Ku Bakilila Holo Dze Bushe mu Chibaka Che COVID-19

“Gubungano li no Laula la ka tola thambo ye kuti pa no dumigwa kuti ku si sagwe shule milayo mingwe ye mibuso, kowo batsha makubungano wose ku tangisa ku shanganila mu zwidiyo ku Dziholo Dze Bushe ku tangisa ne viki ye April 1.” Zibiso iyeyo, ya ka longwa mu jw.org mu ku tangisa kwe March 2022, ya ka shathisa Bafakazi ba Jehova mu shango yose. Ngono COVID-19 ya ka be i sathu i ka pela.a I zwithu zwipi zwa ka be zwi sheteka kuti ba no zha ku zwidiyo zwe gubungano ba bakiligwe mu bugwele? Mu makole mabili ku singa shanganigwe ku Dziholo Dze Bushe, buzo i nga be kuti a Dziholo Dze Bushe dza ka lulwamila ku shingisiwa?

Dumbu iko, bazwalani bedu ba ka be ba chi be ne mingwedzi minjinji be baakanyila kuti ku shanganigwe kakale ku Dziholo Dze Bushe.

Zwi no Sheteka, ne ku Khoneka Kwazo

Ngwedzi u ngompela koga ku si no be kwa misiwa ku shanganila ku Dziholo Dze Bushe ne 2020, Worldwide Design/Construction Department (WDC), ku Warwick, New York, ya ka tangisa ku lingisisa kuti COVID-19 i nowo ama chini zila ya ti no shingisa Dziholo dzedu Dze Bushe ne kuti ku nga togwa thambo dzipi kuti ku shangana kwedu ku be kwa ka bakiligwa.

Zwa ka be zwi sheteka mu ndawo ingwe ye shango zwa ka be zwi leyana ne zwa ka be zwi sheteka mu ndawo dzingwe. Matthew De Sanctis, u no shingila mu WDC, a kati: “Mu shango dzingwe, chi no khataza ha kuna pa no nguligwa maboko. Ha ku sina vula mu Dziholo Dze Bushe, i no tengwa kene i chegwa ku gwizi. Mu shango dzingwe, mibuso i no biga chilizanyo che kuti ku nga shingisiwa air-conditioning ku ngapani, ne ku longa phepo mu bathu ba li pathu pa ngompela, ne kuti ku nga tilikiwa dzisaini dza ka tini dze health and hygiene.”

Bazwalani bedu ba ka khona chini ku mililana ne mathatha iyawa? Ba ka bona kuti mu bunji gwe Dziholo Dze Bushe, “ku shingisa, zwithu zwi singa ture ya ka be ili icho chi no sheteka,” ko leba Matthew. Ha ti lakidzila ku Papua New Guinea, zwithu zwi no shingisiwa ku ngula maboko zwa ka thangwa ku shingisiwa maghaba e 20-liter (5.3-gal) a ka longwa dzipompi. Bazwalani bedu ba ka khona ku shingisa zwithu izwezwi mu Dziholo Dze Bushe ne dzichinyikilo dzi nga be P534 koga. Mu Dziholo Dze Bushe dzi mu Africa, kwa ka tengwa zwithu zwi no ngulila maboko zwe mamo a pezhugwi zwili 6,000, ku dwa ku Asia.

Zwingwe zwa ka thangwa ya ka be ku longa dzifeni ne zwingwe zwi no longa phepo mu Dziholo Dze Bushe. Makubungano manjinji ba ka tenga dziphoulu dzi no sungiligwa dzimicrophone kuti dzi si pindisigwe ku bangwe ne maboko. Kwa ka tapudziwa zwithu zwi nga bakhwa ne maboko ne ku sanitaiza, pa no bakhwa ne maboko mu mabati, kuti bugwele gu si andame. Makubungano angwe, a ka longa dzipompi dzi no zwizhula mu dzitoileti dzawo, kuti bathu ba si bate dzipompi. Ku Chile, ku thama zwithu izwezwi zose kwa ka shingisiwa dzichinyikilo dzi nga be P18 674 mu Holo ye Bushe ingwe ne ingwe.

Nenguba ku bakilila Holo Dze Bushe ya ka be ili chithu chi no zha kutanga, bazwalani bedu ba ka be be shaka kuti zwipo zwi no dusiwa ne ludo zwi shingisiwe ne zila ya ka fanila. Ha ti lakidzila, mu shango dzingwe, ba ka shingisa mari e ku sa ruela likhetho mu zwithu zwingwe ne zila ya ka fanila. Dziofisi dze matabi dza ka shingidzana ku shingisa mari mashomanana ne ku tenga zwithu ne bunjinji ili chi sa ka jwaeleka.Be Dziofisi dze matabi ne be Global Purchasing Department ba ka be be tenga zwithu ku dwa kwa zwi no thamiwa, ichecho chi be chi tapudza dzichinyikilo dze ku tenga zwithu ne ku zwi yesa kwa zwi no shakika ne nako.

“Ku Bakiligwa Kwa Nda ka be Ndi Sheta”

Ku thama kuti Dziholo Dze Bushe dzi be mu chimo cha ka lulwamila ku shingisiwa, kwa ka thama kuti bathu ba zwihwe ba ka bakiligwa ne ku gadzikanya moyo ba ka be be zha ku zwidiyo zwe gubungano. Dulcine, azwadzi we ku Peru, u no leba kuti wa ka be a ka “tshuganyana” ha e hwa kuti to wobe ti gwilila ku Holo ye Bushe. “Nda ka ngingwa ne COVID-19 chinyolocho shule koga kwe ku tangisa kwe bugwele. Ngono nda ka be ndi cha ku yenda ku Holo ye Bushe, ndi kumbula kuti ndi nga na ndi ka ngingwa ne bugwele kakale. Ngono nda kati ndi swika ku Holo ye Bushe, ha lemuga kuti bakugwana ba ka thama zwithu zwi njinji ku bakilila bathu, zwi nonga pa no nguligwa maboko ne dzi-boom pole dze dzimicrophone, ne zwi no shingisiwa ku sanitaiza holo ku sathu ku ka ngingwa ne ku budiwa mu zwidiyo zwe gubungano. Kose ikoko kwa ka thama kuti ndi zwihwe nda ka bakiligwa.”b

Sara, azwadzi we ku Zambia, u no leba kuti, wa ka be ne mathatha awe bo: “Mu mingwedzi ya ka pinda, nlume wangu wa ka bulawa ne COVID-19. Nda ka be ndi zwibuzwa kuti ndowo toleka chini ha ndi yenda ku zwidiyo zwe gubungano ili gwe kutanga ndi si naye.” Ngwenu u no zwihwa chini ha e yenda ku zwidiyo zwe gubungano? U no leba kuti: “Zwidiyo zwe gubungano zwa ka ndi lakidza kuti Jehova u naswi mu mazhuba iyawa e bupelo. Pezhugwi kwa ikoko, ku pinda mu zwibaka zose, ndo duma kuti ndo kulumbidziwa, ku diwa, ne ku bona batsho ya ndi no sheta mu bakugwana ne mu bazwalani ne dziazwadzi.”

Bazwalani bedu ba no dika mu shango yose ba no shathila ku gwilila ku Dziholo Dze Bushe. To bokela zwipo zwenyu zwi no dusiwa ne ludo, bunji gwazo ili zwa ka dusiwa ku shingisiwa donate.jw.org. Zwipo izwezwi zwa ka ti batsha ku thama kuti mbako dze namato ye malebeswa dzi be dze mamo a ka fanila ne ku bakiligwa ku shanganila mu dzili.