Apa Bafakazi ba Jehova ba no Pkhwanya Misha Kene ba no i Baka?

Se Bafakazi ba Jehova, to gwisa ku baka misha, misha yedu ne ye ba ti gele nabo. To hlonipha Ndzimu se Nthami we ndongoloso ye nsha. (Genesisi 2:21-24; Baefesiya 3:14, 15) Mu Baibili, u no diya milayontewo ya ka batsha bathu mu shango yose ku be ne ndobolo dza ka sima ne dza ka shatha.

Se Kwa Bafakazi ba Jehova be Kudza Misha ya ka Sima

To thama kose kwa ti no khona ku tobela milayo ye Baibili, ne kuti ko ti batsha ku be balume, bakadzi, ne bazwadzi ba butuka. (Zwiani 31:10-31; Baefesiya 5:22–6:4; 1 Timoti 5:8) Buchenjedu gu no wangwa mu Baibili go batsha ne misha i singa dumile chi no fanana ku dwilila. (1 Pita 3:1, 2) Yela njele zwa ka legwa ne bangwe ba si Bafakazi ba Jehova ba ka pelela ba ba ka lobolana nabo be be Bafakazi ba Jehova:

• “Makole edu ali 6 e kutanga e ndobolo a ka be ali zhele nghwa ne ku hwa zogwadza. Shule kwe kuti Ivete a be nngwe we Bafakazi ba Jehova, wa ka be ne ludo gwa ka paphidzika ne moyonlefu. Ku shanduka kukwe kwa ka batsha nsha wedu.”​—Clauir, we Brazil.

• “Nda ka be ndi singa de ha nlume wangu, Chansa, e tangisa ku zwidiya Baibili ne Bafakazi ba Jehova, ne kuti nda ka be ndi kumbula kuti ba no pkhwanya misha. Chinga kwa ipapo, nda ka bona kuti Baibili ya ka batsha ndobolo yedu.”​—Agness, we Zambia.

Mu nshingo wedu we ku rera, to lakidza ba ti gele nabo se kwa ku shingisa buchenjedu gu no wangwa mu Baibili gu nga ba batsha ku

• Shalula nkhwinya we ndobolo zwibuyanana

• Dzibila ku pkhwayika kwe ndobolo mu gole le kutanga

• Shingidzana na botezwali

• Shingisa mari zwibuyanana

• Misa manganga

• Zwidiya ku zwibatigwa

• Diya bana

Apa ku fulukila ku budumili gungwe ku nga thama kuti nsha u thubukane?

Malebeswa ose, kwa ka jalo mu zwibaka zwingwe. Ha ti lakidzila, ne 1998 mbiko ye komponi i no shakisisa ye Sofres ya ka wana ili kuti ndobolo i ngompela mu na dzili 20 dzi na Mfakazi dza ka be ne mathatha makulukulu ha nngwe wa khona a ka be e be Mfakazi.

Jesu wa ka lebela mbeli kuti ba no tobela zwidiyo zwizwe ba nowo be ne mathatha e nsha mu zwibaka zwingwe. (Matewu 10:32-36) Nchenjedu we History Will Durant wa ka yela njele kuti mu Mbuso we Roma, “Bukirisiti gwa ka bigwa nlandu we ku pkhwanya misha,”a ngono bangwe be Bafakazi ba Jehova ngwenu ba no bigwa nlandu u no fanana. Apa ikoku ko dwa kuti Mfakazi ndiye u no be a na nlandu?

Ha ku athugwa khani ye kuti Bafakazi ba Jehova ndibo ba no pkhwanya misha, European Court of Human Rights i kati ba no be ba si Bafakazi ba Jehova mu nsha ndibo ba no thama mathatha e ku lamba “ku amuchila ne ku hlonipha ku zwi shalulila budumili kwe makamu abo ba ka sununguka.” Court ya ka dwilila i ti: “Chimo ichechi cha ka jwayeleka mu ndobolo dzose dze budumili gu singa fanane, kose ne mu ndobolo dzi na Bafakazi ba Jehova pa singa dumiwe chi no fanana.”b Ne ba ka lingisana ne ku sa amuchigwa kwe budumili gwabo, Bafakazi ba Jehova ba no gwisa ku tobela nlayo we Baibili u noti: “Musibgwilizile nge tjakabipa. . . . Ha kutubuka muna se kwa munobona, tjilani nge kunyalala ne mmwe ne mmwe.”​—Baroma 12:17, 18.

Ku be Bafakazi ba Jehova be duma kuti ba ka fanila lobolana mu budumili gwabo koga

Bafakazi ba no shingisa nlayontewo we Baibili u noti ba lobole koga “Nkirisiti,” ku no dwa, ku lobolana kwe ba no duma chi no fanana. (1 Bakorinta 7:39) Ndawulo iyeyi nde ye Baibili kakale i no shinga. Ha ti lakidzila, Journal of Marriage and Family ye 2010 ya kati “bathu ba ka lobolana ba mu budumili gu ngompela, be mishingo i no fanana, ne ku dumila chi no fanana” ba no be ne ku shingidzana kwa ka lulwama kwazo.c

Ne kwa ka jalo, Bafakazi ha ba to kulumbidza we budumili gwabo ku thubukana ne wa a ka lobolana naye u si Mfakazi. Baibili i noti: “Ha ikamu tjina nkadzi u si n‘galimoyo ngono iwoyu nkadzi e duma kugala naye, ngaasinlambe. Ha nkadzi ana nlume usi n‘galimoyo koga e duma kugala naye ngaasinlambe.” (1 Bakorinta 7:12, 13) Bafakazi ba Jehova ba no hwa ndawulo iyeyi.