A wa ka tongo kumbula ku bala Baibili ngono u bo zhigwa ne mikumbulo i no nga iyeye? Mu banjinji, ku bala Baibili ko ba tshusa. Ngono ku ingwi ha u nga zibisiwa kuti Baibili i nga ku batsha ku shatha ne ku chila buchilo gu na mazwimisilo? Ngono u nga tini ha u nga ziba kuti ku na dzingwe zila dze ku bala Baibili dzi nga thama kuti u i shathile kwazo? A wa bo u nga duma ku bona kuti Baibili i nga ku batsha chini?

Bona ne bufutshwanana koga kuti bangwe ba ka lebani ha ba si no ku tangisa ku bala Baibili.

Ezekiel, u na makole a nga bo 20, a kati: “Mu chibaka cha ka pinda, nda ka ndi fanana ne nthu u no draiva koloi a si nga zibe kwa a no yenda. Ngono ku bala Baibili kwa ka ndi batsha ku chila buchilo gu na mazwimisilo. I no ndi kumbuludza kuti ndi nga chila chini zhuba ne zhuba.”

Kakale Frieda, u na makole a nga bo 20, u no thalusa e ti: “Nda ka ndi tinega ka bonako. Ngono ku bala Baibili, kwa ka ndi batsha kuti ndi khone ku laula mazwihwo angu. Ichecho cha ka thama kuti ndi khone ku shingidzana zwibuyanana ne bangwe, ngono nda bo ne bakhwinya banjinji ngwenu.”

Nkadzi u no yi Eunice u na makole a nga pinda 50 wa ka leba e ti ne kwe Baibili, “Ya ka ndi batsha ku be nthu u butuka, ne ku shandula mazwibato angu.”

Se kwa kwa ka leba babali ibaba ne bangwe ba no pinda dzimiliyoni, ku bala Baibili ku nga ku batsha kuti u chile buchilo gu no shathisa kwazo. (Izaya 48:17, 18) Zwingwe zwa i nga ku batsha nazo, wu ku ku batsha mu ku (1) tola thambo dza ka lulwama, (2) be ne bakhwinya be malebeswa, (3) lingisana ne stress, ngono (4) pezhugwi kwe zose, ku zwidiya malebeswa ne kwe Ndzimu. Chi no kumbuludziwa ne Baibili cho dwa ku Ndzimu, ndizo ha u i shingisa zwithu zowo ku yendila zwibuyanana. Ndzimu ha u to tongo kumbuludza ne zila i sa ka lulwama.

Chithu chikulu wu tangisa ku i bala. I zwithu zwipi zwi nga thama kuti ku tangisa ku i bala ku si tongo ku simila ngono ku ku shathise kwazo?

Ini chi nga ku batsha ku shathila ku bala Baibili ne kuti i ku batshe kwazo? Bona zwithu zwili 5 zwa ka batsha bangwe.

Gala mu ndawo ya ka lulwama. Shaka pangwe pa si na zhoba. Dusa zwithu zwi nga ku loba zebe ha u bala. Gala pa na chedza ne pa na phepo mbuyanana i nga ku batsha kuti u hwisise cha u no bala.

Gadzikana mu nkumbulo. Ne kuti Baibili i no dwa ku na Tate bedu ba kudzimu, i nowo ku batsha kwazo ha ili kuti u no i bala wa ka zwibiga mu chimo che ngwana ntukununu wa ka zwimisila ku zwidiya mu bazwadzi babe ba na ludo. Ha ili kuti mu nkumbulo uwo u na mikumbulo i sa ka lulwama ne kwe Baibili, gwisa ku i dusa mu nkumbulo uwo kuti u diyiwe ne Ndzimu.​—Pisalema 25:4.

Tembezela u sa thu u ka tangisa ku bala Baibili. Ne kuti Baibili i na mikumbulo ye Ndzimu, a ti zo fanila chenamisiwa ne kuti ta ka fanila kumbila batsho iye kuti ti i hwisise. Ndzimu u no thembesa ku pa ‘meya yakayengemala ibabo banobakumbila!’ (Luka 11:13) Meya ya ka yengemala i nga ku batsha ku hwisisa nkumbulo we Ndzimu. Shule kwe chibaka, i nowo zhula nkumbulo uwo kuti u hwisise “zwithu zwimukatikati zwe Ndzimu.”​—1 Bakorinta 2:10.

Bala u hwisisa. U si tongo balila ku pedza cha u no bala koga. Dwilila u kumbula ne kwe cha u no bala. Zwibuzwe dzibuzo dzi no nga yedzi: ‘I buthu gupi gwa ndi no bona mu nthu wa ndi no bala ne kukwe? Ndi nga shingisa ichechi chini mu buchilo gwangu?’

Zwibigile mazwimisilo a ka lingisana. Kuti ku bala Baibili ku ku batshe, zwimisile ku zwidiya chingwe chi nga ku batsha ne malebeswa mu buchilo. U nga na u ka zwibigila mazwimisilo a no nga iyawa a no tobela: ‘Ndo shaka ku zwidiya kwazo ne kwe Ndzimu.’ ‘Ndo shaka ku be nthu u butuka, nlume u butuka kene nkadzi u butuka.’ Ku dwa po u bo u shalula ndimana dzi mu Baibili dzi nga ku batsha ku thama mazwimisilo iyawo.a

Zwithu izwezwi zwili 5 zowo ku batsha kuti u tangise ku bala Baibili. Ngono ini chi nga na chi ka thama kuti ku bala Baibili ku ku shathise kwazo? Nsholo u no tobela u no lakidza zwingwe zwi nga batsha.

Ko nyadza? Kene ko shathisa? Ku bala Baibili ko ku tola chini? Kowo dwa koga mu kuti u no i tangisa chini ku i bala. A ti bone kuti ini chi nga thama kuti i ku shathise kwazo ne ku ku zipila.

Shalula shandulilo i no thembeka, ye ndebo ya ngwenu. Ha u bala nkwalo u na matama manjinji a ka sima kene a ntolo a u si nga zibe, ha u nga shathisiwe ne ku u bala. Ndizo shaka Baibili i no shingisa ndebo i sa ka sima ya u no hwisisa i nowo ku kutha moyo. Nenguba kwa ka jalo, ya ka fanila kuti i be ya ka shanduligwa ne malebeswa wose.a

Shingisa technology ya ngwenu. Ngwenu Baibili a te ili yapo ili buka koga, ngono kakale iyapo ili soft copy. Dzingwe Dzibaibili dzi nga bagwa online kene dzi nga baligwa mu dzikhomputara, dzitabuleti, kene dzi-cell phone. Dzingwe dzishandulilo dzi na dzithulusi dzi no thama kuti u khone ku bona ka bonako dzindimana dze Baibili dze khani ya u no bala, kene dumbu ne ku fanidzanya dzindimana dze dzishandulilo dzingwe. Ha u shaka ku hwilila Baibili pana ku bala, u nga hwilila ya ka rekhodiwa. Bathu banjinji ba no shathila ku hwilila Baibili ha ba ka tatha bazi, be suka, kene be shinga mishingo ingwe. U nga zwishalulila zila ya ka ku lulwamila.

Shingisa dzithulusi dze ku zwidiya Baibili. Dzithulusi dze ku zwidiya Baibili dzi nga ku thusa kuti u zwidiye kunjinji kwazo ne kwe cha u no bala. Ku na dzimmepe dze ndawo dzi mu Baibili, dzi no ku batsha ku bona ndawo dza u no bala ne kwadzo, ne thama kuti u hwisise chi no legwa zwibuyanana. Dzi-article dzi nonga dzi mu magazini iwoyu, kene dzi mu section ye “Zwidiyo zwe Baibili” mu website ye jw.org dzi nga ku batsha kuti u shakisise ku hwisisa zwinjinji zwi no legwa mu Baibili.

Shingisa zila dzi si nga fanane. Ha ili kuti ku bala Baibili yose kwa ka ku simila, ini u si nga tangise ne ku bala ne kwe cha u no da kwazo mu Baibili? Ha ili kuti u no shaka bona bathu ba no zigwa kwazo mu Baibili, ini u singa tangise ne ku bala ne kwe bathu ba no legwa mu Baibili. Chilakidzilo cha u nga shingisa chi mu bokisi ye “Shakisisa mu Baibili ku Ziba ne Kwe Bathu ba no Legwa mu Ili.” Kene pangwe u no shaka ku bala Baibili u shingisa misholo yayo kene ne kuti zwithu zwa ka shingikala ne ku tobedzana chini. U nga na u ka shingisa ingwe ye zila idzedzi.

Baibili a te i li buka koga. I no lakidza kuti Mbumbi wedu u no ti kumbuludza chini. (2 Timoti 3:16) Nlayetsa wayo u nga ti sendedzela ne zila ya ka lulwama kwazo. Dumbu, Baibili i kati: ‘Dama le Ndzimu lo chila, kakale li na masimba.’ (Bahebera 4:12) Li na masimba e ku shandula machilo edu ne zila mbili hwulu​—lo ti tungamila mu buchilo gwedu gwe zhuba ne zhuba, ne ku ti batsha ku ziba Ndzimu kose ne dzithembiso dzidze.​—1 Timoti 4:8; Jakuba 4:8.

I no ku batsha mu buchilo gugo ngwenu. Baibili i nga ku batsha mu khani dzidzo ne bukuko. I no kumbuludza mu khani dzi no tobela.

• Ku shingidzana ne bangwe.​—Baefeso 4:31, 32; 5:22, 25, 28, 33.

• Mazwiwo ne mamuko.​—Pisalema 37:8; Zwiani 17:22.

• Mazwibato.​—1 Bakorinta 6:9, 10.

• Khani dze ikhonomi.​—Zwiani 10:4; 28:19; Baefeso 4:28.a

Nsha we bathu ba chi bachechana ku Asia wa ka bokela chi no kumbuludziwa ne Baibili kwazo. Se bathu ba cha dwa pa lobolana banjinji, ba ka ba ka simigwa ne ku shingidzana ne buthu gwabo gu si nga fanane, kose ne ku lebesana ba ka shaladuka. Ngono ba ka simolola ku shingisa cha ba ka be be bala mu Baibili. Kwa ka pelela neni? Nlume Vicent, a kati: “Cha nda ka bala mu Baibili cha ka ndi batsha kuti ndi shingidzane ne mathatha e nsha wedu ne ludo. Ku shingisa Baibili kwa ka thama kuti ti shathe.” Nkadzi uwe, Annalou, u no duma e ti: “Ku bala ne kwe zwilakidzilo zwi mu Baibili kwa ka ti batsha. Ngwenu nda ka shatha ne gadzikana mu ndobolo yedu, kakale ti na mazwimisilo mu buchilo gwedu.”

I no ku batsha ku ziba Ndzimu. Pezhugwi kwe cha a ka leba ne kwe ndobolo, Vicent wa ka leba kakale e ti: “Ku bala Baibili kwa ka thama kuti ndi zwihwe ndi li pejo kwazo na Jehova ngwenu.” Cha ka legwa na Vicent cha ka temelela mu khani hwulu i no ti​—Baibili i nga ku batsha ku ziba Ndzimu. Ku thama u jalo, a ku towo thama kuti u batshiwe ne chi no kumbuludziwa ne Ndzimu koga, ngono kakale u nowo ela njele kuti u nga nziba se nkhwinya uwo. Ngono u nowo bona kuti ku na kunjinji kwa a no lakidza ne kwe chibaka chi no zha chi butuka, mu chibaka cha u nowo shathila “butjilo gwe malebeswa”​—gu nowo galila cha chose. (1 Timoti 6:19) Akuna ingwe buka i nga thembesa cha ka jalo.

Ha u nga tangisa ku bala Baibili ngono u bo u si nga mise ku i bala, nawe bo i nga ku batsha​—ku ku batsha mu buchilo gugo ngwenu kose ne ku ziba Ndzimu. Ne kwa ka jalo, ha u bala Baibili, u nga na u ka be ne dzibuzo dzinjinji. Ngono ha u nadzo, kumbula cha ka naka cha ka thamiwa ne nlume wa ka e shinga mu mbuso we Itopiya wa ka e chila mu makole a li 2 000 a ka pinda. Wa ka a na dzibuzo njinji ne kwe Baibili. Ha e buzwiwa kuti a u no hwisisa cha a ka e bala, wa ka shandula e ti: “Ndingahwisisa tjini kusina unonditjenesela kene?”b Ku dwa po wa ka shathila ku amuchila batsho ku dwa mu na Filipo, nngwe we badiyiwana be kutanga ba Jesu, wa ka e hwisisa Baibili. (Mishingo 8:30, 31, 34) Ne zila i no fanana, ha u shaka ku ziba kwa ka paphidzika ne kwe Baibili, to ku laletsa kuti u zhadze fomo online mu www.jw.org kene u kwalile ku adiresi i pejo nawe, mu na dza ka lakidziwa mu magazini iwoyu. Kakale u nga na u ka bona Bafakazi ba Jehova ba pejo nawe kene u nga yenda ku Holo ye Bushe i mu ndawo yenyu. Ini u si nga bale Baibili nasi ngono u leche kuti i ku batshe mu buchilo gugo?