa ne bangwe mu viki!a

Ne kwa ka jalo, dzimiliyoni dze bathu mu Africa ba no khona bona JW Broadcasting ba si nga shingise Inthanete. Chini?

Chinga kwe 2017, kwa ka thangwa kuti JW Broadcasting i bongwe ne be sub-Saharan Africa ku shingisiwa satellite-television channel. Channel i no bongwa mahala, mu mazhuba wose, ne ndimi dzili 16.

Kuti ichechi chi khoneke, Bafakazi ba Jehova ba na kontiraka ne thelevishini broadcast service ku andamisa JW Broadcasting ne satellite. Satellite i no shingisiwa ne shango dze sub-Saharan Africa dzili 35. Kontiraka iyeyo i no ruwelegwa P130 459.92 ne ngwedzi. Mu zwibaka zwi njinji, ko ruwegwa mari a ka paphidzika ku andamisa broadcast mu channel i poga. Ichechi cho thama kuti dzi-thousand dze bathu dzi khone lingilila mishangano kene ndongoloso dza ka shalugwa dze ba no kumba matabi.

Bathu ba njinji, ne ba si Bafakazi, ba no lingilila JW satellite channel mu mizi yabo. Ne kwa ka jalo, bangwe be bazwalani bedu a ba to khona ku tenga zwi no sheteka ku shingisa satellite channel. Ku ba batsha, Dziholo Dze Bushe dzi no pinda 3,670 dza ka longwa zwithu zwi no shingisa satellite i li kuti bazwalani ne dziazwadzi ba khone ku bona JW Broadcasting. Zwithu izwezwo, ne ku zwiyesa, zo ruwelegwa mari a nga be P769.96 ha Holo ye Bushe i na thelevishini kene projekitara. Ha dzi sina, zwithu zwi no shingisiwa zwi nga ruwelegwa mari a ngapa P5 829.68.

Bazwalani ne dziazwadzi ba no shathila channel iyeyo kwazo. Nkugwana nngwe ku Cameroon wa kati: “Woko ko nga mana pakati kwe shango mu nsha wedu.” Nzwalani Odebode, we Nigeria, a kati: “To lingilila channel iyeyi tili nsha katatu ne viki. Bana bangu ba no gala ba ka lindila chibaka ichecho. Ba no shaka kuti ti lingilile JW channel ne mu zwibaka zwingwe.” Rose, we Nigeria, a kati: “Ndo shathila kuti JW satellite channel ya ka ndi batsha kuti ndi di si gale nda ka lingilila dzikhani koga. Nda ka be ndi ti ha nda ka lingilila dzikhani, nda ka be ndi si nga toleke zwibuyanana mu na cha nda bona, ngono blood pressure yangu ya ka be i yenda pezhugwi. Ngono JW Broadcasting i no baka kakale i no nyatutudza! Ndiyo channel ya ndi no da kwazo. I batsho wulu i no dwa ku na Jehova.”

Mpoteleki nngwe ku dwa ku Mozambique u no leba kuti mu seketi iye, kwa ka longwa zwithu zwi no shingisa satellite channel mu Dziholo Dze Bushe. Bazwalani ba mu makubungano iyawo ba no swika mbeli kwe chibaka kuti ba lingilile JW Broadcasting ne satellite.

Mu nshangano we zwichabachaba we 2019 ku Johannesburg, South Africa, channel ya ka shingisiwa ku andamisa ndebo, kose ne dzi no bigwa ne nngwe we Gubungano li no Laula, ku ndawo dzingwe dzi li 9. Sphumelele, we Broadcasting Department ye litabi gwe South Africa, a kati: “Ta ka tongo be ti andamisa ndebo idzedzi ne Inthanete. Ngono ichechi cho shaka Inthanete i no shinga zwibuyanana ne mari a no i ruwelela. JW satellite channel ya ka be i shingisa mari mashomanana kakale i thembeka.”

Tobokela zwipo zwenyu zwe ku da zwe shango yose, bunji gwe bazwalani ne dziazwadzi dzedu mu Africa ba no khona bona JW Broadcasting be shingisa satellite. To bokela kwazo zwipo zwa mu no dusa ne zila dza ka siyasiyana dzi mu donate.jw.org.